Rebaħ il-​Ħażen?

L-​IDEA taʼ ġlieda universali bejn il-​qawwiet tat-​tajjeb u l-​ħażin matul listorja qajmet ruxxmata spekulazzjonijiet minn kittieba u filosfi. Madankollu, hemm ktieb li fih insibu r-​rakkont eżatt tal-​battalja bejn Alla u x-​Xitan. Dan il-​ktieb huwa l-​Bibbja. Hi tikxef x’kien hemm involut f’dan il-​konflitt u tgħin lil dak li jkun jiddetermina min rebaħ tassew.

Eżatt wara l-​ħolqien taʼ l-​ewwel raġel u mara, spirtu inviżibbli, Satana x-​Xitan, sfida l-​ħakma t’Alla. Kif? Billi b’makakkerija saħaq li Alla ċaħħadhom minn affarijiet tajbin tal-​ħolqien tiegħu u li l-​bnedmin setgħu jgħixu aħjar jekk ikunu indipendenti minn Alla.—Ġenesi 3:​1-5; Apokalissi 12:9.

Iktar tard, fi żmien il-​patrijarka Ġob, Satana qajjem kwistjoni oħra. Bl-​intenzjoni li jkisser l-​integrità taʼ Ġob lejn Alla, Satana qal: “Ġild b’ġild, u l-​bniedem jagħti kull ma jkollu għal ħajtu!” (Ġob 2:4) Kif tefaʼ lil kulħadd f’keffa waħda b’din l-​istqarrija! Billi uża l-​kelma ġenerali “bniedem” minflok l-​isem taʼ Ġob, Satana żeraʼ dubju dwar l-​integrità tal-​bnedmin kollha. Fil-​fatt, hu sostna: ‘Il-​bniedem lest li jagħmel minn kollox biex isalva ħajtu. Agħtini l-​opportunità u tara kif jirnexxili nbiegħed lil kulħadd, ikun min ikun, ’il bogħod minn Alla.’

It-tweġiba għal dawn iż-​żewġ mistoqsijiet tiddetermina min rebaħ fil-​battalja bejn Alla u x-​Xitan: Il-​bniedem kapaċi jirnexxi fil-​ħakma tiegħu? Irnexxielu x-​Xitan ibiegħed lil kulħadd minn dak Alla veru?

Jistgħu l-​Bnedmin Jirnexxu fil-​Ħakma Tagħhom?

Għal eluf taʼ snin, il-​bnedmin esperimentaw b’ħakmiet differenti. Matul l-​istorja, ipprovaw diversi forom taʼ gvernijiet, bħall-​monarkija, l-​aristokrazija, id-​demokrazija, l-​awtokrazija, il-​Faxxiżmu, u l-​Komuniżmu. Il-​fatt li dejjem kien hemm bżonn li jesperimentaw b’dan, ma jurix li dawn id-​diversi ħakmiet m’humiex tajbin biżżejjed?

“Ir-​Rumani sabu ruħhom, kważi bla mistenni, involuti f’esperiment amministrattiv u vast,” kiteb H. G. Wells fil-​ktieb A History of the World, li ħareġ fl-​1922. Hu jkompli: “Kien il-​ħin kollu jinbidel, qatt ma sar stabbli. Minn banda, l-​esperiment falla. Mill-​banda l-​oħra l-​esperiment għadu mhux komplut, u llum l-​Ewropa u l-​Amerika għadhom qed jipprovaw isolvu l-​problemi komplikati li ġġib magħha l-​arti tat-​tmexxija, l-​istess bħalma kellhom jagħmlu r-​Rumani fil-​bidu.”

Fis-seklu 20 l-​esperimenti fit-​tmexxija baqgħu għaddejjin. F’dak is-​seklu l-​ħakma demokratika spiċċat aċċettata ħafna iktar minn qatt qabel. Id-​demokrazija bħala teorija ssostni li tilħaq lil kulħadd. Iżda wriet id-​demokrazija li l-​bniedem jistaʼ jirnexxilu jaħkem mingħajr Alla? Jawaharlal Nehru, ex-prim ministru taʼ l-​Indja, iddeskriva d-​demokrazija bħala li hija tajba imma kompla: “Ngħid hekk għax is-​sistemi l-​oħrajn huma agħar minnha.” L-​ex-president Franċiż Valéry Giscard d’Estaing qal: “Għaddejjin minn kriżi taʼ demokrazija rappreżentattiva.”

Anki fil-​ħames seklu Q.E.K., il-​filosfu Grieg Platun skopra xi difetti fit-​tmexxija demokratika. Skond il-​ktieb A History of Political Theory, hu attakka “l-​injoranza u n-​nuqqas t’abbiltà taʼ ħafna politikanti, li hija s-​saħta speċjali tad-​demokraziji.” Ħafna mill-​politikanti taʼ llum jilmentaw minħabba d-​diffikultà li għandhom biex isibu individwi kapaċi li huma kwalifikati sabiex jaqdu fil-​gvern. In-​nies “imxebbgħin b’mexxejja li jidhru mhux kwalifikati meta jiffaċċjaw problemi enormi,” qal The Wall Street Journal. Dan kompla: “Huma ma jifilħux iktar iħabbtu wiċċhom maʼ mexxejja korrotti u indeċiżi meta jiġu biex jistaqsu għad-​direzzjoni mingħandhom.”

Issa ikkunsidra t-​tmexxija tas-​Sultan Salamun taʼ Iżrael tal-​qedem. Alla Jehovah ta għerf li jispikka lil Salamun. (1 Slaten 5:​9-14 [4:​29-34, NW]) Kif mar il-​ġens taʼ Iżrael fil-​ħakma taʼ 40 sena taʼ Salamun? Il-​Bibbja twieġeb, “il-​poplu taʼ Ġuda u Iżrael kien kotran bħar-​ramel tal-​baħar; u kienu lkoll ferħana jieklu u jixorbu.” Ir-​rakkont jgħid ukoll: “Il-​poplu taʼ Ġuda u Iżrael kien jgħix fiż-​żgur, kulħadd taħt id-​dielja u t-​tina tiegħu, minn Dan sa Birsaba, iż-​żmien kollu taʼ Salamun.” (1 Slaten 4:20; 5:5 [4:​20, 25, NW]) Minħabba li kellhom sultan għaref jaħkem fuqhom bħala r-​rappreżentant viżibbli tal-​Ħakkiem Suprem inviżibbli, Alla Jehovah, il-​ġens gawda stabbiltà, għana, u ferħ li qatt ma kien hemm bħalhom.

X’kuntrast estrem bejn il-​ħakma tal-​bniedem u dik t’Alla! Jistaʼ xi ħadd sinċerament jgħid li Satana rebaħ fil-​kwistjoni tat-​tmexxija? Le, għax il-​profeta Ġeremija ddikjara bl-​eżatt: “Jien naf, Mulej, triq il-​bniedem m’hijiex f’idejh, anqas min jimxi ma jistaʼ jiddirieġi l-​passi tiegħu.”—Ġeremija 10:23.

Jistaʼ Satana Jbiegħed lil Kulħadd minn Alla?

Irnexxielu Satana juri li jistaʼ jbiegħed lil kulħadd minn Alla? F’kapitlu 11 tal-​ktieb Bibliku tal-​Lhud, l-​appostlu Pawlu jsemmi għadd taʼ rġiel u nisa leali li għexu qabel żmien il-​Kristjanità. Imbagħad hu ddikjara: “Ma nsibx żmien biż-​żejjed biex insemmi fuq Gidgħon, Barak, Sansun, Ġefti, David, Samwel u l-​profeti.” (Lhud 11:32) Pawlu jirreferi għal dawn il-​qaddejja leali t’Alla sempliċement bħala “sħaba hekk kbira taʼ xhieda.” (Lhud 12:1) Il-​kelma Griega użata hawnhekk bħala “sħaba” ma tfissirx xi ħaġa separata li l-​forma tagħha tidher sew u b’mod ċar b’daqs u forma preċiża, iżda tirreferi għal sħaba enormi u bla forma. Din hija addattata għaliex il-​qaddejja leali t’Alla fil-​passat tant kienu numerużi li huma bħal sħaba enormi. Iva, matul is-​sekli eluf taʼ nies bla għadd użaw ir-​rieda ħielsa tagħhom u għażlu li jappoġġaw lil Alla Jehovah.—Ġożwè 24:15.

Xi ngħidu għal żmienna? L-​għadd taʼ Xhieda taʼ Jehovah madwar id-​dinja żdied għal iktar minn sitt miljuni minkejja l-​persekuzzjoni terribbli u l-​oppożizzjoni li ffaċċjaw matul is-​seklu 20. Xi disaʼ miljuni oħra ssieħbu magħhom u ħafna minn dawn qed jagħmlu bidliet importanti sabiex jidħlu f’relazzjoni persunali mill-​qrib maʼ Alla.

L-aħjar tweġiba għal dak li saħaq Satana dwar li hu kapaċi jbiegħed lill-​bnedmin minn Jehovah, ġiet mill-​Iben t’Alla stess, Ġesù Kristu. Lanqas l-​uġigħ intollerabbli fuq għuda tat-​tortura ma kisser l-​integrità tiegħu. Hekk kif Ġesù ħa l-​aħħar nifs tiegħu, hu għajjat: “Missier, f’idejk jien nerħi ruħi.”—Luqa 23:46.

Satana uża dak kollu li setaʼ—mit-​tentazzjonijiet sal-​persekuzzjoni diretta—sabiex jipprova jżomm il-​bnedmin taħt il-​kontroll tiegħu. Billi juża “l-​ġibda tal-​ġisem u l-​ġibda taʼ l-​għajnejn u l-​kburija tal-​ħajja” biex jittanta lin-​nies, hu jipprova jżommhom ’il bogħod jew iwarrabhom minn Jehovah. (1 Ġwann 2:16) Ukoll, Satana ‘dallam il-​moħħ taʼ dawk neqsin mill-​fidi, biex ma jarawx jiddi d-​dawl taʼ l-​Evanġelju glorjuż taʼ Kristu.’ (2 Korintin 4:4) U Satana ma joqgħodx lura milli juża t-​theddid u milli jinqeda bil-​biżaʼ mill-​bniedem sabiex jilħaq l-​iskop tiegħu.—Atti 5:40.

Madankollu, dawk li jappoġġaw ’l Alla ma jiġux megħluba mix-​Xitan. Huma saru jafu lil Alla Jehovah u saru ‘jħobbuh b’qalbhom kollha b’ruħhom kollha u b’moħħhom kollu.’ (Mattew 22:37) Iva, il-​lealtà li ma titħarrikx taʼ Ġesù u taʼ għadd bla limitu taʼ bnedmin oħra hija telfa enormi għal Satana x-​Xitan.

X’Se Jiġri fil-​Futur?

Se jibqgħu l-​esperimenti fit-​tmexxija tal-​bniedem għaddejjin għal dejjem? Il-​profeta Danjel bassar: “Fi żmien dawn is-​slaten, Alla tas-​sema jqajjem saltna li ma tinqered qatt, u li l-​ħakma tagħha ma tgħaddix għal poplu ieħor. Hija tfarrak u ttemm is-​saltniet l-​oħra kollha, waqt li hi tibqaʼ wieqfa għal dejjem.” (Danjel 2:44) Is-​Saltna li se jwaqqaf Alla tas-​sema hija gvern tas-​sema f’idejn Ġesù Kristu. Hija l-​istess Saltna li Ġesù għallem lis-​segwaċi tiegħu biex jitolbu għaliha. (Mattew 6:​9, 10) Din is-​Saltna se teqred il-​gvernijiet umani kollha fil-​“gwerra [li ġejja] taʼ nhar il-​Jum il-​kbir taʼ Alla li jistaʼ kollox” u se teffettwa l-​art kollha.—Apokalissi 16:​14, 16.

X’hemm lest għal Satana? Il-​Bibbja tiddeskrivi din il-​ġrajja li se sseħħ fil-​futur: “[L-anġlu taʼ Jehovah] qabad id-​Dragun, is-​Serp tal-​qedem, li hu d-​Demonju u x-​Xitan, u rabtu għal elf sena, u waddbu fil-​bir bla qiegħ, li mbagħad għalqu fuqu u ssiġillah biex ma jqarraqx iżjed bil-​ġnus sa ma jintemmu l-​elf sena.” (Apokalissi 20:​1-3) Biss wara li Satana jintefaʼ fil-​bir bla qiegħ fejn ma jistaʼ jagħmel xejn, se jkun possibbli li jibda r-​Renju t’Elf Sena taʼ Ġesù Kristu.

Imbagħad, kemm se tkun post pjaċevoli din l-​art! Il-​ħażen u dawk li jagħmluh mhux se jkunu iktar. Il-​Bibbja twiegħed: “Għax il-​ħżiena jitqaċċtu ’l barra. . . . Imma l-​ġwejdin għad jirtu l-​art, u bi sliem kotran jitgħaxxqu.” (Salm 37:​9-11) Il-​paċi tagħhom mhix se tiġi mhedda minn ħadd, la mill-​bnedmin u lanqas mill-​annimali. (Isaija 11:​6-9) Anki l-​miljuni li, minħabba l-​injoranza jew għax ma kellhomx l-​opportunità li jsiru jafu lil Jehovah, żammew max-​Xitan fil-​passat se jerġgħu jingħataw il-​ħajja u se jirċievu edukazzjoni divina.—Atti 24:15.

Sa tmiem ir-​Renju t’Elf Sena, l-​art se terġaʼ ssir ġenna, u l-​bnedmin taʼ ġo fiha se jkunu saru perfetti. Imbagħad, Satana se jitħalla ħieles għal “ftit żmien,” u dan sabiex jinqered għal dejjem maʼ dawk kollha li jopponu l-​ħakma t’Alla.—Apokalissi 20:​3, 7-10.

Maʼ Min Se Żżomm?

Is-​seklu 20 kien żmien meta Satana ħalaq konfużjoni sħiħa fuq l-​art. Madankollu, minflok ma jindikaw li rebaħ, il-​kundizzjonijiet fuq l-​art jirrappreżentaw sinjal li ninsabu fl-​aħħar jiem taʼ din id-​dinja ħażina. (Mattew 24:​3-14; Apokalissi 6:​1-8) La l-​ħafna ħażen li hawn fuq l-​art u lanqas il-​ħarsa tal-​maġġuranza ma tiddetermina min rebaħ. Iż-​żewġ fatturi li jiddeterminaw min rebaħ huma: Taʼ min hi l-​aħjar tmexxija u jekk l-​individwu jkunx qeda ’l Alla għax qanqlitu l-​imħabba. Fiż-​żewġ każi, ir-​rebbieħ huwa Jehovah.

Jekk iż-​żmien li għadda diġà wera li Satana huwa żbaljat, għala Alla jħalli l-​ħażen jibqaʼ għaddej? Jehovah qed ikun paċenzjuż “għax ma jridx li xi ħadd jintilef, imma li kulħadd jersaq għall-​indiema.” (2 Pietru 3:9) Ir-​rieda t’Alla hi “li l-​bnedmin kollha jsalvaw u jaslu biex jagħrfu l-​verità.” (1 Timotju 2:4) Jalla tuża ż-​żmien li baqaʼ biex tistudja l-​Bibbja u tieħu għarfien dwar l-​uniku Alla veru, u dwar il-​wieħed li hu bagħat, Ġesù Kristu. (Ġwann 17:3) Ix-​Xhieda taʼ Jehovah se jkunu ferħanin jgħinuk tikseb dan l-​għarfien sabiex int ukoll tkun tistaʼ tingħaqad mal-​miljuni li jinsabu weqfin sodi man-​naħa tar-​rebħa.

[Stampi f’paġna 5]

Billi jżommu l-​integrità, ix-​Xhieda taʼ Jehovah ikabbru t-​telfa taʼ Satana

[Stampa f’paġna 7]

Jehovah għandu ħafna wħud leali li jżommu miegħu