‘L-Irsir Fidil’ u l-Ġemgħa li Tiggverna Tiegħu
“Min tassew hu l-irsir fidil u għaqli li sidu ħatru fuq in-nies taʼ daru, biex jagħtihom, l-ikel tagħhom fiż-żmien xieraq?”−MATTEW 24.45.
1. Jehovah għala lest li jiddelega awtorità f’idejn oħrajn, u lil min primarjament għamel hekk?
JEHOVAH hu Alla taʼ ordni. Huwa wkoll is-Sors taʼ kull awtorità leġittima. Billi huwa fiduċjuż fil-lejaltà tal-ħlejjaq fidili tiegħu, Jehovah hu lest li jiddelegalhom awtorità. Il-wieħed li lilu ddelegalu l-iktar awtorità hu Ibnu, Ġesù Kristu. Tabilħaqq, Alla “issottometta l-affarijiet kollha taħt saqajh, u għamlu kap fuq l-affarijiet kollha għall-kongregazzjoni.”−Efesin 1:22.
2. Pawlu xi jsejħilha lill-kongregazzjoni Kristjana, u Kristu lil min iddelegalu awtorità?
2 L-appostlu Pawlu sejjaħ lill-kongregazzjoni Kristjana “d-dar t’Alla” u jgħid li l-Iben lejali taʼ Jehovah, Ġesù Kristu, ġie mqiegħed fuq din id-dar. (1 Timotew 3:15; Ebrej 3:6) Mill-banda l-oħra, Kristu jiddelega awtorità lill-membri tad-dar t’Alla. Aħna nistgħu naraw dan mill-kliem taʼ Ġesù miktub f’Mattew 24:45-47. Hu qal: “Min tassew hu l-irsir fidil u għaqli li sidu ħatru fuq in-nies taʼ daru, biex jagħtihom l-ikel tagħhom fiż-żmien xieraq? Hieni hu dak l-irsir jekk sidu malli jasal isibu jagħmel hekk. Verament ingħidilkom, Hu se jaħtru fuq dak kollu li jippossjedi.”
Dak li Jmexxi d-Dar fl-Ewwel Seklu
3. Min jifforma “I-irsir fidil u għaqli,” u x’terminu jiġi applikat għalihom bħala individwi?
3 Mill-istudji bir-reqqa tagħna tal-Iskrittura, nafu li l-membri midlukin bl-ispirtu tad-dar t’Alla fi kwalunkwe żmien b’mod kollettiv jiffurmaw “l-irsir fidil u għaqli,” “prokuratur,” jew “dak li jmexxi d-dar.” Individwalment, il-membri tad-dar taʼ Jehovah jissejħu “n-nies taʼ daru” jew “ġemgħa taʼ qaddejja.”−Mattew 24:45; Luqa 12:42; Reference Bible, nota taʼ taħt.
4. Ftit qabel mewtu, x’mistoqsija qajjem Ġesù, u maʼ min xebbah lilu nnifsu?
4 Ftit xhur qabel il-mewt tiegħu, Ġesù qajjem din il-mistoqsija, miktuba f’Luqa 12:42: “Min tassew hu l-prokuratur fidil, il-wieħed għaqli, li lilu sidu se jaħtru fuq il-ġemgħa taʼ qaddejja tiegħu biex jibqaʼ jagħtihom il-kejl tagħhom tal-provisti tal-ikel f’waqtu?” Imbagħad, ftit ġranet qabel ma miet, Ġesù xebbah lilu nnifsu maʼ raġel li kien wasal biex jivvjaġġa barra ’l pajjiż u li sejjaħ lill-irsiera tiegħu u fdalhom dak kollu li jippossjedi.—Mattew 25:14.
5. (a) Ġesù meta ħatar oħrajn biex jeħdulu ħsieb l-affarijiet li jippossjedi? (b) X’ħatra mifruxa ta Ġesù lil dawk li kienu se jsiru parti minn dak li jmexxilu daru?
5 Ġesù meta ħatar oħrajn biex jeħdulu ħsieb tal-affarijiet li jippossjedi? Dan ġara wara l-irxoxt tiegħu. Fil-kliem familjari tiegħu misjub f’Mattew 28:19, 20, Kristu l-ewwel ta lil dawk li kellhom isiru parti minn dak li jmexxilu daru ħatra mifruxa biex igħallmu u jagħmlu dixxipli. Billi individwalment jagħtu xiehda “sal-iktar parti ’l bogħod tal-art,” il-qaddejja kellhom ikabbru l-għalqa missjunarja li Ġesù kien beda jikkultiva matul il-ministeru tiegħu fuq l-art. (Atti 1:8) Dan kien jinvolvi li huma jaġixxu bħala “ambaxxaturi li jissostitwixxu għal Kristu.” Bħala “prokuraturi tas-sigrieti sagri t’Alla,” huma kienu se jagħmlu dixxipli u kienu se jqassmulhom ikel spiritwali.—2 Korintin 5:20; 1 Korintin 4:1, 2.
Il-Ġemgħa li Tiggverna tad-Dar
6. Il-prokuratur tal-ewwel seklu x’ġie mnebbaħ b’mod divin biex jipprovdi?
6 B’mod kollettiv, Kristjani midlukin bl-ispirtu kellhom ikunu l-prokuratur tas-sid, jew dak li jmexxilu daru, maħturin biex iqassmu ikel spiritwali f’waqtu lill-membri individwali tad-dar t’Alla. Bejn is-snin 41 E.K. u 98 E.K., membri tal-klassi tal-prokuratur tal-ewwel seklu ġew imnebbħa b’mod divin biex jiktbu 5 rakkonti storiċi, 21 ittra, u l-ktieb taʼ Rivelazzjoni għall-benefiċċju taʼ ħuthom. Dawn il-kitbiet imnebbħa fihom ikel spiritwali mill-aħjar għan-nies tad-dar, jiġifieri, individwi midlukin minn tad-dar t’Alla.
7. Kristu għal liema skop għażel għadd żgħir taʼ rġiel mill-klassi tal-irsir?
7 Fil-waqt li l-Kristjani midlukin kollha b’mod kollettiv jiffurmaw id-dar t’Alla, hemm evidenza abbundanti li Kristu għażel għadd żgħir taʼ rġiel mill-klassi tal-irsir biex jaqdu bħala ġemgħa viżibbli li tiggverna. L-istorja bikrija tal-kongregazzjoni turi li t-12-il appostlu, inkluż Mattijas, kienu l-pedament tal-ġemgħa li tiggverna tal-ewwel seklu. Atti 1:20-26 jipprovdielna indikazzjoni dwar dan. Rigward min se jieħu post Ġuda l-Iskarjota, hemm issir referenza għall-“kariga tiegħu taʼ indokrar” u għal “dan il-ministeru u appostolat.”
8. X’kienu jinkludu r-responsabbiltajiet tal-ġemgħa li tiggverna tal-ewwel seklu?
8 Din il-kariga taʼ indokrar kienet tinkludi r-responsabbiltà tal-appostli li jaħtru rġiel xierqa għal pożizzjonijiet taʼ servizz u biex jorganizzaw il-ministeru. Imma kienet tfisser iktar minn hekk. Kienet tinvolvi wkoll it-tagħlim u l-iċċarar taʼ punti taʼ duttrina. Bi twettieq tal-wegħda taʼ Ġesù miktuba fi Ġwann 16:13, “l-ispirtu tal-verità“ kien se jiggwida lill-kongregazzjoni Kristjana b’mod progressiv fil-verità kollha. Preċiż mill-bidu, dawk kollha li ħaddnu l-kelma u saru Kristjani mgħammdin u midlukin baqgħu jiddedikaw lilhom infushom għat-“tagħlim tal-appostli.” Fil-fatt, ir-raġuni għala sebaʼ rġiel rakkomandati ġew maħturin għax-xogħol neċessarju li jqassmu ikel materjali kienet sabiex “it-tnax” setgħu jibqgħu ħielsa biex ‘jagħtu lilhom infushom għat-talb u għall-ministeru tal-kelma.’—Atti 2:42; 6:l-6.
9. Il-ġemgħa li tiggverna bikrija kif spiċċat bi 11-il membru, imma għala milli jidher il-għadd ma nġabx immedjatament għal 12?
9 Donnu li għall-ewwel il-ġemgħa li tiggverna kienet iffurmata esklussivament mill-appostli taʼ Ġesù. Iżda kienet se tibqaʼ hekk? Madwar is-sena 44 E.K., l-appostlu Ġakbu, ħu Ġwanni, ġie maqtul minn Erodi Agrippa I. (Atti 12.1, 2) Milli jidher ma sar ebda sforz biex jintgħażel ieħor f’loku bħala appostlu, bħalma sar fil-każ taʼ Ġuda. Għala le? Bla dubju dan kien għaliex Ġakbu miet lejali, l-ewwel wieħed li miet mit-12-il appostlu. Mill-banda l-oħra, Ġuda kien traditur mill-agħar u postu kellu jingħata lil xi ħadd ieħor sabiex jinġab lura għal 12 il-għadd tal-ġebel tal-pedament taʼ Iżrael spiritwali.—Efesin 2:20; Rivelazzjoni 21:14.
10. Meta u kif ġiet miżjuda l-ġemgħa li tiggverna tal-ewwel seklu, u Kristu kif użaha biex tiggwida lid-dar t’Alla?
10 Il-membri oriġinali tal-ġemgħa li tiggverna tal-ewwel seklu kienu appostli, rġiel li kienu mxew maʼ Ġesù u kienu xhieda tal-mewt u l-irxoxt tiegħu. (Atti 1:21, 22) Iżda din is-sitwazzjoni kellha tinbidel. Hekk kif gerbbu s-snin irġiel Kristjani oħra laħqu statura spiritwali u ġew maħturin bħala anzjani fil-kongregazzjoni taʼ Ġerusalemm. Sa mhux iktar tard mis-sena 49 E.K., il-ġemgħa li tiggverna kienet ġiet miżjuda biex tinkludi mhux biss l-appostli li kien fadal iżda wkoll għadd taʼ rġiel ixjeħ oħra f’Ġerusalemm. (Atti 15:2) Mela l-format tal-ġemgħa li tiggverna ma kienx fiss b’mod riġidu, imma Alla b’mod evidenti ggwida l-affarijiet sabiex dak il-format jitbiddel biex jaqbel maċ-ċirkostanzi tal-poplu tiegħu. Kristu, il-kap attiv tal-kongregazzjoni, uża din il-ġemgħa akbar li tiggverna biex tissetilja l-kwistjoni duttrinali rigward jekk il-Kristjani mhux Lhud jiġux ċirkonċiżi u jissottomettux ruħhom għal-Liġi taʼ Mosè. Il-ġemgħa li tiggverna kitbet ittra li tispjega d-deċiżjoni tagħha u ħarġet digrieti biex jiġu osservati.—Atti 15:23-29.
Żmien taʼ Rendikont għal Dak li Jmexxi d-Dar
11. Kienet l-inizzjattiva qawwija meħuda mill-ġemgħa li tiggverna apprezzata mill-aħwa, u x’juri li Jehovah bierek dan l-arranġament?
11 Individwalment u bħala kongregazzjonijiet, il-Kristjani tal-bidu kienu japprezzaw din l-inizzjattiva qawwija li kienet tieħu l-ġemgħa li tiggverna. Wara li l-kongregazzjoni f’Antijokija tas-Sirja qrat l-ittra mill-ġemgħa li tiggverna, huma ferħu bl-inkuraġġiment. Hekk kif kongregazzjonijiet oħra rċevew l-informazzjoni u osservaw id-digrieti, huma “komplew jintgħamlu sodi fil-fidi u jiżdiedu fil-għadd minn jum għal jum.” (Atti 16:5) B’mod li jidher, Alla bierek dan l-arranġament.—Atti 15:30, 31.
12, 13. Liema ġrajjiet bassar Ġesù fil-parabboli tiegħu tal-miniet u tat-talenti?
12 Iżda ejjew inħarsu lejn aspett ieħor taʼ din il-kwistjoni sinjifikanti. Fit-tixbieha tiegħu tal-miniet, Ġesù xebbah lilu nnifsu maʼ raġel taʼ twelid nobbli li vvjaġġa lejn art ’il bogħod biex jakkwista poter taʼ sultan għalih innifsu u mbagħad irritorna. (Luqa 19:11, 12) Bħala riżultat tal-irxoxt tiegħu fit-33 E.K., Ġesù Kristu ġie eżaltat lejn il-leminija t’Alla, fejn kellu jistenna sakemm l-egħdewwa tiegħu jiġu mpoġġijin bħala banketta għal saqajh.—Atti 2:33-35.
13 F’tixbieha simili, il-parabbola tat-talenti, Ġesù qal li wara żmien twil, is-sid ġie biex jagħmel il-kontijiet mal-irsiera tiegħu. Lill-irsiera li wrew li kienu lejali, is-sid qal: “Int kont fidil fuq ftit affarijiet. Jien se naħtrek fuq ħafna affarijiet. Idħol fil-ferħ taʼ sidek.” Imma rigward l-irsir mhux lejali, hu ddikjara: “Anki dak li għandu se jittieħed minn għandu. U ixħtu lill-irsir li m’hu tajjeb għal xejn ’il barra fid-dlam taʼ barra.”−Mattew 25:2l-23, 29, 30.
14. Ġesù xi stenna mill-irsiera tiegħu midlukin bl-ispirtu?
14 Wara żmien twil—kważi 19-il seklu—Kristu ngħata l-poter taʼ sultan fl-1914, fit-tmiem taż-“żminijiet maħtura tal-ġnus.” (Luqa 21:24) Ftit wara dan, hu “ġie u għamel il-kontijiet” mal-irsiera tiegħu, Kristjani midlukin bl-ispirtu. (Mattew 25:19) Ġesù xi stenna minnhom individwalment u kollettivament? L-inkarigu tal-prokuratur baqaʼ bħalma kien fl-ewwel seklu. Kristu kien fada talenti lil individwi—“lil kull wieħed skond l-abbiltà tiegħu stess.” B’hekk, Ġesù stenna riżultati taʼ proporzjon xieraq. (Mattew 25:15) Hawn tapplika r-regola fl-1 Korintin 4:2, li tgħid: “Dak li jiġi mfittex fi prokuratur hu li raġel jinstab fidil.” Li jħaddmu t-talenti kien ifisser li bil-fedeltà jaġixxu bħala ambaxxaturi t’Alla, billi jagħmlu dixxipli u jqassmulhom veritajiet spiritwali.—2 Korintin 5:20.
L-“Irsir” u l-Ġemgħa Tiegħu li Tiggverna Hekk Kif iż-Żmien tat-Tmiem Qorob
15. (a) Kristu xi stenna minn dak il-wieħed kollettiv li jmexxi d-dar tiegħu? (b) X’jindika li Kristu stenna li l-klassi tal-irsir se tkun qed tagħmel dan qabel il-wasla tiegħu biex jispezzjona lid-dar tiegħu?
15 Ġesù stenna li b’mod kollettiv Kristjani midlukin se jaġixxu bħala prokuratur lejali, billi jagħtu lill-ġemgħa taʼ qaddejja tiegħu “l-kejl tagħhom tal-provisti tal-ikel f’waqtu.” (Luqa 12:42) Skond Luqa 12:43, Kristu qal: “Hieni hu dak l-irsir, jekk sidu malli jasal isibu jagħmel hekk!” Dan jindika li għal xi żmien qabel wasal Kristu biex jagħmel il-kontijiet mal-irsiera tiegħu midlukin bl-ispirtu, huma kellhom ikunu qed iqassmu l-ikel spiritwali lill-membri tal-kongregazzjoni Kristjana, id-dar t’Alla. Kristu lil min sab jagħmel hekk meta hu rritorna bil-poter taʼ sultan fl-1914 u ssokta jispezzjona lid-dar t’Alla fl-1918?—Malakija 3:l-4; Luqa 19:12; 1 Pietru 4:17.
16. Meta Kristu wasal biex jispezzjona lid-dar t’Alla fl-1918, għala ma sabx lill-knejjes tal-Kristjaneżmu jipprovdu ikel spiritwali fiż-żmien xieraq?
16 Hekk kif il-perijodu li Ġesù għamel jistenna fuq il-leminija taʼ Jehovah qorob lejn it-tmiem, bil-mod il-mod sar ovvju min kien qed jagħti provisti taʼ ikel spiritwali lin-nies taʼ dar Kristu saħansitra fiż-żmien qabel l-1914. Taħseb int li kienu l-knejjes tal-Kristjaneżmu? Żgur li le, għax huma kienu nvoluti fil-fond fil-politika. Huma kienu servew taʼ għodda pronta għall-espansjoni kolonjali u kienu ppruvaw jegħlbu lil xulxin biex jagħtu prova tal-patrijottiżmu tagħhom, billi b’hekk inkuraġġew in-nazzjonaliżmu. Dan malajr ġab ħtija taʼ demm kbira fuqhom, jiġifieri, meta taw l-appoġġ attiv tagħhom lill-gvernijiet politiċi nvoluti fl-ewwel gwerra dinjija. Spiritwalment, il-fidi tagħhom ġiet imdgħajfa mill-Moderniżmu. Kriżi spiritwali ġiet miġjuba għaliex ħafna mill-kleru tagħhom saru faċilment vittmi tal-kritika iktar għolja u tal-evoluzzjoni. L-ebda nutriment spiritwali ma setaʼ jiġi mistenni mill-kleru tal-Kristjaneżmu!
17. Kristu għala rrifjuta lil xi Kristjani midlukin u b’liema konsegwenza għalihom?
17 B’mod simili, l-ebda ikel spiritwali nutrijenti ma kien ġej minn dawk il-Kristjani midlukin li kienu iżjed ikkonċernati dwar is-salvazzjoni persunali tagħhom milli li jħaddmu t-talent taʼ Sidhom. Huma wrew li kienu ‘merħijin,’ mhux ikkwalifikati biex jieħdu ħsieb l-affarijiet tas-Sid. B’hekk, intefgħu “fid-dlam taʼ barra,” fejn għadhom jinsabu l-knejjes tal-Kristjaneżmu.—Mattew 25:24-30.
18. Is-Sid lil min sab jipprovdi lill-ġemgħa taʼ qaddejja tiegħu b’ikel spiritwali fiż-żmien xieraq u xi prova hemm taʼ dan?
18 Meta wasal biex jispezzjona l-irsiera tiegħu fl-1918, għalhekk, is-Sid, Ġesù Kristu, lil min sab jagħti lill-ġemgħa taʼ qaddejja tiegħu l-kejl tal-provisti tal-ikel fiż-żmien xieraq? Sewwa, sa dak iż-żmien, min kien ta lil uħud sinċieri li kienu jfittxu l-verità l-fehma korretta dwar is-sagrifiċċju bħala rahan, l-isem divin, l-inviżibbiltà tal-preżenza taʼ Kristu, u s-sinjifikat tal-1914? Min kien kixef il-falzità tat-Trinità, tal-immortalità tar-ruħ umana, u tan-nar tal-infern? Min kien wissa dwar il-perikli tal-evoluzzjoni u tal-ispiritiżmu? Il-fatti juru li kien il-grupp taʼ Kristjani midlukin imseħbin mal-pubblikaturi tar-rivista Zion’s Watch Tower and Herald of Christ’s Presence, issa msejħa The Watchtower Announcing Jehovah’s Kingdom (It-Torri tal-Għassa Jħabbar is-Saltna taʼ Jehovah).
19. Klassi tal-irsir fidil kif uriet lilha nfisha qabel l-1918, b’liema mezzi kienet qassmet provisti taʼ ikel spiritwali, u minn meta?
19 Fil-ħarġa tiegħu tal-1 taʼ Novembru, 1944, The Watchtower stqarr: “Fl-1878, erbgħin sena qabel il-miġja tal-Mulej fit-tempju fl-1918, kien hemm klassi taʼ Kristjani sinċieri kkonsagrati li kienu qatgħu kull rabta minn mal-organizzazzjonijiet ġerarkiċi u kleriċi u li fittxew li jipprattikaw il-Kristjanità . . . Is-sena taʼ wara, jiġifieri, f’Lulju, 1879, sabiex il-veritajiet li Alla permezz taʼ Kristu pprovda bħala ‘ikel f’waqtu’ jistgħu jiġu mqassma regolarment lid-dar kollha taʼ wlied ikkonsagrati tiegħu, din ir-rivista, The Watchtower, bdiet tiġi ppubblikata.”
20. (a) Ġemgħa li Tiggverna taż-żmien modern kif tfaċċat fix-xena? (b) X’kienu qed jagħmlu l-membri tal-Ġemgħa li Tiggverna, u taħt il-gwida taʼ min?
20 Billi tipprovdi informazzjoni fuq l-iżvilupp tal-Ġemgħa li Tiggverna taż-żmien modern, il-ħarġa tal-15 taʼ Diċembru, 1971, taʼ The Watchtower spjegat: “Ħames snin wara [fl-1884] Zion’s Watch Tower Tract Society ġiet inkorporata u qdiet bħala ‘aġenzija’ biex timministra ikel spiritwali lil eluf taʼ persuni sinċieri li kienu qed ifittxu li jafu ’l Alla u li jifhmu l-kelma tiegħu . . . Kristjani midlukin, iddedikati u mgħammdin saru assoċjati maʼ dik is-Soċjetà fil-kwartieri ġenerali f’Pennsylvania. Kemm jekk fuq il-Bord tad-Diretturi jew le, huma għamlu lilhom infushom disponibbli għal xogħol speċjali tal-klassi tal-‘irsir fidil u għaqli.’ Huma għenu f’li jitimgħu u f’li jidderieġu lill-klassi tal-irsir, u b’hekk tfaċċat ġemgħa li tiggverna. Dan kien b’mod evidenti taħt il-gwida tal-forza attiva inviżibbli jew spirtu qaddis taʼ Jehovah. Ukoll, taħt id-direzzjoni tal-Kap tal-kongregazzjoni Kristjana, Ġesù Kristu.”
21. (a) Kristu lil min sab iqassam ikel spiritwali u kif ippremjahom? (b) X’kien hemm maħżun għall-irsir fidil u għall-Ġemgħa li Tiggverna tiegħu?
21 Fl-1918, meta Ġesù Kristu spezzjona lil dawk li kienu qed igħidu li huma l-irsiera tiegħu, hu sab grupp internazzjonali taʼ Kristjani jippubblikaw veritajiet Bibliċi għall-użu kemm ġewwa l-kongregazzjoni u kemm barra fix-xogħol tal-ippridkar. Fl-1919 verament irriżulta bħalma kien bassar Ġesù: “Hieni hu dak l-irsir jekk sidu malli jasal isibu jagħmel hekk. Verament ingħidilkom, Hu se jaħtru fuq dak kollu li jippossjedi.” (Mattew 24:46, 47) Dawn il-Kristjani veri daħlu fil-ferħ taʼ Sidhom. Billi wrew lilhom infushom ‘fidili fuq ftit affarijiet’ huma ġew maħturin mis-Sid biex ikunu “fuq ħafna affarijiet.” (Mattew 25:21) L-irsir fidil u l-Ġemgħa li Tiggverna tiegħu kienu f’posthom, lesti għal inkarigu miżjud. Kemm għandna nkunu ferħanin li dan kien hekk, għax Kristjani lejali qed jibbenefikaw b’mod għani mix-xogħol iddedikat tal-irsir fidil u l-Ġemgħa li Tiggverna tiegħu!
Punti Ewlenin Biex Niftakruhom
◻ Min hu l-Kap tad-dar t’Alla, u Dan il-wieħed lil min iddelega awtorità?
◻ Kristu liema inkarigu kollettiv ta lill-klassi tal-irsir?
Liema ġemgħa kollettiva oħra eżistiet ġewwa l-klassi tal-irsir, u x’kienu d-doveri partikulari tagħha?
◻ Meta Kristu wasal biex jispezzjona lid-dar t’Alla, min kien qed jipprovdi ikel spiritwali lill-membri tagħha?
◻ Ġemgħa li Tiggverna taż-żmien modern kif tfaċċat?
[Stampa f’paġna 6]
L-“irsir” tal-ewwel seklu kellu ġemgħa li tiggverna ffurmata mill-appostli u l-anzjani tal-kongregazzjoni taʼ Ġerusalemm