Il-​Ħarsa tal-​Bibbja

Min Huma d-​Demonji?

ĦARES, babaw, waħx, fatat, demonju huma spirti li n-​nies f’reliġjonijiet differenti jemmnu fihom u jqisuhom bħala ħżiena jew tajbin, jew it-​tnejn. Xi wħud oħrajn ma jemmnux fl-​ispirti għax jgħidu li huma sempliċement superstizzjoni jew frott tal-​immaġinazzjoni taʼ dak li jkun. Il-​Bibbja x’tgħid?

Il-​Bibbja tgħallem li l-​Ħallieq innifsu hu Spirtu u li l-​ewwel ħlejjaq li ħalaq kienu spirti, jew anġli. (Ġwanni 4:24; Ebrej 1:13, 14) Barra minn hekk, il-​Bibbja ssemmi l-​ispirti mill-​agħar, u xi drabi tirreferi għalihom bħala demonji. (1 Korintin 10:20, 21; Ġakbu 2:19) Imma l-​Bibbja ma tgħallimx li Alla ħalaq id-​demonji. Allura, dawn min huma, u kif bdew jeżistu?

“Anġli li Dinbu”

Meta Alla ħalaq il-​ħlejjaq spirti, hu tahom il-​libertà tal-​għażla, jiġifieri, l-​abbiltà li jagħżlu huma stess jekk iridux jagħmlu t-​tajjeb jew il-​ħażin. B’sogħba, wara l-​ħolqien tal-​bniedem, numru mhux magħruf taʼ anġli għażlu li jagħmlu l-​ħażin billi rribellaw kontra Alla.

L-​ewwel spirtu li rribella u l-​iktar wieħed magħruf li hu mill-​agħar sar Satana. Ġesù Kristu qal li dan “ma żammx sħiħ fil-​verità.” (Ġwanni 8:44) X’qanqal lil Satana jiħodha kontra Alla? Hu beda jixxennaq għall-​qima li tappartjeni esklużivament lill-​Ħallieq, u mbagħad hu aġixxa skont din ix-​xewqa billi għamel lilu nnifsu alla rivali. B’dan il-​mod, hu għamel lilu nnifsu “Satana,” kelma li tfisser “opponent.” Sekli wara, qabel id-​Dilluvju taʼ żmien Noè, anġli oħrajn ngħaqdu maʼ Satana, billi abbandunaw il-​pożizzjoni li kellhom fis-​sema biex jimmaterjalizzaw ruħhom u jieħdu sura taʼ bniedem u jgħixu fuq l-​art. (Ġenesi 6:1-​4; Ġakbu 1:13-​15) Meta seħħ id-​Dilluvju, l-​“anġli li dinbu” li kienu mmaterjalizzaw ruħhom, milli jidher reġgħu lura lejn il-​qasam tal-​ispirti. (2 Pietru 2:4; Ġenesi 7:17-​24) Maż-​żmien, bdew jissejħu demonji.—Dewteronomju 32:17; Marku 1:34.

Dawn l-​anġli diżubbidjenti issa kienu sabu ruħhom f’sitwazzjoni differenti ħafna minn dik li kienu jgawdu qabel ma rribellaw. Ġuda 6 jgħid: “Lill-​anġli li ma żammewx il-​pożizzjoni oriġinali tagħhom imma abbandunaw il-​post xieraq fejn kellhom jgħammru, [Alla] żammhom marbutin għal dejjem fi dlam ċappa għall-​ġudizzju tal-​jum il-​kbir.” Tabilħaqq, Alla ma ħalliex lid-​demonji jgawdu l-​privileġġi li kellhom qabel fis-​sema, imma tefagħhom “f’ħofor taʼ dlam ċappa” figurattivi, maqtugħin minn kull tidwil spiritwali.

“Iqarraq bl-​Art Abitata Kollha”

Għalkemm id-​demonji b’mod evidenti ma tħallewx jimmaterjalizzaw ruħhom mill-​ġdid fi bnedmin, huma għad għandhom qawwa u influwenza kbira fuq l-​imħuħ u l-​ħajjiet tan-​nies. Fil-​fatt, Satana, flimkien mal-​qtajjaʼ taʼ demonji tiegħu, qed “iqarraq bl-​art abitata kollha.” (Rivelazzjoni 12:9; 16:14) Kif? Ħafna drabi permezz tat-​“tagħlim tad-​demonji.” (1 Timotju 4:1) Dan it-​tagħlim falz, li spiss huwa tagħlim reliġjuż, għema l-​imħuħ taʼ miljuni taʼ nies biex ma jarawx il-​verità dwar Alla. (2 Korintin 4:4) Ikkunsidra xi eżempji.

● It-​tagħlim li l-​mejtin jibqgħu ħajjin. Id-​demonji jqarrqu bin-​nies permezz taʼ dehriet, ilħna, u atti makakki, ħalli jġegħluhom jemmnu li l-​ħajjin jistgħu jikkomunikaw mal-​mejtin. Iktar minn hekk, dan il-​qerq makakk jistaʼ jġiegħel lil xi nies jemmnu l-​gidba li r-​ruħ tibqaʼ ħajja wara li jmut il-​ġisem. Madankollu, il-​Bibbja tgħid ċar u tond: “Il-​mejtin ma jafu assolutament xejn.” (Ekkleżjasti 9:5, 6) Peress li ‘niżlu fis-​skiet,’ huma lanqas ifaħħru lil Alla ma jistgħu.—Salm 115:17.a

● Nuqqas taʼ morali għoljin. L-​1 Ġwanni 5:19 jgħid: “Id-​dinja kollha qiegħda taħt il-​qawwa tal-​Ħażin.” Satana u d-​demonji tiegħu jieħdu vantaġġ mill-​qawwa tagħhom billi jużaw il-​mezzi tax-​xandir u mezzi oħrajn biex jippromwovu l-​ħsieb mill-​agħar li l-​bnedmin għandhom ipaxxu x-​xewqat immorali tal-​laħam. (Efesin 2:1-​3) Għaldaqstant, kull xorta taʼ immoralità, inkluż perverżjonijiet sesswali, hija komuni llum. Imġiba bħal din hi saħansitra kunsidrata bħala normali, filwaqt li l-​livelli tal-​Bibbja spiss jitqiesu bħala antikwati jew intolleranti.

● Jippromwovu l-​ispiritiżmu. L-​appostlu Pawlu ltaqaʼ maʼ qaddejja li kienet maħkuma minn “demonju tat-​teħbir,” li permezz tiegħu lis-​sidien tagħha setgħet “tipprovdilhom ħafna qligħ billi tipprattika l-​arti tat-​tbassir.” (Atti 16:16) Peress li kien jaf x’kien is-​sors tal-​abbiltajiet sopranaturali tagħha, Pawlu rrifjuta li jagħti widen għal dak li kienet qed tgħid it-​tfajla. Barra minn hekk, hu ma riedx joffendi lil Alla, li jqis kull xorta taʼ spiritiżmu—inkluż l-​astroloġija u t-​talb lill-​ispirti—bħala moqżieża.—Dewteronomju 18:10-​12.

Ipproteġi Ruħek mid-​Demonji

Kif tistaʼ tipproteġi ruħek mill-​ispirti mill-​agħar? Il-​Bibbja twieġeb: “Issottomettu ruħkom lejn Alla; imma opponu lix-​Xitan, u hu jaħrab minnkom.” (Ġakbu 4:7) Aħna nobdu dan il-​kmand meta ngħixu skont it-​tagħlim li nsibu fil-​Bibbja, l-​uniku ktieb sagru li jikxef kompletament lil Satana, lid-​demonji, u “t-​tnassis,” jiġifieri l-​atti makakki, tagħhom. (Efesin 6:11; 2 Korintin 2:11) Il-​Bibbja tgħidilna wkoll li l-​ispirti mill-​agħar, flimkien maʼ dawk kollha li jopponu lil Alla, mhumiex se jibqgħu għal dejjem. (Rumani 16:20) “Huma r-​retti li se jgħammru fuq l-​art, u dawk bla ħtija se jibqgħu fiha,” jgħid Proverbji 2:21.

[Nota taʼ taħt]

QATT ĦSIBT DWAR DAN?

● Id-​demonji nħalqu minn Alla?—2 Pietru 2:4.

● Tistaʼ titkellem mal-​mejtin?—Ekkleżjasti 9:5, 6.

● Kif tistaʼ tipproteġi ruħek mid-​demonji?—Ġakbu 4:7.

[Stampa f’paġna 31]

Id-​demonji jipprovaw jinfluwenzaw lin-​nies b’ħafna modi