Insiru Ministri Progressivi u Flessibbli

“Sirt kollox għal nies taʼ kull xorta, biex b’kull mezz insalva lil xi wħud.” ​—1 KORINTIN 9:​22.

1, 2. (a) L-appostlu Pawlu b’liema modi kien ministru effettiv? (b) Pawlu kif iddeskriva l-​attitudni tiegħu stess lejn l-​inkarigu tiegħu?

KIEN iħossu komdu maʼ nies intelletwali sofistikati u maʼ wħud umli li kienu jagħmlu t-​tined. Kien jipperswadi uffiċjali Rumani għoljin u raħħala Friġjani. Il-​kitbiet tiegħu kienu jimmotivaw lill-​Griegi li kellhom moħħhom miftuħ u għal-​Lhud konservattivi. Ma stajtx tiddubita l-​loġika tiegħu, u l-​appell emozzjonali tiegħu kien qawwi. Hu pprova jsib xi ħaġa komuni maʼ kulħadd biex forsi jressaq lil xi wħud lejn Kristu.​—Atti 20:21.

² Ir-​raġel kien l-​appostlu Pawlu li mingħajr dubju kien ministru effettiv u progressiv. (1 Timotju 1:​12) Hu rċieva l-​inkarigu mingħand Ġesù biex “iwassal [isem Kristu] quddiem il-​ġnus kif ukoll quddiem slaten u wlied Iżrael.” (Atti 9:​15) X’kienet l-​attitudni tiegħu lejn dan l-​inkarigu? Hu ddikjara: “Sirt kollox għal nies taʼ kull xorta, biex b’kull mezz insalva lil xi wħud. U nagħmel kollox minħabba l-​aħbar tajba, biex naqsam dan il-​messaġġ m’oħrajn.” (1 Korintin 9:​19-​23) X’nistgħu nitgħallmu mill-​eżempju li tana Pawlu u li jistaʼ jgħinna nkunu iktar effettivi fl-​ippridkar u t-​tagħlim tagħna?

Raġel Mibdul Iffaċċja l-​Isfida

3. Pawlu kif kien iħossu dwar il-​Kristjani qabel il-​konverżjoni tiegħu?

³ Kien Pawlu minn dejjem bniedem li juri sabar fit-​tul u konsiderazzjoni, u kien minn dejjem adattat għall-​inkarigu li rċieva? Xejn affattu! Il-​fanatiċiżmu reliġjuż għamel lil Sawlu (bħalma kien magħruf qabel Pawlu) persekutur vjolenti tas-​segwaċi taʼ Kristu. Bħala żagħżugħ, hu approva l-​qtil taʼ Stiefnu. Wara, Pawlu kien jiġri bla ħniena wara l-​Kristjani. (Atti 7:​58; 8:​1, 3; 1 Timotju 1:​13) Hu kompla “jhedded lid-​dixxipli tal-​Mulej u kellu xewqa kbira li joqtolhom.” Minħabba li ma kienx kuntent li jfittex lil min jemmen f’Ġerusalemm biss, hu beda jifrex il-​kampanja tiegħu taʼ mibegħda saħansitra fit-​tramuntana sa Damasku.​—Atti 9:​1, 2.

4. Liema bidla kellu jagħmel Pawlu biex iwettaq l-​inkarigu tiegħu?

⁴ Il-​kaġun tal-​mibegħda intensa taʼ Pawlu lejn il-​Kristjanità forsi kien il-​konvinzjoni li t-​twemmin ġdid kien se jikkorrompi l-​Ġudaiżmu billi jħalltu maʼ ideat barranin u mhux mixtiqin. Wara kollox, Pawlu kien “Fariżew,” isem li jfisser “wieħed separat.” (Atti 23:6) Immaġina kemm ħassu xxokkjat Pawlu meta sar jaf li Alla kien għażlu biex jippriedka dwar Kristu​—minn tant nies​—lill-​Ġentili! (Atti 22:​14, 15; 26:​16-​18) Il-​Fariżej irrifjutaw saħansitra li jieklu maʼ dawk li qisuhom bħala midinbin! (Luqa 7:​36-​39) Bla dubju kien hemm bżonn taʼ sforz kbir min-​naħa tiegħu biex ibiddel il-​ħarsa tiegħu u jġibha fi qbil mar-​rieda t’Alla li nies taʼ kull xorta jiġu salvati.​—Galatin 1:​13-​17.

5. Kif nistgħu nimitaw lil Pawlu fil-​ministeru tagħna?

⁵ Forsi aħna jkollna nagħmlu l-​istess. Hekk kif niltaqgħu maʼ varjetà dejjem akbar taʼ nies minn diversi lingwi fil-​qasam internazzjonali tagħna, irridu nagħmlu sforz ħabrieki biex niċċekkjaw l-​attitudni tagħna u nneħħu kwalunkwe preġudizzju. (Efesin 4:​22-​24) Kemm jekk nirrealizzaw u kemm jekk le, aħna niġu influwenzati mit-​trobbija soċjali u edukattiva tagħna. Dan jistaʼ jnaqqax fina opinjonijiet u attitudnijiet li huma preġudikati u li m’humiex flessibbli. Irridu negħlbu dawn is-​sentimenti jekk irridu li jkollna suċċess f’li nsibu u ngħinu lil uħud bħal nagħaġ. (Rumani 15:7) Pawlu hekk għamel. Hu aċċetta l-​isfida li jkabbar il-​ministeru tiegħu. Immotivat mill-​imħabba, hu żviluppa s-​sengħa tat-​tagħlim li hija taʼ min jimitaha. Tabilħaqq, studju tal-​ministeru taʼ l-​“appostlu tal-​ġnus” juri li hu kien attent, flessibbli, u prattiku fl-​ippridkar u t-​tagħlim.a​—Rumani 11:13.

Kif Pawlu Kien Flessibbli f’Ċirkustanzi Differenti

6. Pawlu kif kien attent għall-​isfond tas-​semmiegħa tiegħu, u b’liema riżultat?

⁶ Pawlu kien attent għat-​twemmin u l-​isfond tas-​semmiegħa tiegħu. Meta kellem lis-​Sultan Agrippa II, Pawlu rrikonoxxa li s-​sultan kien “espert fid-​drawwiet kollha tal-​Lhud kif ukoll fil-​kontroversji tagħhom.” Imbagħad, bis-​sengħa Pawlu uża l-​għarfien tiegħu dwar it-​twemmin t’Agrippa u ddiskuta miegħu kwistjonijiet li s-​sultan kien jifhem sew. Pawlu tant kien jirraġuna b’mod ċar u konvinċenti li Agrippa qal: “Dalwaqt tipperswadini biex insir Kristjan.”​—Atti 26:​2, 3, 27, 28.

7. Pawlu kif wera li kien flessibbli meta ppriedka lil folla f’Listra?

⁷ Pawlu kien ukoll flessibbli. Innota kemm uża tattika differenti meta pprova jipperswadi folla fil-​belt taʼ Listra biex ma jqimux lilu u lil Barnaba bħala allat. Intqal li dawn in-​nies, li kienu jitkellmu bil-​Likaonjan, kienu fost l-​inqas edukati u l-​iktar superstizzjużi fil-​poplu. Skond Atti 14:​14-18, Pawlu pponta lejn il-​ħolqien u l-​għotjiet fin-​natura bħala evidenza tas-​superjorità taʼ l-​Alla l-​veru. L-​argument kien sempliċi biex issegwih, u mid-​dehra ‘żamm lill-​folol milli joffru sagrifiċċji’ lil Pawlu u lil Barnaba.

8. Pawlu b’liema modi wera li kien flessibbli minkejja li ġieli kellu sentimenti qawwijin?

⁸ M’għandniex xi ngħidu, Pawlu ma kienx perfett, u xi drabi, kellu sentimenti qawwijin dwar ċerti affarijiet. Per eżempju, f’okkażjoni minnhom meta ġie attakkat b’mod umiljanti u inġust, hu ħataf lil wieħed Lhudi jismu Ananija. Imma meta Pawlu sar jaf li mingħajr ma induna kien insulta lill-​qassis il-​kbir, hu mill-​ewwel talab skuża. (Atti 23:​1-5) F’Ateni, għall-​ewwel beda ‘jitbaqbaq meta ra li l-​belt kienet mimlija idoli.’ Però, fit-​taħdita tiegħu fuq l-​Għolja taʼ Marte, Pawlu ma weriex li kien imbaqbaq. Minflok, hu indirizza lil dawk minn Ateni fl-​Arjopagu, u rraġuna fuq xi ħaġa li kellhom komuni billi rrefera għall-​artal tagħhom “Lil Alla Mhux Magħruf” u kkwota lil wieħed mill-​poeti tagħhom.​—Atti 17:​16-28.

9. Pawlu kif wera li kien kapaċi jittratta m’udjenzi differenti?

⁹ Pawlu wera li kien kapaċi ħafna jittratta m’udjenzi differenti. Hu kkunsidra l-​kultura u l-​ambjent li influwenzaw l-​irraġunar taʼ l-​udjenza tiegħu. Meta kiteb lill-​Kristjani f’Ruma, hu kien jaf sewwa li dawn kienu jgħixu fil-​belt kapitali taʼ l-​akbar qawwa politika f’dak iż-​żmien. Punt prinċipali fl-​ittra taʼ Pawlu lill-​Kristjani f’Ruma kien li l-​qawwa li tikkorrompi tad-​dnub taʼ Adam tintrebaħ bil-​qawwa li tifdi taʼ Kristu. Hu kellem lill-​Kristjani Rumani u lil dawk madwarhom b’lingwa li kienet se tmissilhom qalbhom.​—Rumani 1:4; 5:​14, 15.

10, 11. Pawlu kif adatta t-​tixbihat tiegħu għas-​semmiegħa tiegħu? (Ara wkoll in-​nota taʼ taħt.)

¹⁰ Pawlu x’għamel meta ried jispjega veritajiet profondi mill-​Bibbja lis-​semmiegħa tiegħu? L-​appostlu kien kapaċi juża tixbihat komuni u sempliċi biex jiċċara ideat spiritwali komplikati. Per eżempju, Pawlu kien jaf li n-​nies f’Ruma kienu familjari mas-​sistema taʼ l-​ilsiera fl-​Imperu Ruman. Fil-​fatt, ħafna min-​nies li kien qed jiktbilhom x’aktarx li kienu lsiera. Pawlu għalhekk uża l-​jasar bħala tixbiha biex isaħħaħ l-​argument qawwi tiegħu dwar l-​għażla taʼ dak li jkun li jissottometti ruħu għad-​dnub jew għas-​sewwa.​—Rumani 6:​16-20.

¹¹ Xogħol taʼ referenza wieħed jgħid: “Fost ir-​Rumani, sid setaʼ jeħles ilsir bla kundizzjonijiet, jew l-​ilsir setaʼ jixtri l-​libertà tiegħu billi jħallas lil sidu. Il-​libertà setgħet tingħata jekk dak li jkun isir ilsir taʼ xi alla.” Ilsir meħlus setaʼ jkompli jaħdem għal sidu biex jaqlaʼ l-​paga. Pawlu milli jidher irrefera għal din il-​prattika meta kiteb dwar l-​għażla taʼ l-​individwu dwar liema sid se jobdi​—id-​dnub jew is-​sewwa. Il-​Kristjani f’Ruma kienu nħelsu mid-​dnub u issa kienu l-​proprjetà t’Alla. Kienu ħielsa biex jaqdu lil Alla, madankollu xorta setgħu jagħżlu li jaqdu lid-​dnub​—is-​sid taʼ qabel—jekk xtaqu. Din it-​tixbiha sempliċi imma familjari kienet se tqanqal lil dawk il-​Kristjani f’Ruma biex jistaqsu lilhom infushom, ‘Lil liema sid qed naqdi?’b

Nitgħallmu mill-​Eżempju taʼ Pawlu

12, 13. (a) Liema sforz hemm bżonn illum sabiex nilħqu l-​qalb taʼ l-​udjenza mħallta tagħna? (b) X’sibt effettiv meta tippriedka lil uħud li għandhom sfond differenti?

¹² Bħal Pawlu, irridu nkunu attenti, flessibbli, u prattiċi sabiex nilħqu l-​qalb taʼ l-​udjenza mħallta tagħna. Biex ngħinu lis-​semmiegħa tagħna jifhmu s-​sens taʼ l-​aħbar tajba, aħna nixtiequ nagħmlu iktar minn kuntatt superfiċjali, naqsmu messaġġ preparat, jew inħallu xi letteratura Biblika. Aħna nistinkaw biex nagħrfu l-​bżonnijiet tagħhom u dak li jkollhom fuq moħħhom, x’jogħġobhom u x’ma jogħġobhomx, dak li jbeżżagħhom, u l-​preġudizzji li jkollhom. Għalkemm dan jirrikjedi ħafna ħsieb u sforz, il-​pubblikaturi tas-​Saltna madwar id-​dinja qed jagħmlu dan bil-​ħerqa. Per eżempju, l-​uffiċċju tal-​fergħa tax-​Xhieda taʼ Ġeħova fl-​Ungerija jirrapporta: “L-​aħwa juru rispett għad-​drawwiet u l-​mod taʼ ħajja taʼ wħud minn pajjiżi oħra u ma jistennewhomx li jadottaw drawwiet lokali.” Ix-​Xhieda f’pajjiżi oħra jistinkaw biex jagħmlu l-​istess.

¹³ F’pajjiż wieħed fil-​Lvant Imbiegħed, il-​maġġuranza min-​nies huma konċernati dwar is-​saħħa, it-​taħriġ tat-​tfal, u l-​edukazzjoni. Il-​pubblikaturi tas-​Saltna hemmhekk jipprovaw jenfasizzaw dawn is-​suġġetti minflok maʼ jiddiskutu kwistjonijiet bħall-​kundizzjonijiet dinjin li sejrin għall-​agħar jew kwistjonijiet soċjali komplikati. B’mod simili, pubblikaturi f’belt kbira fl-​Istati Uniti nnotaw li nies f’ċerti nħawi fit-​territorju tagħhom huma konċernati dwar kwistjonijiet bħall-​korruzzjoni, iż-​żjieda fit-​traffiku, u l-​kriminalità. Ix-​Xhieda b’suċċess jużaw dawn is-​suġġetti biex jibdew diskussjonijiet Bibliċi. Għalliema effettivi tal-​Bibbja jaċċertaw ruħhom li minkejja s-​suġġett li jagħżlu, huma jibqgħu pożittivi u inkuraġġanti, billi jenfasizzaw il-​valur prattiku taʼ l-​applikar taʼ prinċipji Bibliċi issa u l-​prospetti sbieħ li Alla joffri għall-​futur.​—Isaija 48:​17, 18; 52:7.

14. Iddeskrivi modi kif nistgħu nadattaw għall-​bżonnijiet u ċ-​ċirkustanzi differenti tan-​nies.

¹⁴ Huwa t’għajnuna wkoll li invarjaw il-​metodi tagħna fil-​ministeru, ladarba n-​nies għandhom sfondi kulturali, edukazzjonali, u reliġjużi differenti ħafna. Il-​mod kif inkellmu lil dawk li jemmnu fil-​Ħallieq imma mhux fil-​Bibbja se jkun differenti minn kif inkellmu lil dawk li ma jemmnux f’Alla. Meta xi ħadd iħoss li l-​letteratura reliġjuża kollha hija strument taʼ propaganda, il-​preżentazzjoni li nużaw miegħu se tkun differenti mill-​waħda li nużaw maʼ xi ħadd li jaċċetta dak li tgħallem il-​Bibbja. Hemm bżonn ukoll taʼ flessibilità biex nittrattaw maʼ varjetà kbira taʼ livelli t’edukazzjoni li għandhom in-​nies li nitkellmu magħhom. Għalliema tas-​sengħa se jużaw irraġunar u tixbihat adattati għas-​sitwazzjoni li jiffaċċjaw.​—1 Ġwanni 5:20.

Għajnuna għal Ministri Ġodda

15, 16. Għala hemm bżonn li jitħarrġu ministri ġodda?

¹⁵ Pawlu ma kienx konċernat biss li jtejjeb il-​metodi tat-​tagħlim tiegħu. Hu ra l-​bżonn li jħarreġ u jipprepara lil dawk iżgħar minnu, bħal Timotju u Titu, sabiex isiru ministri effettivi. (2 Timotju 2:2; 3:​10, 14; Titu 1:4) B’mod simili, għad hemm bżonn urġenti li nipprovdu u nirċievu taħriġ illum.

¹⁶ Fl-​1914, kien hemm bejn wieħed u ieħor 5,000 pubblikatur tas-​Saltna madwar id-​dinja; illum, kull ġimgħa jitgħammdu 5,000 pubblikatur ġdid! (Isaija 54:​2, 3; Atti 11:21) Meta wħud ġodda jibdew jassoċjaw mal-​kongregazzjoni Kristjana u jkunu jixtiequ jieħdu sehem fil-​ministeru, għandhom bżonn taħriġ u direzzjoni. (Galatin 6:6) Huwa vitali li nużaw il-​metodi taʼ l-​Imgħallem, Ġesù, meta ngħallmu u nħarrġu lid-​dixxipli.c

17, 18. Kif nistgħu ngħinu lil uħud ġodda jiksbu fiduċja fil-​ministeru?

¹⁷ Ġesù ma qabadx u sab folla u qal lill-​appostli tiegħu biex jibdew ikellmuha. L-​ewwel enfasizza kemm hu bżonnjuż ix-​xogħol taʼ l-​ippridkar u inkuraġġixxa l-​bżonn li jitolbu b’mod persistenti dwar il-​ministeru. Imbagħad għamel tliet provvedimenti bażiċi: sieħeb fix-​xogħol, territorju fejn jaħdmu, u messaġġ. (Mattew 9:​35-38; 10:​5-7; Marku 6:7; Luqa 9:​2, 6) Aħna nistgħu nagħmlu l-​istess. Kemm jekk qed ngħinu lil uliedna stess, lil student ġdid, jew lil xi ħadd li ilu ma jieħu sehem fl-​attività taʼ l-​ippridkar, huwa xieraq li nagħmlu sforz biex nipprovdu taħriġ b’dan il-​mod.

¹⁸ Uħud ġodda għandhom bżonn għajnuna konsiderevoli biex isiru kunfidenti meta jippreżentaw il-​messaġġ tas-​Saltna. Tistaʼ tgħinhom jippreparaw u jipprattikaw preżentazzjoni sempliċi imma li tiġbed lin-​nies? Fil-​ministeru, ħallihom jitgħallmu mill-​eżempju tiegħek hekk kif tagħmel l-​ewwel ftit bibien. Tistaʼ ssegwi l-​eżempju taʼ Gidgħon, li qal lil dawk li kienu qed jiġġieldu fuq in-​naħa tiegħu: “Ħarsu lejja u agħmlu bħali.” (Mħallfin 7:17) Imbagħad ħalli lill-​istudent ġdid jieħu sehem. Faħħar lil uħud ġodda għall-​isforzi tagħhom, u meta jkun xieraq, offri suġġerimenti qosra biex jitjiebu.

19. X’inhi d-​determinazzjoni tiegħek hekk kif tistinka biex ‘twettaq il-​ministeru tiegħek bis-​sħiħ’?

¹⁹ Sabiex inwettqu l-​ministeru tagħna ‘bis-​sħiħ,’ aħna determinati li nsiru iktar flessibbli fil-​metodi tagħna, u rridu nħarrġu ministri ġodda biex jagħmlu l-​istess. Meta nikkunsidraw l-​importanza tal-​mira tagħna—li naqsmu l-​għarfien t’Alla li jwassal għas-​salvazzjoni—aħna konvinti li l-​isforzi li hemm bżonn biex insiru “kollox għal nies taʼ kull xorta, biex b’kull mezz [insalvaw] lil xi wħud,” huma vallapena.​—2 Timotju 4:5; 1 Korintin 9:22.

[Noti taʼ taħt]

X’Tiftakar?

• B’liema modi nistgħu nimitaw lil Pawlu fil-​ministeru tagħna?

• X’aktarx, liema bidliet għandna bżonn nagħmlu fil-​mod taʼ ħsieb tagħna?

• Kif nistgħu nżommu l-​messaġġ tagħna pożittiv?

• Ministri ġodda x’għandhom bżonn sabiex isiru kunfidenti?

[Kumment f’paġna 29]

L-​appostlu Pawlu kien attent, flessibbli, u prattiku fl-​ippridkar u t-​tagħlim

[Kumment f’paġna 31]

Ġesù għamel tliet provvedimenti bażiċi għad-​dixxipli tiegħu: sieħeb fix-​xogħol, territorju fejn jaħdmu, u messaġġ

[Stampi f’paġna 28]

Pawlu rnexxa f’li jilħaq udjenzi differenti billi kien flessibbli

[Stampa f’paġna 30]

Ministri effettivi jikkunsidraw l-​isfond kulturali tas-​semmiegħa tagħhom

[Stampa f’paġna 31]

Ministri progressivi jgħinu lil uħud ġodda jippreparaw għall-​ministeru