Ix-​Xitan Mhux Sempliċement Superstizzjoni

“Fit-​Testment il-​Ġdid hemm deskritt konflitt kbir bejn il-​forzi t’Alla u tat-​tajjeb, minn banda waħda, u dawk tal-​ħażen immexxijin minn Satana, mill-​banda l-​oħra. Din m’hijiex l-​idea taʼ xi kittieb jew tnejn, imma tal-​kittieba kollha. . . . Għalhekk, ix-​xiehda tat-​Testment il-​Ġdid hija ċara. Satana tassew jeżisti u jagħmel il-​ħsara, dejjem jiħodha kontra Alla u l-​poplu t’Alla.”—“The New Bible Dictionary.”

ALLURA, għala ħafna li jgħidu li huma Kristjani—u li jsostnu li jemmnu fil-​Bibbja—jiċħduha l-​idea li x-​Xitan veru jeżisti? Għax, fil-​verità, il-​Bibbja ma jaċċettawhiex bħala l-​Kelma t’Alla. (Ġeremija 8:9) Huma jgħidu li l-​kittieba tal-​Bibbja rriflettew il-​filosofiji tal-​ġnus taʼ madwarhom u ma wasslux b’mod eżatt il-​verità mingħand Alla. Per eżempju, it-​teologu Kattoliku Hans Küng jikteb: “L-​ideat mitoloġiċi taʼ Satana b’leġjuni taʼ xjaten . . . twasslu mill-​mitoloġija Babiloniża għal ġol-​Ġudaiżmu tal-​bidu u minn hemmhekk għal ġot-​Testment il-​Ġdid.”—On Being a Christian.

Imma l-​Bibbja m’hijiex sempliċement il-​kelma tal-​bnedmin; hija verament il-​Kelma mnebbħa t’Alla. Għalhekk, inkunu għaqlin jekk nieħdu bis-​serjetà dak li tgħid dwar ix-​Xitan.—2 Timotju 3:​14-17; 2 Pietru 1:​20, 21.

X’Kien Jaħseb Ġesù?

Ġesù Kristu kien jemmen li x-​Xitan veru jeżisti. Ġesù ma ġiex ittantat minn xi ħażen li kellu ġewwa fih. Kien attakkat minn xi ħadd reali li iktar tard Ġesù sejjaħlu “l-​Prinċep tad-​dinja.” (Ġwann 14:30; Mattew 4:​1-11) Hu kien jemmen ukoll li ħlejjaq spirti oħrajn jappoġġaw lil Satana fil-​proġetti mill-​agħar tiegħu. Hu fejjaq lil nies li kienu ‘maħkumin mix-​xitan.’ (Mattew 12:​22-28) Anki l-​pubblikazzjoni ateistika A Rationalist Encyclopædia tinnota s-​sinifikat taʼ dan meta tgħid: “Dejjem kienet ħaġa taʼ tfixkil għat-​teoloġi kif dan Ġesù taʼ l-​Evanġelji aċċetta t-​twemmin fix-​xjaten.” Meta Ġesù tkellem dwar ix-​Xitan u d-​demonji tiegħu, hu ma kienx sempliċement qed jirrepeti xi superstizzjonijiet li kienu ġejjin mill-​mitoloġija Babiloniża. Hu kien jaf li kienu jeżistu tassew.

Nitgħallmu ħafna dwar ix-​Xitan meta nikkunsidraw il-​kliem li qal Ġesù lill-​għalliema reliġjużi taʼ żmienu: “Intom ġejjin minn missierkom, li hu x-​Xitan, u x-​xewqat taʼ missierkom tridu tagħmlu. U dan kien qattiel sa mill-​bidu, u qatt ma żamm mal-​verità, għax il-​verità ma tinsabx fih. Meta jigdeb, ikun qiegħed jitkellem taʼ li hu, għax dak giddieb u missier il-​gideb.”—Ġwann 8:44.

Skond dan il-​vers, ix-​Xitan, li ismu jfisser “kalunnjatur,” kien “giddieb u missier il-​gideb.” (Korsiv tagħna.) Kien l-​ewwel wieħed mill-​ħlejjaq li gideb dwar Alla, u dan għamlu lura fil-​ġnien taʼ Għeden. Jehovah kien qal li l-​ġenituri oriġinali tagħna ‘żgur li kienu se jmutu’ jekk jieklu mis-​siġra taʼ tagħrif it-​tajjeb u l-​ħażin. Permezz taʼ serp, Satana qal li dan il-​kliem ma kienx minnu. (Ġenesi 2:17; 3:4) B’mod xieraq, hu msejjaħ “is-​Serp tal-​qedem, li hu msejjaħ id-​Demonju u x-​Xitan.”—Apokalissi 12:9.

Ix-Xitan gideb dwar is-​siġra taʼ tagħrif it-​tajjeb u l-​ħażin. Hu argumenta illi li wieħed ma jitħalliex jiekol minn din is-​siġra ma kienx ġustifikat; kien abbuż tal-​poter. Hu qal li Adam u Eva setgħu jkunu “bħal allat” billi jiddeċiedu għalihom infushom x’kien tajjeb u x’kien ħażin. Satana implika li, peress li kellhom il-​libertà taʼ l-​għażla, huma kellhom id-​dritt li ma jkollhom assolutament lil ħadd jikkmandahom. (Ġenesi 3:​1-5) Dan l-​attakk fuq il-​korrettezza tal-​mod kif jaħkem Alla qajjem kwistjonijiet importanti. Għalhekk, Jehovah ħalla ż-​żmien biex tinstab soluzzjoni għal dawn il-​kwistjonijiet. Dan ifisser li Satana tħalla jkompli jgħix għal ftit żmien. Iż-​żmien limitat li ngħatalu issa qed jispiċċa b’ħeffa kbira. (Apokalissi 12:12) Xorta waħda, hu jkompli jbiegħed lill-​bnedmin minn Alla bil-​gideb u l-​qerq, billi juża lil nies bħall-​iskribi u l-​Fariżej taʼ żmien Ġesù biex ixerrdu t-​tagħlim tiegħu.—Mattew 23:​13, 15.

Ġesù qal ukoll li x-​Xitan kien “qattiel sa mill-​bidu” u li “qatt ma żamm mal-​verità.” (Korsiv tagħna.) Dan ma jfissirx li Jehovah ħalaq lix-​Xitan bħala “qattiel.” Ma kienx maħluq biex ikun xi tip taʼ mostru inkarigat minn post taʼ nar u turment għal min jopponi lil Alla. L-​“infern” tal-​Bibbja m’huwiex il-​post fejn jgħammar Satana. Huwa sempliċement il-​qabar komuni taʼ l-​umanità.—Atti 2:​25-27; Apokalissi 20:​13, 14.

Ix-Xitan kien oriġinarjament fil-​“verità.” Hu kien darba parti mill-​familja li Jehovah għandu fis-​sema, bħala iben spirtu perfett t’Alla. Imma hu “qatt ma żamm mal-​verità.” Ipprefera t-​triqat u l-​prinċipji tiegħu stess ibbażati fuq il-​gideb. Il-​“bidu” tiegħu bħala qattiel ma kienx meta ġie maħluq bħala iben anġeliku t’Alla, imma meta rribella volontarjament kontra Jehovah u gideb lil Adam u Eva. Ix-​Xitan hu bħal dawk in-​nies li rribellaw kontra Jehovah fi żmien Mosè. Dwarhom naqraw: “Mxew ħażin miegħu; m’humiex uliedu, għajb għalihom; nisel taʼ inkwiet u għawġ.” (Dewteronomju 32:5) L-​istess jistaʼ jingħad dwar Satana. Hu sar “qattiel” meta rribella u sar responsabbli għall-​mewt taʼ Adam u Eva u, fil-​fatt, tal-​familja umana kollha kemm hi.—Rumani 5:12.

Anġli Diżubbidjenti

Kien hemm anġli oħrajn li ssieħbu maʼ Satana meta rribella. (Luqa 11:​14, 15) Dawn l-​anġli “telqu mnejn kienu jgħammru” u dehru f’iġsma umani sabiex igawdu relazzjonijiet sesswali mal-​“bniet tal-​bnedmin” fi żmien Noè. (Ġuda 6; Ġenesi 6:​1-4; 1 Pietru 3:​19, 20) “Waħda mit-​tlieta tal-​kwiekeb tas-​sema,” jew minoranza taʼ ħlejjaq spirti, qabdu din it-​triq.—Apokalissi 12:4.

Il-​ktieb taʼ l-​Apokalissi, li hu simboliku ferm, ipinġi lix-​Xitan bħala “Dragun kbir minn lewn in-​nar.” (Apokalissi 12:3) Għala? Mhux għax għandu letteralment xi ġisem ikrah bħal taʼ mostru. Fil-​fatt, ma nafux x’tip taʼ ġisem għandhom il-​ħlejjaq spirti, imma x’aktarx li Satana m’huwiex differenti minn ħlejjaq spirti anġeliċi oħrajn f’dan ir-​rigward. Madankollu, “Dragun kbir minn lewn in-​nar” hija deskrizzjoni xierqa għall-​ispirtu taʼ Satana, li hu mġewwaħ, tal-​biżaʼ, setgħan, u distruttiv.

Satana u d-​demonji tiegħu huma issa ristretti bl-​aħrax. Ma jistgħux iktar jidhru b’iġsma taʼ bnedmin bħalma milli jidher setgħu jagħmlu qabel. Ftit wara li s-​Saltna t’Alla ġiet stabbilita f’idejn Kristu fl-​1914, dawn twaddbu ’l isfel qrib l-​art.—Apokalissi 12:​7-9.

Ix-​Xitan Hu Għadu Qawwi

Xorta waħda, ix-​Xitan jibqaʼ għadu qawwi. Hu “qisu ljun jgħajjat, idur u jfittex ’il min sa jiblaʼ.” (1 Pietru 5:8) Hu m’huwiex xi xejra għall-​ħażen, li ma tistax tiġi spjegata u li tgħammar fil-​ġisem imperfett tagħna. Huwa minnu li kuljum irridu nitqabdu kontra l-​inklinazzjonijiet midinbin tagħna stess. (Rumani 7:​18-20) Imma t-​taqbida vera hija “kontra l-​Prinċpijiet taʼ din id-​dinja taʼ dlamijiet, kontra l-​ispirti ħżiena li jgħammru fil-​wisaʼ tas-​smewwiet.”—Efesin 6:12.

Kemm hu influwenti x-​Xitan? “Id-​dinja kollha qiegħda taħt idejn il-​Ħażin,” jgħid l-​appostlu Ġwanni. (1 Ġwann 5:19) M’għandniex xi ngħidu, ma rridux insiru ossessjonati bix-​Xitan jew inħallu l-​biżaʼ superstizzjuż dwaru jagħmilna bla ħila. Iżda, aħna nkunu għaqlin jekk noqogħdu attenti biex ma nħalluhx jagħlqilna għajnejna għall-​verità u jkissrilna l-​integrità tagħna lejn Alla.—Ġob 2:​3-5; 2 Korintin 4:​3, 4.

Ix-Xitan mhux dejjem juża mezzi feroċi biex jattakka lil dawk li jridu jagħmlu r-​rieda t’Alla. Kultant, hu jagħmel lilu nnifsu jidher bħal “anġlu tad-​dawl.” L-​appostlu Pawlu wissa lill-​Kristjani dwar dan il-​periklu meta kiteb: “Jiena nibżaʼ li, bħalma s-​serp qarraq b’Eva bil-​ħażen tiegħu, hekk fehmietkom jitħassru mis-​sempliċità u s-​safa tagħhom fi Kristu.”—2 Korintin 11:​3, 14.

Għalhekk, għandna bżonn ‘inkunu meqjusa u ngħassu, niqfulu, sħaħ fil-​fidi.’ (1 Pietru 5:​8, 9; 2 Korintin 2:11) Tagħmilhiex faċli lil Satana biex iqarraq bik billi tbagħbas fi kwalunkwe ħaġa li hi marbuta maʼ l-​okkult. (Dewteronomju 18:​10-12) Kun student għaqli tal-​Kelma t’Alla, u ftakar li Ġesù Kristu rrefera kemm-il darba għall-​Kelma t’Alla meta ġie ttantat mix-​Xitan. (Mattew 4:​4, 7, 10) Itlob għall-​ispirtu t’Alla. Il-​frott tiegħu jistaʼ jgħinek tevita l-​għemejjel tal-​ġisem, li Satana jħeġġeġ b’mod tant effettiv. (Galatin 5:​16-24) Ukoll, itlob bil-​ħerqa lil Jehovah meta tħossok b’xi mod taħt pressjoni mix-​Xitan u d-​demonji tiegħu.—Filippin 4:​6, 7.

M’għandekx għalfejn titwerwer mix-​Xitan. Jehovah jwiegħed protezzjoni vera kontra kwalunkwe ħaġa li Satana jistaʼ jagħmel. (Salm 91:​1-4; Proverbji 18:10; Ġakbu 4:​7, 8) “Twettqu fil-​Mulej u ssaħħu bil-​qawwa tiegħu,” jgħid l-​appostlu Pawlu. Imbagħad se “tkunu tifilħu tieqfu għat-​tnassis tax-​Xitan.”—Efesin 6:​10, 11.

[Stampa f’paġna 5]

Ġesù kien jaf li x-​Xitan kien xi ħadd reali

[Stampa f’paġna 6]

“Id-​dinja kollha qiegħda taħt idejn il-​Ħażin”

[Sors]

Ritratt tan-​NASA

[Stampi f’paġna 7]

Ieqaf kontra x-​Xitan billi tistudja l-​Kelma t’Alla u titlob regolarment