Pawlu Jorganizza Ġabra taʼ Flus Bħala Għajnuna għall-​Qaddisin

L-​INTERESSI spiritwali jiġu l-​ewwel għal dawk li huma Kristjani veri. Madankollu, it-​tħassib dwar il-​bżonnijiet fiżiċi t’oħrajn huwa importanti wkoll għalihom. Huma spiss ipprovdew għal dawk li jkunu għaddejjin minn xi tbatija. L-​imħabba taʼ l-​aħwa tqanqal lill-​Kristjani biex jgħinu lil dawk li jemmnu bħalhom meta dawn ikunu fil-​bżonn.—Ġwann 13:​34, 35.

L-imħabba għal ħutu spiritwali rġiel u nisa qanqlet lil Pawlu biex jorganizza ġabra fost il-​kongregazzjonijiet f’Akaja, fil-​Galazja, fil-​Maċedonja, u fid-​distrett taʼ l-​Asja. X’ġara biex kien hemm dan il-​bżonn? Il-​programm taʼ għoti t’għajnuna kif ġie organizzat? L-​aħwa kif wieġbu? U lilna għala għandu jinteressana x’ġara?

Is-​Sitwazzjoni fil-​Kongregazzjoni taʼ Ġerusalemm

Wara Pentekoste tas-​sena 33 E.K., xi Lhud u proseliti minn pajjiżi oħra li kienu saru dixxipli f’Pentekoste baqgħu Ġerusalemm għal xi żmien biex jitgħallmu iktar dwar ir-​reliġjon vera. Fejn kien meħtieġ, oħrajn li jemmnu bħalhom għenuhom mill-​qalb biex ikunu jistgħu jifilħu għall-​piż taʼ l-​ispiża taż-​żjara tagħhom, li damet iktar milli kienu ppjanaw. (Atti 2:​6-11, 41-44; 4:​32-37) Xi taqlib ċivili setaʼ wkoll wassal għal bżonnijiet oħra hekk kif xi Lhud nazzjonalistiċi bdew iqajmu rewwixti u vjolenza fost il-​poplu. Madankollu, sabiex ħadd mis-​segwaċi taʼ Kristu ma jibqaʼ bil-​ġuħ, kien isir tqassim taʼ kuljum għar-​romol fil-​bżonn. (Atti 6:​1-6) Erodi beda jippersegwitaha bl-​ikrah lill-​kongregazzjoni, u f’nofs is-​snin 40 taʼ l-​ewwel seklu E.K. ġuħ kbir ħakem il-​Lhudija. Rigward is-​segwaċi taʼ Ġesù, dan kollu setaʼ wassal biex huma jġarrbu, kif qal Pawlu, “taqbida ħarxa,” “provi,” u ‘s-​serq taʼ ġidhom.’—Lhud 10:​32-34; Atti 11:27–12:1.

Għall-ħabta tas-​sena 49 E.K., il-​qagħda kienet għadha mwegħra. B’hekk, wara li qablu li Pawlu kellu jikkonċentra fuq il-​Ġentili fl-​ippridkar tiegħu, Pietru, Ġakbu, u Ġwanni ħeġġewh biex ‘jibqaʼ jiftakar fil-​foqra.’ U hekk ipprova jagħmel Pawlu.—Galatin 2:​7-10.

Kif Ġie Organizzat il-​Ġbir

Pawlu ħa ħsieb li jsir ġbir għall-​Kristjani foqra fil-​Lhudija. Għall-​ħabta tas-​sena 55 E.K., hu qal lill-​Korintin: “Dwar il-​ġabra għall-​qaddisin, agħmlu intom ukoll bħalma ordnajt lill-​knejjes tal-​Galazja. Kull wieħed minnkom, kull l-​ewwel tal-​ġimgħa, iwarrab xi ħaġa u jfaddalha skond ma jistaʼ . . . Meta niġi, mbagħad, jien nibgħat nies li tkunu għażiltu, b’ittri taʼ rakkomandazzjoni, biex jieħdu Ġerusalemm l-​offerti tal-​ħniena tagħkom.” (1 Korintin 16:​1-3) Sena wara Pawlu qal li l-​Maċedonja u l-​Akaja kienu qed jieħdu sehem fl-​għoti taʼ kontribuzzjonijiet. U meta l-​flus li nġabru ntbagħtu Ġerusalemm, il-​preżenza taʼ delegati mid-​distrett taʼ l-​Asja milli jidher tindika li kien hemm kongregazzjonijiet minn dawk in-​naħat ukoll li kienu kkontribwew.—Atti 20:4; 2 Korintin 8:​1-4; 9:​1, 2.

Ħadd ma ġie ssikkat biex jagħti iktar milli kien jiflaħ. Minflok, kienet kwistjoni taʼ bilanċjar b’mod li żżejjed taʼ xi wħud għamel tajjeb għan-​nuqqas t’oħrajn minn fost il-​qaddisin f’Ġerusalemm u fil-​Lhudija. (2 Korintin 8:​13-15) “Kull wieħed għandu jagħti skond ma jidhirlu hu minn rajh, mhux fuq il-​qalb jew bilfors; għax Alla jħobb lil min jagħti bil-​ferħ.”—2 Korintin 9:7.

Lill-Korintin l-​appostlu Pawlu tahom raġuni tajba għalxiex ikunu ġenerużi. Ġesù kien ‘ftaqar minħabba fihom, sabiex huma jistagħnew’ spiritwalment. (2 Korintin 8:9) Żgur li huma xtaqu jimitaw l-​ispirtu ġeneruż tiegħu. Iktar minn hekk, ladarba Alla kien għamilhom għonja biex juru “kull xorta taʼ ġenerożità,” kien xieraq li huma jgħinu biex jissupplixxu l-​ħtiġijiet tal-​qaddisin.—2 Korintin 9:​10-12.

L-​Attitudni taʼ Dawk li Ħadu Sehem

Hemm ħafna x’nitgħallmu dwar għoti volontarju jekk naħsbu ftit dwar l-​attitudni taʼ dawk li ssieħbu fil-​programm t’għajnuna għall-​qaddisin fl-​ewwel seklu. Il-​ġbir ma weriex biss it-​tħassib tagħhom għal dawk li kienu jqimu lil Jehovah bħalhom u li kienu foqra. Dan il-​ġbir ta wieħed x’jifhem li kien hemm rabta taʼ fratellanza bejn il-​Kristjani Lhud u l-​Kristjani Ġentili. Il-​fatt li ġew offruti kontribuzzjonijiet u li dawn ġew aċċettati wera l-​għaqda u l-​ħbiberija li kien hemm bejn dawn il-​Ġentili u l-​Lhud. Huma qasmu bejniethom kemm affarijiet materjali kif ukoll affarijiet spiritwali.—Rumani 15:​26, 27.

Għall-​ewwel, Pawlu forsi ma kienx stidinhom lill-​Kristjani tal-​Maċedonja biex jagħtu kontribuzzjonijiet. Wara kollox huma nfushom kienu foqra ferm. Madankollu, dawn ‘talbu b’ħeġġa kbira’ li jkollhom il-​privileġġ “li jissieħbu f’dan il-​ministeru taʼ għajnuna lill-​qaddisin.” U mhux talli hekk. Għalkemm kienu qed iġarrbu ‘prova kbira taʼ sofferenza,’ huma taw bil-​ferħ “aktar milli setgħu”! (2 Korintin 8:​1-4) Il-​prova l-​kbira tagħhom milli jidher kienet tinkludi akkużi li huma kienu qed jipprattikaw reliġjon li kienet illegali għar-​Rumani. Allura wieħed jistaʼ jifhem għala kienu jafu kif kienu qed iħossuhom ħuthom fil-​Lhudija, li kienu qed isofru minn għawġ simili.—Atti 16:​20, 21; 17:​5-9; 1 Tessalonikin 2:14.

Għalkemm Pawlu kien uża ż-​żelu li kellhom fil-​bidu l-​Korintin għall-​ġbir biex jinkuraġġixxi lil dawk tal-​Maċedonja, l-​entużjażmu f’Korintu kien batta. Issa l-​appostlu semma l-​ġenerożità taʼ dawk tal-​Maċedonja sabiex iqanqal lill-​Korintin. Ħass li kellu bżonn ifakkarhom li kien wasal il-​waqt li jtemmu dak li kienu bdew xi sena qabel. X’kien ġara?—2 Korintin 8:​10, 11; 9:1-5.

Kien Titu li beda l-​ġbir f’Korintu, imma nqalgħu ċerti problemi li x’aktarx xekklu l-​isforzi tiegħu. Wara li tkellem maʼ Pawlu fil-​Maċedonja, Titu reġaʼ lura maʼ tnejn oħra biex isaħħaħ il-​kongregazzjoni taʼ Korintu u jtemm il-​ġabra. Xi wħud forsi pprovaw jgħidu li Pawlu kien ipprova jieħu vantaġġ mill-​Korintin. Din kienet x’aktarx ir-​raġuni għala bagħat tlett irġiel biex itemmu l-​ġabra u ta rakkomandazzjonijiet għal kull wieħed minnhom. “Qegħdin attenti li ħadd ma jkollu xi jgħid fina minħabba l-​mod li bih sa nħaddmu din il-​ġabra kbira,” qal Pawlu. “Aħna nfittxu s-​sewwa mhux biss quddiem Alla iżda wkoll quddiem il-​bnedmin.”—2 Korintin 8:​6, 18-23; 12:18.

Il-​Kontribuzzjoni Titwassal

Sar-​rebbiegħa tas-​sena 56 E.K., il-​flus li nġabru kienu lesti biex jittieħdu Ġerusalemm. Pawlu kien se jmur mad-​delegazzjoni magħżula minn dawk li kienu kkontribwew. Atti 20:4 jgħid: “Marru miegħu Sopatru bin Pirru, minn Berija, Aristarku u Sekundu, it-​tnejn minn Tessalonika, Gaju minn Derbi u Timotju, u Tikiku u Trofimu, it-​tnejn mill-​Asja.” Milli jidher, fosthom kien hemm ukoll Luqa, li x’aktarx irrappreżenta lill-​Kristjani ġewwa Filippi. B’hekk, minn taʼ l-​inqas kien hemm disat irġiel li marru fuq din il-​missjoni.

“Is-​somma totali miġbura bilfors li kienet kbira mhux ħażin,” jgħid l-​istudjuż Dieter Georgi, “għaliex inkella l-​isforzi aħħarija, li kienu jinvolvu lil Pawlu u tant delegati, ma kinux ikunu vallapena meta tqis kemm kellhom spejjeż u inkwiet.” Il-​grupp serva mhux biss għas-​sigurtà imma wkoll biex jipproteġi lil Pawlu minn xi akkuża taʼ diżonestà. Dawk li ntbagħtu rrappreżentaw lill-​kongregazzjonijiet Ġentili quddiem il-​qaddisin f’Ġerusalemm.

Kieku baħħret minn Korintu għas-​Sirja, id-​delegazzjoni kienet tasal Ġerusalemm sa żmien il-​Qbiż. Madankollu, meta semgħu li kien hemm komplott biex jinqatel Pawlu, kellhom ibiddlu l-​pjanijiet. (Atti 20:3) L-​għedewwa tiegħu forsi kellhom f’moħħhom li jeħilsu minnu waqt li jkun fuq il-​baħar.

Pawlu kellu affarijiet oħra fuqiex iħabbel rasu. Qabel telaq, hu kiteb lill-​Kristjani f’Ruma biex jitolbu ħalli Alla ‘jeħilsu minn dawk fil-​Lhudija li ma jemmnux, u biex is-​servizz tiegħu jkun milqugħ tajjeb mill-​qaddisin f’Ġerusalemm.’ (Rumani 15:​30, 31) Għalkemm il-​qaddisin żgur li kienu se jilqgħu l-​kontribuzzjonijiet bi gratitudni kbira, Pawlu forsi kien imħasseb dwar l-​inkwiet li l-​wasla tiegħu setgħet iġġib fost il-​Lhud in ġenerali.

L-appostlu tabilħaqq li baqaʼ jiftakar fil-​foqra. Għalkemm l-​Iskrittura ma tgħidx sewwa sew meta twasslet il-​kontribuzzjoni, il-​wasla tagħha kompliet iżżid l-​unità u għamlitha possibbli għall-​Kristjani Ġentili li juru gratitudni lejn dawk li kienu jemmnu bħalhom ġewwa l-​Lhudija għall-​għana spiritwali li kienu rċivew mingħandhom. Id-​dehra taʼ Pawlu fit-​tempju ftit wara li wasal Ġerusalemm ħolqot rewwixta sħiħa li wasslet għall-​arrest tiegħu. Imma dan fl-​aħħar mill-​aħħar ħoloqlu opportunitajiet biex jixhed quddiem gvernaturi u slaten.—Atti 9:15; 21:​17-36; 23:11; 24:1–26:32.

Il-​Kontribuzzjonijiet Tagħna Llum

Mill-​ewwel seklu ’l hawn inbidlu ħafna affarijiet. Imma l-​prinċipji bażiċi ma nbidlux. Huwa sewwa li l-​Kristjani jkunu informati dwar bżonnijiet finanzjarji. Kull kontribuzzjoni li ssir għal min hu fil-​bżonn għandha tkun waħda volontarja, imqanqla mill-​imħabba lejn Alla u lejn il-​bnedmin sħabna.—Mark 12:​28-31.

Il-miżuri li ttieħdu għall-​għoti t’għajnuna lill-​qaddisin fl-​ewwel seklu juru li l-​amministrar taʼ kontribuzzjonijiet bħal dawn għandu jkun organizzat tajjeb u jsir għalkollox bl-​onestà. M’għandniex xi ngħidu, Alla Jehovah jaf xi bżonnijiet ikun hemm, u jipprovdi għall-​qaddejja tiegħu sabiex dawn ikunu jistgħu jkomplu jaqsmu l-​aħbar tajba tas-​Saltna m’oħrajn minkejja t-​tbatija li jkunu għaddejjin minnha. (Mattew 6:​25-34) Imma lkoll kemm aħna nistgħu nagħtu sehemna, hi x’inhi l-​qagħda ekonomika tagħna. B’dan il-​mod, ‘min għandu ħafna ma jsibx iż-​żejjed, u min għandu ftit ma jibqax bin-​nieqes.’—2 Korintin 8:15.