Hu Ra t-Twettieq tax-Xewqa taʼ Qalbu

HIJA x-​xewqa taʼ qalbek li tara s-​Saltna Messjanika jkollha dominju sħiħ għal fuq l-​art kollha? Jekk inhu hekk, int tixxennaq u titlob għall-​barkiet imwegħdin għall-​art taħt dik is-​Saltna tas-​sema. Eżerċita l-​paċenzja, allura, għax “[i]l-ħaġa mixtieqa hi siġra tal-​ħajja meta tassew tasal.”—Proverbji 13:12; Ġakbu 5:7, 8.

Kważi 2,000 sena ilu, kien hemm jgħix f’Ġerusalemm ir-​raġel “twajjeb u reverenzjali” Simeon. Hu kellu fidi fi profeziji Messjaniċi u kien qiegħed bil-​paċenzja “jistenna l-​konsolazzjoni taʼ Iżrael.”—Luqa 2:25.

Profeziji Messjaniċi Jagħtu Tama

Jehovah kien responsabbli għall-​ewwel profezija Messjanika​—waħda li tat tama lill-​umanità midinba u moribonda. Alla bassar il-​miġja taż-​Żerriegħa tal-​“mara,” jew organizzazzjoni universali, tiegħu.—Ġenesi 3:15.

Dak il-​Wieħed ġie identifikat bħala ż-​żerriegħa taʼ Abraham, u Ġakobb bassar il-​miġja tiegħu. (Ġenesi 22:17, 18; 49:10) Il-​glorji tas-​Saltna Messjanika ġew imfaħħrin fis-​salmi. (Salm 72:1-20) Isaija bassar li ż-​Żerriegħa kellu jitwieled minn verġni, u Mikea pprofetizza li t-​twelid kellu jseħħ f’Betlehem. (Isaija 7:14; Mikea 5:2) Dawn huma biss ftit mill-​ħafna profeziji Messjaniċi.

Xorta Ebda Messija!

Irrifletti fuq l-​imgħoddi, u immaġina li l-​ewwel seklu taʼ l-​E.K. qiegħed joqrob. Il-​profezija Messjanika oriġinali għandha 4,000 sena. Il-​Lhud ġarrbu l-​qerda tat-​tempju taʼ Jehovah, il-​ħerba taʼ art twelidhom, eżilju taʼ 70 sena f’Babilonja, u 500 sena oħra taʼ sottomissjoni lejn ħakkiema Ġentili. Xorta ebda Messija!

Kemm ixxennqu għall-​miġja tal-​Messija dawk il-​Lhud li kienu jibżgħu minn Alla! Mingħandu kellhom inixxu l-​barkiet għalihom u għall-​ġnus kollha.

Raġel Tar-​Rispett

Fost Lhud tar-​rispett li kienu qegħdin jixxennqu u jitolbu għall-​miġja tal-​Messija hemm Simeon, qaddej leali taʼ Jehovah imdaħħal fiż-​żmien u li kien jgħix fil-​belt kapitali tal-​Ġudea. Xi ħaġa speċjali ġratlu lil Simeon.

Alla poġġa l-​ispirtu qaddis tiegħu fuq Simeon u ppremjah b’rivelazzjoni. Simeon m’huwiex se jmut sakemm jara lil Dak li se jkun il-​Messija. Imma jiem u xhur qegħdin igerbbu. Simeon qiegħed jixjieħ u ma tantx jistaʼ jistenna li jgħix ħafna iktar. Se titwettaq il-​wegħda li għamel Alla miegħu?

Jum fost l-​oħrajn, (fis-sena 2 Q.E.K.), koppja żagħżugħa b’tarbija jiġu fit-​tempju minn Betlehem. L-​ispirtu qaddis jirrivela lil Simeon li dan hu l-​jum tant mistenni. Hu jmur fit-​tempju, fejn jara lil Dak li dwaru l-​profeti kienu kitbu. Billi jgħaġġel daqskemm jippermettilu l-​ġisem xwejjaħ tiegħu, hu jara lil Ġużeppi, lil Marija u lit-​tifel.

B’liema ferħ Simeon jieħu lit-​tifel Ġesù f’dirgħajh! Dan il-​Wieħed se jkun il-​Messija mwiegħed—“il-​Kristu taʼ Jehovah.” F’dik l-​età tant avvanzata, Simeon ma jistax jittama li jara lil Ġesù jwettaq il-​missjoni Tiegħu fuq l-​art. Madankollu, hija ħaġa taʼ l-​għaġeb li jistaʼ jarah bħala tarbija. Profeziji Messjaniċi qegħdin jibdew jitwettqu. Kemm hu ferħan Simeon! Issa se jkun kuntent li jorqod fil-​mewt sa l-​irxoxt.—Luqa 2:25-28.

Il-​Kliem Profetiku Taʼ Simeon

Hekk kif Simeon jgħolli leħnu f’tifħir lil Jehovah, nisimgħuh jgħid: “Issa, Mulej Sovran, int qiegħed tħalli lill-​irsir tiegħek imur ħieles fil-​paċi skond id-​dikjarazzjoni tiegħek; għaliex għajnejja raw il-​mezz tiegħek taʼ salvazzjoni li int lestejt quddiem wiċċ il-​popli kollha, dawl biex jitneħħa l-​velu mill-​ġnus u glorja tal-​poplu tiegħek Iżrael.” Ġużeppi, il-​missier putattiv taʼ Ġesù, u Ommu, Marija, ikomplu jistagħġbu b’dan il-​kliem.—Luqa 2:29-33.

L-espressjoni fuq wiċċ Simeon qiegħda tiddi hekk kif ibierek lil Ġużeppi u lil Marija, billi b’mod evidenti qiegħed jixtiqilhom il-​barka taʼ Jehovah f’li jwettqu r-​responsabbiltajiet tagħhom lejn it-​tifel. Imbagħad wiċċ ix-​xwejjaħ jisserja. Billi jidderieġi r-​rimarki tiegħu lil Marija biss, hu jżid: “Ħares! Dan il-​wieħed huwa mqiegħed għall-​waqgħa u għall-​qawmien mill-​ġdid taʼ ħafna f’Iżrael u għal sinjal biex jitkellmu kontra tiegħu (iva, xabla twila se tinfed lir-​ruħ tiegħek innifsek), sabiex l-​irraġunar taʼ ħafna qlub jistaʼ jinkixef.”—Luqa 2:34, 35.

L-​Istqarrija Taʼ Simeon Lil Marija

Immaġina kif ħassitha Marija. X’ried ifisser Simeon? Xi wħud kellhom jaċċettaw lil Kristu u jiġu mgħollijin mill-​istat diġà mwaqqaʼ tagħhom. Madankollu, oħrajn kellhom jirrifjutawh, jitfixklu fuqu, u jaqgħu. Bħalma hu mbassar, Ġesù ta prova li kien ġebla taʼ tfixkil għal ħafna Lhud. (Isaija 8:14; 28:16) Il-​kliem taʼ Simeon ma jfissirx li Iżraeliti individwali kellhom l-​ewwelnett jaqgħu f’nuqqas taʼ twemmin u mbagħad jerġgħu jibdew jemmnu billi jaċċettaw lil Ġesù. Minflok, ir-​reazzjonijiet lejh kellhom ivarjaw skond individwi differenti, billi jikxfu l-​irraġunar taʼ ħafna qlub u jwassluhom għall-​ġudizzju t’Alla fuqhom għat-​tajjeb jew għall-​ħażin. Għal uħud li ma jemmnux, hu kellu jkun bħala sinjal, jew oġġett taʼ tmaqdir. Billi jpoġġu fidi fih, oħrajn kellhom jiġu merfugħin milli jkunu mejtin fin-​nuqqasijiet u d-​dnubiet u kellhom jiġu biex igawdu waqfa taʼ tjieba m’Alla. L-​azzjonijiet tan-​nies lejn il-​Messija kellhom juru x’kien hemm fi qlubhom.

Xi ngħidu dwar il-​kliem taʼ Simeon: “Xabla twila se tinfed lir-​ruħ tiegħek innifsek”? M’hemm ebda indikazzjoni Skritturali li lil Marija attwalment nifditha xi xabla. Madankollu, li l-​maġġoranza rrifjutaw lil Ġesù kellu jnikkitha. U kemm kien taʼ uġigħ għal Marija li tara lil Ġesù msammar maʼ zokk! Dan kien qisu nifditha xi xabla.

Simeon Japplika Profeziji Messjaniċi

L-​ispirtu t’Alla kien qanqal lil Simeon biex japplika profeziji Messjaniċi għal Ġesù. Simeon setaʼ jħalli din id-​dinja fil-​paċi, jew fit-​trankwillità, ‘għaliex għajnejh kienu raw il-​mezz taʼ salvazzjoni t’Alla li Hu lesta quddiem wiċċ il-​popli kollha, dawl biex jitneħħa l-​velu mill-​ġnus u glorja tal-​poplu Tiegħu Iżrael.’ (Luqa 2:30-32) Kemm kien japplika tajjeb dan għall-​kliem profetiku taʼ Isaija!

Dak il-​profeta bassar: “Il-​glorja taʼ Jehovah ċertament li se tiġi rrivelata, u l-​laħam kollu jrid jaraha flimkien.” “Jien [Jehovah] ukoll tajtek [lill-Messija] għal dawl tal-​ġnus, biex is-​salvazzjoni tiegħi tistaʼ tiġi li tkun sa l-​estremità taʼ l-​art.” (Isaija 40:5; 42:6; 49:6; 52:10) L-​Iskrittura Griega Kristjana u l-​fatti fiżiċi minn dak in-​nhar ’il hawn sostnew li l-​Messija, Ġesù Kristu, huwa l-​veru dawl tal-​ġnus, il-​Wieħed li jneħħi l-​velu taʼ dlam spiritwali u jġib salvazzjoni lin-​nies.

Il-Kelma t’Alla ma tgħid xejn iktar dwar ix-​xwejjaħ Simeon. B’mod evidenti hu miet qabel ma Kristu fetaħ it-​triq għall-​ħajja fis-​sema. Dalwaqt, allura, Simeon se jiġi rxoxtat għall-​ħajja fuq l-​art. X’ferħ hu—u int—tistgħu ġġarrbu fid-​dinja l-​ġdida taħt is-​Saltna Messjanika t’Alla! (w94 3/15)