Uħud li Jġorru d-Dawl—Għal Liema Għan?

“Jien ħtartek bħala dawl tal-​ġnus.”—ATTI 13:47.

1. L-​appostlu Pawlu kif kien influwenzat mill-​kmandament li hemm referenza għalih f’​Atti 13:47?

“JEHOVAH qiegħed kmandament fuqna f’dawn il-​kelmiet, ‘Jien ħtartek bħala dawl tal-​ġnus, għalik biex tkun salvazzjoni sal-​estremità tal-​art,’” qal l-​appostlu Pawlu. (Atti 13:47) Mhux biss qal hekk imma wkoll għaraf is-​serjetà tiegħu. Wara li sar Kristjan, Pawlu ddedika ħajtu biex iwettaq dan il-​kmandament. (Atti 26:​14-20) Tqiegħed ukoll fuqna dak il-​kmandament? Jekk inhu hekk, għala hu importanti għal żmienna?

Meta ‘d-​Dwal Intfew’ għall-​Umanità

2. (a) Hekk kif id-​dinja daħlet fiż-​żmien tat-​tmiem tagħha, x’seħħ li effettwa b’mod profond il-​klima spiritwali u morali? (b) Statista Ingliż kif irreaġixxa għal dak li ra qiegħed iseħħ f’Awissu tal-​1914?

² Qabel ma l-​biċċa l-​kbira tan-​nies ħajjin illum kienu twieldu, din id-​dinja daħlet fiż-żmien tat-​tmiem tagħha. Ġraw ħafna affarijiet kbar malajr, waħda wara l-​oħra. Satana x-​Xitan, il-​promotur ewlieni tad-​dlam spiritwali u morali, ġie mixħut lejn l-​art. (Efesin 6:12; Rivelazzjoni 12:7-12) L-​umanità kienet diġà mitfugħa fl-​ewwel gwerra dinjija tagħha. Kmieni f’Awissu tal-​1914, meta l-​gwerra kienet saret ċertezza, Sir Edward Grey, is-​segretarju tal-​istat għal affarijiet barranin Ingliż, ħares ’il barra mit-​tieqa tal-​uffiċċju tiegħu f’Londra u qal: “Il-​lampi qed jintfew mal-​Ewropa kollha; m’aħniex se nerġgħu narawhom jinxtegħlu tul ħajjitna.”

3. Liema suċċess kellhom il-​mexxejja dinjin f’li jipprovaw idawlu ħarset il-​bniedem lejn il-​ġejjieni?

³ Fi sforz biex iġġiegħel lil dawk id-​dwal jiġu lura, inħolqot il-​Lega tan-​Nazzjonijiet fl-1920. Imma d-​dawl bil-​kemm beda jnemnem. Mat-​tmiem tat-​tieni gwerra dinjija, il-​mexxejja dinjin reġgħu pprovaw, din id-​darba bl-​organizzazzjoni tal-​Ġnus Magħquda. Għal darb’oħra, id-​dwal ma ħeġġewx. Minħabba ċerti ġrajjiet iktar riċenti, madankollu, il-​mexxejja dinjin bdew jitkellmu dwar “ordni dinjija ġdida.” Imma ma tantx tistaʼ tgħid li xi “dinja ġdida” magħmula minnhom ipprovdiet paċi u sigurtà vera. Għall-​kuntrarju, il-konflitti bl-​armamenti, l-​inkwiet etniku, il-​kriminalità, il-​qagħad, il-​faqar, it-​tniġġis tal-​ambjent, u l-​mard għadhom kollha kemm huma jtellfu lin-​nies milli jgawdu l-​ħajja.

4, 5. (a) Meta u kif waqgħet dalma fuq il-​familja umana? (b) X’inhu neċessarju sabiex jiġi pprovdut serħan?

⁴ Fir-​realtà, kien ferm qabel l-​1914 li d-​dawl intefa għall-​bniedem. Dak seħħ madwar 6,000 sena ilu f’Għeden, meta l-​ewwel ġenituri umani tagħna għażlu li jagħmlu d-​deċiżjonijiet tagħhom stess bla ma jqisu xejn ir-​rieda espressa t’Alla. L-​esperjenzi koroh tar-​razza umana li seħħew minn dak iż-​żmien ’il hawn huma sempliċement episodji f’ħajja taħt dik li l-​Bibbja tirreferi għaliha bħala “l-​awtorità tad-​dlam.” (Kolossin 1:13) Kien taħt l-​influwenza taʼ Satana x-​Xitan li l-​ewwel bniedem, Adam, xeħet lid-​dinja fid-​dnub; u minn Adam id-​dnub u l-​mewt infirxu fuq il-​bnedmin kollha. (Ġenesi 3:1-6; Rumani 5:12) Il-​bnedmin b’hekk tilfu l-​approvazzjoni taʼ Jehovah, is-​Sors tad-​dawl u l-​ħajja.—Salm 36:9.

⁵ L-​uniku mod kif id-​dawl setaʼ jerġaʼ verament jiddi fuq xi ħadd mill-​bnedmin kellu jkun jekk huma jiksbu l-​approvazzjoni taʼ Alla Jehovah, il-​Ħallieq tal-​umanità. Imbagħad, “il-​kisja li qiegħda tiksi fuq il-​popli kollha,” il-​kundanna minħabba d-​dnub, tkun tistaʼ titneħħa. Dan kif jistaʼ jkun possibbli?—Isaija 25:7.

Il-​Wieħed Mogħti “bħala Dawl għall-​Ġnus”

6. Jehovah liema prospetti grandjużi għamel possibbli għalina permezz taʼ Ġesù Kristu?

⁶ Saħansitra qabel ma Adam u Eva tkeċċew mill-​Ġenna tal-​Art, Jehovah bassar “żerriegħa” li kellu jkun il-​ħellies taʼ dawk li jħobbu t-​tjieba. (Ġenesi 3:15) Wara t-​twelid uman taʼ dak iż-​Żerriegħa mwiegħed, Jehovah qanqal lix-​xwejjaħ Xmun, fit-​tempju f’Ġerusalemm, biex jidentifika lil dak bħala “dawl biex jitneħħa l-​velu mill-​ġnus.” (Luqa 2:29-32) Permezz tal-​fidi fis-​sagrifiċċju tal-​ħajja umana perfetta taʼ Ġesù, il-​bnedmin setgħu jinħelsu mill-​kundanna li tirriżulta mid-​dnub li twelidna bih. (Ġwann 3:36) Fi qbil mar-​rieda taʼ Jehovah, huma setgħu jħarsu ’l quddiem lejn ħajja taʼ dejjem fil-​perfezzjoni bħala parti mis-​Saltna tas-​sema jew bħala sudditi tagħha fil-​ġenna tal-​art. Xi provvediment meraviljuż hu dak!

7. Il-​wegħdiet f’​Isaija 42:​1-4 u t-​twettieq tagħhom fl-​ewwel seklu għala jimlewna bit-​tama?

⁷ Ġesù Kristu huwa hu stess il-​garanzija li dawn il-​prospetti grandjużi se jkunu realtà. F’konnessjoni mal-​fejqan li Ġesù ġab għal nies milqutin, l-​appostlu Mattew applika għalih dak li hemm miktub f’​Isaija 42:1-4. Dik l-​iskrittura tgħid, f’parti: “Ħares! Il-​qaddej tiegħi, li fuqu jien inżomm qabda soda! Il-​magħżul tiegħi, li lilu ruħi approvat! Jien qigħedt l-​ispirtu tiegħi fih. Ġustizzja għall-​ġnus hi dik li se jġib.” U mhux dan hu li għandhom bżonn in-​nies tal-​ġnus kollha? Il-​profezija tkompli: “Hu mhux se jgħajjat jew igħolli leħnu, u fit-​triq mhux se jħalli lil leħnu jinstemaʼ. Ebda qasba mfarrka ma se jikser; u inkwantu għal ftila baxxa tal-​kittien, hu mhux se jitfiha.” Fi qbil maʼ dan, Ġesù ma trattahomx bl-​aħrax lin-​nies li kienu diġà milqutin. Hu tħassarhom, għallimhom dwar il-​għanijiet taʼ Jehovah, u fejjaqhom.​—Mattew 12:15-21.

8. Ġesù f’liema sens ingħata minn Jehovah “bħala patt tan-​nies” u “bħala dawl tal-​ġnus”?

⁸ Id-​Donatur taʼ din il-​profezija jindirizza ruħu lill-​Qaddej tiegħu, lil Ġesù, u jgħid: “Jien innifsi, Jehovah, sejjaħtlek fit-​tjieba, u ssoktajt naqbadlek idek. U se nissalvagwardjak u nagħtik bħala patt tan-​nies, bħala dawl tal-​ġnus, għalik biex tiftaħ il-​għajnejn għomja, biex toħroġ ’il barra mill-​ħabs mudlam taħt l-​art lill-​priġunier, ’il barra mid-​dar taʼ detensjoni lil dawk li qegħdin bil-​qiegħda fid-​dlam.” (Isaija 42:​6, 7) Iva, Jehovah tana lil Ġesù Kristu bħala patt, bħala garanzija solenni mwiegħda. Kemm hu inkuraġġanti dan! Ġesù wera tħassib ġenwin għall-​umanità meta kien fuq l-​art; hu saħansitra ta ħajtu għall-​bnedmin. Dan hu dak li lilu Jehovah fdalu l-​ħakma fuq il-​ġnus kollha. Mhux taʼ b’xejn li Jehovah jirreferi għalih bħala dawl għall-​ġnus. Ġesù nnifsu qal: “Jien id-​dawl tad-​dinja.”​—Ġwann 8:12.

9. Ġesù għala ma daħalx b’ruħu u ġismu biex itejjeb is-​sistema taʼ affarijiet eżistenti fi żmienu?

⁹ Għal liema għan qeda Ġesù bħala d-​dawl tad-​dinja? Ċertament li ma kienx għal xi skop sekulari jew materjalista. Hu rrifjuta li jipprova jirranġa s-​sistema politika taʼ żmienu u ma ried jaċċetta ħatra taʼ sultan la mingħand Satana, il-​ħakkiem tad-​dinja, u lanqas mingħand il-​poplu. (Luqa 4:5-8; Ġwann 6:15; 14:30) Ġesù wera mogħdrija kbira lejn dawk li kienu milqutin u ġabilhom serħan b’modi li oħrajn ma setgħux. Imma kien jaf li ebda serħan permanenti ma kien possibbli fil-​qafas taʼ soċjetà umana li kienet taħt kundanna divina minħabba d-​dnub li kulħadd twieled bih u li kienet immanipulata minn forzi spirti mill-​agħar li ma jidhrux. B’dehen mingħand Alla, Ġesù ċċentra l-​ħajja kollha kemm hi tiegħu biex jagħmel ir-​rieda t’Alla.​—Ebrej 10:7.

10. Ġesù b’liema modi u għal liema għan qeda bħala d-​dawl tad-​dinja?

¹⁰ B’liema modi u għal liema għan, allura, qeda Ġesù bħala d-​dawl tad-​dinja? Hu ntefaʼ b’ruħu u ġismu f’li jippriedka l-​aħbar tajba tas-​Saltna t’Alla. (Luqa 4:43; Ġwann 18:37) Billi ta xiehda għall-​verità dwar il-​għan taʼ Jehovah, Ġesù wkoll igglorifika lill-​isem taʼ Missieru tas-​sema. (Ġwann 17:4, 6) Iktar minn hekk, bħala d-​dawl tad-​dinja, Ġesù kixef beraħ il-​qerq reliġjuż u b’hekk ipprovda ħelsien spiritwali għal dawk miżmumin fi rbit reliġjuż. Hu kixef lil Satana bħala dak li jimmanipula bil-​moħbi lil dawk li jħallu lilhom infushom ikunu wżati minnu. Ġesù wkoll identifika b’mod ċar ix-​xogħlijiet li jappartjenu lid-​dlam. (Mattew 15:3-9; Ġwann 3:19-21; 8:44) B’mod li jispikka, hu wera li kien id-​dawl tad-​dinja billi ċeda l-​ħajja umana perfetta tiegħu bħala rahan, u b’hekk fetaħ it-​triq għal dawk li jeżerċitaw fidi f’dan il-​provvediment biex ikollhom il-​maħfra tad-​dnubiet, relazzjoni approvata m’Alla, u l-​prospett taʼ ħajja eterna bħala parti mill-​familja universali taʼ Jehovah. (Mattew 20:28; Ġwann 3:16) U fl-​aħħarnett, billi żamm devozzjoni perfetta lejn Alla matul ħajtu kollha, Ġesù żamm fil-​għoli s-​sovranità taʼ Jehovah u ta prova li x-​Xitan hu giddieb, u b’hekk għamilha possibbli li dawk li jħobbu t-​tjieba jistgħu jiksbu benefiċċji eterni. Imma kellu Ġesù jkun l-​uniku wieħed li jġorr id-​dawl?

“Intom id-​Dawl tad-​Dinja”

11. Biex ikunu wħud li jġorru d-​dawl, id-​dixxipli taʼ Ġesù x’kellhom jagħmlu?

¹¹ F’​Mattew 5:14, Ġesù qal lid-​dixxipli tiegħu: “Intom id-​dawl tad-​dinja.” Huma kellhom isegwu fil-​passi tiegħu. Kemm bil-​mod kif igħixu ħajjithom u kemm bl-​ippridkar tagħhom, huma kellhom jidderieġu lil oħrajn lejn Jehovah bħala s-​Sors tal-​veru tidwil. B’imitazzjoni taʼ Ġesù, huma kellhom jagħmlu magħruf l-​isem taʼ Jehovah u jżommu s-​sovranità Tiegħu fil-​għoli. Bħalma għamel Ġesù, hekk huma kellhom jipproklamaw is-​Saltna t’Alla bħala l-​unika tama għall-​bniedem. Kellhom ukoll jikxfu l-​qerq reliġjuż, ix-​xogħlijiet li jappartjenu lid-​dlam, u jikxfu lill-​wieħed mill-​agħar li qiegħed wara dawn l-​affarijiet. Is-​segwaċi taʼ Kristu kellhom igħidu lin-​nies maʼ kullimkien dwar il-​provvediment taʼ mħabba taʼ Jehovah għal salvazzjoni permezz taʼ Ġesù Kristu. B’liema żelu l-​Kristjani bikrin wettqu dak l-​inkarigu, billi l-​ewwel bdew minn Ġerusalemm u l-​Ġudea u mbagħad marru fis-​Samarija, bħalma kien ikkmandahom Ġesù!​—Atti 1:8

12. (a) Safejn kellu jestendi d-​dawl spiritwali? (b) L-​ispirtu taʼ Jehovah x’għen lil Pawlu biex jagħraf dwar Isaija 42:​6, u dik il-​profezija kif għandha teffettwa lill-​ħajjiet tagħna?

¹² Madankollu, l-​ippridkar tal-​aħbar tajba ma kellux ikun limitat għal dik il-​għalqa. Ġesù struwixxa lis-​segwaċi tiegħu biex ‘jagħmlu dixxipli minn nies tal-​ġnus kollha.’ (Mattew 28:19) Fi żmien il-​konversjoni taʼ Sawlu taʼ Tarsu, il-​Mulej indika speċifikament li Sawlu (li sar l-​appostlu Pawlu) kellu jippriedka mhux biss lil-​Lhud imma wkoll lill-​Ġentili. (Atti 9:15) Bil-​għajnuna tal-​ispirtu qaddis, Pawlu sar japprezza dak x’kien jinvolvi. B’hekk, hu għaraf li l-​profezija taʼ Isaija 42:6, li ssib it-​twettieq tagħha direttament fi Kristu, hija wkoll implikazzjoni taʼ kmand għal dawk kollha li jeżerċitaw fidi fi Kristu. Mela, f’​Atti 13:​47, meta kkwota minn Isaija, Pawlu qal: “Jehovah qiegħed kmandament fuqna f’dawn il-​kelmiet, ‘Jien ħtartek bħala dawl tal-​ġnus, għalik biex tkun salvazzjoni sal-​estremità tal-​art.’” Xi ngħidu dwarek? Daħħalt int f’qalbek dak l-​obbligu li tkun wieħed li jġorr id-​dawl? Bħal Ġesù u Pawlu, tiċċentra int lil ħajtek f’li tagħmel ir-​rieda t’Alla?

Dawl u Verità mingħand Alla biex Imexxuna

13. Fi qbil maʼ Salm 43:​3, x’inhi t-​talba ħerqana tagħna, u dan jissalvagwardjana kontra liema ħaġa?

¹³ Kieku kellna aħna, bl-​invenzjonijiet tagħna stess, nipprovaw ‘inġiegħlu lid-​dawl jinxtelu mill-​ġdid,’ biex indawlu l-​futur tal-​umanità, konna nkunu qed nitilfu serjament il-​punt tal-​Kelma mnebbħa t’Alla. Tagħmel x’tagħmel id-​dinja in ġenerali, madankollu, il-​Kristjani ġenwini jħarsu lejn Jehovah bħala s-​sors veru taʼ dawl. It-​talba tagħna hi bħal dik li nsibu f’​Salm 43:3, li jgħid: “Ibgħat id-​dawl tiegħek u l-​verità tiegħek. Jalla jmexxuni dawn infushom. Jalla jġibuni lejn il-​muntanja qaddisa tiegħek u lejn it-​tabernaklu grandjuż tiegħek.”

14, 15. (a) Jehovah b’liema modi qiegħed issa jibgħat id-​dawl u l-​verità tiegħu? (b) Kif nistgħu aħna nuru li d-​dawl u l-​verità t’Alla tassew imexxuna?

¹⁴ Jehovah ikompli jwieġeb dik it-​talba tal-​qaddejja leali tiegħu. Hu jibgħat id-​dawl billi jiddikjara l-​għan tiegħu, billi jgħin lill-​qaddejja tiegħu biex jifhmuh, u mbagħad billi jġiegħel li jseħħ dak li jkun iddikjara. Meta nitolbu ’l Alla, ma hix xi sempliċi formalità, magħmula biss biex tagħti dehra taʼ qdusija. Ix-​xewqa ħerqana tagħna hi li d-​dawl li jiġi mingħand Jehovah se jmexxina, bħalma jgħid is-​salm. Aħna naċċettaw ir-​responsabbiltà li tiġi maʼ li wieħed jirċievi d-​dawl li Alla jipprovdi. Bħall-​appostlu Pawlu, aħna nagħrfu li t-​twettieq tal-​Kelma taʼ Jehovah iġorr miegħu implikazzjoni taʼ kmand għal dawk li jeżerċitaw fidi fih. Inħossuna bħal uħud li għandna d-​dejn maʼ nies oħra sakemm inkunu tajniehom l-​aħbar tajba li Alla fdalna għal dak il-​għan.​—Rumani 1:​14, 15.

¹⁵ Id-​dawl u l-​verità li Jehovah bagħat fi żmienna jagħmluha ħaġa ċara li Ġesù Kristu qiegħed jaħkem attivament mit-​tron tiegħu fis-​sema. (Salm 2:6-8; Rivelazzjoni 11:15) Ġesù bassar li matul il-​preżenza rjali tiegħu, din l-​aħbar tajba tas-​Saltna kellha tkun ippridkata fl-​art abitata kollha bħala xiehda. (Mattew 24:3, 14) Dak ix-​xogħol qiegħed isir issa, u b’mod intens, mal-​globu kollu. Jekk qegħdin nagħmlu dak ix-​xogħol bħala l-​iktar ħaġa importanti fil-​ħajja tagħna, allura d-​dawl t’Alla u l-​verità tiegħu qegħdin imexxuna, bħalma qal is-​salmista.

Il-​Glorja Nfisha taʼ Jehovah Iddiet

16, 17. Jehovah kif għamel il-​glorja tiegħu tiddi fuq l-​organizzazzjoni bħal mara tiegħu fl-​1914, u liema kmand taha?

¹⁶ B’lingwaġġ li jqanqal il-​qalb, l-​Iskrittura tiddeskrivi l-​manjiera kif id-​dawl divin qiegħed jiġi mqassam lin-​nies kullimkien. Isaija 60:1-3, li hu indirizzat lill-​“mara” taʼ Jehovah, jew l-​organizzazzjoni tiegħu fis-​sema taʼ qaddejja leali, jgħid: “Qum, O mara, ixħet id-​dawl, għax dawlek ġie u fuqek l-​istess glorja taʼ Jehovah iddiet. Għax, ħares! dalma nfisha se tiksi l-​art, u swidija kbira l-​gruppi nazzjonali; imma fuqek Jehovah se jiddi, u fuqek il-​glorja tiegħu stess se tidher. U ġnus ċertament li se jmorru lejn dawlek, u slaten lejn it-​tlellix tad-​dija tiegħek.”

¹⁷ Il-​glorja taʼ Jehovah iddiet fuq l-​organizzazzjoni tiegħu bħal mara fis-​sema fis-​sena 1914 meta, wara perijodu twil taʼ stennija, hi welldet lis-​Saltna Messjanika, b’Ġesù Kristu bħala Sultan. (Rivelazzjoni 12:1-5) Id-​dawl glorjuż taʼ Jehovah jiddi b’approvazzjoni divina fuq dak il-​gvern bħala l-​wieħed li hu sewwa u bi dritt għall-​art kollha.

18. (a) Id-​dlam għala jiksi lill-​art, bħalma hu mbassar f’Isaija 60:2? (b) Individwi kif jistgħu jinħelsu mid-​dlam tal-​art?

¹⁸ B’kuntrast, dlam jiksi l-​art u swidija kbira l-​gruppi nazzjonali. Għala? Għaliex il-​ġnus ma jaċċettawx il-​gvern tal-​Iben għażiż t’Alla u huma favur il-​ħakma mill-​bniedem. Huma jaħsbu li billi jeħilsu minn forma waħda taʼ gvern u jadottaw oħra, se jsolvu l-​problemi tagħhom. Imma dan ma jġibx is-​serħan li jittamaw għalih. Jonqsu li jaraw min hemm wara x-​xena jimmanuvra lill-​ġnus mill-​qasam tal-​ispirti. (2 Korintin 4:4) Huma ma jaċċettawx lis-​Sors tad-​dawl veru u għalhekk qegħdin fid-​dlam. (Efesin 6:12) Hu x’inhu dak li jagħmlu l-​ġnus, madankollu, xi individwi jistgħu jiġu meħlusin minn dak id-​dlam. B’liema mod? Billi jpoġġu fidi sħiħa fis-​Saltna t’Alla u billi jissottomettu ruħhom lejha.

19, 20. (a) Il-​glorja taʼ Jehovah kif u għala iddiet fuq is-​segwaċi midlukin taʼ Ġesù? (b) Jehovah għal liema raġuni għamel lill-​uħud midlukin tiegħu uħud li jġorru d-​dawl? (ċ) Bħalma hu mbassar, “slaten” u “ġnus” kif inġibdu lejn id-​dawl mogħti minn Alla?

¹⁹ Il-​Kristjaneżmu ma poġġiex fidi fis-​Saltna t’Alla u ma ssottomettiex ruħu lejha. Imma s-​segwaċi taʼ Ġesù Kristu midlukin bl-​ispirtu hekk għamlu. Bħala riżultat, id-​dawl taʼ approvazzjoni divina taʼ Jehovah idda fuq dawn ir-​rappreżentanti viżibbli tal-​mara tiegħu fis-​sema, u l-​glorja tiegħu tidher fuqhom. (Isaija 60:​19-21) Huma jgawdu dawl spiritwali li ebda bidla fix-​xena politika jew ekonomika tad-​dinja ma tistaʼ teħodulhom. Huma ġarrbu l-​ħelsien taʼ Jehovah minn Babilonja l-​Kbira. (Rivelazzjoni 18:4) Igawdu t-​tbissima taʼ approvazzjoni tiegħu għaliex aċċettaw id-​dixxiplina tiegħu u żammew lealment mas-​sovranità tiegħu. Għandhom prospetti mill-​isbaħ għall-​futur, u jifirħu bit-​tama li hu poġġa quddiemhom.

²⁰ Imma Jehovah għal liema għan ittrattahom b’dan il-​mod? Bħalma qal hu nnifsu f’​Isaija 60:21, huwa sabiex ikun jistaʼ jiġi ‘msebbaħ,’ sabiex ismu jistaʼ jiġi onorat u oħrajn jistgħu jinġibdu lejh bħala l-​uniku Alla veru—u dan jirriżulta f’benefiċċju dejjiemi għalihom. Fi qbil maʼ dan, fis-​sena 1931 dawn l-​adoraturi taʼ dak Alla veru adottaw l-​isem Xhieda taʼ Jehovah. Bħala riżultat tal-​għoti taʼ xiehda tagħhom, kienu “slaten” miġbudin lejn id-​dawl li rriflettew huma, bħalma bassar Isaija? Iva! Mhux il-​ħakkiema politiċi tal-​art, imma n-​numru li fadal taʼ dawk li qegħdin f’linja biex jaħkmu bħala slaten maʼ Kristu fis-​Saltna tas-​sema tiegħu. (Rivelazzjoni 1:5, 6; 21:24) U xi ngħidu dwar “ġnus”? Ġew huma miġbudin lejn dan id-​dawl? Definittivament li iva! Ebda ġens politiku individwali ma nġibed, imma folla kbira taʼ nies minn dawn il-​ġnus kollha ħadu l-​waqfa tagħhom fuq in-​naħa tas-​Saltna t’Alla, u jistennew bil-​ħerqa ħelsien għal ġod-​dinja ġdida t’Alla. Se tkun dinja verament ġdida li fiha t-​tjieba se tkun prevalenti.​—2 Pietru 3:13; Rivelazzjoni 7:9, 10.

21. Kif nistgħu aħna nuru li ma tlifniex il-​għan tal-​qalb tajba mhix mistħoqqa taʼ Jehovah f’li tana għarfien tar-​rieda tiegħu?

²¹ Inti personalment wieħed jew waħda minn dik il-​qatgħa li dejjem tikber taʼ wħud li jġorru d-​dawl? Jehovah tana li nifhmu r-​rieda tiegħu sabiex, bħal Ġesù, nistgħu nkunu wħud li jġorru d-​dawl. Billi nuru żelu fix-​xogħol li Jehovah fada lill-​qaddejja tiegħu fi żmienna, jalla lkoll kemm aħna nuru li ma tlifniex il-​għan tal-​qalb tajba mhix mistħoqqa li Alla estenda lilna. (2 Korintin 6:1, 2) M’hemm ebda xogħol li hu iktar importanti fi żmienna. U m’hemm ebda privileġġ akbar li jistaʼ jkun tagħna milli nigglorifikaw lil Jehovah billi nirriflettu lil oħrajn id-​dawl glorjuż li jiġi mingħandu.

Kif Twieġeb Int?

◻ X’inhuma l-​għeruq tal-​kawża għall-​problemi serji tal-​bniedem?

◻ B’liema modi huma “d-​dawl tad-​dinja” kemm Ġesù u kemm id-​dixxipli tiegħu?

◻ Id-​dawl u l-​verità taʼ Jehovah kif qegħdin imexxuna?

◻ Jehovah kif ġiegħel li l-​glorja tiegħu tiddi fuq l-​organizzazzjoni tiegħu?

◻ Jehovah għal liema għan għamel lin-​nies tiegħu wħud li jġorru d-​dawl?