Kapitlu 5

Libertà Gawduta Minn Adoraturi taʼ Jehovah

1, 2. (a) Alla x’tip taʼ libertà ta lill-​ewwel koppja umana? (b) Semmi xi wħud mil-​liġijiet li ggvernaw l-​attivitajiet tagħhom.

META Jehovah ħalaq lill-​ewwel koppja umana, huma gawdew libertà li tisboq ferm lil kwalunkwe waħda li għandhom il-​bnedmin illum. Darhom kienet Ġenna. Ebda mard ma kien iħassar it-​tgawdija tagħhom tal-​ħajja. Il-​mewt ma kenitx qiegħda tistenniehom. Imma r-​rispett lejn il-​liġijiet t’Alla kien fattur importanti f’li jkomplu jkollhom libertà bħal din.

² Xi ftit minn dawk il-​liġijiet setgħu ma kinux mistqarrin bil-​kliem, imma Adam u Eva ġew magħmulin b’tali mod li kien naturali għalihom li jobduhom. B’hekk l-​aptit issinjala l-​ħtieġa li jieklu; l-​għatx, il-​ħtieġa li jixorbu. Inżul ix-​xemx inkuraġġiehom jieħdu l-​mistrieħ u l-​irqad meħtiġin. Jehovah ukoll kellimhom u tahom inkarigu taʼ xogħol. Attwalment dak l-​inkarigu kien liġi, għaliex kellu jiggverna l-​korsa t’azzjoni tagħhom. Imma x’liġi ħanina u taʼ benefiċċju kienet! Tathom xogħol li kellu jkun sodisfaċenti għalkollox, billi jagħmilha possibbli għalihom li jużaw il-​fakultajiet tagħhom bis-​sħiħ b’modi li jibnu. Kellhom iwelldu t-​tfal, jeżerċitaw dominanza fuq il-​ħajja taʼ l-​​annimali taʼ l-​art u bil-​mod il-​mod jestendu l-​fruntieri tal-​Ġenna sakemm din tiksi l-​globu. (Ġen. 1:28; 2:15) Alla ma taqqalhomx b’dettalji bla bżonn. Kellhom wisaʼ biżżejjed li ħalliethom jieħdu deċiżjonijiet. X’iktar setaʼ wieħed jitlob?

3. Adam kif setaʼ ġie mgħejjun biex juża bil-​għaqal il-​libertà tiegħu biex jieħu d-​deċiżjonijiet?

³ M’għandniex xi ngħidu, meta Adam ngħatalu l-​privileġġ li jieħu deċiżjonijiet, dak ma kienx ifisser li kull deċiżjoni li kien jieħu, tkun xi tkun, kellha tipproduċi riżultati tajbin. Il-​libertà tiegħu f’li jieħu deċiżjonijiet kienet timplika responsabbiltà. Setaʼ jitgħallem billi jagħti widen lil Missieru tas-​sema u josserva x-​xogħlijiet Tiegħu, u Alla kien ta lil Adam intelliġenza li kellha tagħmlu kapaċi japplika dak li tgħallem. Ladarba Adam ġie maħluq “fi xbiha t’Alla,” l-​inklinazzjoni naturali tiegħu kellha tkun biex hu jirrifletti kwalitajiet divini meta jieħu deċiżjonijiet. Żgur li kien ikun attent biex jagħmel dak jekk verament apprezza dak li Alla għamel għalih u jekk ried jogħġob lil Alla.​—Ġen. 1:​26, 27; qabbel Ġwann 8:29.

4. (a) Il-​kmand restrittiv mogħti lil Adam ċaħħdu mil-​libertà? (b) Għala kienet ħtieġa xierqa?

⁴ Bħala tfakkira tad-​dipendenza tal-​bniedem fuq il-​Ħallieq tiegħu u Dak li Jagħtih il-​Ħajja, Jehovah poġġa dan il-​kmand fuqu: “Minn kull siġra tal-​ġnien tistaʼ tiekol sa ma tixbaʼ. Imma inkwantu għas-​siġra taʼ l-​għarfien tat-​tajjeb u tal-​ħażin ma tridx tiekol minnha, għax fil-​jum li tiekol minnha int żgur li se tmut.” (Ġen. 2:​16, 17) Ċaħdet lill-​bniedem mil-​libertà dik il-​liġi? Ċertament li le. Adam kien liberu li jobdi jew li ma jobdix. Il-​projbizzjoni ma imponiet ebda tagħbija fuqu. Kellu abbundanza x’jiekol mingħajr ma jmiss dik l-​unika siġra. Madankollu, kien xieraq li jirrikonoxxi li l-​art li fuqha għex tappartjeni lil Alla u li, bħala l-​Ħallieq, Alla bi dritt hu l-​Ħakkiem tal-​ħolqien tiegħu.​—Salm 24:​1, 10.

5. (a) Adam u Eva kif tilfu l-​libertà glorjuża li kellhom? (b) X’ġie minflokha, u aħna kif ġejna effettwati?

⁵ Imma x’ġara? Immotivat minn ambizzjoni egoistika, anġlu qarraq b’Eva u ppoża taʼ gwida vera billi assiguraha dwar xi ħaġa kuntrarja għar-​rieda t’Alla. Minflok ma obda lil Missieru, Adam ngħaqad m’Eva u naqas bħalha. Billi ħatfu xi ħaġa li ma kenitx tappartjeni lilhom, Adam u Eva tilfu l-​libertà glorjuża li kellhom. Id-​dnub sar is-​sid tagħhom u, bħalma Alla kien wissa, il-​mewt pożittivament kienet qiegħda tistenniehom. Bħala riżultat, liema wirt għadda għal fuq nisilhom? Id-​dnub, muri f’tendenza ġewwinija lejn il-​ħażen, fi dgħjufijiet li jagħmlu lil dak li jkun suxxettibbli għall-​mard u li eventwalment jiddeterjora bix-​xjuħija. Ukoll il-​mewt. L-​inklinazzjoni lejn il-​ħażen li ntirtet, aggravata mill-​influwenza Satanika, ipproduċiet soċjetà fejn il-​ħajja saret prekarja għal kulħadd. X’kuntrast mal-​libertà li Alla kien ta lill-​umanità fil-​bidu!​—Rum. 5:12; Ġob 14:1; Riv. 12:9.

FEJN TISTAʼ TINSTAB IL-​LIBERTÀ

6. (a) Fejn tistaʼ tinstab il-​vera libertà? (b) Dwar liema tip taʼ libertà kien qiegħed jitkellem Ġesù fi Ġwann 8:​31, 32?

⁶ Meta naraw il-​kundizzjonijiet illum, m’huwiex sorprendenti li n-​nies huma mlebilbin għal libertà akbar milli għandhom. Imma fejn tistaʼ tinstab libertà vera? Ġesù Kristu qal: “Jekk tibqgħu fil-​kelma tiegħi, intom tassew dixxipli tiegħi, u se tkunu tafu l-​verità, u l-​verità se tagħmilkom liberi.” (Ġwn. 8:​31, 32) Din il-​libertà m’hijiex ix-​xorta limitata li n-​nies jittamaw għaliha meta jwarrbu xi ħakkiem politiku jew forma taʼ gvern favur ieħor. Minflok, din tinfed sal-​qalba tal-​problemi umani. Dak li Ġesù kien qiegħed jiddiskuti kien libertà mid-​dnub, mill-​jasar tad-​dnub. (Ara Ġwann 8:24; 34-36.) B’hekk jekk persuna ssir dixxiplu veru taʼ Ġesù Kristu, dan jirriżulta f’bidla notevoli f’ħajjitha, liberazzjoni.

7. (a) F’liema sens, allura, nistgħu issa nkunu liberi mid-​dnub? (b) Biex ikollna dik il-​libertà, x’irridu nagħmlu?

⁷ Dak ma jfissirx li fil-​preżent Kristjani veri m’għadhomx iħossu l-​effetti taʼ l-​inklinazzjoni ġewwinija lejn kondotta midinba. Għall-​kuntrarju, għandhom sarâr minħabba dan. (Rum. 7:​21-25) Imma jekk wieħed tassew jgħix f’armonija mat-​tagħlim taʼ Ġesù, mhux se jkun iktar irsir miżerabbli tad-​dnub. Id-​dnub mhux se jkun iktar għalih bħal re li jagħti l-​ordnijiet li hu jobdi. Mhux se jkun iktar maqbud f’mod taʼ ħajja li hija nieqsa mill-​iskop u li tħallih b’kuxjenza disturbata. Hu se jgawdi kuxjenza nadifa quddiem Alla għaliex id-​dnubiet tal-​passat ġew maħfurin fuq il-​bażi tal-​fidi tiegħu fis-​sagrifiċċju taʼ Kristu. Inklinazzjonijiet midinbin jistgħu jipprovaw jiġġustifikaw lilhom infushom, imma meta jirrifjuta li jaġixxi fuqhom għaliex iġib quddiem għajnejh it-​tagħlim nadif taʼ Kristu, hu se juri li d-​dnub m’huwiex is-​sid tiegħu.​—Rum. 6:​12-17.

8. (a) X’libertà iżjed tagħtina l-​vera Kristjanità? (b) Dan kif għandu jeffettwa l-​attitudni tagħna lejn il-​ħakkiema sekulari?

⁸ Bħala Kristjani aħna ngawdu libertà kbira. Ġejna lliberati mill-​effetti taʼ tagħlim falz, mill-​jasar għas-​superstizzjoni u minn servitù lejn id-​dnub. Il-​veritajiet grandjużi dwar il-​kundizzjoni tal-​mejtin u l-​irxoxt illiberawna mill-​biżaʼ bla raġuni taʼ mewt vjolenti li ġġiegħel lin-​nies jgħakksu l-​kuxjenza tagħhom. L-​għarfien li l-​gvernijiet imperfetti umani se jiġu mibdulin mis-​Saltna taʼ tjieba t’Alla jilliberana milli nkunu bla tama. Imma libertà bħal din ma tiġġustifikax li wieħed ma jagħtix kas il-​liġi jew juri nuqqas taʼ rispett lejn uffiċjali governattivi bl-​iskuża li dalwaqt is-​sistema l-​qadima se tkun telqet.​—1 Piet. 2:​16, 17; Titus 3:​1, 2.

9. (a) Jehovah kif jgħinna bl-​imħabba biex ingawdu l-​ogħla livell taʼ libertà possibbli għal bnedmin? (b) F’li nieħdu d-​deċiżjonijiet, kif nistgħu nuru li nifhmu b’mod ċar x’irriżulta mill-​fatt li Adam abbuża mil-​libertà tiegħu?

⁹ Jehovah ma jħalliniex niffiguraw b’metodi differenti liema huwa l-​aħjar mod kif ngħixu. Jaf kif aħna magħmulin, x’se jġibilna kuntentizza ġenwina u sens taʼ dinjità persunali, u x’se jkun l-​iktar taʼ benefiċċju dejjiemi għalina. Hu jaf ukoll l-​iskeda tiegħu stess sabiex iwettaq l-​iskop tiegħu u, għalhekk, l-​attivitajiet li huma taʼ l-​iktar valur li nieħdu sehem fihom. B’mod simili hu konxju tal-​ħsibijiet u l-​kondotta li jistgħu jiddegradaw persuna jew li jħassru r-​relazzjonijiet tagħha m’oħrajn, saħansitra li jċaħħduha mill-​barkiet tas-​Saltna t’Alla. B’imħabba hu jinformana dwar dawn l-​affarijiet permezz tal-​Bibbja u permezz taʼ l-​organizzazzjoni viżibbli tiegħu. (Gal. 5:​19-23; Mark 13:10; qabbel 1 Timotju 1:​12, 13.) Imbagħad ikun f’idejna, billi nużaw ir-​rieda ħielsa mogħtija minn Alla, li niddeċiedu kif se nwieġbu. Jekk niżżilna f’qalbna dak li tgħidilna l-​Bibbja rigward kif Adam tilef il-​libertà li kien mogħti lill-​bniedem fil-​bidu, aħna se nieħdu dawk id-​deċiżjonijiet bil-​għaqal. Se nuru li r-​relazzjoni tajba maʼ Jehovah hija l-​ħsieb ewlieni tagħna fil-​ħajja.

XENQA GĦAL TIP IEĦOR TAʼ LIBERTÀ

10. Għal liema tip taʼ libertà stinkaw xi wħud li stqarrew li kienu Kristjani?

¹⁰ Xi drabi xi żgħażagħ imrobbijin bħala Xhieda taʼ Jehovah, kif ukoll oħrajn li m’humiex daqstant żgħażagħ, jaslu biex iħossu li jridu tip ieħor taʼ libertà. Id-​dinja tistaʼ tidher glamoruża, u iktar ma jaħsbu dwar dan iktar issir qawwija x-​xewqa tagħhom li jagħmlu affarijiet li n-​nies tad-​dinja jagħmlu. Forsi ma jippjanawx li jitilfu moħħhom bid-​drogi, jixorbu żżejjed jew li jikkommettu l-​fornikazzjoni. Imma jibdew iqattgħu ħin wara l-​iskola jew wara x-​xogħol maʼ sħabhom tad-​dinja. M’għandniex xi ngħidu, huma jridu jkunu aċċettati minn sħabhom il-​ġodda, u għalhekk jibdew jimitaw kliemhom u l-​kondotta tagħhom.​—3 Ġwn. 11.

11. Xi drabi minfejn tiġi l-​ħajra li nagħmlu dan?

¹¹ Xi drabi l-​ħajra li tagħti ruħek għal kondotta dinjija tiġi minn persuna oħra li tistqarr li qiegħda taqdi lil Jehovah. Dak kien li ġara f’Għeden meta Satana sseduċa lil Eva, u mbagħad meta Eva ħeġġet lil Adam biex jingħaqad magħha. Kien ukoll veru fost il-​Kristjani bikrin, u l-​istess ħaġa tiġri llum. Persuni bħal dawn taʼ spiss iħobbu l-​eċċitament u jixxennqu għal affarijiet li jġibu pjaċir intens. Iħeġġu lil oħrajn biex “jieħdu ftit pjaċir.” ‘Iwiegħdu l-​libertà, waqt li huma nfushom huma rsiera tal-​korruzzjoni.’​—2 Piet. 2:​18, 19.

12. (a) X’inhuma r-​riżultati taʼ swied il-​qalb taʼ kondotta dinjija? (b) Ladarba dawk involuti jafu l-​konsegwenzi, għala jinsistu li jagħmlu affarijiet bħal dawn?

¹² Ir-​riżultat m’huwiex pjaċevoli. Sess illeċitu jirriżulta f’taqlib emozzjonali. Dan jistaʼ wkoll iwassal għal mard, tqala mhix mixtieqa u possibilment it-​tkissir taʼ żwieġ. (Prov. 6:​32-35; 1 Kor. 6:18; 1 Tess. 4:​3-8) L-​abbuż tad-​drogi jistaʼ jipproduċi irritazzjoni, kliem imħawwad, vista mċajpra, sturdament, qtugħ taʼ nifs, alluċinazzjonijiet u mewt. (Qabbel Proverbji 23:​29-35.) Dan jistaʼ jirriżulta f’ivvizzjar, li jistaʼ jwassal għal kriminalità sabiex wieħed imantni dan il-​vizzju. Dawk li jiġu involuti f’kondotta bħal din ġeneralment jafu x’jistaʼ jkun ir-​riżultat minn dan. Imma x-​xenqa tagħhom għal eċċitament u pjaċir senswali ġġegħilhom jagħlqu moħħhom għall-​konsegwenzi. Jgħidu lilhom infushom li din hija libertà, imma mbagħad isiru jafu, tard wisq, li huma rsiera tad-​dnub, u x’sid kattiv huwa d-​dnub! Li nirraġunaw fuq din il-​kwistjoni issa jistaʼ jgħin biex niġu ssalvagwardjati kontra esperjenza bħal din.​—Gal. 6:​7, 8.

FEJN JIBDEW IL-​PROBLEMI

13. (a) Taʼ spiss kif jiġu mqanqlin ix-​xewqat li jwasslu għal dawn il-​problemi? (b) Biex nifhmu x’inhuma “sħubijiet ħżiena,” l-​opinjoni taʼ min għandna bżonn? (ċ) Waqt li twieġeb il-​mistoqsijiet fl-​aħħar tal-​paragrafu, enfasizza l-​opinjoni taʼ Jehovah. Ikkummenta fuq biss mistoqsija waħda wara l-​oħra.

¹³ Ieqaf u aħseb dwar minfejn taʼ spiss jibdew dawk il-​problemi. Il-​Bibbja tispjega: “Kull wieħed hu pprovat billi jkun miġbud u mħajjar mix-​xewqa tiegħu stess. Imbagħad ix-​xewqa, meta tkun saret fertili, twelled id-​dnub; imbagħad, id-​dnub, meta jkun ġie mwettaq, iġib il-​mewt.” (Ġak. 1:​14, 15) Imma dawk ix-​xewqat kif jiġu mqanqlin? B’dak li jidħol fil-​​moħħ, u taʼ spiss dan huwa r-​riżultat taʼ sħubija maʼ nies li ma japplikawx il-​prinċipji tal-​Bibbja. M’għandniex xi ngħidu, ilkoll nafu li għandna nevitaw “sħubijiet ħżiena.” Imma l-​mistoqsija hija, liema sħubijiet huma ħżiena? Jehovah kif iħares lejn il-​kwistjoni? Li nirraġunaw fuq il-​mistoqsijiet u l-​iskritturi li ġejjin għandu jgħinna naslu għal konklużjonijiet xierqa.

Ifisser il-​fatt li ċerti nies jidhru li huma onorabbli li se jkunu nies tajbin biex wieħed jassoċja magħhom? (Qabbel Ġenesi 34:​1, 2, 18, 19.)

Tistaʼ l-​konversazzjoni tagħhom, forsi ċ-​ċajt tagħhom, tindika jekk jixirqilniex li nżommu kumpanija fil-​qrib magħhom? (Ef. 5:​3, 4)

Hemm xi raġuni għala għandna nkunu kkonċernati jekk huma ma jinzertawx li jemmnu l-​istess affarijiet bħalna rigward l-​iskop t’Alla? (Qabbel 1 Korintin 15:​12, 32, 33.)

Kif se jħossu Jehovah jekk nagħżlu sħubija maʼ nies li ma jħobbuhx? (Qabbel 2 Kronaki 19:​1, 2.)

Għalkemm nistgħu naħdmu maʼ nies m’humiex kredenti jew immorru l-​iskola magħhom, kif nistgħu nuru li ma nagħżluhomx bħala nies li nissieħbu magħhom? (1 Piet. 4:​3, 4)

Li naraw it-​televixin u naqraw kotba, rivisti u gazzetti huma wkoll modi taʼ sħubija m’oħrajn. Kontra liema tip taʼ materjal minn dawn is-​sorsi hemm bżonn speċjali li noqogħdu għassa f’dawn iż-​żminijiet? (Prov. 3:31; Isa. 8:19; Ef. 4:​17-19)

L-​għażla tagħna taʼ dawk li nassoċjaw magħhom x’tgħidlu lil Jehovah dwar it-​tip taʼ persuni li aħna? (Salm 26:​1, 4, 5; 97:10)

14. Liema libertà glorjuża tistenna lil dawk li issa b’fedeltà japplikaw il-​pariri tal-​Kelma t’Alla?

¹⁴ Immedjatament quddiemna hemm l-​Ordni l-​Ġdid t’Alla. Permezz tas-​Saltna Tiegħu l-​umanità se tiġi lliberata mill-​influwenza li tjassar taʼ Satana u mis-​sistema t’affarijiet mill-​agħar kollha kemm hi. Bil-​mod il-​mod l-​effetti kollha tad-​dnub se jitneħħew mill-​umanità. Il-​ħajja eterna fil-​Ġenna se tkun quddiemhom. Il-​libertà li hija f’armonija sħiħa maʼ “l-​ispirtu taʼ Jehovah” eventwalment se titgawda mill-​ħolqien kollu. (2 Kor. 3:17) Jagħmel sens li tipperikola li titlef dak kollu għaliex issa ma tiħux bis-​serjetà l-​parir tal-​Kelma t’Alla? Bil-​mod li neżerċitaw il-​libertà Kristjana tagħna llum jalla nuru b’mod ċar li dak li tassew nixtiequ huwa “l-​libertà glorjuża tat-​tfal t’Alla.”​—Rum. 8:21.

Diskussjoni Bħala Reviżjoni

● Liema tip taʼ libertà kienu jgawdu l-​ewwel koppja umana? Dan kif jitqabbel maʼ dak li l-​umanità qiegħda tesperjenza issa?

● F’kuntrast mad-​dinja, liema libertà għandhom il-​veri Kristjani? Dan kif inhu possibbli?

● Liema prezz jitħallas minn dawk li jfittxu t-​tip taʼ libertà li għandha d-​dinja?

● Għala huwa tant importanti li nevitaw “sħubijiet ħżiena”? Kuntrarju għal Adam, id-​deċiżjonijiet taʼ min inkwantu għal x’inhu ħażin naċċettaw aħna?