Ejja Nkunu Minn Dawk li Jemmnu

“Aħna minn dawk li jemmnu [“nies tal-​fidi,” “Saydon”], biex insalvaw.”—LHUD 10:39.

1. Għala jistaʼ jingħad li l-​fidi taʼ kull qaddej leali taʼ Jehovah hija prezzjuża?

L-​EWWEl darba li tidħol f’Sala tas-​Saltna li tkun mimlija adoraturi taʼ Jehovah, ieqaf ftit u ħares lejn dawk taʼ madwarek. Aħseb dwar il-​ħafna modi kif dawn juru l-​fidi tagħhom. Tistaʼ tara lil uħud imdaħħlin fiż-​żmien li qdew lil Alla għal għaxriet taʼ snin, żgħażagħ li kuljum jirreżistu l-​pressjoni minn dawk taʼ mparhom, u ġenituri li jaħdmu iebes biex irabbu tfal li jibżgħu minn Alla. Hemm l-​anzjani u l-​qaddejja ministerjali tal-​kongregazzjoni, li jġorru ħafna responsabbiltajiet fuq spallejhom. Iva, tistaʼ tara aħwa rġiel u nisa spiritwali taʼ kull età li jegħlbu kull xorta taʼ ostaklu sabiex jaqdu lil Jehovah. Kemm hi prezzjuża l-​fidi taʼ kull wieħed u waħda minnhom!—1 Pietru 1:7.

2. Il-​pariri taʼ Pawlu f’Lhud kapitli 10 u 11 għala huma taʼ benefiċċju għalina llum?

² Ftit huma l-​bnedmin imperfetti, jekk jeżistu, li fehmu kemm hi importanti l-​fidi aħjar minn kif fehemha l-​appostlu Pawlu. Fil-​fatt, hu nnota li l-​fidi ġenwina twassal lil dak li jkun ‘biex isalva.’ (Lhud 10:39) Iżda, Pawlu kien jaf ukoll li l-​fidi dejjem tistaʼ tiġi attakkata u mikula f’din id-​dinja taʼ mingħajr fidi. Hu kien imħasseb profondament dwar il-​Kristjani Lhud f’Ġerusalemm u fil-​Ġudea, li kienu qegħdin jissieltu biex jippreservaw il-​fidi tagħhom. Hekk kif inħarsu lejn partijiet minn Lhud kapitli 10 u 11, ejja ninnotaw il-​metodi wżati minn Pawlu biex jibnilhom il-​fidi. Waqt li nagħmlu dan, se naraw kif nistgħu nibnu fidi iktar b’saħħitha fina nfusna u f’dawk taʼ madwarna.

Esprimu Fiduċja f’Xulxin

3. Il-​kliem taʼ Pawlu li nsibu f’Lhud 10:39 kif juri li hu kellu fiduċja f’ħutu rġiel u nisa fil-​fidi?

³ L-​ewwel ħaġa li nistgħu ninnotaw hija l-​attitudni pożittiva taʼ Pawlu lejn l-​udjenza tiegħu. Hu kiteb: “Iżda aħna m’aħniex minn dawk li jerġgħu lura, biex nintilfu; aħna minn dawk li jemmnu, biex insalvaw.” (Lhud 10:39) Pawlu ħaseb l-​aħjar, mhux l-​agħar, dwar sħabu l-​Kristjani leali. Innota, ukoll, li hu uża l-​espressjoni “aħna.” Pawlu kien raġel twajjeb, u madankollu ma kienx jippretendi li hu superjuri għall-​udjenza tiegħu, bħallikieku kien fuq livell taʼ tjieba għoli, ferm ’il fuq minnhom. (Qabbel Koħèlet 7:16.) Minflok, inkluda lilu nnifsu magħhom. Hu esprima fiduċja mill-​qalb li hu u l-​qarrejja Kristjani leali tiegħu kellhom ilkoll jiffaċċjaw l-​ostakli skuraġġanti li kellhom quddiemhom, li kien se jkollhom il-​kuraġġ li jirrifjutaw li jerġgħu lura biex jintilfu, u li kienu se juru li huma minn dawk li għandhom il-​fidi.

4. Pawlu għal liema raġunijiet kellu fiduċja fi sħabu fit-​twemmin?

⁴ Pawlu kif setaʼ jkollu din il-​fiduċja? Ma kienx jarahom hu n-​nuqqasijiet tal-​Kristjani Lhud? Għall-​kuntrarju, offrielhom pariri speċifiċi biex jgħinhom jegħlbu n-​nuqqasijiet spiritwali tagħhom. (Lhud 3:12; 5:12-14; 6:4-6; 10:26, 27; 12:5) Xorta waħda, Pawlu kellu minn taʼ l-​inqas żewġ raġunijiet tajbin biex ikollu fiduċja f’ħutu. (1) Bħala wieħed li kien jimita lil Jehovah, Pawlu għamel ħiltu kollha biex lin-​nies t’Alla jarahom kif jarahom Jehovah. Dan ma kienx biss fejn kellhom x’jaqsmu n-​nuqqasijiet tagħhom imma wkoll fejn kellhom x’jaqsmu l-​kwalitajiet tajbin tagħhom u l-​potenzjal li kellhom biex jagħżlu ħalli jagħmlu t-​tajjeb fil-​futur. (Salm 130:3; Efesin 5:1) (2) Pawlu kellu fidi impliċita fil-​qawwa taʼ l-​ispirtu qaddis. Hu kien jaf li ebda ostaklu, ebda debbulizza umana, ma setgħu jżommu lil Jehovah milli jagħti “qawwa iktar min-​normal” lil kull Kristjan li jagħmel ħiltu kollha biex jaqdiH fedelment. (2 Korintin 4:7, NW; Filippin 4:13) Mela l-​fiduċja taʼ Pawlu f’ħutu rġiel u nisa ma kinitx barra minn lokha, mhix realistika, jew ottimistika żżejjed. Kienet ibbażata b’mod sod u msejsa Skritturalment.

5. Kif nistgħu nimitaw il-​fiduċja taʼ Pawlu, u wisq probabbli x’se jkun ir-​riżultat?

⁵ Ċertament, il-​fiduċja li wera Pawlu kienet tittieħed. Il-​fatt li jkollhom lil Pawlu jkellimhom b’mod daqshekk inkuraġġanti bilfors li kien ifisser ħafna għall-​kongregazzjonijiet f’Ġerusalemm u fil-​Ġudea. Il-​Kristjani Lhud, li kienu ffaċċjati biż-​żebliħ aħrax u bl-​indifferenza taʼ kburija taʼ l-​opponenti Lhud tagħhom, ġew megħjunin minn dawn l-​espressjonijiet biex jagħmlu riżoluzzjoni fi qlubhom li jkunu minn dawk li għandhom il-​fidi. Nistgħu aħna llum nagħmlu l-​istess lil xulxin? Huwa verament faċli li f’oħrajn naraw biss lista twila taʼ nuqqasijiet u difetti fil-​personalità. (Mattew 7:1-5) Madankollu, nistgħu ngħinu lil xulxin ferm iktar jekk ninnotaw u nistmaw il-​fidi unika li għandu kull wieħed minna. B’inkuraġġiment bħal dan, il-​fidi jkollha iktar ċans li tissaħħaħ.—Rumani 1:11, 12.

Nużaw il-​Kelma t’Alla b’Mod Xieraq

6. Pawlu minn liema sors kien qed jikkwota meta kiteb il-​kliem dokumentat f’Lhud 10:38?

⁶ Pawlu bena wkoll il-​fidi taʼ sħabu fit-​twemmin billi uża l-​Iskrittura bis-​sengħa. Per eżempju, hu kiteb: “Il-​bniedem ġust tiegħi jgħix bil-​fidi; imma jekk jerġaʼ lura jien ma nitgħaxxaqx bih.” (Lhud 10:38) Hawnhekk Pawlu kien qed jikkwota mill-​profeta Ħabakkuk.a Dan il-​kliem x’aktarx li kien familjari mal-​qarrejja taʼ Pawlu, Kristjani Lhud li kienu midħla sew tal-​kotba profetiċi. Jekk wieħed jikkunsidra l-​għan tiegħu—li jsaħħaħ il-​fidi taʼ Kristjani ġewwa u qrib Ġerusalemm madwar is-​sena 61 E.K.—l-​eżempju taʼ Ħabakkuk kien għażla addattata. Għala?

7. Ħabakkuk meta ddokumenta l-​profezija tiegħu, u x’kundizzjonijiet kien hemm f’Ġuda dak iż-​żmien?

⁷ Huwa evidenti li Ħabakkuk kiteb il-​ktieb tiegħu ftit iktar minn għoxrin sena qabel il-​qerda taʼ Ġerusalemm fis-​sena 607 Q.E.K. Fil-​viżjoni, il-​profeta ra lill-​Kaldin (jew, Babiloniżi), “ġens qalil li jaħbat għal kulħadd,” jattakkaw lil Ġuda u jeqirdu lil Ġerusalemm, u fil-​proċess jibilgħu popli u ġnus sħaħ. (Ħabakkuk 1:​5-11) Imma dan il-​gwaj kien ilu mbassar minn żmien Isaija, iktar minn seklu qabel. Fi żmien Ħabakkuk, Ġeħojakim saltan wara s-​Sultan tajjeb Ġosija, u l-​ħażen f’Ġuda ffjorixxa mill-​ġdid. Ġeħojakim ippersegwita lil dawk li kienu jitkellmu f’isem Jehovah u saħansitra qatilhom. (2 Kronaki 36:5; Ġeremija 22:17; 26:20-24) Mhux taʼ b’xejn li l-​profeta mnikket Ħabakkuk għajjat: “Mulej, kemm se ndum?”—Ħabakkuk 1:2.

8. L-​eżempju taʼ Ħabakkuk għala kien se juri li hu t’għajnuna għall-​Kristjani fl-​ewwel seklu u anki llum?

⁸ Ħabakkuk ma kienx jaf kemm kienet qrib il-​qerda taʼ Ġerusalemm. B’mod simili, il-​Kristjani taʼ l-​ewwel seklu ma kinux jafu meta kienet se tintemm is-​sistema t’affarijiet Lhudija. Lanqas aħna llum ma nafu l-​“jum u s-​siegħa” meta l-​ġudizzju taʼ Jehovah se jiġi kontra din is-​sistema mill-​agħar. (Mattew 24:36) Mela, ejja ninnotaw it-​tweġiba doppja li Jehovah ta lil Ħabakkuk. L-​ewwel, hu assigura lill-​profeta li t-​tmiem kien se jiġi preċiż fil-​waqt. ‘Ma jiddawwarx ma jasal!’ qal Alla, avolja min-​naħa tal-​bniedem kien donnu jidher li se jiddawwar. (Ħabakkuk 2:3) It-​tieni, Jehovah fakkar lil Ħabakkuk: “[I]l-ġust jgħix bil-​fedeltà tiegħu.” (Ħabakkuk 2:4) X’veritajiet mill-​isbaħ u sempliċi! L-​iktar li jimpurtana m’huwiex meta ġej it-​tmiem, imma jekk aħniex se nkomplu ngħixu ħajja taʼ fidi.

9. Qaddejja ubbidjenti taʼ Jehovah kif baqgħu jgħixu minħabba l-​fedeltà tagħhom (a) fis-sena 607 Q.E.K.? (b) wara s-​sena 66 E.K.? (ċ) Għala huwa vitali li nsaħħu l-​fidi tagħna?

⁹ Meta Ġerusalemm saret ħerba fis-​sena 607 Q.E.K., Ġeremija, is-​segretarju tiegħu Baruk, Ebedmelek, u r-​Rekabin leali raw il-​verità tal-​wegħda li Jehovah kien għamel lil Ħabakkuk. Dawn baqgħu ‘jgħixu’ billi skansaw il-​qerda terribbli taʼ Ġerusalemm. Għala? Jehovah ppremja l-​fedeltà tagħhom. (Ġeremija 35:1-19; 39:15-18; 43:4-7; 45:1-5) B’mod simili, il-​Kristjani Lhud taʼ l-​ewwel seklu bilfors li wieġbu tajjeb għall-​parir taʼ Pawlu, għax meta l-​eżerċti Rumani attakkaw lil Ġerusalemm fis-​sena 66 E.K. u mbagħad irtiraw bla ma ħadd jaf għala, dawk il-​Kristjani taw kas fedelment it-​twissija taʼ Ġesù biex jaħarbu. (Luqa 21:20, 21) Huma baqgħu jgħixu minħabba l-​fedeltà tagħhom. Bl-​istess mod, aħna se nibqgħu ngħixu jekk ninstabu li aħna leali meta jiġi t-​tmiem. X’raġuni vitali biex insaħħu l-​fidi tagħna issa!

Eżempji taʼ Fidi Mogħtijin il-​Ħajja

10. Pawlu kif iddeskrivieha l-​fidi taʼ Mosè, u aħna kif nistgħu nimitaw lil Mosè f’dan ir-​rigward?

¹⁰ Pawlu wkoll bena l-​fidi billi uża l-​eżempji b’mod potenti. Hekk kif taqra Lhud kapitlu 11, innota kif hu jagħti l-​ħajja lill-​eżempji taʼ karattri Bibliċi. Per eżempju, hu jgħid li Mosè “żamm iebes, daqs kemm kieku kien qiegħed jara lil Alla li ma jidhirx.” (Korsiv tagħna.) (Lhud 11:27) Fi kliem ieħor, Jehovah tant kien reali għal Mosè li kien bħallikieku setaʼ jara lil Alla li ma jidhirx. Jistaʼ jingħad l-​istess dwarna? Huwa faċli li ngħidu li għandna relazzjoni maʼ Jehovah, imma biex nibnu u nsaħħu din ir-​relazzjoni rridu naħdmu. Dan huwa xogħol li jeħtieġ li nagħmluh! Huwa Jehovah daqshekk reali għalina li nikkunsidrawh meta nieħdu d-​deċiżjonijiet, inkluż dawk li jidhru li huma żgħar ħafna? Fidi taʼ din ix-​xorta se tgħinna nissaportu saħansitra l-​agħar oppożizzjoni.

11, 12. (a) Il-​fidi taʼ Ħenok taħt liema kundizzjonijiet għandha mnejn ġiet ittestjata? (b) Ħenok liema premju inkuraġġanti rċieva?

¹¹ Ikkunsidra, ukoll, il-​fidi taʼ Ħenok. Huwa diffiċli għalina li nimmaġinaw l-​oppożizzjoni li ffaċċja. Ħenok kellu jwassal messaġġ li jniggeż taʼ ġudizzju kontra n-​nies mill-​agħar li kienu jgħixu dak iż-​żmien. (Ġuda 14, 15) Il-​persekuzzjoni li heddet lil dan ir-​raġel leali kienet b’mod evidenti tant kiefra, tant vjolenti, li Jehovah “ħadu” mill-​istat t’għajxien għall-​irqad fil-​mewt qabel ma l-​għedewwa setgħu jitfgħu idejhom fuqu. Għalhekk, Ħenok ma baqax ħaj biex jara t-​twettiq tal-​profezija li lissen. Madankollu, hu rċieva għotja li, f’xi aspetti, kienet saħansitra aħjar.—Lhud 11:5; Ġenesi 5:22-24.

¹² Jispjega Pawlu: “Qabel ma ttieħed [Ħenok] kien kiseb xhieda li hu kien għoġob lil Alla.” (Lhud 11:5) Dan x’kien ifisser? Qabel ma raqad fil-​mewt, Ħenok setaʼ ra viżjoni taʼ xi tip, forsi dwar il-​Ġenna taʼ l-​art li se jqum fiha jum wieħed mhux ’il bogħod. Kien x’kien il-​każ, Jehovah ħalla lil Ħenok ikun jaf li Hu kien kuntent bil-​korsa leali tiegħu. Ħenok kien ferraħ qalb Jehovah. (Qabbel Proverbji 27:11.) Huwa kommoventi li timmedita fuq il-​ħajja taʼ Ħenok, hux hekk? Tixtieq int li tgħix ħajja taʼ fidi bħal din? Allura mmedita fuq eżempji bħal dawn; arahom bħala nies reali. Kun determinat li tgħix bil-​fidi, jum wara jum. Ftakar, ukoll, li dawk li għandhom il-​fidi ma jaqdux lil Jehovah fuq il-​bażi taʼ xi data jew żmien stipulat meta Alla se jwettaq il-​wegħdi kollha tiegħu. Minflok, aħna deċiżi li naqdu lil Jehovah għal dejjem! Li nagħmlu dan ikun ifisser l-​aqwa mod taʼ ħajja f’din is-​sistema t’affarijiet u f’dik li ġejja.

Kif Insiru Iktar b’Saħħitna fil-​Fidi

13, 14. (a) Il-​kliem taʼ Pawlu dokumentat f’Lhud 10:24, 25 kif jistaʼ jgħinna biex il-​laqgħat tagħna nagħmluhom okkażjonijiet taʼ ferħ? (b) X’inhi r-​raġuni primarja għal-​laqgħat Kristjani?

¹³ Lill-​Kristjani Lhud, Pawlu wriehom għadd taʼ modi prattiċi kif setgħu jsaħħu l-​fidi tagħhom. Ejja nikkunsidraw tnejn biss. Aħna x’aktarx familjari mat-​twissija tiegħu f’Lhud 10:24, 25, li tħeġġiġna ninġabru regolarment fil-​laqgħat Kristjani tagħna. Iżda, ftakar li l-​kliem imnebbaħ taʼ Pawlu hemmhekk ma jimplikax li għandna nkunu osservaturi sempliċement passivi f’dawn il-​laqgħat. Minflok, Pawlu jiddeskrivi l-​laqgħat bħala opportunitajiet biex insiru nafu lil xulxin, biex inqanqlu lil xulxin ħalli naqdu lil Alla iktar bis-​sħiħ, u biex ninkuraġġixxu lil xulxin. Aħna nkunu hemm biex nagħtu, mhux biex nirċievu biss. Dan jgħin biex il-​laqgħat tagħna jkunu okkażjonijiet taʼ ferħ.—Atti 20:35.

¹⁴ Iżda, primarjament aħna nattendu għal-​laqgħat Kristjani biex inqimu lil Alla Jehovah. Dan nagħmluh billi nieħdu sehem fit-​talb u fl-​għanjiet, billi nagħtu widen b’attenzjoni kbira, u billi noffru “l-​kelma taʼ xufftejna”—espressjonijiet taʼ tifħir lil Jehovah fil-​kummenti tagħna u f’partijiet mil-​laqgħa. (Lhud 13:15) Jekk inżommu dawn l-​għanijiet f’moħħna u naġixxu fuqhom f’kull laqgħa, il-​fidi tagħna żgur li se tinbena kull darba.

15. Pawlu għala ħeġġeġ lill-​Kristjani Lhud biex iżommu sod mal-​ministeru tagħhom, u l-​istess parir għala huwa xieraq illum?

¹⁵ Mod ieħor kif nibnu l-​fidi huwa permezz tax-​xogħol taʼ l-​ippridkar. Kiteb Pawlu: “Inżommu sħiħ fl-​istqarrija qawwija tat-​tama tagħna, għax taʼ kelmtu huwa dak li għamlilna l-​wegħda.” (Lhud 10:23) Tistaʼ tħeġġeġ lil oħrajn biex jibqgħu ggranfati maʼ xi ħaġa meta jkunu donnhom fil-​periklu li se jitilquha. Satana ċertament li kien qed jippressa lil dawk il-​Kristjani Lhud biex jitilqu l-​ministeru tagħhom, u qed jagħmel pressjoni fuq in-​nies t’Alla llum ukoll. Jekk niġu ffaċċjati b’din il-​pressjoni, x’għandna nagħmlu? Ikkunsidra dak li għamel Pawlu.

16, 17. (a) Pawlu kif għamel il-​qalb għall-​ministeru? (b) Liema passi għandna nieħdu jekk insibu ruħna intimidati b’xi aspett tal-​ministeru Kristjan tagħna?

¹⁶ Lill-​Kristjani f’Tessalonika, Pawlu kitbilhom: “Għalkemm aħna, bħalma tafu, batejna u żebilħuna f’Filippi qabel ma ġejna għandkom, imma għamilna l-​qalb f’Alla tagħna, u fost ħafna taħbit xandarnielkom l-​Evanġelju taʼ Alla.” (1 Tessalonikin 2:2) Pawlu u sħabu kif ġew ‘imżebilħin’ ġo Filippi? Skond xi studjużi, il-​kelma Griega wżata minn Pawlu tesprimi trattament insolenti, t’għajb, jew vjolenti. L-​awtoritajiet Filippini kienu sawtuhom bil-​bsaten, tefgħuhom il-​ħabs, u qaflulhom saqajhom f’ċipp taʼ l-​injam. (Atti 16:16-24) Dik l-​esperjenza qarsa kif effettwatu lil Pawlu? Kien hemm uħud f’Tessalonika, il-​belt li kien imiss fuq il-​vjaġġ missjunarju tiegħu, li sabuh imriegħex bil-​biżaʼ lil Pawlu? Le, hu ‘għamel il-​qalb,’ billi kkonkwista l-​biżaʼ u kompla jippriedka bil-​qlubija.

¹⁷ Il-​qlubija taʼ Pawlu minfejn ġiet? Minn ġo fih? Le, hu qal li għamel il-​qalb permezz taʼ “Alla tagħna.” Xogħol taʼ referenza għal dawk li jittraduċu l-​Bibbja jgħid li din l-​istqarrija tistaʼ tiġi tradotta “Alla neħħa l-​biżaʼ minn ġo qalbna.” Mela jekk tħoss li m’intix partikolarment qalbieni dwar il-​ministeru tiegħek, jew jekk taħseb li xi aspett minnu jintimidak b’mod partikulari, għala ma tistaqsix lil Jehovah biex jagħmel l-​istess ħaġa għalik? Itolbu jneħħi l-​biżaʼ minn ġo qalbek. Itolbu jgħinek tagħmel il-​qalb għax-​xogħol. Iżjed minn hekk, ħu xi passi prattiċi oħrajn. Per eżempju, irranġa biex taħdem maʼ xi ħadd li jinqalaʼ fl-​aspett taʼ għoti taʼ xiehda li jikkonċernak. Dan għandu mnejn jinvolvi territorju taʼ negozju, għoti taʼ xiehda fit-​toroq, xandir informali, jew għoti taʼ xiehda bit-​telefon. Forsi min jgħinek ikun lest li għall-​ewwel jieħu t-​tmexxija hu. Jekk inhu hekk, osserva u tgħallem. Imma mbagħad agħmel il-​qalb biex tipprova int.

18. Liema barkiet nistgħu nesperjenzaw jekk nagħmlu l-​qalb fil-​ministeru tagħna?

¹⁸ Jekk jirnexxilek tagħmel il-​qalb, aħseb dwar x’jistaʼ jirriżulta. Meta tippersisti u ma tħallix li tiġi skuraġġit, x’aktarx li se jkollok esperjenzi tajbin meta taqsam il-​verità m’oħrajn, esperjenzi li kont titlifhom li kieku m’għamiltx hekk. (Ara paġna 25.) Se jkollok is-​sodisfazzjon li tkun taf li għoġobt lil Jehovah billi għamilt xi ħaġa li tħossha diffiċli għalik. Se tesperjenza l-​barka u l-​għajnuna tiegħu talli tkun għelibt il-​biżaʼ. Il-​fidi tiegħek se tkun iktar b’saħħitha. Ngħiduha kif inhi, ma tistax taħdem biex tibni l-​fidi f’oħrajn jekk fl-​istess waqt ma tibnix il-​fidi tiegħek stess.—Ġuda 20, 21.

19. Liema premju prezzjuż hemm maħżun għal “dawk li jemmnu”?

¹⁹ Jalla tkompli ssaħħaħ il-​fidi tiegħek u dik taʼ dawk madwarek. Dan tistaʼ tagħmlu billi tibni lilek innifsek u lil oħrajn billi tuża l-​Kelma t’Alla bis-​sengħa, billi tistudja l-​eżempji Bibliċi taʼ fidi u tagħtihom il-​ħajja, billi tipprepara għal-​laqgħat Kristjani u tipparteċipa fihom, u billi żżomm sod mal-​privileġġ prezzjuż tal-​ministeru pubbliku. Hekk kif tagħmel dawn l-​affarijiet, kun assigurat li int, tabilħaqq, wieħed minn “dawk li jemmnu.” Ftakar, ukoll, li dawk taʼ din ix-​xorta għandhom premju prezzjuż. Huma ‘minn dawk li jemmnu, biex isalvaw.’b Jalla l-​fidi tiegħek tkompli tissaħħaħ, u jalla Alla Jehovah jsalvak għal dejjem!

[Noti taʼ taħt]

Int kif Twieġeb?

◻ Pawlu kif esprima l-​fiduċja tiegħu fil-​Kristjani Lhud, u x’nistgħu nitgħallmu minn dan?

◻ Il-​fatt li Pawlu rrefera għall-​profeta Ħabakkuk għala kien daqshekk addattat?

◻ Pawlu ta l-​ħajja lil liema eżempji Skritturali taʼ fidi?

◻ Pawlu liema mezzi prattiċi rrikkmanda biex wieħed jibni l-​fidi?

[Stampa f’paġna 23]

Wara l-​esperjenza taʼ wġigħ li kellu ġo Filippi, Pawlu għamel il-​qalb biex ikompli jippriedka

[Stampi f’paġna 24]

Tistaʼ int tagħmel il-​qalb biex tipprova diversi forom taʼ għoti taʼ xiehda?