Il-Ħarsa Kristjana Lejn l-Awtorità

“Ma hemm l-​ebda awtorità ħlief permezz t’Alla.”—RUMANI 13:1.

1. Għala jistaʼ jingħad li Jehovah hu l-​Awtorità Suprema?

L-​AWTORITÀ hi marbuta maʼ stat taʼ ħallieq. Il-​Wieħed Suprem li ta l-​eżistenza lill-​ħolqien kollu, ħaj u taʼ mingħajr ħajja, hu Alla Jehovah. Mingħajr l-​iċken dubju hu l-​Awtorità Suprema. Il-​veri Kristjani jħossuhom bħalma jħossuhom il-​ħlejjaq tas-​sema li jiddikjaraw: “Int jistħoqqlok, Jehovah, saħansitra Alla tagħna, li tirċievi l-​glorja u l-​unur u l-​qawwa, għaliex inti ħlaqt l-​affarijiet kollha, u minħabba fir-​rieda tiegħek eżistew u kienu maħluqin.”—Rivelazzjoni 4:11.

2. Ħakkiema umani bikrin f’ċertu sens kif ammettew li huma ma kellhom ebda dritt naturali li jiddominaw fuq bnedmin sħabhom, u x’qal Ġesù lil Ponzju Pilatu?

² Is-​sempliċi fatt li ħafna mill-​ħakkiema umani l-​iktar bikrin ipprovaw jilleġittimizzaw l-​awtorità tagħhom billi sostnew li kienu xi alla jew li kienu r-​rappreżentant taʼ xi alla kien rikonoxximent sieket li l-​ebda bniedem ma għandu dritt inerenti li jaħkem fuq bnedmin oħrajn.a (Ġeremija 10:23) L-​uniku sors leġittimu taʼ awtorità hu Alla Jehovah. Kristu qal lil Ponzju Pilatu, il-​gvernatur Ruman tal-​Ġudea: “Ma kien ikollok assolutament ebda awtorità kontra tiegħi li kieku ma kinetx mogħtija lilek minn fuq.”—Ġwann 19:11.

“Ebda Awtorità Ħlief Permezz T’Alla”

3. L-​appostlu Pawlu xi stqarr rigward “l-​awtoritajiet superjuri,” u l-​istqarrijiet taʼ Ġesù u taʼ Pawlu x’mistoqsijiet iqajmu?

³ L-​appostlu Pawlu kiteb lil Kristjani li kienu jgħixu taħt id-​dominanza taʼ l-​Imperu Ruman: “Ħa tkun kull ruħ sottomessa lejn l-​awtoritajiet superjuri, għax ma hemm l-​ebda awtorità ħlief permezz t’Alla; l-​awtoritajiet eżistenti jinsabu mqegħdin fil-​pożizzjonijiet relattivi tagħhom permezz t’Alla.” (Rumani 13:1) X’ried ifisser Ġesù meta stqarr li l-​awtorità taʼ Pilatu kienet ġiet mogħtija lilu “minn fuq”? U Pawlu b’liema mod ikkunsidra li l-​awtoritajiet politiċi taʼ żmienu tpoġġew fil-​pożizzjonijiet tagħhom minn Alla? Riedu jfissru li Jehovah hu personalment responsabbli għall-​ħatra taʼ kull ħakkiem politiku individwali taʼ did-dinja?

4. Ġesù u Pawlu x’sejħulu lil Satana, u Ġesù x’ma ċaħadx rigward dak li sostna Satana?

⁴ Dan kif jistaʼ jkun hekk, ladarba Ġesù sejjaħ lil Satana “l-​ħakkiem taʼ din id-​dinja,” u l-​appostlu Pawlu laqqmu “l-​alla taʼ din is-​sistema taʼ affarijiet”? (Ġwann 12:31; 16:11; 2 Korintin 4:4) Iktar minn hekk, meta kien qiegħed jittanta lil Ġesù, Satana offrielu “awtorità” fuq “is-​saltniet kollha taʼ l-​art abitata,” billi sostna li din l-​awtorità ġiet mgħoddija lilu. Ġesù rrifjuta l-​offerta tiegħu, imma ma ċaħadx li awtorità bħal din kienet tappartjeni lil Satana biex jagħtiha.—Luqa 4:5-8.

5. (a) Kif għandna nifhmu l-​kliem taʼ Ġesù u taʼ Pawlu dwar awtorità umana? (b) L-​awtoritajiet superjuri f’liema sens “jinsabu mqegħdin fil-​pożizzjonijiet relattivi tagħhom permezz t’Alla”?

⁵ Jehovah għadda l-​ħakma fuq din id-​dinja lil Satana billi ħallieh jgħix wara l-​irvell tiegħu u wara li kien ittanta lil Adam u Eva u kien ġagħalhom jirribellaw kontra s-​sovranità Tiegħu. (Ġenesi 3:1-6; qabbel Eżodu 9:15, 16.) Ġesù u l-​kliem taʼ Pawlu jridu, għalhekk, ifissru li wara li l-​ewwel koppja umana f’Għeden irrifjutaw it-​teokrazija, jew ħakma minn Alla, Jehovah ħalla lil bnedmin miksurin miegħu joħolqu strutturi taʼ awtorità li kienu se jippermettulhom li jgħixu f’soċjetà taʼ ordni. Xi drabi, sabiex iwettaq l-​iskop tiegħu, Jehovah ikkaġuna l-​waqgħa taʼ ċerti ħakkiema jew gvernijiet. (Danjel 2:19-21) Lil oħrajn ħalliehom jibqgħu fil-​poter. Dwar ħakkiema li l-​eżistenza tagħhom Jehovah jittollera, jistaʼ jingħad li “jinsabu mqegħdin fil-​pożizzjonijiet relattivi tagħhom permezz t’Alla.”

Kristjani Bikrin u L-​Awtoritajiet Rumani

6. Kristjani bikrin kif kienu jħarsu lejn l-​awtoritajiet Rumani, u għala?

⁶ Il-​Kristjani bikrin ma ngħaqdux mas-​setet Lhud li kkonfoffaw u ġġieldu kontra r-​Rumani li kienu jokkupaw lil Iżrael. Sal-​punt li l-​awtoritajiet Rumani, bis-​sistema legali tagħhom f’għamla taʼ kodiċi, żammew l-​ordni fuq l-​art u l-​baħar; bnew ħafna akkwidotti, toroq, u pontijiet utli; u b’mod ġenerali aġixxew għall-​ġid komuni, il-​Kristjani qisuhom bħala ‘l-​ministru [jew, “qaddej,” nota taʼ taħt] t’Alla għalihom għall-​ġid tagħhom.’ (Rumani 13:3, 4) Il-​liġi u l-​ordni pproduċew ambjent li għen lil Kristjani biex jippridkaw l-​aħbar tajba maʼ kullimkien, kif ikkmandati minn Ġesù. (Mattew 28:19, 20) B’kuxjenza safja, huma setgħu jħallsu t-​taxxi imposti mir-​Rumani, saħansitra jekk ftit mill-​flus kienu jintużaw għal skopijiet mhux approvati minn Alla.—Rumani 13:5-7.

7, 8. (a) Qari bir-​reqqa taʼ Rumani 13:1-7 x’jirrivela, u l-​kuntest x’juri? (b) Taħt liema ċirkustanzi l-​awtoritajiet Rumani ma aġixxewx bħala “l-​ministru t’Alla,” u f’dan il-​każ liema attitudni addottaw il-​Kristjani tal-​bidu?

⁷ Qari bir-​reqqa taʼ l-​ewwel sebaʼ versi taʼ Rumani kapitlu 13 jirrivela li “awtoritajiet superjuri” politiċi kienu “l-​ministru t’Alla” biex ifaħħru lil dawk li jagħmlu t-​tajjeb u biex jikkastigaw lil dawk li jipprattikaw dak li hu ħażin. Il-​kuntest juri li Alla, mhux l-​awtoritajiet superjuri, jiddetermina x’inhu tajjeb u x’inhu ħażin. Jekk, għalhekk, l-​imperatur Ruman jew xi awtorità politika oħra kien jirrikjedi affarijiet li Alla pprojbixxa jew, bil-​maqlub, ipprojbixxa affarijiet li Alla kien jirrikjedi, hu ma aġixxiex iżjed bħala l-​ministru t’Alla. Ġesù stqarr: “Ħallsu lura . . . l-​affarijiet taʼ Ċesri lil Ċesri, imma l-​affarijiet t’Alla lil Alla.” (Mattew 22:21) Jekk l-​Istat Ruman kien jesiġi affarijiet li jappartjenu lil Alla, bħalma huma l-​qima jew il-​ħajja tal-​persuna, Kristjani veri segwew il-​parir appostoliku: “Aħna rridu nobdu lil Alla bħala ħakkiem iktar milli lill-​bnedmin.”—Atti 5:29.

⁸ Il-​fatt li Kristjani bikrin irrifjutaw li jipprattikaw qima taʼ l-​imperatur u idolatrija, jabbandunaw il-​laqgħat Kristjani tagħhom, u jieqfu jippridkaw l-​aħbar tajba ġab persekuzzjoni. Huwa ġeneralment emmnut li l-​appostlu Pawlu ngħata l-​esekuzzjoni fuq l-​ordnijiet taʼ l-​Imperatur Neruni. Imperaturi oħrajn, b’mod notevoli Domizjanu, Markus Awreljus, Septimjus Severus, Deċjus, u Djoklezjanu, ukoll ippersegwitaw lil Kristjani bikrin. Meta dawn l-​imperaturi u l-​awtoritajiet subordinati tagħhom ippersegwitaw lil Kristjani, huma ċertament ma kinux qegħdin jaġixxu bħala “l-​ministru t’Alla.”

9. (a) X’jibqaʼ veru dwar l-​awtoritajiet superjuri politiċi, u l-​bhima politika mingħand min tirċievi poter u awtorità? (b) X’jistaʼ jingħad b’mod loġiku dwar sottomissjoni Kristjana lejn l-​awtoritajiet superjuri?

⁹ Dan kollu jservi biex juri li fil-​waqt li l-​awtoritajiet superjuri politiċi jaqdu f’xi aspetti bħal “l-​arranġament t’Alla” biex iżommu soċjetà umana taʼ ordni, jibqgħu parti mis-​sistema taʼ affarijiet dinjija li tagħha Satana hu l-​alla. (1 Ġwann 5:19) Huma jappartjenu lill-​organizzazzjoni politika dinjija ssimbolizzata mill-​“bhima selvaġġa” taʼ Rivelazzjoni 13:1, 2. Dik il-​bhima tirċievi l-​poter u l-​awtorità tagħha mingħand “id-​dragun il-​kbir,” Satana x-​Xitan. (Rivelazzjoni 12:9) B’mod loġiku, għalhekk, sottomissjoni Kristjana lejn awtoritajiet bħal dawn hi relattiva, mhux assoluta.—Qabbel Danjel 3:16-18.

Rispett Xieraq Lejn L-​Awtorità

10, 11. (a) Pawlu kif wera li aħna għandna nuru rispett lejn bnedmin fl-​awtorità? (b) Kif u għala jistaʼ jsir talb “rigward slaten u dawk kollha li qegħdin f’kariga għolja”?

¹⁰ Dan ma jfissirx, madankollu, li l-​Kristjani għandhom jaddottaw attitudni insolenti u sfidanti lejn l-​awtoritajiet superjuri politiċi. Veru, ħafna minn dawn il-​bnedmin ma jistħoqqilhomx b’xi mod partikulari rispett fil-​ħajjiet privati, jew saħansitra pubbliċi, tagħhom. Madankollu, l-​appostli, bl-​eżempju u bil-​pariri tagħhom, urew li bnedmin fl-​awtorità għandhom jiġu ttrattati bir-​rispett. Meta Pawlu deher quddiem is-​Sultan inċestuż Erodi Agrippa II, kellmu b’sottomissjoni xierqa.—Atti 26:2, 3, 25.

¹¹ Pawlu saħansitra stqarr li hu xieraq li nsemmu lill-​awtoritajiet dinjin fit-​talb tagħna, b’mod partikulari meta huma jiġu mitlubin biex jagħmlu deċiżjonijiet li jeffettwaw il-​ħajjiet u l-​attivitajiet Kristjani tagħna. Hu kiteb: “Jien għalhekk inħeġġeġ, qabel kollox, li tħanniniet, talbiet, interċessjonijiet, offerti taʼ radd il-​ħajr, isiru rigward kull xorta taʼ bnedmin, rigward slaten u dawk kollha li qegħdin f’kariga għolja; sabiex aħna nistgħu nibqgħu ngħaddu ħajja kalma u kwieta bid-​devozzjoni sħiħa lejn Alla u bis-​serjetà. Dan hu mill-​aħjar u aċċettabbli fid-​dehra tas-​Salvatur tagħna, Alla, li r-​rieda tiegħu hi li kull xorta taʼ bnedmin għandhom jiġu salvati u jiġu għal għarfien eżatt tal-​verità.” (1 Timotew 2:1-4) L-​attitudni tagħna taʼ rispett lejn awtoritajiet bħal dawn tistaʼ twassal biex huma jħalluna għaddejjin b’mod iktar ħieles fix-​xogħol tagħna li nipprovaw insalvaw “kull xorta taʼ bnedmin.”

12, 13. (a) Pietru liema pariri bbilanċjati ta rigward l-​awtorità? (b) Kif nistgħu aħna naġixxu kontra “d-​diskors injorant taʼ l-​irġiel li ma jirraġunawx” li joħolqu preġudizzju kontra x-​Xhieda taʼ Jehovah?

¹² L-​appostlu Pietru kiteb: “Minħabba l-​Mulej issottomettu lilkom infuskom lil kull ħolqien uman: kemm jekk lil sultan bħala li hu superjuri u kemm jekk lil gvernaturi bħala li huma mibgħutin minnu biex jagħtu l-​kastig lil dawk li jagħmlu l-​ħażen imma biex ifaħħru lil dawk li jagħmlu t-​tajjeb. Għax hekk hi r-​rieda t’Alla, li billi tagħmlu t-​tajjeb tistgħu tliġġmu d-​diskors injorant taʼ bnedmin li ma jirraġunawx. Kunu bħala nies liberi, u madankollu billi żżommu l-​libertà tagħkom, mhux bħala għata għall-​ħażen, imma bħala rsiera t’Alla. Onoraw lil irġiel taʼ kull xorta, ħa jkollkom imħabba lejn is-​sħubija kollha taʼ l-​aħwa, kunu fil-​biżaʼ t’Alla, ħa jkollkom unur għas-​sultan.” (1 Pietru 2:13-17) X’pariri bbilanċjati! Aħna obbligati li nuru sottomissjoni totali lejn Alla bħala rsiera tiegħu, u nagħtu sottomissjoni relattiva u taʼ rispett lejn awtoritajiet politiċi mibgħutin biex jikkastigaw lil dawk li jagħmlu l-​ħażen.

¹³ Instab li ħafna awtoritajiet sekulari għandhom ideat l-​iktar strambi u żbaljati dwar ix-​Xhieda taʼ Jehovah. Dan hu normalment għaliex ġew informati ħażin minn għedewwa malizzjużi tal-​poplu t’Alla. Jew jistaʼ jkun li kulma jafu dwarna tgħallmuh mill-​mezzi taʼ komunikazzjoni, li m’humiex dejjem imparzjali f’dak li jgħidu. Xi drabi aħna nistgħu nkissru dan il-​preġudizzju bl-​attitudni tagħna taʼ rispett u, fejn possibbli, billi nipprovdu lill-​awtoritajiet b’deskrizzjoni eżatta tax-​xogħol u t-​twemmin tax-​Xhieda taʼ Jehovah. Għal uffiċjali li huma mħabbtin, il-​ktejjeb Jehovah’s Witnesses in the Twentieth Century jipprovdi spjegazzjoni konċiża. Għal informazzjoni iktar dettaljata, jistgħu jiġu pprovduti bil-​ktieb Jehovah’s Witnesses​—Proclaimers of God’s Kingdom, strument mill-​aħjar li jixraqlu post fuq l-​ixkafef tal-​kotba taʼ libreriji pubbliċi lokali u nazzjonali.

Awtorità Ġewwa D-​Djar Kristjani

14, 15. (a) X’inhi l-​bażi taʼ awtorità ġewwa dar Kristjana? (b) X’għandha tkun l-​attitudni taʼ nisa Kristjani lejn żwieġhom, u għala?

¹⁴ M’għandniex xi ngħidu li jekk il-​Kristjani huma mitlubin minn Alla biex juru rispett xieraq lejn awtoritajiet dinjin, għandhom bl-​istess mod jirrispettaw l-​istruttura taʼ awtorità stabbilita minn Alla ġewwa d-​djar Kristjani. L-​appostlu Pawlu indika b’termini konċiżi l-​prinċipju taʼ l-​stat taʼ kap li hu aċċettat fost il-​poplu taʼ Jehovah. Hu kiteb: “[I]rridkom tkunu tafu li l-​kap taʼ kull raġel hu l-​Kristu; imbagħad il-​kap taʼ mara hu r-​raġel; imbagħad il-​kap tal-​Kristu hu Alla.” (1 Korintin 11:3) Dan hu l-​prinċipju taʼ teokrazija, jew ħakma minn Alla. Dan x’jinvolvi?

¹⁵ Rispett lejn teokrazija jibda fid-​dar. Mara miżżewġa Kristjana li ma turix rispett xieraq lejn l-​awtorità taʼ żewġha​—kemm jekk hu kredent bħalha u kemm jekk le—​mhix teokratika. Pawlu ta parir lill-​Kristjani: “Kunu sottomessi lejn xulxin fil-​biżaʼ taʼ Kristu. Ħalli n-​nisa jkunu sottomessi lejn żwieġhom bħal li kieku lill-​Mulej, għaliex raġel hu l-​kap taʼ martu bħalma l-​Kristu wkoll hu l-​kap tal-​kongregazzjoni, billi hu salvatur taʼ dan il-​ġisem. Fil-​fatt, bħalma l-​kongregazzjoni hija sottomessa lejn il-​Kristu, hekk ħalli jkunu n-​nisa wkoll lejn żwieġhom f’kollox.” (Efesin 5:21-24) Bħalma rġiel Kristjani jridu jissottomettu ruħhom lejn l-​istat taʼ kap taʼ Kristu, nisa Kristjani għandhom jirrikonoxxu l-​għerf taʼ li jkunu sottomessi lejn l-​awtorità taʼ żwieġhom mogħtija minn Alla. Dan iġibilhom sodisfazzjon ġewwieni profond u, iktar importanti, il-​barka taʼ Jehovah.

16, 17. (a) Tfal imrobbijin fi djar Kristjani kif jistgħu jiddistingwu lilhom infushom minn ħafna żgħażagħ illum, u x’inċentiva għandhom? (b) Ġesù kif kien eżempju mill-​aħjar għaż-​żgħażagħ illum, u x’inhuma nkuraġġiti biex jagħmlu?

¹⁶ Tfal teokratiċi huma henjin li juru rispett xieraq lejn il-​ġenituri tagħhom. Dwar il-​ġenerazzjoni żagħżugħa fl-​aħħar jiem, ġie mbassar li kellhom ikunu “ma jobdux lill-​ġenituri.” (2 Timotew 3:1, 2) Imma lil tfal Kristjani l-​Kelma mnebbħa t’Alla tgħid: “Intom it-​tfal, kunu ubbidjenti lejn il-​ġenituri tagħkom f’kollox, għax dan jogħġob sewwa fil-​Mulej.” (Kolossin 3:20) Rispett lejn l-​awtorità tal-​ġenituri jogħġob lil Jehovah u jġib il-​barka tiegħu.

¹⁷ Dan hu muri fil-​każ taʼ Ġesù. Ir-​rakkont taʼ Luqa jistqarr: “Hu niżel magħhom [il-ġenituri tiegħu] u ġie f’Nazzaret, u baqaʼ sottomess lejhom. . . . U Ġesù baqaʼ jagħmel progress fil-​għerf u fit-​tkabbir fiżiku u fil-​favur m’Alla u mal-​bnedmin.” (Luqa 2:51, 52) Ġesù kellu 12-il sena dak iż-​żmien, u l-​forma tal-​verb Grieg użata hawn tenfasizza li hu “baqaʼ sottomess” lejn il-​ġenituri tiegħu. Mela s-​sottomissjoni tiegħu ma ntemmitx meta sar adoloxxent. Jekk intom iż-​żgħażagħ tridu tagħmlu progress fl-​ispiritwalità u fil-​favur maʼ Jehovah u maʼ bnedmin taʼ qdusija, se turu rispett lejn l-​awtorità ġewwa u barra d-​dar tagħkom.

Awtorità Ġewwa L-​Kongregazzjoni

18. Min hu l-​Kap tal-​kongregazzjoni Kristjana, u lil min iddelega awtorità?

¹⁸ Billi tkellem dwar il-​bżonn taʼ l-​ordni ġewwa l-​kongregazzjoni Kristjana, Pawlu kiteb: “Alla huwa Alla, mhux tad-​diżordni, imma tal-​paċi. . . . Ħalli l-​affarijiet kollha jseħħu b’mod diċenti u b’arranġament [jew, “skond l-​ordni,” nota taʼ taħt].” (1 Korintin 14:33, 40) Biex l-​affarijiet kollha jseħħu b’mod taʼ ordni, Kristu, il-​Kap tal-​kongregazzjoni Kristjana, iddelega awtorità lil irġiel leali. Naqraw: “Hu ta xi wħud bħala appostli, xi wħud bħala profeti, xi wħud bħala evanġelizzaturi, xi wħud bħala ragħajja u għalliema, bil-​ħsieb li l-​qaddisin jiġu aġġustati mill-​ġdid, għal xogħol ministerjali . . . Imma billi nitkellmu l-​verità, ejjew bl-​imħabba nikbru fl-​affarijiet kollha fih li hu l-​kap, Kristu.”—Efesin 4:11, 12, 15.

19. (a) Kristu lil min ħatar fuq dak kollu li hu jippossjedi fuq l-​art, u lil min ta awtorità speċjali? (b) Liema delegar taʼ awtorità jseħħ fil-​kongregazzjoni Kristjana, u dan x’jirrikjedi min-​naħa tagħna?

¹⁹ F’dan iż-​żmien tat-​tmiem, Kristu ħatar lill-​“irsir fidil u diskret” kollettiv fuq “dak kollu li jippossjedi,” jew interessi tas-​Saltna fuq l-​art. (Mattew 24:45-47) Bħal fl-​ewwel seklu, dan l-​irsir hu rrappreżentat minn ġemgħa li tiggverna taʼ rġiel Kristjani midlukin li lilhom Kristu ta awtorità biex jieħdu deċiżjonijiet u jaħtru indokraturi oħrajn. (Atti 6:2, 3; 15:2) Mill-​banda l-​oħra, il-​Ġemgħa li Tiggverna tiddelega awtorità lil Kumitati tal-​Fergħat, indokraturi tad-​distrett u tas-​circuit, u anzjani ġewwa kull waħda mill-​iktar minn 73,000 kongregazzjoni tax-​Xhieda taʼ Jehovah madwar l-​art. Dawn l-​irġiel Kristjani devoti kollha jixirqilhom l-​appoġġ u r-​rispett tagħna.—1 Timotew 5:17.

20. Liema eżempju juri li Jehovah hu ddispjaċut b’dawk li huma neqsin mir-​rispett lejn Kristjani sħabhom fl-​awtorità?

²⁰ Rigward ir-​rispett li għandna nagħtu lil dawk fl-​awtorità ġewwa l-​kongregazzjoni Kristjana, paragun interessanti jistaʼ jsir mas-​sottomissjoni li aħna għandna nagħtu lill-​awtoritajiet sekulari. Meta persuna tikser liġi umana li Alla japprova, il-​kastig li jingħata minn “dawk li qegħdin jaħkmu” hu, fil-​fatt, espressjoni indiretta tal-​korla t’Alla “fuq dak li qiegħed jipprattika dak li hu ħażin.” (Rumani 13:3, 4) Jekk Jehovah jirrabja meta persuna tikser il-​liġijiet umani u tonqos fir-​rispett xieraq lejn awtoritajiet dinjin, kemm iktar se jkun iddispjaċut jekk Kristjan iddedikat jinjora prinċipji Bibliċi u juri diżrispett lejn Kristjani sħabu li huma fl-​awtorità!

21. Liema parir Skritturali se nkunu henjin li nsegwu, u x’se jiġi kkunsidrat fl-​artiklu li jmiss?

²¹ Minflok ma nqanqlu d-​dispjaċir taʼ Jehovah billi naddottaw attitudni ribelluża jew indipendenti, aħna se nsegwu l-​parir taʼ Pawlu lill-​Kristjani ġo Filippi: “Għaldaqstant, maħbubin tiegħi, bil-​mod li dejjem obdejtu, mhux matul il-​preżenza tiegħi biss, imma issa ferm iktar fil-​pront matul l-​assenza tiegħi, ibqgħu aħdmu s-​salvazzjoni tagħkom stess bil-​biżaʼ u t-​tkexkix; għax Alla hu dak li, minħabba l-​pjaċir tajjeb tiegħu, qiegħed jaġixxi ġewwa fikom kemm sabiex tkunu tridu u kemm sabiex taġixxu. Ibqgħu agħmlu l-​affarijiet kollha mingħajr tgergir u argumenti, biex tistgħu ssiru bla ħtija u innoċenti, tfal t’Alla mingħajr tebgħa fost ġenerazzjoni mgħawġa u milwija, li fostha intom qegħdin tiddu bħala dawwala fid-​dinja.” (Filippin 2:12-15) Kuntrarju għall-​ġenerazzjoni mgħawġa u milwija tal-​preżent li ġabet fuqha nfisha kriżi taʼ awtorità, il-​poplu taʼ Jehovah minn jeddhom jissottomettu ruħhom lejn l-​awtorità. Huma b’hekk jaħsdu benefiċċji kbar, kif se naraw fl-​artiklu li jmiss. (w94 7/1)

[Nota taʼ taħt]

B’Mod Taʼ Reviżjoni

◻ Min hu l-​Awtorità Suprema, u l-​awtorità tiegħu għala hi leġittima?

◻ L-​awtoritajiet superjuri f’liema sens “jinsabu mqegħdin fil-​pożizzjonijiet relattivi tagħhom permezz t’Alla”?

◻ L-​awtoritajiet superjuri meta jieqfu li jkunu “l-​ministru t’Alla”?

◻ Liema struttura taʼ awtorità teżisti ġewwa familji Kristjani?

◻ Liema delegar taʼ awtorità jeżisti ġewwa l-​kongregazzjoni Kristjana?