Bin il-​bniedem se jiġi rivelat

Waqt li Ġesù għadu s-​Samarija jew il-​Galilija, xi Fariżej jistaqsuh dwar il-​wasla tas-​Saltna, li huma jistennew li se sseħħ b’ħafna pompa u ċerimonji. Madankollu, hu jgħid: “Is-​saltna t’Alla mhix ġejja b’mod li jispikka, u n-​nies ma jkunux qed jgħidu, ‘Ara hawn!’ jew, ‘Hemm!’ Għax, ara! Is-​saltna t’Alla qiegħda f’nofskom.”—Luqa 17:20, 21.

Xi wħud għandhom mnejn jikkonkludu li Ġesù qed jgħid li s-​Saltna qiegħda f’qalb il-​qaddejja t’Alla. Madankollu, dan ma jistax ikun li hu minnu, għax is-​Saltna mhijiex fil-​qalb tal-​Fariżej li Ġesù qed ikellem. Però, hija f’nofshom għax is-​Sultan magħżul tas-​Saltna t’Alla, Ġesù, qiegħed hemmhekk fosthom.—Mattew 21:5.

X’aktarx wara li jitilqu l-​Fariżej, Ġesù jagħti lid-​dixxipli tiegħu iktar dettalji dwar il-​miġja tas-​Saltna. Rigward il-​preżenza tiegħu bħala l-​mexxej tas-​Saltna, l-​ewwel iwissi: “Jiġu jiem meta tkunu tixtiequ taraw wieħed mill-​jiem taʼ Bin il-​bniedem imma ma tarawhx.” (Luqa 17:22) Ġesù qed jindika li r-​renju taʼ Bin il-​bniedem fis-​Saltna se jkun fil-​futur. Qabel ma jasal dan iż-​żmien, xi dixxipli għandhom mnejn ifittxuh bil-​ħerqa, imma se jkollhom jibqgħu jistennew sakemm ikun iż-​żmien stabbilit t’Alla biex jiġi Bin il-​bniedem.

Ġesù jkompli: “In-​nies jgħidulkom, ‘Ara hemm!’ jew, ‘Ara hawn!’ Toħorġux barra jew tmorru tiġru warajhom. Għax saħansitra bħalma sajjetta, bid-​dawl tagħha, tiddi minn parti s’oħra tas-​sema, hekk se jkun Bin il-​bniedem.” (Luqa 17:23, 24) Id-​dixxipli taʼ Ġesù kif se jiġu protetti kontra li jmorru jiġru wara messijiet foloz? Ġesù jgħid li l-​miġja tal-​Messija l-​veru se tkun bħal sajjetta li tidher minn ħafna postijiet. L-​evidenza tal-​preżenza tiegħu bħala l-​mexxej tas-​Saltna se tidher ċara għal dawk kollha li jkunu attenti għaliha.

Imbagħad Ġesù jagħmel xebh maʼ ġrajjiet tal-​qedem biex juri kif se jkunu l-​attitudnijiet tan-​nies matul dan il-​perijodu fil-​futur: “Bħalma ġara fi żmien Noè, hekk ukoll ikun fi żmien Bin il-​bniedem . . . Bl-​istess mod, bħalma ġara fi żmien Lot: kienu qed jieklu, kienu qed jixorbu, kienu qed jixtru, kienu qed ibigħu, kienu qed iħawlu, u kienu qed jibnu. Imma dakinhar li Lot ħareġ minn Sodoma niżlet xita taʼ nar u kubrit mis-​sema u qerdithom ilkoll. L-​istess jiġri dakinhar li Bin il-​bniedem jiġi rivelat.”—Luqa 17:26-​30.

Ġesù mhuwiex qed jgħid li n-​nies fi żmien Noè u fi żmien Lot inqerdu għax għamlu attivitajiet normali bħal li jieklu, jixorbu, jixtru, ibigħu, iħawlu, u jibnu. Anki Noè u Lot u l-​familji tagħhom għamlu minn tal-​inqas xi ftit minn dawn l-​affarijiet. Imma n-​nies l-​oħra kienu qed jagħmlu dawn mingħajr ma jagħtu kas ir-​rieda t’Alla u kienu qed jinjoraw iż-​żmien li kienu qed jgħixu fih. Għalhekk, Ġesù qed iwissi lid-​dixxipli tiegħu biex jagħtu kas ir-​rieda t’Alla u biex ikollhom sehem attiv fiha. B’hekk, qed jurihom il-​mod kif isalvaw—jiġifieri, il-​mod kif jibqgħu ħajjin—meta Alla jġib qerda fil-​futur.

Id-​dixxipli se jkollhom bżonn jevitaw li jiġu aljenati mill-​affarijiet fid-​dinja taʼ madwarhom, ‘l-​affarijiet li ħallew warajhom.’ Ġesù jgħid: “Dakinhar min ikun fuq il-​bejt imma jkollu l-​affarijiet tiegħu d-​dar ħa ma jinżilx biex jiġborhom, u min ikun barra fl-​għalqa, bl-​istess mod ħa ma jmurx lura lejn l-​affarijiet li ħalla warajh. Ftakru f’mart Lot.” (Luqa 17:31, 32) Hi saret kolonna tal-​melħ.

Ġesù jkompli d-​deskrizzjoni tiegħu taʼ kif se tkun is-​sitwazzjoni meta Bin il-​bniedem se jirrenja bħala Sultan billi jgħid lid-​dixxipli tiegħu: “F’dak il-​lejl tnejn ikunu f’sodda waħda; wieħed jittieħed, imma l-​ieħor jiġi abbandunat.” (Luqa 17:34) Allura xi wħud se jiksbu s-​salvazzjoni, imma oħrajn se jiġu abbandunati, jiġifieri, jitilfu ħajjithom.

Id-​dixxipli jistaqsu: “Fejn, Mulej?” Ġesù jwiġibhom: “Fejn hemm il-​ġisem, hemmhekk ukoll l-​ajkli jinġemgħu flimkien.” (Luqa 17:37) Iva, xi wħud se jkunu bħal ajkli li kapaċi jaraw fil-​bogħod. Dawn id-​dixxipli se jinġemgħu flimkien għand il-​Kristu l-​veru, Bin il-​bniedem. F’dan iż-​żmien fil-​futur, Ġesù se jagħti lid-​dixxipli leali tiegħu verità li ssalva l-​ħajja.