Referenzi għall-Fuljett għall-Istudju tal-Laqgħa tal-Ħajja u l-Ministeru Tagħna

5-11 taʼ Novembru

TEŻORI MILL-​KELMA T’ALLA | ĠWANNI 20-21

“Tħobbni int iktar minn dawn?”

nwtsty noti taʼ studju dwar Ġw 21:15, 17

Ġesù qal lil Xmun Pietru: Din il-​konversazzjoni bejn Ġesù u Pietru saret ftit wara li Pietru kien ċaħad lil Ġesù tliet darbiet. Ġesù staqsa tliet mistoqsijiet biex jara kif kien iħossu Pietru dwaru. Lil Pietru staqsieh sal-​punt li “tnikket.” (Ġw 21:17) Ir-​rakkont taʼ Ġwanni li nsibu fi Ġw 21:15-17 juża żewġ verbi Griegi differenti: agapejo, li tiġi tradotta mħabba, u filjo, li tiġi tradotta affezzjoni. Ġesù darbtejn staqsa lil Pietru: “Tħobbni int?” Pietru, id-​darbtejn b’mod sinċier ikkonferma li kellu “affezzjoni” lejn Ġesù. Fl-​aħħar, Ġesù staqsieh: “Għandek int affezzjoni lejja?” Pietru reġaʼ sostna li kellu. Kull darba li Pietru kkonferma mħabbtu, Ġesù enfasizza li din l-​imħabba u l-​affezzjoni kellhom jimmotivaw lil Pietru biex jitmaʼ u ‘jirgħa’ b’mod spiritwali d-​dixxipli taʼ Ġesù, li hawnhekk irrefera għalihom bħala l-​ħrief, jew “in-​nagħaġ ċkejknin” tiegħu. (Ġw 21:16, 17; 1Pt 5:1-3) Ġesù ħalla lil Pietru jikkonferma mħabbtu tliet darbiet, u mbagħad fdah bir-​responsabbiltà taʼ li jieħu ħsieb in-​nagħaġ tiegħu. B’dan il-​mod, Ġesù ġieb fix-​xejn kull dubju dwar jekk kienx ħafer lil Pietru talli kien ċaħdu tliet darbiet.

tħobbni int iktar minn dawn?: Grammatikament, il-​frażi “iktar minn dawn” tistaʼ tinftiehem b’iktar minn mod wieħed. Xi studjużi jippreferu t-​tifsira “tħobbni int iktar milli tħobb lil dawn id-​dixxipli?” jew “tħobbni int iktar milli jħobbuni dawn id-​dixxipli?” Imma aktarx li t-​tifsira hi “tħobbni int iktar minn dawn l-​affarijiet?” jiġifieri l-​ħut li qabdu jew l-​affarijiet li kellhom x’jaqsmu man-​negozju tas-​sajd. Allura l-​idea taʼ dan il-​vers tidher li hi: ‘Tħobbni int iktar mill-​affarijiet materjali jew mill-​karriera? Jekk iva, itmaʼ l-​ħrief tiegħi.’ Din il-​mistoqsija kienet xierqa meta nqisu l-​passat taʼ Pietru. Għalkemm Pietru kien wieħed mill-​ewwel dixxipli taʼ Ġesù (Ġw 1:35-42), hu ma segwiex lil Ġesù full-​time mill-​ewwel. Minflok, hu mar lura għas-​sajd. Xi xhur wara, Ġesù staqsa lil Pietru biex minflok ma jkompli b’dak in-​negozju tajjeb, isir ‘sajjied tal-​bnedmin.’ (Mt 4:18-20; Lq 5:1-11) Għal darba oħra, ftit wara li Ġesù miet, Pietru qal li kien sejjer jistad, u appostli oħra marru jistadu miegħu. (Ġw 21:2, 3) Allura x’aktarx li Ġesù kien qed jenfasizza lil Pietru li hu kellu bżonn jiddeċiedi x’kien se jagħmel: Kien se jpoġġi l-​karriera tan-​negozju tas-​sajd l-​ewwel post f’ħajtu, li kienet irrappreżentata mill-​qabda ħut li kien hemm quddiemhom, jew kien se jagħti prijorità lix-​xogħol spiritwali taʼ li jitmaʼ l-​ħrief, jew is-​segwaċi taʼ Ġesù?—Ġw 21:4-8.

għat-tielet darba: Pietru kien ċaħad lill-​Mulej tiegħu tliet darbiet; issa Ġesù kien qed jagħtih l-​opportunità biex jikkonferma kif kien iħossu tliet darbiet. Waqt li Pietru għamel dan, Ġesù qallu biex juri din l-​imħabba u l-​affezzjoni billi jpoġġi s-​servizz sagru qabel l-​affarijiet l-​oħrajn kollha. Flimkien maʼ aħwa rġiel responsabbli oħra, Pietru kien se jitmaʼ, isaħħaħ, u jirgħa l-​merħla taʼ segwaċi leali taʼ Kristu. Dawn kienu midlukin imma xorta kellhom bżonn jiġu mitmugħin spiritwalment.—Lq 22:32.

Ħaffer għal ġawhar spiritwali

nwtsty noti taʼ studju dwar Ġw 20:17

Tibqax imqabbda miegħi: Il-​verb Grieg ħeptomej jistaʼ jfisser “tmiss” jew “taqbad maʼ; iżżomm maʼ.” Xi traduzzjonijiet ittraduċew il-​kliem taʼ Ġesù: “La tmissnix.” Imma Ġesù ma kienx qed joġġezzjona għas-​sempliċi fatt li kienet qed tmissu Marija l-​Maddalena, ladarba m’oġġezzjonax meta nisa oħra li rawh wara li ġie rxoxtat żammewlu saqajh. (Mt 28:9) Jidher li Marija l-​Maddalena beżgħat li Ġesù dalwaqt kien ħa jitlaʼ s-​sema. Peress li kellha xewqa qawwija li tkun mal-​Mulej, hi qabdet sew maʼ Ġesù, u ma ħallitux jitlaq. Biex jassiguraha li kien baqagħlu ftit biex jitlaq, Ġesù qal lil Marija biex ma tibqax imqabbda miegħu u, minflok, tmur għand id-​dixxipli tiegħu u tgħidilhom bl-​aħbar li ġie rxoxtat.

Alla tiegħi u Alla tagħkom: Din il-​konversazzjoni bejn Ġesù u Marija l-​Maddalena li saret fis-​16 taʼ Nisan tas-​sena 33 turi li Ġesù rxoxtat kien iqis il-​Missier bħala l-​Alla tiegħu, bħalma l-​Missier kien Alla għal Marija l-​Maddalena. Jumejn qabel, meta kien fuq iz-​zokk tat-​tortura, Ġesù kien għajjat: “Alla tiegħi, Alla tiegħi,” u b’hekk wettaq il-​profezija taʼ Sa 22:1 u rrikonoxxa lil Missieru bħala Alla tiegħu. (Mt 27:46; Mk 15:34; Lq 23:46) Anki fil-​ktieb tar-​Rivelazzjoni, Ġesù tkellem dwar Missieru bħala li hu Alla tiegħu. (Ri 3:2, 12) Dawn is-​siltiet jikkonfermaw li Ġesù Kristu rxoxtat u gglorifikat iqim lil Missier tas-​sema bħala Alla tiegħu, bħalma jagħmlu d-​dixxipli taʼ Ġesù.

nwtsty nota taʼ studju dwar Ġw 20:28

Mulej tiegħi u Alla tiegħi!: Litteralment, “Il-​Mulej tiegħi u l-​Alla [ħo teos] tiegħi!” Xi studjużi jqisu din l-​espressjoni bħala espressjoni taʼ stagħġib li ntqalet lil Ġesù imma li fil-​fatt kienet indirizzata lil Alla, Missieru. Oħrajn isostnu li dan il-​kliem bil-​Grieg oriġinali qed jiġi indirizzat lil Ġesù. Anke jekk dan hu minnu, l-​iskop tal-​espressjoni “Mulej tiegħi u Alla tiegħi” jinftiehem l-​aħjar fil-​kuntest tal-​bqija tal-​Iskrittura ispirata. Peress li hemm miktub li ftit qabel Ġesù kien bagħat lid-​dixxipli tiegħu dan il-​messaġġ: “Jien tielaʼ għand Missieri u Missierkom, Alla tiegħi u Alla tagħkom,” m’hemmx raġuni għala għandna nemmnu li Tumas ħaseb li Ġesù kien Alla li jistaʼ kollox. (Ara nota taʼ studju dwar Ġw 20:17.) Tumas kien semaʼ lil Ġesù jitlob lil ‘Missieru,’ u jsejjaħlu “l-​uniku Alla veru.” (Ġw 17:1-​3) Allura Tumas jistaʼ jkun li indirizza lil Ġesù bħala “Alla tiegħi” għal dawn ir-​raġunijiet: Hu qies lil Ġesù bħala li hu “alla” imma mhux Alla li jistaʼ kollox. (Ara nota taʼ studju dwar Ġw 1:1.) Jew jistaʼ jkun li indirizza lil Ġesù b’mod simili għal kif il-​qaddejja t’Alla kienu jindirizzaw lil xi anġli taʼ Ġeħova, bħalma hu miktub fl-​Iskrittura Ebrajka. Tumas aktarx li kien familjari maʼ rakkonti fejn individwi, jew xi kultant il-​kittieb stess tar-​rakkont tal-​Bibbja, kienu jkellmu lil jew jitkellmu dwar messaġġier anġeliku bħallikieku kien Alla Ġeħova nnifsu. (Qabbel Ġen 16:7-11, 13; 18:1-5, 22-33; 32:24-30; Mħ 6:11-15; 13:20-22.) Għalhekk, Tumas jistaʼ jkun li indirizza lil Ġesù bħala “Alla tiegħi” fis-​sens li għaraf lil Ġesù bħala li hu r-​rappreżentant u l-​kelliemi tal-​Alla l-​veru.

Xi wħud jargumentaw li bil-​Grieg l-​użu tal-​artiklu qabel il-​kliem “mulej” u “alla” jindika li dan il-​kliem jirreferi għall-​Alla li jistaʼ kollox. Madankollu, f’dan il-​kuntest l-​użu tal-​artiklu jistaʼ jkun sempliċiment minħabba l-​grammatika Griega. Eżempji simili fil-​Grieg fejn in-​nom bl-​artiklu jintuża biex jindirizza lil xi ħadd tistaʼ tarahom billi tikkunsidra t-​traduzzjoni litterali taʼ skritturi bħal Lq 12:32 (litteralment, il-​“merħla żgħira”) u Kol 3:18-25; 4:1 (litteralment, in-​“nisa miżżewġin”; l-​“irġiel miżżewġin”; it-​“tfal”; il-​“missirijiet”; l-​“ilsiera”; is-​“sidien”). B’mod simili, traduzzjoni litterali tal-​1Pt 3:7 tinqara: “L-​irġiel miżżewġin.” Allura l-​użu tal-​artiklu hawnhekk jistaʼ ma jkunx importanti f’li naraw x’kellu f’moħħu Tumas meta għamel din l-​istqarrija.

12-18 taʼ Novembru

TEŻORI MILL-KELMA T’ALLA | ATTI 1-3

“L-​ispirtu qaddis jiġi mferraʼ fuq il-​kongregazzjoni Kristjana”

w86 12/1 29 ¶4-5, 7

Kontribuzzjonijiet li jferrħu l-​qalb

Fl-​ewwel ġurnata tal-​kongregazzjoni Kristjana fis-​sena 33, it-​3,000 li kienu għadhom kif ikkonvertew u tgħammdu qasmu kollox bejniethom, qasmu l-​ikel, u talbu flimkien. Għal liema raġuni? Biex ikunu jistgħu jsaħħu l-​fidi ġdida tagħhom billi ‘jibqgħu jingħataw għat-​tagħlim taʼ l-​appostli.’—Atti 2:41, 42.

Il-​Lhud u l-​proseliti kienu marru Ġerusalemm bil-​pjan li joqogħdu biss għall-​Festa taʼ Pentekoste. Imma dawk li saru Kristjani xtaqu jdumu iktar u jitgħallmu iktar biex isaħħu l-​fidi ġdida tagħhom. Din f’daqqa waħda ħolqot problema biex ikollhom x’jieklu u fejn joqogħdu. Xi wħud milli kienu vvjaġġaw ma kellhomx biżżejjed flus fuqhom, filwaqt li oħrajn kellhom iżżejjed. Għalhekk, f’dak il-​perjodu nġabru xi affarijiet materjali u ġew imqassmin lil dawk fil-​bżonn.—Atti 2:43-47.

Li jbigħu l-​propjetà u li jaqsmu l-​affarijiet kollha tagħhom kienet xi ħaġa li għamluha minn jeddhom għalkollox. Ħadd ma kien obbligat li jbigħ jew jagħti donazzjoni; lanqas ma kienet xi ħaġa li tippromwovi l-​faqar. L-​idea ma kinitx biex dawk li kellhom iktar flus ibigħu l-​propjetà kollha u b’hekk isiru fqar. Minflok, peress li ħassew għal dawk li kienu jemmnu bħalhom, fiċ-​ċirkustanzi taʼ dak iż-​żmien, huma biegħu l-​propjetà u l-​qligħ kollu kkontribwewh biex jipprovdu dak li kien hemm bżonn biex javanzaw l-​interessi tas-​Saltna.—Qabbel it-​2 Korintin 8:12-​15.

Ħaffer għal ġawhar spiritwali

it-2 61 ¶1

Ġesù Kristu

“Aġent Ewlieni tal-​ħajja.” Bħala espressjoni tal-​qalb tajba taʼ Missieru, Ġesù Kristu ta l-​ħajja umana perfetta tiegħu bħala sagrifiċċju. Dan għamilha possibbli għas-​segwaċi magħżulin taʼ Kristu biex imexxu miegħu fis-​sema u għall-​bnedmin biex jgħixu fuq l-​art taħt it-​tmexxija tas-​Saltna tiegħu. (Mt 6:10; Ġw 3:16; Ef 1:7; Eb 2:5) Għalhekk, hu sar “l-​Aġent Ewlieni [“Prinċep,” KŻ] tal-​ħajja” għall-​bnedmin kollha. (At 3:15) It-​terminu Grieg li jintuża hawnhekk bażikament ifisser “mexxej ewlieni.” Kelma relatata ġiet applikata għal Mosè (At 7:27, 35) bħala “mexxej” f’Iżrael.

IRSISTI FIL-​MINISTERU

it-​1 129 ¶2-​3

Min ħa post Ġuda l-​Iskarjota bħala t-​tnax-​il appostlu?

Minħabba r-​ribelljoni taʼ Ġuda l-​Iskarjota, li miet żleali, kien baqaʼ biss 11-​il appostlu. U matul l-​40 ġurnata minn meta ġie rxoxtat Ġesù sa meta telaʼ s-​sema, hu m’għamel l-​ebda arranġament biex xi ħadd jieħu post Ġuda l-​Iskarjota. F’ċertu punt matul l-​għaxart ijiem taʼ bejn it-​tlugħ taʼ Ġesù fis-​sema u l-​ġurnata taʼ Pentekoste, kien jidher neċessarju li jintgħażel ieħor minflok Ġuda. Dan ma kienx sempliċiment għax miet, imma minflok għax irribella, bħalma juru l-​iskritturi li kkwota minnhom Pietru. (At 1:15-​22; Sa 69:25; 109:8; qabbel Ri 3:11.) Għalhekk, b’kuntrast, meta l-​appostlu leali Ġakbu nqatel, m’hemmx miktub li ppruvaw jagħmlu lil xi ħadd appostlu minfloku.—At 12:2.

Minn dak li qal Pietru hu evidenti li kwalunkwe wieħed li kkunsidraw li kellu jimla l-​pożizzjoni bħala appostlu taʼ Ġesù Kristu kellu jkollu ċerti kwalifiki. Dawn kienu: kellu jkun jafu b’mod persunali, u kellu jkun xhud tal-​għemejjel tiegħu, il-​mirakli tiegħu, u b’mod partikulari l-​irxoxt tiegħu. Meta nqisu dan il-​fatt, nistgħu naraw li iktar ma għadda żmien iktar kien ħa jsir impossibbli li xi ħadd jieħu post appostlu minn dawn it-​tnax, sakemm ma jkunx hemm xi azzjoni divina biex tipprovdi dawn il-​ħtiġijiet f’kull każ individwali. Iżda f’dak iż-​żmien partikulari qabel Pentekoste, kien hemm irġiel li kienu jilħqu dawn il-​ħtiġijiet, u tnejn minnhom kienu kkunsidrati bħala li kienu kkwalifikati biex jieħdu post iż-​żleali Ġuda. Bla dubju kellhom f’moħħhom Proverbji 16:33 meta tefgħu x-​xorti, u ntgħażel Mattija. Minn wara dan, Mattija kien “meqjus mal-​ħdax-​il appostlu.” (At 1:23-​26) Għalhekk, hu kien inkluż fost it-​“tnax” li solvew il-​problema tad-​dixxipli li kienu jitkellmu bil-​Grieg (At 6:1, 2). Ukoll milli jidher, fl-​1 Korintin 15:4-​8, Pawlu inkludih lil Mattija meta rrefera għat-​“tnax” waqt li kien qed jitkellem dwar meta deher Ġesù rxoxtat. Għalhekk, meta waslet il-​Festa taʼ Pentekoste, kien hemm 12-​il pedament t’appostli fuq xiex kien se jserraħ Iżrael spiritwali.

19-25 taʼ Novembru

TEŻORI MILL-​KELMA T’ALLA | ATTI 4-​5

“Baqgħu jitkellmu dwar il-​Kelma t’Alla bi qlubija”

it-​1 128 ¶3

Appostlu

Attività fil-​kongregazzjoni Kristjana. It-​tferrigħ tal-​ispirtu t’Alla fuq l-​appostli f’Pentekoste saħħaħhom ħafna. L-​ewwel ħames kapitli tal-​Atti tal-​Appostli jagħtu prova taʼ kemm l-​appostli ma beżgħux u wrew il-​kuraġġ f’li jiddikjaraw l-​aħbar tajba u l-​irxoxt taʼ Ġesù. Huma għamlu dan minkejja li l-​mexxejja tagħhom kienu qed jitfgħuhom il-​ħabs, isawtuhom, u jheddu li joqtluhom. Waqt l-​ewwel jiem taʼ wara Pentekoste, it-​tmexxija tal-​appostli mimlija entużjażmu, taħt il-​qawwa tal-​ispirtu qaddis, irriżultat fit-​tkabbir tal-​għaġeb tal-​kongregazzjoni Kristjana. (At 2:41; 4:4) Il-​ministeru tagħhom għall-​bidu kien f’Ġerusalemm, imma mbagħad tferrex sas-​Samarija, u maż-​żmien, mad-​dinja kollha.—At 5:42; 6:7; 8:5-17, 25; 1:8.

Ħaffer għal ġawhar spiritwali

it-1 514 ¶4

Il-​ġebla tax-​xewka

Salm 118:22 jgħid li l-​ġebla li warrbu l-​bennejja kienet se ssir “il-​ġebla tax-​xewka taʼ fuqnett” (bl-​Ebrajk, rox pinnà). Ġesù kkwota u applika din il-​profezija għalih innifsu bħala “l-​ġebla tax-​xewka ewlenija” (bil-​Grieg, kefali gonjas, il-​ġebla tax-​xewka taʼ fuq nett). (Mt 21:42; Mk 12:10, 11; Lq 20:17) Bħalma l-​ġebla taʼ fuq nett tispikka, hekk ukoll Ġesù Kristu jispikka fil-​kongregazzjoni Kristjana tal-​uħud midlukin, li hi mxebbha maʼ tempju spiritwali. Pietru applika wkoll Salm 118:22 għal Kristu, billi wera li Kristu kien “il-​ġebla” li warrbu n-​nies imma li għażel Alla biex issir “il-​ġebla tax-​xewka taʼ fuqnett.”—At 4:8-​12; ara wkoll l-​1Pt 2:4-7.