Minn Seder Għal Salvazzjoni

“Il-​kies tas-​salvazzjoni grandjuża se nieħu, u l-​isem taʼ Jehovah se nsejjaħ.”—SALM 116:13.

1. Liema għanja favorita f’kull żmien tistaʼ teffettwa l-​futur tiegħek?

KIF se tħares lejn għanja li titratta dwar futur twil u hieni għalik? Fil-​fatt, għanja bħal din tkun il-​favorita tiegħek għal dejjem. Madankollu, int qiegħed f’pożizzjoni aħjar mill-​biċċa l-​kbira tan-​nies biex tifhem u tgawdi din il-​għanja taʼ tifsir. Il-​Lhud isejħulha Ħallel (Tifħir). Komposta minn Salmi 113 sa 118, hija tħeġġiġna biex inkantaw “Ħalleluljah,” jew “Faħħru lil Jah.”

2. Din il-​għanja kif tintuża, u kif għandha x’taqsam mas-​Seder?

² Il-​Lhud ikantaw il-​Ħallel fis-​servizz tagħhom tal-​Qbiż; u milli jidher dan il-​kant imur lura saż-​żmien meta Alla kellu tempju fejn l-​annimali kienu jiġu ssagrifikati. Illum, jitkanta fid-​djar tal-​Lhud matul is-​servizz u l-​ikla tal-​Qbiż imsejħa s-​Seder. Iżda ftit minn dawk li jkantawha fis-​Seder tagħhom jifhmu s-​sinjifikat veru taʼ Salm 116:13: “Il-​kies tas-​salvazzjoni grandjuża se nieħu, u l-​isem taʼ Jehovah se nsejjaħ.” Għala, iżda, hija s-​salvazzjoni marbuta mal-​Qbiż, u jistaʼ jkun li s-​salvazzjoni tiegħek hija nvoluta?

Il-​Qbiż—Festa taʼ Salvazzjoni

3. Kif żviluppa s-​Seder?

³ Ftakar li l-​Iżraeliti kienu rsiera fl-​Eġittu taħt Farawni oppressiv. Fl-​aħħar, Jehovah qajjem lil Mosè biex imexxi lill-​poplu Tiegħu għall-​ħelsien. Wara li Alla ġab disaʼ kastigi fuq l-​Eġittu, Mosè ħabbar il-​għaxar wieħed. Jehovah kien se joqtol l-​ewwel imwieled f’kull dar Eġizzjana. (Eżodu 11:1-10) L-​Iżraeliti, iżda, setgħu jinħelsu. Kif? Huma kellhom joqtlu nagħġa, ipoġġu d-​demm tagħha fuq il-​koxox u l-​blata tal-​bieb, u jibqgħu ġewwa jieklu ikla taʼ ħaruf, ħobż bla ħmira, u ħxejjex morri. Matul dak is-​Seder, Alla kien se “jaqbeż” mingħajr ma joqtol l-​ewwel imwieled tagħhom.—Eżodu 12:1-13.

4, 5. Il-​Qbiż kif wassal għal salvazzjoni għal ħafna? (Salm lO6:7-lO)

⁴ Bi tweġiba għal dan il-​għaxar kastig, Farawni qal lil Mosè: “Qumu, oħorġu minn ġo nofs il-​poplu tiegħi, kemm intom u kemm l-​ulied l-​oħra taʼ Iżrael, u morru, aqdu lil Jehovah.” (Eżodu 12:29-32) Wara li l-​Ebrej u “kumpanija vasta mħallta” taʼ simpatizzanti telqu, Farawni biddel ħsiebu u telaq għal warajhom biex jaqbadhom. Alla mbagħad b’mod mirakoluż għen lill-​poplu tiegħu biex jaħrab minn ġol-​Baħar l-​Aħmar, fejn Farawni u l-​armata tiegħu li kienu qed jiġru warajhom mietu.—Eżodu 12:38; 14:5-28; Salm 78:5l-53; 136:13-15.

⁵ Mosè qal lil Iżrael ħdejn il-​Baħar l-​Aħmar: “Tibżgħux. Żommu sodi u araw is-​salvazzjoni taʼ Jehovah, li hu se jwettaq għalikom illum.” Iktar tard kantaw: “Saħħti u s-​setgħa tiegħi hu Jah, ladarba jservi għas-​salvazzjoni tiegħi. Dan hu Alla tiegħi, u jien se nfaħħru.” (Eżodu 14:13; 15:2) Iva, il-​ħelsien taʼ Iżrael, sew mill-​għaxar kastig u kemm mill-​Baħar l-​Aħmar, kien salvazzjoni. B’mod tajjeb setaʼ s-​salmista jiddeskrivi lil Jehovah bħala Alla li “jwettaq salvazzjoni grandjuża f’nofs l-​art.”−Salm 68:6, 20; 74:12-14; 78:12, 13, 22.

6, 7. Għala twaqqaf il-​Qbiż, madankollu għala issa jinżamm b’xi differenzi mill-​ewwel Qbiż?

⁶ L-​Ebrej kellhom iħarsu l-​Qbiż bħala mafkar taʼ salvazzjoni. Alla qal: “Dan il-​jum irid iservi bħala mafkar għalikom, u tridu tiċċelebrawh bħala festa għal Jehovah tul il-​ġenerazzjonijiet tagħkom.” (Eżodu 12:14) F’kull ikla tal-​Qbiż, jew Seder, il-​missier ried ifakkar lill-​familja tiegħu dwar dik is-​salvazzjoni. Jehovah ta d-​direzzjoni: “Meta wliedkom igħidulkom, ‘X’ifisser dan is-​servizz għalikom?’ imbagħad intom tridu tgħidulhom, ‘Huwa s-​sagrifiċċju tal-​qbiż għal Jehovah, li qabeż id-​djar taʼ wlied Iżrael fl-​Eġittu meta kkastiga lill-​Eġizzjani, iżda ħeles lil djarna.’”—Eżodu 12:25-27.

⁷ Li l-​Lhud sal-​ġurnata tal-​lum jagħmlu s-​Seder tal-​Qbiż jikkonferma kemm huwa storiku dak ir-​rakkont. Xi wħud mid-​drawwiet tagħhom, iżda, ivarjaw mid-​direzzjonijiet li ta Alla. The Origins of the Seder igħid: “Il-​Bibbja tinkludi diskussjonijiet estensivi dwar il-​Qbiż u l-​Festa tal-​Għażżmi; madankollu, dawn id-​deskrizzjonijiet ma jaqblux maʼ osservanzi iktar riċenti tal-​festa. B’mod partikulari, ir-​rit Bibliku jiċċentra fuq is-​sagrifiċċju tal-​Qbiż, li f’letteratura taʼ wara l-​era Biblika ma jibqax jokkupa pożizzjoni ċentrali.” Raġuni ewlenija hi li l-​Lhud jonqoshom tempju għal sagrifiċċji tal-​annimali.

8. Liema raġuni speċjali għandna aħna biex nikkunsidraw il-​Qbiż?

⁸ Il-​Kristjani jistgħu bi profitt jistudjaw il-​festi kollha li ta Alla lil Iżrael tal-​qedema, iżda għal issa ċerti aspetti tal-​Qbiż jixirqilhom l-​attenzjoni tagħna. Ġesù, li kien Lhudi, ħares il-​Qbiż. Fl-​aħħar okkażjoni li għamel dan, hu waqqaf l-​unika ċelebrazzjoni divina għall-​Kristjani—l-​Ikla taʼ fil-​Għaxija tal-​Mulej, il-​Mafkar tal-​mewt taʼ Ġesù. Għalhekk din iċ-​ċelebrazzjoni Kristjana hi marbuta mal-​Qbiż.

Iżjed Minn Ħaruf tal-​Qbiż

9, 10. Il-​ħaruf tal-​Qbiż kif kien sagrifiċċju speċjali, jew uniku?

⁹ Ebrej 10:1 igħidilna li ‘l-​Liġi kienet dell tal-​affarijiet tajbin li għandhom jiġu.’ Is-​Cyclopedia of Biblical, Theological, and Ecclesiastical Literature, minn M’Clintock u Strong, tgħid: “L-​ebda dell ieħor taʼ affarijiet tajba li jridu jiġu li kien fiha l-​liġi ma jistaʼ jħabbatha mal-​festa tal-​Qbiż.” B’mod partikulari l-​ħaruf tal-​Qbiż għandu tifsir li estenda lil hinn miċ-​ċerimonja li tfakkar kif Alla salva lill-​ewwel imwieled u mbagħad lill-​Ebrej kollha minn ġol-​Eġittu.

¹⁰ Dak il-​Ħaruf kien uniku f’għadd taʼ aspetti. Per eżempju, ħafna sagrifiċċji tal-​annimali tal-​Liġi taʼ Mosè kienu preżentati minn individwu wieħed f’konnessjoni maʼ dnubiet jew ħtija persunali, u partijiet mill-​annimali kienu jinħarqu fuq l-​artal. (Levitiku 4:22-35) Xi laħam mill-​offerta tal-​Komunjoni kien jingħata lill-​qassis li jikkonduċi ċ-​ċerimonja jew lil qassisin oħra. (Levitiku 7:11-38) Madankollu, il-​ħaruf tal-​għid, jew tal-​Qbiż, ma kienx jiġi wżat fuq l-​artal, u kien offrut minn grupp taʼ nies, normalment minn familja, li kienu dawk li jikluh.—Eżodu 12:4, 8-11.

11. X’kienet il-​ħarsa taʼ Jehovah rigward il-​ħaruf tal-​Qbiż, u lejn xiex kien jindika? (Numri 9:13)

¹¹ Jehovah kien jistma l-​ħaruf tal-​Qbiż b’tant valur għoli li hu sejjaħlu “s-​sagrifiċċju tiegħi.” (Eżodu 23:18; 34:25) Studjużi qalu li “s-​sagrifiċċju tal-​għid kien is-​sagrifiċċju taʼ Jehovah per eċċellenza.” Dan il-​ħaruf bla dubju kien jindika lejn, jew jikkaratterizza is-​sagrifiċċju taʼ Ġesù. Dan nafuh għaliex l-​appostlu Pawlu sejjaħ lil Ġesù “il-​qbiż tagħna [li] ġie ssagrifikat.” (1 Korintin 5:7) Ġesù ġie identifikat bħala “l-​Ħaruf t’Alla” u “l-​Ħaruf li nqatel.”−Ġwann 1:29. Rivelazzjoni 5:12; Atti 8:32.

Demm Li Jsalva l-​Ħajja

12. X’parti kellu d-​demm tal-​Ħaruf fl-​ewwel Qbiż?

¹² Lura fl-​Eġittu d-​demm tal-​Ħaruf kien ċentrali għas-​salvazzjoni. Meta Jehovah qatel lill-​ewwel imwieled, Hu qabeż id-​djar fejn kien hemm id-​demm fuq il-​koxox tal-​bieb. Ukoll, billi l-​Ebrej ma kinux vistużi minħabba l-​mewt tal-​ewwel imwieled tagħhom huma kienu f’qagħda li jimmarċjaw minn ġol-​Baħar l-​Aħmar lejn il-​ħelsien.

13, 14. Id-​demm taʼ Ġesù kif isalva l-​ħajja u neċessarju għas-​salvazzjoni? (Efesin 1:13)

¹³ Id-​demm ukoll huwa nvolut għal salvazzjoni llum—id-​demm imxerred taʼ Ġesù. Meta “l-​qbiż, il-​festa tal-​Lhud, kien qrib” fit-​32 E.K., Ġesù qal lil udjenza kbira: “Dak li jiekol minn laħmi u jixrob demmi għandu l-​ħajja taʼ dejjem, u jien se nirxoxtah fl-​aħħar jum, għax laħmi huwa ikel veru, u demmi xorb veru.” (Ġwann 6:4, 54, 55) Dawk il-​Lhud kollha li semgħuh żgur li kellhom f’moħħhom il-​Qbiż li kien qorob u li demm taʼ ħaruf kien użat fl-​Eġittu.

¹⁴ Ġesù ma kienx hemm qed jiddiskuti dwar l-​emblemi wżati fl-​Ikla taʼ fil-​Għaxija tal-​Mulej. Dik iċ-​ċelebrazzjoni ġdida għall-​Kristjani ma ġietx imwaqqfa qabel sena wara, għalhekk saħansitra l-​appostli li semgħu lil Ġesù fit-​32 E.K. ma kienu jafu xejn dwarha. Xorta waħda, Ġesù kien qed juri li demmu kien essenzjali għal salvazzjoni eterna. Pawlu spjega: “Permezz tiegħu għandna l-​ħelsien b’rahan permezz tad-​demm taʼ dak, iva, il-​maħfra tad-​dnubiet tagħna, skond ir-​rikkezzi tal-​qalb tajba mhix mistħoqqa tiegħu.” (Efesin 1:7) Huwa biss permezz tal-​maħfra fuq il-​bażi tad-​demm taʼ Ġesù li aħna nistgħu ngħixu għal dejjem.

Liema Salvazzjoni u Fejn?

15. Għall-​Ebrej fl-​Eġittu, liema salvazzjoni u privileġġi saru possibbli, u x’ma kienx possibbli? (1 Korintin 10:l-5)

¹⁵ Kienet biss salvazzjoni limitata nvoluta fl-​Eġittu tal-​qedem. L-​ebda wieħed li ħalla l-​Eġittu ma stenna li jingħata ħajja bla tmiem wara l-​Eżodu. Veru, Alla ħatar il-​Leviti biex ikunu qassisin għall-​ġens, u xi wħud mit-​tribù taʼ Ġuda saru slaten temporali, iżda dawn kollha kellhom imutu. (Atti 2:29; Ebrej 7:11, 23, 27) Fil-​waqt li l-​“kumpanija vasta mħallta” li wkoll telqu mill-​Eġittu ma kellhomx dawk il-​privileġġi, huma, flimkien mal-​Ebrej, setgħu jittamaw li jaslu fl-​Art Imwiegħda u jgawdu ħajja normali jqimu lil Alla. Xorta waħda, qaddejja taʼ Jehovah taʼ qabel l-​era Kristjana kellhom bażi biex jittamaw li, maż-​żmien, huma setgħu jgawdu ħajja bla tmiem fuq l-​art, fejn Alla għandu l-​iskop li jgħixu l-​bnedmin. Dan ikun fi qbil mal-​wegħda taʼ Ġesù fi Ġwann 6:54.

16. Għal liema xorta taʼ salvazzjoni setgħu jittamaw il-​qaddejja tal-​qedem taʼ Jehovah?

¹⁶ Alla uża xi wħud mill-​qaddejja tiegħu tal-​qedem biex jiktbu kliem taʼ spirazzjoni dwar li l-​art ġiet maħluqa biex tkun abitata u dwar li r-​retti jgħixu fuqha għal dejjem. (Salm 37:9-11; Proverbji 2:21, 22; Isaija 45:18) Madankollu, kif setgħu adoraturi veri jaqilgħu din is-​salvazzjoni jekk imutu? Permezz li Alla jerġaʼ jagħtihom il-​ħajja fuq l-​art. Ġob, per eżempju, esprima t-​tama li hu kien se jiġi miftakar u msejjaħ lura għall-​ħajja. (Ġob 14:13-15; Danjel 12:13) B’mod ċar, għamla waħda taʼ salvazzjoni hi għal ħajja taʼ dejjem fuq l-​art.—Mattew 11:11.

17. Il-​Bibbja turi li oħrajn jistgħu jaqilgħu liema salvazzjoni differenti?

¹⁷ Il-​Bibbja titkellem ukoll dwar salvazzjoni għal ħajja fis-​sema, fejn Ġesù Kristu mar wara l-​irxoxt tiegħu. “Hu qiegħed fuq il-​leminija t’Alla, għax mar fi triqtu lejn is-​sema, u l-​anġli u l-​awtoritajiet u l-​qawwiet intgħamlu suġġetti lejh.” (1 Pietru 3:18, 22; Efesin 1:20-22; Ebrej 9:24) Iżda Ġesù mhux se jkun l-​uniku bniedem meħud fis-​sema. Alla ddetermina li hu se jieħu wkoll mill-​art għadd relattivament żgħir taʼ bnedmin oħra. Ġesù qal lill-​appostli: “F’dar Missieri hemm bosta agħmajjar.... Jien sejjer fi triqti biex inħejji post għalikom. Ukoll, jekk immur fi triqti u nħejji post għalikom, nerġaʼ niġi u se nilqagħkom id-​dar għandi, biex fejn inkun jien tistgħu tkunu intom ukoll.” —Ġwann 14:2, 3.

18. Aħna issa għandna liema raġuni biex niċċentraw fuq salvazzjoni għal ħajja fis-​sema?

¹⁸ Salvazzjoni għal ħajja fis-​sema f’għaqda maʼ Ġesù hija ċertament bil-​wisq iktar grandjuża mis-​salvazzjoni limitata nvoluta maʼ l-​ewwel Qbiż. (2 Timotew 2:10) Kien fil-​lejla tal-​aħħar Seder jew ikla tal-​Qbiż valida, li Ġesù waqqaf iċ-​ċelebrazzjoni l-​ġdida għas-​segwaċi tiegħu, li tiċċentra fuq salvazzjoni għal ħajja fis-​sema. Hu qal lill-​appostli: “Ibqgħu agħmlu dan b’tifkira tiegħi.” (Luqa 22:19) Qabel ma nikkunsidraw kif il-​Kristjani għandhom iħarsu din iċ-​ċelebrazzjoni, ejjew nikkunsidraw il-​kwistjoni taʼ meta għandna nagħmlu dan.

“Żmien Maħtur”

19. Għala huwa loġiku li tassoċja l-​Qbiż mal-​Ikla taʼ fil-​Għaxija tal-​Mulej?

¹⁹ Ġesù qal: “Kelli xewqa kbira li niekol dan il-​qbiż magħkom qabel ma nsofri.” (Luqa 22:15) Hu wara dan waqqaf l-​Ikla taʼ fil-​Għaxija tal-​Mulej, li s-​segwaċi tiegħu kellhom iħarsu bħala mafkar taʼ mewtu. (Luqa 22:19, 20) Il-​Qbiż kien jinżamm darba fis-​sena. Għaldaqstant, huwa raġonevoli li l-​Ikla taʼ fil-​Għaxija tal-​Mulej tinżamm darba fis-​sena. Meta? B’mod loġiku, fir-​rebbiegħa fi żmien il-​Qbiż. Dak ikun ifisser meta tiġi l-​14 taʼ Nisan (kalendarju Lhudi), minflok ma tinżamm dejjem il-​Ġimgħa għaliex dak kien il-​jum tal-​ġimgħa li fih miet Ġesù.

20. Ix-​Xhieda taʼ Jehovah għala huma nteressati fl-​14 taʼ Nisan?

²⁰ Għalhekk l-​14 taʼ Nisan kienet id-​data li Pawlu żgur li kellu f’moħħu meta kiteb: “Kull darba li tieklu dan il-​ħobż u tixorbu dan il-​kies, intom tibqgħu xxandru l-​mewt tal-​Mulej, sakemm jasal.” (1 Korintin 11:26) Matul iż-​żewġ sekli taʼ wara, ħafna Kristjani żammew l-​14 taʼ Nisan, billi saru magħrufin bħala Kwartodeċimani, mil-​Latin għal “l-​14.” M’Clintock u Strong jirrapportaw: “Il-​knejjes tal-​Asja Minuri kienu jiċċelebraw il-​mewt tal-​Mulej fil-​jum li jikkorrispondi mal-​14 tax-​xahar taʼ Nisan, f’liema data, skond l-​opinjoni tal-​knisja tal-​qedem kollha kemm hi, seħħet il-​kruċifissjoni.” Illum, ix-​Xhieda taʼ Jehovah iżommu l-​Ikla taʼ fil-​Għaxija tal-​Mulej kull sena fid-​data li tikkorrispondi mal-​14 taʼ Nisan. Xi wħud, madankollu, innotaw li dan differenti mid-​data meta l-​Lhud iżommu l-​Qbiż tagħhom. Għala?

21. Il-​Ħaruf tal-​Qbiż meta kellu jiġi ssagrifikat, iżda x’jagħmlu l-​Lhud illum?

²¹ Il-​jum Ebrew kien minn inżul ix-​xemx (madwar is-​sitta) sa nżul ix-​xemx taʼ wara. Alla kkmanda li l-​ħaruf tal-​Qbiż jinqatel fl-​14 taʼ Nisan “bejn iż-​żewġ fil-​għaxijiet.” (Eżodu 12:6) Meta jkun dak? Il-​Lhud moderni jżommu mal-​ħarsa rabbinika li l-​ħaruf kellu jinqatel lejn it-​tmiem tal-​14 taʼ Nisan, mill-​ħin meta x-​xemx tibda tinżel (madwar it-​tlieta) sal-​inżul propju tax-​xemx. Bħala riżultat, huma jagħmlu s-​Seder tagħhom wara nżul ix-​xemx, meta jkun beda l-​15 taʼ Nisan.—Mark 1:32.

22. X’inhi raġuni għala d-​data tal-​Mafkar tvarja mid-​data meta l-​Lhud jagħmlu l-​Qbiż tagħhom? (Mark 14:17; Ġwann 13:30)

²² Aħna għandna raġuni tajba, madankollu, li nifhmu l-​espressjoni b’mod differenti. Dewteronomju 16:6 b’mod ċar qal lill-​Iżraeliti biex ‘joqtlu s-​sagrifiċċju tal-​qbiż, fil-​għaxija, fi nżul ix-​xemx.’ (Verżjoni Tanakh) Dan jindika li “bejn iż-​żewġ fil-​għaxijiet” kien jirreferi għall-​perijodu tat-​tbexbix, minn inżul ix-​xemx (li tibda fl-​14 taʼ Nisan) sa x’ħin attwalment jidlam. Il-​Lhud Karaiteb tal-​qedem kienu jifhmuha b’dan il-​mod, kif jagħmlu wkoll is-​Samaritanic sal-​ġurnata tal-​lum. Għax aħna naċċettaw li l-​ħaruf tal-​Qbiż kien jiġi ssagrifikat u jittiekel fiż-​żmien maħtur tiegħu,” fl-​14 taʼ Nisan, mhux fil-​15 taʼ Nisan, hija raġuni waħda għala d-​data tagħna tal-​Mafkar xi drabi tvarja mid-​data Lhudija.—Numri 9:2-5.

23. Għala jiżdiedu xi xhur mal-​kalendarju Ebrew, u dan kif jiġi trattat mil-​Lhud taż-​żmien modern?

²³ Raġuni oħra għala forsi tvarja d-​data tagħna minn dik tal-​Lhud hi għaliex huma jużaw kalendarju determinat bil-​quddiem, liema sistema ma ġietx iffissata qabel ir-​rabaʼ seklu E.K. Billi jużaw dan, huma jistgħu jistabbilixxu dati għall-​1 taʼ Nisan jew għall-​festi għaxriet jew mijiet taʼ snin bil-​quddiem. Jerġaʼ, il-​kalendarju qamri antik kien jinħtieġ, żjieda taʼ xahar (it-13-il wieħed) minn żmien għal żmien sabiex il-​kalendarju setaʼ jissinkronizza mal-​istaġuni. Il-​kalendarju Lhudi kurrenti jżid dan ix-​xahar f’punti fissi; f’ċiklu taʼ 19-il sena, jiġi miżjud maʼ snin 3, 6, 8, 11, 14, 17 u 19.

24, 25. (a) Fi żmien Ġesù, kif kienu jiġu ffissati x-​xhur u l-​bżonn għal xhur miżjudin kif kien jiġi determinat? (b) Id-​data għall-​Ikla taʼ fil-​Għaxija tal-​Mulej kif tiġi stabbilita mix-​Xhieda taʼ Jehovah?

²⁴ Madankollu, Emil Schürer igħid li “fi żmien Ġesù [il-Lhud] kien għad m’għandhomx kalendarju fiss, iżda fuq il-​bażi taʼ osservazzjoni purament mill-​esperjenza, kienu jibdew kull xahar ġdid mad-​dehra tal-​qamar ġdid, u bl-​istess mod fuq il-​bażi taʼ osservazzjoni” kienu jżidu xahar kif meħtieġ. “Jekk . . . kien jiġi nnotat lejn it-​tmiem tas-​sena li l-​Qbiż kien se jiġi qabel l-​ekwinozju tar-​rebbiegħa [madwar il-​21 taʼ Marzu], l-​interkalkolu taʼ xahar qabel Nisan kien jiġi ddikjarat.” (The History of the Jewish People in the Age of Jesus Christ, Volume 1) Ix-​xahar miżjud b’hekk jiġi b’mod naturali, mhux jiżdied bl-​addoċċ.

²⁵ Il-​Ġemgħa li Tiggverna tax-​Xhieda taʼ Jehovah tistabbilixxi d-​data għall-​Ikla taʼ fil-​Għaxija tal-​Mulej fi qbil mal-​metodu l-​antik. L-​ewwel taʼ Nisan jiġi determinat fuq meta l-​qamar ġdid l-​iktar qrib taʼ l-​ekwinozju tar-​rebbigħa jistaʼ x’aktarx jiġi osservat f’inżul ix-​xemx f’Ġerusalemm. Billi jgħodd 14-il ġurnata minn dak in-​nhar wieħed jistaʼ jasal għall-​14 taʼ Nisan, li normalment jikkorrispondi għall-​jum tal-​qamar kwinta. (Ara The Watchtower tal-​15 taʼ Ġunju, 1977, paġni 383-4.) Fuq il-​bażi taʼ dan il-​metodu Bibliku, ix-​Xhieda taʼ Jehovah madwar il-​globu ġew imgħarrfin li ċ-​ċelebrazzjoni tal-​Mafkar din is-​sena se tkun wara nżul ix-​xemx tal-​lO taʼ April.

26. Liema aspetti oħra tal-​Ikla taʼ fil-​Għaxija tal-​Mulej jixirqilhom l-​attenzjoni tagħna?

²⁶ Din id-​data tikkorrispondi għall-​14 taʼ Nisan, li kien meta Ġesù ħa sehem fl-​aħħar Qbiż validu. Madankollu, iċ-​ċelebrazzjoni tal-​Mafkar iġġib għall-​attenzjoni salvazzjoni akbar minn dik li jikkommemora s-​Seder Lhudi. Ilkoll kemm aħna għandna bżonn nifhmu x’jiġri matul l-​Ikla taʼ fil-​Għaxija tal-​Mulej, din xi tfisser, u kif is-​salvazzjoni tagħna hija nvoluta.

[Noti taʼ taħt]

Int Kif Se Twieġeb?

◻ Il-​Qbiż għala hu b’mod xieraq assoċjat mas-​salvazzjoni?

◻ Is-​sagrifiċċju taʼ Ġesù kif jistaʼ jwettaq iktar milli wettaq ◻ il-​ħaruf tal-​Qbiż?

◻ Liema salvazzjoni ssir disponibbli permezz taʼ Ġesù?

◻ Ix-​Xhieda taʼ Jehovah kif jistabbilixxu l-​ħin xieraq għall-​lkla taʼ fil-​Għaxija tal-​Mulej?