Sagrifiċċji taʼ Tifħir li Jogħġbu lil Jehovah

“Offru ġisimkom b’sagrifiċċju ħaj, qaddis, jogħġob lil Alla.”—RUMANI 12:1.

1. Il-​Bibbja x’tgħid dwar il-​valur relattiv tas-​sagrifiċċji taħt il-​Liġi taʼ Mosè?

“IL-​LIĠI taʼ Mosè, billi għandha biss id-​dell tal-​ġid li għandu jiġi, u mhux dan l-​istess ġid, lil dawk li jersqu qrib lejn Alla ma tistaʼ qatt tagħmilhom perfetti bis-​saħħa taʼ dawk is-​sagrifiċċji li huma joffru bla waqfien minn sena għal sena.” (Lhud 10:1) Hawnhekk, l-​appostlu Pawlu jurina ċar u tond li s-​sagrifiċċji kollha offruti taħt il-​Liġi taʼ Mosè ma kellhom ebda valur dejjiemi fejn għandha x’taqsam is-​salvazzjoni tal-​bnedmin.—Kolossin 2:​16, 17.

2. Għala m’huwiex għalxejn li nipprovaw nifhmu l-​informazzjoni dettaljata fil-​Bibbja dwar l-​offerti u s-​sagrifiċċji fil-​Liġi?

² Ifisser dan li l-​informazzjoni fil-​Pentatewku rigward l-​offerti u s-​sagrifiċċji ma tiswa xejn għall-​Kristjani llum? Fil-​fatt, għal ftit iktar minn sena, dawk li huma miktubin fl-​Iskola tal-​Ministeru Teokratiku fil-​kongregazzjonijiet tax-​Xhieda taʼ Jehovah madwar id-​dinja, dan l-​aħħar għaddew l-​ewwel ħames kotba tal-​Bibbja. Xi wħud kellhom jagħmlu sforz kbir biex jaqraw u jifhmu d-​dettalji kollha. Kien għalxejn l-​isforz li għamlu? Żgur li le, għax “kull ma nkiteb fl-​Iskrittura fl-​imgħoddi, nkiteb għat-​tagħlim tagħna, biex bis-​sabar u bil-​faraġ li tagħtina l-​Iskrittura, aħna jkollna t-​tama.” (Rumani 15:4) Mela, il-​mistoqsija hi, Liema “tagħlim” u “faraġ” nistgħu nisiltu minn din il-​ġabra taʼ informazzjoni fil-​Liġi rigward l-​offerti u s-​sagrifiċċji?

Nitgħallmu u Nitfarrġu

3. Liema ħtieġa bażika għandna?

³ Għalkemm mhux mistenni minna li noffru sagrifiċċji letterali skond kif kienet titlob il-​Liġi, xorta waħda sa ċertu punt għad għandna bżonn kbir taʼ dak li s-​sagrifiċċji wettqu għall-​Iżraelin. Dan hu li jinħafrulna dnubietna u li ngawdu l-​favur t’Alla. Ladarba m’għadniex noffru sagrifiċċji letterali, kif nistgħu nirċievu dawn il-​benefiċċji? Wara li juri kemm is-​sagrifiċċji taʼ l-​annimali kienu limitati, Pawlu jiddikjara: “Għalhekk Kristu meta daħal fid-​dinja qal: ‘Sagrifiċċju u offerta int ma ridtx, imma ġisem int ħejjejt għalija; vittmi maħruqa u vittmi għad-​dnubiet lilek ma għoġbukx.’ Jien imbagħad għedt: ‘Hawn jien, ġejt biex nagħmel ir-​rieda tiegħek, O Alla, kif fil-​ktieb hemm miktub fuqi.’”—Lhud 10:​5-7.

4. Pawlu kif japplika Salm 40:​7-9 [40:​6-8, NW] għal Ġesù Kristu?

⁴ Waqt li jikkwota minn Salm 40:​7-9 [40:​6-8, NW], Pawlu juri li Ġesù ma ġiex biex jirrepeti ‘s-​sagrifiċċji u l-​offerti,’ “vittmi maħruqa u vittmi [“għad-​dnub,” Karm Żammit]” li lkoll kemm huma ma kinux għadhom approvati minn Alla saż-​żmien meta kiteb Pawlu. Minflok, Ġesù ġie b’ġisem li ħejjielu Missieru tas-​sema, ġisem li minn kull aspett kien preċiż bħal dak li Alla ħejja għal Adam meta ħalqu. (Ġenesi 2:7; Luqa 1:35; 1 Korintin 15:​22, 45) Bħala l-​Iben perfett t’Alla, Ġesù kellu l-​irwol tan-​“nisel” tal-​mara, bħalma tbassar f’Ġenesi 3:15. Kien se jieħu passi biex lil Satana ‘jisħaqlu rasu,’ għalkemm Ġesù nnifsu kien se jiġi ‘misħuq f’għarqubu.’ B’dan il-​mod, Ġesù sar il-​mezz provdut minn Jehovah għas-​salvazzjoni tal-​bnedmin, mezz li bnedmin taʼ fidi kienu ilhom jistennew sa minn żmien Abel.

5, 6. Il-​Kristjani liema mod superjuri għandhom biex javviċinaw lil Alla?

⁵ Meta jitkellem dwar dan l-​irwol speċjali taʼ Ġesù, Pawlu jgħid: “Dak li ma kienx jaf x’inhu dnub, Alla għamlu dnub għalina sabiex aħna nsiru fih ġustizzja taʼ Alla.” (2 Korintin 5:21) L-​espressjoni “għamlu dnub” tistaʼ tiġi tradotta wkoll ‘għamlu bħala offerta għad-​dnub.’ L-​appostlu Ġwanni jgħid: “Hu jħallas għal dnubietna, mhux għal tagħna biss, iżda wkoll għal dawk tad-​dinja kollha.” (1 Ġwann 2:2) Għaldaqstant, waqt li l-​Iżraelin kellhom mezz temporanju biex jersqu lejn Alla bis-sagrifiċċji tagħhom, il-​Kristjani għandhom bażi superjuri biex jiġu għand Alla—is-​sagrifiċċju taʼ Ġesù Kristu. (Ġwann 14:6; 1 Pietru 3:18) Jekk nuru fidi fis-​sagrifiċċju li Alla pprovda bħala prezz tal-​fidwa u nobdu Lilu, aħna wkoll nistgħu ngawdu l-​maħfra taʼ dnubietna u l-​favur u l-​barka t’Alla. (Ġwann 3:​17, 18) M’huwiex dan sors taʼ faraġ għalina? Iżda, kif nistgħu nuru li għandna fidi fis-​sagrifiċċju li tħallas bħala prezz tal-​fidwa?

⁶ Wara li jispjega li l-​Kristjani għandhom bażi superjuri biex jersqu lejn Alla, l-​appostlu Pawlu jsemmi, bħalma naqraw f’Lhud 10:​22-25, tliet modi li bihom nistgħu nuru l-​fidi u l-​apprezzament tagħna lejn Alla għal dak li pprovdielna b’imħabba. It-​twissija taʼ Pawlu saret primarjament lil dawk li se ‘jidħlu fis-​Santwarju,’ jiġifieri, Kristjani midlukin bis-​sejħa għas-​sema. Però, żgur li l-​umanità kollha għandha bżonn tagħti kas tal-​kliem imnebbaħ taʼ Pawlu jekk trid tibbenefika mis-​sagrifiċċju li Ġesù ħallas għalina.—Lhud 10:19.

Offri Sagrifiċċji Safjin u bla Tinġis

7. (a) Lhud 10:22 kif jitfaʼ dawl fuq x’kien isir fis-​sagrifiċċju? (b) X’ried isir biex is-​sagrifiċċju jkun żgur aċċettat minn Alla?

⁷ L-​ewwel, Pawlu jħeġġeġ lill-​Kristjani: “Ejjew nersqu b’qalb sinċiera u b’fidi sħiħa, bi qlubna mnaddfin minn kuxjenza ħażina u l-​ġisem tagħna maħsul b’ilma safi.” (Lhud 10:22) Il-​kliem li jintuża hawnhekk bla dubju jitfaʼ dawl fuq dak li kien isir f’sagrifiċċju normali taħt il-​Liġi. Hekk jixraq għax biex sagrifiċċju jiġi aċċettat, ried jiġi offrut b’motiv tajjeb u jkun safi u bla tinġis. L-​annimal tas-​sagrifiċċju kien mill-​merħla tal-​baqar jew tan-​nagħaġ, jiġifieri mill-​annimali safjin, u kien “bla difett.” Jekk is-​sagrifiċċju kien mit-​tjur, ried ikun mill-​gamiem jew mill-​bċieċen. Jekk dan kien isir kif suppost, ‘kien se jkun milqugħ għall-​espjazzjoni tiegħu.’ (Levitiku 1:​2-4, 10, 14; 22:​19-25) L-​offerta tal-​qmuħ ma kien ikun fiha ebda ħmira, li hija simbolu tal-​korruzzjoni; lanqas ma kien ikun fiha għasel, x’aktarx il-​ġulepp tal-​frott, għax dan malajr jiffermenta. Meta s-​sagrifiċċji, sew l-​annimali u sew il-​qmuħ, kienu jiġu offruti fuq l-​artal, kienu jżidulhom il-​melħ, li hu preservattiv.—Levitiku 2:​11-13.

8. (a) X’kien meħtieġ minn dak li jagħmel l-​offerta? (b) Kif nistgħu nkunu ċerti li l-​qima tagħna hi aċċettata minn Jehovah?

⁸ Xi ngħidu dwar min jagħmel l-​offerta? Il-​Liġi kienet tgħid li kulmin jiġi quddiem Jehovah ried ikun safi u bla tinġis. Jekk xi ħadd kien jitniġġes b’xi ħaġa, l-​ewwel dan ried joffri offerta għad-​dnub jew offerta għall-​ħtija biex jerġaʼ jikseb qagħda tajba maʼ Jehovah. Hekk l-​offerta tal-​ħruq jew is-​sagrifiċċju tas-​sliem li joffri setaʼ jiġi aċċettat Minnu. (Levitiku 5:​1-6, 15, 17) Għalhekk, napprezzaw aħna kemm hu importanti li dejjem ikollna waqfa tajba maʼ Jehovah? Jekk irridu li l-​qima tagħna tkun aċċettata minn Alla, irridu nkunu ħfief biex insewwu fejn inkunu nqasna milli nobdu l-​liġijiet t’Alla. Għandna nkunu ħfief biex nagħmlu użu mill-​mezzi li Alla pprovdielna għall-​għajnuna. Dawn huma l-​anzjani fil-​kongregazzjoni u Ġesù Kristu, dak li “ħallas għal dnubietna.”—Ġakbu 5:14; 1 Ġwann 2:​1, 2.

9. X’differenza ewlenija hemm bejn is-​sagrifiċċji li jsiru lil Jehovah u dawk offruti lil allat foloz?

⁹ Fil-​fatt, id-​differenza ewlenija bejn is-​sagrifiċċji offruti lil Jehovah u dawk offruti lil allat foloz min-​nies tal-​ġnus madwar Iżrael kienet l-​enfasi fuq li jkunu ħielsa minn kull xorta taʼ tinġis. Waqt li jikkummenta dwar dan il-​fattur distintiv tas-​sagrifiċċji fil-​Liġi taʼ Mosè, ktieb taʼ referenza josserva: “Nistgħu ninnotaw li m’hemm ebda konnessjoni maʼ tbassir jew seħer; ebda mġiba taʼ ġenn, ħsara fiżika fuq il-​persuna nfisha, jew prostituzzjoni sagra, billi r-​riti tal-​fertilità senswali u bla kontroll kienu projbiti għalkollox; ebda sagrifiċċji umani; ebda sagrifiċċji għall-​mejtin.” Dan kollu jiġbed l-​attenzjoni tagħna lejn ħaġa waħda: Jehovah hu qaddis, u ma jaċċettax jew jagħlaq għajnejh għal xi xorta taʼ dnub jew korruzzjoni. (Ħabakkuk 1:13) Il-​qima u s-​sagrifiċċji li jiġu offruti lilu jridu jkunu safja u bla tinġis fiżikament, moralment, u spiritwalment.—Levitiku 19:2; 1 Pietru 1:​14-16.

10. Fi qbil mat-​twissija taʼ Pawlu li nsibu f’Rumani 12:​1, 2, liema eżami tagħna nfusna għandna nagħmlu?

¹⁰ Meta nqisu dan, għandna neżaminaw lilna nfusna f’kull qasam tal-​ħajja biex inkunu ċerti li s-​servizz tagħna lil Jehovah huwa aċċettat minnu. M’għandna qatt naħsbu li dment li jkollna xi sehem fil-​laqgħat Kristjani u fil-​ministeru, ma jimpurtax x’nagħmlu fil-​ħajja privata tagħna. Ukoll m’għandniex inħossu li għax nieħdu sehem f’attivitajiet Kristjani dan b’xi mod jiskużana mill-​ħtieġa li nosservaw il-​liġijiet t’Alla f’oqsma oħrajn taʼ ħajjitna. (Rumani 2:​21, 22) M’għandniex nistennew li se jkollna l-​barka u l-​favur taʼ Jehovah jekk inħallu xi ħaġa mhix safja jew li tkun imniġġsa f’għajnejh tħassar il-​ħsibijiet u l-​azzjonijiet tagħna. Żomm f’moħħok kliem Pawlu: “Nitlobkom ħuti, għall-​ħniena taʼ Alla, offru ġisimkom b’sagrifiċċju ħaj, qaddis, jogħġob lil Alla, jiġifieri l-​qima spiritwali tagħkom. Timxux max-​xejra taʼ din id-​dinja, iżda nbidlu skond it-​tiġdid taʼ fehmietkom, biex iseħħilkom tagħrfu x’inhi r-​rieda taʼ Alla, x’inhu t-​tajjeb li jogħġbu, x’inhu perfett.”—Rumani 12:​1, 2.

Offri Sagrifiċċji taʼ Tifħir b’Qalbek Kollha

11. X’inhu inkluż fl-​espressjoni “stqarrija qawwija,” li tissemma f’Lhud 10:23?

¹¹ Fl-​ittra tiegħu lil-​Lhud, Pawlu mbagħad jiġbed l-​attenzjoni tagħna lejn aspett vitali tal-​qima vera: “Inżommu sħiħ fl-​istqarrija qawwija tat-​tama tagħna, għax taʼ kelmtu huwa dak li għamlilna l-​wegħda.” (Lhud 10:23) L-​espressjoni “stqarrija qawwija” letteralment tfisser “qrara.” Pawlu jitkellem ukoll dwar “sagrifiċċju taʼ tifħir.” (Lhud 13:15) Dan ifakkarna fit-​tip taʼ sagrifiċċju li offrew irġiel bħal Abel, Noè, u Abraham.

12, 13. Meta xi Iżraeli kien joffri sagrifiċċju tal-​ħruq, dan x’kien jirrikonoxxi, u x’nistgħu nagħmlu biex nirriflettu l-​istess spirtu?

¹² Meta xi Iżraeli kien joffri sagrifiċċju tal-​ħruq, dan kien jagħmlu “minn jeddu” quddiem Jehovah. (Levitiku 1:​3, KŻ) B’dan is-​sagrifiċċju hu jkun għamel stqarrija pubblika, jew rikonoxximent, tal-​barkiet kotrana u l-​qalb tajba bl-​imħabba taʼ Jehovah lejn il-​poplu tiegħu. Ftakar li fattur distintiv tas-​sagrifiċċju tal-​ħruq kien li l-​offerta kollha kemm hi kienet tiġi konsmata fuq l-artal—simbolu xieraq taʼ devozzjoni u dedikazzjoni sħiħa. Bl-istess mod, aħna nuru l-​fidi tagħna fis-​sagrifiċċju li tħallas bħala prezz tal-​fidwa u l-​gratitudni tagħna għal dan meta minn jeddna u b’qalbna kollha noffru lil Jehovah “sagrifiċċju taʼ tifħir, jiġifieri l-​kelma taʼ xufftejna li tistqarr ismu.”

¹³ Filwaqt li l-​Kristjani ma joffrux sagrifiċċji letterali, t’annimali jew ħxejjex, huma għandhom ir-​responsabbiltà li jagħtu xiehda dwar l-​aħbar tajba tas-​Saltna u jagħmlu dixxipli taʼ Ġesù Kristu. (Mattew 24:14; 28:​19, 20) Tieħu vantaġġ meta jkollok opportunità li xxandar pubblikament l-aħbar tajba dwar is-Saltna t’Alla sabiex iktar nies jistgħu jkunu jafu dwar l-​affarijiet taʼ l-​għaġeb li Alla għandu merfugħin għal nies ubbidjenti? Tuża l-​ħin u l-​enerġija tiegħek minn jeddek biex tgħallem lil min juri interess u tgħinu jsir dixxiplu taʼ Ġesù Kristu? Il-​parteċipazzjoni żeluża tagħna fil-​ministeru, bħar-​riħa tfuħ taʼ l-​offerta tal-​ħruq, togħġbu ħafna lil Alla.—1 Korintin 15:58.

Thenna bi Sħubija m’Alla u mal-​Bnedmin

14. Il-​kliem taʼ Pawlu f’Lhud 10:​24, 25 kif jixbah l-​idea tas-​sagrifiċċju tas-​sliem?

¹⁴ Fl-​aħħar, Pawlu jiġbdilna l-​attenzjoni lejn ir-​relazzjoni tagħna maʼ Kristjani sħabna hekk kif inqimu lil Alla. “Naraw kif nistgħu nħajjru lil xulxin għall-​imħabba u għall-​għemil tajjeb. Ma ninqatgħux mil-​laqgħat tagħna flimkien, kif ħadu d-drawwa jagħmlu xi wħud; agħmlu l-qalb lil xulxin; u dan wisq aktar għandkom tagħmluh, aktar ma taraw li qiegħed joqrob il-​Jum.” (Lhud 10:​24, 25) L-​espressjonijiet ‘inħajru lil xulxin għall-​imħabba u għall-​għemil tajjeb,’ ‘niltaqgħu flimkien,’ u ‘nagħmlu l-​qalb lil xulxin’ kollha jfakkruna dwar dak li s-​sagrifiċċju tas-​sliem kien jagħmel għall-​poplu t’Alla f’Iżrael.

15. Liema xebh naraw bejn is-​sagrifiċċju tas-​sliem u l-​laqgħat Kristjani?

¹⁵ Il-​frażi “sagrifiċċju tas-​sliem” xi drabi tiġi tradotta “sagrifiċċju tas-​sħubija.” Il-​kelma Lhudija għal “sliem” hawnhekk hi fil-​plural, biex forsi turi li min jipparteċipa f’dawn is-​sagrifiċċji jkollu paċi m’Alla u paċi m’adoraturi sħabu. Rigward is-sagrifiċċju tas-sliem, wieħed studjuż josserva: “Dan kien tabilħaqq żmien taʼ sħubija ferriħija maʼ l-​Alla tal-​Patt, li matulu Hu kien jindenja li jsir il-​Mistieden taʼ Iżrael waqt li jittiekel is-​sagrifiċċju, saħansitra bħalma Hu dejjem kien Dak li jistieden.” Dan ifakkarna fil-​wegħda taʼ Ġesù: “Fejn tnejn jew tlieta jkunu miġbura f’ismi hemm inkun jien f’nofshom.” (Mattew 18:20) Kull darba li nattendu xi laqgħa Kristjana, nibbenefikaw mis-​sħubija li tibni, mit-​tagħlim taʼ inkuraġġiment, u mill-​ħsieb li l-​Mulej Ġesù Kristu qiegħed preżenti magħna. Dan jagħmel il-​laqgħa Kristjana okkażjoni verament taʼ ferħ u li ssaħħaħ il-​fidi.

16. Waqt li nżommu f’moħħna s-​sagrifiċċju tas-​sliem, x’inhu dak li b’mod speċjali jagħmel il-​laqgħat Kristjani tant taʼ ferħ?

¹⁶ Fis-​sagrifiċċju tas-​sliem, ix-​xaħam kollu, jiġifieri, taʼ madwar l-​imsaren, il-​kliewi, il-​parti taʼ fuq il-​fwied, u taʼ madwar il-​ġenbejn, kif ukoll il-​parti mxaħħma tad-​denb tan-​nagħġa, kien offrut lil Jehovah billi jinħaraq, b’duħħan jaqbad fuq l-​artal. (Levitiku 3:​3-16) Ix-​xaħam kien meqjus bħala l-​aħjar u l-​iktar parti rikka taʼ l-​annimal. Li toffrih fuq l-​artal kien jissimbolizza li lil Jehovah tagħtih l-​aħjar sehem. Dak li jagħmel il-​laqgħat Kristjani tant taʼ ferħ hu l-​fatt li aħna mhux biss nirċievu t-​tagħlim iżda wkoll noffru tifħir lil Jehovah. Dan nagħmluh billi nipparteċipaw u nagħtu bl-​umiltà l-​aqwa tagħna meta nkantaw mill-​qalb, nagħtu attenzjoni bir-​reqqa, u nikkummentaw meta jkun possibbli. “Hallelujah!” qal b’leħen għoli s-​salmista. “Għannu lill-​Mulej għanja ġdida: fil-​ġemgħa taʼ ħbiebu t-​tifħir tiegħu!”—Salm 149:1.

Hemm Jistennewna Barkiet Kotrana Mingħand Jehovah

17, 18. (a) Salamun liema sagrifiċċju grandjuż għamel meta ġie inawgurat it-​tempju f’Ġerusalemm? (b) Iċ-​ċerimonja taʼ l-​inawgurazzjoni tat-​tempju liema barkiet ġabitlu lill-​poplu?

¹⁷ Fl-​inawgurazzjoni tat-​tempju f’Ġerusalemm, fis-​sebaʼ xahar tas-​sena 1026 Q.E.K., is-​Sultan Salamun offra sagrifiċċju grandjuż quddiem Jehovah li kien jikkonsisti minn ‘sagrifiċċju tal-​ħruq u l-​offerta tal-​qmuħ u x-​xaħam tas-​sagrifiċċji tas-​sliem.’ Minbarra dak li kien offrut fl-​offerti tal-​qmuħ, total taʼ 22,000 baqra u 120,000 nagħġa ġew sagrifikati f’din l-​okkażjoni.—1 Slaten 8:​62-65.

¹⁸ Tistaʼ timmaġina kemm swiet flus u x’ammont taʼ xogħol kien involut għal ċerimonja kbira bħal din? Madankollu, il-​barkiet li Iżrael irċieva ovvjament kienu bil-​wisq akbar. Meta spiċċaw il-​festi, Salamun “bagħat il-​poplu, u huma bierku lis-​sultan u kulħadd mar fl-​għarix tiegħu, lkoll ferħana u qalbhom hienja għall-​ġid kollu li għamel il-​Mulej maʼ David, il-​qaddej tiegħu, u maʼ Iżrael, il-​poplu tiegħu.” (1 Slaten 8:66) Verament, bħalma qal Salamun, “il-​barka tal-​Mulej iġġib l-​għana, u xejn ma jżid magħha t-​taħbit tagħna.”—Proverbji 10:22.

19. X’nistgħu nagħmlu biex nirċievu barkiet grandjużi mingħand Jehovah issa u għal dejjem?

¹⁹ Qed ngħixu fi żmien meta d-​“dell tal-​ġid li għandu jiġi” ġie mibdul minn “dan l-​istess ġid.” (Lhud 10:1) Ġesù Kristu, bħala Dak li fl-​antik kien jiġi ffigurat permezz tal-​qassis il-​kbir, diġà daħal fis-​sema stess u ppreżenta l-​valur taʼ l-​istess demmu biex ipatti għad-​dnubiet taʼ dawk kollha li juru fidi fis-​sagrifiċċju tiegħu. (Lhud 9:​10, 11, 24-26) Bis-​saħħa taʼ dan is-​sagrifiċċju kbir, u billi b’qalbna kollha noffru lil Alla s-​sagrifiċċji tagħna taʼ tifħir, safjin u bla tinġis, aħna wkoll nistgħu nkomplu nimxu ‘ferħanin u qalbna hienja,’ waqt li nħarsu ’l quddiem lejn barkiet kotrana mingħand Jehovah.—Malakija 3:10.

Int Kif Twieġeb?

• Liema tagħrif u faraġ nistgħu nisiltu mill-​informazzjoni fil-​Liġi dwar is-​sagrifiċċji u l-​offerti?

• Liema hija l-​ewwel ħtieġa biex sagrifiċċju jkun aċċettat, u x’tifsir għandu dan għalina?

• X’nistgħu noffru li jistaʼ jitqabbel maʼ offerta volontarja tal-​ħruq?

• Il-​laqgħat Kristjani b’liema modi jistgħu jitqabblu maʼ sagrifiċċju tas-​sliem?

[Stampa f’paġna 18]

Is-​sagrifiċċju li Ġesù ħallas bħala prezz tal-​fidwa kien provdut minn Jehovah għas-​salvazzjoni tal-​bnedmin

[Stampa f’paġna 20]

Biex is-​servizz tagħna jkun aċċettat minn Jehovah, aħna rridu nkunu ħielsa minn kull xorta taʼ tinġis

[Stampa f’paġna 21]

Aħna nirrikonoxxu pubblikament it-​tjubija taʼ Jehovah meta nieħdu sehem fil-​ministeru