Kulħadd Se Jkun Ħieles

“Jiena għadni persważ li t-​tbatijiet taʼ issa ma għandhom xejn x’jaqsmu mal-​glorja li għad trid tidher fina. Il-​ħlejjaq kollha qegħdin jistennew ħerqana r-​rivelazzjoni taʼ wlied Alla; għax il-​ħolqien jinsab taħt il-​frugħa – mhux minn rajh, imma minħabba Alla li xeħtu taħtha – bit-​tama li l-​ħlejjaq huma wkoll għad ikunu meħlusa mill-​jasar tat-​taħsir u jiksbu l-​ħelsien tal-​glorja taʼ wlied Alla. Aħna nafu li l-​ħolqien kollu għadu s’issa jitniehed bl-​uġigħ tal-​ħlas.”—RUMANI 8:18-22.

F’DIN il-​parti mill-​ittra tiegħu lill-​Kristjani f’Ruma, l-​appostlu Pawlu jagħti sommarju li jispikka dwar għala l-​ħajjiet tan-​nies huma neqsin mil-​libertà vera u għala tant spiss ikunu bla skop u mimlijin uġigħ. Hu jispjega wkoll kif nistgħu niksbu libertà vera.

“It-​Tbatijiet taʼ Issa”

Pawlu ma jċekkinx it-​“tbatijiet taʼ issa” meta jgħid li dawn “ma għandhom xejn x’jaqsmu mal-​glorja li għad trid tidher fina.” Fi żmien Pawlu, kif ukoll iktar tard, il-​Kristjani batew ħafna taħt il-​ħakma totalitarja ħarxa eżerċitata mill-​awtoritajiet Rumani, li ftit li xejn kien jimpurtahom mid-​drittijiet tal-​bniedem. Ladarba Ruma bdiet temmen li l-​Kristjani kienu għedewwa taʼ l-​Istat, hi ssuġġettathom għal repressjoni brutali. L-​istorjografu J. M. Roberts jgħid: “Ħafna Kristjani fil-​kapitali [Ruma] ċertament li mietu mewta orribbli fl-​arena jew ħarquhom ħajjin.” (Shorter History of the World) Dwar dawn il-​vittmi tal-​persekuzzjoni minn Neruni, rapport ieħor jistqarr: “Lil xi wħud sallbuhom, lil oħrajn ħitulhom fuqhom il-​ġlud taʼ l-​annimali u ġew ikkaċċjati mill-​klieb, lil oħrajn ksewhom biż-​żift u tawhom in-​nar biex iservu taʼ torċi ħajjin meta kien jidlam.”​—New Testament History, minn F. F. Bruce.

Dawn il-​Kristjani bikrin żgur li kienu jixtiequ ħelsien minn oppressjoni bħal din, imma ma kinux lesti li jmorru kontra t-​tagħlim taʼ Ġesù Kristu biex jiksbuha. Per eżempju, huma baqgħu assolutament newtrali fit-​taqbida bejn l-​awtoritajiet Rumani li kienu fil-​gvern u ġellieda għal-​libertà Lhud, bħaż-​Żelaturi. (Ġwann 17:16; 18:36) Għaż-​Żelaturi, “diskors dwar li jistennew il-​waqt t’Alla biex jaġixxi ma kienx dak li kienet tirrikjedi l-​kriżi preżenti.” Dak li kien hemm bżonn, qalu huma, kien “azzjoni vjolenti kontra l-​għadu,” Ruma. (New Testament History) Il-​Kristjani bikrin kienu jaħsbuha differenti. “Li jistennew il-​waqt t’Alla biex jaġixxi” għalihom kien l-​unika għażla realistika. Kienu konvinti li xejn ħlief intervent divin ma kien se jtemm “t-​tbatijiet taʼ issa” b’mod permanenti u jġib libertà vera u dejjiema. (Mikea 7:7; Ħabakkuk 2:3) Iżda, qabel ma nikkunsidraw kif se jiġri dan, ejja neżaminaw għala l-​ewwelnett il-​“ħolqien jinsab taħt il-​frugħa.”

“Taħt il-​Frugħa”

Hawnhekk il-​kelma “ħolqien,” jgħid Benjamin Wilson f’The Emphatic Diaglott, ma tfissirx “il-​ħolqien annimalesk u bla ruħ,” bħalma jissuġġerixxu xi wħud, imma pjuttost, “il-​bnedmin kollha.” (Qabbel Kolossin 1:23.) Dan jirreferi għall-​familja umana kollha​—għalina lkoll li nixxennqu għall-​ħelsien. Aħna ‘ġejna mixħutin taħt il-​frugħa’ minħabba dak li għamlu l-​ġenituri oriġinali tagħna. Ma kienx ‘minn rajna’ jew b’riżultat taʼ xi għażla persunali individwali li ġara dan. Is-​sitwazzjoni tagħna writnieha. Mil-​lat Skritturali, Rousseau mar żmerċ meta qal li “l-​bniedem twieled liberu.” Kull wieħed minna twieled taħt il-​jasar tad-​dnub u l-​imperfezzjoni, fi skjavitù, biex ngħidu hekk, taʼ sistema mimlija frustrazzjoni u frugħa.—Rumani 3:23.

Dan għala ġara? Minħabba li l-​ġenituri oriġinali tagħna, Adam u Eva, riedu jkunu “bħal Alla,” li ma jkollhom assolutament lil ħadd jikkmandahom, li jiddeċiedu għalihom infushom x’inhu tajjeb u x’inhu ħażin. (Ġenesi 3:5, Saydon) Huma injoraw fattur vitali rigward il-​libertà. Il-​Ħallieq biss jistaʼ jkollu libertà assoluta. Hu s-​Sovran Universali. (Isaija 33:22; Apokalissi 4:11) Il-​libertà umana trid bilfors tfisser libertà li għandha l-​limiti. Huwa għalhekk li d-​dixxiplu Ġakbu inkuraġġixxa lill-​Kristjani fi żmienu biex jissottomettu ruħhom għal-​“liġi perfetta tal-​ħelsien.”—Ġakbu 1:25.

Jehovah bix-​xieraq keċċa lil Adam u ’l Eva mill-​familja universali tiegħu, u bħala riżultat, huma mietu. (Ġenesi 3:19) Imma xi ngħidu għad-​dixxendenti tagħhom? Billi wera ħniena magħhom, għalkemm issa setgħu jgħaddulhom biss l-​imperfezzjoni, id-​dnub, u l-​mewt, Jehovah xorta ħalliehom jipproduċu t-​tfal. B’hekk, “il-​mewt laħqet il-​bnedmin kollha.” (Rumani 5:12) Huwa f’dan is-​sens li Alla ‘xeħet il-​ħolqien taħt il-​frugħa.’

Ir-​“Rivelazzjoni taʼ Wlied Alla”

Jehovah ssuġġetta lill-​ħolqien għall-​frugħa “bit-​tama” li xi darba l-​ħelsien jingħata lura lill-​familja umana permezz taʼ l-​attivitajiet taʼ “wlied Alla.” Min huma “wlied Alla”? Dawn huma d-​dixxipli taʼ Ġesù Kristu, li, bħall-​bqija tal-​“ħolqien [uman],” jitwieldu lsiera tad-​dnub u l-​imperfezzjoni. Minħabba li twieldu hekk, m’għandhomx id-​dritt li jkunu parti mill-​familja universali nadifa u perfetta t’Alla. Imma Jehovah jagħmel xi ħaġa taʼ l-​għaġeb għalihom. Permezz tas-​sagrifiċċju li Ġesù Kristu ħallas bħala prezz għall-​fidwa, Hu jilliberahom mill-​jasar tad-​dnub li wirtu u jiddikjarahom “twajbin,” jew indaf spiritwalment. (1 Korintin 6:11, New World Translation) Imbagħad, hu jadottahom bħala “wlied Alla,” u jġibhom lura fil-​familja universali tiegħu.—Rumani 8:14-17.

Bħala l-​ulied adottati taʼ Jehovah, huma se jkollhom privileġġ glorjuż. Se jkunu ‘għal Alla tagħna qassisin, li għad isaltnu fuq l-​art’ maġenb Ġesù Kristu bħala parti mis-​Saltna, jew gvern, t’Alla li taħkem mis-​sema. (Apokalissi 5:9, 10; 14:1-4) Dan huwa gvern stabbilit fis-​sod fuq prinċipji taʼ ħelsien u ġustizzja​—mhux fuq l-​oppressjoni u t-​tirannija. (Isaija 9:5, 6 [Isaija 9:6, 7, NW]; Isaija 61:1-4) L-​appostlu Pawlu jgħid li dawn l-​ulied t’Alla huma l-​imseħbin taʼ Ġesù, in-​‘nisel taʼ Abraham’ li tant ilu mwiegħed. (Galatin 3:16, 26, 29) Bħala talin, huma għandhom rwol fundamentali f’li titwettaq wegħda li Alla għamel lill-​ħabib tiegħu Abraham. Parti minn dik il-​wegħda hi li permezz tan-​nisel (jew, żerriegħa) taʼ Abraham, ‘jitbierku l-​ġnus kollha taʼ l-​art.’—Ġenesi 22:18.

Liema barka jġibu dawn għall-​umanità? Ulied Alla għandhom sehem f’li jilliberaw lill-​umanità kollha mill-​konsegwenzi terribbli tad-​dnub Adamiku u f’li jirrestawraw lill-​umanità għall-​perfezzjoni. Nies ‘minn kull ġens u tribù u poplu’ jistgħu jitbierku billi jeżerċitaw fidi fis-​sagrifiċċju li Ġesù Kristu ħallas bħala prezz għall-​fidwa u billi jissottomettu ruħhom għall-​ħakma benevolenti taʼ Saltnatu. (Apokalissi 7:9, 14-17; 21:1-4; 22:1, 2; Mattew 20:28; Ġwann 3:16) B’dan il-​mod, il-​“ħolqien kollu” għal darb’oħra se jgawdi “l-​ħelsien tal-​glorja taʼ wlied Alla.” Din m’hijiex se tkun xi xorta taʼ ħelsien politiku limitat u temporanju, imma pjuttost, ħelsien minn dak kollu li kkaġuna l-​uġigħ u l-​inkwiet għall-​familja umana minn mindu Adam u Eva rrifjutaw is-​sovranità t’Alla. Mhux taʼ b’xejn li l-​appostlu Pawlu setaʼ jgħid li “t-​tbatijiet taʼ issa ma għandhom xejn x’jaqsmu” mas-​servizz glorjuż li se jwettqu wħud leali!

Meta tibda “r-​rivelazzjoni taʼ wlied Alla”? Iż-​żmien huwa qrib ħafna issa, meta Jehovah jagħmilha ċara għal kulħadd min huma dawn l-​ulied t’Alla. Dan se jkun meta dawn l-​‘ulied,’ irxoxtati fil-​qasam taʼ l-​ispirti, jieħdu sehem maʼ Ġesù Kristu f’li jnaddfu din l-​art mill-​ħażen u l-​oppressjoni fil-​gwerra t’Alla taʼ Ħarmagedon. (Danjel 2:44; 7:13, 14, 27; Apokalissi 2:26, 27; 16:16; 17:14; 19:11-21) Madwarna qed naraw iktar u iktar evidenza li aħna dħalna sewwa fl-​“aħħar tad-​dinja,” meta Alla se jtemm l-​irvell li ilu jittollera għal tant żmien u l-​ħażen li jirriżulta minnu.—2 Timotju 3:1-5; Mattew 24:3-31.

Iva, huwa veru, bħalma qal l-​appostlu Pawlu, li “l-​ħolqien kollu għadu s’issa jitniehed bl-​uġigħ tal-​ħlas”​—imma mhux għal ħafna iktar. Miljuni li huma ħajjin issa se jaraw “it-​tiġdid kollu li fl-​imgħoddi semma Alla b’fomm il-​profeti qaddisa tiegħu,” inkluż ir-​restawr tal-​paċi, tal-​ħelsien, u tal-​ġustizzja għall-​familja umana kollha.—Atti 3:21.

Ħelsien Veru sa fl-​Aħħar

Xi trid tagħmel issa biex tgawdi dan il-​“ħelsien tal-​glorja taʼ wlied Alla”? Ġesù Kristu qal: “Jekk iżżommu fil-​kelma tiegħi, tkunu tassew dixxipli tiegħi, u tagħrfu l-​verità u l-​verità teħliskom.” (Ġwann 8:31, 32) Din hija ċ-​ċavetta għall-​ħelsien​—li titgħallem u mbagħad tobdi l-​kmandamenti u t-​tagħlim taʼ Kristu. Dan iġib miegħu ċertu ammont taʼ ħelsien saħansitra issa. Fil-​futur qarib, dan se jġib ħelsien komplet taħt il-​ħakma taʼ Ġesù Kristu. Il-​korsa għaqlija hi li ssir taf il-​“kelma” taʼ Ġesù permezz taʼ studju tal-​Bibbja. (Ġwann 17:3) Assoċja b’mod attiv mal-​kongregazzjoni tad-​dixxipli veri taʼ Kristu, bħalma għamlu l-​Kristjani bikrin. Billi tagħmel hekk, tistaʼ tibbenefika mill-​veritajiet taʼ ħelsien li Jehovah jagħmel disponibbli permezz taʼ l-​organizzazzjoni tiegħu llum.—Lhud 10:24, 25.

Waqt li ‘tistenna r-​rivelazzjoni taʼ wlied Alla,’ tistaʼ tikkultiva l-​fiduċja li l-​appostlu Pawlu kellu fil-​ħarsien u l-​appoġġ li jagħti Kristu, saħansitra meta t-​tbatijiet u l-​inġustizzji jkunu jidhru kważi insopportabbli. Wara li ddiskuta r-​rivelazzjoni taʼ wlied Alla, Pawlu staqsa: “Min se jifridna mill-​imħabba taʼ Kristu? It-​taħbit, id-​dwejjaq, il-​persekuzzjoni, il-​ġuħ, l-​għera, it-​tiġrib, ix-​xabla?” (Rumani 8:35) M’għandniex xi ngħidu, il-​Kristjani fi żmien Pawlu kienu għadhom, biex nużaw l-​istess kliem taʼ Rousseau, “fil-​ktajjen” taʼ xi tip jew ieħor taʼ forzi repressivi. Kienu qed ‘jikkundannawhom għall-​mewt il-​jum kollu’ bħal “nagħaġ għall-​qatla.” (Rumani 8:36) Ħallewh dan ibeżżagħhom?

“Imma f’dan kollu,” kiteb Pawlu, “aħna aktar minn rebbieħa bis-​saħħa taʼ dak li ħabbna.” (Rumani 8:37) Rebbieħa minkejja dak kollu li kellhom jissaportu l-​ewwel Kristjani? Kif jistaʼ jkun? “Għax jiena żgur,” jgħid hu bi tweġiba, “li la l-​mewt u la l-​ħajja, la l-​anġli u la l-​qawwiet, la ż-​żmien t’issa u la taʼ li ġej, la setgħat, la l-​għoli u lanqas il-​fond, u ebda ħliqa oħra ma jistgħu qatt jifirduna mill-​imħabba taʼ Alla li dehret fi Kristu Ġesù Sidna.” (Rumani 8:38, 39) Int ukoll tistaʼ toħroġ “rebbieħ” minn kwalunkwe ‘taħbit, dwejjaq, jew persekuzzjoni’ li forsi jkollok tissaporti sadattant. L-​imħabba t’Alla tagħti garanzija li dalwaqt​—fil-​qrib ferm issa—​se ‘nkunu meħlusin mill-​jasar [kollu] u niksbu l-​ħelsien tal-​glorja taʼ wlied Alla.’

[Stampi f’paġna 6]

“Il-​ħolqien kollu għadu s’issa jitniehed bl-​uġigħ tal-​ħlas”

[Stampa f’paġna 7]

‘Il-​ħlejjaq għad ikunu meħlusa mill-​jasar kollu u jiksbu l-​ħelsien tal-​glorja taʼ wlied Alla’