Kif Tikkultiva Ħarsa Bilanċjata Lejn ix-​Xogħol

FID-​DINJA taʼ llum mimlija pressjoni minħabba s-​swieq globali, il-​kompetizzjoni ħarxa, u l-​produzzjoni bil-​massa, ħafna nies ma jħarsux ’il quddiem li jmorru għax-​xogħol x’ħin tibda l-​ġurnata. Madankollu, suppost li nieħdu pjaċir b’xogħolna. Għala? Għar-​raġuni li aħna ġejna maħluqin fix-​xbieha t’Alla—u Alla jieħu pjaċir b’xogħlu. Per eżempju, meta ra x’kien għamel wara s-​sitt “ijiem”, jew perijodi twal, taʼ ħolqien, “ħares Alla lejn kull ma kien għamel, u, ara, kollox kien tajjeb ħafna,” jgħid Ġenesi 1:31.

M’hemmx dubju li l-​imħabba li Jehovah għandu għax-​xogħol hija waħda mir-​raġunijiet għala jissejjaħ “Alla l-​imbierek, [“hieni,” NW].” (1 Timotju 1:11) Ma jagħmilx sens, mela, li iktar ma nimitawh, iktar għandna nsiru ferħanin? Dwar dan, is-​Sultan Salamun taʼ Iżrael tal-​qedem, bennej u organizzatur prim, kiteb: “Imqar li wieħed jiekol u jixrob, u jithenna f’xogħlu, hi għotja t’Alla.”—Ekkleżjażti 3:​13, Karm Żammit.

Il-post tax-​xogħol illum qiegħed jinbidel mil-​lejl għan-​nhar u tistaʼ tkun sfida li wieħed jikkultiva ħarsa lejn ix-​xogħol li tkun bilanċjata u taʼ benefiċċju moralment. Imma Alla Jehovah ibierek lil dawk li jagħtu kas id-​direzzjonijiet tiegħu kollhom imħabba. (Salm 119:​99, 100) Uħud bħal dawn isiru ħaddiema imprezzabbli u taʼ min jafdahom, u għalhekk ikollhom inqas ċans li jitilfu l-​impjieg tagħhom. Jitgħallmu wkoll iħarsu lejn il-​ħajja u x-​xogħol tagħhom mhux biss mill-​aspett materjali imma wkoll minn dak spiritwali. Dan jgħinhom biex jieħdu deċiżjonijiet taʼ responsabbiltà fil-​ħajja u biex jirrealizzaw li l-​kuntentizza u s-​sens taʼ sigurtà m’humiex marbutin maʼ l-​impjieg tagħhom jew inkella mas-​suq tax-​xogħol li taʼ spiss ma tistax torbot fuqu. (Mattew 6:​31-33; 1 Korintin 2:​14, 15) Dan jgħinhom ukoll biex jikkultivaw etika tax-​xogħol tassew bilanċjata.

Ikkultiva Etika tax-​Xogħol li Togħġob lil Alla

Hemm xi nies li huma ffissati fuq ix-​xogħol u għalihom dan jiġi l-​ewwel u qabel kollox. Oħrajn ma jarawx il-​mument li tispiċċa l-​ġurnata ħalli jżarmaw u jmorru lejn id-​dar. Liema hi l-​ħarsa bilanċjata? Il-​Bibbja twieġeb: “Aħjar id waħda mimlija u fil-​mistrieħ, milli tnejn imfawra u fit-​taħbit, u l-​ġiri wara r-​riħ.” (Koħèlet 4:6) Fil-​fatt, meta naħdmu żżejjed jew għal ħin twil wisq, inkunu qegħdin nagħmlu iktar ħsara milli ġid. Inkunu qed naħlu l-​ħin f’“ġiri wara r-​riħ.” Għala? Għax nispiċċaw biex nagħmlu l-​ħsara lil dawk l-​affarijiet li fil-​fatt iġibulna l-​akbar ferħ: ir-​relazzjoni tagħna mal-​familja u l-​ħbieb, l-​ispiritwalità tagħna, saħħitna, u anki t-​tul taʼ ħajjitna. (1 Timotju 6:​9, 10) Il-​ħarsa bilanċjata hi li nkunu kuntenti b’inqas gwadann materjali u fl-​istess ħin ingawdu kemm jistaʼ jkun il-​paċi. X’inhu l-​aħjar, hekk jew inkella li jkollna idejna t-​tnejn imfawra bix-​xogħol u ħajja mimlija ġlied u miżerja?

Filwaqt li tinkuraġġixxi din il-​ħarsa bilanċjata, il-​Bibbja m’hijiex qed taqbel maʼ l-​għażż. (Proverbji 20:4) L-​għażż jherri bil-​mod il-​mod ir-​rispett lejna nfusna u r-​rispett li ħaddieħor jistaʼ jkollu lejna. Agħar minn hekk, jagħmel ħsara lir-​relazzjoni tagħna m’Alla. Il-​Bibbja tgħid bla tlaqliq li l-​bniedem li jirrifjuta li jaħdem ma jistħoqqlux jiekol minn fuq dahar ħaddieħor. (2 Tessalonikin 3:10) Minflok, hu għandu jbiddel triqatu u jaħdem iebes, biex b’hekk jaqlaʼ l-​għajxien b’mod onorabbli għalih u għal dawk li jiddependu minnu. Bix-​xogħol iebes ikun jistaʼ saħansitra jgħin lil min hu tassew fil-​bżonn—xi ħaġa li l-​Bibbja tinkuraġġina nagħmlu.—Proverbji 21:​25, 26; Efesin 4:28.

Imħarrġin mit-Tfulija biex Jistmaw ix-​Xogħol

Drawwiet tajba taʼ xogħol ma jiġux b’kumbinazzjoni; trid titgħallimhom minn meta tkun għadek żgħir. Għalhekk, il-​Bibbja tħeġġeġ lill-​ġenituri: “Ħarreġ tifel [jew tifla] jimxi fit-​triq it-​tajba; ma joħroġx minnha lanqas meta jixjieħ.” (Proverbji 22:6) Minbarra li jagħtu eżempju tajjeb huma stess bħala ħaddiema, ġenituri għaqlin jibdew iħarrġu liż-​żgħar tagħhom billi jqabbduhom xi faċendi fid-​dar skond l-​età tagħhom. Avolja t-​tfal jistgħu jqarrsu wiċċhom x’ħin tqabbadhom xi ħaġa, maż-​żmien jibdew iqisu lilhom infushom bħala membri utli tal-​familja—speċjalment meta l-​omm u l-​missier ifaħħruhom għal xi biċċa xogħol tajba li jkunu għamlu. Sfortunatament, xi ġenituri lanqas iħallu lil uliedhom imissu xejn u jagħmlulhom kollox huma, mingħalihom li b’hekk ikunu qed iħobbuhom. Ikun aħjar jekk ġenituri bħal dawn jirriflettu fuq dak li jgħid Qwiel 29:21: “Min ifissed minn tfulitu l-​qaddej [jew lit-​tfal], fl-​aħħar ikollu biex jagħli.”—Saydon.

Ġenituri responsabbli jieħdu wkoll interess kbir fl-​edukazzjoni taʼ wliedhom, u jħeġġuhom biex jitgħallmu u jistinkaw waqt li għadhom l-​iskola. Dan ikun jiswielhom ’il quddiem meta jasal iż-​żmien li joħorġu jaħdmu.

Kun Għaqli fix-​Xogħol li Tagħżel

Filwaqt li ma tgħidilniex x’tip taʼ xogħol għandna nagħżlu, il-​Bibbja tagħtina gwida mill-​aħjar sabiex ma nipperikolawx l-​avanz spiritwali tagħna, is-​servizz tagħna lejn Alla, u xi responsabbiltajiet importanti oħra li jistaʼ jkollna. Per eżempju, l-​appostlu Pawlu kiteb: “Iż-​żmien qsar. Ħa jkunu, mela, dawk . . . li jgawdu d-​dinja, bħallikieku ma jgawduhiex: għax is-​sura taʼ din id-​dinja għad tgħaddi!” (1 Korintin 7:​29-31) M’hemm xejn permanenti jew stabbli għalkollox f’din is-​sistema preżenti. Jekk nagħtuha l-​ħin u l-​enerġija kollha tagħna, inkunu qisna qed ninvestu flusna kollha f’dar mibnija f’żona li tintlaqat mill-​għargħar. X’investiment bla għaqal inkunu għamilna!

Bibbji oħra jittraduċu l-​frażi “ma jgawduhiex” bħala li “ma jintilfux warajha” jew “ma jedhewx għalkollox fiha.” (The Jerusalem Bible; Today’s English Version) Nies bil-​għaqal ma jinsew qatt il-​fatt li ż-​żmien “qsar” għas-​sistema preżenti u li jekk ‘tintilef,’ jew ‘tedha għalkollox’ fiha se jwassal bla ebda dubju għal diżappunt u dispjaċir.—1 Ġwann 2:​15-17.

‘Alla Mhux Se Jitilqek’

Jehovah jaf x’inhuma l-​bżonnijiet tagħna saħansitra iktar milli nafu aħna. Hu jaf ukoll f’liema żmien ninsabu fit-​twettiq taʼ l-​iskop tiegħu. Għalhekk ifakkarna: “Tkunux mogħtija għar-​regħba tal-​flus; kunu kuntenti b’dak li għandkom, għax Alla stess qal: ‘Jien m’iniex se nħallik, anqas nitilqek.’” (Lhud 13:5) Kemm huwa taʼ faraġ dan il-​kliem! Alla jħobb u jimpurtah min-​nies tiegħu, u l-​istess għamel Ġesù meta kien fuq l-​art. Hu ddedika parti mhux ħażin mill-​Priedka famuża tiegħu taʼ fuq il-​Muntanja biex jgħallem lid-​dixxipli tiegħu liema hi l-​ħarsa xierqa lejn ix-​xogħol u lejn l-​affarijiet materjali.—Mattew 6:​19-33.

Ix-Xhieda taʼ Jehovah jistinkaw biex jagħtu kas dan it-​tagħlim. Per eżempju, meta l-​imgħallem għamel proposta lil wieħed Xhud, li kien jaħdem fid-​dawl, biex jibda jagħmel is-​sahra regolarment, dan l-​impjegat m’aċċettax. Għala? Għax ma riedx li x-​xogħol sekulari tiegħu jiħodlu mill-​ħin li kien jiddedika għall-​familja tiegħu u għall-​affarijiet spiritwali. Peress li kien ħaddiem mill-​aqwa u taʼ min jafdah, l-​imgħallem irrispetta x-​xewqat tiegħu. M’għandniex xi ngħidu, mhux dejjem hekk jiġri, u jistaʼ jagħti l-​każ li dak li jkun ikollu jfittex xogħol ieħor sabiex iżomm stil bilanċjat taʼ ħajja. Madankollu, dawk li jpoġġu l-​fiduċja sħiħa tagħhom f’Jehovah ġeneralment isibu li minħabba l-​kondotta tajba tagħhom u l-​etika li juru fuq ix-​xogħol, l-​imgħallem tagħhom ikun kuntent bihom.—Proverbji 3:​5, 6.

Meta x-​Xogħol Kollu Se Jkun Premjanti

F’din is-​sistema imperfetta li ninsabu fiha, ix-​xogħol u l-​prospetti taʼ xogħol qatt m’huma se jkunu ħielsa mill-​problemi u l-​inċertezzi. Fil-​fatt, l-​affarijiet jistgħu jmorru għall-​agħar iktar ma d-​dinja ssir instabbli u l-​ekonomiji jibdew telgħin u neżlin jew saħansitra jfallu. Imma din is-​sitwazzjoni hija temporanja. Dalwaqt, ħadd ma se jkun bla xogħol. Iktar minn hekk, ix-​xogħol kollu se jkun wieħed li titpaxxa bih u li jġiblek sodisfazzjon kbir. Dan kif se jkun possibbli? Liema ħaġa se ġġib bidla bħal din?

Permezz tal-​profeta tiegħu Isaija, Jehovah ipponta ’l quddiem lejn żmien bħal dan. “Se noħloq smewwiet ġodda u art ġdida,” qal Jehovah, u “ma jitfakkarx iżjed l-​imgħoddi, f’moħħ ħadd aktar ma jiġi.” (Isaija 65:17) Hu kien qed jitkellem dwar il-​gvern ġdid tiegħu, u taħt dan il-​gvern, soċjetà umana totalment ġdida u differenti se ssir realtà.—Danjel 2:44.

Rigward il-​mod kif in-​nies se jgħixu u jaħdmu f’dak iż-​żmien, il-​profezija tkompli: “Huma għad jibnu djarhom u jgħammru fihom, iħawwlu d-​dwieli u jieklu frotthom. Ma jibnux biex jgħammar ħaddieħor, u ma jħawwlux biex jiekol ħaddieħor; għax il-​poplu tiegħi jgħix daqs kemm jgħixu s-​siġar, u l-​magħżulin tiegħi jistgħallu xogħol idejhom. Ma jitħabtux għal xejn u ma jildux tfal biex jinqerdu ħesrem, għax ikunu nisel imbierek mill-​Mulej, u hekk ukoll uliedhom.”—Isaija 65:​21-23.

X’differenza se tagħmel dik id-​dinja l-​ġdida li Alla fassal! Tixtieq int tgħix f’dinja bħal din, li fiha ‘ma titħabatx għalxejn’ imma tgawdi bis-​sħiħ il-​‘frott’ taʼ xogħol idejk? Innota, iżda, min se jgawdi barkiet bħal dawn. Dawn se jkunu “nisel imbierek mill-​Mulej.” Int tistaʼ tkun parti minn dan in-​“nisel imbierek” billi titgħallem dwar Jehovah u twettaq dak li qed jitlob minnek. Ġesù qal: “Din hi l-​ħajja taʼ dejjem, li jagħrfu lilek, Alla waħdek veru, u lil Ġesù Kristu, li inti bgħatt.” (Ġwann 17:3) Ix-​Xhieda taʼ Jehovah huma lesti li minn qalbhom jgħinuk tikseb dan l-​għarfien li jagħti l-​ħajja billi joffrulek studju regulari tal-​Kelma t’Alla, il-​Bibbja.

[Kaxxa f’Paġna 6]

“HUMA MFITTXIJIN ĦAFNA”

“Kull ma tagħmlu, agħmluh minn qalbkom bħallikieku lill-​Mulej u mhux lill-​bnedmin,” tgħid il-​Bibbja. (Kolossin 3:23) M’għandniex xi ngħidu, wieħed li juri etika fuq ix-​xogħol ibbażata fuq dan il-​prinċipju mill-​aħjar, żgur li jkun ħaddiem li kulħadd jixtieq iħaddmu miegħu. Għal din ir-​raġuni, J. J. Luna, fil-​ktieb tiegħu How to Be Invisible, jagħti parir lil dawk li jridu jħaddmu lil xi impjegati magħhom biex ifittxu membri attivi taʼ ċerti gruppi reliġjużi, imma mbagħad iżid: “Fir-​realtà, ġeneralment nispiċċaw inħaddmu lix-​Xhieda [taʼ Jehovah].” Fost ir-​raġunijiet li jagħti hemm li x-​Xhieda huma magħrufin ħafna għall-​onestà tagħhom, u minħabba dan “huma mfittxijin ħafna” f’diversi oqsma taʼ xogħol.

[Stampi f’paġna 5]

Li ssib bilanċ bejn ix-​xogħol u l-​attivitajiet spiritwali u r-​rikreazzjoni jġib sodisfazzjon