“Kunu Lesti”
1 Fil-profezija straordinarja tiegħu dwar it-tmiem taʼ din is-sistema dinjija, Ġesù wissiena biex ma nkunux medhijin bl-ansjetajiet tal-ħajja taʼ kuljum. (Mt. 24:36-39; Lq. 21:34, 35) Ladarba t-tribulazzjoni l-kbira tistaʼ tfaqqaʼ minn ħin għal ieħor, huwa assolutament importanti li nagħtu kas it-twissija taʼ Ġesù: “Kunu lesti intom ukoll, għax qatt ma tistgħu tobsru s-siegħa li fiha jiġi Bin il-bniedem.” (Mt. 24:44) X’jistaʼ jgħinna f’din il-ħaġa?
2 Niġġieldu Kontra l-Ansjetajiet u l-Aljenazzjonijiet: Waħda min-nasbiet spiritwali li rridu noqogħdu għassa għaliha hija t-“tħassib għall-ħtiġijiet tal-ħajja.” (Lq. 21:34) F’ċerti pajjiżi huwa diffiċli ħafna biex wieħed jikseb il-bżonnijiet tal-ħajja minħabba l-faqar, il-qagħad, u l-għoli tal-ħajja. F’pajjiżi oħra, hija xi ħaġa normali li tikseb affarijiet materjali. Jekk aħna nibdew ninkwetaw biss fuq affarijiet materjali, inkunu fil-periklu li ma nibqgħux iffokati fuq l-affarijiet reali tas-Saltna. (Mt. 6:19-24, 31-33) Il-laqgħat Kristjani jgħinuna nibqgħu ffokati fuqhom. Tagħmilha l-mira tiegħek li tattendi kull laqgħa?—Lhud 10:24, 25.
3 Illum id-dinja hija mimlija aljenazzjonijiet li jistgħu faċilment jisirqulna ħin prezzjuż. L-użu tal-kompjuter jistaʼ jkun taʼ nasba jekk wieħed iqattaʼ ammont esaġerat taʼ ħin ifittex fl-Internet, jaqra u jibgħat messaġġi bl-E-mail, jew jilgħab logħob fuq il-kompjuter. Nistgħu naħlu sigħat twal mat-televixin, il-films, xi delizzju, qari sekulari, u sports, u mbagħad ftit jibqgħalna ħin jew enerġija għal attivitajiet spiritwali. Filwaqt li r-rikreazzjoni u l-mistrieħ jistgħu jipprovdu serħan temporanju, l-istudju persunali tal-Bibbja u bħala familja jġib barkiet dejjiema. (1 Tim. 4:7, 8) Int twarrab ħin biex timmedita fuq il-Kelma t’Alla kuljum?—Efes. 5:15-17.
4 Kemm għandna għalxiex inkunu grati li l-organizzazzjoni taʼ Jehovah ħejjiet programm taʼ taħriġ spiritwali biex jgħinna ‘nifilħu ngħaddu minn kull ma għandu jiġri u nieqfu quddiem Bin il-bniedem’! (Lq. 21:36) Jalla nieħdu vantaġġ sħiħ minn dawn il-provvedimenti u ‘nkunu lesti’ sabiex il-fidi tagħna “tasal għat-tifħir, għall-glorja, u għall-ġieħ, meta jidher Ġesù Kristu.”—1 Pt. 1:7.