Stabar fit-​Tul Maʼ Kulħadd

“Inħeġġukom, I-aħwa, widdbu lil dawk li ma jimxux bl-​ordni, lissnu kliem taʼ faraġ lill-​erwieħ imnikitin, agħtu appoġġ lid-​dgħajfin, stabru fit-​tul maʼ kulħadd.”—1 TESSALONKIN 5:14.

1. Ix-​Xhieda taʼ Jehovah fejn u taħt liema ċirkustanzi wrew sabar fit-​tul?

X’EŻEMPJU taw ix-​Xhieda taʼ Jehovah tal-​lum f’li jistabru fit-​tul! Huma ssaportew ħafna tbatija u persekuzzjoni f’artijiet li qabel kienu Nażisti u Faxxisti u f’pajjiżi bħalma hu l-​Malawi sal-​ġurnata tal-​lum. Jistabru fit-​tul, ukoll, huma dawk li jgħixu fi djar maqsumin reliġjożament.

2. In-​nies taʼ Jehovah minħabba liema żewġ fatturi jgawdu l-​ġenna tal-​art spiritwali?

² Minkejja l-​persekuzzjoni u t-​tbatijiet li jġarrbu, in-​nies iddedikati taʼ Jehovah kienu u għadhom qed igawdu l-​barkiet taʼ ġenna tal-​art spiritwali. Tabilħaqq, il-​fatti juru li Kristjani midlukin bdew igawduha fis-​sena 1919. Minħabba liema affarijiet titgawda din il-​ġenna tal-​art spiritwali? L-​ewwelnett, dawn il-​kundizzjonijiet taʼ ġenna tal-​art jeżistu fost in-​nies taʼ Jehovah għaliex Alla rrestawra lill-​qaddejja midlukin tiegħu lejn l-​“art” tagħhom, jew kundizzjoni, taʼ qima pura. (Isaija 66:7, 8) Il-​ġenna tal-​art spiritwali tiffjorixxi wkoll għaliex kulmin qiegħed fiha juri l-​frottiet tal-​ispirtu t’Alla. Is-​sabar fit-​tul huwa waħda minn dawn. (Galatin 5:22, 23) L-​importanza taʼ din il-​kwalità safejn hija kkonċernata l-​ġenna tal-​art spiritwali tagħna tistaʼ tidher minn din l-​istqarrija mill-​istudjuż William Barclay: “Ma jistaʼ jkun hemm ebda ħaġa bħal sħubija Kristjana mingħajr makrothumia [sabar fit-​tul]. . . . U r-​raġuni għal dak hi sewwa sew din—li makrothumia hi l-​karatteristika kbira t’Alla (Rum. 2.4; 9.22).” (A New Testament Wordbook, paġna 84) Iva, is-​sabar fit-​tul huwa daqshekk importanti!

Nistabru fit-​Tul maʼ Ħutna

3. Ġesù liema lezzjoni dwar is-​sabar fit-​tul ta lil Pietru?

³ L-​appostlu Pietru mid-​dehra kellu xi diffikultà biex juri s-​sabar fit-​tul, għax darba minnhom staqsa lil Ġesù: “Mulej, kemm-il darba għandu ħija jidneb kontra tiegħi u jien għandi naħfirlu? Sa sebaʼ darbiet?” Ġesù qallu: “Ingħidlek, mhux, Sa sebaʼ darbiet, imma, Sa sebgħa u sebgħin darba.” (Mattew 18:21, 22) Fi kliem ieħor, ma hemm ebda limitu għal kemm-il darba rridu nissaportu lil xulxin u naħfru lil xi ħadd li jidneb kontra tagħna. Wara kollox, ma nistgħux nimmaġinaw li xi ħadd se jżomm il-​kont sa 77 darba! Iżda, li naħfru daqshekk żgur li jirrikjedi sabar fit-​tul.

4. L-​anzjani b’mod speċjali għala għandhom bżonn jistabru fit-​tul?

⁴ Meta niġu għat-​turija taʼ sabar fit-​tul minn aħwa spiritwali, ma hemm l-​ebda dubju li l-​anzjani tal-​kongregazzjoni għandhom bżonn li jkunu taʼ eżempju. Il-​paċenzja tagħhom tistaʼ tiġi ttestjata għaliex uħud minn sħabhom fit-​twemmin jistgħu jkunu traskurati jew indifferenti. Oħrajn jistgħu joqogħdu jitnikkru meta jkollhom jikkorreġu drawwiet ħżiena. L-​anzjani jridu joqogħdu attenti li ma jiġux imdejqin jew offiżi malajr mid-​djufijiet taʼ ħuthom Kristjani rġiel u nisa. Minflok, dawn ir-​ragħajja spiritwali għandhom bżonn jiftakru l-​parir: “Aħna, iżda, li aħna b’saħħitna jmissna nerfgħu d-​djufijiet taʼ dawk li m’humiex b’saħħithom, u mhux ingħoġbu lilna nfusna.”​—Rumani 15:1.

5. Liema ħaġa jkollna l-​ħila nissaportu jekk nistabru fit-​tul?

⁵ Imbagħad jerġaʼ, konflitti fil-​personalità jistgħu jqumu minħabba djufijiet u difetti umani. Minħabba nuqqasijiet jew tendenzi, aħna ndejqu lil ħutna, biex ingħidu hekk, u huma jistgħu jagħmlu hekk lilna. Għalhekk, kemm hu xieraq il-​parir: “Komplu ssaportu lil xulxin u aħfru lil xulxin b’xejn jekk xi ħadd għandu x’jilmenta kontra ieħor. Saħansitra bħalma Jehovah ħafer lilkom mill-​qalb, hekk agħmlu intom ukoll.” (Kolossin 3:13) Li ‘nissaportu lil xulxin’ ifisser li nistabru fit-​tul, għalkemm jistaʼ jkun li għandna raġunijiet validi biex ingergru kontra xi ħadd. Ma rridux nirritaljaw jew nikkastigaw lil ħuna, u lanqas saħansitra ma nlissnu xi tgergir kontra tiegħu.—Ġakbu 5:9.

6. Li wieħed jistabar fit-​tul għala hi l-​korsa taʼ għerf?

⁶ Bl-​istess effett huwa l-​parir li nsibu f’​Rumani 12:19: “Tivvendikawx irwieħkom, maħbubin, imma ċedu għall-​korla; għax hu miktub: ‘Tiegħi hi l-​vendetta; jien se nħallas lura, igħid Jehovah.’” Li ‘nċedu għall-​korla’ jfisser li ma ngħaġġlux biex nirrabjaw, jew li nistabru fit-​tul. Li nuru din il-​kwalità huwa l-​korsa taʼ għerf, għax jibbenefika lilna u lil oħrajn. Jekk qamet xi problema, aħna nfusna nħossuna aħjar għaliex billi nistabru fit-​tul, m’aħniex qed ingħarrqu l-​affarijiet. U dak li lejh aħna neżerċitaw is-​sabar fit-​tul ukoll iħossu aħjar għaliex m’aħniex nikkastigawh jew nirritaljaw kontra tiegħu b’xi mod. Mhux taʼ b’xejn li Pawlu ħeġġeġ lill-​Kristjani sħabu biex ‘ilissnu kliem taʼ faraġ lill-​erwieħ imnikktin, jagħtu appoġġ lid-​dgħajfin, jistabru fit-​tul maʼ kulħadd’!—1 Tessalonkin 5:14.

Ġewwa l-​Familja

7. Il-​miżżewġin għala għandhom bżonn jistabru fit-​tul?

⁷ Intqal sewwa li żwieġ hieni huwa l-​għaqda taʼ tnejn li dejjem lesti li jaħfru. X’ifisser dak? Li nies li b’mod hieni huma miżżewġin jistabru fit-​tul f’li jittrattaw maʼ xulxin. Individwi spiss jinġibdu lejn xulxin minħabba t-​temperamenti opposti tagħhom. Dawn id-​differenzi jistgħu jqajmu interess, u madankollu jistgħu jkunu wkoll sors taʼ nuqqas taʼ qbil li jżid mal-​istress u mal-​anzjetajiet li diġà minħabba fihom Kristjani miżżewġin għandhom “tribulazzjoni f’laħamhom.” (1 Korintin 7:28) Per eżempju, suppost li raġel miżżewweġ huwa indifferenti fejn jidħlu d-​dettalji jew għandu t-​tendenza li jkun kemmxejn traskurat jew ma jżommhiex. Din tistaʼ tkun taʼ prova mhux ħażin għal martu. Imma jekk suġġerimenti bi kliem ħelu huma għalxejn, hi tistaʼ sempliċement ikollha tissaporti d-​djufijiet tiegħu billi tistabar fit-​tul.

8. Irġiel miżżewġin għala jistgħu jkollhom bżonn jistabru fit-​tul?

⁸ Mill-​banda l-​oħra, mara miżżewġa tistaʼ tkun fitta wisq fuq id-​dettalji u jkollha t-​tendenza li tgerger maʼ żewġha. Dan jistaʼ sewwa jfakkarna fl-​iskrittura: “Aħjar tgħix fuq il-​bejt milli taqsam id-​dar maʼ mara li tgerger il-​ħin kollu.” (Proverbji 25:24, Today’s English Version) F’każ bħal dan, is-​sabar fit-​tul huwa meħtieġ biex taġixxi fi qbil mal-​parir taʼ Pawlu: “Intom irġiel miżżewġin, ibqgħu ħobbu lin-​nisa tagħkom u la tirrabjawx bl-​aħrax magħhom.” (Kolossin 3:19) Is-​sabar fit-​tul huwa meħtieġ ukoll biex l-​irġiel miżżewġin jagħtu kas il-​parir tal-​appostlu Pietru: “Intom l-​irġiel miżżewġin, komplu għammru bl-​istess manjiera ma[n-nisa tagħkom] skond il-​għarfien, billi tagħtuhom unur bħal li kieku lil reċipjent iktar dgħajjef, il-​femminili, ladarba intom ukoll werrieta magħhom tal-​favur mhux mistħoqq tal-​ħajja, sabiex it-​talb tagħkom ma jkunx imtellef.” (1 Pietru 3:7) Id-​djufijiet taʼ martu jistgħu kultant ikunu taʼ prova għal raġel miżżewweġ, imma s-​sabar fit-​tul se jgħinu biex jissaportihom.

9. Is-​sabar fit-​tul għala huwa meħtieġ min-​naħa tal-​ġenituri?

⁹ Il-​ġenituri għandhom bżonn jistabru fit-​tul jekk iridu li jkollhom suċċess f’li jrabbu lil uliedhom. Iż-​żgħażagħ jistgħu jagħmlu l-​istess żballji darba wara l-​oħra. Jistgħu jidhru li huma rashom iebsa jew bil-​mod biex jitgħallmu u jistgħu kontinwament iġarrbu lill-​ġenituri tagħhom. Taħt ċirkustanzi bħal dawn, ġenituri Kristjani ma jridux igħaġġlu biex jirrabjaw, ma jridux jitilfu t-​tempra jew l-​imġieba tagħhom imma jibqgħu kalmi waqt li jkunu sodi favur prinċipji taʼ tjieba. Il-​missirijiet għandhom jiftakru li huma wkoll kienu żgħażagħ darba u wkoll għamlu xi żballji. Huma għandhom bżonn japplikaw il-​parir taʼ Pawlu: “Intom il-​missirijiet, toqogħdux taqtgħu nifs it-​tfal tagħkom, biex ma jsirux qalbhom sewda.”—Kolossin 3:21.

Maʼ Dawk taʼ Barra

10. Kif għandna naġixxu fuq il-​post tax-​xogħol tagħna, bħalma jidher minn liema esperjenza?

¹⁰ Minħabba l-​imperfezzjoni u l-​egoiżmu tal-​bniedem, sitwazzjonijiet mhux pjaċevoli jistgħu jqumu fuq il-​post tax-​xogħol taʼ Kristjan. Hija l-​korsa taʼ għerf li tuża t-​tattika u li tissaporti n-​nuqqasijiet minħabba fil-​paċi. Turi kemm dan hu għaqli hija l-​esperjenza taʼ Kristjan li kien il-​vittma taʼ ħafna nuqqas taʼ qbil ikkaġunat minn impjegat sieħbu li kien igħir. Minħabba li l-​hu m’għamilx kapital minn din il-​ħaġa imma stabar fit-​tul, maż-​żmien kellu l-​ħila jibda studju tal-​Bibbja mal-​impjegat li kien jaqlaʼ l-​inkwiet.

11. Meta jkollna bżonn b’mod speċjali li nistabru fit-​tul, u għala?

¹¹ In-​nies taʼ Jehovah għandhom bżonn b’mod speċjali li jistabru fit-​tul meta jagħtu xiehda lil dawk barra l-​kongregazzjoni Kristjana. Darba wara l-​oħra, Kristjani jiltaqgħu maʼ rispons pastaż jew aħrax. Ikun xieraq jew għaqli li tirrispondi bl-​istess manjiera? Le, għax jekk tagħmel hekk ma tkunx qed turi sabar fit-​tul. Il-​korsa taʼ għerf hi li tiftakar u li ssegwi l-​proverbju għaqli: “Tweġiba, meta hi ħelwa, iddawwar lil hinn id-​dagħdigħa, imma kelma li twaġġaʼ ġġiegħel ir-​rabja titlaʼ.”−Proverbji 15:1.

Il-​Fidi u t-​Tama Jgħinu f’li Wieħed Juri Sabar fit-​Tul

12, 13. Liema kwalitajiet se jgħinuna biex nistabru fit-​tul?

¹² X’jistaʼ jgħinna biex nuru sabar fit-​tul, biex nissaportu kundizzjonijiet koroh ħafna? Ħaġa waħda hi fidi fil-​wegħdi t’Alla. Irridu noqogħdu fuq il-​kelma t’Alla. L-​Iskrittura tgħid: “Ebda tentazzjoni ma ġiet fuqkom ħlief dik li hi komuni għall-​bnedmin. Imma Alla hu leali, u mhux se jħallikom tiġu ttantati iktar milli tifilħu, imma flimkien mat-​tentazzjoni se jagħmel ukoll it-​triq tal-​ħruġ sabiex tkunu tistgħu tissaportuha.” (1 Korintin 10:13) Fi kliem ieħor, bħalma poġġieha wieħed anzjan fl-​età: “Jekk Alla jippermettih, jien nissaportih.” Iva, aħna nistgħu nissaportuh billi jkollna sabar fit-​tul.

¹³ Relatata mill-​qrib mal-​fidi hija t-​tama fis-​Saltna t’Alla. Meta ssaltan għal fuq l-​art, il-​kundizzjonijiet ħżiena kollha li jikkaġunawlna niket se jiġu mneħħijin. F’dan ir-​rigward, is-​salmista David qal: “Ħalli r-​rabja waħedha u itlaq id-​dagħdigħa; turix ruħek sħun biss biex tagħmel il-​ħażen. Għax dawk li jagħmlu l-​ħażen infushom se jinqatgħu, imma dawk li qed jittamaw f’Jehovah huma dawk li se jkollhom pussess tal-​art.” (Salm 37:8, 9) It-​tama ċerta li Alla dalwaqt se jneħħi dawn iċ-​ċirkustanzi kollha taʼ prova tgħinna biex nistabru fit-​tul.

14. Liema esperjenza turi għala għandna nistabru fit-​tul maʼ sieħeb jew sieħba li ma temminx?

¹⁴ Kif għandna nirreaġixxu jekk sieħeb (jew sieħba) li ma jemminx jikkaġunalna niket? Ibqaʼ fittex lil Alla għal għajnuna, u ibqaʼ ttama li dak li jopponi se jsir adoratur taʼ Jehovah. Il-​mara taʼ wieħed Kristjan xi minn daqqiet ma ridetx tippreparalu l-​ikel u taħsillu Ibiesu. Hi wżat diskors maħmuġ, ma kinetx tkellmu għal ġranet sħaħ, u saħansitra ppruvat titfaʼ magħmul fuqu permezz tas-​seħer. “Imma,” qal hu, “jien dort kull darba lejn Jehovah fit-​talb, u fdajt fiH biex igħinni niżżviluppa l-​kwalità tajba tas-​sabar fit-​tul biex ma nitlifx il-​bilanċ Kristjan tiegħi. Jien ittamajt ukoll li xi darba l-​attitudni taʼ qalb tagħha tinbidel.” Wara 20 sena taʼ trattament bħal dan, martu bdiet tinbidel, u hu qal: “Kemm jien grat lejn Jehovah li għenni nikkultiva l-​frotta tal-​ispirtu, is-​sabar fit-​tul, għaliex issa nistaʼ nara r-​riżultat: Marti bdiet timxi fil-​passaġġ tal-​ħajja!”

It-​Talb, l-​Umiltà, u l-​Imħabba se Jgħinu

15. It-​talb għala jistaʼ jgħinna biex nistabru fit-​tul?

¹⁵ It-​talb huwa għajnuna kbira oħra f’li nuru sabar fit-​tul. Pawlu ħeġġeġ: “Tkunu anzjużi fuq xejn, imma f’kollox bit-​talb u bit-​tħannin flimkien maʼ radd il-​ħajr ħa jkunu l-​petizzjonijiet tagħkom imgħarrfin lil Alla; u l-​paċi t’Alla li tisboq kull ħsieb se tgħasses lil qlubkom u l-​qawwiet mentali tagħkom permezz taʼ Kristu Ġesù.” (Filippin 4:6, 7) Ftakar ukoll f’li tagħti kas it-​twissija: “Itfaʼ t-​tagħbija tiegħek fuq Jehovah innifsu, u hu nnifsu se jsostnik. Hu qatt ma se jħalli lil wieħed twajjeb jixxengel.”—Salm 55:22.

16. F’li nistabru fit-​tul, l-​umiltà kif tistaʼ tgħinna?

¹⁶ L-​umiltà hija jerġaʼ għajnuna kbira oħra f’li nikkultivaw il-​frotta tal-​ispirtu taʼ sabar fit-​tul. Wieħed kburi m’għandux paċenzja. Hu jieħu għalih mix-​xejn, malajr jirrabja, u mhux se jissaporti xi trattament mhux favorevoli. Dan kollu huwa l-​oppost taʼ li tistabar fit-​tul. Imma wieħed umli mhux se jieħu lilu nnifsu bis-​serjetà żżejjed. Hu se jistenna fuq Jehovah, bħalma għamel David meta kien ikkaċċjat mis-​Sultan Sawl u nsolentat mill-​Benjamit Ximej. (1 Samwel 24:4-6; 2 Samwel 16:5-13) B’hekk, aħna għandna nixtiequ li nimxu ‘b’umiltà sħiħa tal-​moħħ u kalma, bis-​sabar fit-​tul, billi nissaportu lil xulxin bl-​imħabba.’ (Efesin 4:2) Barra minn hekk, għandna ‘numiljaw irwieħna f’għajnejn Jehovah.’—Ġakbu 4:10.

17. L-​imħabba għala se tgħinna biex nistabru fit-​tul?

¹⁷ L-​imħabba mhix egoista tgħinna b’mod speċjali biex nistabru fit-​tul. Tabilħaqq, “l-​imħabba tistabar fit-​tul,” għax iġġiegħel li jkollna f’qalbna l-​aħjar interessi taʼ oħrajn. (1 Korintin 13:4) L-​imħabba tgħinna biex ikollna l-​empatija, li npoġġu lilna nfusna fiż-​żarbun taʼ oħrajn, bħal li kieku. Barra minn hekk, l-​imħabba tgħinna biex nistabru fit-​tul għaliex “tiflaħ kollox, temmen kollox, tittama kollox, tissaporti kollox. L-​imħabba qatt ma tonqos.” (1 Korintin 13:7, 8) Iva, bħalma tpoġġiha l-​għanja tas-​Saltna numru 200 fil-​ktieb Sing Praises to Jehovah:

“L-​imħabba tfittex is-​sew.

Tara li l-​aħwa jinbnew.

Jekk int tħobb se tkun ħanin,

’L ħutek tqishom li tajbin.”

Tistabar fit-​Tul bil-​Ferħ?

18. Kif inhu possibbli li tistabar fit-​tul bil-​ferħ?

¹⁸ Pawlu talab biex sħabu fit-​twemmin f’Kolosse jiġu mimlijin bil-​għarfien eżatt tar-​rieda t’Alla sabiex jimxu kif jixraq lil Jehovah, jogħġbuh, u jagħtu frott f’kull xogħol tajjeb. Huma kellhom b’hekk jiġu ‘magħmulin qawwijin bil-​qawwa kollha safejn tasal is-​setgħa glorjuża tiegħu sabiex jissaportu bis-​sħiħ u jistabru fit-​tul bil-​ferħ.’ (Kolossin 1:9-11) Xorta waħda, kif jistaʼ xi ħadd ‘jistabar fit-​tul bil-​ferħ’? Dak mhux kontradittorju, għax li jkollok il-​ferħ imsemmi fl-​Iskrittura mhix sempliċement kwistjoni taʼ li tkun moħħok frisk jew ferrieħi. Il-​frotta tal-​ispirtu tal-​ferħ tinkludi sentiment taʼ sodisfazzjon profond minħabba li qed tagħmel il-​ħaġa sewwa quddiem Alla. Hija wkoll espressjoni tat-​tama taʼ li tirċievi premju mwiegħed bħala riżultat taʼ li teżerċita s-​sabar fit-​tul. Dak hu għala Ġesù qal: “Henjin intom meta n-​nies iżebilħukom u jippersegwitawkom u bil-​gideb igħidu kull xorta taʼ ħaġa mill-​agħar kontra tagħkom minħabba fija. Ifirħu u aqbżu bil-​ferħ, ladarba l-​premju tagħkom hu kbir fis-​smewwiet; għax b’dak il-​mod ippersegwitaw lill-​profeti qabilkom.”−Mattew 5:11, 12.

19. Liema eżempji juru li huwa possibbli li kemm tistabar fit-​tul u kemm tkun ferħan?

¹⁹ Ġesù kellu ferħ bħal dan. Tabilħaqq, “għall-​ferħ li tqiegħed quddiemu hu ssaporta zokk tat-​tortura, billi stmerr il-​għajb.” (Ebrej 12:2) Permezz taʼ dak il-​ferħ Ġesù setaʼ jistabar fit-​tul. Bl-​istess mod, ikkunsidra x’ġara meta l-​appostli ġew imsawtin bil-​frosta u ordnati biex “ma jitkellmux iżjed fuq il-​bażi taʼ isem Ġesù.” Huma “telqu għal triqithom minn quddiem is-​Sinedriju, jifirħu għaliex kienu ġew magħdudin li jistħoqqilhom ikunu mżebilħin minħabba f’ismu. U kuljum fit-​tempju u minn dar għal dar komplew bla heda jgħallmu u jiddikjaraw l-​aħbar tajba dwar il-​Kristu, Ġesù.” (Atti 5:40-42) X’eżempju mill-​aħjar li jagħti prova li s-​segwaċi taʼ Kristu jistgħu jistabru fit-​tul bil-​ferħ!

20. Jekk nuru s-​sabar fit-​tul, kif jistaʼ dan jeffettwa r-​relazzjoni tagħna maʼ oħrajn?

²⁰ Il-​Kelma t’Alla żgur li tagħti parir għaqli meta tħeġġiġna biex ma nirritaljawx, biex ma ngħaġġlux biex nirrabjaw waqt li nittamaw għall-​aħjar—iva, biex nistabru fit-​tul! Għandna bżonn talb regulari u din il-​frotta tal-​ispirtu t’Alla biex immorru tajjeb maʼ ħutna rġiel u nisa fil-​kongregazzjoni, maʼ dawk fil-​familja tagħna, maʼ nies fuq il-​post tax-​xogħol tagħna, u maʼ individwi li niltaqgħu magħhom fil-​ministeru Kristjan. U x’jistaʼ jgħinna biex nuru s-​sabar fit-​tul? Il-​fidi, it-​tama, l-​umiltà, il-​ferħ, u l-​imħabba. Verament, bi kwalitajiet bħal dawn nistgħu nistabru fit-​tul lejn kulħadd.

Tiftakar?

◻ Is-​sabar fit-​tul għala huwa essenzjali għal li nieħdu sehem f’ġenna tal-​art spiritwali?

◻ L-​anzjani għala b’mod speċjali għandhom bżonn li jistabru fit-​tul?

◻ Is-​sabar fit-​tul għala għandu jiġi kkultivat minn irġiel u nisa miżżewġin?

◻ Liema kwalitajiet oħra se jgħinuna biex nistabru fit-​tul?

[Stampa f’paġna 13]

Liema parir mingħand Ġesù għen lil Pietru biex jistabar fit-​tul?