Kif Iħares il-​Kristjan Lejn l-​Awtoritajiet Superjuri

“Ħa tkun kull ruħ sottomessa lejn l-​awtoritajiet superjuri, għax ma hemm l-​ebda awtorità ħlief permezz t’Alla; l-​awtoritajiet eżistenti qegħdin fil-​pożizzjoni relattiva tagħhom permezz t’Alla.”—RUMANI 13:1.

1, 2. (a) Pawlu għala kien priġunier f’Ruma? (b) X’mistoqsijiet iqumu bl-​appell taʼ Pawlu lil Ċesri?

L-​APPOSTLU Pawlu kiteb il-​kliem taʼ hawn fuq lir-​Rumani madwar is-​sena 56 E.K. Ftit snin wara, hu sab ruħu f’Ruma bħala priġunier. Għala? Hu kien ġie attakkat minn marmalja f’Ġerusalemm u salvat minn suldati Rumani. Meħud f’Ċesarija, hu ffaċċja akkużi foloz, imma hu b’ħila ddefenda lilu nnifsu quddiem Feliċ, il-​gvernatur Ruman. Feliċ, billi kien qed jittama li jiġi mxaħħam, żammu l-​ħabs għal sentejn. Fl-​aħħar, Pawlu staqsa lill-​gvernatur taʼ warajh, Festus, biex il-​każ tiegħu jinstemaʼ minn Ċesri.—Atti 21:27-32; 24:1-25:12.

² Dan kien id-​dritt tiegħu bħala ċittadin Ruman. Imma kien konsistenti għal Pawlu li jappella għal dik l-​awtorità imperjali meta Ġesù kien irrefera għal Satana bħala l-​veru “ħakkiem tad-​dinja” u Pawlu nnifsu kien sejjaħ lil Satana “l-​alla taʼ din is-​sistema taʼ affarijiet”? (Ġwann 14:30; 2 Korintin 4:4) Jew kienet l-​awtorità Rumana tokkupa xi ‘pożizzjoni relattiva’ li għamilha xierqa għal Pawlu li jħares lejn dik l-​awtorità għal protezzjoni tad-​drittijiet tiegħu? Tabilħaqq, jippermettu l-​kliem taʼ qabel tal-​appostli, “irridu nobdu ’l Alla bħala ħakem iktar milli lill-​bnedmin,” ubbidjenza Kristjana lejn ħakkiema umani kull meta diżubbidjenza lejn Alla mhix involuta?—Atti 5:29.

3. Liema ħarsa matura jirrivela Pawlu, u kif inhi involuta l-​kuxjenza?

³ Pawlu jgħinna nwieġbu dawn il-​mistoqsijiet fl-​ittra tiegħu lir-​Rumani, fejn hu jirrivela ħarsa matura lejn ħakma umana. F’​Rumani 13:1-7 Pawlu jagħmel ċar il-​parti li trid tilgħab kuxjenza Kristjana f’li tibbilanċja ubbidjenza sħiħa lejn l-​Awtorità Suprema, Alla Jehovah, maʼ ubbidjenza relattiva lejn “l-​awtoritajiet superjuri.”

Nidentifikaw l-​Awtoritajiet Superjuri

4. Liema aġġustament fil-​fehma sar fl-​1962, billi jqajjem liema mistoqsijiet?

⁴ Għal xi snin, sal-​1962, ix-​Xhieda taʼ Jehovah sostnew li l-​awtoritajiet superjuri kienu Alla Jehovah u Kristu Ġesù. Madankollu, fi qbil maʼ Proverbji 4:18, id-​dawl żdied, u din il-​fehma ġiet irranġata, li tistaʼ tqajjem xi mistoqsijiet fl-​imħuħ taʼ xi wħud. Issa korretti aħna f’li ngħidu li dawn l-​awtoritajiet huma s-​slaten, il-​presidenti, il-​prim ministri, is-​sindki, il-​maġistrati, u oħrajn li għandhom qawwa sekulari u politika fid-​dinja u li aħna għandna nagħtuhom sottomissjoni b’mod relattiv?

5. Il-​kuntest taʼ Rumani 13:1 b’liema mod igħinna nidentifikaw l-​awtoritajiet superjuri, u traduzzjonijiet differenti tal-​Bibbja kif jappoġġjaw lil din l-​identifikazzoni?

⁵ Irenaeus, kittieb tat-​tieni seklu E.K., qal li skond xi wħud fi żmienu, Pawlu kien qed jitkellem f’​Rumani 13:1 “rigward qawwiet anġeliċi [jew] dwar ħakkiema inviżibbli.” Irenaeus innifsu, iżda, ħares lejn l-​awtoritajiet superjuri bħala “awtoritajiet umani attwali.” Il-​kuntest tal-​kliem taʼ Pawlu juri li Irenaeus kien korrett. Fil-​versi tal-​egħluq taʼ Rumani kapitlu 12, Pawlu jispjega kif Kristjani għandhom iġibu ruħhom quddiem “il-​bnedmin kollha,” billi jistmaw saħansitra lil ‘egħdewwa’ b’imħabba u konsiderazzjoni. (Rumani 12:17-21) B’mod ċar, l-​espressjoni “l-​bnedmin kollha” tapplika għal nies barra l-​kongregazzjoni Kristjana. Mela “l-​awtoritajiet superjuri,” li dwarhom Pawlu jissokta jiddiskuti, ukoll iridu jkunu barra l-​kongregazzjoni Kristjana. Fi qbil maʼ dan, innota kif traduzzjonijiet differenti jittraduċu l-​ewwel parti taʼ Rumani 13:1: “Kulħadd irid jobdi awtoritajiet tal-​istat” (Today’s English Version); “kulħadd għandu jissottometti lilu nnifsu lejn l-​awtoritajiet li jiggvernaw” (New International Version); “kulħadd għandu jobdi lill-​awtoritajiet ċivili.”−New Testament in Modern English taʼ Phillips.

6. Il-​kliem taʼ Pawlu dwar il-​ħlas taʼ taxxi u ħaraġ kif juri li l-​awtoritajiet superjuri jridu jkunu l-​awtoritajiet sekulari?

⁶ Pawlu jissokta jgħid li dawn l-​awtoritajiet jitolbu t-​taxxi u l-​ħaraġ. (Rumani 13:6, 7) Il-​kongregazzjoni Kristjana ma titlobx taxxi jew ħaraġ; lanqas ma jagħmlu dan Jehovah jew Ġesù jew xi “mexxejja inviżibbli” oħra. (2 Korintin 9:7) It-​taxxi jitħallsu biss lil awtoritajiet sekulari. Fi qbil maʼ dan, il-​kelmiet Griegi għal “taxxa” u “ħaraġ” użati minn Pawlu f’​Rumani 13:7 jirreferu speċifikament għal flus imħallsa lill-​Istat.a

7, 8. (a) Diversi skritturi kif jaqblu mal-​ideja li l-​Kristjani għandhom ikunu suġġetti lejn l-​awtoritajiet politiċi taʼ din id-​dinja? (b) Meta biss il-​Kristjan ma jaċċettax l-​ordnijiet tal-​“awtorità”?

⁷ Barra minn dan, l-​eżortazzjoni taʼ Pawlu biex inkunu sottomessi lejn l-​awtoritajiet superjuri hi fi qbil mal-​kmand taʼ Ġesù biex nagħtu lura “l-​affarijiet taʼ Ċesri lil Ċesri,” fejn “Ċesri” jirrappreżenta awtorità sekulari. (Mattew 22:21) Jaqbel ukoll mal-​kliem li Pawlu qal iżjed tard lil Titus: “Ibqaʼ fakkarhom biex ikunu sottomessi u jkunu ubbidjenti lejn il-​gvernijiet u l-​awtoritajiet bħala ħakkiema, biex ikunu lesti għal kull xogħol tajjeb.” (Titus 3:1) Għaldaqstant, meta l-​Kristjani jiġu ordnati mill-​gvernijiet biex jieħdu sehem f’xogħlijiet tal-​komunità, huma b’mod xieraq jaċċettaw dment li dawk ix-​xogħlijiet ma jammontawx għal sostitut b’kompromess għal xi servizz mhux skritturali jew b’xi mod ieħor jikser prinċipji Skritturali bħal dak li nsibu f’​Isaija 2:4.

⁸ Pietru afferma wkoll li għandna nkunu suġġetti lejn l-​awtoritajiet sekulari taʼ din id-​dinja meta qal: “Minħabba l-​Mulej issottomettu lilkom infuskom lil kull ħolqien uman: kemm jekk lil sultan bħala li hu superjuri jew lil gvernaturi bħala li huma mibgħutin minnu biex jagħtu l-​kastig lil dawk li jagħmlu l-​ħażen u biex ifaħħru lil dawk li jagħmlu t-​tajjeb.” (1 Pietru 2:13, 14) Fi qbil maʼ dan, il-​Kristjani se jagħtu kas ukoll tat-​twissija taʼ Pawlu lil Timotew: “Jien għalhekk inħeġġiġkom, qabel kollox, li tħanniniet, talbiet, interċessjonijiet, offerti taʼ ħajr, isiru rigward kull xorta taʼ nies rigward slaten u dawk li qegħdin f’kariga għolja; sabiex aħna nistgħu nibqgħu ngħaddu ħajja kalma u kwieta.”b—1 Timotew 2:1, 2.

9. Għala ma jnaqqasx mill-​glorja taʼJehovah jekk tirreferi għal awtoritajiet umani bħala “superjuri”?

⁹ F’li nsejħu lill-​awtoritajiet sekulari “superjuri,” aħna qegħdin b’xi mod innaqqsu mill-​unur dovut lil Jehovah? Le, għaliex Jehovah hu bil-​wisq iżjed minn sempliċi superjuri. Huwa “l-​Mulej Sovran,” “il-​Wieħed Suprem.” (Salm 73:28; Danjel 7:18, 22, 25, 27; Rivelazzjoni 4:11; 6:10) Bl-​ebda mod sottomissjoni xierqa lejn awtoritajiet umani ma tnaqqas mill-​qima tagħna lill-​Awtorità Suprema, il-​Mulej Sovran Jehovah. Sa liema punt, mela, huma dawn l-​awtoritajiet superjuri? Sempliċement rigward bnedmin oħra u fil-​qasam taʼ attività tagħhom stess. Huma responsabbli li jiggvernaw u jipproteġu komunitajiet umani, u għal dan huma jagħmlu regolamenti dwar il-​kondotta taʼ affarijiet pubbliċi.

“Qegħdin Hemm fil-​Pożizzjonijiet Relattivi Tagħhom Permezz t’Alla”

10. (a) L-​istqarrija taʼ Pawlu dwar it-​‘tqegħid’ tal-​awtoritajiet superjuri taʼ liema ħaġa jagħti prova dwar l-​awtorità nfisha taʼ Jehovah? (b) X’ippermetta Jehovah rigward it-​‘tqegħid’ taʼ ċerti ħakkiema, u l-​qaddejja tiegħu kif jiġu b’hekk ippruvati?

¹⁰ Is-​supremazija taʼ Alla Jehovah fuq saħansitra l-​awtoritajiet sekulari tidher f’li dawn l-​awtoritajiet “qegħdin hemm fil-​pożizzjonijiet relattivi tagħhom permezz t’Alla.” Madankollu, din l-​istqarrija tqajjem mistoqsija. Xi snin wara li Pawlu kiteb dawn il-​kelmiet, l-​imperatur Ruman Neruni organizza kampanja taʼ persekuzzjoni feroċi kontra l-​Kristjani. Kien Alla li personalment poġġa lil Neruni fil-​pożizzjoni tiegħu? ’Il bogħod minn dan! Mhux li kull mexxej individwali hu magħżul minn Alla u mqiegħed fil-​pożizzjoni ‘bil-​grazzja t’Alla.’ Minflok, Satana xi drabi jimmanuvra biex bnedmin bla qalb jieħdu pożizzjoni bħala mexxejja, u Jehovah jippermetti dan, flimkien mal-​provi li mexxejja bħal dawn iġibu fuq il-​qaddejja tiegħu li jżommu l-​integrità.—Qabbel Ġob 2:2-10.

11, 12. X’każi hemm iniżżlin fejn Jehovah personalment immanuvra l-​awtoritajiet sekulari f’posthom u barra minn posthom?

¹¹ Madankollu, Jehovah ġieli ndaħal personalment fil-​każ taʼ ċerti mexxejja jew gvernijiet sabiex jaqdi l-​għan għoli tiegħu. Per eżempju, fi żmien Abraham il-​Kangħaniti tħallew jibqgħu fl-​art taʼ Kangħan. Iktar tard, iżda, Jehovah qalagħhom minn posthom u ta l-​art liż-​żerriegħa taʼ Abraham. Matul il-​qagħda tal-​Iżraeliti fid-​deżert, Jehovah ma ħallihomx jegħlbu lil Ammon, Moab, u l-​Muntanja Sejir. Imma hu ordnalhom biex jeqirdu s-​saltniet taʼ Siħon u Og.—Ġenesi 15:18-21; 24:37; Eżodu 34:11; Dewteronomju 2:4, 5, 9, 19, 24; 3:1, 2.

¹² Wara li Iżrael issetilja f’Kangħan, Jehovah baqaʼ jieħu interess dirett fl-​awtoritajiet li kienu jeffettwaw lill-​poplu tiegħu. Xi drabi, meta Iżrael kien jidneb, Jehovah ħalliehom jaqgħu taħt awtorità pagana. Meta kienu jindmu, hu kien ineħħi dik l-​awtorità mill-​art. (Imħallfin 2:11-23) Eventwalment, hu ħalla lil Ġuda, flimkien maʼ ħafna ġnus oħra, biex jaqgħu taħt il-​kontroll taʼ Babilonja. (Isaija 14:28-19:17; 23:1-12; 39:5-7) Wara li Iżrael waqaʼ fl-​eżilju fil-​Bablionja, Jehovah bassar it-​tlugħ u l-​waqgħa taʼ qawwiet dinjin li kienu se jeffettwaw lill-​poplu tiegħu miż-​żmien taʼ Babilonja sa żmienna stess.—Danjel, kapitli 2, 7, 8 u 11.

13. (a) Skond il-​għanja taʼ Mosè, Jehovah għala ddikjara l-​fruntieri tal-​popli? (b) Alla għala iktar tard irrestawra lil Iżrael f’artu?

¹³ Mosè kanta dwar Jehovah: “Meta l-​Iktar Għoli ta wirt lill-​ġnus, meta fired lil ulied Adam minn xulxin, hu ssokta jagħmel il-​fruntieri għall-​popli rigward il-​għadd taʼ wlied Iżrael. Għax sehem Jehovah hu l-​poplu tiegħu; Ġakobb huwa s-​sehem li hu jiret.” (Dewteronomju 32:8, 9; qabbel Atti 17:26.) Iva, sabiex iwettaq il-​għanijiet tiegħu, Alla hemm iddikjara liema awtoritajiet kellhom jibqgħu u liema kellhom jinqerdu. B’dan il-​mod, hu ta bħala sehem lil nisel Abraham art biex jirtuha u iktar tard irrestawrahom f’dik l-​art, biex b’hekk eventwalment iż-​Żerriegħa mwiegħed setaʼ jidher hemm sewwa sew bħalma ġie pprofetizzat.—Danjel 9:25, 26; Mikea 5:2.

14. Fil-​biċċa l-​kbira, Jehovah f’liema sens ipoġġi l-​awtoritajiet umani fil-​pożizzjonijiet relattivi tagħhom?

¹⁴ Fil-​biċċa l-​kbira tal-​każi, madankollu, Jehovah ipoġġi lill-​ħakkiema fil-​pożizzjonijiet relattivi tagħhom fis-​sens li hu jħalli lill-​bnedmin jieħdu pożizzjonijiet taʼ awtorità li huma relattivi għal xulxin imma dejjem inferjuri għalih. B’hekk, meta Ġesù kien quddiem Ponzju Pilatu, hu qal lil dak il-​ħakkiem: “Ma kien ikollok assolutament ebda awtorità kontra tiegħi li kieku ma kinetx mogħtija lilek minn fuq.” (Ġwann 19:11) Dan ma kienx ifisser li Pilatu kien personalment imqiegħed f’pożizzjoni minn Alla, imma kien ifisser li l-​awtorità tiegħu taʼ ħajja jew mewt fuq Ġesù kienet biss bil-​permess t’Alla.

“L-​Alla taʼ Din is-​Sistema taʼ Affarijiet”

15. Satana b’liema mod jamministra awtorità f’din id-​dinja?

¹⁵ Xi ngħidu, iżda, dwar l-​istqarrija tal-​Bibbja li Satana hu l-​alla, jew il-​ħakkiem, taʼ din id-​dinja? (Ġwann 12:31; 2 Korintin 4:4) Xi ngħidu tabilħaqq, dwar il-​ftaħira taʼ Satana maʼ Ġesù meta hu wera lil Ġesù s-​saltniet kollha tad-​dinja u qal: “Din l-​awtorità kollha . . . kienet imgħoddija lili, u nagħtiha lil min nixtieq jien.” (Luqa 4:6) Ġesù ma kkontradixxiex il-​ftaħira taʼ Satana. U l-​kliem taʼ Satana hu fi qbil maʼ dak li Pawlu iktar tard kiteb lill-​Efesin: “Għandna sarar, mhux kontra d-​demm u l-​laħam, imma kontra l-​gvernijiet, kontra l-​awtoritajiet, kontra l-​ħakkiema tad-​dinja taʼ dan id-​dlam, kontra l-​forzi tal-​ispirti mill-​agħar fl-​imkejjen tas-​sema.” (Efesin 6:12) Barra minn hekk, il-​ktieb taʼ Rivelazzjoni jpengi lil Satana bħala dragun kbir li jagħti lil simbolu annimalesk tas-​sistema politika tad-​dinja “il-​qawwa tiegħu u t-​tron tiegħu u awtorità kbira.”—Rivelazzjoni 13:2.

16. (a) Kif jistaʼ jidher li l-​awtorità taʼ Satana hija limitata? (b) Jehovah għala jippermetti lil Satana li jkollu awtorità fost il-​bnedmin?

¹⁶ Innota, iżda, li l-​istqarrija taʼ Satana lil Ġesù, “Din l-​awtorità kollha . . . kienet imgħoddija lili,” turi li hu wkoll jeżerċita awtorità biss bil-​permess. Alla għala jagħti dan il-​permess? Il-​karriera taʼ Satana bħala ħakkiem tad-​dinja bdiet lura f’Għeden meta hu pubblikament akkuża lil Alla li qed jigdeb u li b’mod inġust qed jeżerċita s-​sovranità Tiegħu. (Ġenesi 3:1-6) Adam u Eva segwew lil Satana u ma obdewx lil Alla Jehovah. F’dak il-​punt Jehovah setaʼ, b’ġustizzja perfetta, jagħti l-​mewt lil Satana u liż-​żewġ segwaċi ġodda tiegħu. (Ġenesi 2:16, 17) Imma l-​kliem taʼ Satana kien verament sfida persunali lil Jehovah. Mela Alla fil-​għerf tiegħu ħalla lil Satana jkompli jgħix għal xi żmien, u Adam u Eva tħallew jimmultiplikaw ulied qabel ma mietu. B’dan il-​mod, Alla pprovda żmien u opportunità għall-​falzità tal-​isfida taʼ Satana biex tintwera.—Ġenesi 3:15-19.

17, 18. (a) Għala nistgħu ngħidu li Satana hu l-​alla taʼ din id-​dinja? (b) B’liema mod “m’hemm l-​ebda awtorità” f’din id-​dinja “ħlief permezz t’Alla”?

¹⁷ Ġrajjiet minn Għeden ’il hawn urew li l-​akkużi taʼ Satana kienu gideb sfaċċat. Id-​dixxendenti taʼ Adam ma sabux kuntentizza la taħt il-​ħakma taʼ Satana u lanqas taħt dik tal-​bniedem. (Ekkleżjasti 8:9) Mill-​banda l-​oħra, il-​mod kif Alla tratta mal-​poplu tiegħu stess wera s-​superjorità taʼ ħakma divina. (Isaija 33:22) Imma ladarba l-​biċċa l-​kbira min-​nisel taʼ Adam ma jaċċettawx is-​sovranità taʼ Jehovah, kemm jekk din jafu dwarha jew għax ma jafux, huma jaqdu lil Satana bħala l-​alla tagħhom.—Salm 14:1; 1 Ġwann 5:19.

¹⁸ Dalwaqt, il-​kwistjonijiet imqajmin f’Għeden se jiġu solvuti. Is-​Saltna t’Alla se tieħu f’idejha għalkollox l-​amministrar tal-​affarijiet umani, u Satana se jintefaʼ fl-​abbiss. (Isaija 11:1-5; Rivelazzjoni 20:1-6) Sadattant, iżda, xi xorta taʼ arranġament, jew struttura, kien neċessarju fost il-​bnedmin sabiex setgħet tkun possibbli ħajja taʼ ordni. Jehovah hu “Alla, mhux tad-​diżordni, imma tal-​paċi.” (1 Korintin 14:33) Għaldaqstant, hu ppermetta strutturi taʼ awtorità li jibdew jeżistu fil-​komunitajiet li żviluppaw barra minn Għeden, u hu ppermetta lil bnedmin li jeżerċitaw awtorità f’dan l-​arranġament. B’dan il-​mod “ma hemm l-​ebda awtorità ħlief permezz t’Alla.”

Awtoritajiet Ġusti

19. Huwa kull ħakkiem uman taħt il-​kontroll dirett taʼ Satana?

¹⁹ Minn Għeden ’il hawn, Satana gawda libertà sħiħa fost il-​bnedmin, u hu uża din il-​libertà biex jimmanuvra ġrajjiet fuq l-​art, fi qbil mal-​ftaħira tiegħu maʼ Ġesù. (Ġob 1:7; Mattew 4:1-10) Dan ma jfissirx, madankollu, li kull ħakkiem f’din id-​dinja jissottometti direttament għall-​kontroll taʼ Satana. Xi wħud—bħal Neruni fl-​ewwel seklu u Adolf Hitler fis-​seklu tagħna—urew spirtu verament sataniku. Imma oħrajn le. Serġjus Pawlus, il-​prokonslu taʼ Ċipru, kien “raġel intelliġenti” li “fittex li jismaʼ l-​kelma t’Alla.” (Atti 13:7) Galljo, il-​prokonslu tal-​Akaja, irrifjuta li jċedi għall-​pressjoni mil-​Lhud li akkużaw lil Pawlu. (Atti 18:12-17) Ħafna ħakkiema oħra eżerċitaw b’mod onorabbli l-​awtorità tagħhom kuxjenzjożament.—Qabbel Rumani 2:15

20, 21. Liema ġrajjiet fis-​seklu 20 juru li ħakkiema umani mhux dejjem jagħmlu r-​rieda taʼ Satana?

²⁰ Il-​ktieb taʼ Rivelazzjoni bassar li matul “jum il-​Mulej,” li beda fl-​1914, Jehovah kien saħansitra se jimmanuvra awtoritajiet umani biex imorru kontra l-​għanijiet taʼ Satana. Rivelazzjoni jiddeskrivi għargħar taʼ persekuzzjoni, mitfugħ minn Satana kontra l-​Kristjani midlukin, li kien se jinbalaʼ mill-​“art.” (Rivelazzjoni 1:10; 12:16) Elementi minn ġewwa “l-​art,” is-​soċjetà umana li issa teżisti fuq l-​art, kienu se jipproteġu lin-​nies taʼ Jehovah mill-​persekuzzjoni taʼ Satana.

²¹ Ġara dan attwalment? Iva. Fis-​snin tletin u fis-​snin erbgħin, per eżempju, ix-​Xhieda taʼ Jehovah fl-​Istati Uniti kienu taħt pressjoni qawwija, billi sofrew attakki minn folol taʼ nies u arresti inġusti spissi. Huma rċevew serħan meta l-​Qorti Suprema tal-​Istati Uniti għaddiet għadd taʼ deċiżjonijiet li rrikonoxxew ix-​xogħol tagħhom bħala legali. F’postijiet oħra wkoll, l-​awtoritajiet taw għajnuna lill-​poplu t’Alla. Xi 40 sena ilu fl-​Irlanda, folla taʼ Kattoliċi Rumani attakkat lil żewġ Xhieda fil-​belt taʼ Cork. Puliżija lokali ġie biex igħin lix-​Xhieda u qorti tal-​ġustizzja ddixxiplinat lill-​attakkanti. Sas-​sena l-​oħra stess fil-​Fiji, laqgħa taʼ kapijiet għoljin semgħet proposta biex tiġi mwaqqfa l-​attività tax-​Xhieda taʼ Jehovah. Kap minnhom tkellem bil-​qlubija favur ix-​Xhieda, u l-​proposta ġiet megħluba faċilment.

22. X’mistoqsijiet imiss issa li jiġu diskussi?

²² Le, l-​awtoritajiet sekulari mhux dejjem jaqdu l-​għanijiet taʼ Satana. Il-​Kristjani jistgħu jkunu suġġetti lejn l-​awtoritajiet superjuri mingħajr ma jkunu suġġetti lejn Satana nnifsu. Tabilħaqq, huma se jkunu suġġetti lejn dawn l-​awtoritajiet sakemm Alla jippermetti dawn l-​awtoritajiet li jeżistu. Xi tfisser, iżda sottomissjoni bħal din? U x’jistgħu jistennew il-​Kristjani bi tpattija mill-​awtoritajiet superjuri? Dawn il-​mistoqsijiet se jiġu diskussi fl-​artikli taʼ studju li ġejjin.

[Noti taʼ taħt]

Kif Se Twieġeb?

◻ Min huma l-​awtoritajiet superjuri?

◻ Kif nistgħu ngħidu li “ma hemm l-​ebda awtorità ħlief permezz t’Alla”?

◻ Jehovah għala jħalli d-​dinja li tkun taħt l-​awtorità taʼ Satana?

◻ Alla b’liema mod ipoġġi lill-​awtoritajiet umani “fil-​pożizzjonijiet relattivi tagħhom”?