‘Agħmel Ħbieb Permezz tar-Rikkezzi bla Tjieba’

“Agħmlu ħbieb għalikom infuskom permezz tar-​rikkezzi bla tjieba . . . Il-​persuna li hi leali f’dak li huwa l-​inqas hi leali wkoll fil-​ħafna.”—LUQA 16:9, 10.

1. Mosè u wlied Iżrael kif faħħru lil Jehovah wara l-​ħarba tagħhom mill-​Eġittu?

MEĦLUSIN b’miraklu​—x’esperjenza li ssaħħaħ il-​fidi! L-​eżodu taʼ Iżrael mill-​Eġittu ma setaʼ jiġi attribwit lil ħadd ieħor ħlief lil Jehovah, Dak li Jistaʼ Kollox. M’huwiex sorprendenti għalhekk li Mosè u l-​Iżraeliti kantaw: “Saħħti u s-​setgħa tiegħi hu Jah, ladarba jservi għas-​salvazzjoni tiegħi. Dan hu Alla tiegħi, u jien se nfaħħru; Alla taʼ missieri, u jien se ngħollih ’il fuq.”—Eżodu 15:1, 2; Dewteronomju 29:2.

2. In-​nies taʼ Jehovah x’ħadu magħhom hekk kif telqu mill-​Eġittu?

² Il-​ħelsien li Iżrael kienu għadhom kif sabu kemm kien taʼ kuntrast mas-​sitwazzjoni tagħhom fl-​Eġittu! Issa setgħu jqimu lil Jehovah bla xkiel. U ma telqux mill-​Eġittu b’idhom vojta. Mosè jirrakkonta: “Ulied Iżrael . . . marru jitolbu mingħand l-​Eġizzjani oġġetti tal-​fidda u oġġetti tad-​deheb u mantelli. U Jehovah ta lin-​nies favur f’għajnejn l-​Eġizzjani, u b’hekk dawn tawhom dak li ntalab; u neżżgħu lill-​Eġizzjani.” (Eżodu 12:35, 36) Imma kif użaw dawn ir-​rikkezzi taʼ l-​Eġittu? Irriżulta dan f’li ‘jgħollu lil Jehovah ’il fuq’? X’nitgħallmu mill-​eżempju tagħhom?—Qabbel 1 Korintin 10:11.

Il-​“Kontribuzzjoni Taʼ Jehovah”

3. L-​użu tad-​deheb taʼ Iżrael f’qima falza qanqal liema reazzjoni mingħand Jehovah?

³ Matul l-​40 jum li Mosè qattaʼ fuq il-​Muntanja Sinaj biex jirċievi l-​istruzzjonijiet t’Alla għal Iżrael, in-​nies li kienu jistennew taħt saru bla paċenzja. Billi qaċċtu minn fuqhom l-​imsielet tad-​deheb, ġiegħlu lil Aronne jagħmel xbiha għalihom biex iqimuha. Aronne bnielhom ukoll artal, u kmieni l-​għada fil-​għodu, huma offrew sagrifiċċji hemm. Għamilhom dan l-​użu tad-​deheb tagħhom għeżież għall-​Ħellies tagħhom? Ċertament li le! “Issa ħallini,” Jehovah iddikjara lil Mosè, “biex ir-​rabja tiegħi tistaʼ tixgħel kontra tagħhom u jien nistaʼ neqridhom għalkollox.” Kien biss minħabba t-​tħannin taʼ Mosè li Jehovah ħafirha lill-​ġens, għalkemm l-​organizzaturi taʼ l-​irvell inqatlu b’kastig minn Alla.—Eżodu 32:1-6, 10-14, 30-35.

4. X’kienet “il-​kontribuzzjoni taʼ Jehovah,” u min offrieha?

⁴ Iktar tard, Iżrael kellhom l-​opportunità li jużaw ir-​rikkezzi tagħhom b’mod li kien jogħġob lil Jehovah. Huma ġabru “kontribuzzjoni għal Jehovah.”a Deheb, fidda, ram, ħajt blu, diversi drappijiet miżbugħin, ġlud tal-​kbiex, ġlud tal-​bumerini, u njam taʼ l-​akaċja kienu fost id-​donazzjonijiet għall-​bini u t-​tagħmir tat-​tabernaklu. Ir-​rakkont jiffoka l-​attenzjoni tagħna fuq l-​attitudni tal-​kontributuri. “Ħalli kull wieħed li għandu qalbu trid iġib din bħala kontribuzzjoni taʼ Jehovah.” (Eżodu 35:5-9) Iżrael wieġbu b’mod li jgħaġġeb. Għalhekk, it-​tabernaklu kien struttura taʼ “ġmiel u grandezza sublimi,” biex nikkwotaw il-​kliem taʼ wieħed studjuż.

Kontribuzzjonijiet Għat-​Tempju

5, 6. F’konnessjoni mat-​tempju, David kif uża r-​rikkezzi tiegħu, u oħrajn kif wieġbu?

⁵ Għalkemm is-​Sultan Salamun taʼ Iżrael idderieġa l-​bini taʼ dar permanenti għall-​qima taʼ Jehovah, David, missieru, kien għamel preparazzjonijiet estensivi għaliha. David ġabar kwantità kbira taʼ deheb, fidda, ram, ħadid, injam, u ħaġar prezzjuż. “Ladarba qiegħed nieħu gost fid-​dar t’Alla tiegħi,” David qal lin-​nies tiegħu, “għad hemm proprjetà speċjali minn tiegħi, deheb u fidda; jien tassew nagħtiha lid-​dar t’Alla tiegħi iżjed minn dak kollu li jien ħejjejt għad-​dar qaddisa: tlett elef talent taʼ deheb . . . u sebat elef talent taʼ fidda raffinata, għall-​kisi tal-​ħitan tad-​djar.” David inkuraġġixxa lil oħrajn biex ikunu ġenerużi wkoll. Ir-​rispons kien abbundanti: iżjed deheb, fidda, ram, ħadid, u ħaġar prezzjuż. “B’qalb sħiħa,” in-​nies għamlu “offerti volontarji lil Jehovah.”—1 Kronaki 22:5; 29:1-9.

⁶ B’dawn il-​kontribuzzjonijiet volontarji, l-​Iżraeliti esprimew apprezzament profond għall-​qima taʼ Jehovah. David talab b’umiltà: “Min jien u min huma n-​nies tiegħi, li għandna nżommu l-​qawwa biex nagħmlu offerti volontarji bħal din?” Għala? “Għax kollox huwa minnek, u minn idek stess tajniek aħna. . . . Jien, min-​naħa tiegħi, fl-​istat rett taʼ qalbi offrejt volontarjament dawn l-​affarijiet kollha.”—1 Kronaki 29:14, 17.

7. X’lezzjoni taʼ twissija nitgħallmu minn żmien Amos?

⁷ Madankollu, it-​tribujiet taʼ Iżrael naqsu li jżommu l-​qima taʼ Jehovah quddiemnett fl-​imħuħ u fil-​qlub tagħhom. Sad-​disaʼ seklu Q.E.K., Iżrael maqsum kien sar ħati taʼ traskuraġni spiritwali. Rigward is-​saltna tat-​Tramuntana taʼ għaxar tribujiet taʼ Iżrael, Jehovah iddikjara permezz taʼ Amos: “Gwaj għal dawk li qegħdin komdi f’Sijon u għal dawk li qegħdin jafdaw fil-​muntanja taʼ Samarija!” Hu ddeskriviehom bħala rġiel ‘mimdudin fuq sufani taʼ l-​avorju . . . mitluqin fuq id-​divani tagħhom, . . . li qegħdin jieklu l-​kbiex minn ġo merħla u l-​barrin żgħar minn fost għoġġiela msemmnin; . . . li qegħdin jixorbu minn ġo bwieqi taʼ l-​inbid.’ Imma l-​abbundanza taʼ ġid li kellhom ma kienx protezzjoni. Alla wissa: “Se jmorru fl-​eżilju qabel dawk li sejrin fl-​eżilju, u t-​tbaħrid taʼ dawk il-​mitluqin irid jitlaq.” Fis-​sena 740 Q.E.K., Iżrael ġarrab sofferenza minn idejn l-​Assirja. (Amos 6:1, 4, 6, 7) U maż-​żmien is-​saltna tan-​Nofs in-​Nhar taʼ Ġuda wkoll waqgħet vittma tal-​materjaliżmu.—Ġeremija 5:26-29.

Użu Xieraq Tar-​Riżorsi Fi Żminijiet Kristjani

8. Ġużeppi u Marija x’eżempju tajjeb jagħtu rigward l-​użu tar-​riżorsi?

⁸ F’kuntrast, il-​qagħda relattivament fqira tal-​qaddejja t’Alla fi żminijiet iktar tard ma żammithomx lura milli juru żelu għall-​qima vera. Ikkunsidra lil Marija u lil Ġużeppi. B’ubbidjenza lejn id-​digriet taʼ Ċesri Awgustu, huma vjaġġaw lejn belt il-​familja tagħhom, Betlehem. (Luqa 2:4, 5) Hemm twieled Ġesù. Erbgħin jum wara, Ġużeppi u Marija żaru t-​tempju f’Ġerusalemm li kienet qrib biex jippreżentaw l-​offerta preskritta tal-​purifikazzjoni. B’indikazzjoni taʼ l-​istat materjalment fqir tagħhom, Marija offriet żewġ għasafar żgħar. La hi u lanqas Ġużeppi ma talbu li jiġu skużati minħabba li kienu fqar. Minflok, b’ubbidjenza wżaw ir-​riżorsi limitati tagħhom.—Levitiku 12:8; Luqa 2:22-24.

9-11. (a) Il-​kliem taʼ Ġesù f’​Mattew 22:21 jipprovdi liema gwida dwar kif nużaw il-​flus? (b) Il-​kontribuzzjoni żgħira taʼ l-​armla għala ma kenitx offruta għal xejn?

⁹ Iktar tard, il-​Fariżej u segwaċi tal-​partit taʼ Erodi pprovaw jaqbdu lil Ġesù fid-​diskors, billi qalu: “Għidilna, għalhekk, X’taħseb int? Huwa legali li tħallas it-​taxxa tar-​ras lil Ċesri jew le?” It-​tweġiba taʼ Ġesù rrivelat id-​dehen tiegħu. Billi rrefera għall-​munita li tawh, Ġesù staqsa: “L-​immaġni u l-​iskrizzjoni taʼ min hija din?” Huma wieġbu: “Taʼ Ċesri.” B’għaqal hu kkonkluda: “Ħallsu lura, għalhekk, l-​affarijiet taʼ Ċesri lil Ċesri, imma l-​affarijiet t’Alla lil Alla.” (Mattew 22:17-21) Ġesù kien jaf li l-​awtorità li ħarġet il-​munita kienet tistenna li jitħallsu t-​taxxi. Imma hu hemm għen lis-​segwaċi tiegħu u lill-​għedewwa bl-​istess mod biex jirrealizzaw li Kristjan veru jagħmel ħiltu biex iħallas lura “l-​affarijiet t’Alla lil Alla.” Dan jinkludi l-​użu xieraq tar-​riżorsi materjali taʼ dak li jkun.

¹⁰ Każ li Ġesù kien preżenti għalih fit-​tempju jagħti tixbieha taʼ dan. Kien għadu kif ikkundanna lill-​iskribi rgħibin li ‘belgħu d-​djar tar-​romol.’ “Hekk kif ħares ’il fuq ra lill-​għonja jitfgħu l-​għotjiet tagħhom ġos-​sniedaq tat-​teżor,” jirrapporta Luqa. “Imbagħad [Ġesù] ra ċerta armla fil-​bżonn titfaʼ żewġ muniti żgħar taʼ valur żgħir ferm hemmhekk, u qal: ‘Ngħidilkom il-​verità kollha, Din l-​armla, għalkemm fqira, tefgħet iktar milli tefgħu huma lkoll. Għax dawn kollha tefgħu għotjiet miż-​żejjed tagħhom, imma din il-​mara min-​nieqes tagħha tefgħet il-​mezz taʼ għixien kollu li kellha.’” (Luqa 20:46, 47; 21:1-4) Xi ftit min-​nies semmew li t-​tempju kien imżejjen b’ħaġar prezzjuż. Ġesù wieġeb: “Inkwantu għal dawn l-​affarijiet li qegħdin tilmħu, se jiġu l-​jiem li fihom mhux se titħalla hawn ġebla fuq ġebla u ma tiġix mitfugħa ’l isfel.” (Luqa 21:5, 6) Kienet għal xejn il-​kontribuzzjoni żgħira taʼ l-​armla? Ċertament li le. Hi appoġġjat l-​arranġament li Jehovah kellu stabbilit f’dak iż-​żmien.

¹¹ Ġesù qal lis-​segwaċi veri tiegħu: “Ebda qaddej f’dar ma jistaʼ jkun irsir taʼ żewġ sidien; għax, jew se jobgħod lill-​wieħed u jħobb lill-​ieħor, jew se jibqaʼ mal-​wieħed u jistmerr lill-​ieħor. Ma tistgħux tkunu rsiera t’Alla u tar-​rikkezzi.” (Luqa 16:13) B’hekk, kif nistgħu aħna nuru l-​bilanċ xieraq fl-​użu tar-​riżorsi finanzjarji tagħna?

Prokuraturi Leali

12-14. (a) Il-​Kristjani huma prokuraturi taʼ liema riżorsi? (b) In-​nies taʼ Jehovah b’liema modi li jispikkaw illum bil-​fedeltà jwettqu l-​prokura tagħhom? (ċ) Minfejn jiġu l-​flus biex jiġi appoġġjat ix-​xogħol t’Alla llum?

¹² Meta niddedikaw il-​ħajjiet tagħna lil Jehovah, aħna effettivament ngħidu li kulma għandna, ir-​riżorsi tagħna kollha, jappartjeni lilu. Kif, allura, għandna nużaw dak li għandna? Meta ddiskuta s-​servizz Kristjan fil-​kongregazzjoni, Ħuna C. T. Russell, l-​ewwel president tal-​Watch Tower Society, kiteb: “Kull wieħed għandu jqis lilu nnifsu bħala maħtur mill-​Mulej biex ikun il-​prokuratur taż-​żmien, l-​influwenza, il-​flus, eċċ., tiegħu stess, u kull wieħed irid ifittex li juża dawn it-​talenti bl-​aqwa abbiltà tiegħu, għall-​glorja tas-​Sid.”​—The New Creation, paġna 345.

¹³ “Dak li huwa mfittex fi prokuraturi huwa li bniedem jinstab li hu leali,” jistqarr 1 Korintin 4:2. Bħala organizzazzjoni internazzjonali, ix-​Xhieda taʼ Jehovah jistinkaw biex jaġixxu fi qbil maʼ dik id-​deskrizzjoni, billi jużaw kemm jistgħu mill-​ħin tagħhom fil-​ministeru Kristjan, billi bir-​reqqa jikkultivaw l-​abbiltajiet tagħhom taʼ tagħlim. Barra minn hekk, gruppi taʼ voluntieri taħt id-​direzzjoni tal-​Kumitati Reġjonali tal-​Bini minn jeddhom jagħtu l-​ħin, is-​saħħa, u l-​kapaċità tagħhom biex jagħmlu swali mill-​aħjar għal-​laqgħat lesti għall-​qima. B’dan kollu, Jehovah hu kuntent ħafna.

¹⁴ Minn fejn jiġu l-​flus għall-​appoġġ taʼ din il-​kampanja vasta taʼ tagħlim u xogħol taʼ bini? Mingħand uħud li għandhom qalbhom trid, saħansitra bħalma ġew fi żmien il-​bini tat-​tabernaklu. Individwalment, qegħdin aħna nieħdu sehem? Juri l-​mod kif aħna nużaw il-​mezzi finanzjarji tagħna li s-​servizz taʼ Jehovah huwa taʼ importanza suprema għalina? Fi kwistjonijiet taʼ flus, ejjew inkunu prokuraturi leali.

Mudell Taʼ Ġenerożità

15, 16. (a) Il-​Kristjani taʼ żmien Pawlu kif urew ġenerożità? (b) Kif għandna nqisu d-​diskussjoni preżenti tagħna?

¹⁵ L-​appostlu Pawlu kiteb dwar l-​ispirtu ġeneruż taʼ Kristjani fil-​Maċedonja u l-​Akaja. (Rumani 15:26) Għalkemm kienu magħkusin huma stess, kienu lesti li bil-​ferħ jikkontribwixxu biex jgħinu lil ħuthom. Pawlu inkuraġġixxa lill-​Kristjani Korintin biex bl-​istess mod jagħtu b’mod ġeneruż, billi jagħtu miż-​żejjed tagħhom biex jagħmlu tajjeb għan-​nieqes taʼ oħrajn. Ħadd ma setaʼ b’mod xieraq jakkuża lil Pawlu bi ħtif taʼ flus. Hu kiteb: “Dak li jiżraʼ bl-​għaks se jaħsad ukoll bl-​għaks; u dak li jiżraʼ bil-​kotra se jaħsad ukoll bil-​kotra. Ħalli kull wieħed jagħmel sewwa sew bħalma għamel riżoluzzjoni f’qalbu, mhux kontra qalbu jew għax bil-​fors, għax Alla jħobb lil donatur ferrieħi.”—2 Korintin 8:1-3, 14; 9:5-7, 13.

¹⁶ Kontribuzzjonijiet ġenerużi li jagħtu ħutna u persuni interessati għax-​xogħol dinji tas-​Saltna llum jagħtu evidenza taʼ kemm jistmaw fl-​għoli dan il-​privileġġ. Imma, kif Pawlu fakkar lill-​Korintin, aħna nagħmlu tajjeb li nikkunsidraw din id-​diskussjoni bħala tfakkira.

17. Pawlu liema mudell taʼ għoti inkuraġġixxa, u jistaʼ dan jiġi applikat illum?

¹⁷ Pawlu ħeġġeġ lill-​aħwa biex isegwu arranġament organizzat fl-​għoti tagħhom. “Kull l-​ewwel jum tal-​ġimgħa,” hu qal, “ħalli kull wieħed minnkom fid-​dar tiegħu stess iwarrab xi ħaġa fil-​ġenb maħżuna skond m’għandu r-​riżq.” (1 Korintin 16:1, 2) Dak jistaʼ jservi taʼ eżempju għalina u għal uliedna fl-​għoti taʼ kontribuzzjonijiet tagħna, kemm jekk nagħmlu dan permezz tal-​kongregazzjoni jew direttament lill-​eqreb uffiċċju tal-​fergħa tal-​Watch Tower Society. Koppja missjunarji assenjati biex jippridkaw f’belt taʼ l-​Afrika tal-​Lvant stiednu lil uħud interessati biex jingħaqdu magħhom għal studju tal-​Bibbja. Fi tmiem din l-​ewwel laqgħa, il-​missjunarji b’mod diskret tefgħu xi ftit muniti f’kaxxa mmarkata “Kontribuzzjonijiet għax-​xogħol tas-​Saltna.” Nies oħrajn li attendew għamlu l-​istess. Iktar tard, wara li dawn l-​uħud ġodda ġew organizzati f’kongregazzjoni Kristjana, is-​circuit overseer żarhom u rrimarka fuq ir-​regolarità tal-​kontribuzzjonijiet tagħhom.—Salm 50:10, 14, 23.

18. Kif nistgħu ngħinu lil ħutna li jkunu f’xi hemm?

¹⁸ Aħna għandna wkoll il-​privileġġ li nużaw ir-​riżorsi tagħna biex ngħinu lil vittmi taʼ diżastri naturali u lil dawk li jgħixu f’postijiet imtertqin bil-​gwerra. Kemm ħadna pjaċir naqraw dwar il-​provisti taʼ għajnuna mibgħutin lejn l-​Ewropa tal-​Lvant hekk kif taqlib ekonomiku u politiku kines lil dik il-​parti tad-​dinja! Kontribuzzjonijiet kemm t’affarijiet u kemm taʼ flus urew il-​ġenerożità u s-​solidarjetà taʼ ħutna maʼ Kristjani żvantaġġjati.b—2 Korintin 8:13, 14.

19. X’affarijiet prattiċi nistgħu nagħmlu biex ngħinu lil dawk fis-​servizz full-time?

¹⁹ Aħna nistmaw ħafna x-​xogħol taʼ ħutna li jieħdu sehem f’servizz full-time bħala pijunieri, indokraturi li jivvjaġġaw, missjunarji, u voluntieri f’Betel, hux tassew? Skond iċ-​ċirkostanzi tagħna, aħna forsi nkunu nistgħu noffrulhom xi għajnuna materjali direttament. Per eżempju, meta s-​circuit overseer iżur il-​kongregazzjoni tiegħek, forsi tkun tistaʼ tipprovdilu akkomodazzjoni, ikel, jew għajnuna għal spejjeż taʼ vjaġġar. Ġenerożità bħal din ma tiġix injorata minn Missierna tas-​sema, li jrid lill-​qaddejja tiegħu jingħataw attenzjoni. (Salm 37:25) Ftit snin ilu wieħed ħu li kien jistaʼ joffri biss xi ikel ħafif stieden f’daru lil indokratur li jivvjaġġa u lil martu. Meta l-​koppja telqu għas-​servizz taʼ l-​għalqa taʼ fil-​għaxija, il-​ħu newwel lill-​mistednin tiegħu invilopp. Ġo fih kien hemm karta tal-​flus (ekwivalenti għal dollaru Amerikan) flimkien maʼ din in-​nota miktuba bl-​idejn: “Għal kikkra tè jew gallun petrol.” X’apprezzament mill-​aħjar espress b’din il-​manjiera umli!

20. Liema privileġġ u responsabbiltà ma rridux nittraskuraw?

²⁰ Spiritwalment, in-​nies taʼ Jehovah huma mberkin! Aħna ngawdu pranzijiet spiritwali fl-​assembleat u l-​konvenzjonijiet tagħna, fejn nirċievu pubblikazzjonijiet ġodda, tagħlim mill-​aħjar, u pariri prattiċi. Bi qlub mimlijin apprezzament għall-​barkiet spiritwali tagħna, ma ninsewx il-​privileġġ u r-​responsabbiltà tagħna li nikkontribwixxu fondi biex jintużaw għall-​avvanz taʼ l-​interessi tas-​Saltna t’Alla mad-​dinja kollha.

‘Agħmel Ħbieb Permezz Taʼ Rikkezzi Bla Tjieba’

21, 22. X’se jiġrilhom dalwaqt ir-​“rikkezzi bla tjieba,” li jirrikjedi li nagħmlu liema ħaġa issa stess?

²¹ Verament, hemm abbundanza taʼ modi li bihom nistgħu nuru li l-​qima taʼ Jehovah tiġi l-​ewwel fil-​ħajjiet tagħna, u partikolarment mod importanti kif nuru dan jinvolvi li nagħtu kas tal-​parir taʼ Ġesù: “Agħmlu ħbieb għalikom infuskom permezz tar-​rikkezzi bla tjieba, ħalli, meta dawn ifallu, huma jistgħu jilqgħukom ġewwa l-​għamajjar taʼ dejjem.”—Luqa 16:9.

²² Innota li Ġesù tkellem dwar il-​falliment tar-​rikkezzi bla tjieba. Iva, jasal il-​jum meta l-​flus taʼ din is-​sistema se jsiru bla valur. “Fit-​toroq se jarmu lill-​istess fidda tagħhom, u ħaġa mistkerrha d-​deheb tagħhom stess se jsir,” ipprofetizza Eżekjel. “La l-​fidda tagħhom u lanqas id-​deheb tagħhom ma se jkunu jistgħu jeħilsuhom f’jum il-​furja taʼ Jehovah.” (Eżekjel 7:19) Sakemm iseħħ dan, irridu neżerċitaw għerf u dehen bil-​mod kif nużaw il-​ġid materjali tagħna. B’hekk ma nħarsux lura b’sogħba talli ma nkunux tajna kas it-​twissija taʼ Ġesù: “Jekk ma tajtux prova li intom leali f’konnessjoni mar-​rikkezzi bla tjieba, min se jafdakom b’dak li huwa veru? . . . Ma tistgħux tkunu rsiera t’Alla u tar-​rikkezzi.”—Luqa 16:11-13.

23. X’għandna nużaw b’mod għaqli, u x’se jkun il-​premju tagħna?

²³ Ħalli lkoll kemm aħna, allura, bil-​fedeltà nagħtu kas dawn it-​tfakkiriet biex inpoġġu l-​qima taʼ Jehovah l-​ewwel fil-​ħajjiet tagħna u biex nagħmlu użu għaqli mill-​ġid kollu tagħna. B’hekk nistgħu nżommu l-​ħbiberija tagħna maʼ Jehovah u Ġesù, li jwiegħdu li meta l-​flus ifallu huma se jilqgħuna fl-​“għamajjar taʼ dejjem,” bil-​prospett taʼ ħajja eterna jew fis-​Saltna tas-​sema jew f’art magħmula ġenna.—Luqa 16:9. (w94 12/1)

[Noti taʼ taħt]

Tiftakar Int?

◻ Iżrael kif wieġbu għall-​istedina taʼ Jehovah biex jikkontribwixxu għall-​bini tat-​tabernaklu?

◻ Il-​kontribuzzjoni taʼ l-​armla għala ma kenitx għal xejn?

◻ Il-​Kristjani liema responsabbiltà jġorru għall-​mod kif jużaw ir-​riżorsi tagħhom?

◻ Kif nistgħu nevitaw sogħba għall-​użu tagħna tal-​flus?

[Stampa f’paġna 30]

Il-​kontribuzzjoni taʼ l-​armla, għalkemm żgħira, ma kenitx għal xejn