Kapitlu 16

Il-​Gvern T’Alla Jibda L-​Ħakma Tiegħu

1. (a) Nies taʼ fidi lejn liema ħaġa ħarsu ’l quddiem għal żmien twil? (b) Is-​saltna t’Alla għala tissejjaħ “belt”?

GĦAL ELUF taʼ snin persuni b’fidi fil-​gvern t’Alla ħarsu ’l quddiem lejn iż-​żmien meta dan kellu jibda l-​ħakma tiegħu. Per eżempju, il-​Bibbja tgħid li l-​leali Abraham “kien qiegħed jistenna l-​belt li għandha sisien reali, li l-​bennej tagħha u dak li għamilha hu Alla.” (Ebrej 11:10) Dik il-​“belt” hija s-​saltna t’Alla. Imma hawnhekk għala tissejjaħ “belt”? Dan huwa għaliex fl-​antik kienet ħaġa komuni għal sultan li jaħkem fuq belt. Mela n-​nies taʼ spiss ħarsu lejn belt bħala saltna.

2. (a) Liema ħaġa turi li s-​Saltna kienet realtà għad-​dixxipli bikrin taʼ Kristu? (b) X’riedu jkunu jafu dwarha?

² Is-saltna t’Alla kienet reali għas-​segwaċi bikrin taʼ Kristu. Dan jidher mill-​interess profond tagħhom fil-​ħakma tagħha. (Mattew 20:​20-23) Mistoqsija f’moħħhom kienet: Kristu u d-​dixxipli tiegħu meta kellhom jibdew jaħkmu? Darba waħda meta Ġesù deher lid-​dixxipli tiegħu wara l-​irxoxt tiegħu, staqsewh: “Mulej, qiegħed tirrestawra s-​saltna lil Iżrael f’dan iż-​żmien?” (Atti 1:6) Mela, ħerqan int biex tkun taf meta Kristu se jibda jaħkem bħala Sultan tal-​gvern t’Alla, saħansitra bħalma kienu d-​dixxipli taʼ Kristu?

IL-​GVERN LI GĦALIH JITOLBU L-​KRISTJANI

3, 4. (a) Liema ħaġa turi li Alla minn dejjem ħakem bħala Sultan? (b) Mela Kristu għala għallem lis-​segwaċi tiegħu jitolbu biex tiġi s-​saltna t’Alla?

³ Kristu għallem lis-​segwaċi tiegħu biex jitolbu ’l Alla: “Ħalli tiġi saltnatek. Ħalli r-​rieda tiegħek isseħħ, kif fis-​sema, ukoll fuq l-​art.” (Mattew 6:​9, 10) Imma xi ħadd jistaʼ jistaqsi: ‘Alla Jehovah mhux minn dejjem ħakem bħala sultan? U jekk inhu hekk, għala nitolbu biex tiġi saltnatu?’

⁴ Veru, il-​Bibbja ssejjaħ lil Jehovah is-​“Sultan taʼ l-​eternità.” (1 Timotew 1:17) U tgħid: “Jehovah innifsu stabbilixxa b’mod sod it-​tron tiegħu fl-​istess smewwiet; u fuq kull ħaġa l-​istat taʼ sultan tiegħu żamm dominju.” (Salm 103:19) Mela Jehovah minn dejjem kien il-​Ħakkiem Suprem fuq il-​ħolqien kollu tiegħu. (Ġeremija 10:10) Madankollu, minħabba l-​irvell kontra l-​ħakma tiegħu fil-​ġnien t’Għeden, Alla rranġa biex ikun hemm gvern speċjali. Dan huwa l-​gvern li għalih Ġesù Kristu iktar tard għallem lis-​segwaċi tiegħu biex jitolbu. L-​iskop tiegħu huwa li jtemm il-​problemi li nqalgħu meta Satana x-​Xitan u oħrajn taw daharhom lill-​ħakma t’Alla.

5. Jekk is-​saltna hija t’Alla, għala tissejjaħ ukoll is-​saltna taʼ Kristu u s-​saltna tal-​144,000?

⁵ Dan il-​gvern ġdid tas-​Saltna jirċievi l-​poter tiegħu u d-​dritt li jaħkem mingħand is-​Sultan il-​Kbir, Alla Jehovah. Hija s-​saltna tiegħu. Għal darba wara l-​oħra, il-​Bibbja ssejħilha s-​“saltna t’Alla.” (Luqa 9:​2, 11, 60, 62; 1 Korintin 6:​9, 10; 15:50) Madankollu, peress li Jehovah ħatar lil Ibnu biex ikun il-​Ħakkiem Ewlieni tagħha, issir ukoll referenza għaliha bħala s-​saltna taʼ Kristu. (2 Pietru 1:11) Bħalma tgħallimna f’kapitlu ieħor, 144,000 persuna minn fost il-​bnedmin se jaħkmu maʼ Kristu f’din is-​saltna. (Rivelazzjoni 14:​1-4; 20:6) Mela l-​Bibbja tirreferi għaliha wkoll bħala “s-​saltna tagħhom.”​—Danjel 7:27.

6. Skond xi nies, is-​saltna t’Alla meta bdiet taħkem?

⁶ Xi persuni jgħidu li s-​Saltna bdiet il-​ħakma tagħha fis-​sena li fiha Ġesù mar lura fis-​sema. Huma jgħidu li Kristu beda jaħkem meta sawwab l-​ispirtu qaddis fuq is-​segwaċi tiegħu fil-​jum tal-​festa Lhudija taʼ Pentekoste fis-​sena 33 E.K. (Atti 2:​1-4) Imma l-​gvern tas-​Saltna li Jehovah irranġa biex itemm il-​problemi kollha li nħolqu bl-​irvell taʼ Satana ma bediex il-​ħakma tiegħu dak in-​nhar. M’hemm xejn li juri li t-​‘tifel,’ li huwa l-​gvern t’Alla bi Kristu bħala ħakkiem, ġie mwieled dak in-​nhar u beda l-​ħakma tiegħu. (Rivelazzjoni 12:​1-10) Sewwa, kellu Ġesù b’xi mod xi saltna fis-​sena 33 E.K.?

7. Kristu fuq min kien qiegħed jaħkem mis-​sena 33 E.K. ’l hawn?

⁷ Iva, Ġesù dak in-​nhar beda jaħkem fuq il-​kongregazzjoni taʼ segwaċi tiegħu li, maż-​żmien, kellhom jingħaqdu miegħu fis-​smewwiet. B’hekk il-​Bibbja titkellem dwarhom, dment li huma fuq l-​art, bħala li ttieħdu ‘fis-​saltna taʼ l-​Iben taʼ l-​imħabba [t’Alla].’ (Kolossin 1:13) Imma din il-​ħakma, jew “saltna,” fuq il-​Kristjani bit-​tama taʼ ħajja fis-​sema m’hijiex il-​gvern tas-​Saltna li għalih Ġesù għallem lis-​segwaċi tiegħu biex jitolbu. Hija saltna fuq il-​144,000 persuna biss li se jaħkmu miegħu fis-​sema. Matul is-​sekli huma kienu l-​uniċi sudditi tagħha. B’hekk din il-​ħakma, jew ‘saltna taʼ l-​Iben taʼ l-​imħabba t’Alla,’ se tispiċċa meta l-​aħħar wieħed minn dawn is-​sudditi b’tama għas-​sema jmut u jingħaqad maʼ Kristu fis-​sema. Ma jkunux iżjed is-​sudditi taʼ Kristu, imma mbagħad ikunu slaten miegħu fil-​gvern tas-​Saltna t’Alla mwiegħed minn żmien ilu.

BIDU TAL-​ĦAKMA F’NOFS L-​GĦEDEWWA

8. (a) Liema ħaġa turi li wara l-​irxoxt taʼ Kristu kellu jkun hemm żmien taʼ stennija qabel ma beda jaħkem? (b) X’qal Alla lil Kristu meta wasal il-​waqt biex jibda jaħkem?

⁸ Meta Kristu rritorna fis-​sema wara l-​irxoxt tiegħu, ma bediex jaħkem dak in-​nhar bħala Sultan tal-​gvern t’Alla. Minflok, kellu jkun hemm żmien taʼ stennija, bħalma jispjega l-​appostlu Pawlu: “Dan ir-​raġel [Ġesù Kristu] offra sagrifiċċju wieħed għad-​dnubiet b’mod perpetwu u qagħad bil-​qiegħda fuq il-​leminija t’Alla, minn dak iż-​żmien ’il quddiem jistenna sakemm l-​għedewwa tiegħu jitqiegħdu bħala banketta għal saqajh.” (Ebrej 10:​12, 13) Meta wasal iż-​żmien biex Kristu jibda jaħkem, Jehovah qallu: “Mur rażżan [jew, ikkonkwista] f’nofs l-​għedewwa tiegħek.”​—Salm 110:​1, 2, 5, 6.

9. (a) Għala mhux kulħadd irid is-​saltna t’Alla? (b) Meta l-​gvern t’Alla jibda l-​​ħakma tiegħu, il-​ġnus x’jagħmlu?

⁹ Tinstemaʼ stramba li xi ħadd ikun għadu tal-​gvern t’Alla? Madankollu mhux kulħadd irid jgħix taħt gvern li jitlob mis-​sudditi tiegħu li jagħmlu dak li huwa sewwa. Mela wara li tgħid kif Jehovah u Ibnu se jieħdu f’idejhom il-​ħakma tad-​dinja, il-​Bibbja tgħid, “[i]l-ġnus saru mimlijin korla.” (Rivelazzjoni 11:​15, 17, 18) Il-​ġnus ma jilqgħux is-​saltna t’Alla għaliex Satana jiżvijahom biex jopponuha.

10, 11. (a) Meta l-​gvern t’Alla jibda l-​ħakma tiegħu, x’jiġri fis-​sema? (b) X’jiġri fuq l-​art? (ċ) Mela liema punt importanti rridu niftakru?

¹⁰ Meta l-​gvern t’Alla jibda l-​ħakma tiegħu, Satana u l-​anġli tiegħu jkunu għadhom jgħixu fis-​sema. Ladarba huma jopponu l-​ħakma tas-​Saltna, mill-​ewwel tfaqqaʼ gwerra. B’riżultat taʼ dan, Satana u l-​anġli tiegħu jintefgħu ’l barra mis-​sema. Għal dan, leħen qawwi jgħid: “Issa seħħew is-​salvazzjoni u l-​poter u s-​saltna t’Alla tagħna u l-​awtorità tal-​Kristu tiegħu.” Iva, tibda l-​ħakma tal-​gvern t’Alla! U b’Satana u l-​anġli tiegħu mneħħijin mis-​sema, hemm ferħ kbir hemmhekk. “Minħabba f’dan ifirħu, intom is-​smewwiet u intom li toqogħdu fihom!” tgħid il-​Bibbja.​—Rivelazzjoni 12:​7-12.

¹¹ Huwa dan ukoll żmien hieni għall-​art? Le! Minflok, hemm l-​iktar żmien taʼ inkwiet li qatt deher fuq l-​art. Il-​Bibbja tgħidilna: “Gwaj għall-​art u għall-​baħar, għaliex ix-​Xitan niżel għandkom, billi għandu rabja kbira, billi jaf li għandu perijodu qasir taʼ żmien.” (Rivelazzjoni 12:12) Mela dan huwa punt importanti li tiftakar: Il-​bidu tal-​ħakma tas-​saltna t’Alla ma jfissirx paċi u sigurtà mmedjati fuq l-​art. Il-​vera paċi se tiġi iktar tard meta s-​saltna t’Alla tieħu kontroll sħiħ taʼ l-​art. Dan jiġri fit-​tmiem tal-​“perijodu qasir taʼ żmien,” meta Satana u l-​anġli tiegħu jitneħħew min-​nofs biex qatt iktar ma jkunu jistgħu jikkaġunaw inkwiet għal ħadd.

12. Għala nistgħu nistennew li l-​Bibbja tgħidilna meta s-​saltna t’Alla tibda l-​​ħakma tagħha?

¹² Imma Satana meta jintefaʼ ’l barra mis-​sema, u b’hekk jikkaġuna l-​inkwiet fuq l-​art għal “perijodu qasir taʼ żmien”? Il-gvern t’Alla meta jibda l-​ħakma tiegħu? Tagħti l-​Bibbja xi tweġiba? Għandna nistennew li tagħti. Għala? Sewwa, għaliex ħafna bil-​quddiem il-​Bibbja bassret meta l-​Iben t’Alla kellu jidher l-​ewwel bħala bniedem fuq l-​art biex isir il-​Messija. Fil-​fatt, hija indikat dik l-​istess sena li fiha hu sar il-​Messija. Xi ngħidu, allura, dwar il-​miġja bil-​wisq iktar importanti tal-​Messija, jew Kristu, biex jibda l-​ħakma tas-​Saltna tiegħu? Żgur li għandna nistennew li l-​Bibbja għandha tgħidilna wkoll meta dan kellu jiġri!

13. Il-Bibbja kif tbassar dik l-​istess sena li fiha l-​Messija deher fuq l-​art?

¹³ Imma wieħed jistaʼ jistaqsi: ‘Il-​Bibbja fejn tbassar dik l-​istess sena li fiha l-​Messija deher fuq l-​art?’ Il-​ktieb Bibliku taʼ Danjel jgħid: “Mill-​ħruġ tal-​kelma biex Ġerusalemm tiġi restawrata u mibnija mill-​ġdid sal-​Messija l-​Mexxej, se jkun hemm sebaʼ ġimgħat, ukoll tnejn u sittin ġimgħa,” jew b’kollox 69 ġimgħa. (Danjel 9:25) Dawn, madankollu, m’humiex 69 ġimgħa litterali, li jammontaw għal biss 483 jum, jew ftit iżjed minn sena waħda. Dawn huma 69 ġimgħa taʼ snin, jew 483 sena. (Qabbel Numri 14:34.) Il-​kmand biex jiġu rrestawrati u mibnijin mill-​ġdid il-​​ħitan taʼ Ġerusalemm kien mogħti fis-​sena 455 Q.E.K.a (Neħemija 2:​1-8) Mela dawn id-​69 ġimgħa taʼ snin spiċċaw 483 sena wara, fis-​sena 29 E.K. U dik hija l-​istess sena meta Ġesù ġie għand Ġwanni biex jitgħammed! F’dik l-​okkażjoni ġie midluk bl-​ispirtu qaddis u sar il-​Messija, jew Kristu.​—Luqa 3:​1, 2, 21-23.

META L-​GVERN T’ALLA JIBDA L-​ĦAKMA TIEGĦU

14. Is-“siġra” f’​Danjel kapitlu erbgħa x’tirrappreżenta?

¹⁴ Sewwa, allura, il-​Bibbja fejn tbassar is-​sena li fiha Kristu jibda jaħkem bħala sultan tal-​gvern t’Alla? Huwa f’dan l-​istess ktieb Bibliku taʼ Danjel. (Danjel 4:​10-37) Hemmhekk siġra ġganteska li tasal sas-​sema hija wżata biex tirrappreżenta lis-​Sultan Nebukadneżżar taʼ Babilonja. Hu kien l-​ogħla ħakkiem uman f’dak iż-​żmien. Madankollu, is-​Sultan Nebukadneżżar ġie mġiegħel ikun jaf li xi ħadd ogħla kien qiegħed jaħkem. Dan il-​wieħed hu “l-​Iktar Għoli,” jew “is-​Sultan tas-​smewwiet,” Alla Jehovah. (Danjel 4:​34, 37) Mela, b’mod iktar importanti, din is-​siġra m’ogħla s-​sema, tiġi tirrappreżenta l-​ħakma suprema t’Alla, partikolarment fir-​relazzjoni tagħha maʼ l-​art tagħna. L-​istat taʼ ħakma taʼ Jehovah kien espress għal xi żmien permezz tas-​saltna li hu stabbilixxa fuq il-​ġens taʼ Iżrael. B’hekk is-​slaten tat-​tribù taʼ Ġuda, li kienu jsaltnu fuq l-​Iżraeliti, kien jintqal li ‘kienu fuq it-​tron taʼ Jehovah.’​—1 Kronaki 29:23.

15. Meta s-​“siġra” ġiet imqaċċta, għala tpoġġew ċrieki madwarha?

¹⁵ Skond ir-​rakkont Bibliku f’​Danjel kapitlu erbgħa, is-​siġra m’ogħla s-​sema ġiet imqaċċta. Madankollu, iz-​zokk taʼ l-​għeruq ġie mħolli, u ċrieki tal-​​ħadid u tar-​ram ġew imqegħdin madwaru. Dan kellu jżomm iz-​zokk taʼ l-​għeruq milli jikber sakemm jasal il-​waqt li Alla jneħħi l-​irbit u jħallih jibda jikber mill-​ġdid. Imma kif u meta ġie mqaċċat l-​istat taʼ ħakma t’Alla?

16. (a) Kif u meta ġie mqaċċat l-​istat taʼ ħakma t’Alla? (b) Xi ntqal lill-​aħħar sultan taʼ Ġuda li qagħad fuq “it-​tron taʼ Jehovah”?

¹⁶ Maż-żmien, is-​saltna taʼ Ġuda, li Jehovah kien stabbilixxa, saret tant korrotta li hu ħalla lis-​Sultan Nebukadneżżar jeqridha, iqaċċatha. Dan ġara fis-​sena 607 Q.E.K. F’dak iż-​żmien lil Żedekija, l-​aħħar sultan taʼ Ġuda li qagħad fuq it-​tron taʼ Jehovah, intqallu: “Neħħi l-​kuruna. . . . ċertament li ma se tkun taʼ ħadd sakemm jiġi dak li għandu d-​dritt legali, u jien irrid nagħtiha lilu.”​—Eżekjel 21:​25-27.

17. Liema perijodu taʼ żmien beda fis-​sena 607 Q.E.K.?

¹⁷ Mela l-​istat taʼ ħakma t’Alla, bħalma huwa rrappreżentat mis-​“siġra,” ġie mqaċċat fis-​sena 607 Q.E.K. Qatt iktar ma kien hemm gvern biex jirrappreżenta l-​istat taʼ ħakma t’Alla fl-​art. B’hekk, fis-​sena 607 Q.E.K. beda perijodu taʼ żmien li Ġesù Kristu iktar tard irrefera għalih bħala “ż-​żminijiet maħturin tal-​ġnus,” jew, “żminijiet il-​Ġentili.” (Luqa 21:24; King James Version) Matul dawn “iż-​żminijiet maħturin” Alla ma kellux gvern biex jirrappreżenta l-​istat taʼ ħakma tiegħu fl-​art.

18. X’kellu jiġri fit-​tmiem taż-​“żminijiet maħturin tal-​ġnus”?

¹⁸ X’kellu jiġri fit-​tmiem taʼ dawn “iż-​żminijiet maħturin tal-​ġnus”? Jehovah kellu jagħti l-​poter biex jaħkem lill-​Wieħed “li għandu d-​dritt legali.” Dan il-​Wieħed hu Ġesù Kristu. Mela jekk nistgħu niskopru meta jintemmu “ż-​żminijiet maħturin tal-​ġnus,” se nkunu nafu meta Kristu jibda jaħkem bħala sultan.

19. L-istat taʼ ħakma t’Alla fuq l-​art għal kemm “żminijiet” kellu jkun interrott?

¹⁹ Skond Danjel kapitlu erbgħa, dawn “iż-​żminijiet maħturin” kellhom ikunu “sebaʼ żminijiet.” Danjel juri li kellu jkun hemm “sebaʼ żminijiet” li matulhom l-​istat taʼ ħakma t’Alla, bħalma huwa rrappreżentat mis-​“siġra,” ma kellux ikun qiegħed jopera għal fuq l-​art. (Danjel 4:​16, 23) Kemm huma twal dawn is-​“sebaʼ żminijiet”?

20. (a) Kemm huwa twil “żmien” wieħed? (b) Kemm huma twal is-​“sebaʼ żminijiet”? (ċ) Għala ngħoddu sena għal kull jum?

²⁰ F’​Rivelazzjoni kapitlu 12, versi 6 u 14, insibu li 1,260 jum huma daqs “żmien [jiġifieri, żmien wieħed] u żminijiet [jiġifieri, żewġ żminijiet] u nofs żmien.” Dak huwa total taʼ tliet żminijiet u nofs. Mela “żmien” wieħed jiġi ugwali għal 360 jum. Għalhekk, “sebaʼ żminijiet” jagħmlu 7 għal 360 darba, jew 2,520 jum. Issa jekk ngħoddu sena għal kull jum, skond regola tal-​Bibbja, is-​“sebaʼ żminijiet” jiġu ugwali għal 2,520 sena.​—Numri 14:34; Eżekjel 4:6.

21. (a) “Iż-​żminijiet maħturin tal-​ġnus” meta jibdew u jintemmu? (b) Il-​gvern t’Alla meta jibda l-​ħakma tiegħu? (ċ) Għala għadu xieraq li nitolbu biex tiġi s-​saltna t’Alla?

²¹ Diġà tgħallimna li “ż-​żminijiet maħturin tal-​ġnus” bdew fis-​sena 607 Q.E.K. Mela billi ngħoddu 2,520 sena minn dik id-​data, naslu għas-​sena 1914 E.K. Dik hija s-​sena li fiha ntemmu dawn “iż-​żminijiet maħturin.” Miljuni taʼ nies li għadhom ħajjin jiftakru l-​affarijiet li ġraw fl-​1914. F’dik is-​sena, l-​I Gwerra Dinjija bdiet perijodu taʼ inkwiet terribbli li għadu sejjer sa żmienna. Dan ifisser li Ġesù Kristu beda jaħkem bħala sultan tal-​gvern tas-​sema t’Alla fl-​1914. U minħabba li s-​Saltna diġà bdiet il-​ħakma tagħha, kemm huwa f’waqtu li nitolbu biex din “tiġi” u tiknes is-​sistema t’affarijiet mill-​agħar taʼ Satana minn fuq l-​art!​—Mattew 6:10; Danjel 2:44.

22. Xi wħud jistgħu jistaqsu liema mistoqsija?

²² Madankollu wieħed jistaʼ jistaqsi: ‘Jekk Kristu diġà rritorna biex jaħkem fis-​saltna taʼ Missieru, għala ma narawhx?’

[Nota ta’ taħt]

[Tabella f’paġna 140, 141]

Fis-​sena 607 Q.E.K. s-​saltna t’Alla taʼ Ġuda waqgħet.

Fl-​1914 E.K. Ġesù Kristu beda jaħkem bħala sultan tal-​gvern tas-​sema t’Alla

607 Q.E.K.—1914 E.K.

Ottubru, 607 Q.E.K.​—Ottubru, 1 Q.E.K. = 606 snin

Ottubru, 1 Q.E.K.​—Ottubru, 1914 E.K. = 1,914-​il sena

SEBAʼ ŻMINIJIET TAL-ĠENTILI = 2,520 SENA

[Stampa f’paġna 134]

“Qiegħed tirrestawra s-​saltna lil Iżrael f’dan iż-​żmien?”

[Stampa f’paġna 139]

Is-​siġra għolja f’​Danjel kapitlu 4 tirrappreżenta stat divin taʼ ħakma. Għal xi żmien dan kien espress permezz tas-​saltna taʼ Ġuda

[Stampa f’paġna 140, 141]

Is-​siġra ġiet imqaċċta meta s-​saltna taʼ Ġuda ġiet meqruda