Hu “Alla li Jkabbar”!

“La min iħawwel u lanqas min isaqqi m’hu xejn, imma Alla li jkabbar.”—1 KOR. 3:7.

1. B’liema mod aħna “ħaddiema sħab m’Alla”?

“ĦADDIEMA sħab m’Alla.” Hekk iddeskrivieh l-​appostlu Pawlu l-​privileġġ li nistgħu ngawdu lkoll kemm aħna. (Aqra l-​1 Korintin 3:5-9.) Ix-​xogħol li rrefera għalih Pawlu hu dak taʼ li nagħmlu dixxipli. Hu xebbhu maż-​żrigħ u t-​tisqija taż-​żerriegħa. Jekk irridu nirnexxu f’dan ix-​xogħol vitali, għandna bżonn l-​għajnuna taʼ Ġeħova. Pawlu jfakkarna li hu “Alla li jkabbar.”

2. Il-​fatt li ‘Alla jkabbar’ għala jgħinna biex ikollna ħarsa xierqa lejn il-​ministeru tagħna?

² Dan il-​fatt li jżommna umli jgħinna biex ikollna ħarsa xierqa lejn il-​ministeru tagħna. Jistaʼ jkun li nħabirku biex nippridkaw u ngħallmu, imma fl-​aħħar mill-​aħħar it-​tifħir kollu jmur lil Ġeħova għal kwalunkwe tkabbir li jkun hemm. Għala? Għaliex nipprovaw kemm nipprovaw, ħadd minna ma jistaʼ jifhem bis-​sħiħ il-​proċess tat-​tkabbir, aħseb u ara kemm jistaʼ jikkontrollah. Is-​Sultan Salamun iddeskriva s-​sitwazzjoni sew meta kiteb: “Ma tafx l-​għemil taʼ Alla li għamel kollox.”—Koħ. 11:5.

3. Liema xebh hemm bejn ix-​xogħol taż-​żrigħ taż-​żerriegħa letterali u dak taʼ li nagħmlu dixxipli?

³ Inħossuna aħna frustrati bix-​xogħol tagħna peress li ma nifhmux kif isir il-​proċess tat-​tkabbir? Le. Minflok, ix-​xogħol jagħtina ħafna ferħ u hu interessanti. Is-​Sultan Salamun qal: “Iżraʼ fil-​għodu ż-​żerriegħa tiegħek, u tagħtix mistrieħ lil idek fil-​għaxija, għax ma tafx liema tinbet, hux din jew l-​oħra, jew jagħtux it-​tnejn frott tajjeb xorta waħda.” (Koħ. 11:6) Tabilħaqq, meta niġu biex niżirgħu żerriegħa letterali, ma nkunux nafu fejn se tinbet jew jekk tinbitx. Hemm ħafna affarijiet li m’għandniex kontroll fuqhom. Nistgħu ngħidu xi ħaġa simili dwar ix-​xogħol taʼ li nagħmlu dixxipli. Ġesù enfasizza dan il-​fatt f’żewġ tixbihat li kienu mniżżlin bil-​miktub għalina fir-​rabaʼ kapitlu taʼ l-​Evanġelju taʼ Marku. Ejja naraw x’nistgħu nitgħallmu minn dawn iż-​żewġ tixbihat.

Tipi Differenti taʼ Ħamrija

4, 5. Irrakkonta fil-​qosor it-​tixbiha taʼ Ġesù dwar iż-​żerriegħ li jferrex iż-​żerriegħa.

⁴ Bħalma hu mniżżel f’Marku 4:1-9, Ġesù ddeskriva żerriegħ li jitfaʼ, jew iferrex, iż-​żerriegħa li taqaʼ f’postijiet differenti: “Isimgħu. Ara! Wieħed raġel ħareġ jiżraʼ. U waqt li kien qed jiżraʼ, xi żerriegħa waqgħet fil-​ġenb tat-​triq, u ġew l-​għasafar u kiluha. U xi żerriegħa oħra waqgħet fuq il-​blat fejn, naturalment, ma tantx kellha ħamrija, u, peress li l-​ħamrija ma kinitx fonda, nibtet mill-​ewwel. Imma meta telgħet ix-​xemx, inħarqet, u, għax ma kellhiex għeruq, nixfet. U xi żerriegħa oħra waqgħet qalb ix-​xewk, u x-​xewk kiber u ħonoqha, u ma tatx frott. Imma oħrajn waqgħu f’ħamrija tajba, u, meta kibru u kotru, bdew jagħtu l-​frott, u din bdiet tagħti tletin, dik sittin u dik mija.”

⁵ Fi żminijiet Bibliċi, iż-​żrigħ taż-​żerriegħa ġeneralment kien isir billi jferrxuha. Iż-​żerriegħ kien iġorr iż-​żerriegħa f’parti mil-​libsa taʼ fuq tiegħu jew f’kontenitur u jferrixha billi jxejjer idejh ’il barra. Allura f’din it-​tixbiha, iż-​żerriegħ ma jiżrax iż-​żerriegħa minn jeddu fit-​tipi differenti taʼ ħamrija. Minflok, iż-​żerriegħa mferrxa kienet taqaʼ f’diversi postijiet.

6. Ġesù kif spjegaha t-​tixbiha taż-​żerriegħ?

⁶ M’għandniex għalfejn nipprovaw naqtgħu xi tfisser din it-​tixbiha. Ġesù ssokta jispjegaha, kif inhu mniżżel f’Marku 4:14-20: “Dak li jiżraʼ, jiżraʼ l-​kelma. Dawn, mela, huma dawk li waqgħu fil-​ġenb tat-​triq fejn tinżeraʼ l-​kelma: malli jkunu semgħuha, jiġi Satana u jieħu l-​kelma li nżergħet fihom. U bl-​istess mod dawn huma dawk li nżergħu fuq il-​blat: malli jisimgħu l-​kelma, jaċċettawha bil-​ferħ. Iżda m’għandhomx għeruq fihom infushom, imma jkomplu għal xi żmien; imbagħad malli tqum xi tribulazzjoni jew persekuzzjoni minħabba l-​kelma, jitfixklu. Jerġaʼ hemm oħrajn li jinżergħu qalb ix-​xewk; dawn huma dawk li jkunu semgħu l-​kelma, imma l-​ansjetajiet taʼ din is-​sistema, il-​qawwa qarrieqa tar-​rikkezzi, u x-​xewqa għal affarijiet oħra jidħlu fihom u joħonqu l-​kelma, u din issir bla frott. Fl-​aħħarnett, dawk li nżergħu f’ħamrija tajba huma dawk li jisimgħu l-​kelma u jilqgħuha u jagħtu l-​frott, min tletin u min sittin u min mija.”

7. X’jirrappreżentaw iż-​żerriegħa u t-​tipi differenti taʼ ħamrija?

⁷ Innota li Ġesù ma jgħidx li qed jintużaw tipi differenti taʼ żerriegħa. Minflok, hu jitkellem dwar tip wieħed taʼ żerriegħa li taqaʼ fuq tipi differenti taʼ ħamrija, u kull xorta tipproduċi riżultati differenti. L-​ewwel xorta taʼ ħamrija hi iebsa, jew imballta; it-​tieni m’hijiex fonda; it-​tielet mimlija xewk; u r-​rabaʼ hija ħamrija tajba li tipproduċi sew. (Lq. 8:8) X’inhi ż-​żerriegħa? Hija l-​messaġġ tas-​Saltna li hemm fil-​Kelma t’Alla. (Mt. 13:19) X’jirrappreżentaw it-​tipi differenti taʼ ħamrija? Nies li għandhom kundizzjonijiet tal-​qalb differenti.—Aqra Luqa 8:12, 15.

8. (a) Iż-​żerriegħ lil min jirrappreżenta? (b) In-​nies għala jwieġbu b’modi differenti għax-​xogħol taʼ l-​ippridkar tas-​Saltna?

⁸ Iż-​żerriegħ lil min jirrappreżenta? Jirrappreżenta lill-​ħaddiema sħab m’Alla, dawk li jxandru l-​aħbar tajba tas-​Saltna. Huma jħawlu u jsaqqu bħal Pawlu u Apollo. Imma avolja jaħdmu iebes, ir-​riżultati huma differenti. Għala? Minħabba l-​kundizzjonijiet tal-​qalb differenti taʼ dawk li jisimgħu l-​messaġġ. Fit-​tixbiha, iż-​żerriegħ ma jikkontrollax dawn ir-​riżultati. Kemm hu taʼ faraġ dan, speċjalment għal dawk minn ħutna leali li ħadmu iebes għal ħafna snin, f’xi każi għal għaxriet taʼ snin, u forsi mid-​dehra ftit kellhom suċċess!a Dan għala?

9. Kemm l-​appostlu Pawlu kif ukoll Ġesù liema verità taʼ faraġ enfasizzaw?

⁹ Il-​lealtà taż-​żerriegħ ma tiġix imkejla mir-​riżultati taʼ xogħlu. Pawlu rrefera għal dan meta qal: “Kull wieħed jirċievi l-​premju tiegħu skond il-​ħidma tiegħu.” (1 Kor. 3:8) Il-​premju jingħata skond il-​ħidma, mhux skond ir-​riżultati taʼ din il-​ħidma. B’mod simili, Ġesù enfasizza dan il-​punt meta d-​dixxipli tiegħu ġew lura minn vjaġġ taʼ ppridkar. Huma kienu ferħanin se jtiru minħabba li d-​demonji ntgħamlu sottomessi lejhom għax użaw isem Ġesù. Kien kemm kien eċċitanti dan, Ġesù qalilhom: “Tifirħux b’dan, li l-​ispirti jintgħamlu sottomessi lejkom, imma ifirħu għax isimkom tnaqqax fis-​smewwiet.” (Lq. 10:17-20) Anki meta żerriegħ forsi ma jarax ħafna żjieda minħabba xogħlu, ma jfissirx li kien inqas ħabrieki jew leali minn oħrajn. Fil-​maġġorparti, ir-​riżultati jiddependu mill-​kundizzjoni tal-​qalb tas-​semmiegħ. Imma fl-​aħħar mill-​aħħar, hu Alla li jkabbar!

Ir-​Responsabbiltà taʼ Dawk li Jisimgħu l-​Kelma

10. X’jiddetermina jekk individwu li jismaʼ l-​kelma jixbahx il-​ħamrija tajba jew le?

¹⁰ Xi ngħidu għal dawk li jisimgħu l-​kelma? Huwa l-​mod kif se jwieġbu determinat minn qabel? Le, m’huwiex. Jekk jixbhux il-​ħamrija tajba jew le jiddependi minnhom. Tabilħaqq, il-​kundizzjoni tal-​qalb taʼ l-​individwu tistaʼ titbiddel għat-​tajjeb jew għall-​ħażin. (Rum. 6:17) Fit-​tixbiha tiegħu, Ġesù qal li “malli [xi wħud] jisimgħu” l-​kelma, Satana jiġi u jiħodhielhom. Imma m’hemmx għalfejn jiġri hekk. F’Ġakbu 4:7, il-​Kristjani huma mħeġġin biex ‘jopponu lix-​Xitan,’ u mbagħad hu jaħrab minnhom. Ġesù jiddeskrivi lil oħrajn li għall-​ewwel jaċċettaw il-​kelma bil-​ferħ imma mbagħad jitfixklu minħabba li ‘ma jkollhomx għeruq fihom infushom.’ Imma l-​qaddejja t’Alla huma mwissijin biex ‘jagħmlu l-​għeruq u jkunu stabbiliti fuq il-​pedament,’ sabiex ikunu jistgħu jifhmu “l-​wisaʼ u t-​tul u l-​għoli u l-​fond, u [ikunu jafu] l-​imħabba tal-​Kristu li tisboq l-​għarfien.”—Efes. 3:17-19; Kol. 2:6, 7.

11. Kif jistaʼ individwu ma jħallix l-​ansjetajiet u r-​rikkezzi joħonqu l-​kelma?

¹¹ Oħrajn li semgħu l-​kelma huma deskritti bħala li jħallu “l-​ansjetajiet taʼ din is-​sistema [u] il-​qawwa qarrieqa tar-​rikkezzi” jidħlu fihom u joħonqu l-​kelma. (1 Tim. 6:9, 10) Kif jistgħu jevitawh dan? L-​appostlu Pawlu jwieġeb: “Ħa jkun il-​mod kif tgħixu ħieles mill-​imħabba għall-​flus, waqt li tkunu kuntenti b’dak li għandkom fil-​preżent. Għax hu qal: ‘Żgur ma nitilqikx u żgur ma nabbandunakx.’”—Ebr. 13:5.

12. Dawk rappreżentati mill-​ħamrija tajba għala jagħmlu ammonti differenti taʼ frott?

¹² Finalment, Ġesù jgħid li dawk miżrugħin f’ħamrija tajba “bdew jagħtu l-​frott, u din bdiet tagħti tletin, dik sittin u dik mija.” Avolja xi wħud li jwieġbu għall-​kelma għandhom kundizzjoni tajba tal-​qalb u jagħtu l-​frott, dak li jistgħu jagħmlu biex ixandru l-​aħbar tajba jvarja skond iċ-​ċirkustanzi tagħhom. Per eżempju, l-​età avanzata jew il-​mard li jdgħajjifhom jistaʼ jillimita s-​sehem taʼ xi wħud fix-​xogħol taʼ l-​ippridkar. (Qabbel Marku 12:43, 44.) Għal darb’oħra, iż-​żerriegħ jistaʼ jkollu ftit kontroll fuq dan jew xejn affattu, imma hu jifraħ meta jara li Ġeħova kabbar.—Aqra Salm 126:5, 6.

Iż-​Żerriegħ li Jorqod

13, 14. (a) Irrakkonta fil-​qosor it-​tixbiha taʼ Ġesù dwar ir-​raġel li jferrex iż-​żerriegħa. (b) Min hu rappreżentat miż-​żerriegħ, u x’inhi ż-​żerriegħa?

¹³ F’Marku 4:26-29, insibu tixbiha oħra dwar iż-​żerriegħ: “B’dan il-​mod is-​saltna t’Alla hi bħal meta raġel jixħet iż-​żerriegħa fl-​art, u jorqod bil-​lejl u jqum bi nhar, u ż-​żerriegħa tinbet u tikber, bla ma jaf kif. L-​art tagħti l-​frott minnha nfisha bil-​mod il-​mod, l-​ewwel in-​nebbieta, imbagħad is-​sbula, fl-​aħħarnett il-​qamħ mimli fis-​sbula. Imma malli jsir il-​frott ilesti l-​minġel, għax ikun wasal il-​ħsad.”

¹⁴ Min hu dan iż-​żerriegħ? Xi wħud fil-​Kristjaneżmu jemmnu li dan jirreferi għal Ġesù nnifsu. Imma kif jistaʼ jingħad li Ġesù jorqod u ma jkunx jaf kif tikber iż-​żerriegħa? Żgur li Ġesù jaf kif tikber! Minflok, dan iż-​żerriegħ, bħall-​wieħed li semmejna qabel, jirrappreżenta lil proklamaturi tas-​Saltna individwali, dawk li jiżirgħu ż-​żerriegħa tas-​Saltna bl-​attività taʼ l-​ippridkar żeluż tagħhom. Iż-​żerriegħa li jitfgħu fl-​art hija l-​kelma li jippridkaw.b

15, 16. Ġesù liema verità dwar tkabbir letterali u spiritwali semma fit-​tixbiha tiegħu dwar iż-​żerriegħ?

¹⁵ Ġesù jgħid li ż-​żerriegħ “jorqod bil-​lejl u jqum bi nhar.” Dan ma jfissirx li ż-​żerriegħ huwa traskurat. Sempliċement jiddeskrivi r-​rutina tal-​ħajja normali taʼ ħafna nies. Il-​mod kif il-​kliem huwa mpoġġi f’dan il-​vers jindika proċess kontinwu taʼ ħidma matul il-​jum u rqad bil-​lejl għal perijodu taʼ żmien. Ġesù enfasizza x’ġara matul dak iż-​żmien. “Iż-​żerriegħa tinbet u tikber,” jgħid hu. Imbagħad Ġesù jżid: “Bla ma jaf kif.” L-​enfasi hi fuq li t-​tkabbir isir ‘minnu nnifsu.’c

¹⁶ Ġesù x’punt kien qed jagħmel hawnhekk? Innota li l-​enfasi hi fuq it-​tkabbir u kif iseħħ bil-​mod il-​mod. “L-​art tagħti l-​frott minnha nfisha bil-​mod il-​mod, l-​ewwel in-​nebbieta, imbagħad is-​sbula, fl-​aħħarnett il-​qamħ mimli fis-​sbula.” (Marku 4:28) Dan it-​tkabbir iseħħ bil-​mod il-​mod u pass pass. Ma jistax jiġi sforzat jew mgħaġġel. L-​istess jistaʼ jingħad dwar it-​tkabbir spiritwali. Dan iseħħ pass pass hekk kif Ġeħova jippermetti li l-​verità tikber fil-​qalb taʼ individwu li għandu attitudni xierqa.—Atti 13:48; Ebr. 6:1.

17. Min huma dawk li jifirħu flimkien meta ż-​żerriegħa tal-​verità tagħti l-​frott?

¹⁷ Iż-​żerriegħ kif jieħu sehem fil-​ħsad “malli jsir il-​frott”? Meta Ġeħova jkabbar il-​verità tas-​Saltna fil-​qlub tad-​dixxipli ġodda, dawn eventwalment jaslu sal-​punt meta jiġu mqanqlin mill-​imħabba tagħhom għal Alla biex jiddedikaw ħajjithom lilu. Huma jissimbolizzaw id-​dedikazzjoni tagħhom bil-​magħmudija taʼ l-​ilma. L-​aħwa rġiel li jkomplu jimmaturaw ikunu jistgħu, bil-​mod il-​mod, jieħdu iktar responsabbiltà fil-​kongregazzjoni. Iż-​żerriegħ oriġinali kif ukoll proklamaturi oħrajn tas-​Saltna li forsi ma kinux involuti personalment fiż-​żrigħ jaħsdu l-​frott tas-​Saltna miż-​żerriegħa li pproduċiet dan id-​dixxiplu partikulari. (Aqra Ġwanni 4:36-38.) Tabilħaqq, “min jiżraʼ u min jaħsad jifirħu flimkien.”

Lezzjonijiet Għalina Llum

18, 19. (a) Kif inkuraġġietek personalment din ir-​reviżjoni dwar it-​tixbihat taʼ Ġesù? (b) X’se nikkunsidraw fl-​artiklu li jmiss?

¹⁸ X’tgħallimna mir-​reviżjoni tagħna dwar dawn iż-​żewġ tixbihat imniżżlin f’Marku kapitlu 4? Nistgħu naraw biċ-​ċar li għandna xogħol x’nagħmlu—iż-​żrigħ. Qatt m’għandna nħallu l-​iskużi u l-​problemi u d-​diffikultajiet li jistgħu jinqalgħu jwaqqfuna milli nagħmlu dan ix-​xogħol. (Koħ. 11:4) Iżda, fl-​istess waqt, aħna nafu li għandna privileġġ meraviljuż li nkunu magħdudin bħala ħaddiema sħab m’Alla. Ġeħova hu l-​wieħed li jkabbar spiritwalment, u jbierek l-​isforzi tagħna u taʼ dawk li jilqgħu l-​messaġġ. Aħna nirrealizzaw li ma nistgħu nisforzaw lil ħadd biex isir dixxiplu. Bl-​istess mod, m’għandniex għalfejn inħossuna skuraġġiti jew naqtgħu qalbna jekk it-​tkabbir isir bil-​mod jew jekk ma jkunx hemm tkabbir. Kemm hu taʼ faraġ li nkunu nafu li s-​suċċess tagħna jitkejjel mil-​lealtà lejn Ġeħova u mill-​privileġġ li tana biex nippridkaw “l-​aħbar tajba tas-​saltna . . . bħala xiehda lill-​ġnus kollha”!—Mt. 24:14.

¹⁹ X’għallimna iktar Ġesù dwar it-​tkabbir taʼ dixxipli ġodda u x-​xogħol tas-​Saltna? It-​tweġiba għal din il-​mistoqsija tinsab f’tixbihat oħrajn imniżżlin fir-​rakkonti taʼ l-​Evanġelju. Se nanalizzaw ftit minn dawn it-​tixbihat fl-​artiklu li jmiss.

[Noti taʼ taħt]

X’Tiftakar?

• Liema xebh hemm bejn iż-​żrigħ taʼ żerriegħa letterali u l-​ippridkar tal-​messaġġ tas-​Saltna?

• Ġeħova kif ikejjel il-​lealtà taʼ predikatur tas-​Saltna?

• Ġesù liema xebh enfasizza bejn it-​tkabbir letterali u dak spiritwali?

• “Min jiżraʼ u min jaħsad” kif “jifirħu flimkien”?

[Stampi f’paġna 13]

Ġesù għala qabbel predikatur tas-​Saltna t’Alla maʼ żerriegħ?

[Stampi f’paġna 15]

Dawk rappreżentati minn ħamrija tajba jieħdu sehem b’qalbhom kollha fl-​ippridkar tas-​Saltna skond iċ-​ċirkustanzi tagħhom

[Stampi f’paġna 16]

Hu Alla li jkompli jkabbar