Il-​Biżaʼ—Komuni Issa Imma Mhux Għal Dejjem!

STUDENTI tal-​Kelma t’Alla m’humiex sorpriżi li l-​biżaʼ huwa tant komuni. Bħalma x-​Xhieda taʼ Jehovah xandru b’mod estensiv fil-​ministeru tagħhom, hemm evidenza abbundanti li aħna qegħdin ngħixu fi żmien immarkat fl-​istorja taʼ l-​umanità. Int taf li huwa mmarkat minn biżaʼ mifrux maʼ kullimkien. Imma żmien twil ilu Ġesù mmarka, jew ipponta lejn, żmienna. Hu kien qiegħed jirrispondi l-​mistoqsijiet taʼ l-​appostli dwar il-​preżenza tiegħu u l-​konklużjoni tas-​sistema t’affarijiet, jew ‘tmiem id-​dinja.’—Mattew 24:3.

Hawnhekk hawn parti minn dak li bassar Ġesù:

“Iqum ġens kontra ġens u saltna kontra saltna, l-​art titheżheż bil-​kbir f’ħafna bnadi ikun hemm il-​ġuħ u mard li jittieħed, u fis-​sema jidhru ħwejjeġ tal-​biżaʼ u sinjali taʼ l-​għaġeb.”—Luqa 21:10, 11.

Innotajt int il-​kumment tiegħu dwar “ħwejjeġ tal-​biżaʼ”? Iktar tard fl-​istess risposta, Ġesù għamel osservazzjoni sinjifikanti oħra dwar il-​biżaʼ li tistaʼ b’mod dirett u deċisiv tolqot lilek u lill-​maħbubin tiegħek. Imma qabel nitfgħu l-​attenzjoni fuq dak, ħalli nirrevedu fil-​qosor xi evidenza addizzjonali li aħna qegħdin ngħixu fl-​aħħar jiem.—2 Timotju 3:1.

Biżaʼ Ġġustifikat Mill-​Gwerra

Konflitti militari ħallew ħafna partijiet taʼ l-​art imħarbtin. Per eżempju, ir-​rivista Geo sejħet il-​bjar taż-​żejt li kienu tħallew jaqbdu fi tmiem konflitt riċenti fil-​Lvant Nofsani “l-​akbar katastrofu ambjentali qatt ikkaġunat mill-​id umana.” Il-​gwerer qatlu jew immankaw għaxriet taʼ miljuni taʼ nies. Iktar mill-​miljuni taʼ mwiet taʼ nies militari u ċivili fl-​Ewwel Gwerra Dinjija, 55 miljun ruħ kienu nqatlu fit-​Tieni Gwerra Dinjija. Ftakar li bħala parti mis-​sinjal li tmiem id-​dinja kien qrib, Ġesù qal li kien se “[j]qum ġens kontra ġens u saltna kontra saltna.”

Ma nistgħux ma nagħtux kas ukoll taʼ l-​attentati taʼ ġenoċidju mill-​bniedem​—qerda taʼ razez jew popli sħaħ. L-​imwiet taʼ miljuni t’Armeni, Kambodjani, Lhud, Irwandiżi, Ukrajnjani, u oħrajn żiedu mal-​ħtija tad-​demm inkredibbli taʼ l-​umanità matul is-​seklu 20. It-​tbiċċir ikompli f’pajjiżi fejn mibgħeda etnika hija inkuraġġita minn estremisti reliġjużi. Iva, il-​gwerer għadhom qegħdin jgħarrqu l-​art fid-​demm uman.

Gwerer moderni jaħsdu l-​vittmi saħansitra wara li l-​ġlied jispiċċa. Ngħidu aħna, ikkunsidra t-​tqegħid bla skruplu taʼ mini splussivi taʼ l-​art. Skond rapport mill-​organizzazzjoni tar-​riċerka Human Rights Watch, “madwar 100 miljun mina splussiva madwar id-​dinja jheddu lin-​nies ċivili.” Mini bħal dawn ikomplu jkunu perikolużi għal irġiel, nisa, u tfal innoċenti ħafna wara li l-​gwerra li kienu ntużaw fiha tkun intemmet. Jintqal li kull xahar eluf jiġu mmankati jew maqtulin bil-​mini taʼ l-​art f’iktar minn 60 pajjiż. Din it-​theddida għall-​ħajja għala ma titneħħiex b’mod sistematiku? The New York Times innotat: “Qegħdin jitpoġġew mini kull ġurnata ħafna iktar milli jiġu nnewtralizzati f’operazzjonijiet taʼ tneħħija taʼ mini, u għalhekk in-​numru taʼ korruti qiegħed dejjem jiżdied b’mod regulari.”

Dak l-​artiklu fil-​gazzetta taʼ l-​1993 irrapporta li l-​bejgħ taʼ dawn il-​mini sar negozju li “jħallas sa $200 miljun kull sena.” Dan jinvolvi “xi 100 kumpanija u aġenzija governattiva fi 48 pajjiż” li “kienu qegħdin jesportaw 340 tip differenti” taʼ mini. B’mod djaboliku, xi mini huma ddisinnjati biex jidhru qishom ġugarelli sabiex jagħmluhom attraenti għat-​tfal! Immaġina ftit, timmira apposta biex timmanka u teqred tfal innoċenti! Editorjal intitolat “100 Miljun Apparat Infernali” sostna li mini “qatlu jew immankaw iktar nies mill-​armi kemikali, bijoloġiċi u nukleari.”

Imma l-​mini taʼ l-​art m’humiex l-​uniku prodott qattiel mibjugħ fis-​swieq tad-​dinja. Bejjiegħa taʼ l-​armi għatxanin għall-​flus qegħdin jagħmlu negozju taʼ bosta biljuni taʼ dollari madwar id-​dinja kollha. The Defense Monitor, ippubblikat miċ-​Ċentru taʼ Informazzjoni Għad-​Difiża, jirrapporta: “Matul dawn l-​aħħar għaxar snin [pajjiż ewlieni] esporta armi stmati li jiswew xi $135 Biljun.” Dan in-​nazzjon potenti wkoll “awtorizza l-​bejgħ inkredibbli taʼ b’kemm jiswew $63 Biljun t’armi, kostruzzjoni militari, u taħriġ lil 142 nazzjon.” Iż-​żrieragħ b’hekk qegħdin jinżergħu għal gwerer u sofferenzi umani futuri. Skond The Defence Monitor, fl-​“1990 biss, il-​gwerer żammew lil 5 miljun ruħ imħarrġin għat-​taqbid, swew iktar minn $50 Biljun, u qatlu kwart taʼ miljun ruħ, il-​biċċa l-​kbira minnhom nies ċivili.” Int ċertament li tistaʼ taħseb f’għadd taʼ gwerer li qamu minn dik is-​sena ’l hawn, billi ġabu biżaʼ u mewt għal iktar miljuni!

Iktar Irvinar Taʼ L-​Art u L-​Ħajja Taʼ Fuqha

Il-​professur Barry Commoner iwissi: “Jien nemmen li t-​tniġġis kontinwu taʼ l-​art, jekk ma jitwaqqafx, fl-​aħħar mill-​aħħar se jeqred l-​adattament taʼ din il-​pjaneta bħala post għall-​ħajja umana.” Hu jkompli jgħid li l-​problema m’hijiex l-​injoranza imma regħba apposta. Taħseb int li dak Alla ġust u taʼ mħabba tagħna se jittollera din is-​sitwazzjoni għal dejjem, billi jħallina esposti għal iżjed biżaʼ mit-​tniġġis? L-​irvinar taʼ l-​art jitlob kont minn dawk li qegħdin jirvinawha u mbagħad għal rijabilitazzjoni divina tal-​pjaneta. Dik hija parti minn dak li Ġesù ttratta dwaru fit-​tweġiba tiegħu lill-​appostli rigward ‘tmiem id-​dinja.’

Qabel ma nikkunsidraw kif Alla se jġib fis-​seħħ dak ir-​rendikont, ħalli neżaminaw iktar fil-​fond l-​istorja tal-​bniedem. Saħansitra lista parzjali tal-​vjolazzjonijiet mill-​bniedem hija taʼ swied il-​qalb: xita aċiduża u prattiċi rgħiba taʼ qtugħ taʼ siġar li jeqirdu foresti sħaħ; rimi bl-​addoċċ taʼ skart nukleari, kimiċi velenużi, u drenaġġ mhux maħdum; dgħajfien tas-​saff protettiv taʼ l-​ożonu; u użu bl-​addoċċ t’erbiċidi u pestiċidi.

Interessi kummerċjali jħammġu l-​art b’modi oħrajn għal profitt. Tunellati taʼ prodotti difettużi jintremew taʼ kuljum fix-​xmajjar, fl-​oċeani, fl-​ajru, u fil-​ħamrija. Ix-​xjenzati jħammġu s-​smewwiet b’imbarazz spazjali, billi ma jnaddfux warajhom, biex ngħidu hekk. L-​art malajr qiegħda ssir imdawra b’miżbla spazjali fl-​orbita. Li kieku ma kienx għall-​proċessi naturali li Alla għamel sabiex l-​art tistaʼ ġġedded lilha nfisha, id-​dar terrestrjali tagħna ma kenitx tibqaʼ ssostni l-​ħajja, u l-​bniedem x’aktarx li jkun ilu żmien twil li faga fl-​iskart tiegħu stess.

Il-bniedem saħansitra jniġġes lilu nnifsu. Ħu, per eżempju, l-​abbuż mit-​tabakk u minn drogi oħrajn. Fl-​Istati Uniti, abbuż minn sustanzi bħal dawn ġie msejjaħ “il-​problema tas-​saħħa numru wieħed tan-​nazzjon.” Din tiswa lil dak il-​pajjiż $238 biljun fis-​sena, li $34 biljun minnhom jintefqu f’“kura għas-​saħħa bla bżonn [jiġifieri, li tistaʼ tiġi evitata].” It-​tabakk xi kemm taħseb li jiswa flus u ħajjiet fejn tgħix int?

Modi t’għixien permessivi u xellerati, li ħafna jsostnu li huma bi dritt, ipproduċew ħsad terribbli taʼ mard trasmess sesswalment li jġib il-​mewt, billi jwassal lil ħafna għal għomor qasir. Ġie osservat li f’gazzetti ewlenin il-​kolonni taʼ l-​aħbarijiet dwar min ikun miet issa juru numru dejjem jiżdied taʼ wħud li jmutu bejn it-​30 u l-​50 sena. Għala? Spiss minħabba li vizzji qerrieda malajr poġġewhom għall-​frisk. Żjieda traġika bħal din taʼ mard sesswali u mard ieħor taqbel ukoll mal-​profezija taʼ Ġesù, għax hu qal li kien se jkun hemm “f’ħafna bnadi . . . mard li jittieħed.”

L-agħar tniġġis, madankollu, huwa dak tal-​moħħ u taʼ l-​ispirtu, jew l-​attitudni umana. Jekk tħares mill-​ġdid lejn il-​forom kollha taʼ kontaminazzjoni li semmejna s’issa, m’huwiex dan veru li ħafna minnhom huma riżultat taʼ mħuħ imniġġsin? Ħares lejn it-​tħarbit li mħuħ morda joħolqu fil-​forma taʼ qtil, stupri, serq, u tipi oħrajn taʼ vjolenza li persuna tagħmel fuq oħra. Bosta jirrikonoxxu, ukoll, li l-​miljuni t’aborti mwettqin kull sena huma sinjal taʼ kontaminazzjoni mentali u spiritwali.

Naraw ħafna affarijiet fl-​attitudni taż-​żgħażagħ. Nuqqas taʼ rispett lejn l-​awtorità tal-​ġenituri u t’oħrajn qiegħed iwassal għal tifrik fil-​familji u disprezz lejn il-​liġi u l-​bonordni. Dan in-​nuqqas taʼ biżaʼ bnin mill-​awtorità huwa marbut direttament man-​nuqqas taʼ spiritwalità taż-​żgħażagħ. Għalhekk, dawk li jgħallmu l-​evoluzzjoni, l-​ateiżmu, u teoriji oħrajn li jeqirdu l-​fidi jġorru ħtija konsiderevoli. Ħatjin ukoll huma l-​bosta edukaturi reliġjużi li, fl-​isforzi tagħhom biex ikunu aċċettati bħala moderni u “konformi,” taw daharhom lill-​Kelma t’Alla. Huma u oħrajn influwenzati mill-​għerf tad-​dinja jgħallmu filosofiji umani kontradittorji.

Ir-riżultati llum huma ovvji. In-​nies huma motivati, mhux mill-​imħabba lejn Alla u lejn għajrhom, imma mir-​regħba u mill-​mibgħeda. Il-​frott ħażin huwa immoralità, vjolenza, u disperazzjoni maʼ kullimkien. B’dispjaċir, dan iħalli lil nies onesti fil-​biżaʼ, inkluż biżaʼ li l-​bniedem se jeqred lilu nnifsu u lill-​pjaneta.

Sejjer Dan Imur Għall-​Agħar Jew Għall-​Aħjar?

X’hemm lest għall-​futur qarib rigward il-​biżaʼ? Sejjer il-​biżaʼ jkompli jiżdied, jew se jkun megħlub? Ħalli għal darba oħra ninnotaw x’qal Ġesù lill-​appostli tiegħu.

Hu pponta lejn xi ħaġa li se tiġri fil-​futur qarib​—tribulazzjoni kbira. Hawn huwa kliemu: “Minnufih, wara d-​diqa taʼ dawk il-​jiem, ix-​xemx tiddallam, il-​qamar jitlef id-​dija tiegħu, il-​kwiekeb jaqgħu mis-​sema, u l-​qawwiet tas-​sema jitheżhżu. Imbagħad jidher fis-​sema s-​sinjal taʼ Bin il-​Bniedem, il-​popli kollha taʼ l-​art jibdew jagħtu fuq sidirhom, u jaraw lil Bin il-​Bniedem ġej fuq is-​sħab tas-​sema b’qawwa u glorja kbira.”—Mattew 24:29, 30.

Mela nistgħu nistennew li t-​tribulazzjoni l-​kbira se tibda dalwaqt. Profeziji oħrajn tal-​Bibbja jindikaw li l-​ewwel parti tagħha se tkun ritaljazzjoni fuq ir-​reliġjon falza madwar il-​globu. Imbagħad se jseħħu dawk l-​iżviluppi li jixxokkjaw u li għadna kemm ikkwotajna, inkluż xi xorta taʼ fenomeni ċelestjali. X’se jkun l-​effett fuq miljuni taʼ nies?

Sewwa, ikkunsidra rakkont parallel tar-​risposta taʼ Ġesù, fejn insibu kummenti profetiċi amplifikati:

“U jkun hemm sinjali fix-​xemx u l-​qamar u l-​kwiekeb. Il-​ġnus fuq l-​art, b’qalbhom ittaqtaq, ma jafux x’jaqbdu jagħmlu minħabba l-​ħsejjes tal-​baħar u taʼ l-​imwieġ; in-​nies ruħhom ħierġa bil-​biżaʼ għax jobsru x’ikun ġej fuq id-​dinja, għax il-​qawwiet tas-​sema jitqallbu.”—Luqa 21:25, 26.

Dak jinsab quddiemna. Imma mhux il-​bnedmin kollha se jkunu mbagħad f’biżaʼ bħal dan li jġegħilhom iħossuhom ħażin. Għall-​kuntrarju, Ġesù qal: “Meta jibda jseħħ dan kollu, qawwu qalbkom u erfgħu raskom, għax il-​fidwa tagħkom hija fil-​qrib.”—Luqa 21:28.

Hu indirizza dak il-​kliem inkuraġġanti lis-​segwaċi veri tiegħu. Minflok ma jħossuhom ħażin jew jipparalizzaw ruħhom bil-​biżaʼ, huma se jkollhom raġuni għala jerfgħu rjushom bla biżaʼ, avolja jafu li l-​quċċata tat-​tribulazzjoni l-​kbira hija mminenti. Għala ebda biżaʼ?

Għax il-​Bibbja tgħid b’mod ċar li se jkun hemm min isalva minn din “it-​tribulazzjoni l-​kbira” kollha kemm hi. (Rivelazzjoni 7:14, New World Translation) Ir-​rakkont li jwiegħed dan jgħid li jekk aħna nkunu fost dawk li jsalvaw, nistgħu ngawdu barkiet minn id Alla li huma bla parallel. Dan ir-​rakkont itemm bl-​assiguranza li Ġesù “[j]kun ir-​ragħaj tagħhom; u hu jwassalhom ħdejn ilmijiet taʼ l-​għejun tal-​ħajja. U Alla jixxottalhom kull demgħa minn għajnejhom.”—Apokalissi 7:17.

Dawk​—u aħna nistgħu niġu inklużi—​li jgawdu barkiet bħal dawn m’humiex se jkollhom il-​biżaʼ li jnikket lin-​nies illum. Madankollu, dak ma jfissirx li ma se jkollhom assolutament ebda biżaʼ, għax il-​Bibbja turi tassew li hemm biżaʼ tajjeb u f’loku. L-​artiklu li jmiss se jikkunsidra dan x’inhu u kif għandu jeffettwana. (w95 10/15)

[Stampa f’paġna 6]

L-​adoraturi taʼ Jehovah b’hena jistennew id-​dinja ġdida li riesqa

[Sors taʼ l-​Istampa f’paġna 5]

Tniġġis: Ritratt: Godo-Foto; rocket: ritratt tal-​U.S. Army; siġar jaqbdu: Richard Bierregaard, Smithsonian Institution