Iġru Wara d-​Devozzjoni Lejn Alla Bħala Kristjani Mgħammdin

“Madankollu, int, O raġel t’Alla, . . . iġri wara t-​tjieba, d-​devozzjoni lejn Alla.”—1 TIMOTEW 6:11.

1. Kif twieġeb il-​mistoqsija, Liema hi l-​iktar ġurnata mportanti taʼ ħajtek? Għala twieġeb hekk?

LIEMA hi l-​iktar ġurnata mportanti taʼ ħajtek? Jekk int Xhud imgħammed taʼ Jehovah, bla dubju int se twieġeb, ‘X’taħseb, dak in-​nhar li tgħammidt!’ Ċertament, il-​magħmudija hija pass importanti f’ħajtek. Hija simbolu fuq barra li int għamilt dedikazzjoni sħiħa u bla riżerva lil Jehovah biex tagħmel ir-​rieda tiegħu. Il-​magħmudija tiegħek timmarka d-​data tal-​ħatra tiegħek bħala ministru taʼ Dak Alla l-​Iktar Għoli, Jehovah.

2. (a) Kif jistaʼ jintwera b’tixbieha li l-​magħmudija mhix l-​aħħar pass li int tieħu fil-​korsa Kristjana tiegħek? (b) Liema passi preliminarji mportanti ħadt qabel tgħammidt?

² Hija l-​magħmudija, iżda, l-​aħħar pass li int tieħu fil-​korsa Kristjana tiegħek? ’Il bogħod minn dan! Biex nagħtu tixbieha: F’ħafna artijiet ċeremonja taż-​żwieg timmarka t-​tmiem taʼ perijodu taʼ pjanar u preparazzjoni (u ġeneralment taʼ għarusija). Fl-​istess ħin, timmarka l-​bidu taʼ ħajja flimkien bħala koppja miżżewġa. Bl-​istess mod, il-​magħmudija tiegħek hija l-​quċċata taʼ perijodu taʼ preparazzjoni li matulu int ħadt għadd taʼ passi preliminarji mportanti. Int ksibt għarfien dwar Alla u Kristu. (Ġwann 17:3) Int bdejt teżerċita fidi f’Jehovah bħala l-​veru Alla, fi Kristu bħala s-​Salvatur tiegħek, u fil-​Bibbja bħala l-​Kelma t’Alla. (Atti 4:12; 1 Tessalonkin 2:13; Ebrej 11:6) Inti wrejt dik il-​fidi billi ndimt mill-​korsa taʼ azzjoni taʼ qabel tiegħek u kkonvertejt għal korsa taʼ tjieba. (Atti 3:19) Int imbagħad għamilt deċiżjoni biex tiddedika lilek innifsek lil Jehovah biex tagħmel ir-​rieda tiegħu. (Mattew 16:24) Fl-​aħħar, int tgħammidt.—Mattew 28:19, 20.

3. (a) Kif nistgħu nuru li l-​magħmudija tagħna timmarka l-​bidu taʼ ħajja taʼ servizz iddedikat lil Alla? (b) X’mistoqsijiet iqumu, u t-​tweġibiet għala għandhom ikunu taʼ nteress għalina?

³ Il-​maglimudija tiegħek, iżda, mhix it-​tmiem iżda l-​bidu taʼ ħajja taʼ servizz sagru ddedikat lil Alla. Kif innota wieħed studjuż Bibliku, il-​ħajja Kristjana ma tridx tkun ‘qabża inizjali segwita minn inattività kronika.’ Kif, mela, tistaʼ turi li, fil-​każ tiegħek, il-​magħmudija ma tirrappreżentax sempliċement ‘qabża inizjali’? Huwa billi ssegwi korsa taʼ devozzjoni lejn Alla matul ħajtek kollha. X’inhi din id-​devozzjoni lejn Alla? Għala huwa neċessarju li ssegwiha? Kif tistaʼ tikkultivaha iżjed bis-​sħiħ f’ħajtek? It-​tweġibiet għandhom ikunu taʼ nteress kbir għalina, għax aħna rridu nkunu persuni identifikati minn “egħmejjel taʼdevozzjoni lejn Alla” jekk irridu nibqgħu ħajjin fil-​jum li riesaq taʼ ġudizzju taʼ Jehovah.—2 Pietru 3:11, 12.

It-​Tifsir Taʼ Devozzjoni Lejn Alla

4. X’wissa Pawlu lil Timotew biex jagħmel, u x’kien Timotew f’dak iż-​żmien?

⁴ F’xi żmien bejn is-​sena 61 u 64 E.K., l-​appostlu Pawlu kiteb l-​ewwel ittra spirata tiegħu lid-​dixxiplu Kristjan Timotew. Wara li ddeskriva l-​perikli li tistaʼ twassal għalihom l-​imħabba tal-​flus, Pawlu kiteb: “Madankollu, int, O raġel t’Alla, aħrab minn dawn l-​affarijiet. Iżda iġri wara . . . d-​devozzjoni lejn Alla.” (1 Timotew 6:9-11) Taʼ nteress, f’dan iż-​żmien Timotew kien forsi għadu kif għalaq it-​30. Kien diġà vjaġġa ħafna mal-​appostlu Pawlu u kien ingħata l-​awtorità biex jaħtar indokraturi u qaddejja ministerjali fil-​kongregazzjonijiet. (Atti 16:3; 1 Timotew 5:22) Madankollu, Pawlu wissa lil dan ir-​raġel Kristjan iddedikat u mgħammed u matur biex jiġri wara d-​devozzjoni lejn Alla.

5. X’inhu t-​tifsir tal-​espressjoni “devozzjoni lejn Alla”?

⁵ X’ried ifisser Pawlu bl-​espressjoni “devozzjoni lejn Alla”? Il-​kelma oriġinali Griega (eu·se’bei·a) tistaʼ tiġi tradotta litteralment bħala “tqim b’mod tajjeb.” Rigward it-​tifsir tagħha, naqraw: “Eusebeia tidher kultant f’sens li jissuġġerixxi devozzjoni reliġjuża persunali fl-​iskrizzjonijiet kontemporanji . . . iżda t-​tifsir iktar ġenerali tagħha fil-​Grieg popolari tal-​perijodu Ruman kien ‘lejalta.’ . . . Għall-​Kristjani eusebeia hija l-​ogħla tip taʼ devozzjoni lejn Alla.” (Christian Words, minn Nigel Turner) Għalhekk kif użata fl-​Iskrittura, l-​espressjoni “devozzjoni lejn Alla” tirreferi għal reverenza jew devozzjoni bil-​lejaltà lejn Alla Jehovah personalment.

6. Kristjan kif jagħti evidenza tad-​devozzjoni tiegħu lejn Alla?

⁶ Din id-​devozzjoni lejn Alla, iżda, mhix sempliċement sentiment taʼ qima. L-​istess bħalma ”fidi mingħajr xogħlijiet hi mejta,” hekk, ukoll, devozzjoni lejn Alla trid issib espressjoni fil-​ħajja taʼ dak li jkun. (Ġakbu 2:26) Fi New Testament Words William Barclay kiteb: “Mhix biss [eu·se’bei·a u kliem ieħor marbut magħha] jesprimu dak is-​sentiment taʼ biżaʼ u reverenza, iżda huma jimplikaw ukoll qima li tixraq lil dak il-​biżaʼ, u ħajja taʼ ubbidjenza attiva li tixraq lil dik ir-​reverenza.” Eu·se’bei·a tiġi wkoll definita bħala “li tkun b’mod prattiku konxju dwar Alla f’kull aspett tal-​ħajja.” (The Second Epistle General of Peter and the General Epistle of Jude, minn Michael Green) Il-​Kristjan, mela, jrid jagħti evidenza tar-​rabta persunali tiegħu maʼ Jehovah bil-​mod li hu jgħix ħajtu.—1 Timotew 2:2; 2 Pietru 3:11.

Sforz Qawwi Meħtieġ

7. X’ried ifisser Pawlu meta ħeġġeġ lil Timotew, għalkemm kien imgħammed, biex “jiġri wara” d-​devozzjoni lejn Alla?

⁷ Iżda, x’inhu nvolut f’li tiżviluppa u turi devozzjoni lejn Alla? Hija sempliċement kwistjoni taʼ li titgħammed? Ftakar li Timotew, għalkemm imgħammed, ġie mheġġeġ biex ‘jiġri warajha’ [litteralment,‘kun int tiġri warajha’].a (1 Timotew 6:11, Kingdom Interlinear) Ovvjament, Pawlu ma kienx qed jissuġġerixxi li d-​dixxiplu Timotew kien nieqes mid-​devozzjoni lejn Alla. Minflok, hu kien qed jimpressjona fuqu l-​bżonn li jibqaʼ jiġri warajha b’ħeġġa u żelu. (Qabbel Filippin 3:14.) B’mod ċar, dan kellu jkun segwit tul ħajtu kollha. Timotew, bħall-​Kristjani mgħammdin kollha, setaʼ jkompli jagħmel progress f’li juri devozzjoni lejn Alla.

8. Pietru kif wera li sforz qawwi hu meħtieġ biex Kristjan iddedikat u mgħammed jiġri wara d-​devozzjoni lejn Alla?

⁸ Sforz qawwi hu meħtieġ għal Kristjan iddedikat u mgħammed biex jiġri wara d-​devozzjoni lejn Alla. Meta kiteb lill-​Kristjani mgħammdin li kellhom il-​prospett li ‘jsiru mseħbin f’natura divina,’ l-​appostlu Pietru qal: “Iva, għal dir-raġuni stess, billi tikkontribwixxu bi tweġiba l-​isforz ħerqan kollu tagħkom, ipprovdu lill-​fidi tagħkom il-​virtù, lill-​virtù tagħkom il-​għarfien, lill-​għarfien tagħkom ir-​rażna, lir-​rażna tagħkom is-​sabar, lis-​sabar tagħkom devozzjoni lejn Alla.” (2 Pietru 1:4-6) Ovvjament, ammont taʼ fidi hu meħtieġ sabiex nippreżentaw lilna nfusna għall-​magħmudija. Madankollu, wara l-​magħmudija ma nistgħux immajnaw, billi nikkuntentaw lilna nfusna b’sempliċi Kristjanità tal-​isem. Minflok, hekk kif nagħmlu progress fil-​għixien Kristjan, hemm bżonn li nibqgħu niżviluppaw kwalitajiet oħra mill-​aħjar, inkluża d-​devozzjoni lejn Alla, li tistaʼ tiġi provduta lill-​fidi tagħna. Dan, igħid Pietru, jitlob sforz ħerqan min-​naħa tagħna.

9. (a) Il-​kelma Griega għal “ipprovdu” kif turi l-​ammont taʼ sforz meħtieġ biex niżviluppaw devozzjoni lejn Alla? (b) Pietru x’qed iħeġġiġna biex nagħmlu?

⁹ Il-​kelma Griega li juża Pietru għal “ipprovdu” (e·pi·kho·re·ge’o) għandha sfond interessanti u turi l-​ammont taʼ sforz meħtieġ. Hija ġejja minn nom (kho·re·gos’) li litteralment ifisser “il-​mexxej taʼ kor.” Tirreferi għal xi ħadd li kien iħallas l-​ispejjeż kollha biex iħarreġ u jżomm kor biex itellaʼ reċta fuq palk. Dawn l-​irġiel daħlu għal din ir-​responsabbiltà minn jeddhom sforz l-​imħabba għall-​belt tagħhom u ħallsu l-​ispejjeż minn bwiethom stess. Dawn l-​irġiel kienu kburin li jonfqu bil-​ħala biex jipprovdu kulma kien meħtieġ għal wirja nobbli. Il-​kelma żviluppat biex tfisser “li tipprovdi, tforni bl-​abbundanza.” (Qabbel 2 Pietru 1:11.) Għalhekk Pietru jħeġġiġna biex nipprovdu lilna nfusna, mhux biss b’ammont taʼ devozzjoni lejn Alla, iżda bl-​iktar espressjoni possibbli taʼ din il-​kwalità prezzjuża.

10, 11. (a) Għala huwa meħtieġ l-​isforz biex nikkultivaw u nuru devozzjoni lejn Alla? (b) Kif nistgħu nirbħu t-​taqtigħa?

¹⁰ Għala, iżda, huwa meħtieġ daqstant sforz biex tikkultiva u turi devozzjoni lejn Alla? L-​ewwelnett, hemm it-​taqtigħa kontra l-​laħam imwaqqaʼ. Ladarba “il-​ġibda taʼ qalb il-​bniedem hi ħażina minn żogħżitu ’l fuq,” mhux faċli li ssegwi ħajja taʼ ubbidjenza attiva lejn Alla. (Ġenesi 8:21; Rumani 7:2l-23) “Dawk kollha li jixtiequ jgħixu bid-​devozzjoni lejn Alla f’għaqda maʼ Kristu Ġesù se jkunu wkoll ippersegwitati,” jgħid l-​appostlu Pawlu. (2 Timotew 3:12) Iva, l-​Kristjan li jipprova jgħix b’mod li jogħġob lil Alla jrid ikun differenti mid-​dinja. Hu għandu sett differenti taʼ livelli u miri differenti. Bħalma wissa Ġesù, dan iqajjem il-​mibgħeda tad-​dinja ħażina.—Ġwann 15:19; 1 Pietru 4:4.

¹¹ Madankollu, nistgħu nirbħu t-​taqtigħa, għax “Jehovah jaf kif jeħles lil nies taʼ devozzjoni lejn Alla ’l barra mit-​tiġrib.” (2 Pietru 2:9) Aħna, iżda, irridu nagħmlu l-​parti tagħna billi nkomplu niġru wara d-​devozzjoni lejn Alla.

Nikkultivaw id-​Devozzjoni Lejn Alla

12. Pietru kif jindika x’inhu meħtieġ biex niżviluppaw devozzjoni lejn Alla f’ammont iktar bis-​sħiħ?

¹² Kif, mela, tistaʼ int tikkultiva din id-​devozzjoni lejn Alla f’ammont iktar bis-​sħiħ? L-​appostlu Pietru jipprovdi ideja. Fit-​2 Pietru 1:5, 6, meta jagħti lista tal-​kwalitajiet li jridu jiġu provduti lill-​fidi tagħna, hu jpoġġi l-​għarfien qabel id-​devozzjoni lejn Alla. Iżjed kmieni fl-​istess kapitlu, hu kiteb: “Is-​setgħa divina tiegħu tatna b’xejn l-​affarijiet kollha li għandhom x’jaqsmu mal-​ħajja u d-​devozzjoni lejn Alla, permezz tal-​għarfien eżatt taʼ dak li sejħilna.” (2 Pietru 1:3) Pietru b’hekk jassoċja d-​devozzjoni lejn Alla mal-​għarfien eżatt dwar Jehovah.

13. Għarfien eżatt għala huwa essenzjali f’li niżviluppaw devozzjoni lejn Alla?

¹³ Fil-​fatt, mingħajr għarfien eżatt huwa mpossibbli li tikkultiva devozzjoni lejn Alla. Għala? Sewwa, ftakar li devozzjoni lejn Alla hi lejn Jehovah personalment u tiġi murija bil-​mod li aħna ngħixu l-​ħajjiet tagħna. Għarfien eżatt dwar Jehovah hu b’hekk essenzjali, ladarba jinvolvi li ssir tafu personalment, b’mod intimu, billi ssir familjari għalkollox mal-​kwalitajiet u l-​mogħdijiet tiegħu. Iktar minn hekk, jinvolvi li nħabirku biex nimitawh. (Efesin 5:1) Iktar ma nipprogressaw f’li nitgħallmu dwar Jehovah u f’li nirriflettu l-​mogħdijiet u l-​kwalitajiet tiegħu fil-​ħajjiet tagħna, iktar se nsiru nafuh aħjar. (2 Korintin 3:18; qabbel 1 Ġwann 2:3-6.) Dan, b’hekk, iwassal għal apprezzament akbar għall-​kwalitajiet prezzjużi taʼ Jehovah, ammont iktar bis-​sħiħ taʼ devozzjoni lejn Alla.

14. Biex niksbu għarfien eżatt, x’għandu jinkludi l-​programm tagħna taʼ studju persunali, u għala?

¹⁴ Kif tikseb dan il-​għarfien eżatt? M’hemmx xi mod eħfef. Biex niksbu għarfien eżatt, irridu nħabirku f’li nistudjaw il-​Kelma t’Alla u pubblikazzjonijiet ibbażati fuq il-​Bibbja. Studju persunali bħal dan għandu jinkludi programm regulari taʼ qari tal-​Bibbja, bħalma jiġi nkluż f’konnessjoni mal-​Iskola tal-​Ministeru Teokratiku. (Salm 1:2) Ladarba l-​Bibbja hija rigal mingħand Jehovah, dak li nagħmlu f’għamla taʼ studju persunali tal-​Bibbja jirrifletti kemm napprezzaw dak ir-​rigal. Id-​drawwiet taʼ studju persunali tiegħek x’jirriflettu dwar il-​kobor tal-​apprezzament tiegħek għall-​provvedimenti spiritwali taʼ Jehovah?—Salm 119:97.

15, 16. (a) X’jistaʼ jgħinna biex niżviluppaw aptit spiritwali għal studju persunali tal-​Bibbja? (b) Biex studju persunali tal-​Bibbja jwassal f’li niżviluppaw devozzjoni lejn Alla, x’għandu jsir meta naqraw porzjon mill-​Kelma t’Alla?

¹⁵ Huwa veru li l-​qari u l-​istudju m’humiex faċli għal xi wħud. Iżda biż-​żmien u l-​isforz, int tistaʼ tiżviluppa aptit spiritwali għal studju persunali tal-​Bibbja. (1 Pietru 2:2) Meta tirrifletti b’apprezzament fuq dak kollu li Alla Jehovah għamel, qed jagħmel, u għad irid jagħmel għalik, qalbek se tqanqlek biex titgħallem kulma tistaʼ dwaru.—Salm 25:4.

¹⁶ Iżda biex dan l-​istudju persunali tal-​Bibbja jwassal f’li int tiżviluppa devozzjoni lejn Alla, l-​oġġettiv tiegħek m’għandux ikun sempliċement li tgħaddi paġni taʼ materjal jew li timla moħħok bl-​informazzjoni. Minflok, meta taqra porzjon mill-​Kelma t’Alla, trid tieħu l-​ħin biex tirrifletti fuq il-​materjal, billi tistaqsi lilek innifsek mistoqsijiet bħalma huma: ‘X’igħallmuni dwar il-​kwalitajiet teneri u l-​mogħdijiet taʼ Jehovah? Kif nistaʼ nkun iktar bħal Jehovah f’dawn l-​aspetti?’

17. (a) X’nitgħallmu dwar il-​ħniena taʼ Jehovah mill-​ktieb taʼ Ħosegħa? (b) Li nirriflettu fuq il-​ħniena taʼ Jehovah kif għandu jeffettwana?

¹⁷ Ikkunsidra eżempji. Xi ftit żmien ilu l-​qari tal-​Bibbja li kien imissna fl-​Iskola tal-​Ministeru Teokratiku ħadna fil-​ktieb taʼ Ħosegħa. Wara li tlesti taqra dan il-​ktieb Bibliku, tistaʼ tistaqsi lilek innifsek: ‘X’nitgħallem dwar Jehovah bħala Persuna—il-​kwalitajiet tiegħu u l-​mogħdijiet tiegħu— minn dan il-​ktieb?’ Il-​mod li jiġi wżat minn kittieba Bibliċi iktar tard jindika li nitgħallmu ħafna dwar il-​ħniena tenera taʼ Jehovah mill-​ktieb taʼ Ħosegħa. (Qabbel Mattew 9:13 maʼ Ħosegħa 6:6; Rumani 9:22-26 maʼ Ħosegħa 1:10 u 2:2l-23.) Il-​ħeġġa taʼ Jehovah li juri ħniena maʼ Iżrael ġiet murija bil-​mod li Ħosegħa tratta maʼ martu, Gomer. (Ħosegħa 1:2; 3:l-5) Għalkemm it-​tixrid tad-​demm, is-​serq, iż-​żina, u l-​idolatrija kienu kotrana f’Iżrael, Jehovah ‘kellem lil qalb Iżrael.’ (Ħosegħa 2:13, 14; 4:2) Jehovah ma kienx obligat li juri ħniena bħal din, iżda kien se jagħmel dan ‘minn jeddu,’ dment li l-​Iżraeliti wrew indiema mill-​qalb u daru mill-​korsa midinba tagħhom. (Ħosegħa 14:4; qabbel Ħosegħa 3:3.) Hekk kif tirrifletti b’dan il-​mod fuq il-​ħniena straordinarja taʼ Jehovah, qalbek se titqanqal, u b’hekk issaħħaħ ir-​rabta persunali tiegħek miegħu.

18. Wara li tirrifletti fuq il-​ħniena taʼ Jehovah kif enfasizzata f’Ħosegħa, x’tistaʼ tistaqsi lilek innifsek?

¹⁸ Iżjed, però, huwa meħtieġ. “Henjin huma dawk li mimlijin ħniena, ladarba jintwerew il-​ħniena,” qal Ġesù. (Mattew 5:7) Għalhekk, wara li tirrifletti fuq il-​ħniena taʼ Jehovah kif enfasizzata fil-​ktieb taʼ Ħosegħa, staqsi lilek innifsek: ‘Kif nistaʼ b’mod aħjar nimita l-​ħniena taʼ Jehovah fil-​mod kif nitratta maʼ oħrajn? Jekk ħu jew oħt li dinbu kontrija jew offendewni jitlobni maħfra, naħfer jien “bil-​ferħ”?’ (Rumani 12:8; Efesin 4:32) Jekk taqdi fil-​kongregazzjoni bħala anzjan maħtur, tistaʼ tistaqsi lilek innifsek: ‘Meta nitratta każi ġudizzjarji, kif nistaʼ nimita aħjar lil Jehovah, li dejjem “lest li jaħfer,” b’mod partikulari meta wieħed li jkun għamel il-​ħażen jagħti evidenza ġenwina taʼ ndiema mill-​qalb?’ (Salm 86:5; Proverbji 28:13)‘X’għandi nfittex bħala bażi biex nestendi l-​ħniena?’—Qabbel Ħosegħa 5:4 u 7:14.

19, 20. (a) X’jirriżulta meta l-​istudju tal-​Bibbja jsir bir-​reqqa? (b) Liema hi għajnuna oħra f’li nikkultivaw devozzjoni lejn Alla, u x’se jiddiskuti l-​artiklu li jmiss?

¹⁹ Kemm isir premjanti l-​istudju persunali tiegħek tal-​Bibbja meta jsir b’manjiera daqstant bir-​reqqa! Qalbek tfur b’apprezzament għall-​kwalitajiet prezzjużi taʼ Jehovah. U billi kontinwament tħabrek biex timita dawn il-​kwalitajiet f’ħajtek, int se ssaħħaħ ir-​rabta persunali tiegħek miegħu. Int b’hekk tkun qed tiġri wara d-​devozzjoni lejn Alla bħala qaddej iddedikat u mgħammed taʼ Jehovah.—1 Timotew 6:11.

²⁰ Għajnuna oħra f’li nikkultivaw din il-​kwalità prezzjuża tistaʼ tinsab f’Ġesù Kristu—l-​eżempju perfett taʼ devozzjoni lejn Alla. Billi ssegwi l-​eżempju taʼ Ġesù kif se jgħinek f’li tikkultiva kif ukoll f’li turi devozzjoni lejn Alla? L-​artiklu li jmiss se jiddiskuti dan u mistoqsijiet marbutin miegħu.

[Nota taʼ taħt]

Kif Se Twieġeb?

◻ Il-​magħmudija għala mhix l-​aħħar pass li tieħu fil-​korsa Kristjana tiegħek?

◻ X’inhu t-​tifsir taʼ “devozzjoni lejn Alla,” u kif tagħti evidenza tagħha?

◻ Għala hu meħieġ sforz qawwi biex tiżviluppa devozzjoni lejn Alla?

◻ Kif tistaʼ tikkultiva d-​devozzjoni lejn Alla f’ammont iktar bis-​sħiħ?