“Ibqgħu Agħtu Prova taʼ X’Intom”

“Ibqgħu għarblu jekk intomx fil-​fidi, ibqgħu agħtu prova taʼ x’intom.” —2 KORINTIN 13:5.

1, 2. (a) L-inċertezza dwar it-​twemmin tagħna kif tistaʼ teffettwana? (b) Liema sitwazzjoni f’Korintu taʼ l-​ewwel seklu forsi ġagħlet lil xi wħud isiru inċerti dwar kif għandhom jimxu?

RAĠEL li qed jivvjaġġa fil-​kampanja jasal f’salib it-​toroq. Minħabba li m’huwiex ċert liema triq se twasslu għad-​destinazzjoni tiegħu, hu jistaqsi lil dawk li jkunu għaddejjin għad-​direzzjonijiet imma ma jaqblux fl-​informazzjoni li jagħtuh. Konfuż, hu ma jistax ikompli bil-​vjaġġ tiegħu. Dubji dwar it-​twemmin tagħna jistaʼ jkollhom l-​istess effett fuqna. Inċertezza bħal din tistaʼ ttellef l-​abbiltà tagħna li nieħdu deċiżjonijiet u ġġagħalna nkunu indeċiżi dwar kif għandna nimxu.

² Qamet sitwazzjoni li setgħet kellha effett bħal dan fuq xi wħud fil-​kongregazzjoni Kristjana f’Korintu, fil-​Greċja taʼ l-​ewwel seklu. “Appostli raffinati żżejjed” kienu qed jisfidaw l-​awtorità taʼ l-​appostlu Pawlu, billi qalu: “L-​ittri tiegħu huma serji u qawwijin, imma l-​preżenza tiegħu meta jkun fostna hi dgħajfa u kliemu taʼ min jistmerru.” (2 Korintin 10:​7-​12; 11:​5, 6) Ħarsa bħal din forsi ġagħlet lil xi wħud fil-​kongregazzjoni f’Korintu jsiru inċerti dwar kif għandhom jimxu.

3, 4. Il-​parir li Pawlu ta lill-​Korintin għala għandu jkun taʼ interess għalina?

³ Pawlu stabbilixxa l-​kongregazzjoni f’Korintu waqt iż-​żjara tiegħu hemmhekk fis-​sena 50 E.K. Hu baqaʼ f’Korintu “sena u sitt xhur, jgħallem il-​kelma t’Alla fosthom.” Tabilħaqq, “ħafna mill-​Korintin li semgħu bdew jemmnu u jitgħammdu.” (Atti 18:​5-​11) Pawlu kien interessat ferm fis-​saħħa spiritwali taʼ sħabu fit-​twemmin f’Korintu. Iżjed minn hekk, il-​Korintin kienu kitbu lil Pawlu għal pariri dwar ċerti kwistjonijiet. (1 Korintin 7:1) Għalhekk tahom pariri eċċellenti.

⁴ Pawlu kiteb: “Ibqgħu għarblu jekk intomx fil-​fidi, ibqgħu agħtu prova taʼ x’intom.” (2 Korintin 13:5) Li kieku applikaw dan il-​parir kien se jipproteġi lil dawk l-​aħwa f’Korintu milli jkunu inċerti dwar kif għandhom jimxu. Dan jistaʼ jipproteġina bl-​istess mod illum. Għalhekk, kif nistgħu nsegwu l-​parir taʼ Pawlu? Kif nistgħu ngħarblu jekk aħniex fil-​fidi? U x’hemm involut biex nagħtu prova taʼ x’aħna?

“Ibqgħu Għarblu Jekk Intomx fil-​Fidi”

5, 6. Liema livell għandna biex ngħarblu jekk aħniex fil-​fidi, u dan għala hu livell ideali?

⁵ F’eżami, ġeneralment jiġi testjat suġġett jew oġġett, u jkun hemm bażi jew livell maʼ xiex jitqabbel ir-​riżultat. F’dan il-​każ, l-​oġġett li se jiġi eżaminat m’huwiex il-​fidi​—it-​twemmin kollu li aħna aċċettajna. Is-​suġġett huwa aħna bħala individwi. Sabiex nagħmlu dan l-​eżami, għandna livell perfett. Għanja li kkompona s-​salmista David tgħid: “Il-​liġi tal-​Mulej perfetta, u tagħti l-​ħajja; ix-​xhieda tal-​Mulej hi sewwa, u tgħallem lil min ma jafx. Il-​preċetti tal-​Mulej dritti, u jferrħu l-​qalb; il-​kmandament tal-​Mulej safi, u jdawwal l-​għajnejn.” (Salm 19:​8, 9 [19:7, 8, NW]) Il-​Bibbja fiha l-​liġijiet perfetti u l-​ordnijiet ġusti taʼ Ġeħova, it-​tfakkiriet taʼ min jafdahom u l-​kmandamenti safjin tiegħu. Il-​messaġġ li hemm fiha huwa l-​livell ideali biex aħna ngħarblu lilna nfusna bih.

⁶ Rigward dan il-​messaġġ ispirat minn Alla, l-​appostlu Pawlu qal: “Għax il-​kelma t’Alla hi ħajja u qawwija u taqtaʼ iktar minn sejf b’żewġt ixfar u tinfed tant li tifred ir-​ruħ u l-​ispirtu, u l-​ġogi u l-​mudullun tagħhom, u tistaʼ tagħraf il-​ħsibijiet u l-​intenzjonijiet tal-​qalb.” (Ebrej 4:​12) Iva, il-​Kelma t’Alla tistaʼ teżamina lil qalbna​—dak li aħna tassew minn ġewwa. Kif nistgħu napplikaw personalment dan il-​messaġġ li jinfed u li hu qawwi? Is-​salmista ma jħalli ebda dubju dwar x’jinvolvi dan. Hu kanta: “Hieni l-​bniedem li . . . fil-​liġi tal-​Mulej hi l-​għaxqa tiegħu, lejl u nhar [“jaqra,” NW] fil-​liġi tiegħu.” (Salm 1:​1, 2) Il-​“liġi tal-​Mulej” tinsab fil-​Kelma miktuba t’Alla, il-​Bibbja. Għandha tkun l-​għaxqa tagħna li naqraw il-​Kelma taʼ Ġeħova. Tabilħaqq, għandna nieħdu l-​ħin biex naqrawha taħt l-​ilsien, jew nimmeditaw fuqha. Hekk kif nagħmlu dan, irridu nesponu lilna nfusna​—l-​oġġett li se jiġi eżaminat​—għal dak li hemm miktub fiha.

7. Liema hu l-​aħjar mod biex ngħarblu jekk aħniex fil-​fidi?

⁷ Għalhekk, l-​aħjar mod biex ngħarblu jekk aħniex fil-​fidi huwa li naqraw u nimmeditaw fuq il-​Kelma t’Alla bit-​talb u neżaminaw kemm il-​kondotta tagħna hi fi qbil maʼ dak li nitgħallmu. Aħna nistgħu nkunu ferħanin li għandna ħafna għajnuniet biex nifhmu l-​Kelma t’Alla.

8. Il-​pubblikazzjonijiet taʼ “l-​ilsir leali u għaqli” kif jistgħu jgħinuna ngħarblu jekk aħniex fil-​fidi?

⁸ Ġeħova pprovda tagħlim u istruzzjoni permezz tal-​pubblikazzjonijiet taʼ “l-​ilsir leali u għaqli,” li jispjegaw l-​Iskrittura. (Mattew 24:45) Per eżempju, ikkunsidra l-​kaxxa intitolata “Mistoqsijiet għall-​Meditazzjoni” fl-​aħħar tal-​maġġuranza mill-​kapitli fil-​ktieb Ersaq Qrib Lejn Jehovah.a X’opportunitajiet mill-​aqwa tipprovdilna din il-​parti mill-​ktieb biex nirriflettu personalment! Diversi suġġetti diskussi fir-​rivisti tagħna, It-​Torri taʼ l-​Għassa u Stenbaħ!, ukoll jgħinuna ngħarblu jekk aħniex fil-​fidi. Rigward l-​artikli li jiddiskutu l-​ktieb tal-​Proverbji f’ħarġiet reċenti tat-​Torri taʼ l-​Għassa, waħda mara Kristjana qalet: “Insib dawn l-​artikli prattiċi ħafna. Jgħinuni neżamina jekk id-​diskors, il-​kondotta, u l-​attitudni tiegħi jilħqux tassew il-​livelli ġusti taʼ Ġeħova.”

9, 10. Liema provvedimenti mingħand Ġeħova jgħinuna nibqgħu ngħarblu jekk aħniex fil-​fidi?

⁹ Nirċievu wkoll abbundanza taʼ direzzjoni u inkuraġġiment fil-​laqgħat tal-​kongregazzjoni, l-​assembleat, u l-​konvenzjonijiet. Dawn huma fost il-​provvedimenti spiritwali li Alla ta lil dawk li dwarhom Isaija pprofetizza: “Għad jiġri fl-​aħħar jiem li l-​għolja tad-​dar tal-​Mulej togħla ’l fuq mill-​qċaċet tal-​muntanji, u tintrefaʼ ’l fuq mill-​għoljiet, lejha għad jiġru l-​ġnus kollha. Kotra taʼ popli għad jiġu u jgħidu: ‘Ħalli mmorru u nitilgħu fuq l-​għolja tal-​Mulej, . . . biex jgħallimna triqatu, u nimxu fil-​mogħdijiet tiegħu.’” (Isaija 2:​2, 3) Hija tassew barka li għandna dawn l-​istruzzjonijiet dwar it-​triqat taʼ Ġeħova.

¹⁰ Mod ieħor biex ngħarblu lilna nfusna hu permezz tal-​parir mingħand dawk li għandhom kwalifiki spiritwali, inkluż lanzjani Kristjani. Rigward dawn, il-​Bibbja tgħid: “Ħuti, anki jekk bniedem jagħmel xi pass falz qabel ma jinduna, intom li għandkom kwalifiki spiritwali ipprovaw aġġustawh mill-​ġdid bi spirtu taʼ ħlewwa, waqt li kull wieħed minnkom joqgħod attent għalih innifsu, minħabba l-​biżaʼ li hu wkoll jiġi ttantat.” (Galatin 6:1) Kemm għandna nkunu grati għal dan il-​provvediment biex naġġustaw lilna nfusna!

11. X’hemm bżonn nagħmlu biex ngħarblu jekk aħniex fil-​fidi?

¹¹ Il-​pubblikazzjonijiet tagħna, il-​laqgħat Kristjani, u l-​irġiel maħturin huma kollha provvedimenti taʼ l-​għaġeb mingħand Ġeħova. Però, biex ngħarblu jekk aħniex fil-​fidi hemm bżonn li neżaminaw lilna nfusna. Għalhekk, meta nkunu qed naqraw il-​pubblikazzjonijiet tagħna jew nisimgħu pariri Skritturali rridu nistaqsu lilna nfusna: ‘Qiegħed dan jiddeskrivi lili? Nagħmlu dan? Qiegħed inżomm mat-​twemmin Kristjan kollu kemm hu?’ L-​attitudni tagħna lejn l-​informazzjoni li nirċievu permezz taʼ dawn il-​provvedimenti wkoll għandha tinfluwenza l-​kundizzjoni spiritwali tagħna. “Bniedem fiżiku ma jilqax l-​affarijiet taʼ l-​ispirtu t’Alla, għax huma bluha għalih,” tgħid il-​Bibbja. “Madankollu, il-​bniedem spiritwali jistħarreġ kollox.” (1 Korintin 2:​14, 15) M’għandniex aħna nistinkaw biex inżommu ħarsa spiritwali u pożittiva lejn dak li naqraw fil-​kotba, ir-​rivisti, u l-​pubblikazzjonijiet l-​oħra tagħna u lejn dak li nisimgħu fil-​laqgħat tagħna u mingħand l-​anzjani?

“Ibqgħu Agħtu Prova taʼ X’Intom”

12. X’jinvolvi li nagħtu prova taʼ x’aħna?

¹² Biex nagħtu prova taʼ x’aħna hemm bżonn li neżaminaw lilna nfusna. Iva, nistgħu nkunu fil-​verità, imma x’inhu l-​livell taʼ l-​ispiritwalità tagħna? Biex nagħtu prova taʼ x’aħna jinvolvi li nagħtu prova taʼ maturità u t’apprezzament ġenwin għall-​provvedimenti spiritwali.

13. Skond Ebrej 5:​14, x’għandna li jservi taʼ prova tal-​maturità tagħna?

¹³ Liema prova taʼ maturità Kristjana nistgħu nfittxu ġewwa fina? L-​appostlu Pawlu kiteb: “Imma l-​ikel solidu hu għan-​nies maturi, għal dawk li bl-​użu għandhom is-​sensi tagħhom imħarrġin biex jagħrfu jagħżlu kemm it-​tajjeb u kemm il-​ħażin.” (Ebrej 5:​14) Aħna nagħtu prova taʼ maturità billi nħarrġu s-​sensi tagħna. Hekk kif ċerti muskoli fil-​ġisem t’atleta għandhom bżonn jiġu mħarrġin billi jużahom ripetutament qabel ma jkun jistaʼ jibbrilla f’dak li jagħmel, is-​sensi tagħna għandhom jiġu mħarrġin ripetutament billi napplikaw prinċipji Bibliċi.

14, 15. Għala għandna nagħmlu sforz diliġenti biex nistudjaw l-​affarijiet iktar profondi tal-​Kelma t’Alla?

¹⁴ Però, qabel ma nistgħu nħarrġu s-​sensi tagħna hemm bżonn li nakkwistaw l-​għarfien. Għal dan, studju persunali diliġenti huwa essenzjali. Meta nagħmlu l-​istudju persunali b’mod regulari​—speċjalment dwar l-​affarijiet profondi tal-​Kelma t’Alla​—is-​sensi tagħna jitjiebu. Matul is-​snin, ħafna suġġetti profondi ġew diskussi fit-​Torri taʼ l-​Għassa. Kif nirreaġixxu meta niltaqgħu m’artikli li jiddiskutu l-​veritajiet iktar profondi? Għandna t-​tendenza li nevitawhom għaliex fihom “xi affarijiet tqal biex tifhimhom”? (2 Pietru 3:​16) Għall-​kuntrarju, nistinkaw iktar biex nifhmu dak li qed jingħad.​—Efesin 3:​18.

¹⁵ X’nistgħu nagħmlu jekk insibuha bi tqila biex nagħmlu l-​istudju persunali? Huwa vitali li nistinkaw biex nitgħallmu nieħdu gost nagħmluh.b (1 Pietru 2:2) Biex insiru maturi hemm bżonn li nitgħallmu niksbu nutrimenti minn ikel solidu, il-​veritajiet profondi tal-​Kelma t’Alla. Inkella, is-​sensi tagħna se jibqgħu limitati. Madankollu, biex nagħtu prova li mmaturajna jirrikjedi iktar milli sempliċement niksbu s-​sens tagħna biex nagħżlu. Fil-​ħajja taʼ kuljum għandna nużaw l-​għarfien li niksbu permezz taʼ studju persunali diliġenti.

16, 17. Liema parir jagħti d-​dixxiplu Ġakbu dwar li nsiru wħud li ‘jagħmlu l-​kelma’?

¹⁶ Il-​prova taʼ x’aħna tinsab ukoll fl-​espressjonijiet tagħna t’apprezzament għall-​verità​—ix-​xogħlijiet taʼ fidi tagħna. Billi juża tixbiha qawwija biex jiddeskrivi din il-​parti taʼ l-​eżaminar tagħna nfusna, id-​dixxiplu Ġakbu jgħid: “Qisu li tagħmlu l-​kelma, u mhux tisimgħuha biss, u b’hekk tqarrqu bikom infuskom bi rraġunar falz. Għax jekk xi ħadd jismaʼ l-​kelma u ma jagħmilhiex, dan qisu wieħed li jħares lejn wiċċu naturali f’mera. Iħares lejn wiċċu u jitlaq ’l hemm, u minnufih jinsa liema xorta taʼ bniedem hu. Imma min iħares fiss lejn il-​liġi perfetta tal-​libertà u jibqaʼ jagħmel hekk, peress li dan ma jkunx wieħed li jismaʼ u jinsa imma wieħed li jobdi l-​kelma, ikun hieni li qed jagħmilha.”​—Ġakbu 1:​22-​25.

¹⁷ Ġakbu qed jgħid: ‘Ħares fil-​mera tal-​Kelma t’Alla u eżamina lilek innifsek. Ippersisti f’dan, u eżamina lilek innifsek fid-​dawl taʼ dak li ssib fil-​kelma t’Alla. Imbagħad, tinsiex malajr dak li tara. Agħmel il-​bidliet li hemm bżonn.’ Li ssegwi dan il-​parir mhux dejjem jistaʼ jkun faċli.

18. Għala jistaʼ jkun taʼ sfida li nsegwu l-​parir taʼ Ġakbu?

¹⁸ Per eżempju, innota l-​bżonn taʼ li tieħu sehem fix-​xogħol taʼ l-​ippridkar. Pawlu kiteb: “Għax bil-​qalb wieħed jeżerċita l-​fidi għall-​ġustizzja, imma bil-​fomm jistqarr pubblikament għas-​salvazzjoni.” (Rumani 10:10) Li nistqarru pubblikament is-​salvazzjoni b’fommna jirrikjedi diversi bidliet. Il-​maġġuranza minna ma nsibuhx faċli x-​xogħol taʼ l-​ippridkar. Biex inkunu żelużi fih u nagħtu dan ix-​xogħol il-​post li jixraqlu f’ħajjitna jirrikjedi saħansitra iktar bidliet u sagrifiċċji. (Mattew 6:​33) Imma ladarba nagħmlu dan ix-​xogħol li tana Alla, aħna ferħanin bit-​tifħir li jġib lil Ġeħova. Għalhekk, irridu nistaqsu, aħna proklamaturi żelużi tas-​Saltna?

19. X’għandhom jinkludu x-​xogħlijiet taʼ fidi tagħna?

¹⁹ X’għandhom jinkludu x-​xogħlijiet taʼ fidi tagħna? Pawlu jgħid: “L-​affarijiet li tgħallimtu kif ukoll aċċettajtu u smajtu mingħandi u dak kollu li rajtu fija, ipprattikawhom; u l-​Alla tal-​paċi jkun magħkom.” (Filippin 4:9) Nagħtu prova taʼ dak li aħna billi nipprattikaw dak li tgħallimna, aċċettajna, smajna, u rajna​—dak kollu li jinvolvi biex inkunu Kristjani dedikati u dixxipli. Permezz tal-​profeta Isaija, Ġeħova jistruwixxi: “Din hi t-​triq; għaddi minnha.”​—Isaija 30:21.

20. Liema tip taʼ individwi huma barka kbira għall-​kongregazzjoni?

²⁰ Irġiel u nisa li huma studenti diliġenti tal-​Kelma t’Alla, li huma predikaturi żelużi taʼ l-​aħbar tajba, li ma jonqsux fl-​integrità tagħhom, u li jappoġġaw lealment is-​Saltna huma barka kbira għall-​kongregazzjoni. Il-​preżenza tagħhom iżżid maʼ l-​istabbilità tal-​kongregazzjoni li huma jassoċjaw magħha. Huma jagħtu prova li huma t’għajnuna kbira, speċjalment għaliex hemm ħafna wħud ġodda li għandna nieħdu ħsieb. Meta ndaħħlu f’qalbna l-​parir taʼ Pawlu biex ‘nibqgħu ngħarblu jekk aħniex fil-​fidi, nibqgħu nagħtu prova taʼ x’aħna,’ aħna wkoll insiru t’eżempju tajjeb għal oħrajn.

Tgħaxxaq f’li Tagħmel ir-​Rieda t’Alla

21, 22. Kif nistgħu nitgħaxxqu f’li nagħmlu r-​rieda t’Alla?

²¹ Is-​Sultan David taʼ Iżrael tal-​qedem kanta: “Li nagħmel ir-​rieda tiegħek. Alla tiegħi, dan jogħġobni; il-​liġi tiegħek ġewwa qalbi.” (Salm 40:9 [40:​8, NW]) David kien jitgħaxxaq f’li jagħmel ir-​rieda t’Alla. Għala? Għaliex il-​liġi taʼ Ġeħova kienet f’qalbu. David ma kienx inċert dwar it-​triq li kellu jieħu.

²² Meta l-​liġi t’Alla tkun f’qalbna, aħna ma nkunux inċerti dwar kif għandna nimxu. Aħna nitgħaxxqu f’li nagħmlu r-​rieda t’Alla. Għalhekk, bil-​mezzi kollha tagħna ejja ‘nistinkaw kemm nifilħu’ hekk kif naqdu lil Ġeħova mill-​qalb.​—Luqa 13:24.

[Noti taʼ taħt]

Tiftakar Int?

• Kif nistgħu ngħarblu jekk aħniex fil-​fidi?

• X’hemm involut biex nagħtu prova taʼ x’aħna?

• Xi prova nistgħu nagħtu biex nuru li aħna Kristjani maturi?

• Ix-​xogħlijiet taʼ fidi tagħna kif jgħinuna neżaminaw x’aħna?

[Stampa f’paġna 23]

Taf x’inhu l-​aħjar mod kif tgħarbel jekk intix fil-​fidi?

[Stampa f’paġna 24]

Aħna nagħtu prova tal-​maturità Kristjana tagħna billi nużaw is-​sensi tagħna

[Stampi f’paġna 25]

Nagħtu prova taʼ x’aħna billi ‘nagħmlu l-​kelma, u mhux nisimgħuha biss’