Aqdi lil Jehovah b’Qalb Ferħana

“Dawn il-​maledizzjonijiet kollha ċertament li se jiġu fuqek . . . minħabba l-​fatt li ma qdejtx lil Jehovah Alla tiegħek b’hena u qalb ferħana.”—DEWTERONOMJU 28:45-47.

1. Liema evidenza hemm li dawk li qegħdin jaqdu lil Jehovah huma mimlijin ferħ, kulfejn jaqduh?

IL-​QADDEJJA taʼ Jehovah huma mimlijin ferħ, kemm jekk qegħdin jagħmlu r-​rieda tiegħu fis-​sema jew fuq l-​art. “Kwiekeb taʼ fil-​għodu” anġeliċi għajtu bil-​ferħ fit-​tisjis taʼ l-​art, u bla dubju b’ferħ il-​mirjadi t’anġli tas-​sema ‘jwettqu l-​kelma t’Alla.’ (Ġob 38:4-7; Salm 103:20) L-​Iben uniġenitu taʼ Jehovah kien “mgħallem” mimli ferħ fis-​sema u sab għaxqa f’li jagħmel ir-​rieda divina bħala r-​raġel Ġesù Kristu fuq l-​art. Barra minn hekk, “għall-​ferħ li tqiegħed quddiemu ssaporta zokk tat-​tortura, billi stmerr l-​għajb, u qagħad bil-​qiegħda fuq il-​leminija tat-​tron t’Alla.”—Proverbji 8:30, 31; Ebrej 10:5-10; 12:2.

2. X’kien jiddetermina jekk l-​Iżraeliti kinux jesperjenzaw barkiet jew maledizzjonijiet?

² L-​Iżraeliti ġarrbu l-​ferħ meta kienu jogħġbu lil Alla. Imma xi ngħidu kieku m’obdewhx? Huma kienu mwissijin: ‘Maledizzjonijiet iridu jkomplu fuqek u nislek bħala sinjal u għelm għal żmien indefinit, minħabba l-​fatt li ma qdejtx lil Jehovah Alla tiegħek b’hena u qalb ferħana għall-​abbundanza taʼ kollox. U se jkollok taqdi lill-​għedewwa tiegħek li lilhom Jehovah se jibgħat kontra tiegħek b’ġuħ u għatx u għera u l-​bżonn taʼ kollox; u hu ċertament li se jpoġġi madmad tal-​ħadid fuq għonqok sakemm ikun ġiebek fix-​xejn.’ (Dewteronomju 28:45-48) Barkiet u maledizzjonijiet kienu jagħmlu ċar min kienu u min ma kinux il-​qaddejja taʼ Jehovah. Maledizzjonijiet bħal dawn ukoll urew ċar li ma jistax ikun hemm nuqqas taʼ rispett lejn il-​prinċipji u l-​iskopijiet t’Alla, lanqas ma jistaʼ jkun hemm stmerrija lejhom. Minħabba li l-​Iżraeliti rrifjutaw li jagħtu kas tat-​twissijiet taʼ deżolazzjoni u eżilju mingħand Jehovah, Ġerusalemm saret “maledizzjoni għall-​ġnus kollha taʼ l-​art.” (Ġeremija 26:6) Ejjew għalhekk nobdu lil Alla u ngawdu l-​favur tiegħu. Il-​ferħ huwa wieħed mill-​ħafna barkiet divini esperjenzati mit-​twajbin.

Kif Taqdi B’“Ferħ Tal-​Qalb”

3. X’inhija l-​qalb figurattiva?

³ L-​Iżraeliti kellhom jaqdu lil Jehovah “b’hena u qalb ferħana.” Hekk ukoll iridu jagħmlu l-​qaddejja t’Alla taż-​żmien modern. Li tithenna huwa “li tkun kuntent; tkun mimli ferħ.” Għalkemm il-​qalb fiżika hija msemmija fl-​Iskrittura, din ma taħsibx jew tirraġuna b’mod litterali. (Eżodu 28:30) Il-​funzjoni prinċipali tagħha hija li tippompja d-​demm li jsostni ċ-​ċelloli tal-​ġisem. Fil-​maġġoranza vasta tal-​każi, madankollu, il-​Bibbja tirreferi għall-​qalb figurattiva, li hija iżjed mis-​sors taʼ l-​affezzjoni, il-​motivazzjoni, u l-​intellett. Jintqal li tirrappreżenta “l-​parti ċentrali inġenerali, il-​ġewwieni, u għalhekk il-​bniedem minn ġewwa kif juri lilu nnifsu fid-​diversi attivitajiet kollha tiegħu, fix-​xewqat, l-​affezzjonijiet, l-​emozzjonijiet, il-​passjonijiet, l-​iskopijiet tiegħu, il-​ħsibijiet, l-​osservazzjonijiet, l-​immaġinazzjonijiet tiegħu, l-​għerf, l-​għarfien, is-​sengħa tiegħu, it-​twemmin tiegħu u l-​irraġunar tiegħu, il-​memorja tiegħu u l-​istat konxju tiegħu.” (Journal of the Society of Biblical Literature and Exegesis, 1882, paġna 67) Il-​qalb figurattiva tagħna tinvolvi s-​sentimenti u l-​emozzjonijiet tagħna, inkluż il-​ferħ.—Ġwann 16:22.

4. X’jistaʼ jgħinna biex naqdu lil Alla Jehovah b’qalb ferħana?

⁴ X’jistaʼ jgħinna naqdu lil Jehovah b’qalb ferħana? Ħarsa pożittiva u t’apprezzament għall-​barkiet u l-​privileġġi mogħtijin lilna minn Alla hija t’għajnuna. Per eżempju, nistgħu nirriflettu b’ferħ dwar il-​privileġġ tagħna li nagħtu “servizz sagru” lil dak Alla veru. (Luqa 1:74) Hemm il-​privileġġ relatat li nġorru isem Jehovah bħala x-​Xhieda tiegħu. (Isaija 43:​10-12) Maʼ dan nistgħu nżidu l-​ferħ li nafu li billi nsegwu l-​Kelma t’Alla qegħdin nogħġbuh. U x’ferħ hemm f’li nirriflettu d-​dawl spiritwali u b’hekk ngħinu lil ħafna biex joħorġu mid-​dlam!—Mattew 5:14-16; qabbel 1 Pietru 2:9.

5. X’inhuwa s-​sors taʼ ferħ taʼ tjieba?

⁵ Madankollu, li taqdi lil Jehovah b’qalb ferħana ma jinvolvix biss ħsieb pożittiv. Huwa taʼ benefiċċju li jkollok ħarsa pożittiva. Imma l-​ferħ taʼ tjieba m’huwiex xi ħaġa li nipproduċu permezz taʼ l-​iżvilupp tal-​karattru. Huwa frotta taʼ l-​ispirtu taʼ Jehovah. (Galatin 5:22, 23) Jekk m’għandniex ferħ bħal dan, għandu mnejn ikollna bżonn nagħmlu aġġustamenti sabiex nevitaw li naħsbu jew naġixxu b’xi manjiera m’hijiex Skritturali li tistaʼ tnikket l-​ispirtu t’Alla. (Efesin 4:30) Bħala dawk devoti lejn Jehovah, madankollu, ejjew ma nibżgħux li nuqqas taʼ ferħ mill-​qalb f’xi okkażjoni huwa evidenza taʼ diżapprovazzjoni divina. Aħna imperfetti u suġġetti għal uġigħ, niket, u saħansitra dipressjoni xi drabi, imma Jehovah jifhimna. (Salm 103:10-14) Ejjew għalhekk nitolbu għall-​ispirtu qaddis tiegħu, billi niftakru li l-​frotta tiegħu taʼ ferħ hija mogħtija minn Alla. Missierna tas-​sema taʼ mħabba se jwieġeb talb bħal dan u jgħinna naqduh b’qalb ferħana.—Luqa 11:13.

Meta Ma Jkunx Hemm Ferħ

6. Jekk il-​ferħ huwa nieqes mis-​servizz tagħna lil Alla, x’għandna nagħmlu?

⁶ Jekk il-​ferħ ikun nieqes mis-​servizz tagħna, nistgħu eventwalment immajnaw f’li naqdu lil Jehovah jew saħansitra ma nibqgħux leali lejh. Għalhekk, ikun għaqli li bl-​umiltà u bit-​talb nikkunsidraw il-​motivi tagħna u nagħmlu aġġustamenti neċessarji. Biex ikollna ferħ mogħti minn Alla, irridu naqdu lil Jehovah imqanqlin mill-​imħabba u b’qalbna, b’ruħna, u b’moħħna kollha kemm huma. (Mattew 22:37) Ma rridux naqdu b’attitudni kompetittiva, għax Pawlu kiteb: “Jekk qegħdin ngħixu bl-​ispirtu, ejjew inkomplu mexjin bl-​ordni wkoll bl-ispirtu. Ejjew ma nsirux egoistiċi, billi nqanqlu l-​kompetizzjoni maʼ xulxin, billi ngħiru għal xulxin.” (Galatin 5:25, 26) Mhux se jkollna ferħ veru jekk qegħdin naqdu għaliex irridu nibbrillaw fuq oħrajn jew qegħdin infittxu t-​tifħir.

7. Kif nistgħu nkebbsu mill-​ġdid il-​qalb ferħana tagħna?

⁷ Hemm ferħ f’li nwettqu d-​dedikazzjoni tagħna lejn Jehovah. Meta konna għadna kif iddedikajna lilna nfusna lil Alla, b’mod żeluż bdejna fit-​triq taʼ ħajja Kristjana. Studjajna l-​Iskrittura u regolarment ipparteċipajna fil-​laqgħat. (Ebrej 10:24, 25) Kien iġibilna ferħ li nieħdu sehem fil-​ministeru. Madankollu, xi ngħidu jekk il-​ferħ tagħna naqas? Studju tal-​Bibbja, attendenza għal-​laqgħat, parteċipazzjoni fil-​ministeru​—tabilħaqq, involviment sħiħ f’kull aspett tal-​Kristjanità—​għandhom jagħtu lill-​ħajjiet tagħna stabbilità spiritwali u jkebbsu mill-​ġdid kemm l-​imħabba li kellna fil-​bidu kif ukoll il-​qalb ferħana li kellna qabel. (Rivelazzjoni 2:4) Imbagħad ma nkunux bħal xi wħud li x’aktarx m’għandhomx ferħ u taʼ spiss jeħtieġu għajnuna spiritwali. L-anzjani huma kuntenti li jgħinu, imma rridu individwalment inwettqu d-​dedikazzjoni tagħna lil Alla. Ħadd iktar ma jistaʼ jagħmel dan għalina. Ejjew għalhekk nagħmluha l-​mira tagħna li nsegwu r-​rutina normali Kristjana sabiex inwettqu d-​dedikazzjoni tagħna lil Jehovah u jkollna ferħ veru.

8.Kuxjenza nadifa għala hija importanti jekk irridu li nkunu mimlijin ferħ?

⁸ Jekk irridu li jkollna l-​ferħ li huwa frotta taʼ l-​ispirtu t’Alla, neħtieġu kuxjenza nadifa. Dment li s-​Sultan David taʼ Iżrael ipprova jaħbi dnubu, kien miżerabbli. Fil-​fatt, it-​tira tal-​ħajja tiegħu donnha kienet evaporat, u setaʼ saħansitra marad fiżikament. X’serħan ġarrab meta nidem u stqarr ħtijietu! (Salm 32:1-5) Ma nistgħux inkunu mimlijin ferħ jekk inkunu qegħdin naħbu xi dnub serju. Dak jistaʼ tassew iġegħilna ngħixu ħajja taʼ nkwiet. Ċertament, dak m’huwiex il-​mod kif tesperjenza l-​ferħ. Imma stqarrija tal-​ħtijiet u ndiema jġibu serħan u restawrar taʼ spirtu mimli ferħ.—Proverbji 28:13.

Nistennew Bil-​Ferħ

9, 10. (a) Abraham x’wegħda rċieva, imma l-​fidi u l-​ferħ tiegħu kif setgħu ġew ittestjati? (b) Kif nistgħu nibbenefikaw mill-​eżempji t’Abraham, taʼ Iżakk, u taʼ Ġakobb?

⁹ Hija ħaġa li jkollna l-​ferħ meta nitgħallmu għall-​ewwel darba dwar l-​iskop divin imma hija ħaġ’oħra li nibqgħu mimlijin ferħ waqt li s-​snin qegħdin igerbbu. Dan jistaʼ jingħata tixbieha tiegħu fil-​każ tal-​leali Abraham. Wara li pprova joffri lil ibnu Iżakk għall-​kmand t’Alla, anġlu tah dan il-​messaġġ: “‘Bija nnifsi naħlef tassew jien,’ hija l-​ħaġa mitkellma taʼ Jehovah, ‘li minħabba l-​fatt li int għamilt din il-​ħaġa u ma żammejtx lura lil ibnek, l-​uniku wieħed tiegħek, jien żgur li se nbierkek u żgur li se nimmultiplika liż-​żerriegħa tiegħek bħall-​kwiekeb tas-​smewwiet u bħall-​frak tar-​ramel li qiegħed fuq xatt il-​baħar; u ż-​żerriegħa tiegħek se jieħu pussess tax-​xatba taʼ l-​għedewwa tiegħu. U permezz taż-​żerriegħa tiegħek il-​ġnus kollha taʼ l-​art ċertament li se jbierku lilhom infushom minħabba l-​fatt li int tajt widen lil leħni.’” (Ġenesi 22:15-18) Bla dubju, Abraham kien se jtir bil-​ferħ b’din il-​wegħda.

¹⁰ Abraham setaʼ stenna li Iżakk kellu jkun iż-​“żerriegħa” li permezz tiegħu l-​barkiet imwegħdin kienu se jiġu. Imma l-​mogħdija tas-​snin mingħajr ma twettaq xejn taʼ l-​għaġeb permezz taʼ Iżakk setgħet kienet taʼ prova għall-​fidi u l-​ferħ t’Abraham u l-​familja tiegħu. Il-​konferma t’Alla tal-​wegħda lil Iżakk u iktar tard lil ibnu Ġakobb żgurathom li l-​miġja taż-​Żerriegħa kienet għadha fil-​futur, u dan għenhom iżommu l-​fidi u l-​ferħ tagħhom. Madankollu, Abraham, Iżakk, u Ġakobb mietu mingħajr ma raw it-​twettieq tal-​wegħdiet t’Alla lilhom, imma ma kinux qaddejja bla ferħ taʼ Jehovah. (Ebrej 11:13) Aħna wkoll nistgħu nibqgħu naqdu lil Jehovah bil-​fidi u bil-​ferħ waqt li nistennew it-​twettieq tal-​wegħdiet tiegħu.

Ferħ Minkejja Persekuzzjoni

11. Għala nistgħu nkunu mimlijin ferħ minkejja l-​persekuzzjoni?

¹¹ Bħala qaddejja taʼ Jehovah, nistgħu naqdu lil Jehovah b’qalb ferħana, avolja nsofru persekuzzjoni. Ġesù ddikjara henjin lil dawk ippersegwitati minħabba fih, u l-​appostlu Pietru qal: “Komplu thennew billi intom imxerkin fis-​sofferenzi tal-​Kristu, sabiex tkunu tistgħu tithennew u tkunu ferħanin qatigħ ukoll matul ir-​rivelazzjoni tal-​glorja tiegħu. Jekk qegħdin tkunu mgħajrin għal isem Kristu, intom henjin, għaliex l-​ispirtu taʼ glorja, saħansitra l-​ispirtu t’Alla, qiegħed jistrieħ fuqkom.” (1 Pietru 4:13, 14; Mattew 5:11, 12) Jekk qed tissaporti persekuzzjoni u tbatija minħabba t-​tjieba, għandek l-​ispirtu u l-​approvazzjoni taʼ Jehovah, u dak ċertament li jippromwovi l-​ferħ.

12. (a) Għala nistgħu niffaċċjaw provi taʼ fidi bil-​ferħ? (b) Liema lezzjoni bażika nistgħu nitgħallmu mill-​każ taʼ ċertu Levita fl-​eżilju?

¹² Aħna nistgħu niffaċċjaw provi tal-​fidi bil-​ferħ għaliex Alla hu r-​Refuġju tagħna. Dan jintgħamel evidenti f’Salmi 42 u 43. Għal xi raġuni, ċertu Levita kien fl-​eżilju. Tant immissjaha l-​qima fis-​santwarju t’Alla li ħassu bħal ċerva bl-​għatx, li tixxennaq għall-​ilma f’reġjun niexef u għeri. Kien ‘għatxan,’ jew imxennaq, għal Jehovah u għall-​privileġġ li jqim lil Alla fis-​santwarju Tiegħu. (Salm 42:​1, 2) L-​esperjenza taʼ dan l-​eżiljat għandha tqanqalna biex nuru gratitudni għas-​sħubija li ngawdu man-​nies taʼ Jehovah. Jekk sitwazzjoni bħal iżolament minħabba persekuzzjoni temporanjament iżżommna milli nkunu magħhom, ejjew nirriflettu fuq mumenti taʼ ferħ fil-​passat flimkien fis-​servizz sagru u nitolbu għas-​sabar waqt li ‘nistennew ’l Alla’ biex jirrestawrana għal attività regulari maʼ l-​adoraturi tiegħu.—Salm 42:4, 5, 11; 43:3-5.

‘Aqdi Lil Jehovah B’Hena’

13. Salm 100:1, 2 kif juri li l-​ferħ irid ikun aspett importanti fis-​servizz tagħna lil Alla?

¹³ Il-​ferħ irid ikun aspett prominenti tas-​servizz tagħna lil Alla. Dan intwera f’melodija taʼ radd il-​ħajr li fiha s-​salmista kanta: “Għajtu bi trijonf lil Jehovah, intom in-​nies kollha taʼ l-​art. Aqdu lil Jehovah bl-​hena. Idħlu quddiemu b’għajta mimlija ferħ.” (Salm 100:1, 2) Jehovah hu “dak Alla hieni” u jrid lill-​qaddejja tiegħu jsibu ferħ f’li jwettqu d-​dedikazzjoni tagħhom lilu. (1 Timotew 1:11) Nies mill-​ġnus kollha għandhom jeżaltaw f’Jehovah, u l-​espressjonijiet tagħna taʼ tifħir għandhom ikunu qawwijin, bħall-​‘għajta trijonfanti’ t’armata rebbieħa. Ladarba servizz lil Alla huwa rifreskanti, għandu jkun akkumpanjat bl-​hena. Għalhekk, is-​salmista ħeġġeġ lin-​nies biex jidħlu fil-​preżenza t’Alla “b’għajta mimlija ferħ.”

14, 15. Salm 100:3-5 kif japplika għan-​nies mimlijin ferħ taʼ Jehovah illum?

¹⁴ Is-​salmista żied: “Kunu afu [irrikonoxxu, agħrfu] li Jehovah hu Alla. Huwa hu li għamilna, u mhux aħna nfusna. Aħna l-​poplu tiegħu u n-​ngħaġ tal-​mergħa tiegħu.” (Salm 100:3) Ladarba Jehovah hu l-​Ħallieq tagħna, jippossjedina bħalma ragħaj jippossjedi lin-​ngħaġ tiegħu. Alla tant jieħu ħsiebna b’mod tajjeb li bi gratitudni aħna nfaħħruh. (Salm 23) Rigward Jehovah, is-​salmista kanta wkoll: “Idħlu fix-​xatbiet tiegħu b’radd il-​ħajr, fil-​btieħi tiegħu bit-​tifħir. Iżżu ħajr lilu, bierku lil ismu. Għax Jehovah hu tajjeb; il-​qalb tajba bl-​imħabba tiegħu hija għal żmien indefinit, u l-​fedeltà tiegħu għal ġenerazzjoni wara ġenerazzjoni.”—Salm 100:4, 5.

¹⁵ Illum, nies mimlijin ferħ mill-​ġnus kollha qegħdin jidħlu fil-​btieħi tas-​santwarju taʼ Jehovah biex joffru radd il-​ħajr u tifħir. Aħna bil-​ferħ inbierku isem Alla billi dejjem nitkellmu tajjeb dwar Jehovah, u l-​kwalitajiet grandjużi tiegħu jqanqluna biex infaħħruh. Hu tajjeb għalkollox, u l-​qalb tajba bl-​imħabba jew stima b’mogħdrija tiegħu għall-​qaddejja tiegħu hija dejjem taʼ min jorbot fuqha, għax tibqaʼ għal żmien indefinit. Għal “ġenerazzjoni wara ġenerazzjoni,” Jehovah hu leali f’li juri mħabba lejn dawk li jagħmlu r-​rieda tiegħu. (Rumani 8:38, 39) Ċertament, allura, għandna raġuni tajba biex “naqdu lil Jehovah bl-​hena.”

Ithenna Bit-​Tama Tiegħek

16. Il-​Kristjani b’liema tamiet u prospetti jistgħu jithennew?

¹⁶ Pawlu kiteb: “Ithennew bit-​tama.” (Rumani 12:12) Segwaċi midlukin taʼ Ġesù Kristu jithennew bit-​tama glorjuża taʼ ħajja immortali fis-​sema li Alla għamel disponibbli għalihom permezz taʼ Ibnu. (Rumani 8:16, 17; Filippin 3:20, 21) Kristjani bit-​tama taʼ ħajja eterna fil-​Ġenna fuq l-​art ukoll għandhom bażi għall-​hena. (Luqa 23:43) Il-​qaddejja leali kollha taʼ Jehovah għandhom raġuni biex jithennew bit-​tama tas-​Saltna, għax jew se jkunu parti minn dak il-​gvern ċelestjali jew se jgħixu fid-​dominju tiegħu taʼ l-​art. X’barka ferriħija!—Mattew 6:9, 10; Rumani 8:18-21.

17, 18. (a) X’kien imbassar f’Isaija 25:6-8? (b) Din il-​profezija taʼ Isaija kif qiegħda tiġi mwettqa issa, u xi ngħidu dwar it-​twettieq tagħha fil-​futur?

¹⁷ Isaija wkoll bassar futur mimli ferħ għall-​umanità ubbidjenti. Kiteb: “Jehovah taʼ l-​armati ċertament li se jagħmel għall-​popli kollha, f’din il-​muntanja, bankett taʼ dixxijiet imħawrin tajjeb biż-​żejt, bankett taʼ nbid irraffinat min-​naqal, taʼ dixxijiet imħawrin tajjeb biż-​żejt mimlijin mudullun, taʼ nbid irraffinat min-​naqal, imsoffi. U f’din il-​muntanja ċertament li se jiblaʼ wiċċ il-​kisja li qiegħda tiksi għal fuq il-​popli kollha, u x-​xogħol taʼ l-​insiġ li huwa minsuġ fuq il-​ġnus kollha. Hu attwalment se jiblaʼ l-​mewt għal dejjem, u l-​Mulej Sovran Jehovah ċertament li se jimsaħ id-​dmugħ mill-​uċuħ kollha. U t-​tkasbir tal-​poplu tiegħu se jneħħi mill-​art kollha, għax Jehovah innifsu tkellem dan.”—Isaija 25:6-8.

¹⁸ Il-​festa spiritwali li nieħdu sehem fiha llum bħala adoraturi taʼ Jehovah hija bankett mimli ferħ tabilħaqq. Fil-​fatt, il-​ferħ tagħna jfur hekk kif naqdu lil Alla b’mod żeluż b’antiċipazzjoni tal-​bankett t’affarijiet tajbin litterali li wiegħed għad-​dinja ġdida. (2 Pietru 3:13) Fuq il-​bażi tas-​sagrifiċċju taʼ Ġesù, Jehovah se jneħħi “x-​xogħol taʼ l-​insiġ” li qed jiksi lill-​umanità minħabba d-​dnub t’Adam. X’ferħ se jkun li tara d-​dnub u l-​mewt imneħħijin! X’għaxqa li tilqaʼ lura wħud maħbubin irxoxtati, li tinnota li d-​dmugħ sparixxa, u li tgħix fuq art magħmula ġenna, fejn in-​nies taʼ Jehovah ma jiġux immaqdrin imma se jkunu taw lil Alla tweġiba għan-​nebbiex il-​kbir, Satana x-​Xitan!—Proverbji 27:11.

19. Kif għandna nirreaġixxu għall-​prospetti li Jehovah qiegħed quddiemna bħala x-​Xhieda tiegħu?

Kif Twieġeb Int?

◻ Kif nistgħu naqdu lil Jehovah b’“qalb ferħana”?

◻ X’nistgħu nagħmlu jekk il-​ferħ huwa nieqes mis-​servizz tagħna lil Alla?

◻ In-​nies taʼ Jehovah għala jistgħu jkollhom il-​ferħ minkejja l-​persekuzzjoni?

◻ Liema raġunijiet għandna biex nithennew bit-​tama tagħna?

[Stampi f’paġna 15]

Li nieħdu sehem fl-​aspetti kollha taʼ ħajja Kristjana se jżid il-​ferħ tagħna