Il-​Kelma taʼ Ġeħova Hi Ħajja

Punti Prinċipali mill-​Ittra lir-​Rumani

MADWAR is-​sena 56 E.K., l-​appostlu Pawlu jinsab fuq it-​tielet vjaġġ missjunarju tiegħu u jasal fil-​belt taʼ Korintu. Hu jsir jaf bid-​differenzi fl-​opinjoni bejn il-​Kristjani Lhud u Ġentili f’Ruma. Peress li Pawlu jixtieq iġibhom f’unità sħiħa fi Kristu, hu jieħu l-​inizjattiva biex jiktbilhom ittra.

F’din l-​ittra lir-​Rumani, Pawlu jispjega kif il-​bnedmin jiġu dikjarati ġusti u kif għandhom jgħixu individwi bħal dawn. Din l-​ittra żżidilna l-​għarfien t’Alla u tal-​Kelma tiegħu, tenfasizza l-​qalb tajba mhix mistħoqqa t’Alla, u tonora l-​irwol taʼ Kristu fis-​salvazzjoni tagħna.—Ebr. 4:12.

DIKJARATI ĠUSTI––KIF?

(Rum. 1:1–11:36)

“Kollha dinbu u jonqsu milli jilħqu l-​glorja t’Alla,” jikteb Pawlu. Hi ‘għotja b’xejn li qed jiġu dikjarati ġusti bil-​qalb tajba mhix mistħoqqa t’Alla permezz tal-​ħelsien bil-​fidwa mħallsa minn Kristu Ġesù.’ Pawlu jgħid ukoll: “Bniedem jiġi dikjarat ġust bil-​fidi mingħajr għemejjel tal-​liġi.” (Rum. 3:23, 24, 28) Permezz tal-​fidi f’“att wieħed taʼ ġustifikazzjoni,” kemm il-​Kristjani midlukin u kemm il-​membri tal-​“folla kbira” taʼ “nagħaġ oħrajn” jistgħu jiġu “dikjarati ġusti”—taʼ l-​ewwel għall-​ħajja fis-​sema bħala werrieta bi sħab maʼ Kristu, u taʼ l-​aħħar bħala l-​ħbieb t’Alla, bil-​prospett li jsalvaw mit-​“tribulazzjoni l-​kbira.”—Rum. 5:18; Riv. 7:9, 14; Ġw. 10:16; Ġak. 2:21-24; Mt. 25:46.

Pawlu jistaqsi: “Nidinbu għax m’aħniex taħt il-​liġi imma taħt il-​qalb tajba mhix mistħoqqa?” Hu jwieġeb: “Jalla qatt ma jkun dan!” Pawlu jispjega: “Tkunu lsiera . . . , tad-​dnub li jwassal għall-​mewt jew taʼ l-​ubbidjenza li twassal għall-​ġustizzja.” (Rum. 6:15, 16) Hu jgħid: “Jekk bl-​ispirtu tagħtu l-​mewt lid-​drawwiet tal-​ġisem, tgħixu.”—Rum. 8:13.

Mistoqsijiet Skritturali Mweġbin:

1:24-32—Il-​kondotta immorali deskritta hawnhekk kienet tapplika għal-​Lhud jew għall-​Ġentili? Għalkemm din id-​deskrizzjoni tistaʼ tapplika għaż-​żewġ gruppi, Pawlu kien qed jirreferi speċifikament għall-​Iżraelin apostati tal-​qedem. Dawn avolja kienu jafu d-​digriet ġust t’Alla, “m’għoġobhomx li jkollhom għarfien eżatt dwar Alla.” B’hekk, kien ħaqqhom jiġu mċanfrin.

3:24, 25—Il-​“fidwa mħallsa minn Kristu Ġesù” kif tistaʼ tpatti għad-​“dnubiet li seħħew fil-​passat” qabel ma kienet tħallset? L-​ewwel profezija Messjanika mniżżla f’Ġenesi 3:15 twettqet fis-​sena 33 E.K. meta Ġesù ngħata l-​mewt fuq iz-​zokk tat-​tortura. (Gal. 3:13, 16) Madankollu, f’dak il-​mument li Ġeħova lissen din il-​profezija, għalih il-​prezz tal-​fidwa kien bħallikieku diġà tħallas, għax xejn ma jistaʼ jżomm lil Alla milli jwettaq l-​iskopijiet tiegħu. Għalhekk, fuq il-​bażi tas-​sagrifiċċju taʼ Ġesù Kristu, Ġeħova jistaʼ jaħfer id-​dnubiet tad-​dixxendenti taʼ Adam li eżerċitaw fidi f’din il-​wegħda. Il-​fidwa tagħmel possibbli wkoll l-​irxoxt taʼ dawk li għexu qabel żmien il-​Kristjanità.—Atti 24:15.

6:3-5—Xi tfisser il-​magħmudija fi Kristu Ġesù u l-​magħmudija f’mewtu? Meta Ġeħova jidlek lis-​segwaċi taʼ Kristu bl-​ispirtu qaddis, huma jingħaqdu maʼ Ġesù u jsiru membri tal-​kongregazzjoni li hi l-​ġisem taʼ Kristu, li tiegħu huwa r-​Ras. (1 Kor. 12:12, 13, 27; Kol. 1:18) Din hi l-​magħmudija tagħhom fi Kristu Ġesù. Il-​Kristjani midlukin huma wkoll ‘mgħammdin fil-​mewt taʼ Kristu’ fis-​sens li huma jgħixu ħajja taʼ sagrifiċċju u jiċċaħħdu minn kwalunkwe tama taʼ ħajja taʼ dejjem fuq l-​art. Għalhekk, il-​mewt tagħhom hija waħda taʼ sagrifiċċju, bħalma kienet il-​mewt taʼ Ġesù, għalkemm il-​mewt tagħhom m’għandhiex valur li jifdi. Din il-​magħmudija fil-​mewt taʼ Kristu tkun kompluta meta jmutu u jiġu rxoxtati għall-ħajja fis-sema.

7:8-11—Id-​dnub kif ‘ġie mħajjar mill-​kmandament’? Il-​Liġi għenet lin-​nies biex jifhmu dak kollu li kien jinkludi d-​dnub, u dan għamilhom iktar konxji li kienu midinbin. Minħabba f’hekk, huma indunaw li kienu midinbin b’iktar modi, u iktar nies irrealizzaw kemm kienu midinbin. Għalhekk, jistaʼ jingħad li d-​dnub ġie mħajjar mil-​Liġi.

Lezzjonijiet Għalina:

1:14, 15. Għandna għadd taʼ raġunijiet għala rridu niddikjaraw l-​aħbar tajba bil-​ħeġġa. Waħda minnhom hi li għandna dejn man-​nies li nxtraw bid-​demm taʼ Ġesù u aħna obbligati li ngħinuhom spiritwalment.

1:18-20. In-​nies li jiċħdu lil Alla u li m’humiex ġusti “ma jistgħux iġibu skuża,” għax il-​kwalitajiet inviżibbli t’Alla jidhru sew fil-​ħolqien.

2:28; 3:1, 2; 7:6, 7. Wara li lil-​Lhud kien qalilhom xi affarijiet li setgħu dehru offensivi għalihom, Pawlu għadda xi rimarki li jtaffu l-​kliem li kien qal. Dan hu t’eżempju għalina li jurina kif nittrattaw suġġetti delikati bit-​tattika u bis-​sengħa.

3:4. Meta l-​kelma tal-​bniedem tkun f’konflitt maʼ dak li jgħid Alla fil-​Kelma tiegħu, ħa “jintwera li Alla hu veru” billi nafdaw fil-​messaġġ tal-​Bibbja u naġixxu fi qbil mar-​rieda t’Alla. Bis-​sehem żeluż tagħna fl-​ippridkar tas-​Saltna u fix-​xogħol taʼ li nagħmlu dixxipli, nistgħu ngħinu biex oħrajn jaraw li Alla hu veru.

4:9-12. Il-​fidi t’Abraham ngħadditlu bħala ġustizzja ferm qabel ma kien ċirkonċiż fl-​età taʼ 99 sena. (Ġen. 12:4; 15:6; 16:3; 17:1, 9, 10) B’hekk, Alla wera b’qawwa kbira li kien possibbli li xi ħadd ikollu qagħda ġusta miegħu.

4:18. It-​tama hija element essenzjali tal-​fidi—il-​fidi tagħna hija bbażata fuq it-​tama.—Ebr. 11:1.

5:18, 19. Pawlu b’mod loġiku wera x-​xebh li hemm bejn Ġesù u Adam, u b’hekk spjega fil-​qosor kif bniedem wieħed jistaʼ “jagħti ruħu b’fidwa għal ħafna.” (Mt. 20:28) Irraġunar b’mod loġiku u fil-​qosor huwa metodu eċċellenti taʼ tagħlim li għandna nimitaw.—1 Kor. 4:17.

7:23. Membri taʼ ġisimna bħalma huma idejna, riġlejna, u lsienna jistgħu ‘ijassruna għal-​liġi tad-​dnub,’ u għalhekk għandna noqogħdu għassa li ma nużawhomx ħażin.

8:26, 27. Meta niffaċċjaw sitwazzjonijiet li tant iħawduna li ma nkunux nafu għal xiex irridu nitolbu, “l-​ispirtu nnifsu jitlob bil-​ħniena għalina.” Imbagħad Ġeħova, ‘li jismaʼ t-​talb,’ jaċċetta t-​talb xieraq li hemm fil-​Kelma tiegħu bħala li ġej mingħandna.—Salm 65:3 (Salm 65:2, NW).

8:38, 39. Il-​gwajijiet, il-​ħlejjaq spirti mill-​agħar, u l-​gvernijiet umani ma jistgħux iġiegħlu lil Ġeħova ma jibqax iħobbna; lanqas m’għandhom iġiegħlu lilna ma nibqgħux inħobbu lilu.

9:22-28; 11:1, 5, 17-26. Ħafna profeziji rigward ir-​restawr taʼ Iżrael twettqu mill-​kongregazzjoni taʼ Kristjani midlukin, li l-​membri tagħha ‘jsejħilhom mhux biss minn fost il-​Lhud imma wkoll minn fost il-​ġnus.’

10:10, 13, 14. Minbarra mħabba għal Alla u għall-​proxxmu tagħna, fidi soda f’Ġeħova u fil-​wegħdi tiegħu tistaʼ timmotivana biex ikollna sehem żeluż fil-​ministeru Kristjan.

11:16-24, 33. Kemm huma bilanċjati tajjeb il-​“qalb tajba u l-​ħruxija t’Alla”! Iva, “il-​Blata tagħna; perfett għemilu; u lkoll ġusti t-​triqat tiegħu.”—Dt. 32:4.

NGĦIXU FI QBIL MAL-​FATT LI ĠEJNA DIKJARATI ĠUSTI

(Rum. 12:1–16:27)

“Għaldaqstant, ħuti, nitlobkom bil-​ħrara minħabba l-​mogħdrijiet t’Alla” jgħid Pawlu, “biex tippreżentaw ġisimkom bħala sagrifiċċju ħaj, qaddis, aċċettabbli għal Alla.” (Rum. 12:1) “Għaldaqstant,” jew minħabba l-​fatt li l-​Kristjani jiġu dikjarati ġusti minħabba l-​fidi tagħhom, dak li Pawlu jgħid wara għandu jeffettwa l-​attitudni tagħhom lejhom infushom, lejn oħrajn, u lejn l-​awtoritajiet governattivi.

Pawlu jikteb: “Ngħid lil kull wieħed minnkom biex ma jaħsibx li hu xi ħaġa iktar milli hu xieraq.” Hu jagħtihom dan il-​parir: “Ħa tkun imħabbitkom mingħajr ipokrisija.” (Rum. 12:3, 9) “Ħa tkun kull ruħ sottomessa lejn l-​awtoritajiet superjuri.” (Rum. 13:1) Fi kwistjonijiet taʼ kuxjenza, hu jinkuraġġixxi lill-​Kristjani biex ma ‘jiġġudikawx lil xulxin.’—Rum. 14:13.

Mistoqsijiet Skritturali Mweġbin:

12:20—Kif ‘niġimgħu faħam jaqbad’ fuq ras l-​għadu? Fi żminijiet Bibliċi, kienu jpoġġu l-​mineral ġo forn b’saff faħam fuqu kif ukoll taħtu. Is-​sħana miżjuda għenet biex il-​metall jinħall u jiġi separat mill-​impuritajiet. Bl-​istess mod, aħna npoġġu faħam jaqbad fuq ras l-​għadu billi naġixxu b’qalb tajba miegħu sabiex l-​attitudni iebsa tiegħu tinħall u jibda juri kwalitajiet tajbin.

12:21—Kif nistgħu ‘dejjem nirbħu l-​ħażen bit-​tajjeb’? Mod wieħed kif nistgħu nagħmlu dan hu billi bla biżaʼ nibqgħu nagħmlu x-​xogħol li jagħtina Alla li nippridkaw l-​aħbar tajba tas-​Saltna sakemm dan ikun sar għas-​sodisfazzjon taʼ Ġeħova.—Mk. 13:10.

13:1—L-​awtoritajiet superjuri b’liema mod “tqiegħdu fil-​pożizzjonijiet relattivi tagħhom minn Alla”? L-​awtoritajiet sekulari “tqiegħdu fil-​pożizzjonijiet relattivi tagħhom minn Alla” fis-​sens li huma jaħkmu bil-​permess t’Alla, u f’ċerti każi l-​ħakma tagħhom kienet imbassra minn Alla. Dan jidher ċar minn dak li bassret il-​Bibbja dwar xi ħakkiema.

Lezzjonijiet Għalina:

12:17, 19. Meta npattuha lil min jagħmlilna l-​ħsara nkunu qed nagħmlu dak li Ġeħova biss għandu dritt jagħmel. Kemm inkunu prużuntużi jekk ‘irroddu ħsara bi ħsara’!

14:14, 15. M’għandniex innikktu jew infixklu lil xi ħadd mill-​aħwa minħabba l-​ikel jew ix-​xorb li noffrulu.

14:17. Relazzjoni tajba m’Alla ma tiddependix prinċipalment minn dak li wieħed jiekol jew jixrob jew minn dak li ma jikolx jew ma jixrobx. Pjuttost, għandha x’taqsam mal-​ġustizzja, il-​paċi, u l-​ferħ.

15:7. M’għandniex ikollna preġudizzju imma għandna nilqgħu fil-​kongregazzjoni lin-​nies sinċieri kollha li qed ifittxu l-​verità u nxandru l-​messaġġ tas-​Saltna maʼ kulmin niltaqgħu.

[Stampi f’paġna 31]

Jistaʼ jkun hemm tpattija għad-​dnubiet li saru qabel ma tħallset il-​fidwa?