Kien Ġesù Qed Jirreferi għan-​Nar taʼ l-​Infern?

XI WĦUD li jemmnu bid-​duttrina tan-​nar taʼ l-​infern jirreferu għall-​kliem taʼ Ġesù mniżżel f’Marku 9:48 (jew versi 44, 46). Hu semma d-​dud li ma jmutx u n-​nar li ma jintefiex. Kieku xi ħadd jistaqsik dwar dan il-​kliem, kif twieġbu?

Skond liema verżjoni tal-​Bibbja tkun qed tintuża, individwu jistaʼ jaqra versi 44, 46, jew 48, għaliex dawn il-​versi huma simili f’xi verżjonijiet tal-​Bibbja.a It-​Traduzzjoni tad-​Dinja l-​Ġdida taʼ l-​Iskrittura Griega Kristjana tgħid: “Jekk għajnek tfixklek, armiha; ikun aħjar għalik li tidħol b’għajn waħda fis-​saltna t’Alla milli jixħtuk b’għajnejk it-​tnejn f’Geħenna, fejn id-​dud tagħhom ma jmutx u n-​nar ma jintefiex.”—Mk. 9:47, 48.

Hu x’inhu l-​każ, xi wħud isostnu li l-​istqarrija taʼ Ġesù tappoġġa l-​idea li wara l-​mewt l-​erwieħ tal-​ħżiena jibqgħu jsofru għal dejjem. Per eżempju, kumment fis-​Sagrada Biblia Spanjola taʼ l-​Università taʼ Navarre jgħid: “Il-​Mulej tagħna juża [dan il-​kliem] biex jirreferi għat-​turmenti taʼ l-​infern. Spiss ‘id-​dud li ma jmutx’ hu spjegat bħala r-​rimors etern li jħossu dawk fl-​infern; u ‘n-​nar li ma jixbax,’ bħala l-​uġigħ fiżiku tagħhom.”

Madankollu, qabbel il-​kliem taʼ Ġesù maʼ l-​aħħar vers tal-​profezija taʼ Isaija.b Ma jidhirx ċar li Ġesù kien qed jalludi għat-​test f’Isaija kapitlu 66? Hemmhekk, il-​profeta jidher li kien qed jirreferi għal ħruġ “minn Ġerusalemm lejn il-​Wied taʼ Ħinnom (Geħenna) li kien hemm madwarha, fejn darba kienu jiġu offruti n-​nies bħala sagrifiċċju (Ġer 7:31) u li maż-​żmien sar il-​miżbla tal-​belt.” (The Jerome Biblical Commentary) Jidher ċar li s-​simboliżmu li jintuża f’Isaija 66:24 ma jirrappreżentax nies li qed jiġu torturati; jitkellem dwar iġsma mejtin. Dak li qed jirreferi għalih bħala li ma jmutx huwa d-​dud—mhux bnedmin ħajjin jew erwieħ immortali. Allura, xi jfisser kliem Ġesù?

Innota l-​kumment f’Marku 9:48 fil-​kitba Kattolika El evangelio de Marcos. Análisis lingüístico y comentario exegético, it-​tieni Volum: “[Il-]frażi hija meħuda minn Isaija (66,24). Hemmhekk il-​profeta juri żewġ modi kif ġeneralment kienu jiġu meqrudin l-​iġsma mejtin: billi jitħallew jitħassru jew billi jinħarqu . . . F’dan il-​vers il-​fatt li d-​dud u n-​nar jissemmew ħdejn xulxin isaħħaħ l-​idea taʼ qerda. . . . Iż-​żewġ forzi qerridin huma deskritti bħala permanenti (‘ma jintefiex, ma jmutx’): sempliċement m’hemm ebda mod kif tistaʼ taħrabhom. F’din id-​deskrizzjoni, l-​uniċi affarijiet li jibqgħu ħajjin huma d-​dud u n-​nar—mhux il-​bniedem—u t-​tnejn li huma jeqirdu kompletament kulma jiġi quddiemhom. Għalhekk, din mhix deskrizzjoni taʼ turment taʼ dejjem, imma taʼ qerda totali li, peress li ma tħallix l-​irxoxt iseħħ, hi ekwivalenti għal mewt finali. Mela [in-nar] hu simbolu taʼ qerda.”

Kulmin jaf li l-​Alla l-​veru hu kollu mħabba u ġust għandu jkun jistaʼ jara kemm hu raġunevoli li l-​kliem taʼ Ġesù jinftiehem b’dan il-​mod. Hu ma kienx qed jgħid li l-​ħżiena se jesperjenzaw turment etern. Pjuttost, huma qegħdin fil-​periklu taʼ qerda totali li minnha ma jkollhomx irxoxt.

[Noti taʼ taħt]