Għassu u Ishru!

“[“Ibqgħu,” “NW”] ishru, mela, għaliex la tafu l-​jum u lanqas is-​siegħa.”—MATTEW 25:13.

1. L-​appostlu Ġwanni lejn liema ħaġa ħares ’il quddiem?

FL-​AĦĦAR djalogu fil-​Bibbja, Ġesù wiegħed: “Jien dalwaqt ġej!” L-​appostlu tiegħu Ġwanni wieġeb: “Hekk ikun. Ejja, Mulej Ġesù!” L-​appostlu ma kellu ebda dubju li Ġesù kien se jiġi. Ġwanni kien fost l-​appostli li kienu staqsew lil Ġesù: “Dan meta għad jiġri? U x’se jkun is-​sinjal tal-​miġja [“preżenza,” NW] [Grieg, pa·rou·siʹa] tiegħek u taʼ tmiem id-​dinja?” Iva, Ġwanni ħares ’il quddiem bil-​fiduċja kollha lejn il-​preżenza futura taʼ Ġesù.—Apokalissi 22:20; Mattew 24:3.

2. Inkwantu għall-​preżenza taʼ Ġesù, x’inhi s-​sitwazzjoni fir-​reliġjonijiet?

² Fiduċja bħal din hija rari llum il-​ġurnata. Ħafna reliġjonijiet għandhom duttrina uffiċjali dwar il-​“miġja” taʼ Ġesù, imma ftit mill-​membri tagħhom qed jistennewha bis-​serjetà. Dan juruh bil-​mod li jgħixu. Il-​ktieb The Parousia in the New Testament jinnota: “Ftit hemm integrazzjoni pożittiva tat-​tama tal-​Parousia fil-​ħajja, fil-​ħsieb u fix-​xogħol tal-​knisja. . . . L-​urġenza kbira li biha l-​knisja għandha tattwa d-​dmirijiet tagħha taʼ ndiema u taʼ proklamazzjoni missjunarja taʼ l-​evanġelju, tiddgħajjef jekk mhux tintilef għalkollox.” Imma mhux għal kulħadd!

3. (a) Il-​Kristjani veri kif iħossuhom dwar il-​pa·rou·siʹa? (b) Issa x’se nikkunsidraw b’mod partikulari?

³ Id-​dixxipli veri taʼ Ġesù qegħdin jistennew bil-​ħerqa t-​tmiem taʼ din is-​sistema preżenti t’affarijiet mill-​agħar. Waqt li nagħmlu dan lealment, jeħtieġ li nżommu l-​ħarsa xierqa lejn dak kollu li hu involut fil-​preżenza taʼ Ġesù u naġixxu fi qbil miegħu. Dan se jgħinna ‘nibqgħu nżommu sħaħ sa l-​aħħar u nsalvaw.’ (Mattew 24:13) Waqt li kien qed jagħti l-​profezija li nsibu f’Mattew kapitli 24 u 25, Ġesù pprovda parir għaqli li nistgħu napplikawh, għall-​ġid dejjiemi tagħna. Kapitlu 25 fih parabboli li int x’aktarx taf bihom, inkluż dik dwar għaxar xebbiet (ix-xebbiet għaqlin u dawk boloh) u l-​parabbola tat-​talenti. (Mattew 25:1-30) Kif nistgħu nibbenefikaw minn dawn it-​tixbihat?

Oqgħod Għassa, Bħalma Kienu l-​Ħames Xebbiet!

4. X’inhu l-​punt prinċipali tal-​parabbola tax-​xebbiet?

⁴ Forsi tixtieq terġaʼ taqra l-​parabbola tax-​xebbiet misjuba f’Mattew 25:1-13. L-​isfond huwa tieġ grandjuż Lhudi li fih l-​għarus imur id-​dar taʼ missier l-​għarusa biex jiħodha lejn id-​dar taʼ l-​għarus (jew dar missieru). Purċissjoni bħal din setgħet kienet tinkludi mużiċisti u għannejja, u ħadd ma kien ikun jaf eżatt il-​ħin tal-​wasla tagħha. Fil-​parabbola, l-​għaxar xebbiet stennew sa tard bil-​lejl għall-​wasla taʼ l-​għarus. Ħamsa minnhom, taʼ boloh li kienu, ma kinux ġabu żejt biżżejjed għall-​musbieħ, u b’hekk kellhom imorru jixtru iktar. Il-​ħamsa l-​oħra, bil-​għaqal kollu, kienu ġabu iktar żejt f’reċipjenti sabiex ikunu jistgħu jerġgħu jimlew l-​imsiebaħ tagħhom jekk ikun hemm bżonn waqt li jkunu qed jistennew. Dawn il-​ħamsa biss kienu preżenti u mħejjijin meta wasal l-​għarus. Għaldaqstant, huma biss tħallew jidħlu għall-​festa. Meta l-​ħames xebbiet boloh marru lura, kien tard wisq għalihom biex jidħlu.

5. Liema skritturi jitfgħu dawl fuq it-​tifsira figurattiva tal-​parabbola tax-​xebbiet?

⁵ Ħafna mill-​aspetti taʼ din il-​parabbola jidhru li huma simboliċi. Per eżempju, l-​Iskrittura titkellem dwar Ġesù bħala l-​għarus. (Ġwann 3:28-30) Ġesù xebbah lilu nnifsu maʼ bin sultan li tħejjiet festa tat-​tieġ għalih. (Mattew 22:1-14) U l-​Bibbja tqabbel lil Kristu maʼ raġel miżżewweġ. (Efesin 5:23) Interessanti, li waqt li l-​Kristjani f’postijiet oħrajn huma deskritti bħala “l-​għarusa” taʼ Kristu, din il-​parabbola ma ssemmix għarusa. (Ġwann 3:29; Apokalissi 19:7; 21:2, 9) Din, iżda, issemmi għaxar xebbiet, u f’postijiet oħrajn il-​midlukin huma mxebbhin maʼ xebba mwegħda fiż-​żwieġ lil Kristu.—2 Korintin 11:2.a

6.Ġesù liema twissija ta meta kien qed jikkonkludi l-​parabbola tax-​xebbiet?

⁶ Minbarra dawn id-​dettalji u xi applikazzjonijiet profetiċi, ċertament li hemm prinċipji mill-​aħjar li nistgħu nitgħallmu minn din il-​parabbola. Per eżempju, innota li Ġesù temm din il-​parabbola bil-​kliem: “[Ibqgħu] ishru, mela, għaliex la tafu l-​jum u lanqas is-​siegħa.” Għalhekk, il-​parabbola turi l-​ħtieġa li kull wieħed minna joqgħod għassa, u jżomm għajnejh miftuħin għat-​tmiem li riesaq taʼ din is-​sistema mill-​agħar. Dan it-​tmiem ġej bla ebda dubju taʼ xejn, avolja ma nistgħux ngħidu d-​data eżatta. F’dan ir-​rigward, innota l-​attitudnijiet li wrew iż-​żewġ gruppi taʼ xebbiet.

7. Il-​ħames xebbiet tal-​parabbola f’liema sens urew kemm kienu boloh?

⁷ Ġesù qal: “Ħamsa minnhom kienu boloh.” Kien dan għax ma kinux jemmnu li l-​għarus kien ġej? Marru huma jinħlew wara l-​pjaċiri? Jew ġew imqarrqin? L-​ebda waħda minn dawn. Ġesù qal li dawn il-​ħamsa “ħarġu . . . biex jilqgħu l-​għarus.” Kienu jafu li ġej, u riedu jkunu involuti, saħansitra biex jieħdu sehem fil-​“festa tat-​tieġ.” Madankollu, kienu ppreparati biżżejjed? Huma stennewh għal ftit tal-​ħin, san-​‘nofs tal-​lejl,’ imma ma kinux lesti għall-​wasla tiegħu fi kwalunkwe ħin li setgħet tiġi​—kemm jekk iktar kmieni jew iktar tard minn dak li stennew fil-​bidu.

8. Ħamsa mix-​xebbiet tal-​parabbola kif taw prova li kienu diskreti?

⁸ Il-​ħamsa l-​oħra​—dawk li Ġesù sejħilhom għaqlin—​ukoll ħarġu b’imsiebaħ mixgħulin, jistennew il-​wasla taʼ l-​għarus. Huma wkoll kellhom jistennew, imma kienu “għaqlin.” Il-​kelma Griega tradotta “għaqlin” tistaʼ ġġorr is-​sens taʼ li wieħed ikun “prudenti, sensibbli, għaref b’mod prattiku.” Dawn il-​ħamsa wrew li kienu għaqlin billi ġabu reċipjenti oħrajn biż-​żejt biex jekk ikun hemm bżonn jerġgħu jimlew l-​imsiebaħ tagħhom. Fil-​fatt, tant kienu qed jiffokaw fuq li jkunu lesti għall-​għarus li ma ridux jagħtu miż-​żejt tagħhom. Għassa bħal din ma kinitx taʼ xejn, bħalma ġie pprovat bil-​fatt li kienu preżenti u mħejjijin għalkollox meta wasal l-​għarus. Dawk li kienu “lesti daħlu miegħu għall-​festa tat-​tieġ, u l-​bieb ingħalaq.”

9, 10. X’inhu l-​punt tal-​parabbola tax-​xebbiet, u liema mistoqsijiet għandna nistaqsu lilna nfusna?

⁹ Ġesù ma kienx qed joffri lezzjoni dwar imġiba xierqa fit-​tiġijiet, lanqas ma kien qed jagħti parir dwar kif naqsmu dak li għandna maʼ xulxin. Il-​punt tiegħu kien: “[Ibqgħu] ishru, mela, għaliex la tafu l-​jum u lanqas is-​siegħa.” Staqsi lilek innifsek, ‘Qiegħed jien verament għassa rigward il-​preżenza taʼ Ġesù?’ Aħna nemmnu li Ġesù issa qiegħed isaltan fis-​sema, imma kemm aħna ffokati fuq ir-​realtà li ‘Bin il-​bniedem dalwaqt ġej fuq is-​sħab tas-​sema b’qawwa u glorja kbira’? (Mattew 24:30) Meta sar ‘nofs il-​lejl,’ il-​wasla taʼ l-​għarus ċertament li kienet eqreb minn meta x-​xebbiet kienu ħarġu jistennewh għall-​ewwel darba. Bl-​istess mod, il-​wasla taʼ Bin il-​bniedem biex jeqred is-​sistema mill-​agħar preżenti hija eqreb milli kienet meta bdejna għall-​ewwel darba nistennew b’ħerqa l-​miġja tiegħu. (Rumani 13:11-14) Żammejna aħna l-​għassa tagħna, waqt li noqogħdu saħansitra iktar għassa hekk kif dak iż-​żmien riesaq iktar qrib?

¹⁰ Li nobdu l-​kmand “[Ibqgħu] ishru” jirrikjedi għassa kontinwa. Ħames xebbiet ħallewh jispiċċalhom iż-​żejt u marru jixtru iktar. Kristjan illum għandu mnejn jiġi distratt bl-​istess mod, u b’hekk ma jkunx imħejji bis-​sħiħ għall-​wasla imminenti taʼ Ġesù. Dan ġara lil xi Kristjani fl-​ewwel seklu. Jistaʼ wkoll jiġri lil xi wħud illum. Għalhekk ejja nistaqsu lilna nfusna, ‘Dan qed jiġri lili?’—1 Tessalonikin 5:6-8; Lhud 2:1; 3:12; 12:3; Apokalissi 16:15.

Kun Bieżel hekk kif Joqrob it-​Tmiem

11. Ġesù liema parabbola ta wara, u din għal liema ħaġa kienet simili?

¹¹ Fil-​parabbola li ta wara, Ġesù għamel iktar milli ħeġġeġ lis-​segwaċi tiegħu biex joqogħdu għassa. Wara li tkellem dwar ix-​xebbiet għaqlin u dawk boloh, hu rrakkonta t-​tixbieha tat-​talenti. (Aqra Mattew 25:14-30.) Din f’ħafna aspetti tixbah lill-​parabbola taʼ qabel dwar il-​miniet, li Ġesù kien ta għaliex ħafna “kien mingħalihom li s-​Saltna taʼ Alla kienet se tidher minnufih.”—Luqa 19:11-27.

12. X’inhu l-​punt prinċipali tal-​parabbola tat-​talenti?

¹² Fil-​parabbola tat-​talenti, Ġesù rrakkonta dwar wieħed raġel li qabel ma siefer, bagħat għal tliet ilsiera. Lil wieħed fdalu ħames talenti, lill-​ieħor tnejn, u lil taʼ l-​aħħar wieħed biss​—“kull wieħed skond il-​ħila tiegħu.” X’aktarx li dan kien talent tal-​fidda, ammont stabbilit, li dakinhar kien jiswa daqs il-​paga li ħaddiem komuni kien jaqlaʼ f’14-il sena​—kemxa flus ġmielha! Meta dan ir-​raġel reġaʼ lura, talab rendikont mill-​ilsiera taʼ dak li kienu għamlu matul il-​‘ħafna żmien’ li kien ilu msiefer. L-​ewwel żewġ ilsiera kienu rdoppjaw dak li kien ġie fdat lilhom. Hu qal “sewwa,” wiegħed lil kull wieħed minnhom iktar responsabbiltà, u kkonkluda: “Idħol fl-​hena taʼ sidek.” Billi sostna li s-​sid kien wieħed li kien jistenna żżejjed minnu, l-​ilsir li kellu talent wieħed ma kienx ħaddem it-​talent tiegħu u qalaʼ profitt. Hu ħeba l-​flus, u lanqas biss indenja ruħu jitfagħhom il-​bank biex idaħħal l-​interessi. Is-​sid sejjaħlu “ħażin u għażżien” għax kien aġixxa kontra l-​interessi taʼ sidu. B’konsegwenza taʼ dan, it-​talent ittiħidlu, u ġie mitfugħ ’il barra fejn kien se ‘jkun hemm il-​biki tiegħu u t-​theżżiż taʼ snienu.’

13. Ġesù kif ta prova li kien bħas-​sid fil-​parabbola?

¹³ Għal darb’oħra d-​dettalji taʼ din il-​parabbola jistaʼ jkollhom sens simboliku. Per eżempju, Ġesù, li kien irrappreżentat mir-​raġel li siefer, kien se jħalli lid-​dixxipli tiegħu, imur fis-​sema, u jdum jistenna ħafna sakemm jirċievi l-​qawwa bħala sultan.b (Salm 110:1-4; Atti 2:34-36; Rumani 8:34; Lhud 10:12, 13) Għal darb’oħra, iżda, nistgħu naraw lezzjoni oħra jew prinċipju li lkoll kemm aħna nagħmlu tajjeb li napplikaw f’ħajjitna. X’inhi din?

14. Il-​parabbola tat-​talenti tenfasizza liema ħtieġa vitali?

¹⁴ Sew jekk it-​tama tagħna hija taʼ ħajja immortali fis-​sema jew dik taʼ ħajja taʼ dejjem fuq art magħmula ġenna, jidher ċar mill-​parabbola taʼ Ġesù li rridu nkunu qed nitħabtu f’attivitajiet Kristjani. Fil-​fatt, il-​messaġġ taʼ din il-​parabbola jistaʼ jinġabar f’kelma waħda: bżulija. L-​appostli stabbilew mudell minn Pentekoste tas-​sena 33 E.K. ’l hawn. Naqraw: “B’ħafna kliem ieħor [Pietru] tahom xhieda u wissiehom billi qalilhom: ‘Salvaw lilkom infuskom minn dan in-​nisel ħażin.’” (Atti 2:40-42) Xi profitt eċċellenti kellu taʼ l-​isforzi li għamel! Hekk kif oħrajn ngħaqdu maʼ l-​appostli fix-​xogħol taʼ l-​ippridkar Kristjan, huma wkoll ħabirku, bl-​aħbar tajba li kienet qed ‘tikber fid-​dinja kollha.’—Kolossin 1:3-6, 23; 1 Korintin 3:5-9.

15. B’liema mod speċjali għandna napplikaw il-​punt prinċipali tal-​parabbola tat-​talenti?

¹⁵ Żomm f’moħħok il-​kuntest taʼ din il-​parabbola​—profezija dwar il-​preżenza taʼ Ġesù. Għandna konferma biżżejjed li l-​pa·rou·siʹa taʼ Ġesù qegħda sseħħ u dalwaqt se tilħaq il-​quċċata. Ftakar fil-​konnessjoni li Ġesù għamel bejn it-​“tmiem” u x-​xogħol li l-​Kristjani jeħtieġ li jagħmlu: “Dan l-​Evanġelju tas-​Saltna jixxandar fid-​dinja kollha, biex il-​ġnus kollha jkollhom xhieda. Mbagħad jiġi t-​tmiem.” (Mattew 24:14) B’dan f’moħħna, lil liema tip taʼ lsir nixbhu aħna? Staqsi lilek innifsek: ‘Se jkun hemm għalfejn nikkonkludi li jien bħal dak l-​ilsir li ħeba dak li ġie fdat lilu, forsi waqt li ħa ħsieb taʼ l-​affarijiet persunali tiegħu? Jew jidher ċar li jien bħal dawk li kienu tajbin u leali? Ninsab jien riżolut biex naħtaf kull okkażjoni ħalli nżid l-​interessi tas-​Sid?’

Għassa u Biżlin Matul il-​Preżenza Tiegħu

16. Liema messaġġ għandhom għalik dawn iż-​żewġ parabboli li ddiskutejna?

¹⁶ Iva, minbarra t-​tifsira figurattiva u profetika tagħhom, dawn iż-​żewġ parabboli jippreżentawlna inkuraġġiment ċar minn fomm Ġesù nnifsu. Il-​messaġġ tiegħu huwa dan: Oqgħod għassa; kun bieżel, speċjalment meta jidher is-​sinjal tal-​pa·rou·siʹa taʼ Kristu. Dan huwa issa. Għalhekk ninsabu aħna tassew għassa u biżlin?

17, 18. Id-​dixxiplu Ġakbu liema parir ta rigward il-​preżenza taʼ Ġesù?

¹⁷ Ġakbu, ħu Ġesù mill-​omm, ma kienx fuq l-​Għolja taż-​Żebbuġ biex jismaʼ l-​profezija taʼ Ġesù; imma hu samaʼ biha iktar tard, u jidher ċar li fehem it-​tifsira tagħha. Hu kiteb: “Ħuti, stabru, sa ma jasal il-​Mulej. Ara, il-​bidwi joqgħod b’sabar kbir jistenna l-​frott għażiż taʼ l-​art, sa ma jieħu x-​xita bikrija u mwaħħra. Stabru intom ukoll; qawwu qalbkom, għax il-​miġja [“preżenza,” “NW”] tal-​Mulej hi fil-​qrib.” (Korsiv tagħna.)—Ġakbu 5:7, 8.

¹⁸ Wara li ta assiguranza li Alla se jgħaddi ġudizzju avvers fuq dawk li ma jużawx ir-​rikkezzi tagħhom tajjeb, Ġakbu ħeġġeġ lill-​Kristjani biex ma jitilfux il-​paċenzja waqt li jistennew sakemm Jehovah jaġixxi. Kristjan bla paċenzja jistaʼ jsir vendikattiv, bħallikieku hu nnifsu kellu jirranġa l-​affarijiet ħżiena li saru. Iżda dan m’għandux ikun, għaliex iż-​żmien tal-​ġudizzju żgur se jasal. L-​eżempju tal-​bidwi juri dan, bħalma spjega Ġakbu.

19. Bidwi Iżraelit setaʼ jeżerċita liema tip taʼ paċenzja?

¹⁹ Bidwi Iżraelit li żeraʼ ż-​żerriegħa kellu jistenna, l-​ewwel biex tibda tinbet, imbagħad biex ix-​xitla timmatura, u fl-​aħħar għall-​ħsad. (Luqa 8:5-8; Ġwann 4:35) Matul dawk ix-​xhur, kien hemm żmien u forsi raġuni għal xi ftit ansjetà. Kienet se tagħmel xita bikrija u tkun biżżejjed? Xi ngħidu għax-​xita mwaħħra? Jistgħu xi insetti jew xi maltempata joqtlu x-​xtieli? (Qabbel Ġoel 1:4; 2:23-25.) Xorta waħda, ġeneralment bidwi Iżraelit setaʼ jafda f’Jehovah u fiċ-​ċikli naturali li hu stabbilixxa. (Dewteronomju 11:14; Ġeremija 5:24) Il-​paċenzja tal-​bidwi tistaʼ tgħid kienet tammonta għal stennija fiduċjuża. Bil-​fiduċja kollha kien jaf li dak li kien qed jistenna kien se jiġi. Kienet ħaġa ċerta!

20. Kif nistgħu nuru l-​paċenzja fi qbil mal-​parir taʼ Ġakbu?

²⁰ Filwaqt li bidwi jistaʼ jkollu xi għarfien dwar meta se jkun il-​ħsad, il-​Kristjani taʼ l-​ewwel seklu ma setgħux jikkalkulaw meta kellha sseħħ il-​preżenza taʼ Kristu. Kienet ħaġa ċerta, iżda. Ġakbu kiteb: “Il-​[preżenza] [Grieg, pa·rou·siʹa] tal-​Mulej hi fil-​qrib.” Fiż-​żmien li Ġakbu kiteb dan il-​kliem, is-​sinjal tal-​preżenza taʼ Kristu fuq skala kbira, jew globali, kien għadu m’huwiex evidenti. Imma issa hu! Mela kif għandna nħossuna f’dan il-​perijodu? Is-​sinjal huwa attwalment viżibbli. Qed narawh. Nistgħu ngħidu b’ċertezza, ‘Qed nara s-​sinjal jitwettaq.’ Aħna nistgħu ngħidu b’fiduċja, ‘Il-​preżenza tal-​Mulej qegħda hawnhekk, u l-​quċċata tagħha hi fil-​qrib.’

21. Liema ħaġa aħna assolutament riżoluti li nagħmlu?

²¹ Ladarba l-​preżenza qegħda fil-​qrib, għandna raġuni ferm soda biex indaħħlu f’qalbna u napplikaw il-​lezzjonijiet fundamentali taż-​żewġ parabboli taʼ Ġesù li ddiskutejna. Hu qal: “[Ibqgħu] ishru, mela, għaliex la tafu l-​jum u lanqas is-​siegħa.” (Mattew 25:13) Bla ebda dubju taʼ xejn issa hu ż-​żmien għalina biex inkunu żelużi fis-​servizz Kristjan tagħna. Ejja kuljum nuru fil-​ħajja tagħna li nifhmuh il-​punt taʼ Ġesù. Ejja ngħassu! Ejja nishru!

[Noti taʼ taħt]

Tiftakar Int?

◻ Liema punt prinċipali ħadt int mill-​parabbola tax-​xebbiet għaqlin u boloh?

◻ Ġesù liema parir fundamentali qiegħed joffrilek permezz tal-​parabbola tat-​talenti?

◻ F’liema sens hija l-​paċenzja tiegħek relatata mal-​pa·rou·siʹa, bħal dik taʼ bidwi Iżraelit?

◻ Li tkun tgħix f’dan iż-​żmien għala huwa speċjalment eċċitanti u taʼ sfida?

[Stampi f’paġna 23]

Liema lezzjonijiet titgħallem int mill-​parabbola tax-​xebbiet u dik tat-​talenti?