Lil Liema Alla Għandek Tadura?

L-​EWWEL, min hu dak Alla wieħed li waħdu għandu jiġi meqjum? Il-​Bibbja twieġeb b’mod dirett ħafna. Il-​ktieb taʼ Rivelazzjoni jiddikjara: “Int jistħoqqlok, Jehovah, saħansitra Alla tagħna, li tirċievi l-​glorja u l-​unur u l-​qawwa, għaliex inti ħloqt l-​affarijiet kollha, u minħabba fir-​rieda tiegħek eżistew u nħolqu.” (Rivelazzjoni 4:11) Iva, Jehovah, il-​Ħallieq, huwa l-​uniku Alla li jixraqlu l-​qima tagħna. Għala? Issa niġu għal dik il-​mistoqsija minn hawn u ftit ieħor. Imma l-​ewwel, ejjew nitkellmu dwar l-​allat l-​oħra li jiġu meqjumin mill-​bnedmin.

Wara l-​Allat Foloz Kollha

Għalkemm il-​bniedem jaqdi ħafna allat, il-​verità hi li l-​qima kollha mogħtija lill-​allat fil-​ġnus kollha—apparti mill-​qima mogħtija lil Jehovah, il-​Ħallieq—tilħaq l-​iskop taʼ alla wieħed biss. B’liema mod? Aqra l-​kliem tal-​appostlu Pawlu lill-​Kristjani f’Korintu. F’dik il-​belt ħafna allat kienu jiġu meqjumin, mid-​diskla Afrodite sa Aesculapius, l-​alla tal-​fejqan. Pawlu wera, madankollu, li verament kien hemm qawwa waħda li thedded wara dawk l-​allat kollha. Hu kiteb: “L-​affarijiet li l-​ġnus jissagrifikaw huma jissagrifikawhom lid-​demonji, u mhux lil Alla.” (1 Korintin 10:20) Iva, il-​Korintin pagani qiemu lid-​demonji.

Id-demonji kellhom il-​bidu tagħhom fi rvell. L-​ewwel u l-​akbar minnhom kien dak il-​ħlejqa anġeliku li sseduċa lil Eva f’li tikser il-​liġi t’Alla lura fil-​ġnien taʼ Għeden. (Ġenesi 3:1-6; Ġwann 8:44) Billi għamel hekk, dan il-​ħlejqa rribella kontra s-​sovranità tal-​Ħallieq. Wara, hu beda jissejjaħ Satana, li tfisser “Wieħed li Jirreżisti.” Iktar tard, ħlejjaq spirti oħra ngħaqdu miegħu fl-​irvell. Huma wkoll saru demonji, u Satana huwa identifikat bħala “l-​ħakkiem tad-​demonji.” (Mattew 12:24, 26) Fil-​ktieb taʼ Rivelazzjoni, dawn id-​demonji huma msejħin l-​“anġli” taʼ Satana. (Rivelazzjoni 12:7) Mela l-​qima tad-​demonji hija l-​istess bħall-​qima taʼ Satana.

Satana għandu influwenza enormi. L-​appostlu Ġwanni qal li “d-​dinja kollha” qiegħda fis-​setgħa tiegħu, u Pawlu sejjaħlu “l-​alla taʼ din is-​sistema taʼ affarijiet.” (1 Ġwann 5:19; 2 Korintin 4:4) B’hekk, il-​qima taʼ kwalunkwe alla apparti minn Jehovah hija verament il-​qima taʼ Satana. Tal-​inqas, tilħaq l-​iskopijiet taʼ Satana minħabba li l-​mira tiegħu hi li jisseduċi t-​tfal taʼ Adam u Eva biex jirvellaw kontra Jehovah. Ladarba Satana qed “jiżżvija lill-​art abitata kollha,” biċ-​ċar hu qed ikollu suċċess fil-​maġġoranza vasta taʼ każi. (Rivelazzjoni 12:9) Imma mhux f’kollha. Għad hemm miljuni li qed jippruvaw iqimu lil Jehovah. Għala?

Il-​Frott taʼ Qima Ħażina

L-​ewwel ħaġa, huma jafu li l-​qima taʼ allat oħra barra minn Jehovah tiswa iktar milli lesti li jħallsu. Tħaffir arkeoloġiku taʼ Kartaġni tal-​qedem fit-​Tramuntana tal-​Afrika skopra ċimiterju taʼ tfal. Fih instabu skeletri taż-​żgħar li kienu ġew issagrifikati lill-​alla Baal tal-​ Feniċi. Is-​Sagrifiċċju tat-​tfal kien il-​prezz terribbli li dawk il-​Kartaġiniżi ħallsu għall-​qima taʼ Baal. Il-​Kattoliċiżmu Medjovali wkoll kien jesiġi prezz meta kkaġuna sofferenzi bla qies fi Kruċjati mdemmija u Inkwiżizzjonijiet krudili. Il-​qima tal-​allat Inka tal-​Amerka pre-Kolumbjana involviet il-​qtil ritwali taʼ eluf.

Fi żminijiet iktar moderni, forom differenti taʼ qima kienu involuti fi qtil tal-​massa fl-​Indja, u huma kkontribwew għal problemi politiċi gravi fil-​Lvant Nofsani u fl-​Irlanda taʼ Fuq. L-​injoranza, is-​superstizzjoni, u l-​biżaʼ għandhom ukoll jiġu mniżżlin bħala parti mill-​prezz li l-​bniedem iħallas għall-​qima tal-​ħafna allat tiegħu.

Għala Għandek Taqdi Lil Alla Jehovah?

Mill-​banda l-​oħra, il-​qima taʼ Jehovah iġġib benefiċċji biss. L-​ewwel ħaġa, hu “Dak li jgħix għal dejjem taʼ dejjem, li ħalaq is-​sema u l-​affarijiet fih u l-​art u l-​affarijiet fiha u l-​baħar u l-​affarijiet fih.” (Rivelazzjoni 10:6) B’hekk, għandna nqimuh minħabba li hu l-​Hallieq tagħna.

Imbagħad, għandna nqimu lil Alla Jehovah minħabba li l-​kwalitajiet tiegħu jistiednu lilna biex inqimuh. L-​appostlu Ġwanni qal li “Alla hu mħabba.” (1 Ġwann 4:8) Ir-​raġel leali Ġob qal li “[Alla] hu għaref fil-​qalb u b’saħħtu fil-​qawwa.” (Ġob 9:4) Mosè għanna dwaru: “Il-​Blata, perfetta hi l-​attività tiegħu, għax mogħdijietu kollha huma ġustizzja. Alla tal-​fedeltà, li miegħu m’hemm ebda inġustizzja; twajjeb u dritt hu.” (Dewteronomju 32:4) Min se jaħsibha darbtejn biex jaqdi lil Alla bħal dan?

Barra minn dan, il-​Bibbja tgħid: “[I]d-devozzjoni lejn Alla hi taʼ ġid għall-​affarijiet kollha, billi toffri l-​wegħda tal-​ħajja issa u dik li għandha tiġi.” (1 Timotew 4:8) Kemm hu veru dan! Jehovah irid dak li hu tajjeb għall-​umanità. Hu pprovda l-​art bħala dar sabiħa għall-​ħolqien tiegħu, u għamel provvediment abbundanti sabiex il-​ħajja tkun taʼ gost. Minkejja l-​irvell tal-​bniedem, Alla kompla jmantni l-​ħajja fuq din l-​art, billi jipprovdi l-​ħtiġijiet materjali kollha tal-​bniedem hekk kif “jagħmel ix-​xemx tiegħu titlaʼ fuq nies mill-​agħar u tajbin u jagħmel ix-​xita tinżel fuq nies twajbin u mhux twajbin.”—Mattew 5:45.

Imma l-​“wegħda tal-​ħajja issa” tmur ’il bogħod iktar. Li taqdi lil Alla hija ħaġa sodisfaċenti u li thennik. Kienet dak li konna ddisinnjati li nagħmlu. U Alla jgħin lil dawk li fedelment jaqduh biex jagħmlu suċċess mill-​ħajja. Permezz tal-​Bibbja, hu jagħti gwida lil dawk li m’humiex miżżewġin, lill-​koppji miżżewġin, lit-​tfal—nies minn kull sfond tal-​ħajja. Hu jagħti għerf taʼ min joqgħod fuqu u prattiku biex igħin fis-​sitwazzjonijiet kollha sabiex nistgħu nsolvu l-​problemi taʼ li ngħixu bħala bnedmin imperfetti f’dinja taħt l-​influwenza taʼ Satana. Jekk inqimu lil Alla bil-​mod li jogħgob lilu, aħna se ngawdu “l-​paċi t’Alla li tisboq kull ħsieb.”—Filippin 4:7.

Taʼ min jinnotaha, ukoll, hija l-​“wegħda tal-​ħajja . . . li għandha tiġi.” Ġesù qal lill-​Fariżew Nikodemu: “Alla tant ħabb lid-​dinja li ta l-​Iben uniġenitu tiegħu, sabiex kulmin jeżerċita fidi fih jistaʼ ma jinqeridx imma jkollu l-​ħajja taʼ dejjem.” (Ġwann 3:16) Ħajja taʼ dejjem! Liema alla ħlief Jehovah jistaʼ jwiegħed ħaġa bħal din u mbagħad iwettaq il-​wegħda tiegħu? Il-​kundizzjoni finali taʼ dawk li jirċievu dak ir-​rigal grandjuż hija deskritta f’Rivelazzjoni: “U se jimsaħ kull demgħa minn għajnejhom, u l-​mewt ma tkunx iżjed, u la l-​għali u la l-​biki u lanqas l-​uġigħ ma jkunu iżjed. L-​affarijiet taʼ qabel għaddew.” (Rivelazzjoni 21:4, 5) Verament, il-​prospetti tal-​ħajja li għandha tiġi għandhom jagħmluna nkunu rridu naqdu lil Jehovah!

Liema Alla, mela, għandna nqimu? Biss lil Jehovah, il-​Ħallieq. Mill-​allat kollha, lilu biss japplikaw il-​kelmiet: “Kbar u tal-​għaġeb huma x-​xogħlijiet tiegħek, Alla Jehovah, li Tistaʼ Kollox. Taʼ tjieba u veri huma mogħdijietek, Sultan tal-​eternità. Min mhux tassew se jibżaʼ minnek, Jehovah, u jigglorifika lil ismek, għaliex int waħdek leali? Għax il-​ġnus kollha se jiġu u jqimu quddiemek, għaliex id-​digrieti taʼ tjieba tiegħek saru jidhru.” (Rivelazzjoni 15:3, 4) Kemm huma għaqlin dawk li jwieġbu għat-​tħeġġiġ tas-​salmista: “O idħlu, ejjew inqimu u mmilu; ejjew ninżlu għarrkobbtejna quddiem Jehovah Dak li Għamilna”!—Salm 95:6.

[Stampa f’paġna 5]

Xi wħud mill-​allat li Satana qanqal lill-​bniedem biex iqim