Ibqgħu Aqdu Spalla maʼ Spalla

“Se nagħti lill-​popli l-​bidla għal lingwa pura, sabiex ilkoll isejħu isem Jehovah, sabiex jaqduh spalla maʼ spalla.”​—Sofonija 3:​9, NW.

1. X’qed jiġri bi twettiq taʼ Sofonija 3:​9, NW?

ILLUM hawn madwar 6,000 lingwa mitkellma fid-​dinja kollha. Minbarra dawn jeżistu diversi djaletti, jew forom diversi taʼ lingwi lokali. Madankollu, minkejja li n-​nies jitkellmu b’ilsna li huma differenti minn xulxin daqskemm huma l-​Aramajk u ż-​Żulu, Alla għamel xi ħaġa li hija verament taʼ l-​għaġeb. Hu għamilha possibbli li l-​bnedmin, jgħixu fejn jgħixu, jitgħallmu l-​unika lingwa pura u jitkellmuha. Dan qed iseħħ bi twettiq tal-​wegħda li ngħatat permezz tal-​profeta Sofonija: “[Jien, Alla Jehovah] se nagħti lill-​popli l-​bidla għal lingwa pura [letteralment, “xofftejn safja,” Saydon], sabiex ilkoll isejħu isem Jehovah, sabiex jaqduh spalla maʼ spalla.”—Sofonija 3:​9, NW.

2. X’inhi l-​“lingwa pura,” u din x’għamlet possibbli?

² Il-​“lingwa pura” hija l-​verità t’Alla kif misjuba fil-​Kelma tiegħu, il-​Bibbja. B’mod speċjali, din hi l-​verità dwar is-​Saltna t’Alla, li se tqaddes l-​isem taʼ Jehovah, tivvindika s-​sovranità tiegħu, u ġġib barkiet lill-​umanità. (Mattew 6:​9, 10) Bħala l-​unika lingwa nadifa spiritwalment fid-​dinja, il-​lingwa pura hi mitkellma min-​nies taʼ kull ġens u razza. Permezz tagħha huma jistgħu jaqdu lil Jehovah “spalla maʼ spalla.” B’hekk, huma jaqduh magħqudin flimkien, jew “għalenija.”—Saydon.

M’Hemmx Lok għall-​Parzjalità

3. X’inhu li jagħmilhielna possibbli biex naqdu lil Jehovah magħqudin?

³ Bħala Kristjani, aħna grati għall-​kooperazzjoni li teżisti bejnietna minkejja li nitkellmu b’lingwi differenti. Għalkemm nippridkaw l-​aħbar tajba tas-​Saltna b’ħafna lingwi, qed naqdu lil Alla magħqudin. (Salm 133:1) Dan hu possibbli għaliex, ngħixu fejn ngħixu fid-​dinja, nitkellmu l-​unika lingwa pura biex infaħħru lil Jehovah.

4. Għala m’għandu jkun hemm l-​ebda parzjalità fost in-​nies t’Alla?

⁴ M’għandu jkun hemm l-​ebda parzjalità fost in-​nies t’Alla. L-​appostlu Pietru għamel dan ċar meta kien qed jippriedka fid-​dar taʼ wieħed mill-​Ġentili jismu Kornelju, li kien uffiċjal taʼ l-​armata, fis-​sena 36 E.K. Pietru tqanqal biex jgħid: “Issa tassew qiegħed nifhem li Alla ma jħares lejn wiċċ ħadd, imma jilqaʼ lil kull min għandu l-​biżaʼ tiegħu u jagħmel is-​sewwa, ikun minn liema poplu jkun.” (Atti 10:​34, 35) Ladarba dan huwa minnu, fil-​kongregazzjoni Kristjana m’hemmx lok għal parzjalità, klikek, jew favoritiżmu.

5. Għala huwa ħażin li tinkuraġġixxi l-​klikek fil-​kongregazzjoni?

⁵ Waħda studenta taʼ l-​Università qalet hekk dwar iż-​żjara li għamlet fis-​Sala tas-​Saltna: “Is-​soltu, il-​knejjes jiġbdu lejhom il-​membri taʼ ċertu razza jew grupp etniku. . . . Ix-​Xhieda taʼ Jehovah kienu lkoll bil-​qiegħda flimkien u mhux fi klikek.” Madankollu, xi membri tal-​kongregazzjoni f’Korintu tal-​qedem kienu qed joħolqu l-​firdiet. Bit-​tilwim li kienu qed jaqilgħu, huma kienu qed jiħduha kontra l-​ħidma taʼ l-​ispirtu qaddis t’Alla, għax dan l-​ispirtu jinkuraġġixxi l-​għaqda u l-​paċi. (Galatin 5:​22) Li kieku kellna ninkuraġġixxu l-​klikek fil-​kongregazzjoni, inkunu qed naħdmu kontra d-​direzzjoni taʼ l-​ispirtu. Għalhekk, ejja nżommu f’moħħna l-​kliem li l-​appostlu Pawlu qal lill-​Korintin: “Nitlobkom, ħuti f’isem Sidna Ġesù Kristu, biex tkunu taqblu fi kliemkom u ma jkunx hemm firdiet fostkom. Kunu magħqudin kif imiss, ħsieb wieħed u fehma waħda.” (1 Korintin 1:10) Pawlu reġaʼ enfasizza l-​għaqda fl-​ittra tiegħu lill-​Efesin.—Efesin 4:​1-6, 16.

6, 7. Ġakbu liema parir ta dwar il-​favoritiżmu, u kliemu kif japplika?

⁶ L-​imparzjalità minn dejjem kienet ħtieġa għall-​Kristjani. (Rumani 2:​11) Minħabba li fil-​kongregazzjoni taʼ l-​ewwel seklu kien hemm xi wħud li kienu qed juru l-​favoritiżmu maʼ individwi għonja, id-​dixxiplu Ġakbu kiteb: “Ħuti, tħalltux il-​fidi f’Ġesù Kristu, il-​Mulej tagħna tal-​glorja, mal-​ħarsien lejn l-​uċuħ. Għax jekk fil-​laqgħat tagħkom jidħol xi ħadd biċ-​ċrieket tad-​deheb f’subgħajh u bi lbies ilellex, mbagħad jidħol xi ħaddieħor fqir liebes imċerċer, u intom idduru maʼ dak bl-​ilbies ilellex u tgħidulu: ‘Int oqgħod komdu bilqiegħda’ waqt li lill-​fqir tgħidulu: ‘Int oqgħod bil-​wieqfa’, jew ‘Oqgħod bilqiegħda fuq il-​mirfes taʼ riġlejja’, ma jidhrilkomx li tkunu qegħdin tagħmlu għażla bejniethom, u hekk issiru mħallfin qarrieqa?”—Ġakbu 2:​1-4.

⁷ Jekk għal-​laqgħat Kristjani kien jidħol xi ħadd ġdid li jkun sinjur, biċ-​ċrieket tad-​deheb u bi lbies mill-​isbaħ, u xi ħadd ġdid bi lbies maħmuġ, l-​individwu sinjur kien jiġi trattat b’mod speċjali. Dan kien jingħata post “komdu,” waqt li l-​fqir kien jintqallu biex jibqaʼ bil-​wieqfa jew joqgħod bil-​qiegħda maʼ l-​art ħdejn saqajn xi ħadd. Imma Alla pprovda s-​sagrifiċċju taʼ fidwa taʼ Ġesù kemm għas-​sinjur kif ukoll għall-​fqir mingħajr ebda distinzjoni. (Ġob 34:19; 2 Korintin 5:​14) Għalhekk, jekk irridu nogħġbu lil Jehovah u naqduh spalla maʼ spalla, m’għandniex nuru favoritiżmu jew ‘inżiegħlu bin-​nies f’wiċċhom ħalli niksbu xi ħaġa minnhom.’—Ġuda 4, 16.

Tgergirx

8. Xi ġralhom l-​Iżraelin talli qagħdu jgergru?

⁸ Sabiex inżommu l-​unità tagħna u nkomplu ngawdu l-​favur t’Alla, irridu nagħtu kas il-​parir taʼ Pawlu: “Agħmlu kollox mingħajr tgemgim.” (Filippin 2:​14, 15) L-​Iżraelin bla fidi li nħelsu mill-​jasar Eġizzjan gergru kontra Mosè u Aron, u għalhekk anki kontra Alla Jehovah. Minħabba f’dan, l-​irġiel kollha minn 20 sena ’l fuq, minbarra Ġożwè u Kaleb u l-​Leviti, ma daħlux fl-​Art Imwiegħda imma mietu matul l-​40 sena li għamlu jterrqu fid-​deżert. (Numri 14:​2, 3, 26-​30; 1 Korintin 10:10) Xi prezz kellhom iħallsu għat-​tgergir tagħhom!

9. Xi ġralha Mirjam talli gergret?

⁹ Dan juri x’jistaʼ jiġrilu ġens sħiħ minħabba t-​tgergir. Xi ngħidu dwar individwi li jgergru? Sewwa, Mirjam, oħt Mosè, flimkien maʼ ħuha Aron, gergru: “Jaqaw il-​Mulej lil Mosè biss kellem? Ma kellimx lilna wkoll?” Ir-​rakkont ikompli: “U l-​Mulej semagħhom.” (Numri 12:​1, 2) X’kien ir-​riżultat? Mirjam, li milli jidher kienet l-​ewwel waħda li gergret, ġiet umiljata minn Alla. Kif? Billi ntlaqtet bil-​ġdiem u ġiet imġagħla tibqaʼ barra mill-​kamp għal sebat ijiem sakemm indafet.​—Numri 12:​9-​15.

10, 11. X’jistaʼ jiġri jekk ma nikkontrollawx it-​tgergir? Agħti eżempju.

¹⁰ It-​tgergir m’huwiex biss ilment fuq xi ħaġa ħażina li tkun saret. Dawk li jgergru għal kull ħaġa taʼ xejn jagħtu ħafna importanza lis-​sentimenti jew il-​pożizzjoni tagħhom, u b’hekk jiġbdu l-​attenzjoni lejhom infushom minflok lejn Alla. Jekk it-​tgergir ma jiġix kontrollat, dan jistaʼ jġib firda fost l-​aħwa spiritwali u jfixkel l-​isforzi tagħhom biex jaqdu lil Jehovah spalla maʼ spalla. Dan jiġri għax dawk li jħobbu jgergru qatt ma jżommu l-​ilmenti tagħhom għalihom imma jgħiduhom lil oħrajn, bla dubju bit-​tama li jsibu lil min jaqbel magħhom.

¹¹ Per eżempju, xi ħadd jistaʼ jikkritika l-​mod kif ċertu anzjan jagħmel it-​taħditiet fil-​laqgħat jew kif dan iwettaq dmirijietu. Jekk noqogħdu nisimgħu lil min qed jilmenta, nistgħu nibdew naħsbuha bħalu. Dment li ħadd ma jkun qalilna xejn, l-​attivitajiet taʼ dak l-​anzjan qatt ma jkunu tawna fastidju. Imma hekk kif xi ħadd ifesfsilna erbaʼ kelmiet, nibdew naraw id-​difetti kollha. Maż-​żmien, xejn minn dak li jagħmel l-​anzjan ma jibda jidher tajjeb f’għajnejna, u aħna wkoll nistgħu nibdew nilmentaw dwaru. Imġiba bħal din m’hijiex xierqa fil-​kongregazzjoni tan-​nies taʼ Jehovah.

12. X’effett jistaʼ jkollu t-​tgergir fuq ir-​relazzjoni tagħna m’Alla?

¹² It-​tgergir kontra l-​irġiel li għandhom id-​dmir li jirgħu l-​merħla t’Alla jistaʼ jwassal għat-​tgħajjir. Il-​fatt li ngergru b’dan il-​mod kontrihom jew nimmalafamawhom jistaʼ jeffettwa ħażin ir-​relazzjoni tagħna maʼ Jehovah. (Eżodu 22:27 [22:​28, NW]) Persuni insolenti li ma juru l-​ebda ndiema mhux se jirtu s-​Saltna t’Alla. (1 Korintin 5:​11; 6:​10) Id-​dixxiplu Ġuda kiteb dwar xi wħud li kienu qed igergru u “jiċħdu l-​awtorità taʼ Alla, iżebilħu l-​ħlejjaq glorjużi,” jew l-​irġiel taʼ responsabbiltà fil-​kongregazzjoni. (Ġuda 8) Dawk l-​uħud li gergru ma kellhomx l-​approvazzjoni t’Alla, u aħna b’mod għaqli nevitaw li nimitawhom.

13. Għala mhux kull ilment hu ħażin?

¹³ Huwa minnu li hemm xi lmenti li huma aċċettabbli għal Alla. Hu ma injorax “l-​għajta qawwija” dwar Sodoma u Gomorra imma qered lil dawk il-​bliet mill-​agħar. (Ġenesi 18:​20, 21; 19:​24, 25) F’Ġerusalemm, ftit żmien wara Pentekoste tas-​sena 33 E.K., “sar xi tgergir mil-​Lhud Griegi kontra l-​Lhud, għax dehrilhom li ma kienx hemm min jieħu ħsieb ir-​romol tagħhom fil-​ministeru taʼ kuljum.” Għalhekk, “it-​Tnax” ħadu passi biex jirranġaw is-​sitwazzjoni billi ħatru “sebat irġiel li [kellhom] isem tajjeb” biex jieħdu ħsieb “il-​ħidma” taʼ li jqassmu l-​ikel. (Atti 6:​1-6) L-​anzjani fi żmienna ma jridux ‘jagħlqu widnejhom’ għal ilmenti raġunevoli. (Proverbji 21:13) U minflok ma jikkritikaw lill-​aduraturi sħabhom, l-​anzjani għandhom jinkuraġġuhom u jsaħħuhom.​—1 Korintin 8:1.

14. Liema kwalità hija meħtieġa b’mod speċjali sabiex ma ngergrux?

¹⁴ Ilkoll kemm aħna għandna nevitaw li ngergru, għax it-​tgergir ma jagħmilx ġid spiritwalment. Attitudni bħal din tfixkel l-​għaqda taʼ bejnietna. Minflok, ejja dejjem inħallu l-​ispirtu qaddis jipproduċi l-​imħabba fina. (Galatin 5:22) Il-​fatt li nobdu “l-​aqwa liġi” taʼ l-​imħabba se jgħinna nkomplu naqdu lil Jehovah spalla maʼ spalla.—Ġakbu 2:8; 1 Korintin 13:​4-8; 1 Pietru 4:8.

Għasses Kontra l-​Malafama

15. X’inhi d-​differenza bejn it-​tqassis u l-​malafama?

¹⁵ Ladarba t-​tgergir jistaʼ jwassal għal tqassis taʼ ħsara, irridu noqogħdu b’sebaʼ għajnejn għal dak li ngħidu. It-​tqassis huwa kliem fil-​vojt dwar in-​nies u l-​ħajja tagħhom. Iżda l-​malafama hija rapport falz li jsir bl-​intenzjoni li jħassar ir-​reputazzjoni taʼ ħaddieħor. Kliem bħal dan huwa mimli malizzja u jmur kontra r-​rieda t’Alla. Għalhekk, Alla qal lill-​Iżraelin: “Tmurx ixxerred qlajjaʼ fuq niesek.”—Levitiku 19:16.

16. X’qal Pawlu dwar ċerti wħud li kienu jqassu, u x’effett għandu jkollu fuqna l-​parir tiegħu?

¹⁶ Ladarba l-​kliem fil-​vojt jistaʼ jwassal għall-​malafama, Pawlu ċanfar lil ċerti wħud li kienu jħobbu jqassu. Wara li semma xi nisa romol li kienu jikkwalifikaw biex jirċievu l-​għajnuna fil-​kongregazzjoni, hu rrefera għal xi nisa romol li kienu ‘draw fl-​għażż u kienu joqogħdu jiġġerrew minn dar għal oħra; u jsiru mhux biss għażżiena, imma wkoll paċpaċa u fiergħa [“jindaħlu fi ħwejjeġ ħaddieħor,” NW], u jħollu lsienhom fuq dak li ma għandhomx jgħidu.’ (1 Timotju 5:​11-15) Jekk mara Kristjana tara li għandha d-​difett li tgħid kliem li jistaʼ jwassal għall-​malafama, hi tagħmel tajjeb jekk tagħti kas il-​parir taʼ Pawlu biex tkun ‘serja, ma tqassasx fuq l-​oħrajn.’ (1 Timotju 3:11) M’għandniex xi ngħidu, l-​irġiel Kristjani wkoll iridu jgħassu kontra t-​tqassis taʼ ħsara.​—Proverbji 10:19.

Tiġġudikax!

17, 18. (a) X’qal Ġesù dwar li niġġudikaw lil ħutna? (b) Kif nistgħu napplikaw il-​kliem taʼ Ġesù dwar l-​iġġudikar?

¹⁷ Anki jekk ma nimmalafamaw lil ħadd, forsi jkollna nagħmlu sforz kbir biex nevitaw li niġġudikaw lil oħrajn. Ġesù kkundanna attitudni bħal din meta qal: “Tiġġudikawx, biex ma tkunux iġġudikati; għax bl-​istess ġudizzju li tagħmlu intom, tkunu ġġudikati; u bl-​istess kejl li tkejjlu intom, jitkejjel lilkom. Xi trid tħares lejn it-​tibna li hemm f’għajn ħuk? Għax ma tarax it-​travu li għandek f’għajnek int? Jew kif tmur tgħid lil ħuk, ‘Ħa nneħħilek it-​tibna minn għajnek,’ meta inti stess f’għajnek għandek travu? Ja wiċċ b’ieħor, neħħi l-​ewwel it-​travu li għandek f’għajnek int, ħalli mbagħad tara sewwa tneħħi t-​tibna minn għajn ħuk!”—Mattew 7:​1-5.

¹⁸ M’għandniex nippreżentaw ruħna u noffru li nneħħu sempliċi “tibna” minn għajnejn xi ħu meta l-​abbiltà tagħna stess biex nagħtu ġudizzju xieraq hija mfixkla minn “travu” figurattiv. Fil-​fatt, jekk tassew napprezzaw kemm Alla hu ħanin, m’aħniex se nkunu inklinati li niġġudikaw lil ħutna spiritwali. Kif nistgħu qatt naslu biex nifhmuhom tajjeb daqs Missierna tas-​sema? Mhux taʼ b’xejn li Ġesù wissiena biex ma ‘niġġudikawx, biex ma nkunux iġġudikati’! Eżami onest taʼ l-​imperfezzjonijiet tagħna stess għandu jżommna milli niġġudikaw b’mod li huwa inġust f’għajnejn Alla.

Fraġli imma taʼ Ġieħ

19. Kif għandna nħarsu lejn sħabna fit-​twemmin?

¹⁹ Jekk aħna determinati li naqdu lil Alla spalla maʼ spalla maʼ sħabna fit-​twemmin, m’aħniex se nevitaw biss li niġġudikawhom. Se nkunu minn taʼ quddiem biex nuruhom ġieħ. (Rumani 12:10) Fil-​fatt, se nfittxu dak li jaqbel lilhom u mhux dak li jaqbel lilna, u bil-​ferħ se nagħmlu affarijiet sempliċi għalihom. (Ġwann 13:​12-​17; 1 Korintin 10:24) Kif nistgħu nżommu attitudni mill-​aħjar bħal din? Billi nżommu f’moħħna li kull wieħed li jaqdi lil Jehovah huwa prezzjuż f’għajnejh u li aħna għandna bżonn xulxin, sewwa sew bħalma kull membru tal-​ġisem uman jiddependi mill-​membri l-​oħra.​—1 Korintin 12:​14-​27.

20, 21. Xi jfisser għalina l-​kliem tat-​2 Timotju 2:​20, 21?

²⁰ Irridu nammettu li l-​Kristjani huma reċipjenti fraġli tal-​fuħħar li għandhom it-​teżor glorjuż tal-​ministeru fdat f’idejhom. (2 Korintin 4:7) Jekk irridu li nwettqu din l-​attività sagra taʼ tifħir lil Jehovah, irridu nżommu isem onorabbli miegħu u maʼ Ibnu. Huwa biss jekk nibqgħu moralment u spiritwalment puri li nistgħu nibqgħu niġu użati minn Alla bħala reċipjenti taʼ ġieħ. Rigward dan, l-​appostlu Pawlu kiteb: “F’dar kbira ma hemmx biss tagħmir [“reċipjenti,” NW] tad-​deheb u l-​fidda, imma wkoll taʼ l-​għuda u tal-​fuħħar; u xi wħud minnhom ninqdew bihom għal għan taʼ ġieħ, oħrajn għal għan bla ġieħ. Jekk wieħed jissaffa minn dawn il-​ħwejjeġ, huwa jsir biċċa tagħmir [“reċipjent,” NW] għal għan taʼ ġieħ, tagħmir [“reċipjent,” NW] imqaddes, taʼ siwi għal sidu, mħejji għal kull għemil tajjeb.”—2 Timotju 2:​20, 21.

²¹ L-​individwi li ma jġibux ruħhom fi qbil mal-​ħtiġijiet divini huma ‘reċipjenti bla ġieħ.’ Madankollu, jekk nippersistu fil-​mogħdijiet t’Alla se nkunu ‘reċipjenti għal għan taʼ ġieħ, imqaddsin, jew magħżulin, għas-​servizz taʼ Alla u mħejjijin għal kull għemil tajjeb.’ Għalhekk, nagħmlu tajjeb li nistaqsu lilna nfusna: ‘Jien “reċipjent taʼ ġieħ”? Għandi effett pożittiv fuq sħabi fit-​twemmin? Bħala membru fil-​kongregazzjoni, qed naqdi spalla maʼ spalla maʼ sħabi fit-​twemmin?’

Ibqaʼ Aqdi Spalla maʼ Spalla

22. Maʼ xiex tistaʼ tiġi mxebbha l-​kongregazzjoni Kristjana?

²² Il-​kongregazzjoni Kristjana hija arranġament bħal dak taʼ familja. Meta l-​membri kollha tal-​familja jkunu jqimu lil Jehovah, fil-​familja jkun hemm atmosfera pjaċevoli, mimlija mħabba, u kulħadd jgħin wieħed lill-​ieħor. Il-​familja tistaʼ tikkonsisti minn numru taʼ individwi b’personalitajiet differenti, imma kulħadd ikollu post onorabbli. Is-​sitwazzjoni fil-​kongregazzjoni hija simili. Minkejja li aħna lkoll differenti—u imperfetti—Alla ġibidna lejh permezz taʼ Kristu. (Ġwann 6:​44; 14:6) Jehovah u Ġesù jħobbuna, u bħal familja magħquda, aħna żgur li rridu nuru mħabba lejn xulxin.​—1 Ġwann 4:​7-​11.

23. X’għandna niftakru u nkunu determinati li nagħmlu?

²³ Il-​kongregazzjoni Kristjana, bħal familja, hija wkoll post fejn bix-​xieraq nistennew li nsibu l-​lealtà. L-​appostlu Pawlu kiteb: “Nixtieq li l-​irġiel jitolbu kullimkien, jerfgħu ’l fuq idejn safja [“leali,” NW] bla għadab u bla ġlied.” (1 Timotju 2:8) B’hekk, Pawlu għaqqad il-​lealtà mat-​talb pubbliku “kullimkien,” f’kull post fejn il-​Kristjani jiltaqgħu flimkien. Il-​kongregazzjoni għandha tiġi rappreżentata fit-​talb pubbliku minn irġiel leali biss. M’għandniex xi ngħidu, Alla jistenna li lkoll kemm aħna nkunu leali lejh u lejn xulxin. (Koħèlet 12:​13, 14) Għalhekk, ejja nkunu determinati li naħdmu flimkien magħqudin, bħall-​membri tal-​ġisem uman. Jalla wkoll naqdu magħqudin bħala parti mill-​familja t’aduraturi taʼ Jehovah. Fuq kollox, ejja niftakru li għandna bżonn xulxin u jekk inkomplu naqdu lil Jehovah spalla maʼ spalla se ngawdu l-​approvazzjoni u l-​barkiet divini.

Int Kif Twieġeb?

•X’jagħmilha possibbli biex in-​nies taʼ Jehovah jaqduh spalla maʼ spalla?

• Il-Kristjani għala jevitaw li jkunu parzjali?

• Int x’tgħid li hemm ħażin fit-​tgergir?

• Għala għandna nagħtu ġieħ lil sħabna fit-​twemmin?

[Stampa f’paġna 15]

Pietru fehem li “Alla ma jħares lejn wiċċ ħadd”

[Stampa f’paġna 16]

Taf għala Alla umiljaha lil Mirjam?

[Stampa f’paġna 18]

Il-​Kristjani leali jaqdu lil Jehovah bil-​ferħ u spalla maʼ spalla