Sottomissjoni Mimlija Ferħ Lejn l-Awtorità
“Sirtu ubbidjenti mill-qalb.”—RUMANI 6:17.
1, 2. (a) Liema spirtu huwa evidenti fid-dinja llum, u x’inhuma s-sors tiegħu u l-effett tiegħu? (b) Il-qaddejja ddedikati taʼ Jehovah kif juru li huma differenti?
“L-ISPIRTU li issa jopera f’ulied id-diżubbidjenza” huwa evidenti b’mod li jaħsdek illum. Huwa spirtu taʼ indipendenza mhix imrażżna, li s-sors tagħha huwa Satana, “il-ħakkiem taʼ l-awtorità taʼ l-arja.” Dan l-ispirtu, din “l-arja,” jew attitudni dominanti taʼ egoiżmu u diżubbidjenza, jeżerċita “awtorità,” jew poter, fuq il-biċċa l-kbira taʼ l-umanità. Din hija raġuni waħda għala d-dinja għaddejja minn dak li ġie msejjaħ kriżi taʼ awtorità.—Efesin 2:2.
2 B’ferħ, il-qaddejja ddedikati taʼ Jehovah illum ma jimlewx il-pulmuni spiritwali tagħhom b’din l-“arja” mniġġsa, jew spirtu taʼ rvell. Huma jafu li “l-korla t’Alla ġejja fuq ulied id-diżubbidjenza.” L-appostlu Pawlu jżid: “Għalhekk tiħdux sehem magħhom.” (Efesin 5:6, 7) Minflok, il-veri Kristjani jistinkaw biex ikunu ‘mimlijin bl-ispirtu [taʼ Jehovah],’ u jixorbu “l-għerf minn fuq,” li huwa “kast, imbagħad tal-paċi, raġonevoli, lest biex jobdi.”—Efesin 5:17, 18; Ġakbu 3:17.
Sottomissjoni Volontarja Lejn Is-Sovranità Taʼ Jehovah
3. X’inhu l-muftieħ għal sottomissjoni volontarja, u l-istorja liema lezzjoni kbira tgħallimna?
3 Il-muftieħ għal sottomissjoni volontarja huwa li wieħed jirrikonoxxi l-awtorità leġittima. L-istorja tal-bniedem turi illi li wieħed jiċħad is-sovranità taʼ Jehovah ma jġibx hena. Ċaħda bħal din ma ġabitx hena lil Adam u Eva, lanqas lil dak li xewwex l-irvell tagħhom, Satana x-Xitan. (Ġenesi 3:16-19) Fil-kundizzjoni mwiegħra tiegħu fil-preżent, Satana għandu “rabja kbira” għaliex jaf li żmienu huwa qasir. (Rivelazzjoni 12:12) Il-paċi u l-hena taʼ l-umanità, iva, taʼ l-univers kollu, jiddependu fuq ir-rikonoxximent universali tas-sovranità taʼ tjieba taʼ Jehovah.—Salm 103:19-22.
4. (a) Liema xorta taʼ sottomissjoni u ubbidjenza jrid Jehovah li l-qaddejja tiegħu juru? (b) Dwar liema ħaġa għandna nkunu konvinti, u s-salmista kif jesprimi dan?
4 Madankollu, minħabba l-kwalitajiet tiegħu bbilanċjati b’mod meraviljuż, Jehovah m’huwiex sodisfatt b’ubbidjenza bierda. Hu potenti, O, iva! Imma m’huwiex tirann. Huwa Alla taʼ mħabba, u jrid li l-ħlejjaq intelliġenti tiegħu jobduh għax iridu, sforz l-imħabba. Iridhom jissottomettu ruħhom lejn is-sovranità tiegħu għaliex b’qalbhom kollha jagħżlu li jpoġġu lilhom infushom taħt l-awtorità leġittima u taʼ tjieba tiegħu, konvinti li ma jistaʼ jkun hemm xejn aħjar għalihom milli jobduh għal dejjem. Ix-xorta taʼ persuna li Jehovah irid fl-univers tiegħu għandha l-istess sentimenti tas-salmista li kiteb: “Il-liġi taʼ Jehovah hija perfetta, billi ġġib lura r-ruħ. It-tfakkira taʼ Jehovah hija taʼ min jafdaha, billi lil wieħed mingħajr esperjenza tagħmlu għaref. L-ordnijiet mingħand Jehovah huma retti, billi jġiegħlu lill-qalb tifraħ; il-kmandament taʼ Jehovah huwa nadif, billi jagħmel lill-għajnejn jiddu. Il-biżaʼ taʼ Jehovah huwa pur, billi jibqaʼ għal dejjem. Id-deċiżjonijiet ġudizzjarji taʼ Jehovah huma veri; taw prova li huma għalkollox taʼ tjieba.” (Salm 19:7-9) Fiduċja assoluta fid-dritt u fit-tjieba tas-sovranità taʼ Jehovah—din trid tkun l-attitudni tagħna jekk irridu ngħixu fid-dinja ġdida taʼ Jehovah.
Sottomissjoni Mimlija Ferħ Lejn Is-Sultan Tagħna
5. Ġesù kif kien ippremjat għall-ubbidjenza tiegħu, u aħna x’nirrikonoxxu volontarjament?
5 Kristu Ġesù nnifsu huwa eżempju eċċellenti taʼ sottomissjoni lejn Missieru tas-sema. Naqraw li “umilja lilu nnifsu u sar ubbidjenti sal-mewt, iva, mewt fuq zokk tat-tortura.” Pawlu jżid: “Għal din ir-raġuni stess ukoll Alla eżaltah għal pożizzjoni superjuri u b’qalb tajba tah l-isem li hu ’l fuq minn kull isem ieħor, biex f’isem Ġesù kull irkobba għandha tintlewa taʼ dawk fis-sema u dawk fuq l-art u dawk taħt l-art, u kull ilsien għandu jirrikonoxxi fil-beraħ li Ġesù Kristu huwa Mulej għall-glorja t’Alla l-Missier.” (Filippin 2:8-11) Iva, aħna mimlijin ferħ nilwu l-irkobba quddiem il-Mexxej tagħna u Sultan renjanti, Kristu Ġesù.—Mattew 23:10.
6. Ġesù kif ta prova li hu xhud u mexxej għal gruppi nazzjonali, u “l-ħakma taʼ prinċep” tiegħu kif se tkompli wara t-tribulazzjoni l-kbira?
6 Dwar Kristu bħala l-Mexxej tagħna, Jehovah ipprofetizza: “Ħares! Bħala xhud għall-gruppi nazzjonali tajtu, bħala mexxej u kmandant għall-gruppi nazzjonali.” (Isaija 55:4) Permezz tal-ministeru tiegħu fuq l-art u permezz taʼ li jidderieġi x-xogħol taʼ l-ippridkar mis-sema wara l-mewt u l-irxoxt tiegħu, Ġesù wera li hu nnifsu hu “xhud fidil u veru” taʼ Missieru lejn popli tal-ġnus kollha. (Rivelazzjoni 3:14; Mattew 28:18-20) Gruppi nazzjonali bħal dawn huma issa rrappreżentati f’numri li dejjem jiżdiedu mill-“folla kbira,” li se jibqgħu ħajjin wara t-“tribulazzjoni l-kbira” taħt it-tmexxija taʼ Kristu. (Rivelazzjoni 7:9, 14) Imma t-tmexxija taʼ Ġesù ma tintemmx hemm. Il-“ħakma taʼ prinċep” tiegħu se ddum għal elf sena. Għal bnedmin ubbidjenti, hu se jwettaq l-isem tiegħu taʼ “Wieħed taʼ l-Għaġeb li Jagħti Pariri, Alla Setgħan, Missier Etern, Prinċep tal-Paċi.”—Isaija 9:6, 7; Rivelazzjoni 20:6.
7. Jekk nixtiequ li Kristu Ġesù jmexxina lejn “nixxigħat taʼ ilmijiet taʼ ħajja,” x’irridu nagħmlu mingħajr dewmien, u liema ħaġa se ġġigħelna nkunu maħbubin minn Ġesù u Jehovah?
7 Jekk nixtiequ nibbenefikaw min-“nixxigħat taʼ ilmijiet tal-ħajja” li lejhom il-Ħaruf, Kristu Ġesù, jiggwida lil bnedmin taʼ qalb sewwa, aħna rridu mingħajr dewmien nagħtu prova bil-korsa taʼ azzjoni tagħna li nissottomettu ruħna mimlijin ferħ lejn l-awtorità tiegħu bħala Sultan. (Rivelazzjoni 7:17; 22:1, 2; qabbel Salm 2:12.) Ġesù stqarr: “Jekk tħobbuni, se tosservaw il-kmandamenti tiegħi. Dak li għandu l-kmandamenti tiegħi u josservahom, dak hu li jħobbni. Mill-banda l-oħra, dak li jħobbni se jinħabb minn Missieri, u jien se nħobbu.” (Ġwann 14:15, 21) Trid int li tkun maħbub minn Ġesù u minn Missieru? Allura kun sottomess lejn l-awtorità tagħhom.
Indokraturi Jobdu Mimlijin Ferħ
8, 9. (a) Kristu xi pprovda għall-bini tal-kongregazzjoni, u b’liema mod għandhom dawn l-irġiel ikunu eżempji għall-merħla? (b) Is-sottomissjoni taʼ l-indokraturi Kristjani kif inhi ssimbolizzata fil-ktieb taʼ Rivelazzjoni, u kif għandhom ifittxu “qalb ubbidjenti” meta jittrattaw kwistjonijiet ġudizzjarji?
8 “[I]l-kongregazzjoni hija sottomessa lejn il-Kristu.” Bħala l-Indokratur tagħha, hu pprovda “għotjiet fi rġiel” għall-“bini” tal-kongregazzjoni. (Efesin 4:8, 11, 12; 5:24) Dawn l-irġiel ixjeħ spiritwalment jintqalilhom biex ‘jirgħu l-merħla t’Alla li hemm fil-ħarsien tagħhom,’ mhux ‘billi jagħmluha taʼ sidien fuq dawk li huma l-wirt t’Alla, imma billi jsiru eżempji għall-merħla.’ (1 Pietru 5:1-3) Il-merħla hija taʼ Jehovah, u Kristu huwa “r-ragħaj mill-aħjar” tagħha. (Ġwann 10:14) Ladarba l-indokraturi b’mod xieraq jistennew koperazzjoni volontarja min-ngħaġ li Jehovah u Kristu fdaw għall-ħarsien tagħhom, huma nfushom għandhom ikunu eżempji mill-aħjar taʼ sottomissjoni.—Atti 20:28.
9 Fl-ewwel seklu, indokraturi midlukin kienu b’mod simboliku rrappreżentati bħala li qegħdin ‘fi,’ jew “fuq,” l-id il-leminija taʼ Kristu, u dan kien jissinjifika s-sottomissjoni tagħhom lejh bħala Kap tal-kongregazzjoni. (Rivelazzjoni 1:16, 20; 2:1) Xejn inqas minn hekk illum, indokraturi ġewwa l-kongregazzjonijiet tax-Xhieda taʼ Jehovah għandhom jissottomettu ruħhom lejn id-direzzjoni taʼ Kristu u ‘jumiljaw lilhom infushom taħt l-id setgħana t’Alla.’ (1 Pietru 5:6) Meta jiġu mitlubin biex jittrattaw kwistjonijiet ġudizzjarji, bħal Salamun matul is-snin leali tiegħu, għandhom jitolbu lil Jehovah: “Trid tagħti lill-qaddej tiegħek qalb ubbidjenti biex jiġġudika lill-poplu tiegħek, biex jiddistingwi bejn it-tajjeb u l-ħażin.” (1 Slaten 3:9) Qalb ubbidjenti se tqanqal lil anzjan biex ifittex li jara l-affarijiet bħalma Jehovah u Kristu Ġesù jarawhom sabiex id-deċiżjoni li tittieħed fuq l-art tixbah mill-qrib kemm jistaʼ jkun lil dik meħuda fis-sema.—Mattew 18:18-20.
10. L-indokraturi kollha kif għandhom jistinkaw biex jimitaw lil Ġesù fil-mod kif hu ttratta lin-ngħaġ?
10 Indokraturi li jivvjaġġaw u anzjani tal-kongregazzjoni bl-istess mod se jistinkaw biex jimitaw lil Kristu fil-mod kif ittratta lin-ngħaġ. F’kuntrast mal-Fariżej, Ġesù m’imponiex għadd kbir taʼ regoli li kienu ebsin biex wieħed isegwihom. (Mattew 23:2-11) Hu qal lil uħud bħal ngħaġ: “Ejjew għandi, intom ilkoll li qegħdin taħdmu iebes u mgħobbijin wisq, u jien se nserraħkom. Ħudu l-madmad tiegħi fuqkom u tgħallmu minni, għax jien kalm u umli fil-qalb, u intom se ssibu serħan għal erwieħkom. Għax il-madmad tiegħi ħanin u t-tagħbija tiegħi ħafifa.” (Mattew 11:28-30) Waqt li huwa veru li kull Kristjan irid “[i]ġorr it-tagħbija tiegħu stess,” l-indokraturi għandhom jiftakru l-eżempju taʼ Ġesù u jgħinu lil ħuthom biex iħossu li t-tagħbija tagħhom taʼ responsabbiltà Kristjana hi ‘ħanina,’ “ħafifa,” u ferħ biex iġorruha.—Galatin 6:5.
Sottomissjoni Teokratika
11. (a) Kif jistaʼ wieħed jirrispetta l-istat taʼ kap u madankollu ma jkunx tassew teokratiku? Agħti stampa. (b) Xi jfisser li tkun verament teokratiku?
11 It-teokrazija hija ħakma minn Alla. Tinvolvi l-prinċipju taʼ l-istat taʼ kap deskritt fl-1 Korintin 11:3. Imma tfisser iktar minn hekk. Wieħed jistaʼ jidher li juri rispett lejn l-istat taʼ kap u madankollu ma jkunx teokratiku fis-sens sħiħ tal-kelma. Kif jistaʼ jkun dan? Biex nagħtu stampa, id-demokrazija hija gvern min-nies, u demokrat ġiet mogħtija definizzjoni tiegħu bħala “persuna li temmen fl-ideali tad-demokrazija.” Raġel jistaʼ jsostni li hu demokratiku, jieħu parti fl-elezzjonijiet, u saħansitra jkun politikant attiv. Imma jekk, fl-imġiba ġenerali tiegħu, jistmerr l-ispirtu tad-demokrazija u l-prinċipji kollha li din tinvolvi, jistaʼ jingħad li huwa verament demokratiku? Bl-istess mod, biex ikun verament teokratiku, wieħed irid jagħmel iktar milli jissottometti ruħu lejn l-istat taʼ kap b’mod nominali. Irid jimita l-modi u l-kwalitajiet taʼ Jehovah. Irid ikun verament iggvernat minn Jehovah b’kull mod. U ladarba Jehovah ta lil Ibnu l-awtorità sħiħa, li tkun teokratiku jfisser ukoll li tikkopja lil Ġesù.
12, 13. (a) Li tkun teokratiku jinvolvi liema ħaġa, b’mod partikulari? (b) Is-sottomissjoni teokratika tinvolvi ubbidjenza lejn għadd kbir taʼ regoli? Agħti stampa.
12 Ftakar, Jehovah irid sottomissjoni volontarja mqanqla mill-imħabba. Dak hu l-mod tiegħu kif jiggverna l-univers. Huwa l-istess personifikazzjoni taʼ l-imħabba. (1 Ġwann 4:8) Kristu Ġesù huwa “r-riflessjoni tal-glorja tiegħu u r-rappreżentazzjoni eżatta taʼ l-istess eżistenza tiegħu.” (Ebrej 1:3) Hu jitlob li l-veri dixxipli tiegħu jħobbu lil xulxin. (Ġwann 15:17) Mela li tkun teokratiku jinvolvi mhux biss li tkun sottomess imma wkoll li tkun tħobb. Il-kwistjoni tistaʼ tiġi miġbura fil-qosor kif ġej: It-teokrazija hija ħakma minn Alla; Alla huwa mħabba; għalhekk it-teokrazija hija ħakma mill-imħabba.
13 Anzjan jistaʼ jaħseb li sabiex ikun teokratiku, l-aħwa għandhom jobdu kull xorta taʼ regoli. Xi anzjani għamlu regoli minn suġġerimenti mogħtijin minn żmien għal żmien mill-“irsir fidil u diskret.” (Mattew 24:45) Per eżempju, darba ġie suġġerit li biex wieħed isibha eħfef sabiex isir jaf lill-aħwa fil-kongregazzjoni, jistaʼ jkun tajjeb li mhux dejjem joqgħod bil-qiegħda fl-istess post fis-Sala tas-Saltna. Dan kellu jkun suġġeriment prattiku, mhux regola riġida. Imma xi anzjani jistgħu jkunu inklinati li jdawru dan f’regola u jħossu li dawk li ma jsegwuhx m’humiex teokratiċi. Madankollu, jistaʼ jkun hemm ħafna raġunijiet tajbin għala ħu jew oħt jistaʼ jippreferi li joqgħod bil-qiegħda f’ċertu post. Jekk anzjan ma jikkalkulax bl-imħabba affarijiet bħal dawn, qiegħed hu nnifsu jkun verament teokratiku? Biex tkun teokratiku, ‘ħalli l-affarijiet kollha tiegħek isiru bl-imħabba.’—1 Korintin 16:14.
Naqdu Bil-Ferħ
14, 15. (a) Anzjan kif jistaʼ jċaħħad lil ċerti aħwa rġiel jew nisa mill-ferħ tagħhom f’li jaqdu lil Jehovah, u għala dan ma jkunx teokratiku? (b) Ġesù kif wera li japprezza l-imħabba espressa permezz tas-servizz tagħna, iktar milli l-ammont? (ċ) L-anzjani x’għandhom jikkunsidraw?
14 Li tkun teokratiku jfisser ukoll li taqdi lil Jehovah bil-ferħ. Jehovah huwa “dak Alla hieni.” (1 Timotew 1:11) Hu jrid li dawk li jqimuh jaqduh mimlijin ferħ. Dawk li jinsistu għar-regoli għandhom jiftakru li fost ir-regolamenti li Iżrael kellhom joqogħdu “attenti li jwettqu” kien hemm dan li ġej: “Int trid tifraħ quddiem Jehovah Alla tiegħek f’dak kollu li tagħmel.” (Dewteronomju 12:1, 18) Dak kollu li nagħmlu fis-servizz taʼ Jehovah għandu jkun taʼ ferħ, mhux tagħbija. L-indokraturi jistgħu jagħmlu ħafna biex lill-aħwa jagħmluhom iħossuhom henjin li jagħmlu dak li jistgħu f’li jaqdu lil Jehovah. Għall-kuntrarju, jekk l-anzjani ma joqogħdux attenti, jistgħu jċaħħdu lil xi wħud minn ħuthom mill-ferħ tagħhom. Jekk, per eżempju, jagħmlu paraguni, billi jfaħħru lil dawk li laħqu jew qabżu l-medja tal-kongregazzjoni fis-sigħat li jqattgħu fil-għoti taʼ xiehda u b’konsegwenza jikkritikaw lil dawk li ma laħquhiex, kif se jħossuhom dawk li forsi kellhom raġuni valida għala rrapportaw ferm inqas ħin? Ma jistax dan iġigħelhom iħossuhom ħatjin bla bżonn u jċaħħadhom mill-ferħ tagħhom?
15 Il-ftit sigħat li xi wħud jistgħu jiddedikaw għall-għoti taʼ xiehda pubblika jistgħu jirrappreżentaw sforz akbar mill-ħafna sigħat li oħrajn iqattgħu jippridkaw, minħabba età iżgħar, saħħa aħjar, u ċirkostanzi oħrajn. F’dan ir-rigward, l-anzjani ma jridux jiġġudikawhom. Tabilħaqq, huwa lil Ġesù li l-Missier ta “awtorità biex jagħmel ġudizzju.” (Ġwann 5:27) Ikkritikaha Ġesù lill-armla fqira għaliex l-offerta tagħha kienet inqas mill-medja? Le, kien sensittiv għal dak li dawk iż-żewġ muniti żgħar tassew swewlha. Kienu “dak kollu li kellha, l-għixien kollu tagħha.” X’imħabba profonda lejn Jehovah irrappreżentaw! (Mark 12:41-44) Għandhom l-anzjani jkunu inqas sensittivi għall-isforzi taʼ mħabba taʼ dawk li dak kollu li jagħmlu huwa numerikalment taħt il-“medja”? Fejn jirrigwardja l-imħabba lejn Jehovah, sforzi bħal dawn jistgħu tabilħaqq ikunu iktar mill-medja!
16. (a) Jekk l-indokraturi jużaw il-figuri fit-taħditiet tagħhom, għala jeħtieġu dehen u bilanċ tajjeb? (b) Kif jistgħu l-aħwa jiġu mgħejjunin bl-aħjar mod biex iżidu s-servizz tagħhom?
16 Għandhom dawn ir-rimarki issa jiġu mibdulin f’“regola” ġdida li figuri—saħansitra medji—ma jissemmew qatt? Xejn affattu! Il-punt hu li l-indokraturi għandhom iżommu l-bilanċ bejn li jinkuraġġixxu lill-aħwa sabiex jespandu l-ministeru tagħhom u li jgħinuhom biex jagħmlu dak li jistgħu bil-ferħ. (Galatin 6:4) Fit-tixbieha li Ġesù ta dwar it-talenti, is-sid ta l-ġid kollu li kellu lill-irsiera tiegħu “kull wieħed skond l-abbiltà tiegħu stess.” (Mattew 25:14, 15) L-anzjani bl-istess mod għandhom jikkunsidraw il-possibiltajiet taʼ kull pubblikatur tas-Saltna. Dan jitlob dehen. Jistaʼ jkun li xi wħud attwalment tassew jeħtieġu inkuraġġiment biex jagħmlu iktar. Jistgħu japprezzaw għajnuna lejn li jorganizzaw aħjar l-attività tagħhom. Hu x’inhu l-każ, jekk jistgħu jiġu assistiti biex jagħmlu dak li jistgħu bil-ferħ, dak il-ferħ x’aktarx li se jsaħħaħhom sabiex jespandu l-attività Kristjana tagħhom fejn possibbli.—Neħemija 8:10; Salm 59:16; Ġeremija 20:9.
Il-Paċi Li Tiġi Minn Sottomissjoni Mimlija Ferħ
17, 18. (a) Sottomissjoni mimlija ferħ kif tistaʼ ġġibilna paċi u tjieba? (b) Liema ħaġa tistaʼ tkun tagħna jekk tassew noqogħdu attenti għall-kmandamenti t’Alla?
17 Is-sottomissjoni mimlija ferħ lejn is-sovranità leġittima taʼ Jehovah iġġibilna paċi kbira. Qal is-salmista f’talba lil Jehovah: “Paċi abbundanti tappartjeni lil dawk li qegħdin iħobbu l-liġi tiegħek, u għalihom m’hemm ebda ġebla taʼ tfixkil.” (Salm 119:165) Billi nobdu l-liġi t’Alla, nibbenefikaw lilna nfusna. Jehovah qal lil Iżrael: “Dan hu dak li qal Jehovah, Dak li xtrak lura, il-Wieħed Qaddis taʼ Iżrael: ‘Jien, Jehovah, jien Alla tiegħek, il-Wieħed li qiegħed jgħallmek biex tibbenefika lilek innifsek, il-Wieħed li qiegħed iġiegħlek tirfes fil-mogħdija li fiha għandek timxi. O kieku biss tagħti kas attwalment il-kmandamenti tiegħi! Imbagħad il-paċi tiegħek kieku ssir sewwa sew bħal xmara, u t-tjieba tiegħek bħall-mewġ tal-baħar.’”—Isaija 48:17, 18.
18 Is-sagrifiċċju bħala rahan taʼ Kristu jġibilna paċi m’Alla. (2 Korintin 5:18, 19) Jekk għandna fidi fid-demm li jifdi taʼ Kristu u b’mod kuxjenzjuż nistinkaw biex nikkumbattu d-djufijiet tagħna u nagħmlu r-rieda t’Alla, insibu serħan minn sentimenti taʼ ħtija. (1 Ġwann 3:19-23) Fidi bħal din, appoġġjata minn xogħlijiet, tagħtina waqfa taʼ tjieba quddiem Jehovah u t-tama taʼ l-għaġeb taʼ li nibqgħu ħajjin wara “t-tribulazzjoni l-kbira” u li ngħixu għal dejjem fid-dinja ġdida taʼ Jehovah. (Rivelazzjoni 7:14-17; Ġwann 3:36; Ġakbu 2:22, 23) Dan kollu jistaʼ jkun tagħna ‘kieku biss nagħtu kas attwalment il-kmandamenti t’Alla.’
19. L-hena tagħna issa u t-tama tagħna taʼ ħajja taʼ dejjem fuq liema ħaġa jiddependu, u David kif esprima l-konvinzjoni tagħna mill-qalb?
19 Iva, l-hena tagħna issa u t-tama tagħna taʼ ħajja taʼ dejjem fuq art magħmula ġenna jiddependu mis-sottomissjoni tagħna mimlija ferħ lejn l-awtorità taʼ Jehovah bħala Mulej Sovran taʼ l-univers. Jalla aħna dejjem naqsmu s-sentimenti taʼ David, li qal: “Tiegħek, O Jehovah, huma l-kobor u s-setgħa u l-ġmiel u l-eċċellenza u d-dinjità; għax kulma hemm fis-smewwiet u fl-art huwa tiegħek. Tiegħek hi s-saltna, O Jehovah, il-Wieħed ukoll li qiegħed terfaʼ lilek innifsek ’il fuq bħala kap fuq kulħadd. U issa, O Alla tagħna, aħna qegħdin niżżuk ħajr u nfaħħru lil ismek sabiħ.”—1 Kronaki 29:11, 13. (w94 7/1)
Punti Li Trid Tiftakar
◻ Liema xorta taʼ sottomissjoni u ubbidjenza jrid Jehovah li l-qaddejja tiegħu juru?
◻ Ġesù kif kien ippremjat għall-ubbidjenza tiegħu, u aħna rridu nagħtu prova taʼ liema ħaġa bil-korsa taʼ azzjoni tagħna?
◻ L-indokraturi kollha kif għandhom jimitaw lil Ġesù fil-mod kif hu ttratta lin-ngħaġ?
◻ X’inhu involut f’li tkun teokratiku?
◻ Is-sottomissjoni mimlija ferħ liema barkiet iġġibilna?