Il-​Ħajja u l-​Ministeru taʼ Ġesù

Il-​Kwistjoni taʼ Min Hu l-​Missier

MATUL il-​Festa tat-​Tabernakli tas-​sena 32 E.K., id-​diskussjoni taʼ Ġesù mal-​mexxejja Lhud tiħrax iktar. “Jien naf li intom nisel Abraham,” Ġesù jirrikonoxxi, “imma intom qed tfittxu biex toqtluni, għaliex il-​kelma tiegħi ma tagħmel ebda progress fostkom. Dawk l-​affarijiet li rajt maʼ Missieri nitkellem jien; u intom, għalhekk, agħmlu l-​affarijiet lqi smajtu mingħand missierkom.”

Għalkemm ma jidentifikax lil missierhom, Ġesù jagħmilha ċara li missierhom huwa differenti minn missieru. Billi ma jafux lil min għandu f’moħħu Ġesù, il-​mexxejja Lhud iwieġbu: “Missierna huwa Abraham.” Huma jħossu li għandhom l-​istess fidi li kellu Abraham, li kien il-​ħabib t’Alla.

Madankollu, Ġesù jaħsadhom bit-​tweġiba: “Jekk intom it-​tfal taʼ Abraham, agħmlu x-​xogħlijiet taʼ Abraham.” Tabilħaqq, iben reali jimita lil missieru. “Imma issa intom qed tfittxu biex toqtluni,” jgħid Ġesù, “raġel li qalilkom il-​verità li jien smajt mingħand Alla. Abraham ma għamlux dan.” Mela Ġesù jerġaʼ jgħid: “Intom tagħmlu x-​xogħlijiet taʼ missierkom.”

Xorta waħda huma ma jifhmux dwar min qed jitkellem Ġesù. Huma jsostnu li huma wlied leġittimi taʼ Abraham, billi jgħidu: “Ahna ma konniex imwelldin miż-​żina.” Għalhekk, billi jippretendu li huma adoraturi veri bħal Abraham, huma jinsistu: “Aħna għandna Missier wieħed Alla.”

Imma huwa Alla tassew Missierhom? “Kieku Alla kien Missierkom,” iwieġeb Ġesù, “kontu tħobbuni, għax minn Alla jien ħriġt u qiegħed hawn. Lanqas ma ġejt minn rajja assolutament, imma dak il-​Wieħed bagħatni ’l quddiem. Għala ma tafux intom x’qed nitkellem jien?”

Ġesù pprova juri lil dawn il-​mexxejja reliġjużi l-​konsegwenzi taʼ li huma m’aċċettawhx. Imma issa hu jgħid b’mod dirett: “Intom minn missierkom ix-​Xitan, u intom tixtiequ tagħmlu x-​xewqat taʼ missierkom.” Liema xorta taʼ missier huwa x-​Xitan? Ġesù identifikah bħala qattiel u qal ukoll: “Huwa giddieb u missier il-​gidba.” Għalhekk Ġesù jikkonkludi: “Dak li hu minn Alla jismaʼ minn dak li jgħid Alla. Għalhekk intom ma tisimgħux, għaliex m’intomx minn Alla.”

Irrabjati bil-​kundanna taʼ Ġesù, il-​Lhud iwieġbu: “Ma nagħmlux aħna tajjeb li ngħidu, Inti Samaritan u għandek demonju?” Il-​kelma “Samaritan” hija wżata bħala espressjoni taʼ tmaqdir u żeblieh, għaliex is-​Samaritani huma poplu mibgħud mil-​Lhud.

Billi ma jagħtix kas tat-​tmaqdir dwar li huwa Samaritan, Ġesù jwieġeb: “Jien m’għandix demonju, imma jien nonora lil Missieri, u intom tiddiżonorawni.” Billi jissokta, Ġesù jagħmel il-​wegħda li taħsad: “Jekk xi ħadd josserva l-​kelma tiegħi, hu qatt ma se jara l-​mewt assolutament.” Naturalment, Ġesù ma jridx ifisser li dawk kollha li jsegwuh qatt ma se jaraw il-​mewt litteralment. Minflok, hu jrid ifisser li huma qatt ma se jaraw il-​qerda eterna, jew “it-​tieni mewt’” li minnha m’hemmx irxoxt.

Madankollu, il-​Lhud jieħdu l-​kliem taʼ Ġesù litteralment. Għalhekk, huma jgħidu: “Issa żgur li nafu li int għandek demonju. Abraham miet, il-​profeti wkoll; imma int tgħid, ‘Jekk xi ħadd josserva l-​kelma tiegħi, hu qatt ma se jduq il-​mewt assolutament.’ Inti m’intix akbar minn missierna Abraham, li miet, hux hekk? Ukoll, il-​profeti mietu. Min tippretendi li int?”

F’din id-​diskussjoni kollha, huwa ovvju li Ġesù qed jiġbed l-​attenzjoni taʼ dawn l-​irġiel lejn il-​fatt li hu l-​Messija mwiegħed. Imma minflok ma jwieġeb direttament il-​mistoqsija tagħhom dwar l-​identità tiegħu, Ġesù jgħid: “Jekk nigglorifika lili nnifsi il-​glorja tiegħi m’hi xejn. Huwa Missieri li jigglorifikani, dak li intom tgħidu li hu Alla tagħkom; u madankollu ma sirtux tafuh. Imma jien nafu. U kieku għidt li ma nafux kont inkun bħalkom, giddieb.”

Billi jissokta, Ġesù jerġaʼ jirreferi għal Abraham il-​lejali, billi jgħid: “Abraham missierkom feraħ ħafna bil-​prospett taʼ li jara l-​jum tiegħi, u hu rah u feraħ.” Iva, b’għajnejn taʼ fidi, Abraham ħares ’il quddiem lejn il-​wasla tal-​Messija mwiegħed. B’nuqqas taʼ twemmin, il-​Lhud iwieġbu: “Għad m’għandekx ħamsin sena, u xorta rajt lil Abraham?”

“Verissimu ngħidilkom,” iwieġeb Ġesù, “qabel ma Abraham beda jeżisti, jien kont.” Ġesù qiegħed, naturalment, jirreferi għall-​eżistenza tiegħu taʼ qabel ma sar bniedem bħala persuna spirtu u setgħana fis-​sema.

Irrabjati b’dak li Ġesù sostna li kien jeżisti qabel Abraham, il-​Lhud jaqbdu l-​ġebel biex igarawhulu. Imma hu jistaħba u joħroġ mit-​tempju bla ma ġralu xejn. Ġwann 8:37-59; Rivelazzjoni 3:14; 21:8.

◆ Ġesù kif juri li hu u l-​egħdewwa tiegħu għandhom missirijiet differenti?

◆ X’inhu s-​sinjifikat taʼ li l-​Lhud isejħu lil Ġesù Samaritan?

◆ Ġesù f’liema sens irid ifisser li s-​segwaċi tiegħu qatt ma se jaraw il-​mewt?