Il-​Kristjani U d-​Dinja taʼ Bnedmin

“Imxu bil-​għaqal maʼ dawk li huma barranin għalina.”—KOLOSSIN 4:5.

1. Ġesù x’qal rigward is-​segwaċi tiegħu u d-​“dinja”?

F’TALBA lil Missieru tas-​sema, Ġesù qal dwar is-​segwaċi tiegħu: “[I]d-dinja bagħdithom, għaliex huma m’humiex tad-​dinja, kif jiena m’iniex tad-​dinja.” Imbagħad żied: “Ma nitolbokx li twarrabhom mid-​dinja, imma li tħarishom mill-​Ħażin.” (Ġwann 17:14, 15) Il-​Kristjani ma kellhomx jiġu sseparati fiżikament mid-​dinja​—per eżempju, billi jinqatgħu għalihom f’monasteri. Pjuttost, Kristu ‘bagħathom fid-​dinja’ biex ikunu x-​xhieda tiegħu “sa truf l-​art.” (Ġwann 17:18; Atti 1:8) Xorta waħda hu talab lil Alla biex jgħasses fuqhom għaliex Satana, “[i]l-Prinċep taʼ din id-​dinja,” kien se jqanqal mibegħda kontriehom minħabba l-​isem taʼ Kristu.—Ġwann 12:31; Mattew 24:9.

2. (a) Il-​Bibbja kif tużaha l-​kelma “dinja”? (b) Jehovah liema attitudni bilanċjata juri lejn id-​dinja?

² Fil-​Bibbja l-​kelma “dinja” (koʹsmos bil-​Grieg) taʼ spiss tindika s-​soċjetà umana bla tjieba li “qiegħda taħt idejn il-​Ħażin.” (1 Ġwann 5:19) Minħabba li l-​Kristjani jikkonformaw mal-​livelli taʼ Jehovah u wkoll jobdu l-​kmand biex jippridkaw l-​aħbar tajba tas-​Saltna t’Alla lid-​dinja, xi drabi kien hemm relazzjoni diffiċli bejnhom u bejn id-​dinja. (2 Timotju 3:12; 1 Ġwann 3:1, 13) Madankollu, koʹsmos hija wżata wkoll fl-​Iskrittura biex tirreferi għall-​familja umana inġenerali. Billi tkellem dwar id-​dinja f’dan is-​sens, Ġesù qal: “Għax Alla hekk ħabb lid-​dinja li ta lil Ibnu l-​waħdieni, biex kull min jemmen fih ma jintilifx, iżda jkollu l-​ħajja taʼ dejjem. Għax Alla ma bagħatx lil Ibnu fid-​dinja biex jagħmel ħaqq mid-​dinja, imma biex id-​dinja ssalva permezz tiegħu.” (Ġwann 3:16, 17; 2 Korintin 5:19; 1 Ġwann 4:14) Mela, waqt li jobgħod l-​affarijiet li jikkaratterizzaw is-​sistema mill-​agħar taʼ Satana, Jehovah wera mħabbtu għall-​umanità billi bagħat lil Ibnu lejn l-​art sabiex isalva lil dawk kollha li kienu se ‘jersqu għall-​indiema.’ (2 Pietru 3:9; Proverbji 6:16-19) L-​attitudni bilanċjata taʼ Jehovah lejn id-​dinja għandha tiggwida l-​adoraturi tiegħu.

L-​Eżempju Taʼ Ġesù

3, 4. (a) Ġesù liema pożizzjoni adotta inkwantu għat-​tmexxija? (b) Ġesù kif qiesha lid-​dinja taʼ bnedmin?

³ Ftit qabel mewtu, Ġesù qal lil Ponzju Pilatu: “Is-​saltna tiegħi m’hijiex taʼ din id-​dinja.” (Ġwann 18:36) Fi qbil maʼ dawn il-​kelmiet, Ġesù kien iktar kmieni ċaħad l-​offerta taʼ Satana biex jagħtih awtorità fuq is-​saltniet tad-​dinja, u kien irrifjuta li jħalli lil-​Lhud jagħmluh sultan. (Luqa 4:5-8; Ġwann 6:14, 15) Madankollu, Ġesù wera mħabba kbira għad-​dinja taʼ bnedmin. Eżempju taʼ dan ġie rrapportat mill-​appostlu Mattew: “Ra n-​nies u tħassarhom, għax kienu mdejjqa u mitluqa bħal nagħaġ bla ragħaj.” Imqanqal mill-​imħabba, hu ppriedka lin-​nies fl-​ibliet u fl-​irħula tagħhom. Għallimhom u fejqilhom il-​mard. (Mattew 9:36) Kien ukoll sensittiv għall-​ħtiġijiet fiżiċi taʼ dawk li ġew biex jitgħallmu minnu. Naqraw: “Ġesù sejjaħ lid-​dixxipli tiegħu u qalilhom: ‘Nitħassarhom lil dawn in-​nies, għax ġa ilhom tlitt ijiem miegħi u ma għandhom xejn x’jieklu. Ma rridx inħallihom imorru sajmin, li ma jmurx iħosshom ħażin fit-​triq.’” (Mattew 15:32) X’konsiderazzjoni mqanqla mill-​imħabba!

⁴ Il-​Lhud kienu preġudikati ferm kontra s-​Samaritani, imma Ġesù tkellem fit-​tul maʼ mara Samaritana u qattaʼ jumejn jagħti xiehda bir-​reqqa f’belt Samaritana. (Ġwann 4:5-42) Għalkemm Alla bagħtu għand in-​“nagħaġ li ntilfu mid-​dar taʼ Iżrael,” Ġesù kultant irreaġixxa għal espressjonijiet taʼ fidi magħmulin minn oħrajn li ma kinux Lhud. (Mattew 8:5-13; 15:21-28) Iva, Ġesù wera li huwa possibbli li wieħed ‘ma jkunx tad-​dinja’ u fl-​istess ħin juri mħabba lejn id-​dinja taʼ bnedmin, lejn in-​nies. Nuru aħna b’mod simili mogħdrija għan-​nies fejn noqogħdu, fejn naħdmu, jew fejn nagħmlu x-​xiri tagħna? Nuru aħna li jimpurtana mill-​benesseri tagħhom​—mhux biss għall-​bżonnijiet spiritwali tagħhom, imma wkoll għall-​bżonnijiet oħrajn jekk ikun possibbli min-​naħa tagħna li ngħinuhom? Ġesù hekk għamel, u permezz taʼ dan, fetaħ it-​triq biex jgħallem lin-​nies dwar is-​Saltna. Veru, aħna ma nistgħux nagħmlu mirakli litterali bħalma għamel Ġesù. Imma att taʼ karità taʼ spiss jagħmel, biex ngħidu hekk, il-​mirakli f’li jegħleb il-​preġudizzju.

L-​Attitudni Taʼ Pawlu Lejn Nies “Li Huma Barranin”

5, 6. L-​appostlu Pawlu kif ittratta maʼ Lhud li kienu “barranin”?

⁵ F’ħafna mill-​ittri tiegħu, l-​appostlu Pawlu jirreferi għan-​nies “barranin” jew “li huma barranin,” u dan ifisser dawk li m’humiex Kristjani, kemm jekk Lhud u kemm jekk Ġentili. (1 Korintin 5:12; 1 Tessalonikin 4:12; 1 Timotju 3:7) Kif ittratta maʼ wħud bħal dawn? Hu ‘sar kollox maʼ kulħadd biex isalva lil kulħadd [“x’uħud,” KŻ].’ (1 Korintin 9:20-22) Meta kien jasal f’xi belt, il-​mod tiegħu taʼ pridkar kien li l-​ewwel imur għand il-​Lhud li kienu jkunu ssetiljaw hemmhekk. X’kienet il-​preżentazzjoni tiegħu? Bit-​tattika u bir-​rispett kollu, kien joffri provi konvinċenti minn fuq il-​Bibbja li l-​Messija kien ġie, kien miet mewta taʼ sagrifiċċju, u kien ġie rxoxtat.—Atti 13:5, 14-16, 43; 17:1-3, 10.

⁶ B’dan il-​mod Pawlu bena fuq l-​għarfien li l-​Lhud kellhom tal-​Liġi u l-​profeti sabiex jgħallimhom dwar il-​Messija u s-​Saltna t’Alla. U hu rnexxielu jikkonvinċi lil xi wħud. (Atti 14:1; 17:4) Minkejja oppożizzjoni minn xi mexxejja Lhud, Pawlu wera sentimenti kordjali għal sħabu Lhud meta kiteb: “Ħuti, nixtieq tassew minn qalbi nitlob quddiem Alla li niesi jsalvaw. Jien xhud għalihom li huma għandhom il-​ħeġġa għal Alla, iżda din m’hijiex ħeġġa skond l-​għerf veru.”—Rumani 10:1, 2.

Jgħin Lil Kredenti Mhux Lhud

7. Ħafna proseliti kif wieġbu għall-​aħbar tajba li ppriedka Pawlu?

⁷ Il-​proseliti kienu nies li ma kinux Lhud u li kienu saru prattikanti ċirkonċiżi tal-​Ġudaiżmu. Evidentement, kien hemm Lhud proseliti f’Ruma, fl-​Antijokja Sirjana, fl-​Etjopja, u fl-​Antijokja tal-​Pisidija​—tabilħaqq, mad-​Dijaspora Lhudija kollha. (Atti 2:8-10; 6:5; 8:27; 13:14, 43; qabbel Mattew 23:15.) Il-​proseliti, kuntrarju għal ħafna ħakkiema Lhud, x’aktarx li ma kinux imkabbrin, u ma setgħux jiffanfraw li kienu dixxendenti t’Abraham. (Mattew 3:9; Ġwann 8:33) Minflok, huma kienu abbandunaw allat pagani u kienu bl-​umiltà kollha daru lejn Jehovah, waqt li kisbu xi għarfien dwaru u dwar il-​liġijiet tiegħu. U huma kellhom l-​istess tama li kellhom il-​Lhud taʼ Messija li kellu jiġi. Billi kienu diġà wrew li kienu lesti li jinbidlu minħabba t-​tfittxija tagħhom għall-​verità, ħafna minnhom kienu lesti li jagħmlu iżjed bidliet u jwieġbu għall-​ippridkar taʼ l-​appostlu Pawlu. (Atti 13:42, 43) Meta xi proselit li qabel kien iqim allat pagani kien jikkonverti għall-​Kristjanità, dan kien ikun mgħammar b’mod uniku biex jagħti xiehda lil Ġentili oħrajn li jkunu għadhom iqimu lil dawk l-​allat.

8, 9. (a) Minbarra l-​proseliti, liema klassi oħra taʼ Ġentili kienu attirati lejn ir-​reliġjon Lhudija? (b) Ħafna minn dawk mhux ċirkonċiżi li kienu jibżgħu minn Alla kif wieġbu għall-​aħbar tajba?

⁸ Minbarra l-​proseliti ċirkonċiżi, oħrajn li ma kinux Lhud ġew attirati lejn ir-​reliġjon Lhudija. L-​ewwel wieħed minnhom li sar Kristjan kien Kornelju li, għalkemm ma kienx proselit, kien “bniedem sewwa u kellu l-​biżaʼ taʼ Alla.” (Atti 10:2) Fil-​kummentarju tiegħu dwar l-​Atti, il-​Professur F. F. Bruce kiteb: “Dawn il-​Ġentili normalment jissejħu ‘Dawk li jibżgħu minn Alla’; waqt li dan m’huwiex xi terminu tekniku, huwa konvenjenti biex jiġi wżat. Bosta Ġentili f’dak iż-​żmien, waqt li ma kinux ippreparati li jikkonvertu kompletament għall-​Ġudaiżmu (billi l-​ħtieġa għaċ-​ċirkonċiżjoni kienet speċjalment taʼ tfixkil għall-​irġiel), ġew attirati mill-​monoteiżmu sempliċi tal-​qima Lhudija fis-​sinagoga u mil-​livelli etiċi tal-​mod taʼ ħajja Lhudija. Xi wħud minnhom attendew is-​sinagoga u saru familjari mhux ħażin mat-​talb u l-​lezzjonijiet mill-​iskrittura, li semgħu jiġu moqrijin fil-​verżjoni Griega.”

⁹ L-​appostlu Pawlu ltaqaʼ maʼ ħafna li kienu jibżgħu minn Alla meta kien jippriedka fis-​sinagogi fl-​Asja Minuri u fil-​Greċja. F’Antijokja tal-​Pisidija hu indirizza lil dawk miġburin fis-​sinagoga bħala “Nies taʼ Iżrael, u intom il-​ġnus li tibżgħu minn Alla.” (Atti 13:16, 26) Luqa jikteb li wara li Pawlu ppriedka għal tliet Sibtijiet fis-​Sinagoga f’Tessalonika, “xi wħud minnhom [mil-Lhud] emmnu [saru Kristjani] u ssieħbu miegħu u maʼ Sila; fosthom kien hemm għadd kbir taʼ Grieg[i] li kienu jqimu lil Alla, u mhux ftit nisa mill-​kbarat.” (Atti 17:4) X’aktarx, xi Griegi kienu wħud mhux ċirkonċiżi li jibżgħu minn Alla. Hemm evidenza li bosta minn dawn il-​Ġentili kienu ssieħbu mal-​komunitajiet Lhud.

Pridkar Fost ‘Dawk Li Ma Jemmnux’

10. Pawlu kif ippridkalhom lill-​Ġentili li ma kellhom ebda sfond mill-​Iskrittura, u b’liema riżultat?

¹⁰ Fl-​Iskrittura Griega Kristjana, it-​terminu ‘dawk li ma jemmnux’ jistaʼ jirreferi għan-​nies inġenerali li ma kinux parti mill-​kongregazzjoni Kristjana. Taʼ spiss dan jirreferi għall-​pagani. (Rumani 15:31; 1 Korintin 14:22, 23; 2 Korintin 4:4; 6:14) F’Ateni ħafna minn dawk li ma kinux jemmnu ġew edukati fil-​filosofija Griega bla ebda sfond mill-​Iskrittura. Skuraġġieh dan lil Pawlu milli jagħtihom xiehda? Le. Hu, madankollu, addatta l-​preżentazzjoni tiegħu. B’sengħa kbira ppreżenta ideat Bibliċi mingħajr ma kkwota direttament mill-​Iskrittura Ebrajka, li n-​nies t’Ateni ma kinux familjari magħhom. B’ħila kbira wera similarità bejn il-​verità tal-​Bibbja u ċerti ħsibijiet li esprimew ċerti poeti Stojċi tal-​qedem. U ppreżenta l-​kunċett t’Alla wieħed veru għall-​umanità kollha, Alla li se jiġġudika bit-​tjieba permezz taʼ raġel li miet u ġie rxoxtat. B’hekk, Pawlu bit-​tattika ppriedka dwar Kristu lin-​nies t’Ateni. B’liema riżultat? Waqt li l-​maġġuranza minnufih waqqgħuh għaċ-​ċajt jew kienu xettiċi, “xi wħud issieħbu miegħu u emmnu; fost dawn kien hemm ukoll Djonisju l-​Arjopagita u waħda mara jisimha Damari u oħrajn magħhom.”—Atti 17:18, 21-34.

11. Korintu x’tip taʼ belt kienet, u x’kien ir-​riżultat taʼ l-​attività taʼ l-​ippridkar li Pawlu għamel hemmhekk?

¹¹ F’Korintu kien hemm komunità mdaqqsa taʼ Lhud, u għalhekk Pawlu beda l-​ministeru tiegħu hemmhekk billi ppriedka fis-​sinagoga. Imma meta sab li l-​Lhud kienu jopponu, Pawlu mar għand il-​popolazzjoni tal-​Ġentili. (Atti 18:1-6) U x’popolazzjoni dik! Korintu kienet belt kosmopolitana u kummerċjali, b’ħajja mgħaġġla, magħrufa sew mad-​dinja Griega-Rumana għall-​ħajja laxka taʼ ġo fiha. Tabilħaqq, “li wieħed Jikkorintizza” kien ifisser li jipprattika l-​immoralità. Madankollu, kien wara li l-​Lhud kienu rrifjutaw l-​ippridkar taʼ Pawlu li Kristu deherlu u qallu: “La tibżax, imma tkellem u tiskotx . . . , għax poplu kbir hawn għalija f’din il-​belt.” (Atti 18:9, 10) Preċiż bħalma qal Ġesù, Pawlu stabbilixxa kongregazzjoni f’Korintu, avolja xi wħud mill-​membri tagħha qabel kellhom mod taʼ ħajja a la Korintjana.—1 Korintin 6:9-11.

Jipprova Jsalva “Lill-​Bnedmin Kollha” Llum

12, 13. (a) It-​territorju tagħna llum kif inhu simili għal dak taʼ żmien Pawlu? (b) Liema attitudni nuru aħna f’territorji fejn ir-​reliġjonijiet tal-​Kristjaneżmu ilhom li ġew stabbiliti jew fejn ħafna huma diżillużi bir-​reliġjon organizzata?

¹² Illum, bħal fl-​ewwel seklu, “il-​grazzja taʼ Alla . . . [“ġġib,” NW] salvazzjoni lill-​bnedmin kollha.” (Titu 2:11) It-​territorju għall-​ippridkar taʼ l-​aħbar tajba espanda biex issa qiegħed ikopri l-​kontinenti kollha u l-​biċċa l-​kbira tal-​gżejjer tal-​baħar. U, bħal fi żmien Pawlu, il-​“bnedmin kollha” qegħdin tabilħaqq jiġu milħuqin. Per eżempju, xi wħud minna jippridkaw f’pajjiżi fejn il-​knejjes tal-​Kristjaneżmu ilhom stabbiliti għal ħafna sekli. Bħal-​Lhud taʼ l-​ewwel seklu, il-​membri tagħhom għandhom mnejn ikunu mgħaddsin fi tradizzjonijiet reliġjużi. Xorta waħda, aħna henjin li nfittxu lil dawk b’kundizzjoni tajba tal-​qalb u nibnu fuq kwalunkwe għarfien li jistaʼ jkollhom tal-​Bibbja. Ma rridux ma nagħtuhomx ċans jitkellmu jew niddisprezzawhom anki jekk il-​mexxejja reliġjużi tagħhom xi drabi jopponuna u jippersegwitawna. Pjuttost, aħna nirrikonoxxu li xi wħud fosthom għandhom mnejn ikollhom “ħeġġa għal Alla” avolja neqsin mill-​għarfien eżatt. Bħal Ġesù u Pawlu, aħna nuru mħabba ġenwina għan-​nies, u għandna xewqa ħerqana li huma jiġu salvati.—Rumani 10:2.

¹³ Waqt l-​ippridkar, ħafna minna niltaqgħu maʼ individwi li huma diżillużi bir-​reliġjon organizzata. Madankollu, għandhom mnejn li għad għandhom il-​biżaʼ t’Alla, jemmnu b’Alla sa ċertu punt u jipprovaw jgħixu ħajja tajba. M’għandniex nifirħu li niltaqgħu maʼ nies li għadhom jemmnu xi ftit b’Alla fost din il-​ġenerazzjoni mgħawġa u li dejjem iktar ma tridx taf b’Alla? U m’aħniex aħna ħerqanin li nidderiġuhom lejn forma taʼ qima li m’hijiex immarkata b’ipokresija u qerq?—Filippin 2:15.

14, 15. Kif saret disponibbli għalqa kbira għall-​ippridkar taʼ l-​aħbar tajba?

¹⁴ Fit-​tixbieha tiegħu dwar ix-​xibka, Ġesù bassar li kellu jkun hemm territorju kbir ferm għax-​xogħol taʼ l-​ippridkar. (Mattew 13:47-49) Waqt li spjega din it-​tixbieha, It-​Torri Tal-​Għassa tal-​15 taʼ Settembru, 1992, f’paġna 9 stqarr: “Matul is-​sekli membri tal-​Kristjaneżmu kellhom parti kbira f’li jittraduċu, jikkopjaw, u jqassmu l-​Kelma t’Alla. Knejjes iktar tard ifformaw jew appoġġjaw lil soċjetajiet tal-​Bibbja, li ttraduċew il-​Bibbja fil-​lingwi taʼ pajjiżi mbegħdin. Huma wkoll bagħtu missjunarji mediċi u għalliema, li fformaw Kristjani taʼ l-​isem. Dan ġabar numru kbir taʼ ħut mhux tajjeb, li ma kellhomx l-​approvazzjoni t’Alla. Imma taʼ l-​inqas, espona miljuni taʼ wħud li m’humiex Kristjani għall-​Bibbja u għal għamla taʼ Kristjanità, għalkemm korrotta.”

¹⁵ Il-​proselitiżmu tal-​Kristjaneżmu kien effettiv speċjalment fl-​Amerka t’Isfel, fl-​Afrika, u f’xi gżejjer tal-​baħar. Fi żmienna, instabu ħafna ġwejdin f’dawn l-​inħawi, u nistgħu nkomplu nagħmlu ħafna ġid jekk ikollna attitudni pożittiva, u mimlija mħabba lejn nies umlin bħal dawn, saħansitra bħalma kellu Pawlu lejn proseliti Lhud. Fost dawk li jeħtieġu l-​għajnuna tagħna hemm ukoll il-​miljuni taʼ nies li jistgħu jissejħu “dawk li jissimpatizzaw” max-​Xhieda taʼ Jehovah. Dawn dejjem jieħdu gost jarawna meta nżuruhom. Xi wħud studjaw il-​Bibbja magħna u attendew għal-​laqgħat tagħna, partikolarment il-​Mafkar annwali tal-​mewt taʼ Kristu. Ma jirrappreżentawx dawn l-​uħud għalqa kbira għall-​ippridkar taʼ l-​aħbar tajba tas-​Saltna?

16, 17. (a) Liema tipi taʼ nies navviċinaw aħna bl-​aħbar tajba? (b) Aħna kif nimitawh lil Pawlu f’li nippridkaw lil diversi tipi taʼ nies?

¹⁶ Barra minn hekk, xi ngħidu għal dawk li jiġu minn kulturi barra mill-​Kristjaneżmu​—kemm jekk niltaqgħu magħhom f’art twelidhom u kemm jekk huma immigranti f’pajjiżi tal-​Punent? U xi ngħidu għal dawk il-​ħafna miljuni li abbandunaw ir-​reliġjon għalkollox, u saru atei jew anjostiċi? Iktar minn hekk, xi ngħidu għal dawk li jħaddnu kważi b’ħeġġa reliġjuża l-​filosofija moderna jew il-​psikoloġija popolari li tiġi ppubblikata fil-​kotba numerużi taʼ referenza misjubin fil-​ħwienet tal-​kotba? Għandu xi ħadd minn dawn in-​nies jiġi injorat, u kkunsidrat bħala li m’hemmx tama li jiġi mifdi? Mhux jekk nimitaw lill-​appostlu Pawlu.

¹⁷ Meta kien qiegħed jippriedka f’Ateni, Pawlu ma waqax fin-​nassa taʼ li jiddibatti l-​filosofija mas-​semmiegħa tiegħu. Hu, iżda, ċertament li addatta r-​raġunar tiegħu għan-​nies li kien qiegħed jittratta magħhom, billi ppreżenta l-​veritajiet tal-​Bibbja b’mod ċar u loġiku. Bl-​istess mod, aħna m’għandniex għalfejn insiru esperti fir-​reliġjonijiet u l-​filosofiji tan-​nies li nippridkawlhom. Madankollu, aħna naddattaw il-​mod tagħna taʼ kif navviċinawhom biex nagħmlu x-​xiehda tagħna effettiva, u b’hekk insiru “kollox maʼ kulħadd.” (1 Korintin 9:22) Waqt li kiteb lill-​Kristjani f’Kolossi, Pawlu stqarr: “Imxu bil-​għaqal maʼ dawk li huma barranin għalina; nqdew tajjeb b’kull okkażjoni. Ħa tkun dejjem il-​kelma tagħkom kollha ħlewwa, mħawwra bil-​melħ taʼ l-​għerf, biex tkunu tafu twieġbu sewwa lil kulħadd.” (Korsiv tagħna.)—Kolossin 4:5, 6.

18. Liema responsabbiltà għandna, u x’qatt m’għandna ninsew?

¹⁸ Bħal Ġesù u l-​appostlu Pawlu, ejjew nuru mħabba lejn il-​bnedmin kollha. Speċjalment ejjew noħorġu barra minn triqitna biex naqsmu m’oħrajn l-​aħbar tajba tas-​Saltna. Mill-​banda l-​oħra, qatt tinsa dak li Ġesù qal dwar id-​dixxipli tiegħu: “M’humiex tad-​dinja.” (Ġwann 17:16) Dak li dan ifisser għalina se jkompli jiġi kkunsidrat fl-​artiklu li jmiss. (w97 11/1)

Bħala Reviżjoni

◻ Iddeskrivi l-​attitudni bilanċjata taʼ Ġesù lejn id-​dinja.

◻ L-​appostlu Pawlu kif ippriedka lil-​Lhud u lill-​proseliti?

◻ Pawlu kif avviċina lil dawk li kienu jibżgħu minn Alla u lil dawk li ma kinux jemmnu?

◻ Kif nistgħu aħna nkunu “kollox għal kulħadd” fl-​attività tagħna taʼ l-​ippridkar?

[Stampi f’paġna 24]

Billi jwettqu atti taʼ qalb tajba mal-​proxxmu tagħhom, il-​Kristjani taʼ spiss jistgħu jegħlbu l-​preġudizzju