Nies li minn Rajhom Jitqanqlu biex Jiġu Gilgħad

L-​iSKOLA taʼ Gilgħad (Watchtower Bible School of Gilead) qiegħda hemm biex tħarreġ irġiel u nisa li huma dedikati lil Alla għas-​servizz missjunarju f’pajjiżi barranin. Min jikkwalifika biex jiġi Gilgħad? Dawk li minn rajhom huma lesti li jagħtu iktar. (Salm 110:​3, Saydon) Dan żgur li deher ċar fit-​8 taʼ Settembru, 2001, meta ggradwat il-​111-il klassi.

Xi studenti f’din il-​klassi kienu diġà ħallew minn rajhom lill-​familji tagħhom, lil ħbiebhom, u lil art twelidhom biex jaqdu fejn kien hemm iktar bżonn. Billi għamlu dan, huma raw jekk setgħux jagħmlu l-​aġġustamenti meħtieġa biex jgħixu f’ambjent kemxejn differenti. Per eżempju, Richer u Nathalie rranġaw l-​affarijiet tagħhom biex imorru l-​Bolivja, Todd u Michelle biex imorru r-​Repubblika Dominikana, u David u Monique biex imorru f’pajjiż Asjatiku bl-​iskop li jxerrdu l-​aħbar tajba dwar is-​Saltna t’Alla. Studenti oħrajn kienu diġà qdew fin-​Nikaragwa, l-​Ekwador, u l-​Albanija.

Christy ġiet inkuraġġita biex fl-​iskola sekondarja tistudja l-​Ispanjol. Dan għenha tipprepara ruħha sabiex tqattaʼ sentejn fl-​Ekwador qabel ma tiżżewweġ. Oħrajn ngħaqdu maʼ kongregazzjonijiet taʼ lingwa barranija f’pajjiżhom stess. Saul u Priscilla kellhom jiffaċċjaw sfida differenti. Qabel m’attendew l-​iskola, minn rajhom ħadmu iebes biex itejbu l-​Ingliż tagħhom.

L-20 ġimgħa taʼ taħriġ missjunarju għaddew malajr. Il-​ġurnata tal-​gradwazzjoni waslet, u l-​istudenti flimkien mal-​ħbieb u l-​familjari tagħhom semgħu l-​pariri għaqlin u l-​aħħar kliem taʼ inkuraġġiment.

Iċ-chairman tal-​programm kien Theodore Jaracz, li ggradwa mis-​sebaʼ klassi taʼ l-​Iskola taʼ Gilgħad u li issa qed jaqdi bħala membru tal-​Ġemgħa li Tiggverna tax-​Xhieda taʼ Jehovah. Il-​kliem tal-​ftuħ tiegħu enfasizza l-​fatt li bħala organizzazzjoni aħna qatt ma tlifna l-​objettiv tat-​taħriġ taʼ l-​istudenti f’Gilgħad, jiġifieri l-​ippridkar taʼ l-​aħbar tajba tas-​Saltna mad-​dinja kollha. (Mark 13:10) L-​Iskola taʼ Gilgħad tħarreġ lill-​istudenti li jikkwalifikaw sabiex ikomplu bl-​attività taʼ l-​ippridkar tagħhom fuq skala akbar minn dik tal-​passat u f’partijiet tad-​dinja fejn hemm il-​bżonn għal missjunarji mħarrġin. Ħuna Jaracz ħeġġeġ lill-​istudenti biex jagħmlu użu tajjeb mit-​taħriġ li ħadu f’Gilgħad, issa li se jingħaqdu maʼ missjunarji oħra li fil-​preżent qed jaqdu fid-​19-il pajjiż fejn se jintbagħtu dawk li se jiggradwaw.

Pariri f’Waqthom għal Dawk li Se Jiggradwaw

Imbagħad kien hemm serje taʼ taħditiet. William Van De Wall, membru tal-​Kumitat tal-​Fergħa taʼ l-​Istati Uniti, tkellem fuq is-​suġġett “Iż-​Żelu Missjunarju—Il-​Marka tal-​Kristjani Veri.” Hu ffoka fuq l-​inkarigu taʼ li ‘nagħmlu dixxipli,’ bħalma hu mniżżel f’Mattew 28:​19, 20, u ħeġġeġ ’l-istudenti: “Imitaw lil Ġesù, li wettaq l-​inkarigu missjunarju tiegħu biż-​żelu u bl-​entużjażmu.” Sabiex jgħin lill-​missjunarji futuri ma jitilfux iż-​żelu tagħhom għax-​xogħol missjunarju, hu inkuraġġiehom: “Agħmlu skeda prattika; żommu drawwiet tajbin taʼ studju persunali, aġġornaw ruħkom dwar l-​affarijiet teokratiċi, u dejjem żommu f’moħħkom ir-​raġunijiet għala qegħdin fl-​inkarigu tagħkom.”

Imbagħad kien imiss lil Guy Pierce, membru tal-​Ġemgħa li Tiggverna. Hu żviluppa t-​tema “Ibqgħu Ikkultivaw ‘il-​Qawwa tar-​Raġuni Tagħkom.’” (Rumani 12:​1, NW) Hu ta pariri prattiċi lill-​klassi li kienet se tiggradwa, u ħeġġiġhom jużaw l-​abbiltà li tahom Alla biex jaħsbu u jirraġunaw. “Komplu aħsbu fil-​fond dwar dak li Jehovah qed jgħidilkom permezz tal-​Kelma tiegħu. Dan se jħariskom,” qal hu. (Proverbji 2:​11, Saydon) Ħuna Pierce wissa wkoll lill-​membri tal-​klassi biex ma jkunux dommatiċi fl-​opinjonijiet tagħhom, u b’hekk ma jfixklux il-​“qawwa tar-​raġuni.” Ċertament, dawn it-​tfakkiriet f’waqthom se jkunu t’għajnuna hekk kif il-​gradwati jibdew jaqdu bħala missjunarji.

Iċ-chairman imbagħad introduċa lill-​wieħed mill-​għalliema taʼ Gilgħad, Lawrence Bowen. Dan tkellem dwar it-​tema “Ippretendi li Ma Taf Xejn.” Hu ġibed l-​attenzjoni għall-​fatt li l-​appostlu Pawlu, fix-​xogħol missjunarju tiegħu f’Korintu, iddeċieda li ma jkun jaf xejn “ħlief lil Ġesù Kristu, u ’l dan imsallab.” (1 Korintin 2:​2, korsiv tagħna.) Pawlu kien jaf li l-​akbar forza fl-​univers, l-​ispirtu qaddis, jappoġġa l-​messaġġ li huwa rifless fil-​Bibbja kollha: l-​ivvindikar tas-​sovranità taʼ Jehovah permezz taż-​Żerriegħa mwiegħda. (Ġenesi 3:15) It-​48 student li kienu se jiggradwaw ġew inkuraġġiti biex ikunu bħal Pawlu u Timotju u jkunu missjunarji li jirnexxu, u jżommu maʼ “l-​eżempju tat-​tagħlim sħiħ.”—2 Timotju 1:13.

“Apprezza l-​Privileġġ Tiegħek li Hu Rigal Mingħand Alla” kienet it-​tema taʼ l-​aħħar taħdita mis-​serje taʼ taħditiet tal-​ftuħ. Wallace Liverance, ir-​reġistratur taʼ l-​Iskola taʼ Gilgħad, għen lill-​istudenti li kienu se jiggradwaw biex jifhmu li l-​privileġġi taʼ servizz huma espressjonijiet tal-​qalb tajba mhix mistħoqqa t’Alla, mhux xi ħaġa li għandhom id-​dritt għaliha jew li kisbu bil-​kapaċità tagħhom. Billi uża l-​eżempju taʼ l-​appostlu Pawlu, Ħuna Liverance nnota: “Jehovah m’għażilx lil Pawlu biex ikun l-​appostlu tal-​ġnus minħabba l-​għemejjel tiegħu. Kieku għamel hekk Pawlu kien ikun donnu kiseb id-​dritt għal dak l-​inkarigu jew inkella għax kien jixraqlu. Lanqas minħabba li kien ilu żmien jaqdih jew għax kellu iktar esperjenza. Mil-​lat uman, kien donnu li jagħmel iktar sens li jintgħażel Barnaba. Pawlu lanqas ma ntgħażel minħabba l-​abbiltajiet tiegħu. Apollo milli jidher kien iktar fluwenti minnu. L-​għażla tiegħu kienet espressjoni tal-​qalb tajba mhix mistħoqqa t’Alla.” (Efesin 3:​7, 8) Ħuna Liverance ħeġġeġ lill-​gradwati biex jużaw ir-​rigal tagħhom, jew il-​privileġġ taʼ servizz, sabiex jgħinu lil oħrajn isiru ħbieb t’Alla u jirċievu ‘d-​don li jagħti Alla . . . l-​ħajja taʼ dejjem fi Kristu Ġesù Sidna.’—Rumani 6:23.

Wara dan, Mark Noumair, għalliem ieħor taʼ Gilgħad, mexxa diskussjoni interessanti maʼ numru taʼ studenti fuq it-​tema “Il-​Preparazzjoni Twassal għal Riżultati Tajbin.” (Proverbji 21:5) L-​esperjenzi wrew li meta l-​ministru taʼ l-​aħbar tajba jipprepara tajjeb għall-​ministeru, speċjalment billi jħejji qalbu, hu se jkollu interess ġenwin fin-​nies. Hu dejjem se jsib xi jgħid. Anzi, hu se jgħid u jaġixxi b’mod li jgħinhom spiritwalment. “Dan hu l-​qofol biex tirnexxi bħala missjunarju,” qal Ħuna Noumair waqt li tkellem mill-​esperjenza tiegħu stess bħala missjunarju fl-​Afrika.

Is-​Servizz Missjunarju —Karriera Sodisfaċenti

Ralph Walls u Charles Woody intervistaw xi missjunarji taʼ l-​esperjenza, li kienu wkoll fiċ-​Ċentru Edukattiv taʼ Patterson għal taħriġ speċjali. L-​intervisti enfasizzaw li hija l-​imħabba għan-​nies li ġġib il-​ferħ fis-​servizz missjunarju. Kemm l-​istudenti kif ukoll il-​familji u l-​ħbieb tagħhom li kienu fl-​udjenza qawwew qalbhom meta semgħu lil dawn il-​missjunarji taʼ l-​esperjenza jispjegaw huma stess għala s-​servizz missjunarju huwa karriera sodisfaċenti.

John E. Barr, li jaqdi fil-​Ġemgħa li Tiggverna, ta t-​taħdita prinċipali tal-​ġurnata, bit-​titlu “Għannu lil Jehovah Għanja Ġdida.” (Isaija 42:10) Ħuna Barr wera li l-​espressjoni “għanja ġdida” tidher disaʼ darbiet fil-​Bibbja. Hu staqsa l-​mistoqsija, “Dwar xiex inhi din l-​għanja ġdida?” Imbagħad wieġeb: “Il-​kuntest juri li l-​għanja ġdida titkanta minħabba l-​iżviluppi ġodda fil-​mod kif Jehovah jeżerċita s-​sovranità tiegħu.” Hu ħeġġeġ lill-​istudenti biex b’vuċi waħda jkomplu jgħannu tifħir dwar is-​Saltna vittorjuża t’Alla mmexxija mis-​Sultan Messjaniku, Kristu Ġesù. Ħuna Barr qal ukoll li t-​taħriġ li rċivew f’Gilgħad għenhom jifhmu l-​aspetti differenti taʼ din l-​“għanja ġdida” iktar minn qatt qabel. “L-​iskola enfasizzat il-​bżonn li intom ‘tgħannu’ tifħir lil Jehovah f’armonija maʼ ħutkom kulfejn tmorru. Fittxu dejjem li tkunu magħqudin maʼ dawk fl-​inkarigu tagħkom.”

Wara li ngħataw id-​diplomi tagħhom, wieħed mill-​istudenti qara ittra f’isem sħabu tal-​klassi li esprimiet l-​apprezzament sinċier tagħhom għat-​taħriġ li kienu rċivew f’Gilgħad.

Tistaʼ tagħmel iżjed fis-​servizz tiegħek lejn Alla u tagħmlu iktar produttiv? Jekk iva, stinka bħalma għamlu dawn l-​istudenti li ggradwaw. Dan hu dak li għenhom jikkwalifikaw għall-​għalqa missjunarja. Jekk toffri lilek innifsek minn rajk u minn qalbek għas-​servizz taʼ Jehovah jistaʼ jkollok ferħ kbir.—Isaija 6:8.

[Kaxxa f’paġna 25]

STATISTIĊI TAL-​KLASSI

Numru taʼ pajjiżi rappreżentati: 10

Numru taʼ pajjiżi li ġew assenjati fihom: 19

Numru taʼ studenti: 48

Età medja: 33.2

Medja taʼ snin fil-​verità: 16.8

Medja taʼ snin fil-​ministeru full-time: 12.6

[Stampa f’paġna 26]

Il-​111-il Klassi li Ggradwat mill-​Iskola taʼ Gilgħad

Fil-​lista t’hawn taħt, ir-​ringieli huma nnumerati minn quddiem għal wara, u l-​ismijiet f’kull ringiela huma mniżżlin mix-​xellug għal-​lemin.

(1) Yeomans, C.; Toukkari, A.; Nuñez, S.; Phillips, J.; Dawkin, M.; Silvestri, P. (2) Morin, N.; Biney, J.; López, M.; Van Hout, M.; Cantú, A.; Szilvassy, F. (3) Williams, M.; Itoh, M.; Van Coillie, S.; Levering, D.; Fuzel,  F.; Geissler, S. (4) Yeomans, J.; Moss, M.; Hodgins, M.; Dudding, S.; Briseño, J.; Phillips, M. (5) López, J.; Itoh, T.; Sommerud, S.; Kozza, C.; Fuzel, G.; Moss, D. (6) Williams, D.; Dudding, R.; Geissler, M.; Morin, R.; Biney, S.; Cantú, L. (7) Dawkin, M.; Hodgins, T.; Levering, M.; Silvestri, S.; Van Hout, D.; Briseño, A. (8) Van Coillie, M.; Nuñez, A.; Kozza, B.; Sommerud, J.; Toukkari, S.; Szilvassy, P.