Kapitlu Ħamsa

Il-​Libertà li Jgawdu l-​Aduraturi taʼ Jehovah

1, 2. (a) Liema tip taʼ libertà ta Alla lill-​ewwel koppja umana? (b) Semmi ftit mil-​liġijiet li kkontrollaw l-​attività taʼ Adam u Eva.

META Jehovah ħalaq l-​ewwel raġel u mara, huma kienu jgawdu libertà ferm iktar minn dik li għandhom il-​bnedmin illum. Id-​dar tagħhom kienet il-​Ġenna taʼ l-​art, il-​Ġnien sabiħ taʼ l-​Għeden. L-​ebda mard ma ħassrilhom it-​tgawdija tal-​ħajja, peress li kellhom imħuħ u iġsma perfetti. Ma kinitx qed tistenniehom il-​mewt bħalma tistenna lil kulħadd minn dakinhar ’l hawn. Ukoll, huma ma kinux robots imma kellhom l-​għotja meraviljuża tal-​libertà taʼ l-​għażla, l-​abbiltà li jieħdu deċiżjonijiet għalihom infushom. Madankollu, biex ikomplu jgawdu din il-​libertà meraviljuża kellhom jirrispettaw il-​liġijiet t’Alla.

² Per eżempju, ikkunsidra l-​liġijiet naturali li Alla stabbilixxa. M’għandniex xi ngħidu, dawn il-​liġijiet forsi ma ngħatawx bil-​miktub, imma Adam u Eva kienu magħmulin b’mod li kien sempliċement naturali għalihom li jobduhom. L-​aptit tagħhom kien jurihom il-​bżonn li jieklu; l-​għatx, il-​bżonn li jixorbu; inżul ix-​xemx, il-​bżonn li jorqdu. Jehovah tahom ukoll inkarigu taʼ xogħol. Dan l-​inkarigu fil-​fatt kien fl-​istess ħin liġi għax kien jikkontrolla l-​mod kif jaġixxu. Kellhom iġibu t-​tfal, jeżerċitaw ħakma fuq il-​ħafna għamliet taʼ ħajja fuq l-​art, u jkabbru l-​Ġenna taʼ l-​art sakemm tkopri l-​globu kollu. (Ġenesi 1:28; 2:15) X’liġi pjaċevoli u taʼ benefiċċju kienet din! Kienet tagħtihom xogħol sodisfaċenti għall-​aħħar, waqt li għenithom jużaw il-​fakultajiet tagħhom bis-​sħiħ f’modi siewja. Ukoll, kellhom libertà kbira biex jieħdu deċiżjonijiet dwar kif iwettqu l-​inkarigu tagħhom. X’setaʼ jitlob iktar dak li jkun?

3. Adam u Eva kif setgħu jitgħallmu jużaw b’mod għaqli l-​libertà tagħhom li jieħdu d-​deċiżjonijiet?

³ M’għandniex xi ngħidu, meta Adam u Eva kellhom il-​privileġġ li jieħdu d-​deċiżjonijiet, ma kienx ifisser li kwalunkwe deċiżjoni li kienu se jieħdu kien se jkollha riżultati tajbin. Il-​libertà tagħhom li jieħdu deċiżjonijiet kellha tiġi eżerċitata fil-​limiti tal-​liġijiet u l-​prinċipji t’Alla. Kif setgħu jitgħallmuhom dawn? Billi jagħtu widen lill-​Ħallieq tagħhom u josservaw ix-​xogħlijiet tiegħu. Alla ta lil Adam u Eva l-​intelliġenza meħtieġa biex japplikaw dak li jkunu tgħallmu. Ladarba nħolqu perfetti, l-​inklinazzjoni naturali tagħhom kienet li jirriflettu l-​kwalitajiet t’Alla meta jieħdu xi deċiżjoni. Tabilħaqq, riedu joqogħdu attenti li jagħmlu dan jekk tassew kienu japprezzaw dak li Alla għamel għalihom u riedu jogħġbuh.—Ġenesi 1:​26, 27; Ġwann 8:29.

4. (a) Il-​kmand li ngħata lil Adam u Eva biex ma jiklux mill-​frott taʼ siġra waħda ċaħħadhom mil-​libertà? (b) Għala kienet ħtieġa xierqa din?

⁴ Mela, b’mod ġust Alla għażel li jittestja d-​devozzjoni tagħhom lejh bħala d-​Donatur tal-​Ħajja u kemm kienu lesti li jibqgħu fil-​limiti dikjarati minnu. Jehovah ta lil Adam dan il-​kmand: “Mis-​siġar kollha tal-​ġnien tistaʼ tiekol, imma mis-​siġra taʼ tagħrif it-​tajjeb u l-​ħażin, la tikolx minnha, għax dak in-​nhar li tiekol minnha żgur li tmut.” (Ġenesi 2:​16, 17) Wara li nħolqot Eva, hi wkoll ġiet informata b’din il-​liġi. (Ġenesi 3:​2, 3) Kienet din ir-​restrizzjoni se ċċaħħadhom mil-​libertà? Dażgur li le. Kellhom abbundanza kbira u minn kull tip taʼ ikel tajjeb x’jieklu mingħajr ma jieklu l-​frott taʼ dik is-​siġra. (Ġenesi 2:​8, 9) Kien tassew xieraq li jirrikonoxxu li l-​art tappartjeni lil Alla, ladarba ħalaqha hu. Għalhekk, hu għandu d-​dritt li jagħmel liġijiet li jaqblu maʼ l-​iskop tiegħu u li minnhom jibbenefikaw il-​bnedmin.—Salm 24:​1, 10.

5. (a) Adam u Eva kif tilfu l-​libertà glorjuża li kellhom? (b) X’inhu li ħa post il-​libertà li kienu gawdew Adam u Eva, u aħna kif ġejna effettwati?

⁵ Imma x’ġara? Imqanqal minn ambizzjoni egoista, kien hemm anġlu li uża l-​libertà taʼ l-​għażla b’mod ħażin u sar Satana, li jfisser “Avversarju.” Hu qarraq b’Eva billi assiguraha minn xi ħaġa kontra r-​rieda t’Alla. (Ġenesi 3:​4, 5) Adam ngħaqad m’Eva u kiser il-​liġi t’Alla. Talli ħadu dak li ma kienx jappartjeni lilhom, huma tilfu l-​libertà glorjuża li kellhom. Id-​dnub sar dak li jikkontrollahom u, bħalma kien wissa Alla, wara ġiet il-​mewt. Il-​wirt li għaddew lin-​nisel tagħhom kien id-​dnub—muri fit-​tendenza lejn il-​ħażen li l-​bniedem jitwieled biha. Id-​dnub ġab ukoll dgħjufijiet li rriżultaw f’mard, xjuħija, u mewt. L-​inklinazzjoni lejn il-​ħażin, li saret agħar minħabba l-​influwenza taʼ Satana, ipproduċiet soċjetà umana magħrufa għall-​mibegħda, il-​kriminalità, il-​moħqrija, u l-​gwerer li bihom mietu ħafna miljuni taʼ nies. X’kuntrast mal-​libertà li Alla ta lill-​bniedem fil-​bidu!—Dewteronomju 32:​4, 5; Ġob 14:​1, 2; Rumani 5:12; Apokalissi 12:9.

Fejn Tistaʼ Tinstab il-​Libertà

6. (a) Fejn tistaʼ tinstab il-​libertà vera? (b) Dwar liema tip taʼ libertà kien qed jitkellem Ġesù?

⁶ Meta tqis il-​kundizzjonijiet ħżiena li jeżistu kullimkien illum, m’għandniex għalfejn nistagħġbu li n-​nies jixtiequ iktar libertà. Imma fejn tistaʼ tinstab il-​libertà vera? Ġesù qal: “Jekk iżżommu fil-​kelma tiegħi, tkunu tassew dixxipli tiegħi, u tagħrfu l-​verità u l-​verità teħliskom.” (Ġwann 8:​31, 32) Din il-​libertà m’hijiex minn dak it-​tip li l-​bnedmin jittamaw għaliha meta jiċħdu lil xi ħakkiem jew xi gvern għax jiffavorixxu xi ħaġa oħra. Minflok, din il-​libertà tmur eżatt fil-​qalba tal-​problemi tal-​bniedem. Ġesù kien qed jiddiskuti dwar il-​libertà mill-​jasar tad-​dnub. (Ġwann 8:​24, 34-36) B’hekk, jekk xi ħadd isir dixxiplu veru taʼ Ġesù Kristu, hu jesperjenza bidla notevoli f’ħajtu, ħelsien!

7. (a) F’liema sens nistgħu nkunu meħlusin mid-​dnub issa? (b) X’irridu nagħmlu biex ikollna din ir-​rieda ħielsa?

⁷ Dan ma jfissirx li fil-​preżent il-​Kristjani veri ma jħossux l-​effetti tat-​tendenza lejn l-​imġiba midinba li twieldu biha. Ladarba wirtu d-​dnub, huma għadhom jissieltu minħabba fih. (Rumani 7:​21-25) Madankollu, jekk xi ħadd tassew jgħix fi qbil mat-​tagħlim taʼ Ġesù, ma jibqax iktar ilsir tad-​dnub. Id-​dnub ma jibqax iktar għalih bħala dittatur li jagħtih l-​ordnijiet u li jrid jobdihom b’għajnejh magħluqa. Ma jkunx maqbud f’ħajja li ma jkollhiex skop u li tħallih b’kuxjenza mtebbgħa. Hu jgawdi kuxjenza nadifa quddiem Alla għax id-​dnubiet tal-​passat ikunu ġew maħfura fuq il-​bażi tal-​fidi tiegħu fis-​sagrifiċċju taʼ Kristu. Jistaʼ jerġaʼ jħoss inklinazzjonijiet midinba, imma meta jirrifjuta li jaġixxi fuqhom għax jiftakar fit-​tagħlim nadif taʼ Kristu, hu juri li d-​dnub m’għadux iktar jikkontrollah.—Rumani 6:​12-17.

8. (a) Liema libertà tagħtina l-​Kristjanità vera? (b) X’għandha tkun l-​attitudni tagħna lejn il-​ħakkiema sekulari?

⁸ Ikkunsidra bħala Kristjani kemm ingawdu libertà. Ġejna meħlusin mill-​effetti tat-​tagħlim falz, mill-​ħakma tas-​superstizzjoni, u mill-​jasar tad-​dnub. Il-​veritajiet meraviljużi dwar il-​kundizzjoni tal-​mejtin u l-​irxoxt ħelsuna mill-​biżaʼ mhux raġunevoli tal-​mewt. L-​għarfien li l-​gvernijiet umani imperfetti dalwaqt se jkollhom iċedu posthom lis-​Saltna ġusta t’Alla jeħlisna min-​nuqqas taʼ tama. (Danjel 2:44; Mattew 6:10) Madankollu, libertà bħal din ma tiġġustifikax nuqqas taʼ rispett lejn l-​awtoritajiet tal-​gvern u l-​liġijiet tagħhom.—Titu 3:​1, 2; 1 Pietru 2:​16, 17.

9. (a) Jehovah kif jgħinna bl-​imħabba biex ingawdu l-​akbar ammont taʼ libertà possibbli issa għall-​bniedem? (b) Kif nistgħu nieħdu deċiżjonijiet għaqlin?

⁹ Jehovah ma jħalliniex nitgħallmu mill-​iżbalji tagħna stess. Hu jaf kif aħna magħmulin, xi jġibilna ferħ ġenwin, u x’inhu taʼ benefiċċju dejjiemi għalina. Huwa konxju tal-​ħsibijiet u l-​kondotta li jistgħu jħassru r-​relazzjoni taʼ dak li jkun Miegħu u maʼ sħabu l-​bnedmin, u forsi saħansitra jtellfuh milli jkun parti mid-​dinja l-​ġdida. Bl-​imħabba, Jehovah jinformana dwar dawn l-​affarijiet kollha permezz tal-​Bibbja u l-​organizzazzjoni viżibbli tiegħu. (Mark 13:10; Galatin 5:​19-​23; 1 Timotju 1:​12, 13) Imbagħad, hija r-​responsabbiltà tagħna li nużaw il-​libertà taʼ l-​għażla li tana Alla biex niddeċiedu kif se nirreaġixxu. Jekk tajna kas dak li tgħid il-​Bibbja, se nieħdu deċiżjonijiet għaqlin, mhux bħalma għamel Adam. Se nuru li relazzjoni tajba maʼ Jehovah hija l-​mira prinċipali f’ħajjitna.

Xi Wħud Iridu Tip Ieħor taʼ Libertà

10. Liema tip taʼ libertà fittxew xi wħud li huma Xhieda taʼ Jehovah?

¹⁰ Xi drabi, xi żgħażagħ li huma Xhieda taʼ Jehovah—kif ukoll oħrajn li m’humiex żgħażagħ—jistgħu jħossu li jridu tip ieħor taʼ libertà. Id-​dinja tistaʼ tidher attraenti u eċċitanti, u iktar ma jaħsbu dwarha, iktar ikunu jixtiequ jagħmlu l-​affarijiet mhux Kristjani li huma popolari fid-​dinja. Uħud bħal dawn forsi ma jippjanawx li jabbużaw mid-​drogi, jixorbu żżejjed, jew jikkommettu fornikazzjoni. Imma jibdew jassoċjaw maʼ xi wħud li m’humiex Kristjani veri, u jkunu jridu jiġu aċċettati minnhom. Huma saħansitra jibdew jimitaw id-​diskors u l-​kondotta tagħhom.—3 Ġwann 11.

11. Xi drabi minfejn tiġi l-​ħajra biex isir il-​ħażin?

¹¹ Xi drabi, wieħed jiġi mħajjar biex iċedi għal kondotta mhux Kristjana minn xi ħadd li jistqarr li jaqdi lil Jehovah. Dan kien minnu fost xi Kristjani tal-​bidu, u l-​istess ħaġa tistaʼ tiġri fi żmienna. Taʼ spiss, nies bħal dawn ikunu jridu jagħmlu l-​affarijiet li jaħsbu li se jagħtuhom pjaċir, imma dawn l-​affarijiet ikunu kontra l-​liġijiet t’Alla. Huma jħeġġu lil oħrajn biex imorru “jiddevertu.” ‘Iwiegħdu l-​ħelsien, waqt li huma stess imjassrin mit-​taħsir.’—2 Pietru 2:19.

12. X’riżultati ħżiena jiġu minn kondotta li tmur kontra l-​liġijiet u l-​prinċipji t’Alla?

¹² Ir-​riżultat taʼ din l-​hekk imsejħa libertà huwa dejjem taʼ ħsara, ladarba din tfisser ksur tal-​liġijiet t’Alla. Per eżempju, is-​sess projbit jistaʼ jirriżulta f’taqlib emozzjonali, mard, mewt, tqala mhix mixtieqa, u x’aktarx il-​ksur taʼ żwieġ. (1 Korintin 6:18; 1 Tessalonikin 4:​3-8) L-​abbuż tad-​drogi jistaʼ jipproduċi nervi, kliem maħtuf, vista mċajpra, sturdamenti, qtugħ taʼ nifs, immaġinazzjoni taʼ dehriet, u mewt. Dak li jkun jistaʼ jsir jiddependi minnhom, u jibda jwettaq atti kriminali sabiex jissodisfa l-​vizzju tiegħu. Ħafna konsegwenzi simili jiġu mill-​abbuż taʼ l-​alkoħol. (Proverbji 23:​29-35) Dawk li jaġixxu b’dan il-​mod jistgħu jaħsbu li huma ħielsa, imma mbagħad meta jkun tard wisq jindunaw li jkunu saru lsiera tad-​dnub. X’sid krudili huwa d-​dnub! Li nirraġunaw dwar dan issa jistaʼ jgħinna nissalvagwardjaw lilna nfusna minn esperjenzi bħal dawn.—Galatin 6:​7, 8.

Minfejn Jibdew il-​Problemi

13. (a) Taʼ spiss, kif jibdew jitqanqlu x-​xewqat li jwasslu għall-​problemi? (b) Biex nifhmu liema hi l-​“ħbiberija ħażina,” il-​ħarsa taʼ min għandna bżonn? (ċ) Hekk kif twieġeb il-​mistoqsijiet imniżżlin f’paragrafu 13, enfasizza l-​ħarsa taʼ Jehovah.

¹³ Aħseb ftit minfejn taʼ spiss jibdew il-​problemi. Il-​Bibbja tispjega: “Kull bniedem imġarrab jinġibed u jitħajjar mill-​passjoni [“xewqa,” NW] tiegħu stess. Mbagħad il-​passjoni, meta tnissel, tiled id-​dnub; u d-​dnub, meta jilħaq il-​milja tiegħu, iġib il-​mewt.” (Ġakbu 1:​14, 15) Kif tibda titqanqal ix-​xewqa? B’dak li jidħol fil-​moħħ. Taʼ spiss, dan jiġi mill-​assoċjazzjoni maʼ nies li ma japplikawx il-​prinċipji Bibliċi. M’għandniex xi ngħidu, ilkoll nafu li għandna nevitaw il-​“ħbiberija ħażina.” (1 Korintin 15:33) Imma liema ħbiberija hija ħażina? Jehovah kif iqisha din il-​kwistjoni? Li nirraġunaw fuq il-​mistoqsijiet li ġejjin u nfittxu l-​iskritturi ċitati għandhom jgħinuna naslu għal konklużjonijiet xierqa.

Il-​fatt li ċerti nies jidhru li huma onorabbli jfisser li huma ħbieb tajbin? (Ġenesi 34:​1, 2, 18, 19)

Tistaʼ l-​konversazzjoni tagħhom, forsi anki ċ-​ċajt li jgħidu, tindika jekk għandniex inkunu ħbieb mill-​qrib tagħhom? (Efesin 5:​3, 4)

Jehovah kif iħossu jekk nagħżlu ħbiberija intima maʼ nies li ma jħobbuhx? (2 Kronaki 19:​1, 2)

Għalkemm inkunu qed naħdmu jew immorru l-​iskola maʼ nies li m’għandhomx l-​istess twemmin tagħna, għala hemm bżonn noqogħdu b’sebaʼ għajnejn? (1 Pietru 4:​3, 4)

Li naraw it-​televixin u l-​films, nużaw l-​Internet, u naqraw kotba, rivisti, u gazzetti huma kollha modi kif nassoċjaw m’oħrajn. Għal liema tip taʼ materjal minn dawn is-​sorsi għandna bżonn noqogħdu attenti? (Proverbji 3:31; Isaija 8:19; Efesin 4:17-19)

L-​għażla tagħna maʼ min nassoċjaw x’tgħid lil Jehovah dwar liema tip taʼ nies aħna? (Salm 26:​1, 4, 5; 97:10)

14. Liema libertà grandjuża hemm għal dawk li japplikaw fedelment il-​pariri tal-​Kelma t’Alla issa?

¹⁴ Eżatt quddiemna hemm id-​dinja l-​ġdida t’Alla. Permezz tas-​Saltna t’Alla li se tiggverna mis-​sema, l-​umanità se tinħeles mill-​influwenza taʼ Satana u mis-​sistema t’affarijiet mill-​agħar kollha tiegħu. Bil-​mod il-​mod, se jitneħħew l-​effetti kollha tad-​dnub minn fuq l-​umanità ubbidjenti. Dan jirriżulta f’perfezzjoni tal-​moħħ u l-​ġisem, u b’hekk inkunu nistgħu ngawdu ħajja taʼ dejjem f’Ġenna taʼ l-​art. Il-​libertà li hi kompletament fi qbil maʼ l-​“Ispirtu tal-​Mulej” ftit ftit se titgawda mill-​ħolqien kollu. (2 Korintin 3:17) Jagħmel sens li nirriskjaw nitilfu dan kollu minħabba li ma nagħtux kas tal-​Kelma t’Alla issa? Billi neżerċitaw il-​libertà Kristjana tagħna bil-​għaqal illum, jalla lkoll nuru biċ-​ċar li tassew irridu “l-​ħelsien tal-​glorja taʼ wlied Alla.”—Rumani 8:21.

Diskussjoni Bħala Reviżjoni

• Liema tip taʼ libertà kienet tgawdi l-​ewwel koppja umana? Dan kif jitqabbel maʼ dak li l-​umanità qed tesperjenza issa?

• Liema libertà għandhom il-​Kristjani veri? Din kif inhi kontra dik li d-​dinja tikkunsidra bħala libertà?

• Għala huwa tant importanti li nevitaw ħbiberija ħażina? Kuntrarju għal Adam, id-​deċiżjonijiet taʼ min naċċettaw dwar dak li hu ħażin?

[Stampi f’paġna 46]

Il-​Kelma t’Alla twissi: “La titqarrqux: il-​ħbiberija ħażina tħassar id-​drawwiet tajba”