Dawl Mingħand Alla Jġib id-​Dlam fix-​Xejn!

“Alla tiegħi jdawwal id-​dlam tiegħi.”—2 SAMWEL 22:29.

1. Id-dawl kif inhu marbut mal-​ħajja?

“QAL Alla: ‘Ħa jkun id-​dawl.’ U d-​dawl sar.” (Ġenesi 1:3) B’dan il-​kliem importanti, ir-​rakkont tal-​ħolqien f’Ġenesi jidentifika lil Jehovah bħala s-​sors tad-​dawl, li mingħajru l-​ħajja fuq l-​art kienet tkun impossibbli. Jehovah hu wkoll is-​sors tad-​dawl spiritwali, li huwa vitali biex jiggwidana fil-​mogħdija tal-​ħajja. (Salm 43:3) Is-​Sultan David wera r-​relazzjoni mill-​qrib li teżisti bejn id-​dawl spiritwali u l-​ħajja meta kiteb: “Għandek hemm l-​għajn tal-​ħajja, fid-​dawl tiegħek naraw id-​dawl.”—Salm 36:10 (36:​9, NW).

2. Bħalma wera Pawlu, id-​dawl maʼ xiex inhu assoċjat mill-​qrib?

² Madwar 1,000 sena wara żmien David, l-​appostlu Pawlu rrefera għar-​rakkont tal-​ħolqien. Meta kiteb lill-​kongregazzjoni Kristjana f’Korintu, hu qal: “Dan Alla li qal: ‘Ħa jiddi d-​dawl mid-​dlam.’” Pawlu mbagħad wera li d-​dawl spiritwali huwa assoċjat mill-​qrib maʼ l-​għarfien mingħand Jehovah meta żied: “Hu li idda fi qlubna biex jagħtina d-​dawl taʼ l-​għarfien tal-​glorja taʼ Alla, li tiddi f’wiċċ Kristu.” (2 Korintin 4:6) Dan id-​dawl kif jaslilna?

Il-​Bibbja Twasslilna d-​Dawl

3. Jehovah liema dawl jipprovdi permezz tal-​Bibbja?

³ Jehovah jagħti d-​dawl spiritwali primarjament permezz tal-​Kelma mnebbħa tiegħu, il-​Bibbja. Mela hekk kif nistudjaw il-​Bibbja u nieħdu għarfien mingħand Alla, inkunu qed inħallu d-​dawl tiegħu jiddi fuqna. Permezz tal-​Bibbja, Jehovah jitfaʼ d-​dawl fuq l-​iskopijiet tiegħu u jgħidilna kif nistgħu nagħmlu r-​rieda tiegħu. Dan jagħti skop lil ħajjitna u jgħinna nissodisfaw il-​ħtiġijiet spiritwali tagħna. (Koħèlet 12:1; Mattew 5:3) Ġesù enfasizza li rridu nieħdu ħsieb il-​ħtiġijiet spiritwali tagħna meta, waqt li kkwota mil-​Liġi Mosajka, qal: “Hemm miktub, ‘Il-​bniedem mhux bil-​ħobż biss jgħix, iżda b’kull kelma li toħroġ minn fomm Alla.’”​—Mattew 4:4; Dewteronomju 8:3.

4. Ġesù b’liema mod hu “d-​dawl tad-​dinja”?

⁴ Ġesù hu assoċjat mill-​qrib mad-​dawl spiritwali. Tabilħaqq, hu tkellem dwaru nnifsu bħala “d-​dawl tad-​dinja” u qal: “Min jiġi warajja ma jimxix fid-​dlam, iżda jkollu d-​dawl tal-​ħajja.” (Ġwann 8:12) Din l-​espressjoni tgħinna nifhmu l-​irwol ċentrali li Ġesù għandu f’li jwassal il-​verità taʼ Jehovah lill-​bnedmin. Jekk irridu nevitaw id-​dlam u nimxu fid-​dawl t’Alla, irridu nisimgħu dak kollu li jgħid Ġesù u nimxu mill-​qrib wara l-​eżempju u t-​tagħlim tiegħu kif insibuhom fil-​Bibbja.

5. X’responsabbiltà kellhom is-​segwaċi taʼ Ġesù wara mewtu?

⁵ Ftit ġranet qabel ma miet, waqt li għal darb’oħra rrefera għalih innifsu bħala d-​dawl, Ġesù qal lid-​dixxipli tiegħu: “Ftit ieħor baqagħlu magħkom id-​dawl. Mela ibqgħu miexja sakemm għandkom id-​dawl, biex id-​dlam ma jilħaqkomx. Min jimxi fid-​dlam ma jafx fejn hu sejjer. Sakemm għandkom id-​dawl, emmnu fid-​dawl, biex tkunu wlied id-​dawl.” (Ġwann 12:​35, 36) Dawk li saru wlied id-​dawl tgħallmu l-​mudell taʼ “tagħlim sħiħ” mill-​Bibbja. (2 Timotju 1:​13, 14) Imbagħad huma użaw dan it-​tagħlim sħiħ biex joħorġu lil individwi taʼ qalb onesta mid-​dlam għal ġod-​dawl t’Alla.

6. Liema verità bażika dwar id-​dawl u d-​dlam insibu fl-​1 Ġwann 1:5?

⁶ L-​appostlu Ġwanni kiteb: “Alla hu dawl u ebda dlam ma hemm fih.” (1 Ġwann 1:5) Innota f’dan il-​vers il-​kuntrast bejn id-​dawl u d-​dlam. Id-​dawl spiritwali jiġi mingħand Jehovah, u d-​dlam spiritwali ma jistax jiġi assoċjat miegħu. Allura, mingħand min jiġi d-​dlam?

Is-​Sors tad-​Dlam Spiritwali

7. Min hemm wara d-​dlam spiritwali tad-​dinja, u liema qawwa għandu?

⁷ L-​appostlu Pawlu tkellem dwar “l-​alla taʼ din id-​dinja.” B’din l-​espressjoni, hu kien qed jirreferi għal Satana x-​Xitan. Hu ssokta jgħid li dan ‘dallam il-​moħħ tan-​nies neqsin mill-​fidi, biex ma jarawx jiddi d-​dawl taʼ l-​Evanġelju glorjuż taʼ Kristu, li hu xbieha taʼ Alla.’ (2 Korintin 4:4) Ħafna nies jgħidu li jemmnu b’Alla; iżda, għadd minnhom li dejjem jiżdied ma jemmnux li jeżisti x-​Xitan. Għala? M’humiex lesti jaċċettaw li huwa possibbli li teżisti qawwa ħażina soprannaturali li tinfluwenza l-​mentalità tagħhom. Minkejja dan, bħalma juri Pawlu, ix-​Xitan jeżisti tassew, u verament jinfluwenza lin-​nies biex ma jkunux jistgħu jaraw id-​dawl tal-​verità. Il-​qawwa li għandu x-​Xitan biex jinfluwenza l-​mentalità tan-​nies tidher mid-​deskrizzjoni profetika tiegħu bħala “l-​qarrieq tad-​dinja kollha.” (Apokalissi 12:9) Minħabba l-​ħidma taʼ Satana, il-​kundizzjoni mbassra mill-​profeta Isaija issa tapplika għall-​bnedmin kollha ħlief għal dawk li qed jaqdu lil Jehovah: “Id-​dlamijiet jiksu l-​art, u sħab iswed il-​popli.”—Isaija 60:2.

8. Dawk li qegħdin fid-​dlam spiritwali b’liema modi juru li ma jafux fejn huma?

⁸ Fid-​dlam ċappa jkun impossibbli tara madwarek. Faċli tintilef jew titfixkel. Bl-​istess mod, dawk li qegħdin fid-​dlam spiritwali jonqoshom id-​dehen u malajr jitfixklu f’sens spiritwali. Jistgħu ma jibqgħux jiddistingwu l-​verità mill-​qerq, it-​tajjeb mill-​ħażin. Il-​profeta Isaija tkellem dwar dawk li jinsabu f’dan it-​tip taʼ dlam meta kiteb: “Gwaj għal dawk li jsejjħu tajjeb il-​ħażin, u ħażin it-​tajjeb; u jibdlu d-​dlam mad-​dawl, li jibdlu l-​morr mal-​ħelu, u l-​ħelu mal-​morr.” (Isaija 5:20) Dawk li jgħixu fid-​dlam spiritwali qed jiġu influwenzati mill-​alla tad-​dlam, Satana x-​Xitan, u minħabba f’hekk huma mbegħdin mis-​sors tad-​dawl u l-​ħajja.—Efesin 4:​17-19.

L-​Isfida biex mid-​Dlam Jiġu għad-​Dawl

9. Spjega kif lill-​ħżiena jogħġobhom id-​dlam kemm f’sens letterali u kemm f’sens spiritwali.

⁹ Il-​leali Ġob wera kemm lill-​ħżiena kien jogħġobhom id-​dlam letterali meta qal: “Iż-​żieni wkoll jistenna d-​dlam, jgħid lilu nnifsu: ‘Ħadd ma jarani,’ u jqiegħed maskra maʼ wiċċu.” (Ġob 24:15) Il-​ħżiena qegħdin ukoll fid-​dlam spiritwali, u dan id-​dlam jistaʼ jaħkimhom. L-​appostlu Pawlu qal li l-​immoralità sesswali, is-​serq, ir-​regħba, is-​sokor, it-​tbahrid, u l-​ingann huma komuni fost dawk li huma maqbudin f’dan id-​dlam. Imma kulmin jersaq lejn id-​dawl tal-​Kelma t’Alla jistaʼ jinbidel. Fl-​ittra tiegħu lill-​Korintin, Pawlu jagħmilha ċara li din il-​bidla hija possibbli. Ħafna Kristjani Korintin qabel kienu jipprattikaw għemejjel tad-​dlam, u madankollu Pawlu qalilhom: “Imma issa tnaddaftu, tqaddistu u ġejtu ġġustifikati fl-​isem taʼ Sidna Ġesù Kristu u fl-​Ispirtu taʼ Alla tagħna.”—1 Korintin 6:​9-11.

10, 11. Ġesù kif wera konsiderazzjoni lejn raġel agħma meta tah lura d-​dawl? (b) Għala ħafna ma jagħżlux id-​dawl?

¹⁰ Meta xi ħadd joħroġ minn dlam ċappa għal ġod-​dawl, għajnejh x’aktarx li jkollhom bżonn ftit tal-​ħin biex jidraw id-​dawl. F’Betsajda, Ġesù fejjaq raġel agħma imma b’qalb tajba d-​dawl tahulu ftit ftit. “Qabad l-​agħma minn idu u ħadu barra mir-​raħal, beżaqlu f’għajnejh, qiegħed idejh fuqu u staqsieh: ‘Qiegħed tara xi ħaġa?’ Dak ħares ’il fuq u qal: ‘Qiegħed nara n-​nies, imma qiegħed narahom donnhom siġar mexjin.’ Mbagħad raġaʼ qegħedlu jdejh fuq għajnejh, u beda jara ċar: u kien imfejjaq, hekk li sar jara kollox tajjeb mill-​bogħod ukoll.” (Mark 8:​23-25) Milli jidher Ġesù ġab lir-​raġel jara bil-​mod il-​mod biex ikun jistaʼ jaddatta ruħu għad-​dawl qawwi tax-​xemx. Nistgħu nimmaġinaw kemm feraħ dak ir-​raġel issa li setaʼ jara.

¹¹ Madankollu, il-​ferħ li ħass dak ir-​raġel ma jissuperax il-​ferħ li jħossu dawk li jiġu megħjunin biex joħorġu pass pass mid-​dlam spiritwali għal ġod-​dawl tal-​verità. Meta naraw il-​ferħ tagħhom, niskantaw kif ma jiġux iktar nies miġbudin lejn id-​dawl. Ġesù jagħti r-​raġuni: “Il-​ġudizzju huwa dan: li d-​dawl ġie fid-​dinja, imma l-​bnedmin ħabbew id-​dlam aktar mid-​dawl, għax l-​għemil tagħhom kien ħażin. Għax kull min jagħmel il-​ħażen jobgħod id-​dawl, u ma jersaqx lejn id-​dawl, biex għemilu ma jinkixifx.” (Ġwann 3:​19, 20) Iva, ħafna jħobbu jipprattikaw “il-​ħażen”—bħall-​immoralità, il-​moħqrija, il-​gideb, il-​frodi, u s-​serq—u d-​dlam spiritwali taʼ Satana huwa ambjent perfett għalihom biex jagħmlu li jridu.

Nagħmlu Progress fid-​Dawl

12. B’liema modi diġà bbenefikajna għax ġejna fid-​dawl?

¹² Minn mindu ħadna l-​għarfien dwar id-​dawl, liema bidliet rajna fina nfusna? Kultant tkun ħaġa tajba li nħarsu lura u nosservaw il-​progress spiritwali li għamilna. Liema vizzji ħżiena qtajna? Liema problemi f’ħajjitna konna kapaċi nsolvu? Kif inbidlu l-​pjanijiet tagħna għall-​futur? Bis-​saħħa taʼ Jehovah u bl-​għajnuna taʼ l-​ispirtu qaddis tiegħu, nistgħu nkomplu nagħmlu bidliet fil-​personalità u l-​mentalità tagħna li juru li aħna qed naċċettaw id-​dawl. (Efesin 4:​23, 24) Pawlu jpoġġiha b’dan il-​mod: “Intom kontu darba dlam, imma issa intom dawl fil-​Mulej; għixu taʼ wlied id-​dawl li intom; frott id-​dawl jinsab f’kull ma hu tjieba, f’kull ma hu ġustizzja, f’kull ma hu verità.” (Efesin 5:​8, 9) Meta nħallu lilna nfusna niġu gwidati mid-​dawl taʼ Jehovah ningħataw tama u skop kif ukoll inkunu taʼ benefiċċju għal dawk taʼ madwarna. U x’ferħ inġibu f’qalb Jehovah meta nagħmlu dawn il-​bidliet!—Proverbji 27:11.

13. Kif nistgħu nuru l-​gratitudni tagħna għad-​dawl taʼ Jehovah, u x’inhu meħtieġ biex nagħmlu dan?

¹³ Aħna nuru l-​gratitudni tagħna għall-​ħajja iktar kuntenta li qed ingawdu billi nirriflettu d-​dawl taʼ Jehovah—u naqsmu dak li tgħallimna mill-​Bibbja mal-​membri tal-​familja, ħbieb, u qraba. (Mattew 5:​12-16; 24:14) Għal dawk li ma jridux jisimgħu, l-​ippridkar tagħna flimkien maʼ l-​imġiba eżemplari tagħna bħala Kristjani jservu taʼ ċanfira għalihom. Pawlu jispjega: “Fittxu li tagħrfu dak li jogħġob lill-​Mulej, u tisseħbux fl-​għemejjel tad-​dlam bla frott, imma ikxfuhom fil-​beraħ.” (Efesin 5:​10, 11) Li ngħinu lil oħrajn ħalli jabbandunaw id-​dlam u jagħżlu d-​dawl jitlob kuraġġ min-​naħa tagħna. Iktar importanti, jitlob għal mogħdrija u interess ġenwin f’oħrajn, u xewqa ħerqana li naqsmu d-​dawl tal-​verità magħhom għall-​benefiċċju etern tagħhom.—Mattew 28:​19, 20.

Attent minn Dwal Foloz

14. Liema twissija għandna nagħtu kas rigward id-​dawl?

¹⁴ Għal min ikun fuq il-​baħar fi dlam ċappa, kull dawl ikun dehra pjaċevoli. Fl-​antik kienu jinxtegħlu ħġejjeġ fuq l-​irdumijiet taʼ l-​Ingilterra biex jindikaw fejn il-​vapuri setgħu jidħlu għall-​kenn mill-​maltemp. L-​ekwipaġġi tal-​vapuri kienu jkunu grati talli kienu jiġu gwidati minn dawn id-​dwal għal ġo portijiet bla periklu. Iżda xi ħġejjeġ kienu jinxtegħlu bħala nasba. Minflok ma jsibu xi port, ħafna bastimenti kienu jitqarrqu u jinkaljaw mal-​blat, u mbagħad kienu jinsterqulhom it-​tagħbijiet tagħhom. F’din id-​dinja qarrieqa rridu noqogħdu attenti biex ma ninġibdux lejn dwal foloz li jistgħu jwassluna għal nawfraġju spiritwali. Jintqalilna li “Satana stess jitbiddel f’anġlu tad-​dawl.” Bl-​istess mod, il-​qaddejja tiegħu, inkluż l-​apostati, huma “ħaddiema qarrieqa” li wkoll ‘jitbiddlu bħallikieku kienu qaddejja tal-​ġustizzja.’ Jekk naċċettaw ir-​raġunar falz taʼ nies bħal dawn, il-​fiduċja tagħna fil-​Kelma tal-​verità taʼ Jehovah, il-​Bibbja, tistaʼ tiddgħajjef u l-​fidi tagħna tmut.—2 Korintin 11:​13-15; 1 Timotju 1:19.

15. X’se jgħinna nibqgħu fit-​triq li tieħu għall-​ħajja?

¹⁵ Is-​salmista kiteb: “Fanal għal riġlejja l-​kelma tiegħek, u dawl fil-​mogħdija tiegħi.” (Salm 119:105) Iva, ‘it-​triq id-​dejqa li tieħu għall-​ħajja’ hija mdawla b’mod ċar minn Alla tagħna kollu mħabba, Jehovah, “li jrid li l-​bnedmin kollha jsalvaw u jaslu biex jagħrfu l-​verità.” (Mattew 7:14; 1 Timotju 2:4) Li napplikaw il-​kmandi tal-​Bibbja se jħarisna milli nitbiegħdu minn din it-​triq id-​dejqa għal ġol-​mogħdijiet tad-​dlam. Pawlu kiteb: “L-​Iskrittura kollha hija mnebbħa minn Alla, u tiswa biex wieħed jgħallem, iċanfar, iwiddeb u jrawwem fis-​sewwa.” (2 Timotju 3:16) Hekk kif nikbru spiritwalment, aħna niġu mgħallmin mill-​Kelma t’Alla. Fid-​dawl tal-​Kelma t’Alla aħna nistgħu nwiddbu lilna nfusna jew, jekk ikun hemm bżonn, niġu mwiddbin minn rgħajja fil-​kongregazzjoni li jħobbuna. Bl-​istess mod nistgħu niddrittaw l-​affarijiet u bl-​umiltà naċċettaw id-​dixxiplina fit-​tjieba biex nibqgħu mexjin fit-​triq li tagħti għall-​ħajja.

Imxi b’Apprezzament fid-​Dawl

16. Kif nistgħu nuru apprezzament lejn id-​dawl, il-​provvediment taʼ l-​għaġeb mingħand Jehovah?

¹⁶ Kif nistgħu nuru l-​apprezzament tagħna lejn id-​dawl, il-​provvediment taʼ l-​għaġeb mingħand Jehovah? Ġwanni kapitlu 9 jgħidilna li meta Ġesù fejjaq raġel imwieled agħma, dan ħassu mqanqal biex jesprimi l-​apprezzament tiegħu. Kif? Hu poġġa fidi f’Ġesù bħala l-​Iben t’Alla u stqarru pubblikament bħala “profeta.” Iktar minn hekk, bi qlubija kbira hu ta tweġiba lil dawk li pprovaw jiddisprezzaw il-​miraklu taʼ Ġesù. (Ġwann 9:​17, 30-34) L-​appostlu Pietru jsejjaħ lill-​membri midlukin tal-​kongregazzjoni Kristjana “poplu li Alla kiseb għalih.” Għala? Għax għandhom l-​istess spirtu taʼ gratitudni bħal dak ir-​raġel li twieled agħma u tfejjaq. Huma juru apprezzament għal Jehovah, il-​Benefattur tagħhom, billi jxandru maʼ kullimkien ‘it-​tifħir taʼ dak li sejħilhom mid-​dlam għad-​dawl tiegħu taʼ l-​għaġeb.’ (1 Pietru 2:9; Kolossin 1:13) Dawk bit-​tama li jgħixu fuq l-​art għandhom l-​istess spirtu rikonoxxenti, u huma jappoġġaw lil ħuthom il-​midlukin billi jxandru pubblikament “it-​tifħir” taʼ Jehovah. Xi privileġġ imprezzabbli jagħti Alla lill-​bnedmin imperfetti!

17, 18. (a) X’inhi r-​responsabbiltà taʼ kull individwu? (b) Sabiex ikun bħal Timotju, kull Kristjan x’inhu inkuraġġit li jevita?

¹⁷ Li jkollna apprezzament mill-​qalb lejn id-​dawl tal-​verità huwa vitali. Ftakar li ħadd minna ma jitwieled jaf il-​verità. Xi wħud jitgħallmuha meta jikbru, u malajr jindunaw kemm id-​dawl huwa superjuri għad-​dlam. Oħrajn għandhom il-​privileġġ speċjali li jkunu mrobbijin minn ġenituri li għandhom il-​biżaʼ t’Alla. Għal dawn taʼ l-​aħħar jistaʼ jkun faċli li ma japprezzawx id-​dawl biżżejjed. Waħda Xhud li l-​ġenituri tagħha kienu ilhom jaqdu lil Jehovah minn qabel ma twieldet hi tammetti li kien meħtieġ ħafna ħin u sforz min-​naħa tagħha biex tifhem is-​sinifikat sħiħ u l-​importanza tal-​veritajiet li kienet ġiet mgħallma minn ċkunitha. (2 Timotju 3:15) Kbar jew żgħar, ilkoll kemm aħna għandna bżonn nikkultivaw apprezzament profond lejn il-​verità li rrivelalna Jehovah.

¹⁸ Iż-​żagħżugħ Timotju kien ġie mgħallem “il-​Kotba Mqaddsa” minn mindu kien żgħir, imma kien biss billi stinka fil-​ministeru li hu kiseb il-​maturità bħala Kristjan. (2 Timotju 3:15) B’riżultat taʼ dan, hu setaʼ jassisti lill-​appostlu Pawlu, li ħeġġu: “Agħmel mill-​aħjar biex iġġib ruħek quddiem Alla, bħala bniedem li għadda mill-​prova, bħala ħaddiem li m’għandux mniex jistħi, li jxandar bir-​reqqa l-​kelma tal-​verità.” Jalla lkoll kemm aħna, bħal Timotju, nevitaw li nagħmlu xi ħaġa li tħammrilna wiċċna—jew inġagħlu lil Jehovah iħossu jistħi minħabba fina!—2 Timotju 2:15.

19. (a) Bħal David, x’għandna ngħidu lkoll kemm aħna? (b) X’se jiġi diskuss fl-​artiklu li jmiss?

¹⁹ Għandna kull raġuni li nfaħħru lil Jehovah, li tana d-​dawl tal-​verità. Aħna ngħidu bħas-​Sultan David: “Int tixgħel, Mulej, il-​musbieħ tiegħi; Alla tiegħi jdawwal id-​dlam tiegħi.” (2 Samwel 22:29) Xorta waħda, ma nissograwx insiru indifferenti, għax dan jistaʼ jwassalna biex naqgħu lura fid-​dlam li ġejna merfugħin minnu. Għalhekk, l-​artiklu li jmiss se jgħinna niżnu l-​importanza li nagħtu lill-​verità divina f’ħajjitna.

X’Tgħallimt?

• Jehovah kif jipprovdi tidwil spiritwali?

• Xi sfida jippreżenta d-​dlam spiritwali taʼ madwarna?

• Liema perikli għandna nevitaw?

• Kif nistgħu nuru l-​gratitudni tagħna għad-​dawl tal-​verità?

[Stampa f’paġna 8]

Jehovah hu s-​sors tad-​dawl fiżiku u spiritwali

[Stampa f’paġna 10]

Bħalma Ġesù fejjaq raġel agħma pass, pass, bl-​istess mod hu jgħin lilna noħorġu mid-​dlam spiritwali

[Stampa f’paġna 11]

Jekk nitqarrqu mid-​dwal foloz taʼ Satana nispiċċaw f’nawfraġju spiritwali