Ibqaʼ qrib l-organizzazzjoni taʼ Ġeħova

ID-​DIXXIPLU Ġakbu kiteb: “Ersqu qrib lejn Alla, u hu jersaq qrib lejkom.” (Ġak. 4:8) Iva, Ġeħova la hu kbir wisq u lanqas ’il bogħod wisq biex jismaʼ t-​talb li nitolbuh, minkejja l-​imperfezzjonijiet tagħna. (Atti 17:27) Kif nistgħu nersqu qrib lejn Alla? Nistgħu nagħmlu dan billi nibnu relazzjoni persunali mill-​qrib maʼ Ġeħova li tinkludi talb bil-​ħrara. (Salm 39:12) Nistgħu wkoll nikkultivaw l-​intimità maʼ Alla billi regolarment nistudjaw il-​Kelma tiegħu, il-​Bibbja. B’hekk, insiru nafu lil Alla Ġeħova, l-​iskopijiet tiegħu, u r-​rieda tiegħu għalina. (2 Tim. 3:16, 17) Għalhekk, nitgħallmu nħobbuh u niżviluppaw biżaʼ bnin li ma nogħġbuhx.—Salm 25:14.

² Madankollu, li nkunu qrib Ġeħova hu possibbli biss permezz taʼ Ibnu, Ġesù. (Ġw. 17:3; Rum. 5:10) L-​ebda bniedem ma jistaʼ qatt jagħtina dehen aħjar li nifhmu moħħ Alla Ġeħova milli tana Ġesù. Tant kien midħla taʼ Missieru b’mod intimu li setaʼ jgħid: “Ħadd ma jaf min hu l-​Iben ħlief il-​Missier; u ħadd ma jaf min hu l-​Missier ħlief l-​Iben, u dak li lilu l-​Iben lest li jirrivelah.” (Lq. 10:22) Għalhekk, meta nistudjaw l-​Evanġelji biex nitgħallmu kif kien jaħseb u jħossu Ġesù, fil-​fatt, inkunu qed nitgħallmu kif jaħseb u jħossu Ġeħova. Għarfien bħal dan jgħinna nersqu eqreb lejn Alla tagħna.

³ Taħt l-​istat taʼ kap tal-​Iben t’Alla, nikkultivaw intimità maʼ Ġeħova billi nibqgħu qrib tal-​mezz viżibbli li jgħinna nitgħallmu kif nagħmlu r-​rieda t’Alla. Bħalma ġie mbassar f’​Mattew 24:45-​47, is-​Sid, Ġesù Kristu, ħatar lill-​“ilsir leali u għaqli” biex jipprovdi “ikel fiż-​żmien xieraq” għall-​kongregazzjoni Kristjana. Illum, l-​ilsir leali jipprovdilna abbundanza taʼ ikel spiritwali. Permezz taʼ dan il-​mezz, Ġeħova jagħtina l-​parir biex naqraw il-​Kelma tiegħu kuljum, nattendu regolarment il-​laqgħat Kristjani tagħna, u jkollna sehem sinifikanti fl-​ippritkar tal-​“aħbar tajba tas-​saltna.” (Mt. 24:14; 28:19, 20; Ġoż. 1:8; Salm 1:1-​3) Qatt m’għandu jkollna ħarsa mill-​aspett fiżiku dwar l-​ilsir leali. Għandna nagħmlu ħilitna biex nibqgħu qrib il-​parti viżibbli tal-​organizzazzjoni taʼ Ġeħova u naġixxu fuq id-​direzzjoni tagħha. Dan se jressaqna eqreb lejn Alla tagħna, Ġeħova, u se jservi biex isaħħaħna u jipproteġina minkejja l-​provi.

GĦALA L-​PROVI QED JIŻDIEDU

⁴ Forsi ilek fil-​verità ħafna snin. Jekk inhu hekk, żgur li taf xi jfisser li tissaporti provi taʼ integrità. Imma anki jekk għadek kemm sirt taf lil Ġeħova u ilek tassoċja man-​nies tiegħu għal perijodu taʼ żmien qasir biss, int konxju li Satana x-​Xitan jopponi lil kull min jissottometti ruħu lejn is-​sovranità taʼ Ġeħova. (2 Tim. 3:12) Għalhekk, kemm jekk ilek tissaporti ftit u kemm jekk ħafna, m’għandekx għalfejn tibżaʼ jew tiskuraġġixxi ruħek. Ġeħova jwiegħed li se jsostnik u jippremjak b’ħelsien u ħajja fil-​futur.—Ebr. 13:5, 6; Riv. 2:10.

⁵ Ilkoll kemm aħna forsi għad irridu ngħaddu minn provi matul dawn il-​jiem li baqaʼ mis-​sistema taʼ Satana. Minn mindu ġiet stabbilita s-​Saltna t’Alla fl-​1914, Satana ma tħalliex jidħol fis-​smewwiet taʼ Ġeħova. Hu twaddab ’l isfel lejn l-​art, fejn hu u l-​anġli mill-​agħar tiegħu huma ristretti. Il-​gwaj li żdied fuq l-​art, inkluż il-​persekuzzjoni li żdiedet fuq il-​qaddejja dedikati taʼ Ġeħova, hu riżultat tar-​rabja taʼ Satana u juri li qed ngħixu fl-​aħħar jiem tal-​ħakma mill-​agħar tiegħu fuq il-​bnedmin.—Riv. 12:1-​12.

⁶ Inkorlat minħabba l-​kundizzjoni degradanti tiegħu, Satana jaf li ftit żmien baqagħlu. Flimkien mad-​demonji tiegħu, hu jagħmel kull sforz biex ifixkel ix-​xogħol tal-​ippritkar u biex jeqred l-​unità tal-​qaddejja taʼ Ġeħova. Dan iqegħedna fil-​kamp tal-​battalja tal-​gwerra spiritwali li hi deskritta bħala li “ma nissarawx kontra d-​demm u l-​laħam, imma kontra l-​gvernijiet, kontra l-​awtoritajiet, kontra l-​ħakkiema dinjin taʼ dan id-​dlam, kontra l-​forzi taʼ l-​ispirti mill-​agħar fil-​postijiet tas-​sema.” Jekk irridu noħorġu rebbiħin fuq in-​naħa taʼ Ġeħova, m’għandniex inċedu fil-​ġlieda, imma nżommu l-​armatura spiritwali tagħna sħiħa. Għandna ‘nżommu sod kontra t-​tnassis’ tax-​Xitan. (Efes. 6:10-​17) Dan jitlob is-​sabar min-​naħa tagħna.

NIKKULTIVAW IS-​SABAR

⁷ Is-​sabar ifisser “l-​abbiltà li nissaportu t-​tbatija jew l-​għawġ.” F’sens spiritwali, is-​sabar jirreferi għal kwalità taʼ li wieħed ikun sod f’li jagħmel dak li hu sewwa minkejja tbatija, oppożizzjoni, persekuzzjoni, jew fatturi oħra intenzjonati biex ibegħduna mit-​triq taʼ integrità lejn Alla li nkunu qbadna. Is-​sabar Kristjan għandu jiġi kultivat. Dan jieħu ż-​żmien. Il-​ħila li nissaportu tiżdied hekk kif nagħmlu progress spiritwali. Billi nissaportu provi żgħar tal-​fidi tagħna li jiġu fil-​bidu tal-​korsa Kristjana li qbadna, se nissaħħu, inkunu kapaċi nissaportu iktar provi diffiċli li żgur se jiġu. (Lq. 16:10) Ma naffordjawx nistennew sakemm jiġu provi kbar biex inkunu determinati li nieqfu sodi fil-​fidi. Għandna nieħdu deċiżjoni soda qabel ma jiġu l-​provi. Biex jindika li s-​sabar irid jiġi kultivat flimkien maʼ kwalitajiet divini oħra, l-​appostlu Pietru kiteb: “Aġixxu billi tagħmlu kull sforz ħerqan, u mal-​fidi tagħkom żidu l-​virtù, mal-​virtù l-​għarfien, maʼ l-​għarfien ir-​rażna, mar-​rażna s-​sabar, mas-​sabar id-​devozzjoni lejn Alla, mad-​devozzjoni lejn Alla l-​affezzjoni lejn l-​aħwa, maʼ l-​affezzjoni lejn l-​aħwa l-​imħabba.”—2 Pt. 1:5-​7; 1 Tim. 6:11.

⁸ Fl-​ittra tiegħu, Ġakbu jiġbdilna l-​attenzjoni lejn l-​importanza taʼ li nikkultivaw is-​sabar: “Qisuh bħala ferħ mill-​akbar, ħuti, meta tiltaqgħu maʼ diversi provi, għax bħalma tafu, meta l-​fidi tagħkom tgħaddi mill-​provi tipproduċi s-​sabar. Imma ħallu s-​sabar iwettaq xogħlu għalkollox, sabiex b’hekk tkunu kompluti u sħaħ f’kull aspett bla ma jonqoskom xejn.” (Ġak. 1:2-​4) Ġakbu jgħid li l-​Kristjani għandhom jilqgħu l-​provi u jkunu ferħanin bihom għax jgħinuna nipproduċu s-​sabar. Int tarahom hekk l-​affarijiet? Imbagħad Ġakbu juri li s-​sabar stess għandu xogħol xi jwettaq biex jipperfezzjonalna l-​personalità Kristjana u jagħmilna aċċettabbli bis-​sħiħ għal Alla. Iva, is-​sabar tagħna jinbena jum wara jum hekk kif niffaċċjaw u negħlbu l-​provi. Is-​sabar, imbagħad, jipproduċi kwalitajiet mixtiqin oħra li neħtieġu.

⁹ Is-​sabar tagħna jogħġob lil Ġeħova; se jqanqlu jippremjana bil-​ħajja taʼ dejjem. Ġakbu żied jgħid: “Hieni l-​bniedem li jibqaʼ jissaporti l-​provi, għaliex meta jiġi approvat jirċievi l-​kuruna tal-​ħajja, li Ġeħova wiegħed lil dawk li jibqgħu jħobbuh.” (Ġak. 1:12) Iva, aħna nissaportu għax għandna l-​ħajja quddiem għajnejna. Mingħajr sabar, ma nistgħux nibqgħu fil-​verità. Jekk inċedu għall-​pressjonijiet tad-​dinja, se niġu sforzati biex immorru lura fid-​dinja. Mingħajr sabar, ma jibqax ikollna l-​ispirtu taʼ Ġeħova, u għalhekk ma nistgħux nipproduċu l-​frott tiegħu f’ħajjitna.

¹⁰ Jekk irridu nibqgħu nissaportu f’dawn iż-​żminijiet diffiċli, jeħtieġ nikkultivaw l-​attitudni x-​xierqa lejn is-​sofferenza bħala Kristjani. Ftakar li Ġakbu kiteb: “Qisuh bħala ferħ mill-​akbar.” Dan jistaʼ ma jkunx faċli nagħmluh peress li jistgħu jkunu involuti sofferenza fiżika jew dik mentali. Imma ftakar li hemm il-​ħajja futura fin-​nofs. Esperjenza tal-​appostli tgħinna naraw kif nistgħu nithennew waqt is-​sofferenza. Ir-​rakkont jinsab fil-​ktieb tal-​Atti u jgħid hekk: “Sejħu lill-​appostli, sawtuhom, u ordnawlhom biex ma jibqgħux jitkellmu f’isem Ġesù, u telquhom. Għalhekk, dawn telqu minn quddiem is-​Sinedriju, henjin għax kienu tqiesu denji li jiġu diżonorati minħabba ismu.” (Atti 5:40, 41) L-​appostli fehmu li s-​sofferenza tagħhom kienet prova li kienu ubbidjenti lejn il-​kmand taʼ Ġesù u li kienu rċivew l-​approvazzjoni taʼ Ġeħova. Snin wara, meta kiteb l-​ewwel ittra mnebbħa tiegħu, Pietru kkummenta fuq il-​valur taʼ sofferenza bħal din minħabba s-​sewwa.—1 Pt. 4:12-​16.

¹¹ Esperjenza oħra tinvolvi lil Pawlu u Sila. Meta kienu għaddejjin bix-​xogħol missjunarju tagħhom f’Filippi, ġew arrestati u akkużati li fixklu lill-​belt u li xandru drawwiet illegali. Minħabba f’hekk, ġew imsawtin bl-​aħrax u mitfugħin il-​ħabs. Ir-​rakkont Bibliku jgħidilna li waqt li kienu għadhom fil-​ħabs bil-​ġrieħi tagħhom mhux imdewwijin, “għall-​ħabta taʼ nofsillejl, Pawlu u Sila kienu qed jitolbu u jfaħħru lil Alla bil-​kant, u l-​ħabsin kienu qed jisimgħuhom.” (Atti 16:16-​25) Pawlu u sieħbu kellhom il-​ħarsa t-​tajba lejn is-​sofferenzi tagħhom minħabba Kristu mhux biss bħala evidenza tal-​integrità tagħhom stess quddiem Alla u l-​bnedmin imma wkoll bħala mezz biex ikomplu jagħtu xhieda lil dawk li forsi kienu inklinati jagħtu widen għall-​aħbar tajba. Il-​ħajja t’oħrajn kienet involuta. Dak il-​lejl stess, il-​kalzrier u n-​nies taʼ daru taw widen u saru dixxipli. (Atti 16:26-​34) Pawlu u Sila fdaw f’Ġeħova, fil-​qawwa tiegħu, u fir-​rieda tiegħu li jwiżinhom fis-​sofferenzi tagħhom. Ma ħarġux diżappuntati.

¹² Illum, ukoll, Ġeħova pprovda kulma neħtieġu biex iwiżinna waqt żminijiet taʼ prova. Iridna nissaportu. Tana l-​Kelma mnebbħa tiegħu biex jarmana bl-​għarfien eżatt dwar l-​iskop tiegħu. Dan isaħħilna l-​fidi. Aħna għandna l-​opportunità li nassoċjaw maʼ sħabna fit-​twemmin u li nagħtu servizz sagru. Għandna wkoll il-​privileġġ li nżommu sħubija mill-​qrib maʼ Ġeħova nnifsu permezz tat-​talb. Hu jismaʼ l-​espressjonijiet taʼ tifħir tagħna u t-​talb bil-​ħerqa tagħna biex jgħinna nżommu waqfa nadifa quddiemu. (Flp. 4:13) U ma rridux ninsew is-​saħħa li niksbu mill-​meditazzjoni fuq it-​tama mqiegħda quddiemna.—Mt. 24:13; Ebr. 6:18; Riv. 21:1-​4.

NISSAPORTU DIVERSI PROVI

¹³ Il-​provi li niffaċċjaw illum huma simili għal dawk li ffaċċjaw id-​dixxipli li Ġesù Kristu kellu fil-​bidu. Fi żmienna, ix-​Xhieda taʼ Ġeħova sofrew abbuż verbali u fiżiku minn opponenti informati ħażin. Bħalma ġara fi żmien l-​appostli, ħafna mill-​oppożizzjoni tiġi mxewxa minn fanatiċi reliġjużi li t-​tagħlim u l-​prattiki foloz tagħhom jiġu esposti fil-​Kelma t’Alla. (Atti 17:5-​9, 13) Kultant, in-​nies taʼ Ġeħova sabu s-​serħan billi fittxew drittijiet legali li huma garantiti minn gvernijiet politiċi. (Atti 22:25; 25:11) Madankollu, xi mexxejja wkoll imponew projbizzjonijiet uffiċjali fuq ix-​xogħol tagħna, biex jipprovaw itemmu l-​ministeru Kristjan tagħna. (Salm 2:1-​3) F’ċirkustanzi bħal dawn, bi qlubija aħna nsegwu l-​eżempju tal-​appostli leali, li qalu: “Jeħtieġ li aħna nobdu lil Alla bħala ħakkiem u mhux lill-​bnedmin.”—Atti 5:29.

¹⁴ Hekk kif l-​ispirtu tan-​nazzjonaliżmu jkompli jintensifika fid-​dinja kollha, il-​predikaturi tal-​aħbar tajba jesperjenzaw pressjonijiet akbar biex jabbandunaw il-​ministeru tagħhom mogħti minn Alla. Il-​qaddejja kollha t’Alla japprezzaw iktar bis-​sħiħ it-​twissija li tinsab f’​Rivelazzjoni 14:9-​12 dwar il-​qima tal-​“bhima salvaġġa u x-​xbieha tagħha.” Aħna nirrealizzaw is-​sinifikat taʼ kliem Ġwanni: “Hawn hu fejn jeħtieġu s-​sabar il-​qaddisin, dawk li josservaw il-​kmandamenti t’Alla u l-​fidi taʼ Ġesù.”

¹⁵ Il-​provi li jiġu minħabba gwerer, rivoluzzjonijiet, jew persekuzzjoni diretta u projbizzjonijiet uffiċjali jistgħu jagħmluhielek impossibbli li twettaq il-​qima Kristjana fil-​beraħ. Jistaʼ jkun li l-​kongregazzjoni ma tkunx tistaʼ tiltaqaʼ. Il-​kuntatt mal-​uffiċċju tal-​fergħa jistaʼ jinqataʼ. Jistgħu jiġu interrotti ż-​żjajjar mill-​indokraturi li jżuru l-​kongregazzjonijiet. Forsi ma jaslux il-​pubblikazzjonijiet. Jekk tiġri xi waħda minn dawn l-​affarijiet, x’għandek tagħmel?

¹⁶ Ir-​risposta hi, agħmel kulma tistaʼ u kemm tistaʼ skont ma jippermettu ċ-​ċirkustanzi. Għandu jkun possibbli li tagħmel studju persunali. Ġeneralment gruppi żgħar ikunu jistgħu jiltaqgħu għal studju fi djar privati. Pubblikazzjonijiet li ġew studjati fil-​passat u l-​Bibbja stess jistgħu jintużaw bħala bażi għal-​laqgħat. Tinkwetax jew teċċita ruħek. Ġeneralment, il-​Ġemgħa li Tiggverna tkun tistaʼ tistabbilixxi xi forma taʼ komunikazzjoni maʼ aħwa responsabbli fi żmien qasir.

¹⁷ Anki jekk issib ruħek iżolat minn ħutek Kristjani kollha, żomm f’moħħok li m’intix iżolat minn Ġeħova u Ibnu, Ġesù Kristu. It-​tama tiegħek tistaʼ tibqaʼ soda. Ġeħova xorta jistaʼ jismaʼ t-​talb tiegħek, u jistaʼ jsaħħek bl-​ispirtu tiegħu. Fittex lilu biex jiggwidak. Ftakar li int qaddej taʼ Ġeħova u dixxiplu taʼ Ġesù Kristu. Għalhekk agħmel użu tajjeb minn kull opportunità biex tagħti xhieda. Ġeħova se jbierek l-​isforzi tiegħek, u fi ftit żmien oħrajn jistgħu jissieħbu miegħek fil-​qima vera.—Atti 4:13-​31; 5:27-​42; Flp. 1:27-​30; 4:6, 7; 2 Tim. 4:16-​18.

¹⁸ Però, jekk, bħall-​appostli u oħrajn, tinsab mhedded bil-​mewt, poġġi l-​fiduċja tiegħek “fl-​Alla li jqajjem il-​mejtin.” (2 Kor. 1:8-​10) Il-​fidi tiegħek fil-​provvediment tiegħu tal-​irxoxt tistaʼ tgħinek tissaporti saħansitra l-​eħrex oppożizzjoni. (Lq. 21:19) Kristu Ġesù tana l-​eżempju; kien jaf li l-​fedeltà tiegħu li għaddiet minn prova kienet se ssaħħaħ lil oħrajn biex jissaportu. Int tistaʼ ssaħħaħ lil ħutek b’mod simili.—Ġw. 16:33; Ebr. 12:2, 3; 1 Pt. 2:21.

¹⁹ Minbarra l-​persekuzzjoni u l-​oppożizzjoni, għandu mnejn ikollok tissaporti sitwazzjonijiet diffiċli oħra. Pereżempju, xi wħud ġew skuraġġiti minħabba l-​apatija tan-​nies fit-​territorju tagħhom. Oħrajn kellhom ikampaw b’mard fiżiku jew emozzjonali tagħhom stess jew kellhom jissaportu limitazzjonijiet imposti fuqhom minn dgħufija umana. Bl-​istess mod, l-​appostlu Pawlu kellu jissaporti prova taʼ xi tip li fixklitu fis-​servizz tiegħu jew kultant għamlithulu diffiċli. (2 Kor. 12:7) Ukoll, Epafroditu, Kristjan tal-​ewwel seklu minn Filippi, ħassu ‘mdejjaq għaliex [sħabu] semgħu li kien marad.’ (Flp. 2:25-​27) L-​imperfezzjonijiet umani tagħna u dawk t’oħrajn jistgħu joħolqu problemi partikularment diffiċli biex nissaportuhom. Jistaʼ jkun hemm konflitti fil-​personalità bejn il-​Kristjani jew anki fil-​familja taʼ dak li jkun. Imma dawk li jżommu mal-​pariri tal-​Kelma taʼ Ġeħova jistgħu jissaportu ostakli bħal dawn b’suċċess u jegħlbuhom.—Eżek. 2:3-​5; 1 Kor. 9:27; 13:8; Kol. 3:12-​14; 1 Pt. 4:8.

DETERMINATI LI NIBQGĦU LEALI

²⁰ Għandna nibqgħu mqabbdin sod maʼ dak li Ġeħova ħatar bħala Kap tal-​kongregazzjoni, Ġesù Kristu. (Kol. 2:18, 19) Irridu naħdmu mill-​qrib mal-​“ilsir leali u għaqli” u dawk maħturin bħala indokraturi. (Ebr. 13:7, 17) Billi nżommu qrib maʼ arranġamenti teokratiċi u nikkooperaw maʼ dawk li qed jieħdu t-​tmexxija, inkunu organizzati biex nagħmlu r-​rieda taʼ Ġeħova. Jeħtieġ li nużaw bis-​sħiħ il-​privileġġ tat-​talb. Ftakar, lanqas saħansitra ħitan taʼ ħabs jew ċella solitarja ma tistaʼ taqtgħalna l-​komunikazzjoni maʼ Missierna tas-​sema li jħobbna jew tħarbtilna l-​unità li għandna maʼ sħabna l-​aduraturi.

²¹ B’determinazzjoni u sabar, ejja nagħmlu kulma nistgħu biex inwettqu l-​inkarigu tagħna biex nippritkaw u nipperseveraw fix-​xogħol li Ġesù Kristu rxoxtat qal lis-​segwaċi tiegħu jagħmlu: “Għalhekk, morru u agħmlu dixxipli min-​nies tal-​ġnus kollha, għammduhom fl-​isem tal-​Missier u taʼ l-​Iben u taʼ l-​ispirtu qaddis, u għallmuhom josservaw dak kollu li ordnajtilkom.” (Mt. 28:19, 20) Bħal Ġesù, ejja nissaportu. Jalla nżommu ċar quddiemna t-​tama tas-​Saltna u l-​prospett taʼ ħajja taʼ dejjem. (Ebr. 12:2) Bħala dixxipli mgħammdin taʼ Kristu, għandna l-​privileġġ li naqsmu fit-​twettiq tal-​profezija taʼ Ġesù rigward “il-​konklużjoni tas-​sistema.” Hu qal: “Din l-​aħbar tajba tas-​saltna tiġi pridkata fl-​art abitata kollha bħala xiehda lill-​ġnus kollha; u mbagħad jiġi t-​tmiem.” (Mt. 24:3, 14) Jekk nagħmlu dan ix-​xogħol b’qalbna kollha matul dan iż-​żmien, se nesperjenzaw il-​ferħ taʼ li nidħlu f’ħajja eterna fid-​dinja ġdida u ġusta taʼ Ġeħova!