Ħa “Jkollkom l-​Imħabba Bejnietkom”

“Minn dan jagħraf kulħadd li intom dixxipli tiegħi, jiġifieri, jekk ikollkom l-​imħabba bejnietkom.”—Ġwann 13:35.

1. Ġesù liema kwalità enfasizza ftit qabel ma miet?

“ULIEDI ċ-​ċkejknin.” (Ġwann 13:​33, KŻ) Ġesù indirizza lill-​appostli tiegħu b’din l-​espressjoni tenera fil-​lejla taʼ qabel mewtu. Imkien qabel fir-​rakkonti taʼ l-​Evanġelju ma nsibu mniżżel li Ġesù esprima ruħu b’tant mogħdrija meta kellimhom. Madankollu, f’dak il-​lejl speċjali hu ġie mqanqal ikellimhom b’dan il-​mod kollu affezzjoni sabiex juri l-​imħabba profonda li ħass għas-​segwaċi tiegħu. Fil-​fatt, Ġesù tkellem dwar l-​imħabba xi 30 darba dak il-​lejl. Għala enfasizzaha daqshekk din il-​kwalità?

2. Għala huwa importanti ħafna li l-​Kristjani juru l-​imħabba?

² Ġesù spjega għala l-​imħabba hija tant importanti. Hu qal: “Minn dan jagħraf kulħadd li intom dixxipli tiegħi, jiġifieri, jekk ikollkom l-​imħabba bejnietkom.” (Ġwann 13:35; 15:​12, 17) Li tkun segwaċi taʼ Ġesù jmur id f’id maʼ li turi l-​imħabba taʼ bejn l-​aħwa. Il-​Kristjani veri ma jiġux identifikati minn xi stil taʼ lbies mhux tas-​soltu jew xi drawwiet strambi, iżda mill-​imħabba tenera u kordjali li juru lejn xulxin. Din l-​imħabba li tispikka hija t-​tieni waħda mit-​tliet ħtiġijiet prinċipali li jrid ikollu dixxiplu taʼ Ġesù u li ssemmew fil-​bidu taʼ l-​artiklu taʼ qabel. X’se jgħinna nkomplu nilħqu din il-​ħtieġa?

‘Agħmlu Iktar minn Hekk’

3. L-​appostlu Pawlu ta liema twissija dwar limħabba?

³ Din l-​imħabba li tispikka tistaʼ taraha llum fid-​dixxipli ġenwini taʼ Kristu, l-​istess bħalma kienet tidher fis-​segwaċi tiegħu taʼ l-​ewwel seklu. L-​appostlu Pawlu kiteb lill-​Kristjani taʼ l-​ewwel seklu: “Fuq l-​imħabba taʼ l-​aħwa ma għandniex għalfejn niktbulkom; intom stess tgħallimtu mingħand Alla kif għandkom tħobbu lil xulxin. U dan intom qegħdin tagħmluh maʼ l-​aħwa kollha.” Xorta waħda, Pawlu kompla jgħid: “Nħeġġukom, ħuti, li tagħmlu iktar minn hekk.” (1 Tessalonikin 3:12; 4:​9, 10) Aħna wkoll irridu nagħtu kas sew it-​twissija taʼ Pawlu u nagħmlu ħilitna kollha biex nuru l-​imħabba lil xulxin iktar bis-​sħiħ, “iktar minn hekk.”

4. Skond Pawlu u Ġesù, taʼ min għandna nagħtu kas b’mod speċjali?

⁴ Fl-​istess ittra ispirata, l-​appostlu Pawlu ħeġġeġ lil sħabu fit-​twemmin biex ‘jagħmlu l-​qalb lill-​beżżiegħa [“l-​erwieħ dipressi,” NW]’, u ‘jgħinu lid-​dgħajfa.’ (1 Tessalonikin 5:14) F’okkażjoni oħra, hu fakkar lill-​Kristjani li dawk li huma ‘sħaħ fil-​fidi għandhom jgħinu lid-​dgħajfa jerfgħu l-​piż tagħhom.’ (Rumani 15:1) Ġesù wkoll għallem dwar kif għandna ngħinu lid-​dgħajfa. Wara li bassar li fil-​lejl taʼ l-​arrest tiegħu Pietru kien se jabbandunah, Ġesù qal lil Pietru: “Meta terġaʼ lura għas-​sewwa, wettaq [jew “saħħaħ,” NW] lil ħutek.” Għala? Għaliex huma wkoll se jkunu telqu lil Ġesù, u għalhekk kien se jkollhom bżonn l-​għajnuna. (Luqa 22:32; Ġwann 21:​15-17) Għalhekk, il-​Kelma t’Alla tagħtina d-​direzzjoni biex nuru l-​imħabba tagħna lejn dawk li huma dgħajfa spiritwalment u li forsi m’għadhomx jissieħbu mal-​kongregazzjoni Kristjana. (Lhud 12:12) Għala għandna nagħmlu dan? Żewġ tixbihat ħajjin li ta Ġesù jagħtuna t-​tweġiba.

Nagħġa Mitlufa u Munita Mitlufa

5, 6. (a) Liema żewġ tixbihat qosra rrakkonta Ġesù? (b)  Dawn it-​tixbihat x’juru dwar Jehovah?

⁵ Biex jgħallem lis-​semmiegħa tiegħu kif Jehovah iħares lejn dawk li tbiegħdu, Ġesù rrakkonta żewġ tixbihat qosra. Waħda minnhom kienet dwar ragħaj. Ġesù qal: “Min hu dak fostkom li jkollu mitt nagħġa u jitlef waħda minnhom, u ma jħallix id-​disgħa u disgħin l-​oħra fid-​deżert biex imur wara l-​mitlufa sa ma jsibha? U meta jsibha, jifraħ biha u jerfagħha fuq spallejh, imur id-​dar, isejjaħ għandu lil ħbiebu u l-​ġirien, u jgħidilhom, ‘Ifirħu miegħi, għax sibt in-​nagħġa li kienet intilfitli.’ Ngħidilkom li l-​istess jiġri fis-​smewwiet: ikun hemm aktar ferħ għal midneb wieħed li jindem milli għal disgħa u disgħin bniedem tajjeb li ma kellux bżonn taʼ ndiema.”—Luqa 15:​4-7.

⁶ It-​tieni tixbiha kienet dwar waħda mara. Ġesù qal: “Min hi dik il-​mara li jkollha għaxar drakmiet u titlef waħda minnhom, li m’hijiex sejra tixgħel il-​musbieħ u tiknes id-​dar, u tibqaʼ tfittex bil-​għaqal sa ma ssibha! U meta ssibha, issejjaħ għandha lil ħbiebha u l-​ġirien, u tgħidilhom, ‘Ifirħu miegħi, għax sibt id-​drakma li kienet intilfitli.’ Ngħidilkom jien li l-​istess ferħ ikun hemm fost l-​anġli taʼ Alla għal midneb wieħed li jindem.”—Luqa 15:​8-10.

7. Liema żewġ tagħlimiet jagħtuna t-​tixbihat tan-​nagħġa l-​mitlufa u tal-​munita l-​mitlufa?

⁷ X’nistgħu nitgħallmu minn dawn iż-​żewġ tixbihat qosra? Dawn juruna (1) kif għandna nħossuna dwar dawk li ddgħajfu spiritwalment u (2) x’għandna nagħmlu biex ngħinuhom. Ejja nikkunsidraw dawn il-​punti.

Mitlufa iżda Prezzjuża

8. (a) Ir-​ragħaj u l-​mara kif irreaġixxew għat-​telfa tagħhom? (b) Ir-​reazzjoni tagħhom x’turina dwar kif kienu jħarsu lejn l-​oġġett li tilfu?

⁸ Fiż-​żewġ tixbihat intilef xi ħaġa, iżda innota kif irreaġixxew iż-​żewġ sidien. Ir-​ragħaj ma qalx: ‘Xi rridha nagħġa waħda meta għad għandi 99? Nistaʼ ngħaddi mingħajrha.’ Il-​mara ma qalitx: ‘X’ninkwieta nagħmel dwar il-​munita? Kuntenta bid-​disgħa li għadhom għandi.’ Minflok, ir-​ragħaj fittex in-​nagħġa l-​mitlufa bħallikieku kienet l-​unika waħda li kellu. U l-​mara ħasset it-​telfa tal-​munita bħallikieku ma kellhiex iktar muniti. Fiż-​żewġ każi l-​oġġett li ntilef baqaʼ prezzjuż f’moħħ sidu. X’jurina dan?

9. X’jurina l-​interess li wrew ir-​ragħaj u l-​mara?

⁹ Innota l-​konklużjoni taʼ Ġesù fiż-​żewġ każi: “Ngħidilkom li l-​istess jiġri fis-​smewwiet: ikun hemm aktar ferħ għal midneb wieħed li jindem” u “ngħidilkom jien li l-​istess ferħ ikun hemm fost l-​anġli taʼ Alla għal midneb wieħed li jindem.” Għalhekk, l-​interess tar-​ragħaj u l-​mara jirrifletti ftit is-​sentimenti taʼ Jehovah u l-​ħlejjaq tiegħu tas-​smewwiet. Sewwa sew bħalma dak li ntilef baqaʼ prezzjuż f’għajnejn ir-​ragħaj u l-​mara, dawk li tbiegħdu u ma baqgħux f’kuntatt man-​nies t’Alla jibqgħu prezzjużi f’għajnejn Jehovah. (Ġeremija 31:3) Dawn l-​individwi għandhom mnejn ikunu dgħajfa spiritwalment, iżda mhux bilfors ikunu ribellużi. Minkejja l-​kundizzjoni dgħajfa tagħhom, xorta jistgħu jkunu għadhom qed iżommu mal-​ħtiġijiet taʼ Jehovah b’xi mod. (Salm 119:176; Atti 15:29) Għalhekk, bħalma kien jagħmel fil-​passat, Jehovah idum biex ‘iwarrabhom minn quddiemu.’—2 Slaten 13:23.

10, 11. (a) Kif irridu nħarsu lejn dawk li tbiegħdu mill-​kongregazzjoni? (b) Skond iż-​żewġ tixbihat taʼ Ġesù, kif nistgħu nuruhom li naħsbu fihom?

¹⁰ Bħal Jehovah u Ġesù, aħna wkoll jinteressana ferm minn dawk li huma dgħajfa u neqsin mill-​kongregazzjoni Kristjana. (Eżekjel 34:​16, KŻ; Luqa 19:10) Aħna nħarsu lejn min hu dgħajjef spiritwalment bħala nagħġa mitlufa—mhux bħala każ bla tama. Aħna ma nirraġunawx: ‘X’ninkwieta nagħmel għal min hu dgħajjef? Il-​kongregazzjoni xorta waħda għadha miexja ħarir mingħajru.’ Minflok, bħal Jehovah, aħna naraw lil dawk li tbiegħdu imma li jridu jiġu lura bħala li huma prezzjużi.

¹¹ Madankollu, kif nistgħu nuruhom li naħsbu fihom? Iż-​żewġ tixbihat taʼ Ġesù jindikaw li dan nistgħu nagħmluh billi (1) nieħdu l-​inizjattiva, (2) nuru ġentilezza, u (3) nagħmlu sforz bis-​serjetà. Ejja nikkunsidraw dawn l-​aspetti wieħed wieħed.

Ħu l-​Inizjattiva

12.Il-​kliem “imur wara l-​mitlufa” x’jurina dwar lattitudni tar-​ragħaj?

¹² Fl-​ewwel waħda miż-​żewġ tixbihat, Ġesù jgħid li r-​ragħaj “imur wara l-​mitlufa.” Ir-​ragħaj jieħu l-​inizjattiva u jagħmel sforz minn jeddu sabiex isib in-​nagħġa l-​mitlufa. It-​tbatija, il-​periklu, u d-​distanza ma jżommuhx lura. Mhux talli hekk, imma talli r-​ragħaj jibqaʼ jfittex “sa ma jsibha.”—Luqa 15:4.

13. L-​irġiel leali tal-​qedem kif wieġbu għall-​bżonnijiet taʼ dawk li kienu dgħajfa, u kif nistgħu nimitaw lil dawn l-​eżempji Bibliċi?

¹³ Bl-​istess mod, biex tingħata l-​għajnuna lil xi ħadd li għandu bżonn l-​inkuraġġiment, spiss ikun jeħtieġ li min hu l-​iktar b’saħħtu jieħu l-​inizjattiva. L-​irġiel leali tal-​qedem kienu fehmuh dan. Per eżempju, meta Ġonatan, bin is-​sultan Sawl, innota li l-​ħabib tal-​qalb tiegħu David kellu bżonn l-​inkuraġġiment, Ġonatan “qabad u mar ħdejn David f’Ħores u qawwielu qalbu f’Alla.” (1 Samwel 23:​15, 16) Ħafna sekli wara, meta l-​Gvernatur Neħemija ra li xi wħud minn ħutu l-​Lhud saru dgħajfa, hu wkoll ‘qam’ u ħeġġiġhom biex ‘jiftakru fil-​Mulej.’ (Neħemija 4:8 [4:​14, NW]) Illum, aħna wkoll irridu ‘nqumu’—nieħdu l-​inizjattiva—biex insaħħu lil dawk li huma dgħajfa. Iżda min fil-​kongregazzjoni għandu jagħmel dan?

14. Min fil-​kongregazzjoni għandu b’mod attiv joffri l-​għajnuna lid-​dgħajfa?

¹⁴ L-​anzjani Kristjani, b’mod partikulari, għandhom ir-​responsabbiltà li ‘jqawwu l-​idejn mitruħa; isaħħu l-​irkubbtejn imriegħda’ u li ‘jgħidu lil dawk b’qalbhom imbeżżgħa: “Agħmlu l-​ħila, la tibżgħux.”’ (Isaija 35:​3, 4; 1 Pietru 5:​1, 2) Madankollu, innota li t-​twissija li ta Pawlu biex “tagħmlu l-​qalb lill-​beżżiegħa [“lill-​erwieħ dipressi,” NW]” u “tgħinu lid-​dgħajfa,” ma tahiex lill-​anzjani biss. Minflok, il-​kliem taʼ Pawlu kien għal dawk kollha fil-​“knisja taʼ Tessalonika.” (1 Tessalonikin 1:1; 5:14) Għalhekk, il-​Kristjani kollha għandhom l-​inkarigu li b’mod attiv joffru l-​għajnuna lid-​dgħajfa. Bħar-​ragħaj tat-​tixbiha, kull Kristjan għandu jitqanqal biex “imur wara l-​mitlufa.” M’għandniex xi ngħidu, dan ikun l-​iktar effettiv jekk isir f’kooperazzjoni maʼ l-​anzjani. Tistaʼ tagħmel xi ħaġa biex tgħin lil xi ħadd dgħajjef fil-​kongregazzjoni tiegħek?

Uri Ġentilezza

15. X’tistaʼ tkun ir-​raġuni għala r-​ragħaj aġixxa b’dan il-​mod?

¹⁵ Ir-​ragħaj x’jagħmel meta fl-​aħħar isib in-​nagħġa l-​mitlufa? “Jerfagħha fuq spallejh.” (Luqa 15:5) Kemm hu dettall li jmiss il-​qalb u sinifikanti! In-​nagħġa għandha mnejn kienet ilha ġranet u ljieli sħaħ tiġġerra f’territorju mhux familjari. Saħansitra setgħet għaddiet minfejn kien hemm il-​periklu li tiġi attakkata minn xi ljuni jħufu. (Ġob 38:​39, 40) Żgur li n-​nagħġa tiddgħajjef minħabba n-​nuqqas taʼ ikel. Hija sempliċement fraġli wisq biex bis-​saħħa tagħha stess tegħleb l-​ostakli li se tiltaqaʼ magħhom fi triqitha lura lejn il-​merħla. Għalhekk, ir-​ragħaj jitbaxxa, bil-​ġentilezza jerfaʼ lin-​nagħġa, u jġorrha lura lejn il-​maqjel minn ġo l-​ostakli kollha. Kif nistgħu nuru l-​istess attenzjoni li wera r-​ragħaj?

16. Għala rridu nuru l-​istess tenerezza li wera r-​ragħaj man-​nagħġa l-​mitlufa?

¹⁶ Individwu li m’għadux f’kuntatt mal-​kongregazzjoni jistaʼ jkun eżawrit f’sens spiritwali. Bħan-​nagħġa li ma baqgħetx mar-​ragħaj, dan l-​individwu għandu mnejn iġġerra fil-​vojt fit-​territorju aggressiv taʼ din id-​dinja. Mingħajr il-​protezzjoni li jagħtih il-​maqjel, il-​kongregazzjoni Kristjana, iktar minn qatt qabel hu jsib ruħu fil-​periklu mill-​attakki tax-​Xitan, li “qisu ljun jgħajjat, idur u jfittex ’il min sa jiblaʼ.” (1 Pietru 5:8) Barra minn hekk, hu jiddgħajjef minħabba n-​nuqqas taʼ ikel spiritwali. Allura, probabbilment li waħdu huwa dgħajjef wisq biex jegħleb l-​ostakli li se jiltaqaʼ magħhom fi triqtu lura lejn il-​kongregazzjoni. Minħabba f’hekk, irridu nitbaxxew, biex ngħidu hekk, nerfgħu lid-​dgħajjef bil-​ġentilezza kollha, u nġorruh lura. (Galatin 6:2) Kif nistgħu nagħmluh dan?

17. Kif nistgħu nimitaw lill-​appostlu Pawlu meta nżuru lil xi ħadd li hu dgħajjef?

¹⁷ L-​appostlu Pawlu qal: “Jekk xi ħadd hu dgħajjef, ma naqsamx miegħu d-​dgħjufija tiegħu?” (2 Korintin 11:​29, The New English Bible; 1 Korintin 9:22) Pawlu kellu empatija għan-​nies, anki għad-​dgħajfa. Aħna rridu nuru l-​istess empatija maʼ dawk li huma dgħajfa. Meta żżur lil Kristjan li huwa dgħajjef spiritwalment, iżgurah li hu prezzjuż fil-​ħarsa taʼ Jehovah u li sħabu x-​Xhieda jimmissjawh ħafna. (1 Tessalonikin 2:17) Urih li huma lesti jappoġġawh u jixtiequ jkunu għalih bħal ‘ħu mwieled għal żmien l-​hemm.’ (Proverbji 17:17; Salm 34:19 [34:​18, NW]) Jekk nesprimu ruħna mill-​qalb nistgħu, bil-​ġentilezza u ftit ftit, ninkuraġġuh tant li jkun jistaʼ jirritorna lejn il-​merħla. Imbagħad x’għandna nagħmlu? It-​tixbiha tal-​mara u l-​munita l-​mitlufa tiggwidana.

Agħmel Sforz bis-​Serjetà

18. (a) Il-​mara tat-​tixbiha għala ma qatgħetx qalbha? (b) Liema sforzi bis-​serjetà għamlet il-​mara, u x’riżultat kellha?

¹⁸ Il-​mara li titlef il-​munita taf li s-​sitwazzjoni hija diffiċli iżda mhux bla tama. Kieku l-​munita waqgħet f’għalqa kbira u mimlija siġar jew f’għadira fonda u kollha tajn, probabbilment hi kienet taqtaʼ jiesha milli ssibha. Madankollu, peress li kienet taf li l-​munita bilfors qiegħda xi mkien f’darha, fejn tistaʼ ssibha, hi tibda tfittex sew maʼ kullimkien. (Luqa 15:8) L-​ewwel, hi tixgħel musbieħ biex iddawwal id-​dar mudlama tagħha. Imbagħad, tiknes l-​art bl-​ixkupa, waqt li tispera li tismaʼ xi ċekċika. Fl-​aħħar, hi tfittex sa l-​inqas rokna sakemm id-​dawl tal-​musbieħ jirrifletti fuq il-​munita tal-​fidda. L-​isforz bis-​serjetà tal-​mara jiġi premjat!

19. Il-​mod kif aġixxiet il-​mara fit-​tixbiha tal-​munita l-​mitlufa x’lezzjonijiet jgħallimna dwar l-​għajnuna li nagħtu lid-​dgħajjef?

¹⁹ Bħalma jfakkarna dan id-​dettall tat-​tixbiha, l-​obbligu Skritturali tagħna li ngħinu lil xi Kristjan dgħajjef m’huwiex xi ħaġa impossibbli għalina. Fl-​istess ħin, aħna nirrealizzaw li jeħtieġ sforz. Wara kollox, l-​appostlu Pawlu qal lill-​anzjani f’Efesu: “B’xogħol iebes bħal dan tagħna għandna nieħdu ħsieb ngħinu lil min hu fil-​bżonn [‘dgħajjef,’ NW].” (Atti 20:35a) Ftakar li l-​mara ma ssibx il-​munita billi ddur dawra taʼ kafkaf mad-​dar, kif ġie ġie, jew kemm tagħti daqqa t’għajn. Le, hi jirnexxilha ssibha għaliex tfittex bir-​reqqa “sa ma ssibha.” Bl-​istess mod, meta nistinkaw biex nerġgħu nsaħħu lil xi ħadd li hu dgħajjef spiritwalment, għandna nagħmlu sforz sinifikanti u bis-​serjetà. X’nistgħu nagħmlu?

20. X’nistgħu nagħmlu biex ngħinu lil dawk li huma dgħajfa?

²⁰ Kif nistgħu ngħinu lil min hu dgħajjef biex jibni l-​fidi u l-​apprezzament tiegħu? Studju persunali mill-​Bibbja minn pubblikazzjoni Kristjana addattata jistaʼ jkun eżatt dak li jkollu bżonn. Tabilħaqq, jekk nikkonduċu studju tal-​Bibbja maʼ individwu dgħajjef inkunu nistgħu ngħinuh b’mod konsistenti u bir-​reqqa. Wisq probabbli, l-​indokratur tas-​servizz jistaʼ jiddetermina l-​aħjar min jistaʼ jipprovdi l-​għajnuna li hemm bżonn. Għandu mnejn jissuġġerixxi liema materjal jistaʼ jiġi studjat u x’pubblikazzjoni se tkun l-​iktar t’għajnuna. L-​istess bħalma l-​mara tat-​tixbiha tuża xi għodod utli biex tagħmel xogħolha, illum għandna għodod li jgħinuna nwettqu r-​responsabbiltà tagħna mogħtija minn Alla biex ngħinu lid-​dgħajfa. Żewġ għodod, jew pubblikazzjonijiet, ġodda li għandna se jkunu speċjalment t’għajnuna f’dan ix-​xogħol. Dawn huma l-​kotba Worship the Only True God (Qim lill-​Uniku Alla Veru) u Draw Close to Jehovah (Ersaq Qrib Lejn Jehovah).a

21. Meta tingħata l-​għajnuna lid-​dgħajfa kif jiġi mbierek kulħadd?

²¹ Meta tingħata l-​għajnuna lid-​dgħajfa kulħadd jiġi mbierek. Min ikun qed jingħata l-​għajnuna jħoss il-​ferħ li jiġi meta jerġaʼ jingħaqad maʼ ħbieb veri. Aħna nħossu l-​ferħ f’qalbna li jiġi biss meta nagħtu. (Luqa 15:​6, 9; Atti 20:35b) B’mod ġenerali, il-​qalb tajba tiżdied fil-​kongregazzjoni hekk kif kull membru jieħu interess bl-​imħabba fl-​oħrajn. U fuq kollox, jingħata ġieħ lir-​Rgħajja tagħna li tant jieħdu ħsiebna, Jehovah u Ġesù, hekk kif ix-​xewqa tagħhom biex jgħinu lid-​dgħajfa tidher ukoll fil-​qaddejja tagħhom li jinsabu fuq l-​art. (Salm 72:​12-14; Mattew 11:​28-30; 1 Korintin 11:1; Efesin 5:1) Mela, kemm għandna għalxiex inkomplu ‘jkollna l-​imħabba bejnietna’!

[Nota taʼ taħt]

Tistaʼ Tispjega?

• Għala huwa essenzjali li lkoll kemm aħna għandna bżonn nuru l-​imħabba?

• Għala għandna nuru l-​imħabba maʼ dawk li huma dgħajfa?

• Liema tagħlimiet nieħdu mit-​tixbihat tan-​nagħġa l-​mitlufa u tal-​munita l-​mitlufa?

• Liema passi prattiċi nistgħu nieħdu biex ngħinu lil xi ħadd li hu dgħajjef?

[Stampi f’paġna 16]

Meta ngħinu lid-​dgħajfa, aħna nieħdu l-​inizjattiva, nuru ġentilezza, u nagħmlu sforz bis-​serjetà

[Stampa f’paġna 17]

Meta tingħata l-​għajnuna lid-​dgħajfa kulħadd jiġi mbierek