“Sa Minn Żgħoritek Sirt Midħla”

SKOND studji xjentifiċi reċenti, li titkellem maʼ tfal żgħar jinfluwenza b’mod profond l-​iżvilupp taʼ moħħhom, billi jistabbilixxi l-​abbiltà tagħhom biex jaħsbu, jirraġunaw, u jsolvu l-​problemi. Dan b’mod partikulari jkun il-​każ matul l-​ewwel sena taʼ ħajja taʼ tarbija. L-​International Herald Tribune tirrapporta li xi riċerkaturi llum jemmnu li “l-​għadd taʼ kliem li t-​tfal żgħar jisimgħu kuljum huwa l-​bassâr eċċezzjonali u l-​iktar importanti taʼ l-​intelliġenza, is-​suċċess fl-​iskola u l-​kompetenza soċjali li jiġu iktar tard.”

Il-kliem mitkellem, madankollu, irid jiġi mingħand xi ħadd. Milli jidher, dan ma jistax jiġi sostitwit minn xi televixin jew xi radju.

Nevroxjentista fl-​Università taʼ Washington f’Seattle ġewwa l-​Istati Uniti stqarret: “Issa nafu li konnessjonijiet nevrali jiġu fformati kmieni ferm fil-​ħajja u li l-​moħħ tat-​tifel jew tat-​tifla jkun qed jistenna litteralment esperjenzi biex jiddetermina kif iseħħu l-​konnessjonijiet. Ma rrealizzajniex ħlief dan l-​aħħar kemm dan il-​proċess jibda kmieni. Per eżempju, trabi tgħallmu l-​ħsejjes tal-​lingwa t’art twelidhom sa minn meta kellhom sitt xhur.”

Ir-riċerka tisfida l-​opinjoni popolari li t-​trabi jissaħħu intellettwalment jekk jiġu sempliċement mogħtijin ħafna mħabba. Din tenfasizza wkoll l-​importanza tal-​ġenituri fl-​iżvilupp tat-​tifel jew tat-​tifla.

Dan ifakkarna fil-​kliem taʼ l-​ittra ispirata taʼ l-​appostlu Pawlu lil Timotju: “Sa minn żgħoritek sirt midħla tal-​Kotba Mqaddsa, li jistgħu jagħtuk l-​għerf li jwassal għas-​salvazzjoni.” (Korsiv tagħna.) X’aktarx li l-​kotba mqaddsa, mitkellma liċ-​ċkejken Timotju minn ommu u nanntu li kienu jemmnu, kellhom irwol fundamentali fl-​iżvilupp tiegħu bħala qaddej li jispikka t’Alla.—2 Timotju 1:5; 3:15.