Il-​Verità Tittrasforma l-​Ħajjiet

HUWA taʼ swied il-​qalb imma veru li l-​ħajjiet taʼ tant nies illum huma diffiċli, saħansitra kritiċi. Huwa possibbli għal nies bħal dawn li jsibu l-​hena? Xi wħud huma kriminali li jivvittimizzaw lill-​proxxmu tagħhom. Jistgħu dawn qatt isiru membri onesti tas-​soċjetà? It-​tweġiba għal dawn iż-​żewġ mistoqsijiet hija iva. In-​nies jistgħu jinbidlu. Il-​ħajjiet jistgħu jiġu ttrasformati. L-​appostlu Pawlu wera kif meta kiteb: “[I]nbidlu skond it-​tiġdid taʼ fehmietkom, biex iseħħilkom tagħrfu x’inhi r-​rieda taʼ Alla, x’inhu t-​tajjeb li jogħġbu, x’inhu perfett.”—Rumani 12:2.

Meta nisimgħu l-​frażi r-​‘rieda perfetta taʼ Alla’ jistaʼ jiġi f’moħħna dak li Ġesù qal lid-​dixxipli tiegħu iktar minn 20 sena qabel ma Pawlu kiteb il-​kliem t’hawn fuq. Ġesù qal: “Tagħrfu l-​verità u l-​verità teħliskom.” (Ġwann 8:32) Bil-​kelma “verità,” Ġesù ried ifisser it-​tagħrif imnebbaħ b’mod divin​—speċjalment tagħrif rigward ir-​rieda t’Alla—​li huwa ppreservat għalina fil-​Bibbja. (Ġwann 17:17) Tassew li l-​verità tal-​Bibbja tagħmel lin-​nies ħelsin? Li wieħed jgħix f’armonija mar-​rieda t’Alla tassew li jbiddel il-​ħajjiet? Dażgur li hekk jagħmel. Ikkunsidra xi ftit eżempji.

Skop fil-​Ħajja

M’ilux ħafna, Moisés, minn Ġibiltà, kien raġel verament imdejjaq. Hu jgħid: “Kont sakranazz u kont norqod barra t-​triq. Ħassejtni ddisprat. Kull fil-​għaxija kont nitlob lil Alla biex ikollu ħniena minni u ma jħallinix nissaporti ġurnata oħra. Kont nibki kull meta kont nitlob lil Alla dwar għala kont f’din id-​dinja jekk jien ma kont tajjeb għal xejn, mingħajr xogħol, mingħajr familja, u mingħajr ma kelli lil ħadd li jgħinni. Għala għandi nibqaʼ ngħix?” Imbagħad, ġara xi ħaġa.

Moisés ikompli: “Kont naf li Alla kien semaʼ t-​talba tiegħi meta ltqajt maʼ Roberto, wieħed mix-​Xhieda taʼ Jehovah. Roberto tani Bibbja u kopja tal-​brochure Alla X’Jirrikjedi Minna?a bħala għajnuna għall-​istudju tal-​Bibbja. Kuljum konna nistudjaw il-​Bibbja flimkien fuq il-​bank li kont norqod fuqu bil-​lejl. Wara xahar Roberto ħadni għal-​laqgħa fis-​Sala tas-​Saltna lokali tax-​Xhieda taʼ Jehovah. F’qasir żmien, il-​verità tal-​Bibbja bidlet kompletament l-​opinjoni tiegħi. M’għadnix norqod barra; lanqas m’għadni nixrob jew inpejjep. Ħajti nbidlet, u nħossni ferħan. Nittama li dalwaqt nitgħammed u naqdi lil Jehovah bħala wieħed mix-​Xhieda tiegħu.”

Xi trasformazzjoni din! Meta n-​nies ikunu mingħajr tama, ir-​raġuni taʼ spiss tkun nuqqas t’għarfien. Huma ma jafux dwar Alla jew l-​iskopijiet meraviljużi tiegħu. Fil-​każ taʼ Moisés, meta kiseb dak l-​għarfien, dan tah il-​qawwa u l-​kuraġġ li jbiddel ħajtu. It-​talba tas-​salmista lil Alla ġiet imwieġba fil-​każ taʼ Moisés: “Ibgħat id-​dawl tiegħek u s-​sewwa tiegħek: huma jmexxuni; iwassluni sa l-​għolja mqaddsa tiegħek u sa l-​għerejjex tiegħek.”—Salm 43:3.

Fil-Beliże, Daniel kellu esperjenza simili. Daniel ma kienx jorqod barra t-​triq​—kellu impjieg prestiġjuż. Imma għal 20 sena hu ġġieled biex jaqtaʼ l-​vizzju tad-​drogi u l-​alkoħol u kien jgħix ħajja immorali. Għalkemm ġie mrobbi bħala Kattoliku, Daniel ma setax jifhem għala kien qed jgħix, u kien jiddubita l-​eżistenza t’Alla. Mar fil-​knejjes taʼ reliġjonijiet differenti biex ifittex l-​għajnuna imma sab li ħafna minn ħbiebu li jmorru l-​knisja u saħansitra xi wħud mill-​membri tal-​kleru li kienu ħbieb tiegħu kienu jabbużaw mid-​drogi jew mill-​alkoħol. Sadattant, martu kienet waslet biex tiddivorzjah.

B’disperazzjoni Daniel daħal f’ċentru taʼ rijabilitazzjoni. Xorta waħda, hu kien jaf li wara li joħroġ, malajr kien se jerġaʼ lura għad-​drogi jekk ma kienx se jirċievi l-​għajnuna. Imma liema tip t’għajnuna? F’Mejju taʼ l-​1996, jumejn wara li ħareġ miċ-​ċentru tar-​rijabilitazzjoni, Daniel avviċina lil wieħed mix-​Xhieda taʼ Jehovah u ħasdu bl-​appell, “Studja l-​Bibbja miegħi jekk jogħġbok.” Ix-​Xhud irranġa li jistudja l-​Bibbja maʼ Daniel darbtejn fil-​ġimgħa, u Daniel malajr beda jirranġa ħajtu biex tiġi taqbel mar-​rieda t’Alla u ssostitwixxa l-​ħbieb taʼ qabel tiegħu maʼ ħbieb Kristjani li ma kinux jabbużaw mid-​drogi jew mill-​alkoħol u li kienu jaħarbu mill-​immoralità. B’hekk, Daniel sab li dak li tgħid il-​Bibbja huwa minnu: “Min jagħmilha maʼ l-​għaref, isir għaref, min imur mal-​boloh, jaqaʼ fl-​hemm.” (Proverbji 13:20) F’qasir żmien qal: “Din hi l-​ewwel darba f’ħajti li sirt naf x’ifisser li jkollok kuxjenza nadifa.” Il-​ħajja taʼ Daniel ukoll ġiet ittrasformata.

Fil-Puerto Rico, raġel ieħor esperjenza bidla notevoli. Hu kien fil-​ħabs u kien ikkunsidrat perikoluż ħafna, minħabba li kien qatel bosta nies. Setgħet il-​verità tal-​Bibbja tbiddlu? Iva. Wieħed mix-​Xhieda taʼ Jehovah rnexxielu jagħtih xi ftit kopji tar-​rivisti It-​Torri taʼ l-​Għassa u Stenbaħ!, u malajr talbu iżjed. Inbeda studju tal-​Bibbja miegħu, u hekk kif il-​verità tal-​Bibbja bdiet teffettwalu qalbu, il-​bidliet li għamel setaʼ jarahom kulħadd. Waħda mill-​ewwel evidenzi tal-​bidla tiegħu kienet li qataʼ x-​xagħar twil u qaxxar il-​leħja mgerfxa li kellu.

Il-Bibbja tgħid li Alla jaħfer lill-​midinbin li verament jindmu u jbiddlu l-​mod taʼ ħajja tagħhom. Pawlu kiteb: “Ma tafux li l-​inġusti ma jirtuhiex is-​Saltna taʼ Alla? . . . U minn dawn kienu xi wħud minnkom. Imma issa tnaddaftu.” (1 Korintin 6:9, 11) Mingħajr ebda dubju, dan il-​kliem farraġ lil dan ir-​raġel, bħalma farrġu l-​kliem taʼ Atti 24:15: “Kemm it-​tajbin u kemm il-​ħżiena għad iqumu minn bejn l-​imwiet.” Hu qal: “Irrid inkun hemm meta jseħħ l-​irxoxt biex b’hekk inkun nistaʼ nitlob maħfra lil dawk li qtilt.”

Iva, il-​ħajjiet jiġu ttrasformati meta n-​nies jagħtu kas il-​verità tal-​Kelma t’Alla, il-​Bibbja. Tabilħaqq, se jasal żmien meta l-​bnedmin kollha li jibqgħu ħajjin se jkunu ġabu ħajjithom f’armonija mar-​rieda t’Alla. Xi trasformazzjoni se tkun din! Imbagħad, se titwettaq il-​profezija: “Ma jagħmlux aktar deni u anqas ħsara fuq il-​muntanja qaddisa kollha tiegħi, għax mimlija hi l-​art bl-​għarfien tal-​Mulej bħalma l-​baħar hu miksi bl-​ilmijiet.”—Isaija 11:9. (w98 1/1)

[Nota taʼ taħt]