April​—Żmien biex ‘Nitħabtu u Nitqabdu’

¹ Iż-​żmien tal-​Mafkar għall-​poplu taʼ Jehovah huwa żmien taʼ riflessjoni. Dan huwa żmien biex wieħed joqgħod jaħseb dwar dak li wettqet il-​mewt taʼ Kristu u jimmedita fuq it-​tama li tana Alla permezz tad-​demm li xerred Ġesù. Jekk taħseb fid-​19 t’April tas-​sena l-​oħra, x’jiġik f’moħħok? Tiftakar l-​uċuħ li rajt f’dik il-​lejla tar-​rebbiegħa? l-​atmosfera prezzjuża u spiritwali tal-​Mafkar? id-​diskussjoni serja mill-​Bibbja u t-​talb mill-​qalb? Forsi int ħadt deċiżjoni soda biex turi iktar bis-​sħiħ kemm għandek gratitudni għall-​imħabba li wrew lejk Jehovah u Ġesù. Kif teffettwak issa meditazzjoni bħal din?

² Jidher ċar li l-​poplu taʼ Jehovah juri gratitudni mhux biss bil-​kliem. (Kol. 3:15, 17) F’April li għadda, b’mod partikulari, aħna għamilna iktar mis-​soltu biex nuru l-​apprezzament tagħna lejn dak li Jehovah pprovda għas-​salvazzjoni tagħna billi ħadna sehem akbar fil-​ministeru Kristjan. Kien hemm 130 li qdew bħala pijunieri awżiljarji, u dan in-​numru qabeż sew il-​quċċata li kellna qabel. L-​isforzi tagħhom, flimkien maʼ dak taʼ proklamaturi tas-​Saltna oħrajn, wassal għal quċċata ġdida kemm fis-​sigħat, fit-​tqassim tar-​rivisti, kif ukoll fiż-​żjajjar lura. Il-​ferħ tagħna żdied meta rajna ħafna studji tal-​Bibbja ġodda jinbdew. Flimkien maʼ dan rajna quċċata ġdida taʼ wħud li attendew għall-​Mafkar!

³ Tabilħaqq, it-​tama ċerta tagħna tqanqalna biex naġixxu. Huwa eżatt bħalma kiteb l-​appostlu Pawlu: “Hu għal dan l-​għan li aħna nitħabtu u nitqabdu, għax it-​tama tagħna hi f’Alla l-​ħaj, li hu s-​Salvatur tal-​bnedmin kollha, l-​aktar taʼ dawk li jemmnu.”​—1 Tim. 4:10.

⁴ F’dan l-​istaġun tal-​Mafkar, kif se turi l-​fidi tiegħek fil-​provvedimenti taʼ Jehovah għall-​ħajja? F’April li għadda rajna l-​akbar numru taʼ proklamaturi tas-​Saltna li qatt kien hawn f’Malta. Nistgħu naqbżu dak in-​numru f’April? Hija xi ħaġa li nistgħu nagħmlu. Iżda kull pubblikatur, kemm jekk mgħammed u kemm jekk le, għandu bżonn jagħti sehmu. Ħafna wħud ġodda jistgħu jikkwalifikaw biex jagħtu sehemhom. B’hekk, filwaqt li qed tippjana biex titħabat u titqabad f’April, aħseb dwar xi modi kif tistaʼ tqanqal lil oħrajn, anki lil uħud ġodda u taʼ inqas esperjenza, biex jingħaqdu miegħek.

⁵ Kif Tgħin lil Xi Wħud Jerġgħu Jibdew l-​Attività Tagħhom: Jekk taf b’xi wħud li ilhom xi xahar jew xahrejn ma joħorġu fis-​servizz taʼ l-​għalqa, forsi tistaʼ tinkuraġġihom u tistidinhom biex jiġu miegħek. Jekk xi wħud fil-​kongregazzjoni saru inattivi, l-​anzjani se jagħmlu sforz speċjali biex iżuruhom u jinkuraġġuhom jerġgħu jibdew f’April.

⁶ Ilkoll kemm aħna għandna nibqgħu nitolbu għall-​ispirtu taʼ Jehovah biex isaħħaħna fis-​servizz tiegħu. (Lq. 11:13) X’irridu nagħmlu sabiex nirċievu dak l-​ispirtu? Naqraw il-​Kelma ispirata t’Alla. (2 Tim. 3:16, 17) Irridu wkoll ‘nisimgħu x’jgħid l-​Ispirtu’ lill-​kongregazzjonijiet billi nattendu l-​ħames laqgħat kollha tal-​ġimgħa. (Apk. 3:6) Issa huwa ż-​żmien ideali biex ngħinu lil dawk li m’humiex regulari fis-​servizz jew li huma inattivi biex itejbu d-​drawwiet taʼ studju tagħhom u jibdew jattendu għal-​laqgħat regolarment. (Salm 50:23) Għandna nagħmlu dan filwaqt li nibżgħu ħafna għas-​saħħa spiritwali tagħna stess. Madankollu, jirrikjedi xi ħaġa oħra.

⁷ L-​appostlu Pietru spjega li Alla jagħti l-​ispirtu qaddis tiegħu “lil dawk li jobduh.” (Atti 5:​32) Din l-​ubbidjenza tinkludi li nżommu mal-​kmand biex ‘inxandru lill-​poplu u nixhdu.’ (Atti 1:8; 10:42) B’hekk, għalkemm huwa veru li għandna bżonn l-​ispirtu t’Alla biex isaħħaħna ħalli nippridkaw, huwa minnu wkoll li hekk kif nibdew nuru x-​xewqa li rridu nogħġbu ’l Jehovah, hu se jgħinna saħansitra iktar. Jalla qatt ma nittraskuraw l-​ewwel ftit passi t’ubbidjenza li għandna nieħdu minn jeddna!

⁸ Ngħinu liż-​Żgħar: Ġenituri, taraw f’uliedkom ix-​xewqa li jitkellmu m’oħrajn dwar il-​verità? Qed joħorġu magħkom fil-​ministeru? Huma t’eżempju fl-​imġiba tagħhom? Jekk inhu hekk, għala toqogħdu lura? Tkellmu maʼ wieħed mill-​membri tal-​Kumitat tas-​Servizz tal-​Kongregazzjoni, u araw jekk it-​tfal tagħkom jikkwalifikawx biex isiru pubblikaturi f’April. (Ara l-​ktieb Our Ministry, paġni 99-100.) Aċċetta l-​fatt li uliedek jistgħu jagħtu sehem kbir fl-​għajta taʼ tifħir lil Jehovah f’dan l-​istaġun tal-​Mafkar.​—Mt. 21:15, 16.

⁹ Omm Kristjana minn Georgia, fl-​Istati Uniti taʼ l-​Amerika, dejjem kienet tinkuraġġixxi lit-​tifla ż-​żgħira tagħha biex titkellem m’oħrajn dwar Jehovah. Is-​sena l-​oħra, hekk kif din it-​tifla kienet fil-​ministeru m’ommha, ħalliet il-​browxer X’Jirrikjedi maʼ wieħed raġel u fil-​qosor spjegatlu x’kien fih mill-​werrej. Hu staqsieha: “Kemm għandek żmien?” Hi qaltlu: “Sebaʼ snin.” Ir-​raġel kien mistagħġeb meta raha tagħmel preżentazzjoni daqshekk tajba. Fil-​fatt hu kien jissieħeb max-​Xhieda meta kien iżgħar iżda qatt ma kien ħa l-​verità bis-​serjetà u għamilha parti minn ħajtu. F’qasir żmien, inbeda studju tal-​Bibbja mar-​raġel, maʼ martu, u maʼ bintu.

¹⁰ Ħafna wħud żgħar huma diġà pubblikaturi, u aħna nieħdu pjaċir bil-​kumpanija tagħhom hekk kif huma jaħdmu magħna fil-​ministeru. Dawn iż-​żgħażagħ jistgħu jqanqlu u jinkuraġġixxu lil dawk taʼ mparhom. Iżda April huwa wkoll żmien xieraq biex kull familja individwali ssaħħaħ l-​għaqda li għandha u tibni l-​ispiritwalità tagħha billi l-​membri kollha jaħdmu flimkien fis-​servizz sagru. Il-​kapijiet tal-​familja għandhom jieħdu t-​tmexxija f’idejhom f’dan ir-​rigward.​—Prov. 24:27.

¹¹ Kif Ngħinu lill-​Ġodda: Xi ngħidu għal dawk ġodda li qed tistudja l-​Bibbja magħhom? Jistgħu huma jagħtu sehemhom fl-​isforz speċjali li se jsir f’April? Forsi huma wrew ix-​xewqa li jitkellmu m’oħrajn dwar dak li qed jitgħallmu hekk kif għaddejtu kapitlu 2, paragrafu 22, jew kapitlu 11, paragrafu 14, fil-​ktieb Għarfien. Jekk wasaltu fl-​aħħar tal-​ktieb, kun lest biex titħaddet u titkellem b’mod ċar dwar dan is-​suġġett meta tgħaddu kapitlu 18, paragrafu 8, li jgħid: “Probabbilment int ħerqan biex tgħid lil qrabatek, ħbiebek, u oħrajn dak li qiegħed titgħallem. Fil-​fatt, għandu mnejn li int diġà kont qiegħed tagħmlu dan, saħansitra bħalma Ġesù qasam l-​aħbar tajba m’oħrajn f’ċirkostanzi informali. (Lq. 10:38, 39; Ġw. 4:6-15) Issa għandu mnejn li trid tagħmel iktar.” Huwa dan kif iħossuhom dawk li qed tistudja magħhom?

¹² L-​istudent tiegħek jemminha l-​Kelma t’Alla? Qiegħed japplika l-​prinċipji tal-​Bibbja? Ġab ħajtu fi qbil mal-​livelli divini? Qiegħed jattendi l-​laqgħat tal-​kongregazzjoni? Irid jaqdi lil Alla Jehovah? Mela għax ma tħeġġux biex jitkellem maʼ l-​anzjani sabiex huma jkunu jistgħu jiddeċiedu jekk jikkwalifikax biex isir pubblikatur mhux mgħammed u jaħdem miegħek f’April? (Ara l-​ktieb Our Ministry, paġni 97-9.) B’hekk, hu jkun jistaʼ jesperjenza b’mod dirett kif l-​organizzazzjoni taʼ Jehovah tgħinu fl-​isforzi tiegħu biex jaqdi ’l Alla.

¹³ Veru, xi studenti jagħmlu progress iktar minn oħrajn. Għalhekk fi qbil mal-​gwida li tinsab fil-​Ministeru tas-​Saltna taʼ Ġunju tas-​sena 2000, f’paġna 4, paragrafi 5-6, ħafna qed jistudjaw it-​tieni ktieb maʼ nies li wrew interess fil-​bidu iżda li kellhom bżonn iktar għajnuna biex isiru attivi magħna. Aħna qatt ma naqtgħu jiesna minn dawn l-​uħud taʼ qalb onesta li xi darba għad isiru dixxipli ġenwini taʼ Kristu, “jew fi żmien qasir jew fi żmien twil.” (Atti 26:29, New World Translation) Madankollu, jekk iż-​żmien li ilek tistudja maʼ wħud bħal dawn tistaʼ ssejjaħlu “żmien twil,” jistaʼ dan l-​istaġun tal-​Mafkar ikun opportunità tajba għall-​istudent tiegħek biex jibda juri kemm għandu apprezzament profond għall-​fidwa taʼ Ġesù?

¹⁴ Kif Tgħinhom Jieħdu Sehem: Aħna nistgħu nitgħallmu ħafna dwar kif ngħinu lil dawk li jikkwalifikaw għall-​ministeru billi niflu bir-​reqqa kif Ġesù ħarreġ lil ħaddieħor. Hu ma qabadx u sab folla u qal lill-​appostli biex jibdew jitkellmu. L-​ewwel li għamel kien li enfasizza l-​bżonn tax-​xogħol tax-​xandir, ħeġġiġhom biex jitolbu f’kull aspett taʼ ħajjithom, u mbagħad tahom tliet affarijiet bażiċi: sieħeb, territorju, u messaġġ. (Mt. 9:​35-​38; 10:​5-7; Mk. 6:7; Lq. 9:​2, 6) Int tistaʼ tagħmel l-​istess. Kemm jekk se tgħin lil uliedek, student ġdid, jew xi ħadd li ilu ma jirrapporta xi attività, ikun xieraq li tagħmel sforz speċjali biex tilħaq il-​miri li ġejjin.

¹⁵ Enfasizza l-​Bżonn: Enfasizza mal-​persuna l-​importanza tax-​xogħol tax-​xandir. Kun pożittiv dwaru. Għidlu xi esperjenzi biex turih kif inhi sejra l-​kongregazzjoni fil-​ministeru. Uri spirtu bħal dak li wera Ġesù f’Mattew 9:​36:-​38. Ħeġġeġ lil dan il-​pubblikatur tal-​futur jew lill-​wieħed inattiv biex jitlob dwar is-​sehem persunali tiegħu fil-​ministeru u sabiex ix-​xogħol madwar id-​dinja jirnexxi.

¹⁶ Ħeġġeġ lil Dak li Jkun biex Jaħseb dwar il-​Ħafna Opportunitajiet Meta Jistaʼ Jagħti Xiehda: Semmilu l-​possibbiltà li jiltaqaʼ mal-​grupp tiegħu taʼ l-​istudju tal-​ktieb biex flimkien jagħtu xiehda minn dar għal dar. Għidlu kif jistaʼ jitkellem mal-​qraba u maʼ dawk li jaf jew maʼ sħabu tax-​xogħol jew taʼ l-​iskola matul il-​brejk. Meta wieħed ikun qed jivvjaġġa b’xi trasport pubbliku, malajr jistaʼ jaqbad jitkellem mal-​passiġġieri li jkunu miegħu sempliċement billi juri interess persunali fihom. Meta aħna nieħdu l-​inizjattiva, dan taʼ spiss jagħtina opportunità biex nagħtu xiehda tajba. Verament hemm ħafna opportunitajiet fejn aħna nistgħu naqsmu t-​tama tagħna m’oħrajn “minn jum għal ieħor.”​—Salm 96:​2, 3.

¹⁷ X’aktarx, però, li jkun aħjar li int u l-​pubblikatur il-​ġdid taħdmu flimkien minn dar għal dar malajr kemm jistaʼ jkun. Jekk int għamilt mira li żżid is-​servizz tiegħek matul ix-​xahar t’April, staqsi lil min jieħu ħsieb it-​territorju biex jara jekk hemmx xi wieħed konvenjenti għalik li tistaʼ taħdem. Jekk inhu hekk, dan se jagħtik l-​opportunità biex taħdmu sew. Per eżempju, hekk kif tkun spiċċajt mis-​servizz jew tkun sejjer għal-​laqgħat jew xi mkien ieħor, tistaʼ ssib lil xi ħadd f’xi dar fejn qabel ma tkun sibt lil ħadd jew fejn sibt l-​interess. Jekk ikun il-​ħin addattat, agħmel żjara qasira li biha tistaʼ tħalli effett tajjeb. Dan, imbagħad, se jagħtik sodisfazzjon u ferħ fil-​ministeru.

¹⁸ Lesti Messaġġ li Jolqot lil Oħrajn: Li wieħed ikun irid jaqsam il-​messaġġ tas-​Saltna hija ħaġa, iżda li jħossu kunfidenti dwar kif jgħaddih lil ħaddieħor, speċjalment jekk għadu ġdid jew ilu ma joħroġ fis-​servizz hija ħaġa oħra. Li tgħin lil uħud ġodda u inattivi jippreparaw hi waħda mill-​aħjar affarijiet li tistaʼ tagħmel. Il-​Laqgħat tas-​Servizz u l-​laqgħat tal-​grupp tas-​servizz taʼ l-​għalqa jistgħu jipprovdu ideat tajbin, iżda dawn ma jiħdux post il-​preparazzjoni li wieħed irid jagħmel personalment.

¹⁹ Kif tistaʼ tgħin lil uħud ġodda jippreparaw għas-​servizz? Ibda billi turihom kif għandhom jippreżentaw rivista, u agħmilhielhom faċli u fil-​qosor! Għidilhom biex jaħsbu dwar xi ġrajjiet fl-​aħbarijiet li l-​inkwilini fit-​territorju jistgħu jkunu qegħdin jaħsbu fuqhom, imbagħad sib xi punt f’waħda mir-​rivisti reċenti li jkun qed jitkellem fuq hekk. Ipprattikaw il-​preżentazzjoni flimkien, u użawha fil-​ministeru malajr kemm jistaʼ jkun.

²⁰ Niżviluppaw il-​Potenzjal għal Żjieda fil-​Futur: Is-​sena l-​oħra l-​attendenza għall-​Mafkar madwar id-​dinja qabżet l-​14,800,000 ruħ. Ftit iktar minn sitt miljuni minnhom irrapportaw bħala pubblikaturi. Dan ifisser li xi 8.8 miljuni kienu interessati biżżejjed biex jiġu għal dan il-​programm speċjali fejn huma qagħdu jisimgħu l-​ispjegazzjoni taʼ waħda mill-​akbar tagħlimiet tal-​Bibbja. Saru jafu lil xi wħud minna personalment, u dan x’aktarx li effettwahom b’mod pożittiv. Bosta minnhom jitkellmu tajjeb ħafna dwarna, jagħtu donazzjonijiet għax-​xogħol tagħna madwar id-​dinja kollha, u jaqbżu għalina m’oħrajn. Dan il-​grupp kbir jipprovdi potenzjal għal żjieda fil-​futur. X’nistgħu nagħmlu aħna biex ngħinuhom jagħmlu iktar progress?

²¹ Il-​biċċa l-​kbira minn dawk il-​ġodda li jattendu għall-​Mafkar jagħmlu dan għax jistidinhom xi ħadd minna personalment. Ġeneralment, dan ikun ifisser li għall-​inqas jafu lil xi ħadd fl-​udjenza. Jekk aħna stidinna lil xi ħadd, għandna r-​responsabbiltà li nilqgħuh bil-​qalb u ngħinuh jibbenefika sew mill-​programm. Ladarba s-​sala se tkun mimlija, għinu jsib fejn joqgħod bil-​qegħda. Sellfu Bibbja, u stiednu biex ikanta miegħek mill-​ktieb taʼ l-​għanjiet tiegħek. Wiġiblu kull mistoqsija li jistaʼ jistaqsi. Jekk int tkun dħuli miegħu u turi interess persunali fih dan se jkun mezz ewlieni kif tqanqlu biex ikompli jżid l-​interess tiegħu. M’għandniex xi ngħidu, ilkoll kemm aħna għandna din ir-​responsabbiltà, jiġifieri li meta naraw lil xi ħadd ġdid, nagħtuh merħba mill-​qalb u nitkellmu ftit miegħu biex b’hekk insiru nafuh.

²² Il-​Mafkar jistaʼ jeffettwa ħafna l-​mod kif ikun jaħsibha l-​individwu. Il-​fatt li hu ġie għal-​laqgħa jistaʼ jfisser li ma sabx dak li qed ifittex xi mkien ieħor, u li aħna noffru xi ħaġa li hu jħoss li għandu bżonn jeżaminaha iktar mill-​qrib. L-​ispjegazzjoni dwar il-​provvediment meraviljuż tal-​fidwa jistaʼ jkun skoperta taʼ l-​għaġeb għal xi ħadd li m’għandux idea taʼ l-​imħabba bla limitu taʼ Jehovah. Jistaʼ jinduna mill-​ewwel kemm aħna differenti, billi aħna sinċieri, dħulin, nuru l-​imħabba u r-​rispett. Is-​sala tagħna m’għandhiex x’taqsam maʼ dak li forsi ra fi knejjes oħra bħal statwi u ritwali li ma jagħmlux sens. Uħud ġodda żgur se jindunaw li fl-​udjenza hemm nies minn kull livell tal-​ħajja u li ma jsirx ġbir. Din l-​esperjenza tistaʼ tqanqalhom jerġgħu jiġu.

²³ Wara l-​Mafkar, irid ikun hemm xi ħadd li joqgħod attent li kull wieħed ġdid li attenda jkompli jingħata l-​għajnuna. Jekk int stidint li xi wħud ġodda, għandek responsabbiltà speċjali. Qabel ma jitilqu, kun ċert li jkunu jafu dwar il-​laqgħat l-​oħra li jsiru fis-​Sala tas-​Saltna. Għidilhom x’inhu t-​titlu tat-​taħdita pubblika li jmiss. Għarrafhom dwar il-​ħin u l-​post taʼ l-​Istudju tal-​Ktieb tal-​Kongregazzjoni li jkun l-​iktar viċin tagħhom. Iktar tard, agħtihom kopja tal-​ktieb Hena fil-​Familja, u għidilhom bid-​diskussjoni li se jkun hemm fil-​ġimgħa tat-​30 t’April intitolata “Ipproteġi Lill-​Familja Tiegħek Minn Influwenzi Distruttivi.”

²⁴ Ftiehem biex tagħmel żjara kordjali fi djarhom. Kun ċert li għandhom kopja tal-​browxer X’Jirrikjedi u l-​ktieb Għarfien, li se jgħinuhom isiru jafu aħjar it-​tagħlim bażiku tal-​Bibbja. Jekk mhux diġà qed jistudjaw, offrilhom studju tal-​Bibbja. Stidinhom jaraw il-​vidjos tagħna, bħal per eżempju, il-​vidjo Our Whole Association of Brothers. Irranġalhom biex jiltaqgħu m’oħrajn fil-​kongregazzjoni. Fix-​xhur li ġejjin ibqaʼ f’kuntatt maʼ dawn l-​uħud ġodda; stidinhom biex jattendu għal-​laqgħat meta jkollna ż-​żjajjar taʼ l-​indokratur tas-​circuit, meta jkun hemm assemblea tas-​circuit jew jum t’assemblea speċjali. Agħtihom iċ-​ċans li juru li huma “disposti sewwa għall-​ħajja taʼ dejjem”!​—Atti 13:48, NW.

²⁵ Dak li Jistgħu Jagħmlu l-​Anzjani: Is-​suċċess li jkun hemm mill-​isforzi miżjuda fil-​ministeru għax-​xahar t’April jiddependi, sa ċertu punt, mill-​anzjani. Jekk int tikkonduċi l-​istudju tal-​ktieb, agħmel lista taʼ l-​affarijiet li tistaʼ tagħmel biex tgħin lil kulħadd fil-​grupp tiegħek taʼ l-​istudju jieħu sehem fl-​attivitajiet speċjali. Hemm min għadu żgħir, ġdid, irregolari jew inattiv assenjat fil-​grupp tiegħek? Ara jekk il-​ġenituri, il-​pijunieri, jew il-​pubblikaturi l-​oħra ħadux l-​inizjattiva biex jgħinuhom. Agħti kull għajnuna persunali li tistaʼ tagħti int stess. Waħda oħt li kienet ilha sentejn sħaħ mhux regulari fis-​servizz għamlet iktar minn 50 siegħa fil-​ministeru f’April li għadda. X’kien li ġab din il-​bidla fiha? Hi qalet li kienu ż-​żjajjar pastorali inkuraġġanti li għamlulha l-​anzjani.

²⁶ L-​anzjani u l-​qaddejja ministerjali għandhom jikkooperaw biex ikunu ċerti li jkollhom biżżejjed territorju, rivisti, u letteratura għax-​xahar li ġej. Tistaʼ ssir żjieda fl-​arranġamenti tal-​laqgħat tas-​servizz taʼ l-​għalqa? Jekk iva, avżaw meta se jkunu dawn l-​arranġamenti speċjali. Fuq kollox, fit-​talb pubbliku u privat tiegħek, itlob lil Jehovah biex ibierek dan ix-​xahar tagħna t’attività miżjuda tas-​Saltna.​—Rum. 15:30, 31; 2 Tess. 3:1.

²⁷ F’April li għadda f’kongregazzjoni fin-​North Carolina, l-​anzjani inkuraġġew ħafna ż-​żjieda t’attività fil-​ministeru. Fil-​laqgħat taʼ kull ġimgħa, stiednu lill-​pubblikaturi biex iqisu bit-​talb jekk jistgħux jaqdu bħala pijunieri awżiljarji. F’kull opportunità, l-​anzjani u l-​qaddejja ministerjali kollha tkellmu b’entużjażmu dwar li jagħmlu April l-​aħjar xahar li qatt kellhom. Bħala riżultat, 58 fil-​mija tal-​pubblikaturi, flimkien maʼ l-​anzjani u l-​qaddejja ministerjali kollha, għamlu x-​xogħol taʼ pijunier dak ix-​xahar!

²⁸ Il-​Ferħ f’li Nagħtu Sehem Sħiħ: X’inhuma l-​barkiet li jiġu milli ‘nitħabtu u nitqabdu’ fil-​ministeru? (1 Tim. 4:10) Dwar l-​attività żeluża tal-​kongregazzjoni tagħhom f’April li għadda, l-​anzjani li għadna kif semmejna kitbu: “L-​aħwa taʼ spiss jitkellmu dwar kemm saru jħossuhom iktar maħbubin u magħqudin bejniethom minn mindu bdew jaħdmu iktar fil-​ministeru taʼ l-​għalqa.”

²⁹ Ħu żagħżugħ li ma tantx jistaʼ jiċċaqlaq xtaq ħafna li jkollu sehem f’din l-​attività speċjali f’April li għadda. Permezz taʼ ppjanar tajjeb u bl-​għajnuna t’ommu u t’aħwa spiritwali, hu ħa pjaċir waqt xahar produttiv meta qeda bħala pijunier awżiljarju. Kif ħassu dwar din l-​esperjenza? Hu qal: “Għall-​ewwel darba f’ħajti, ħassejtni bħal raġel b’saħħtu.”

³⁰ M’hemm l-​ebda dubju li Jehovah jbierek b’mod abbundanti lil dawk li jgħożżu l-​privileġġ li għandhom li jitkellmu dwar is-​saltna tiegħu. (Salm 145:11, 12) Hekk kif infakkru l-​mewt taʼ Sidna, aħna nifhmu li l-​barkiet li jiġu jekk ikollna devozzjoni lejn Alla se jkunu iktar abbundanti fil-​futur. L-​appostlu Pawlu b’mod ħerqan xtaq ir-​rigal tal-​ħajja taʼ dejjem. Madankollu, hu kien jaf li din m’hijiex xi ħaġa li trid toqgħod bil-​qegħda tistennieha u tittama għaliha. Hu kiteb: “Għalhekk jiena nitħabat u nissielet bis-​saħħa tiegħu, li tinsab taħdem fija bil-​qawwa kollha tiegħu.” (Kol. 1:​29) Jehovah, permezz taʼ Ġesù, saħħaħ lil Pawlu biex iwettaq ministeru li jsalva l-​ħajjiet, u Hu jistaʼ jagħmel l-​istess għalina llum. Se tkun din l-​esperjenza persunali tiegħek f’April?

[Kaxxa f’paġna 3]

Int lil Min Tistaʼ Tinkuraġġixxi biex Ikun Pubblikatur f’April?

Lit-​tfal tiegħek?

Lil xi Student tal-​Bibbja?

Lil xi ħadd li sar inattiv?