Dan Hu Jum is-​Salvazzjoni!

“Araw, issa hu ż-​żmien tajjeb, araw, issa hu jum is-​salvazzjoni!”—2 KORINTIN 6:2.

1. X’inhu meħtieġ għal waqfa approvata m’Alla u maʼ Kristu?

JEHOVAH stabbilixxa jum taʼ ġudizzju għall-​umanità. (Atti 17:31) Jekk irriduh ikun jum taʼ salvazzjoni għalina, neħtieġu waqfa approvata miegħu u maʼ Ġesù Kristu, l-​Imħallef maħtur minnu. (Ġwann 5:22) Din il-​waqfa tirrikjedi kondotta fi qbil mal-​Kelma t’Alla u fidi li tqanqalna ngħinu lil oħrajn ħalli jkunu dixxipli veri taʼ Ġesù.

2. Id-​dinja taʼ l-​umanità għala hija mbiegħda minn Alla?

² Minħabba d-​dnub li wirtet, id-​dinja taʼ bnedmin hija mbiegħda minn Alla. (Rumani 5:12; Efesin 4:17, 18) Għalhekk, dawk li nippridkawlhom jistgħu jiksbu s-​salvazzjoni biss jekk jirrikonċiljaw ruħhom miegħu. L-​appostlu Pawlu dan għamlu ċar meta kiteb lill-​Kristjani f’Korintu. Ejjew neżaminaw it-2 Korintin 5:10–6:10 biex naraw Pawlu x’qal dwar il-​ġudizzju, ir-​rikonċiljazzjoni m’Alla, u s-​salvazzjoni.

Nibqgħu “Nipperswadu lill-​Bnedmin”

3. Pawlu kif baqaʼ ‘jipperswadi lill-​bnedmin,’ u għala għandna nagħmlu dan illum?

³ Pawlu rabat il-​ġudizzju maʼ l-​ippridkar meta kiteb: “Jeħtieġ li lkoll kemm aħna nidhru quddiem it-​tribunal taʼ Kristu, ħalli kulħadd jieħu skond it-​tajjeb jew il-​ħażin li jkun għamel meta kien għadu ħaj fil-​ġisem. Aħna li nafu x’jiġifieri l-​biżaʼ tal-​Mulej, nipperswadu lill-​bnedmin għal magħna.” (2 Korintin 5:10, 11) L-​appostlu baqaʼ ‘jipperswadi lill-​bnedmin’ billi ppriedka l-​aħbar tajba. Xi ngħidu għalina? Ladarba qed niffaċċjaw it-​tmiem taʼ dis-sistema t’affarijiet mill-​agħar, għandna nagħmlu l-​almu tagħna kollu biex nipperswadu lil oħrajn ħalli jieħdu l-​passi meħtiġin biex jiksbu ġudizzju favorevoli mingħand Ġesù u jaqilgħu l-​approvazzjoni tas-​Sors tas-​salvazzjoni, Alla Jehovah.

4, 5. (a) Għala m’għandniex niftaħru dwar dak li nwettqu fis-​servizz taʼ Jehovah? (b) Kif kien li Pawlu ftaħar “għal Alla”?

⁴ Madankollu, jekk Alla bierek il-​ministeru tagħna, m’għandniex niftaħru. F’Korintu xi wħud kienu minfuħin bil-​kburija bihom infushom jew bi bnedmin oħrajn, u b’hekk ġabu firdiet fil-​kongregazzjoni. (1 Korintin 1:10-13; 3:3, 4) Waqt li alluda għal din is-​sitwazzjoni, Pawlu kiteb: “M’aħniex nerġgħu nirrikkmandaw ruħna lilkom, imma qegħdin nagħtukom raġun tiftaħru bina, biex ikollkom xi twieġbu lil dawk kollhom ftaħir fil-​wiċċ minn barra, imma mhux mill-​qalb. Jekk aħna boloh, aħna boloh għal Alla; jekk aħna f’sensina, aħna f’sensina għalikom.” (2 Korintin 5:12, 13) Il-​kburin ma kienx jimpurtahom mill-​unità u l-​benesseri spiritwali tal-​kongregazzjoni. Huma riedu jiftaħru bl-​apparenzi taʼ barra minflok ma jgħinu lil sħabhom fit-​twemmin jiżviluppaw qlub twajbin quddiem Alla. Għaldaqstant, Pawlu widdeb lill-​kongregazzjoni u iktar tard qal: “Min irid jiftaħar, ħa jiftaħar fil-​Mulej.”—2 Korintin 10:17.

⁵ Pawlu nnifsu ma ftaħarx ukoll? Xi wħud setgħu ħasbu hekk minħabba dak li qal dwar l-​appostolat tiegħu. Imma hu kellu jiftaħar “għal Alla.” Ftaħar dwar il-​kredenzjali tiegħu bħala appostlu, sabiex il-​Korintin ma jintilfulux lil Jehovah. Pawlu għamel dan biex iġibhom lura lejn Alla għaliex appostli foloz kienu qegħdin idawruhom lejn id-​direzzjoni l-​ħażina. (2 Korintin 11:16-21; 12:11, 12, 19-21; 13:10) Iżda Pawlu ma kienx joqgħod jipprova jimpressjona kontinwament lil kulħadd b’dak li jwettaq.—Proverbji 21:4.

Iġġagħlek l-​Imħabba taʼ Kristu?

6. Kif għandha teffettwana l-​imħabba taʼ Kristu?

⁶ Bħala appostlu veru, Pawlu għallem lil oħrajn dwar is-​sagrifiċċju bħala rahan taʼ Ġesù. Dan kellu impatt fuq il-​ħajja taʼ Pawlu, għax kiteb: “L-​imħabba taʼ Kristu ġġegħelna naħsbu dan; li wieħed miet għal kulħadd, mela kulħadd miet. U miet għal kulħadd biex dawk li jgħixu ma jgħixux għalihom infushom, imma għal dak li miet u rxoxta għalihom.” (2 Korintin 5:14, 15) X’imħabba wera Ġesù meta ta ħajtu għalina! Ċertament din għandha tkun forza f’ħajjitna li tqanqalna. Gratitudni għal Ġesù talli ta ħajtu għalina għandha tqanqalna għal attività żeluża fl-​ipproklamar taʼ l-​aħbar tajba tas-​salvazzjoni pprovduta minn Jehovah permezz taʼ Ibnu l-​maħbub. (Ġwann 3:16; qabbel Salm 96:2.) Qiegħda “l-​imħabba taʼ Kristu” ġġagħlek tieħu sehem żeluż fix-​xogħol taʼ l-​ippridkar tas-​Saltna u t-​trawwim taʼ dixxipli?—Mattew 28:19, 20.

7. X’ifisser li “ma nagħrfu lil ħadd skond il-​ġisem”?

⁷ Billi jużaw il-​ħajjiet tagħhom b’mod li juri gratitudni għal dak li Kristu għamel għalihom, il-​midlukin ‘ma jgħixux iktar għalihom infushom, imma għalih.’ “Għalhekk,” qal Pawlu, “aħna ma nagħrfu lil ħadd skond il-​ġisem. Jekk għarafna lil Kristu skond il-​ġisem, issa ma nagħrfuhx aktar hekk.” (2 Korintin 5:16) Il-​Kristjani m’għandhomx iħarsu lejn in-​nies b’mod fiżiku, forsi billi jiffavorixxu lil-​Lhud iktar mill-​Ġentili jew lill-​għonja iktar mill-​foqra. Il-​midlukin ‘ma jagħrfu lil ħadd skond il-​ġisem,’ għaliex l-​importanti hija r-​relazzjoni spiritwali tagħhom maʼ dawk taʼ l-​istess twemmin tagħhom. Dawk li ‘għarfu lil Kristu skond il-​ġisem’ ma kinux biss dawk in-​nies li raw lil Ġesù waqt li kien fuq l-​art. Anki jekk xi wħud li kienu jittamaw fil-​Messija darba ħarsu lejn Kristu bħala sempliċi bniedem, dawn ma kellhomx jibqgħu jagħmlu dan. Hu ta ġismu bħala rahan u ġie rxoxtat bħala spirtu li jagħti l-​ħajja. Oħrajn li jitqajmu għall-​ħajja fis-​sema kienu se jċedu l-​ġisem fiżiku tagħhom mingħajr qatt ma jkunu raw lil Ġesù Kristu bħala bniedem.—1 Korintin 15:45, 50; 2 Korintin 5:1-5.

8. Xi individwi kif ‘ngħaqdu maʼ Kristu’?

⁸ Waqt li jkompli jindirizza lill-​midlukin, Pawlu jżid: “Meta wieħed jingħaqad maʼ Kristu, isir ħolqien ġdid; il-​qadim għadda u daħal il-​ġdid.” (2 Korintin 5:17) Li “wieħed jingħaqad maʼ Kristu” jfisser li hu jgawdi unità miegħu. (Ġwann 17:21) Din ir-​relazzjoni bdiet teżisti għal dan l-​individwu meta Jehovah ressqu lejn Ibnu u nisslu bl-​ispirtu qaddis. Bħala iben t’Alla mnissel bl-​ispirtu, hu kien “ħolqien ġdid” bil-​prospett li jieħu sehem maʼ Kristu fis-​Saltna tas-​sema. (Ġwann 3:3-8; 6:44; Galatin 4:6, 7) Dawn il-​Kristjani midlukin ngħataw privileġġ grandjuż taʼ servizz.

“Ħallu lil Alla Jħabbibkom Miegħu”

9. X’għamel Alla biex jagħmel possibbli r-​rikonċiljazzjoni miegħu?

⁹ Jehovah kemm iffavorixxa lill-​“ħolqien ġdid”! Pawlu jgħid: “Kollox ġej minn Alla li ħabbibna miegħu nnifsu permezz taʼ Kristu u tana l-​ministeru taʼ din il-​ħbiberija tal-​bnedmin maʼ Alla. Alla kien li ħabbeb il-​ħolqien miegħu nnifsu permezz taʼ Kristu, bla ma qagħad iżomm il-​kont taʼ dnubiethom, u fdalna l-​ministeru taʼ din il-​ħbiberija.” (2 Korintin 5:18, 19) L-​umanità ilha mbiegħda minn Alla minn mindu Adam dineb. Imma Jehovah b’imħabba ħa l-​inizjattiva biex jiftaħ it-​triq tar-​rikonċiljazzjoni permezz tas-​sagrifiċċju taʼ Ġesù.—Rumani 5:6-12.

10. Jehovah lil min fada l-​ministeru tar-​rikonċiljazzjoni, u x’għamlu dawn biex iwettquh?

¹⁰ Jehovah fada l-​ministeru tar-​rikonċiljazzjoni lill-​midlukin, għalhekk, Pawlu setaʼ jgħid: “Aħna ambaxxaturi taʼ Kristu bħallikieku Alla stess qiegħed isejjħilkom permezz tagħna. Nitlobkom f’ġieħ Kristu, ħallu lil Alla jħabbibkom miegħu.” (2 Korintin 5:20) Fl-​antik, l-​ambaxxaturi kienu jintbagħtu prinċipalment matul perijodi taʼ ostilità biex jaraw jekk setgħux jiġu skansati l-​gwerer. (Luqa 14:31, 32) Ladarba d-​dinja midinba hija mbiegħda minn Alla, hu bagħat lill-​ambaxxaturi midlukin tiegħu biex jinformaw lin-​nies dwar it-​termini tiegħu għar-​rikonċiljazzjoni. Bħala sostituti taʼ Kristu, il-​midlukin jitolbu bil-​ħniena: “Ħallu lil Alla jħabbibkom miegħu.” Din it-​talba mqanqla hija tħeġġiġ mimli ħniena biex in-​nies ifittxu l-​paċi m’Alla u jaċċettaw is-​salvazzjoni li hu jagħmel possibbli permezz taʼ Kristu.

11. Fl-​aħħar mill-​aħħar, min jikseb waqfa taʼ tjieba quddiem Alla, permezz tal-​fidi fir-​rahan?

¹¹ Il-​bnedmin kollha li jeżerċitaw fidi fir-​rahan jistgħu jirrikonċiljaw ruħhom m’Alla. (Ġwann 3:36) Pawlu jgħid: “Dak [Ġesù] li ma kienx jaf x’inhu dnub, Alla għamlu dnub għalina sabiex aħna n[si]ru fih ġustizzja taʼ Alla.” (2 Korintin 5:21) Il-​bniedem perfett Ġesù kien l-​offerta tad-​dnub għal dawk kollha minn nisel Adam li huma meħlusin mill-​istat midneb li wirtu. Huma jsiru l-​“ġustizzja taʼ Alla” permezz taʼ Ġesù. Din it-​tjieba, jew waqfa taʼ tjieba quddiem Alla, tiġi l-​ewwel għand il-​144,000 werriet sħab maʼ Kristu. Matul ir-​Renju tiegħu t’Elf Sena, waqfa taʼ tjieba bħala bnedmin perfetti se tiġi għand l-​ulied taʼ fuq l-​art tal-​Missier għal dejjem, Ġesù Kristu. Hu se jelevahom għal waqfa taʼ tjieba fil-​perfezzjoni sabiex ikunu jistgħu juru li huma leali lejn Alla u jirċievu l-​għotja taʼ ħajja taʼ dejjem.—Isaija 9:5 [Isaija 9:6, NW]; Apokalissi 14:1; 20:4-6, 11-15.

‘Iż-​Żmien Tajjeb’

12. Liema ministeru importanti qed jitwettaq mill-​ambaxxaturi u l-​mibgħutin speċjali taʼ Jehovah?

¹² Biex insalvaw, irridu naġixxu fi qbil mal-​kliem taʼ Pawlu: “Ladarba qegħdin naħdmu flimkien maʼ Alla, aħna mela nħeġġukom biex ma tirċevux il-​grazzja tiegħu għal xejn. Għax hu jgħid: ‘Fiż-​żmien it-​tajjeb [“żmien aċċettabbli,” NW] smajtek, f’jum is-​salvazzjoni għentek.’ Araw, issa hu ż-​żmien tajjeb, araw, issa hu jum is-​salvazzjoni!” (2 Korintin 6:1, 2) L-​ambaxxaturi midlukin taʼ Jehovah u l-​mibgħutin speċjali tiegħu, in-​“nagħaġ oħra,” ma jaċċettawx il-​qalb tajba mhix mistħoqqa taʼ Missierhom tas-​sema u jitilfu l-​iskop tagħha. (Ġwann 10:16) Bil-​kondotta retta u l-​ministeru żeluż tagħhom f’dan iż-​“żmien aċċettabbli,” huma jfittxu l-​favur t’Alla u qed jinformaw lill-​abitanti taʼ l-​art li dan hu “jum is-​salvazzjoni.”

13. X’inhu s-​sugu taʼ Isaija 49:8, u dan kif twettaq l-​ewwel darba?

¹³ Pawlu jikkwota Isaija 49:8, li jaqra: “Dan jgħid il-​Mulej: ‘Fiż-​żmien it-​tajjeb smajtek, u f’jum is-​salvazzjoni għentek. Ħaristek u għamilt minnek patt mal-​poplu, biex nerġaʼ nqajjem l-​art, u nqassam il-​wirt imħarbat.’” Din il-​profezija twettqet l-​ewwel darba meta l-​poplu taʼ Iżrael inħeles mill-​jasar f’Babilonja u iktar tard huma rritornaw lejn art twelidhom li kienet diżabitata.—Isaija 49:3, 9.

14. Isaija 49:8 kif twettaq fil-​każ taʼ Ġesù?

¹⁴ Bi twettiq ieħor tal-​profezija taʼ Isaija, Jehovah ta lill-​“qaddej” tiegħu Ġesù bħala “dawl għall-​ġnus, biex is-​salvazzjoni [t’Alla] sa truf l-​art tinfirex.” (Isaija 49:6, 8; qabbel Isaija 42:1-4, 6, 7; Mattew 12:18-21.) Iż-​“żmien it-​tajjeb,” jew iż-​“żmien aċċettabbli,” milli jidher kien japplika għal Ġesù waqt li kien fuq l-​art. Hu talab, u Alla ‘semgħu.’ Dan wera li kien “jum is-​salvazzjoni” għal Ġesù għax hu żamm l-​integrità b’mod perfett, u b’hekk “sar awtur tas-​salvazzjoni taʼ dejjem għal kull min jismaʼ minnu.”—Lhud 5:7, 9; Ġwann 12:27, 28.

15. L-​Iżraeliti spiritwali minn meta għamlu ħilithom biex juru li kienu denji tal-​qalb tajba mhix mistħoqqa t’Alla, u b’liema objettiv?

¹⁵ Pawlu japplika Isaija 49:8 għall-​Kristjani midlukin, billi jitlobhom bil-​ħniena biex ‘ma jitilfux l-​iskop tal-​qalb tajba mhix mistħoqqa t’Alla’ billi jonqsu li jfittxu r-​rieda tajba tiegħu matul iż-​“żmien aċċettabbli” u “jum is-​salvazzjoni” li hu jipprovdi. Pawlu jżid: “Araw, issa hu ż-​żmien tajjeb, araw, issa hu jum is-​salvazzjoni!” (2 Korintin 6:2) Minn Pentekoste tat-​33 E.K. ’l hawn, Iżraeliti spiritwali għamlu ħilithom biex juru li huma denji tal-​qalb tajba mhix mistħoqqa t’Alla sabiex iż-​“żmien aċċettabbli” jkun għalihom “jum is-​salvazzjoni.”

‘Nirrikkmandaw Lilna Nfusna Bħala Ministri t’Alla’

16. Pawlu taħt liema ċirkustanzi taʼ prova rrikkmanda lilu nnifsu bħala ministru t’Alla?

¹⁶ Xi rġiel imseħbin mal-​kongregazzjoni taʼ Korintu ma kinux qed juru li kienu denji tal-​qalb tajba mhix mistħoqqa t’Alla. Huma kkalunjaw lil Pawlu bl-​iskop li jkissru l-​awtorità appostolika tiegħu, għalkemm hu qagħad attent li ma jagħmel xejn “li jistaʼ jkun taʼ tfixkil.” Hu ċertament li rrikkmanda lilu nnifsu bħala ministru t’Alla “bis-​sabar kollu fit-​tiġrib, fit-​tbatija, fid-​djieqa, fis-​swat, fil-​ħabsijiet, fit-​tixwix, fit-​taħbit, fis-​sahriet bla rqad, fis-​sawm.” (2 Korintin 6:3-5) Iktar tard, Pawlu rraġuna li jekk l-​avversarji tiegħu kienu ministri, hu kien “ħafna aktar minnhom” minħabba li kien sofra iktar tfigħ fil-​ħabs, swat, perikli, u għaks.—2 Korintin 11:23-27.

17. (a) Billi nuru liema kwalitajiet nistgħu aħna nirrikkmandaw lilna nfusna bħala ministri t’Alla? (b) X’inhuma l-​“armi tal-​ġustizzja”?

¹⁷ Bħal Pawlu u sħabu, aħna nistgħu nirrikkmandaw lilna nfusna bħala ministri t’Alla. Kif? “Bis-​safa tal-​qalb,” jew il-​purità, u billi naġixxu fi qbil maʼ l-​għarfien eżatt tal-​Bibbja. Nistgħu nirrikkmandaw lilna nfusna “bis-​sabar,” billi bil-​paċenzja nissaportu l-​ħażen u l-​provokazzjoni, u “bil-​ħlewwa” waqt li nagħmlu affarijiet biex ngħinu lil oħrajn. Iktar minn hekk, nistgħu nirrikkmandaw lilna nfusna bħala ministri t’Alla billi naċċettaw gwida mill-​ispirtu tiegħu, nuru “mħabba sinċiera,” nitkellmu l-​verità, u nistrieħu fuqu għall-​qawwa biex inwettqu l-​ministeru. Taʼ interess, Pawlu ta prova wkoll tal-​pożizzjoni ministerjali tiegħu “bl-​armi tal-​ġustizzja fuq il-​lemin u fuq ix-​xellu[g].” Fil-​gwerer tal-​qedem, l-​id il-​leminija normalment kienet timmaniġġa x-​xabla fil-​waqt li x-​xellugija kienet iżżomm it-​tarka. Waqt li tqabad fil-​gwerra spiritwali kontra għalliema foloz, Pawlu ma wżax armi tal-​laħam midneb​—tgħawwiġ, qerq, ingann. (2 Korintin 6:6, 7; 11:12-14; Proverbji 3:32) Kien juża “armi,” jew mezzi taʼ tjieba, biex javanza l-​qima vera. Hekk għandna nagħmlu aħna wkoll.

18. Jekk aħna ministri t’Alla kif se nġibu ruħna?

¹⁸ Jekk aħna ministri t’Alla, se nġibu ruħna bħalma għamlu Pawlu u l-​ħaddiema sħabu. Se naġixxu bħala Kristjani kemm jekk jonorawna u kemm jekk jiddisprezzawna. Rapporti ħżiena dwarna ma jwaqqfuniex milli nippridkaw, u lanqas ma se nitkabbru jekk ifaħħruna. Se nitkellmu l-​verità u għandu mnejn jirrikonoxxuna minħabba xogħlijiet taʼ tjieba. Meta nkunu f’periklu mortali taħt l-​attakki taʼ l-​għedewwa, se nafdaw f’Jehovah. U se naċċettaw id-​dixxiplina bi gratitudni.—2 Korintin 6:8, 9.

19. Kif inhu possibbli li ‘tagħmel lil ħafna għonja’ spiritwalment?

¹⁹ Biex itemm id-​diskussjoni tiegħu dwar il-​ministeru tar-​rikonċiljazzjoni, Pawlu tkellem dwaru nnifsu u sħabu “bħala nies imdejjqa, għad li dejjem ferħana; bħala nies foqra, għad li nagħmlu għonja lil ħafna; bħala nies li ma għandhom xejn, għad li kollox huwa tagħna!” (2 Korintin 6:10) Waqt li dawk il-​ministri kellhom għalfejn ikunu mdejqin minħabba t-​tbatijiet tagħhom, huma kellhom ferħ ġewwieni. Kienu foqra materjalment, imma ‘għamlu lil ħafna għonja’ spiritwalment. Fil-​fatt, ‘kollox kien tagħhom’ għaliex il-​fidi tagħhom ġabitilhom għana spiritwali​—saħansitra l-​prospett li jsiru wlied tas-​sema t’Alla. U kellhom ħajja hienja u għanja bħala ministri Kristjani. (Atti 20:35) Bħalhom, aħna nistgħu “nagħmlu għonja lil ħafna” billi nieħdu sehem fil-​ministeru tar-​rikonċiljazzjoni issa stess​—f’dan jum is-​salvazzjoni!

Afda f’Salvazzjoni Mingħand Jehovah

20. (a) X’kienet ix-​xewqa ħerqana taʼ Pawlu, u għala ma kienx hemm żmien x’jintilef? (b) Liema ħaġa timmarka jum is-​salvazzjoni li qed ngħixu fih issa?

²⁰ Meta Pawlu kiteb it-​tieni ittra tiegħu lill-​Korintin madwar is-​sena 55 E.K., is-​sistema t’affarijiet Lhudija kien fadlilha biss xi 15-il sena. L-​appostlu xtaq b’ħeġġa kbira li kemm il-​Lhud u kemm il-​Ġentili jirrikonċiljaw ruħhom m’Alla permezz taʼ Kristu. Dak kien jum taʼ salvazzjoni u ma kienx hemm żmien x’jintilef. Ara, aħna ilna ngħixu bl-​istess mod f’konklużjoni taʼ sistema t’affarijiet mill-​1914 ’l hawn. Ix-​xogħol globali taʼ ppridkar tas-​Saltna li qed isir issa jimmarka dan iż-​żmien bħala jum is-​salvazzjoni.

21. (a) Liema skrittura tas-​sena ntgħażlet għall-​1999? (b) X’għandna nkunu qegħdin nagħmlu f’dan jum is-​salvazzjoni?

²¹ Nies mill-​ġnus kollha għandhom bżonn jisimgħu dwar il-​provvediment t’Alla għas-​salvazzjoni permezz taʼ Ġesù Kristu. M’hemmx żmien biex nitnikkru. Pawlu kiteb: “Araw, issa hu jum is-​salvazzjoni!” Dan il-​kliem tat-2 Korintin 6:2 se jkun l-​iskrittura tas-​sena tax-​Xhieda taʼ Jehovah għall-​1999. Kemm hu xieraq, għax aħna niffaċċjaw xi ħaġa ferm agħar mill-​qerda taʼ Ġerusalemm u t-​tempju tagħha! Fi ftit żmien ieħor se jasal it-​tmiem taʼ dis-sistema t’affarijiet kollha kemm hi, u dan se jinvolvi lil kulmin hawn fuq l-​art. Issa​—mhux għada—​hu ż-​żmien biex wieħed jaġixxi. Jekk nemmnu li s-​salvazzjoni tappartjeni lil Jehovah, jekk inħobbuh, u jekk ngħożżu l-​ħajja taʼ dejjem, ma nitilfux l-​iskop tal-​qalb tajba mhix mistħoqqa t’Alla. B’xewqa mill-​qalb biex nonoraw lil Jehovah, se nuru bil-​kliem u bil-​fatti li dan verament infissruh meta nesklamaw: “Araw, issa hu jum is-​salvazzjoni!”

Int Kif Twieġeb?

◻ Ir-​rikonċiljazzjoni m’Alla għala hija importanti b’mod vitali?

◻ Min huma l-​ambaxxaturi u l-​mibgħutin speċjali li qed jieħdu sehem fil-​ministeru tar-​rikonċiljazzjoni?

◻ Kif nistgħu aħna nirrikkmandaw lilna nfusna bħala ministri t’Alla?

◻ Xi tfisser għalik l-​iskrittura tas-​sena tax-​Xhieda taʼ Jehovah għall-​1999?

[Stampi f’paġna 17]

Bħal Pawlu, qiegħed int tippriedka b’mod żeluż u tgħin lil oħrajn jirrikonċiljaw ruħhom m’Alla?

L-​Istati Uniti

Franza

Kosta taʼ l-​Avorju

[Stampa f’paġna 18]

F’dan jum is-​salvazzjoni, tinsab int fost il-​qtajjiet li qed jirrikonċiljaw ruħhom m’Alla Jehovah?