Ferħ Veru f’li Naqdu lil Jehovah

“Hieni hu dak li għandu lil dak Alla taʼ Ġakobb għall-​għajnuna tiegħu, li t-​tama tiegħu hi f’Jehovah Alla tiegħu.”​—SALM 146:5.

1, 2. X’intqal dwar id-​definizzjoni tal-​ferħ, u x’ifisser il-​ferħ għal ħafna nies illum?

X’INHU l-​ferħ? Kittieba taʼ dizzjunarji, filosfi, u teoloġi ilhom jipprovaw jagħtu definizzjoni tiegħu għal sekli sħaħ. Imma huma ma pprovdewx definizzjoni li tikseb l-​approvazzjoni unanima. L-​Encyclopœdia Britannica tammetti: “‘Ferħ hija waħda mill-​iktar kelmiet li jqarrqu bik.” Ferħ milli jidher ifisser affarijiet differenti għal nies differenti, jiddependi fuq il-​ħarsa tagħhom lejn il-​ħajja.

² Għal ħafna nies il-​ferħ jiddependi fuq saħħa tajba, ġid materjali, u sħubija pjaċevoli. Madankollu, hemm nies li għandhom dak kollu imma m’humiex kuntenti. Għal irġiel u nisa ddedikati lil Alla Jehovah, il-​Bibbja tipprovdi kunċett taʼ ferħ li hu differenti mhux ħażin mill-​ħarsa ġenerali.

Ħarsa Differenti tal-​Ferħ

3, 4. (a) Ġesù lil min ippronunzja henjin? (b) X’jistaʼ jiġi nnotat rigward il-​fatturi tal-​ferħ li semma Ġesù?

³ Fil-​Priedka tiegħu fuq il-​Muntanja, Ġesù Kristu ma qalx li l-​ferħ jiddependi fuq saħħa tajba, ġid materjali, u affarijiet hekk. Hu ppronunzja verament henjin lil “dawk li huma konxji tal-​bżonn spiritwali tagħhom” u dawk “bil-​ġuħ u bil-​għatx għat-​tjieba”. Marbuta maʼ dawn iż-​żewġ fatturi meħtieġa għall-​ferħ veru hemm l-​istqarrija li tidher kontradittorja taʼ Ġesù: “Henjin dawk bil-​vistu, ladarba se jitfarrġu.” (Mattew 5:​3-6) Ovvjament, Ġesù ma kienx qed igħid li n-​nies se jkunu awtomatikament henjin meta jitilfu lil xi maħbubin tagħhom. Minflok, hu kien qed jitkellem dwar dawk li jitnikktu minħabba l-​istat midneb tagħhom u l-​konsegwenzi tiegħu.

⁴ L-​appostlu Pawlu tkellem dwar il-​ħolqien uman li jokrob taħt id-​dnub fuq il-​bażi tat-​tama li hu kien se “jinħeles mill-​jasar għall-​korruzzjoni.” (Rumani 8:​21, 22) Bnedmin li jaċċettaw il-​provvediment taʼ Jehovah li jpatti għad-​dnub permezz tas-​sagrifiċċju bħala rahan taʼ Kristu u li jagħmlu r-​rieda t’Alla huma verament imfarrġin u jintgħamlu henjin. (Rumani 4:​6-8) Fil-​Priedka fuq il-​Muntanja, Ġesù ppronunzja wkoll henjin lill-​“kalmi,” “dawk li mimlijin ħniena,” “il-​puri fil-​qalb,” u “dawk li jġibu l-​paċi.” Hu ta l-​assiguranza li saħansitra jekk ippersegwitati, uħud ġwejdin bħal dawn ma kinux se jitilfu l-​ferħ tagħhom. (Mattew 5:​5-11) Huwa taʼ interess li tinnota li dawn il-​fatturi elevati għall-​ferħ ipoġġu lis-​sinjuri u lill-​fqar fuq livell indaqs.

Il-​Bażi għal Ferħ Veru

5. X’inhi l-​bażi tal-​ferħ tal-​qaddejja ddedikati t’Alla?

⁵ Is-​sors tal-​ferħ veru ma jinstabx f’ġid materjali. Il-​għaref Sultan Salamun qal: “Il-​barka taʼ Jehovah​—dik hi li tagħmel għani, u hu ma jżid ebda wġigħ magħha.” (Proverbji 10:22) Għal ħlejjaq li jirrikonoxxu s-​sovranità universali taʼ Jehovah, il-​ferħ huwa b’mod inseparabbli relatat mal-​barka t’Alla. Il-​persuna ddedikata li għandha u li tħoss il-​barka taʼ Jehovah fuqha hi verament hienja. Mill-​ħarsa tal-​Bibbja, il-​ferħ jinvolvi sens taʼ kuntentizza, sodisfazzjon, u twettieq fis-​servizz taʼ Jehovah.

6. X’inhu meħtieġ min-​nies taʼ Jehovah biex huma jkunu verament henjin?

⁶ Il-​ferħ veru jiddependi minn relazzjoni tajba maʼ Jehovah. Huwa bbażat fuq imħabba għal Alla u fedeltà lejh. Il-​qaddejja ddedikati taʼ Jehovah jaqblu b’qalbhom kollha mal-​kelmiet taʼ Pawlu: “Ħadd minna, fil-​fatt, ma jgħix rigward lilu nnifsu biss. . .Aħna ngħixu għal Jehovah. . .Aħna nappartjenu lil Jehovah.” (Rumani 14:​7, 8) Għalhekk, il-​ferħ veru ma jistax jinkiseb mingħajr ubbidjenza lejn Jehovah u mingħajr sottomissjoni bil-​ferħ lejn ir-​rieda tiegħu. Ġesù qal: “Henjin huma dawk li qegħdin jisimgħu l-​kelma t’Alla u qegħdin iżommuha!”​—Luqa 11:28.

Fatturi Varjabbli tal-​Ferħ

7, 8. (a) Il-​fatturi tal-​ferħ kif jistgħu jiġu kklassifikati? (b) X’jistaʼ jingħad dwar iż-​żwieġ u li jkollok it-​tfal?

⁷ Il-​fatturi għall-​ferħ li semmejna jistgħu jissejħu “bażiċi,” jew “kostanti,” għaliex huma validi għall-​qaddejja ddedikati taʼ Jehovah f’kull waqt. Minbarra dan, hemm dawk li jistgħu jissejħu fatturi varjabbli, li jistgħu jirriżultaw fil-​ferħ f’xi żmien imma fi ftit li xejn jew f’xejn affattu f’xi żmien ieħor. Fil-​perijodi tal-​patrijarki u taʼ qabel il-​Kristjanità, iż-​żwieġ u li jkollhom it-​tfal kienu meqjusin indispensabbli għall-​ferħ. Dan jidher mill-​appell li jniggeż taʼ Rakele lil Ġakobb: “Agħtini tfal jew inkella se nkun mara mejta.” (Ġenesi 30:1) Din l-​attitudni lejn li jkollhom it-​tfal kienet taqbel mal-​iskop taʼ Jehovah għal dak il-​perijodu.​—Ġenesi 13:​14-16; 22:17.

⁸ Iż-​żwieġ u li jkollhom it-​tfal kienu meqjusin bħala barkiet mogħtijin minn Alla fost il-​poplu taʼ Jehovah taʼ żminijiet bikrin. Madankollu, in-​niket kien assoċjat maʼ dawn u maʼ ċirkostanzi oħrajn matul perijodi taʼ gwaj fl-​istorja tagħhom. (Qabbel Salm 127, 128 maʼ Ġeremija 6:12; 11:22; Biki taʼ Ġeremija 2:19; 4:​4, 5.) Huwa, għalhekk, evidenti li ż-​żwieġ u li jkollok it-​tfal m’humiex fatturi għall-​ferħ permanenti.

Ferħ mingħajr Żwieġ fil-​Passat

9. Bint Ġefta għala rċeviet tifħir kull sena?

⁹ Ħafna mill-​qaddejja t’Alla sabu ferħ veru fil-​passat mingħajr żwieġ. B’rispett lejn il-​wegħda taʼ missierha, bint Ġefta baqgħet ma żżewġitx. Għal xi żmien hi u sħabha t-​tfajliet bkew dwar il-​verġinità tagħha. Imma x’ferħ ġarrbet taqdi full time fid-​dar taʼ Jehovah, forsi fost “il-​qaddejja nisa li għamlu servizz organizzat fid-​daħla tat-​tinda tal-​laqgħa”! (Eżodu 38:8) Għal dan, hi ġiet imfaħħra kull sena.​—Imħallfin 11:​37-40.

10. Jehovah x’irrikjeda minn Ġeremija, u jidher dan li għadda ħajja mdejqa bħala riżultat?

¹⁰ Minħabba ż-​żminijiet drammatiċi li kien igħix fihom il-​profeta Ġeremija, Alla rrikjeda minnu li hu ma jiżżewwiġx u ma jrabbix tfal. (Ġeremija 16:​1-4) Imma Ġeremija ġarrab kemm hu veru l-​kliem t’Alla: “Imbierek hu r-​raġel b’saħħtu li jpoġġi l-​fiduċja tiegħu tiegħu f’Jehovah, u li Jehovah sar il-​fiduċja tiegħu.” (Ġeremija 17:7) Matul iktar minn 40 sena taʼ servizz profetiku, Ġeremija qeda lil Alla bil-​fedeltà bħala ġuvni. Sa fejn nafu aħna, hu qatt ma żżewweġ u kellu t-​tfal. Madankollu, min jistaʼ jiddubita li Ġeremija kien hieni, bħall-​fdal Lhudi leali li ‘saru jiddu bil-​ferħ minħabba t-​tjieba taʼ Jehovah’?​—Ġeremija 31:12.

11. Liema huma xi eżempji Skritturali taʼ qaddejja leali taʼ Jehovah li kienu henjin għalkemm ma kellhomx sieħeb jew sieħba fiż-​żwieġ?

¹¹ Ħafna nies oħrajn qdew lil Jehovah bil-​ferħ mingħajr sieħeb jew sieħba fiż-​żwieġ. Huma jew baqgħu ma żżewġux, jew romlu. Fosthom kien hemm il-​profetessa Anna; probabbli Dorkas, jew Tabita; l-​appostlu Pawlu; u l-​aqwa eżempju fosthom ilkoll​—Ġesù Kristu.

Mhux Miżżewġin imma Henjin Illum

12. Xi wħud mill-​qaddejja taʼ Jehovah dedikati u henjin għal liema ħaġa għamlu wisgħa illum, u għala?

¹² Illum, eluf taʼ Xhieda taʼ Jehovah qegħdin jaqdu bil-​fedeltà lil Alla mingħajr sieħeb jew sieħba fiż-​żwieġ. Xi wħud kienu kapaċi jaċċettaw l-​istedina taʼ Ġesù: “Ħalli min jistaʼ jagħmel il-​wisgħa għalih [ir-rigal taċ-​ċelibat] jagħmel wisgħa għalih.” Huma għamlu dan “minħabba s-​saltna tas-​smewwiet.” (Mattew 19:​11, 12) Jiġifieri, poġġew il-​libertà li tahom Alla għal użu tajjeb billi ddedikaw iktar ħin u enerġija biex javvanzaw l-​interessi tas-​Saltna. Ħafna minnhom qegħdin jaqdu bħala pijunieri, missjunarji, jew membri tal-​familja Betel fil-​kwartieri ġenerali dinjin tal-​Watch Tower Society jew f’xi waħda mill-​fergħat tagħha.

13. Liema eżempji juru li Kristjan jistaʼ jibqaʼ ma jiżżewwiġx u jkun hieni?

¹³ Waħda oħt għażiża fiż-​żmien irrakkontat l-​istorja taʼ ħajjitha taħt it-​titlu indikattiv “Mhux Miżżewġa u Hienja bħala Pijuniera.” (The Watchtower, 1 taʼ Mejju, 1985, paġni 23-6) Oħt oħra mhix miżżewġa li qattgħet ’il fuq minn 50 sena taqdi f’Betel stqarret: “Jiena sodisfatta għalkollox b’ħajti u bix-​xogħol li nħobb bi-għożża. M’għandix dispjaċiri. Jien kont nerġaʼ nieħu l-​istess deċiżjoni.”​—The Watchtower, 15 taʼ Ġunju, 1982, paġna 15.

14, 15. (a) Skond l-​appostlu Pawlu, x’inhu neċessarju sabiex tibqaʼ ma tiżżewwiġx? (b) Pawlu għala jgħid li min maʼ jiżżewwiġx jagħmel “aħjar” u “hu iżjed hieni”?

¹⁴ Innota l-​kelma “deċiżjoni”. Pawlu kiteb: “Jekk xi ħadd qiegħed sewwa f’qalbu, billi m’għandu ebda neċessità, imma għandu awtorità fuq ir-​rieda tiegħu stess u għamel din id-​deċiżjoni f’qalbu stess, biex iżomm il-​verġinità tiegħu stess, se jagħmel sewwa. Għaldaqstant dak ukoll li jagħti l-​verġinità tiegħu fiż-​żwieġ jagħmel sewwa, imma dak li ma jagħtihiex fiż-​żwieġ se jagħmel aħjar.” (1 Korintin 7:​37, 38) Għala “aħjar”? Pawlu spjega: “Irridkom tkunu ħielsa mill-​anzjetà. Ir-​raġel li mhux miżżewweġ hu anzjuż għall-​affarijiet tal-​Mulej, kif hu jistaʼ jikseb l-​approvazzjoni persunali tal-​Mulej. . .. Jerġaʼ, il-​mara mhix miżżewġa, u l-​verġni, hi anzjuża għall-​affarijiet tal-​Mulej. . .Imma dan qiegħed ingħidu għall-​vantaġġ persunali tagħkom, . . . biex inqanqalkom għal dak li jixraq u dak li jfisser attendenza l-​ħin kollu fuq il-​Mulej mingħajr tfixkil.”​—1 Korintin 7:​32-35.

¹⁵ Hija “attendenza l-​ħin kollu fuq il-​Mulej mingħajr tfixkil” bil-​ħsieb li ‘taqlaʼ l-​approvazzjoni tal-​Mulej’ relatata mal-​ferħ Milli jidher Pawlu hekk kien jaħseb. Waqt li tkellem dwar armla Kristjana, hu qal: “Hi ħielsa li tiżżewweġ lil min trid hi, biss fil-​Mulej. Imma hi iktar hienja jekk tibqaʼ kif inhi, skond l-​opinjoni tiegħi. Jien ċertament naħseb li jien ukoll għandi l-​ispirtu t’Alla.”​—1 Korintin 7:​39, 40.

Vantaġġi tal-​Istat taʼ Ċelibat

16. Liema huma xi vantaġġi gawduti minn Xhieda taʼ Jehovah mhux miżżewġin?

¹⁶ Kemm jekk Kristjan baqaʼ maʼ żżewwiġx minħabba deċiżjoni persunali jew sforz iċ​—ċirkostanzi, l-​istat taʼ ċelibat iġib miegħu ħafna vantaġġi persunali. Persuni mhux miżżewġin ġeneralment għandhom iżjed ħin biex jistudjaw il-​Kelma t’Alla u jimmeditaw fuqha. Jekk huma jieħdu vantaġġ minn din iċ-​ċirkostanza, l-​ispiritwalità tagħhom tikber. Billi m’għandhomx sieħeb jew sieħba maʼ min jaqsmu l-​problemi tagħhom, ħafna jitgħallmu jistrieħu iżjed bis-​sħiħ fuq Jehovah u jfittxu d-​direzzjoni tiegħu fl-​affarijiet kollha. (Salm 37:5) Dan igħin biex iġib relazzjoni iżjed mill-​qrib maʼ Jehovah.

17, 18. (a) Liema opportunitajiet għal iżjed servizz tal-​għalqa huma disponibbli għal qaddejja taʼ Jehovah li m’humiex miżżewġin? (b) Xi qaddejja taʼ Jehovah mhux miżżewġin kif iddeskrivew il-​ferħ tagħhom?

¹⁷ Kristjani mhux miżżewġin għandhom opportunitajiet għal iżjed servizz tal-​għalqa għat-​tifħir taʼ Jehovah. It-​taħriġ speċjali li qed jingħata issa fl-​Iskola taʼ Taħriġ Ministerjali huwa llimitat lil aħwa rġiel mhux miżżewġin jew romol. Aħwa nisa mhux miżżewġin ukoll huma iżjed liberi biex jimmiraw għal privileġġi fis-​servizz t’Alla. L-​oħt avvanzata fl-​età li semmejna qabel ivvolontarjat biex taqdi f’art Afrikana meta, biex nikkwotaw lilha, hi kienet “mara xi ftit fraġli taʼ iktar minn 50 sena.” U hi baqgħet hemm, saħansitra matul projbizzjoni, meta l-​missjunarji kollha ġew imkeċċijin. Hi għadha taqdi hemm bħala pijuniera, għalkemm issa għandha ’l fuq minn 80 sena. Ferħana hi? Fl-​istorja taʼ ħajjitha kitbet: “Kont nistaʼ nuża l-​libertà miżjuda u l-​mobilità li ċ-​ċelibat jippermetti biex inżomm attiva fil-​ministeru, u dan ġabli ferħ kbir. . .. Matul is-​snin ir-​relazzjoni tiegħi maʼ Jehovah kibret. Bħala mara mhix miżżewġa f’art Afrikana, rajtu bħala Protettur.”

¹⁸ Notevoli, ukoll, hu l-​kliem taʼ ħu li qeda fil-​kwartieri ġenerali tal-​Watch Tower Society għal għaxriet taʼ snin. Hu kien hieni, għalkemm baqaʼ ma żżewwiġx u għalkemm kellu t-​tama tas-​sema mingħajr ebda prospett taʼ żwieġ. Fl-​età taʼ 79, hu kiteb: “Kuljum nitlob lill-​għażiż Missierna tas-​sema għall-​għajnuna u l-​għerf biex inżomm lili nnifsi spiritwalment kif ukoll fiżikament b’saħħti u sod sabiex inkompli nagħmel ir-​rieda qaddisa tiegħu. Matul dawn l-​aħħar disgħa u erbgħin sena fis-​servizz taʼ Jehovah jien tassew gawdejt mod taʼ ħajja hienja, premjanti u mbierka. U bil-​ħniena mhix mistħoqqa taʼ Jehovah qed inħares ’il quddiem lejn servizz kontinwu għall-​unur u l-​glorja tiegħu u għall-​barka tal poplu tiegħu. . . [Il-]ferħ taʼ Jehovah igħinni biex nibqaʼ fil-​ġlieda t-​tajba tal-​fidi, billi nħares ’il quddiem lejn iż-​żmien meta l-​għedewwa taʼ Jehovah ikunu spiċċaw u l-​art kollha tkun mimlija bil-​glorja tiegħu.”​—Numri 14:21; Neħemija 8:10; The Watchtower, 15 taʼ Novembru, 1968, paġni 699-702.

Fuqiex Jiddependi l-​Ferħ Veru?

19. Il-​ferħ tagħna fuq liema ħaġa se jiddependi dejjem?

¹⁹ Ir-​relazzjoni prezzjuża tagħna maʼ Jehovah, l-​approvazzjoni tiegħu, u l-​barka tiegħu​—dawn huma fatturi li se jġibulna l-​ferħ veru matul l-​eternità. B’din il-​ħarsa xierqa fuq x’jipproduċi ferħ ġenwin, saħansitra qaddejja taʼ Jehovah li huma miżżewġin jirrealizzaw li ż-​żwieġ tagħhom m’huwiex l-​iktar ħaġa importanti fil-​ħajjiet tagħhom. Huma jagħtu kas tal-​parir tal-​appostlu Pawlu: “Dan ingħid, l-​aħwa, iż-​żmien li fadal hu mnaqqas. Minn issa ’l quddiem ħalli dawk li għandhom nisa jkunu bħal li kieku ma kellhomx.” (1 Korintin 7:29) Dan ma jfissirx li jittraskuraw lin-​nisa tagħhom. Irġiel miżżewġin Kristjani maturi jpoġġu s-​servizz taʼ Jehovah l-​ewwel, u hekk jagħmlu n-​nisa tagħhom taʼ tjieba, taʼ mħabba, u li jagħtuhom l-​appoġġ tagħhom, billi xi wħud minnhom saħansitra jaqdu full time bħala mseħbin taʼ żwieġhom.​—Proverbji 31:​10-12, 28; Mattew 6:33.

20. Ħafna Kristjani liema attitudni xierqa għandhom lejn i-privileġġi tagħhom taż-​żwieġ?

²⁰ Aħwa rġiel miżżewġin li huma indokraturi li jivvjaġġaw, voluntieri f’Betel, anzjani tal-​kongregazzjoni​—tabilħaqq, il-​Kristjani miżżewġin kollha li jpoġġu l-​interessi tas-​Saltna l-​ewwel​—ma ‘jużawx lid-​dinja bis-​sħiħ’; huma jaħdmu biex jiffittjaw il-​privileġġi taż-​żwieġ tagħhom fil-​ħajja ddedikata tagħhom taʼ servizz lil Jehovah. (1 Korintin 7:31) Madankollu, huma henjin. Għala? Għaliex ir-​raġuni ewlenija għall-​ferħ tagħhom mhix iż-​żwieġ tagħhom imma s-​servizz tagħhom lil Jehovah. U ħafna rġiel u nisa miżżewġin leali​—iva, u t-​tfal tagħhom ukoll​—huma henjin li jridu jagħmlu hekk.

21, 22. (a) Fuq il-​bażi taʼ Ġeremija 9:​23, 24, x’għandu jimliena bil-​ferħ? (b) Liema fatturi tal-​ferħ huma msemmijin fi Proverbji 3:​13-18?

²¹ Il-​profeta Ġeremija kiteb: “Dan hu dak li qal Jehovah: ‘Ħalli l-​bniedem għaref ma jiftaħarx bih innifsu minħabba fil-​għerf tiegħu, u ħalli l-​bniedem setgħani ma jiftaħarx bih innifsu minħabba fis-​setgħa tiegħu. Ħalli l-​bniedem għani ma jiftaħarx bih innifsu minħabba fir-​rikkezzi tiegħu. Imma ħalli dak li qiegħed jiftaħar bih innifsu jiftaħar bih innifsu minħabba f’din il-​ħaġa, li għandu d-​dehen u li għandu l-​għarfien tiegħi, li jien Jehovah, Dak li qiegħed jiżerċita l-​qalb tajba bl-​imħabba, il-​ġustizzja u t-​tjieba fl-​art; għax b’dawn l-​affarijiet nitgħaxxaq,’ hija l-​ħaġa mitkellma taʼ Jehovah.”​—Ġeremija 9:​23, 24.

²² Kemm jekk aħna miżżewġin u kemm jekk m’aħniex, l-​akbar sors taʼ ferħ tagħna għandu jkun l-​għarfien tagħna dwar Jehovah u l-​konvinzjoni li aħna għandna l-​barka tiegħu għaliex qegħdin nagħmlu r-​rieda tiegħu. Aħna ferħanin ukoll li għandna dehen f’dak li jikkostitwixxi l-​vera skala taʼ valuri, l-​affarijiet li bihom Jehovah jitgħaxxaq. Is-​Sultan Salamun li żżewweġ bosta drabi ma kienx iqis iż-​żwieġ bħala l-​uniku muftieħ għall-​ferħ. Hu qal: “Hieni hu r-​raġel li sab il-​għerf, u r-​raġel li jikseb id-​dehen, għax li jkollok il-​fidda bħala qligħ hu aħjar milli jkollok il-​fidda bħala qligħ u li jkollok lilu bħala prodott milli d-​deheb innifsu. Huwa iktar prezzjuż mill-​qroll, u l-​għaxqiet l-​oħra kollha tiegħek ma jistgħux jintgħamlu ugwali għalih. Tul taʼ jiem qiegħed f’idu l-​leminija; f’idu x-​xellugija hemm rikkezzi u glorja. Il-​mogħdijiet tiegħu huma mogħdijiet taʼ gost, u t-​toroq kollha tiegħu huma paċi. Huwa siġra tal-​ħajja għal dawk li jaħtfuh, u dawk li jibqgħu sew għandhom jissejħu ferħanin.”​—Proverbji 3:​13-18.

23, 24. Għala nistgħu nkunu ċerti li l-​qaddejja leali kollha taʼ Jehovah se jkunu henjin fis-​sistema ġdida taʼ affarijiet?

²³ Jalla dawk fostna li huma miżżewġin isibu ferħ etern f’li jagħmlu r-​rieda divina. U jalla l-​għeżież ħutna rġiel u nisa li m’humiex miżżewġin għax għażlu hekk jew sforz iċ-​ċirkostanzi jissaportu l-​provi kollha tagħhom u jsibu ferħ u kuntentizza f’li jaqdu lil Jehovah issa u għal dejjem. (Luqa 18:​29, 30; 2 Pietru 3:​11-13) Fis-​sistema taʼ affarijiet t’Alla li ġejja, “rombli” se jinfetħu. (Rivelazzjoni 20:12) Dawn se jkun fihom kmandamenti u regulamenti eċċitanti ġodda li jikkontribwixxu għall-​ferħ tal-​umanità ubbidjenti.

²⁴ Ċertament, nistgħu nħossuna fiduċjużi li “Alla l-​hieni” tagħna għandu maħżun għalina affarijiet tajbin b’mod tal-​għaġeb li se jirriżultaw f’ferħ sħiħ għalina. (1 Timotew 1:11) Alla se jkompli ‘jiftaħ idu u jissodisfa x-​xewqa taʼ kull ħaġa ħajja.’ (Salm 145:16) Mhux taʼ b’xejn li hemm u dejjem ikun hemm ferħ veru f’li naqdu lil Jehovah.

Kif Twieġeb Int?

◻ X’inhu l-​bażi tal-​ferħ tal-​qaddejja ddedikati taʼ Jehovah?

◻ Fiż-​żminijiet Bibliċi, min kienu xi wħud mill-​qaddejja taʼ Jehovah mhux miżżewġin u henjin?

◻ Pawlu għala nkuraġġixxa ċ-​ċelibat, u xi Kristjani kif sabu dan ħajja taʼ ferħ?

◻ Il-​ferħ tagħna fuq liema ħaġa se jiddependi dejjem?

◻ Għala għandna nkunu fiduċjużi li dawk kollha leali se jkunu henjin fis-​sistema ġdida taʼ affarijiet?