In-​Nies taʼ Jehovah Issodati fil-​Fidi

“Il-​kongregazzjonijiet komplew jiġu ssodati fil-​fidi u jiżdiedu fin-​numru minn jum għal jum.”—ATTI 16:5.

1. Alla kif uża lill-​appostlu Pawlu?

ALLA JEHOVAH uża lil Sawlu taʼ Tarsu bħala “reċipjent magħżul.” Bħala l-​appostlu Pawlu, hu ‘sofra ħafna affarijiet.’ Imma permezz tax-​xogħol tiegħu u dak taʼ oħrajn, l-​organizzazzjoni taʼ Jehovah gawdiet għaqda u żjieda meraviljuża.—Atti 9:15, 16.

2. Għala jkun taʼ benefiċċju li nikkunsidraw Atti 13:1-16:5?

² Ġentili kienu qed isiru Kristjani f’numri li dejjem jiżdiedu, u laqgħa vitali tal-​ġemgħa li tiggverna għenet ħafna biex tavvanza l-​unità fost il-​poplu t’Alla u biex tagħmilhom sodi fil-​fidi. Ikun taʼ benefiċċju kbir li nikkunsidraw dawn l-​iżviluppi u oħrajn miktubin f’Atti 13:1-16:5, għax ix-​Xhieda taʼ Jehovah issa qed iġarrbu żjieda u barkiet spiritwali simili. (Isaija 60:22) (Fi studju privat tal-​artikli fuq l-​Atti f’din il-​ħarġa, aħna nissuġġerixxu li taqra l-​passaġġi mill-​ktieb indikati b’tipi grassi.)

Missjunarji Jieħdu Azzjoni

3. Liema xogħol sar minn “profeti u għalliema” f’Antijokija?

³ Irġiel mibgħutin mill-​kongregazzjoni f’Antijokija, tas-​Sirja, għenu lil dawk li jemmnu biex jissodaw fil-​fidi. (13:l-5) F’Antijokija kien hemm il-​“profeti u għalliema” Barnabas, Simeon (Niġer), Luċjus taʼ Ċirene, Manaen, u Sawlu taʼ Tarsu. Il-​profeti spjegaw il-​Kelma t’Alla u ħabbru ġrajjiet, fil-​waqt li l-​għalliema taw struzzjonijiet fl-​Iskrittura u fil-​għixien taʼ tjieba. (1 Korintin 13:8; 14:4) Barnabas u Sawlu rċevew kariga speċjali. Billi ħadu magħhom lil Mark, il-​kugin taʼ Barnabas, erħewlha lejn Ċipru. (Kolossin 4:10) Huma ppridkaw f’sinagogi f’Salamis, port fuq in-​naħa tal-​Lvant, imma m’hemmx miktub li l-​Lhud wieġbu b’mod tajjeb. Ladarba dawn l-​uħud kienu sinjuri materjalment, xi ħtieġa kellhom għall-​Messija?

4. X’ġara hekk kif il-​missjunarji baqgħu jippridkaw f’Ċipru?

⁴ Alla bierek xogħol ieħor taʼ xiehda f’Ċipru. (13:6-12) F’Pafos il-​missjunarji Itaqgħu mas-​saħħar u profeta falz Lhudi Bar-Ġesù (Elimas). Meta pprova jwaqqaf lill-​Prokonslu Serġjus Pawlus milli jismaʼ l-​kelma t’Alla, Sawlu mtela bl-​ispirtu qaddis u qal: ‘O raġel mimli qerq u viljakkerija, inti bin ix-​Xitan, inti l-​għadu taʼ dak kollu li hu twajjeb, m’intix se tieqaf iċċajpar il-​mogħdijiet tajbin taʼ Jehovah?’ F’dak il-​waqt, l-​id taʼ kastig taʼ Jehovah għamiet lil Elimas għal xi żmien, u Serġjus Pawlus “sar wieħed li jemmen, billi baqaʼ mibluh bit-​tagħlim taʼ Jehovah.”

5, 6. (a) Meta Pawlu tkellem fis-​sinagoga f’Antijokija taʼ Pisidja, x’qal dwar Ġesù? (b) X’effett kellha t-​taħdita taʼ Pawlu?

⁵ Minn Ċipru, il-​ġemgħa baħħret lejn il-​belt taʼ Perga fl-​Asja Minuri. Pawlu u Barnabas imbagħad marru lejn in-​naħa taʼ fuq minn mogħdijiet fil-​muntanji, wisq probabbli ‘f’perikli minn xmajjar u minn ħallelin tat-​toroq,’ lejn Antijokija, taʼ Pisidja. (2 Korintin 11:25, 26) Hemm Pawlu tkellem fis-​sinagoga. (13:13-41) Hu rriveda kif Alla tratta maʼ Iżrael u identifika lil Ġesù, id-​dixxendent taʼ David, bħala s-​Salvatur. Għalkemm mexxejja Lhud kienu insistew li Ġesù jmut, il-​wegħda lil missirijiethom twettqet meta Alla qajmu mill-​mewt. (Salm 2:7; 16:10; Isaija 55:3) Pawlu wissa lis-​semmiegħa tiegħu biex ma jżebilħux lir-​rigal taʼ salvazzjoni t’Alla permezz taʼ Kristu.—Ħabakkuk 1:5, Settwaġinta.

⁶ Id-​diskors taʼ Pawlu qajjem interess bħalma jagħmlu t-​taħdidiet pubbliċi mogħtijin mix-​Xhieda taʼ Jehovah illum. (13:42-52) Is-​Sibt taʼ wara kważi l-​belt kollha nġabret biex tismaʼ l-​kelma taʼ Jehovah, u dan ġiegħel lil-​Lhud jimtlew bil-​għira. Ara, f’ġimgħa waħda biss, il-​missjunarji kienu milli jidher ikkonvertew iktar Ġentili milli kienu għamlu dawk il-​Lhud f’ħajjithom kollha! Peress li l-​Lhud b’mod midgħi ikkontradixxew lil Pawlu, kien wasal iż-​żmien biex dawl spiritwali jiddi band’oħra, u ntqalilhom: ‘Ladarba qegħdin twarrbu ’l hemm il-​kelma t’Alla u ma tiġġudikawx lilkom infuskom bħala li ħaqqkom il-​ħajja taʼ dejjem, aħna nduru lejn il-​ġnus.’—Isaija 49:6.

7. Pawlu u Barnabas kif irreaġixxew għall-​persekuzzjoni?

⁷ Issa l-​Ġentili bdew jifirħu, u dawk kollha li kienu disposti kif jixraq għall-​ħajja taʼ dejjem saru jemmnu. Hekk kif il-​kelma taʼ Jehovah inġarret mal-​pajjiż kollu, madankollu, il-​Lhud xewxu lil xi nisa magħrufin (wisq probabbli biex jippressaw lil żwieġhom jew oħrajn) u rġiel prinċipali biex jippersegwitaw lil Pawlu u Barnabas u jitfgħuhom ’il barra mil-​limiti tagħhom. Imma dak ma waqqafx lill-​missjunarji. Huma sempliċement “farfru t-​trab minn saqajhom kontra tagħhom” u marru Ikonjum (Konija tal-​lum), belt ewlenija fil-​provinċja Rumana taʼ Galatja. (Luqa 9:5; 10:11) Sewwa, xi ngħidu dwar id-​dixxipli li baqgħu f’Antijokija taʼ Pisidja? Billi kienu ntgħamlu sodi fil-​fidi, huma “komplew ikunu mimlijin bil-​ferħ u bl-​ispirtu qaddis.” Dan igħinna naraw li l-​oppożizzjoni mhux bil-​fors tfixkel il-​progress spiritwali.

Sodi fil-​Fidi Minkejja Persekuzzjoni

8. X’ġara bħala riżultat taʼ għoti taʼ xiehda b’suċċess f’Ikonjum?

⁸ Pawlu u Barnabas infushom urew li kienu sodi fil-​fidi minkejja l-​persekuzzjoni. (14:1-7) Bi tweġiba għall-​għoti taʼ xiehda tagħhom fis-​sinagoga taʼ Ikonjum, ħafna Lhud u Griegi saru jemmnu. Meta Lhud li ma jemmnux qanqlu lill-​Ġentili kontra d-​dixxipli l-​ġodda, iż-​żewġ ħaddiema tkellmu bil-​qlubija u bl-​awtorità t’Alla, u hu wera l-​approvazzjoni tiegħu billi għenhom jagħmlu sinjali. Dan qasam il-​folla, xi wħud żammew mal-​Lhud u oħrajn mal-​appostli (uħud mibgħutin). L-​appostli ma kinux beżżiegħa, imma meta saru jafu dwar pjan biex iħaġġruhom, huma b’mod għaqli telqu biex jippridkaw f’Lakonija, reġjun tal-​Asja Minuri fil-​Galatja t’Isfel. Billi nkunu prudenti, aħna wkoll nistgħu taʼ spiss nibqgħu attivi fil-​ministeru minkejja l-​oppożizzjoni.—Mattew 10:23.

9, 10. (a) L-​abitanti taʼ Listra kif irreaġixxew għall-​fejqan taʼ raġel zopp? (b) Pawlu u Barnabas kif ireaġġixxew f’Listra?

⁹ Il-​belt taʼ Listra fil-​Lakonija mbagħad ħadet xiehda. (14:8-18) Hemm Pawlu fejjaq raġel zopp mit-​twelid. Billi ma rrealizzawx li Jehovah kien responsabbli għall-​miraklu, il-​folol għajtu: “L-​allat saru bħall-​bnedmin u niżlu għandna!” Peress li dan intqal bl-​ilsien Likaoni, Barnabas u Pawlu ma kinux jafu x’kien qed jiġri. Ladarba Pawlu kien il-​kelliem ewlieni, in-​nies ħarsu lejh bħala Hermes (il-messaġġier elokwenti tal-​allat) u ħasbu li Barnabas kien Żews, l-​alla Grieg ewlieni.

¹⁰ Il-​qassis taʼ Żews saħansitra ġab barrin u girlandi sabiex joffri sagrifiċċji lil Pawlu u Barnabas. Wisq probabbli billi tkellmu bil-​Grieg li kien jiftiehem minn kulħadd jew bl-​użu taʼ xi interpretu, il-​viżitaturi malajr spjegaw li huma wkoll kienu bnedmin b’difetti u li kienu qed jiddikjaraw l-​aħbar tajba sabiex in-​nies iduru ’l bogħod minn “dawn l-​affarijiet fiergħa” (allat, jew idoli bla ħajja) lejn Alla l-​ħaj. (1 Slaten 16:13; Salm 115:3-9; 146:6) Iva, Alla qabel ħalla lill-​ġnus (imma mhux lill-​Ebrej) imorru għal triqithom, għalkemm, ma ħalliex lilu nnifsu mingħajr xiehda dwar l-​eżistenza u t-​tjubija tiegħu f’li ‘tahom xita u staġuni bil-​frott, billi mela lil qlubhom għalkollox bl-​ikel u b’ferħ tajjeb.’ (Salm 147:8) Minkejja dan ir-​raġunar, Barnabas u Pawlu bil-​kemm irnexxielhom iżommu lill-​folol milli jissagrifikawlhom. Iżda, il-​missjunarji ma aċċettawx qima bħala allat, lanqas ma wżaw din l-​awtorità biex iwaqqfu l-​Kristjanità f’dak il-​post. Eżempju mill-​aħjar, b’mod speċjali jekk aħna inklinati li nixxenqu għal tifħir f’dak li Jehovah jippermettielna nwettqu fis-​servizz tiegħu!

11. X’nistgħu nitgħallmu mill-​istqarrija: “Irridu nidħlu ġewwa s-​saltna t’Alla minn ħafna tribulazzjonijiet”?

¹¹ F’daqqa waħda, il-​persekuzzjoni tfaċċat bil-​kruħa tagħha. (14:19-28) Dan kif? Ipperswaduti minn Lhud taʼ Antijokija taʼ Pisidja u taʼ Ikonjum, il-​folol ħaġġru lil Pawlu u kaxkruh barra ’l belt, billi ħasbu li kien mejjet. (2 Korintin 11:24, 25) Imma meta d-​dixxipli daru miegħu, hu qam u daħal f’Listra bla ħadd ma nduna, forsi għax kien id-​dlam. L-​għada, hu u Barnabas marru Derbe, fejn għadd mhux ħażin taʼ nies saru dixxipli. Meta reġgħu żaru Listra, Ikonjum, u Antijokija, il-​missjunarji saħħew lid-​dixxipli billi nkuraġġewhom biex jibqgħu fil-​fidi u qalu: “Irridu nidħlu ġewwa s-​saltna t’Alla minn ħafna tribulazzjonijiet.” Bħala Kristjani, aħna wkoll nistennew li ngħaddu minn tribulazzjonijiet u m’għandniex nippruvaw naħarbuhom billi nikkompromettu l-​fidi tagħna. (2 Timotew 3:12) F’dak iż-​żmien, inħatru anzjani fil-​kongregazzjonijiet li lilhom inkitbet l-​ittra taʼ Pawlu lill-​Galatin.

12. Meta tlesta l-​ewwel vjaġġ missjunarju taʼ Pawlu, x’għamlu ż-​żewġ missjunarji?

¹² Waqt li għaddew minn Pisidja, Pawlu u Barnabas tkellmu l-​kelma f’Perga, belt prominenti taʼ Pamfilja. Maż-​żmien, huma rritornaw f’Antijokija, fis-​Sirja. Peress li l-​ewwel vjaġġ taʼ Pawlu kien tlesta, iż-​żewġ missjunarji nfurmaw lill-​kongregazzjoni dwar “il-​ħafna affarijiet li Alla kien għamel permezz tagħhom, u li hu kien fetaħ għall-​ġnus il-​bieb għall-​fidi.” Għaddew xi żmien mad-​dixxipli f’Antijokija, u dan bla dubju għen ħafna biex jagħmilhom sodi fil-​fidi. Żjajjar taʼ indokraturi li jivvjaġġaw il-​lum għandhom effetti spiritwali simili.

Mistoqsija Vitali Mwieġba

13. Biex il-​Kristjanità ma tinqasamx f’taqsima Ebrajka u f’waħda mhix Lhudija, x’kien meħtieġ?

¹³ Sodizza fil-​fidi kienet tirrikjedi għaqda fil-​ħsieb. (1 Korintin 1:10) Biex il-​Kristjanità ma tinqasamx f’taqsima Ebrajka u f’waħda mhix Lhudija, il-​ġemgħa li tiggverna kellha bżonn li tiddeċiedi jekk il-​Ġentili li kienu deħlin bil-​ħeffa ġol-​organizzazzjoni t’Alla kellhomx iħarsu l-​Liġi taʼ Mosè u jiġu ċirkonċiżi. (15:1-5) Ċerti rġiel mill-​Ġudea kienu diġà vvjaġġaw lejn Antijokija tas-​Sirja u kienu bdew igħallmu lill-​Ġentili li emmnu li jekk ma jiġux ċirkonċiżi, ma setgħux isalvaw. (Eżodu 12:48) Għaldaqstant, Pawlu, Barnabas, u oħrajn intbagħtu għand l-​appostli u l-​anzjani f’Ġerusalemm. Saħansitra hemm, uħud li jemmnu u li xi darba kienu Fariżej moħħhom fuq affarijiet legali insistew li l-​Ġentili kellhom jiġu ċirkonċiżi u josservaw il-​Liġi.

14. (a) Għalkemm sar disputar fil-​konferenza taʼ Ġerusalemm, x’eżempju tajjeb ingħata? (b) X’inhu s-​sugu tar-​raġunar taʼ Pietru f’dik l-​okkażjoni?

¹⁴ Inżammet konferenza biex tiġi aċċertata r-​rieda t’Alla. (15:6-11) Iva, kien hemm disputar, imma ma kienx hemm ġlied hekk kif irġiel b’konvinzjonijiet qawwija esprimew lilhom infushom—eżempju mill-​aħjar għall-​anzjani llum! Meta kien il-​waqt Pietru qal: ‘Alla għażel li permezz taʼ fommi Ġentili [bħal Kornelju] għandhom jisimgħu l-​aħbar tajba u jemmnu. Hu ta xiehda billi tahom l-​ispirtu qaddis u ma għamel ebda distinzjoni bejna u bejnhom. [Atti 10:44-47] Mela għala qegħdin iġġarrbu lil Alla billi timponu madmad [obbligu li jżommu l-​Liġi] fuq għonqhom li la aħna u lanqas missirijietna tal-​qedem ma setgħu jifilħu? Ahna [il-Lhud skond il-​laħam] nafdaw li nsalvaw permezz tal-​qalb tajba mhix mistħoqqa tal-​Mulej Ġesù bl-​istess mod bħal dawk in-​nies.’ Il-​fatt li Alla aċċetta Ġentili mhux ċirkonċiżi wera li ċ-​ċirkonċiżjoni u z-​żamma tal-​Liġi ma kinux meħtieġa għas-​salvazzjoni.—Galatin 5:1.

15. Liema punti bażiċi għamel Ġakbu, u x’issuġġerixxa li jiktbulhom lill-​Kristjani Ġentili?

¹⁵ Il-​kongregazzjoni siktet meta kkonkluda Pietru, imma kellu jintqal iżjed. (15:12-21) Barnabas u Pawlu tkellmu dwar is-​sinjali li Alla wettaq permezz tagħhom fost il-​Ġentili. Imbagħad dak li ppresieda l-​laqgħa, Ġakbu, ħu Ġesù mill-​omm, qal: ‘Simeon [isem Pietru bl-​Ebrajk] irrakkonta kif Alla dawwar l-​attenzjoni tiegħu lejn il-​ġnus biex jieħu minnhom poplu għal ismu.’ Ġakbu indika li l-​bini mill-​ġdid li kien imbassar tal-​“għarix taʼ David” (it-twaqqif mill-​gdid tas-​saltna fil-​linja taʼ David) kien qed jitwettaq bil-​ġbir tad-​dixxipli (werrieta tas-​Saltna) taʼ Ġesù minn fost Lhud kif ukoll Ġentili. (Għamos 9:11, 12 Settwaġinta; Rumani 8:17) Ladarba Alla hekk ippjana, id-​dixxipli għandhom jaċċettawh dan. Ġakbu ta l-​parir li jiktbu lill-​Kristjani Ġentili biex jastjenu minn (1) affarijiet imniġġsin, (2) miż-​żina, u (3) mid-​demm u dak li jiġi fgat. Dawn il-​projbizzjonijiet kienu fil-​kitbiet taʼ Mosè li kienu jinqraw fis-​sinagogi kull jum taʼ Sibt.—Ġenesi 9:3, 4; 12:15-17; 35:2, 4.

16. L-​ittra tal-​ġemgħa li tiggverna tal-​ewwel seklu fuq liema tliet punti tagħti gwida sal-​ġurnata tal-​lum?

¹⁶ Il-​ġemgħa li tiggverna issa bagħtet ittra lill-​Kristjani Ġentili f’Antijokija, is-​Sirja, u ċ-​Ċiliċja. (15:22-35) L-​ispirtu qaddis u l-​kittieba tal-​ittra irrikjedew astinenza minn affarijiet issagrifikati lill-​idoli; mid-​demm (ikkunsmat b’mod regulari minn xi nies); minn affarijiet fgati mingħajr ma jinħareġ demmhom (ħafna pagani kienu jqisu laħam bħal dan bħala mill-​aqwa ikel); u miż-​żina (Grieg por·neiʹa, li tindika relazzjonijiet sesswali illeċiti barra żwieġ Skritturali). B’din l-​astinenza, huma kien se jkollhom ir-​riżq spiritwalment, saħansitra bħalma għandhom issa x-​Xhieda taʼ Jehovah għaliex huma japplikaw “dawn l-​affarijiet neċessarji.” Il-​kelmiet “Saħħa tajba lilkom!” ammontaw għal li wieħed igħid “Saħħa,” u m’għandniex nikkonkludu li dawn il-​ħtiġijiet primarjament kellhom x’jaqsmu maʼ miżuri taʼ saħħa. Meta l-​ittra nqrat f’Antijokija, il-​kongregazzjoni ferħet bl-​inkuraġġiment li kienet tipprovdi. F’dak iż-​żmien, il-​poplu t’Alla f’Antijokija wkoll intagħmel sod fil-​fidi bil-​kliem inkuraġġanti taʼ Pawlu, Silas, Barnabas, u oħrajn. Jalla aħna wkoll infittxu modi biex ninkuraġġixxu u nibnu lil sħabna fit-​twemmin.

Tibda t-​Tieni Mawra Missjunarja

17. (a) Xi problema qamet meta ġiet proposta mawra missjunarja oħra, it-​tieni waħda? (b) Pawlu u Barnabas kif aġixxew fit-​tilwima tagħhom?

¹⁷ Qamet problema meta ġie pproponut vjaġġ missjunarju ieħor, it-​tieni wieħed. (15:36-41) Pawlu ssuġġerixxa li hu u Barnabas jerġgħu jżuru lill-​kongregazzjonijiet f’Ċipru u fl-​Asja Minuri. Barnabas qabel imma ried jieħu miegħu lil Mark il-​kuġin tiegħu. Pawlu m’aċċettax għax Mark kien telaqhom f’Pamfilja. Minħabba f’hekk kien hemm “tfaqqiegħa qawwija taʼ rabja.” Imma la Pawlu u lanqas Barnabas ma fittxew vindikazzjoni persunali billi ppruvaw jinvolvu anzjani oħra jew il-​ġemgħa li tiggverna fil-​kwistjoni privata tagħhom. X’eżempju mill-​aħjar!

18. X’irriżulta mis-​separazzjoni taʼ Pawlu u Barnabas, u kif nistgħu nibbenefikaw minn dan l-​inċident?

¹⁸ Din it-​tilwima, madankollu, ikkaġunat separazzjoni. Barnabas ħa lil Mark miegħu lejn Ċipru. Pawlu, maʼ Silas bħala sieħbu, “għaddew mis-​Sirja u minn Ċiliċja, isaħħu lill-​kongregazzjonijiet.” Barnabas setaʼ ġie influwenzat minn rabtiet tal-​familja, imma kien imissu għaraf l-​appostolat taʼ Pawlu u l-​għażla tiegħu bħala “reċipjent magħżul.” (Atti 9:15) U xi ngħidu għalina? Dan l-​inċident għandu jimpressjonana dwar il-​ħtieġa li nagħrfu awtorità teokratika u li nikkoperaw bis-​sħiħ mal-​“irsir fidil u għaqli”!—Mattew 24:45-47.

Progress fil-​Paċi

19. X’eżempju għandhom żgħażagħ Kristjani taż-​żmien preżenti f’Timotew?

¹⁹ Din it-​tilwima ma tħallietx teffettwa l-​paċi tal-​kongregazzjoni. Il-​poplu t’Alla baqaʼ jiġi ssodat fil-​fidi. (16:1-5) Pawlu u Silas marru Derbe u lil hinn lejn Listra. Hemm kien igħix Timotew, l-​iben taʼ Ewniċe, Lhudija li kienet temmen, u taʼ żewġha li ma kienx jemmen u li kien Grieg. Timotew kien żagħżugħ, għax saħansitra 12 - 15 sena wara, intqallu: “Tħalli lil ebda raġel qatt imaqdar lil żgħożitek.” (1 Timotew 4:12) Ladarba hu “kien irrapportat tajjeb dwaru mill-​aħwa f’Listra u [madwar 18-il mil ’l bogħod] f’Ikonjum,” hu kien magħruf tajjeb għall-​ministeru mill-​aħjar u l-​kwalitajiet taʼ tjieba tiegħu. Żgħażagħ Kristjani llum għandhom ifittxu l-​għajnuna taʼ Jehovah biex jibnu reputazzjoni simili. Pawlu għamel iċ-​ċirkonċiżjoni lil Timotew għaliex kienu se jmorru fi djar u sinagogi tal-​Lhud li kienu jafu dwar missier Timotew li kien Ġentil, u l-​appostlu ried li xejn ma jfixkel l-​aċċess għal irġiel u nisa Lhud li kellhom bżonn jitgħallmu dwar il-​Messija. Mingħajr ma jiksru l-​prinċipji tal-​Bibbja, ix-​Xhieda taʼ Jehovah illum ukoll jagħmlu li jistgħu biex jagħmlu l-​aħbar tajba aċċettabbli għal kull xorta taʼ nies.—1 Korintin 9:19-23.

20. L-​aċċettar tal-​ittra tal-​ġemgħa li tiggverna tal-​ewwel seklu x’effett kellu, u kif taħseb li dan għandu jeffettwa lilna?

²⁰ B’Timotew bħala assistent tagħhom, Pawlu u Silas qassmu lid-​dixxipli d-​digrieti tal-​ġemgħa li tiggverna biex josservawhom. U x’kien ir-​riżultat? Probabbli billi jirreferi għas-​Sirja, iċ-​Ċiliċja, u l-​Galatja, Luqa kiteb: “Il-​kongregazzjonijiet komplew jiġu ssodati fil-​fidi u jiżdiedu fin-​numru minn jum għal jum.” Iva, l-​aċċettar tal-​ittra tal-​ġemgħa li tiggverna rriżulta f’għaqda u prosperità spiritwali. X’eżempju mill-​aħjar għaż-​żminijiet kritiċi tagħna, meta n-​nies taʼ Jehovah iridu jibqgħu magħqudin u sodi fil-​fidi!

Kieku Int Kif Twieġeb

◻ Pawlu u Barnabas kif irreaġixxew għall-​persekuzzjoni?

◻ X’nistgħu nitgħallmu mill-​istqarrija: “Irridu nidħlu ġewwa s-​saltna t’Alla minn ħafna tribulazzjonijiet”?

◻ X’parir nieħdu mit-​tliet punti fl-​ittra mibgħuta mill-​ġemgħa li tiggverna tal-​ewwel seklu?

◻ Fatturi li għamlu lix-​Xhieda taʼ Jehovah tal-​ewwel seklu sodi fil-​fidi kif japplikaw għalina llum?