Minkejja l-​Provi, Iggranfa mal-​Fidi Tiegħek!

“Ħuti, għoddu kollox b’ferħ meta tħabbtu wiċċkom maʼ kull xorta taʼ tiġrib.”—ĠAKBU 1:2.

1. In-​nies taʼ Jehovah jaqduh bil-​fidi u “bil-​ferħ u l-​qalb it-​tajba” minkejja xiex?

IN-​NIES taʼ Jehovah jaqduh bħala x-​Xhieda tiegħu b’fidi fih u “bil-​ferħ u l-​qalb it-​tajba.” (Dewteronomju 28:47; Isaija 43:10) Dan jagħmluh għalkemm ikunu għaddejjin minn ħafna provi. Minkejja t-​tbatijiet tagħhom, huma jiksbu faraġ fil-​kliem: “Ħuti, għoddu kollox b’ferħ meta tħabbtu wiċċkom maʼ kull xorta taʼ tiġrib, għax għandkom tkunu tafu li t-​tiġrib tal-​fidi tagħkom inissel is-sabar.”—Ġakbu 1:2, 3.

2. X’inhu magħruf dwar il-​kittieb taʼ l-​ittra taʼ Ġakbu?

² Dik l-​istqarrija nkitbet madwar is-​sena 62 E.K. mid-​dixxiplu Ġakbu, ħu Ġesù Kristu mill-​omm. (Mark 6:3) Ġakbu kien anzjan fil-​kongregazzjoni taʼ Ġerusalemm. Fil-​fatt, hu, Kefa (Pietru), u Ġwanni “kienu meqjusin bħala l-​kolonni”​—sisien sodi u b’saħħithom tal-​kongregazzjoni. (Galatin 2:9) Meta l-​kwistjoni taċ-​ċirkonċiżjoni ġiet ippreżentata lill-​“appostli u l-​presbiteri” madwar is-​sena 49 E.K., Ġakbu għamel proposta bbażata fuq l-​Iskrittura u din ġiet adottata minn dik il-​ġemgħa li tiggverna taʼ l-​ewwel seklu.—Atti 15:6-29.

3. X’kienu xi problemi li l-​Kristjani taʼ l-​ewwel seklu ffaċċjaw, u kif nistgħu nieħdu l-​benefiċċju massimu mill-​ittra taʼ Ġakbu?

³ Ġakbu, bħala ragħaj spiritwali li kien jimpurtah minn ħutu, ‘għarafhom sewwa lin-​nagħaġ.’ (Proverbji 27:23) Hu rrealizza li dak in-​nhar il-​Kristjani kienu qed jiffaċċjaw provi qliel. Xi wħud kellhom bżonn ibiddlu mill-​ġdid il-​ħsieb tagħhom, peress li kienu qed jagħmlu preferenzi maʼ l-​għonja. Għal xi wħud minnhom, il-​qima kienet sempliċement formalità. Xi wħud kienu qed jagħmlu l-​ħsara bl-​ilsien twil tagħhom. Spirtu dinji kien qed iħalli effetti taʼ ħsara, u ħafna la kienu paċenzjużi u lanqas kienu jitolbu. Fil-​fatt ċerti Kristjani kienu mardu spiritwalment. L-​ittra taʼ Ġakbu tindirizza dawn il-​kwistjonijiet b’manjiera edifikanti, u l-​pariri tiegħu huma prattiċi llum daqs kemm kienu fl-​ewwel seklu E.K. Nibbenefikaw bil-​kbir jekk inqisu din l-​ittra bħala li nkitbet għalina personalment.a

Meta Nġarrbu Xi Provi

4. Kif għandna nqisuhom il-​provi?

⁴ Ġakbu jurina kif għandna nqisuhom il-​provi. (Ġakbu 1:1-4) Fil-​waqt li ma jsemmix il-​fatt li jiġi mill-​Iben t’Alla, hu b’umiltà jsejjaħ lilu nnifsu “qaddej taʼ Alla u tal-​Mulej Ġesù Kristu.” Ġakbu jikteb “lit-​tnax-il tribù” taʼ Iżrael spiritwali “mxerrda” fil-​bidu minħabba l-​persekuzzjoni. (Atti 8:1; 11:19; Galatin 6:16; 1 Pietru 1:1) Bħala Kristjani, aħna wkoll niġu ppersegwitati, u nħabbtu wiċċna “maʼ kull xorta taʼ tiġrib.” Imma jekk niftakru li meta nissaportu l-​provi l-​fidi tagħna tissaħħaħ, se ‘ngħoddu kollox b’ferħ’ meta dawn jiġu fuqna. Jekk inżommu l-​integrità tagħna lejn Alla meta nġarrbu xi provi, dan se jġibilna ferħ dejjiemi.

5. Il-​provi tagħna x’jistgħu jinkludu, u x’jiġri meta jirnexxilna nissaportuhom?

⁵ Il-​provi tagħna jinkludu l-​iżventuri li jiġu fuq kulħadd. Per eżempju, il-​mard għandu mnejn jgħakkisna. Alla m’huwiex qed iwettaq fejqan mirakoluż f’dan iż-​żmien, imma jwieġeb it-​talb tagħna għall-​għerf u l-​qawwa meħtieġa biex niffaċċjaw il-​marda. (Salm 41:2-4 [Salm 41:1-3, New World Translation]) Aħna nsofru wkoll minħabba t-​tjieba bħala Xhieda ppersegwitati taʼ Jehovah. (2 Timotju 3:12; 1 Pietru 3:14) Meta jirnexxilna nissaportu provi bħal dawn, il-​fidi tagħna tkun ittestjata u ‘mġarrba.’ U meta tittrijonfa l-​fidi tagħna, dan “inissel is-​sabar.” Fidi msaħħa mill-​provi mbagħad se tgħinna nissaportu tiġrib ieħor.

6. Kif inhu li ‘s-​sabar ikollu l-​milja tiegħu fina,’ u liema passi prattiċi jistgħu jittieħdu meta nkunu għaddejjin minn xi prova?

⁶ Ġakbu jgħid: “Ħallu li s-​sabar ikollu l-​milja tiegħu fikom.” Jekk nissaportu xi prova mingħajr ma nipprovaw intemmuha malajr permezz taʼ xi mezzi mhux Skritturali, is-​sabar se jwettaq il-​“milja” tiegħu billi jagħmilna sħaħ bħala Kristjani, mhux neqsin mill-​fidi. M’għandniex xi ngħidu, jekk prova tikxef xi dgħjufija, għandna nfittxu l-​għajnuna taʼ Jehovah biex din negħlbuha. Xi ngħidu jekk il-​prova hi t-​tentazzjoni li nieħdu sehem f’immoralità sesswali? Ejjew nitolbu dwar dik il-​problema u mbagħad naġixxu fi qbil mat-​talb tagħna. Forsi jkollna nbiddlu l-​impjieg tagħna jew nieħdu xi passi oħra biex inżommu l-​integrità tagħna lejn Alla.—Ġenesi 39:7-9; 1 Korintin 10:13.

It-​Tfittxija Għall-​Għerf

7. Kif nistgħu niġu megħjunin inkampaw mal-​provi?

⁷ Ġakbu jurina x’għandna nagħmlu jekk ma nkunux nafu kif inkampaw maʼ xi prova. (Ġakbu 1:5-8) Jehovah ma jċanfarniex jekk jonqosna l-​għerf u nitolbu għalih bil-​fidi. Hu jgħinna nħarsu kif jixraq lejn il-​prova u nissaportuha. Għandu mnejn tinġibed l-​attenzjoni tagħna lejn xi skritturi minn xi adoraturi sħabna jew matul xi studju tal-​Bibbja. Il-​mod kif Alla jimmanuvra l-​affarijiet jistaʼ jgħinna naraw x’għandna nagħmlu. Nistgħu niġu ggwidati mill-​ispirtu t’Alla. (Luqa 11:13) Biex ingawdu dawn il-​benefiċċji, m’għandniex xi ngħidu, irridu nżommu qrib t’Alla u tal-​poplu tiegħu.—Proverbji 18:1.

8. Wieħed li jiddubita kif ma se jirċievi xejn mingħand Jehovah?

⁸ Jehovah jagħtina l-​għerf biex inkampaw mal-​provi jekk ‘nitolbu bil-​fidi, bla ma nitħassbu xejn.’ Min jiddubita “jixbah lill-​mewġ tal-​baħar imqanqal u mqalleb bir-​riħ” u ma tistax tiħodlu kopja. Jekk inkunu daqshekk spiritwalment instabbli, ‘m’għandniex nistennew li se naqilgħu xi ħaġa mingħand il-​Mulej.’ Ejjew ma nkunux ‘mifxulin fina nfusna’ u ‘mhux żguri’ dwar dak li nitolbu jew dwar affarijiet oħrajn. Minflok, ejjew nuru fidi f’Jehovah, is-​Sors taʼ l-​għerf.—Proverbji 3:5, 6.

Għonja u Fqar Jistgħu Jifirħu

9. Għala għandna raġuni għall-​ferħ bħala adoraturi taʼ Jehovah?

⁹ Anki jekk il-​faqar hu waħda mill-​provi tagħna, ejjew inżommu f’moħħna li l-​Kristjani kollha, għonja jew foqra, jistgħu jifirħu. (Ġakbu 1:9-11) Qabel ma saru segwaċi taʼ Ġesù, il-​biċċa l-​kbira mill-​midlukin ma kinux sinjuri u kienu mistmerra mid-​dinja. (1 Korintin 1:26) Imma huma setgħu jifirħu minħabba ‘li Alla għolliehom’ għall-​pożizzjoni taʼ werrieta tas-​Saltna. (Rumani 8:16, 17) Mill-​banda l-​oħra, nies għonja li darba kienu onorati jġarrbu l-​“umiljazzjoni” bħala segwaċi taʼ Kristu minħabba li huma mistmerra mid-​dinja. (Ġwann 7:47-52; 12:42, 43) Bħala qaddejja taʼ Jehovah, madankollu, ilkoll kemm aħna nistgħu nifirħu għaliex għana materjali u pożizzjoni għolja ma jiswew xejn meta tqabbilhom maʼ l-​għana spiritwali li ngawdu. U kemm aħna grati li fostna m’hemm ebda post għal kburija fejn tidħol qagħda soċjali!—Proverbji 10:22; Atti 10:34, 35.

10. Kristjan kif għandu jħares lejn il-​ġid materjali?

¹⁰ Ġakbu jgħinna naraw li ħajjitna ma tiddependix mill-​ġid u l-​kisbiet materjali. Bħalma l-​ġmiel taʼ fjura ma jistax iżommha milli tmut ‘fis-​sħana tax-​xemx tisreġ,’ hekk ukoll l-​għana taʼ wieħed sinjur ma jistax itawwallu ħajtu. (Salm 49:7-10 [Salm 49:6-9, NW]; Mattew 6:27) Għandu mnejn imut waqt li jkun qed jiġri wara xi ħaġa li ‘jmidd għonqu għaliha,’ forsi fin-​negozju. Għaldaqstant, l-​iktar ħaġa importanti hi li ‘nistagħnew quddiem Alla’ u li nagħmlu kulma nistgħu biex inġibu ’l quddiem l-​interessi tas-​Saltna.—Luqa 12:13-21; Mattew 6:33; 1 Timotju 6:17-19.

Henjin Dawk Li Jissaportu L-​Provi

11. Xi prospetti għandhom dawk li jiggranfaw mal-​fidi tagħhom minkejja l-​provi?

¹¹ Għonja jew foqra, nistgħu nkunu henjin biss jekk il-​provi tagħna nissaportuhom. (Ġakbu 1:12-15) Jekk nissaportu l-​provi b’fidi bla mittiefsa, nistgħu niġu ddikjarati henjin, għax hemm ferħ f’li nagħmlu dak li hu sewwa f’għajnejn Alla. Billi jiggranfaw mal-​fidi tagħhom sal-​mewt, Kristjani mnisslin bl-​ispirtu jirċievu “l-​kuruna tal-​ħajja,” immortalità fis-​smewwiet. (Apokalissi 2:10; 1 Korintin 15:50) Jekk nittamaw li ngħixu fuq l-​art u nżommu l-​fidi tagħna f’Alla, nistgħu nħarsu ’l quddiem lejn ħajja taʼ dejjem fuq art magħmula ġenna. (Luqa 23:43; Rumani 6:23) Kemm hu twajjeb Jehovah lejn dawk kollha li jeżerċitaw fidi fih!

12. Meta nġarrbu xi żventura, għala m’għandniex ngħidu: “Alla qiegħed iġarrabni”?

¹² Huwa possibbli li Jehovah nnifsu jipprovana billi jibagħtilna xi żventura? Le, m’għandniex ngħidu: “Alla qiegħed iġarrabni.” Jehovah mhux qed jipprova jħajjarna nidinbu imma żgur li jgħinna u jagħtina l-​qawwa meħtieġa biex nissaportu l-​provi jekk nibqgħu sodi fil-​fidi. (Filippin 4:13) Alla hu qaddis, u għalhekk ma jpoġġiniex f’ċirkostanzi li jdgħajfu r-​reżistenza tagħna għal dak li hu ħażin. Jekk nidħlu f’sitwazzjoni mhux qaddisa u nikkommettu xi dnub, m’għandniex inwaħħlu fih, “għax Alla ma jistax jiġġarrab għall-​ħażin, u anqas m’hu se jġarrab lil ħadd.” Għalkemm Jehovah forsi jippermetti xi prova biex jiddixxiplinana għall-​ġid tagħna, hu ma jipprovaniex bi skop ħażin. (Lhud 12:7-11) Satana għandu mnejn jittantana biex nagħmlu l-​ħażen, imma Alla jistaʼ jeħlisna minn dak il-​wieħed ħażin.—Mattew 6:13.

13. X’jistaʼ jiġri jekk xewqa ħażina ma nwarrbuhiex malajr?

¹³ Għandna bżonn nitolbu dejjem għaliex xi sitwazzjoni għandha mnejn twassal għal xewqa ħażina li tistaʼ tħajjarna nidinbu. Ġakbu jgħid: “Kull bniedem imġarrab jinġibed u jitħajjar mill-​passjoni tiegħu stess.” Ma nistgħux inwaħħlu f’Alla għad-​dnub tagħna jekk inkunu ħallejna ’l qalbna tberren fuq xi xewqa ħażina. Jekk ix-​xewqa ħażina ma nwarrbuhiex malajr, din ‘titnissel,’ tikber fil-​qalb, u “tiled id-​dnub.” Meta jsir id-​dnub, dan “iġib il-​mewt.” M’għandniex xi ngħidu, irridu ngħassu ’l qlubna u nirreżistu inklinazzjonijiet midinba. (Proverbji 4:23) Kajjin ġie mwissi li d-​dnub kien se jegħlbu, imma hu ma rreżistiex. (Ġenesi 4:4-8) Mela, allura, xi ngħidu jekk inkunu bdejna nsusu wara korsa mhix skritturali? Żgur li għandna nkunu grati jekk l-​anzjani Kristjani jipprovaw jikkorreġuna biex ma nidinbux kontra Alla.—Galatin 6:1.

Alla​—Is-​Sors Taʼ Kull Ħaġa Tajba

14. F’liema sens jistaʼ jingħad li l-​għotjiet t’Alla huma ‘perfetti’?

¹⁴ Irridu niftakru li Jehovah hu s-​Sors, mhux tal-​provi, imma t’affarijiet tajbin. (Ġakbu 1:16-18) Ġakbu jindirizza lill-​adoraturi sħabu bħala “aħwa għeżież” u juri li Alla hu d-​Donatur taʼ “kull ħaġa tajba li tingħata u kull don perfett.” L-​għotjiet spiritwali u materjali taʼ Jehovah huma ‘perfetti,’ jew sħaħ, ma jonqoshom xejn. Dawn jiġu “mis-​sema,” mill-​post fejn jgħammar Alla fis-​smewwiet. (1 Slaten 8:39) Jehovah hu “l-​Missier, l-​għajn tad-​dawl [“dwal ċelestjali,” NW]”​—ix-​xemx, il-​qamar, u l-​kwiekeb. Hu jagħtina wkoll dawl spiritwali u verità. (Salm 43:3; Ġeremija 31:35; 2 Korintin 4:6) Kuntrarju għax-​xemx li tbiddel id-​dellijiet hekk kif titħarrek u tkun fl-​aqwa tagħha biss f’nofs in-​nhar, Alla dejjem fl-​aqwa tiegħu biex jipprovdi dak li hu tajjeb. Hu żgur li jagħtina dak li għandna bżonn biex niffaċċjaw il-​provi jekk napprofittaw ruħna mill-​provvedimenti spiritwali tiegħu provduti permezz tal-​Kelma tiegħu u tal-​“qaddej fidil u għaqli.”—Mattew 24:45.

15. Liema hi waħda mill-​aqwa għotjiet taʼ Jehovah?

¹⁵ Liema kienet waħda mill-​aqwa għotjiet t’Alla? It-​tnissil taʼ wlied spiritwali bi spirtu qaddis, li ħadem flimkien maʼ l-​aħbar tajba, jew il-​“kelma tal-​verità.” Dawk li jġarrbu twelid spiritwali huma “ċertu l-​ewwel frott” (NW), magħżulin minn fost il-​bnedmin biex ikunu “Saltna u Qassisin” fis-​sema. (Apokalissi 5:10; Efesin 1:13, 14) Ġakbu għandu mnejn kellu f’moħħu l-​ewwel frott tax-​xgħir offrut fis-​16 taʼ Nisan, li kienet id-​data meta Ġesù ġie rxoxtat, u l-​offerta taʼ żewġ ħobżiet tal-​qamħ f’jum Pentekoste, meta tferraʼ l-​ispirtu qaddis. (Levitiku 23:4-11, 15-17) F’dak il-​każ, Ġesù jkun l-​ewwel frott u l-​werrieta sħabu “ċertu l-​ewwel frott.” Xi ngħidu jekk għandna tama għall-​art? Sewwa, li nżommu dan f’moħħna se jgħinna niggranfaw mal-​fidi tagħna fid-​Donatur taʼ “kull ħaġa tajba,” li għamilha possibbli li niksbu l-​ħajja taʼ dejjem taħt il-​ħakma tas-​Saltna.

Kun Wieħed Minn “Dawk Li Jagħmlu L-​Kelma”

16. Għala għandna nkunu ‘ħfief biex nisimgħu imma tqal biex nitkellmu u biex ninkorlaw’?

¹⁶ Kemm jekk qegħdin inġarrbu provi tal-​fidi tagħna issa stess u kemm jekk le, irridu nkunu “dawk li jagħmlu l-​kelma.” (Ġakbu 1:19-25) Irridu nkunu ‘ħfief biex nisimgħu’ l-​kelma t’Alla, billi nkunu ubbidjenti f’li nagħmluha. (Ġwann 8:47) Mill-​banda l-​oħra, ejjew inkunu ‘tqal biex nitkellmu,’ billi niżnu kliemna bir-​reqqa. (Proverbji 15:28; 16:23) Ġakbu għandu mnejn qed iħeġġiġna biex ma nkunux ħfief biex ngħidu li l-​provi tagħna ġejjin mingħand Alla. Niġu mwissijin ukoll biex inkunu ‘tqal biex ninkorlaw; għax bniedem inkorlat ma jagħmilx il-​ġustizzja t’Alla.’ Jekk xi ħadd jgħidilna xi ħaġa li tirrabjana, ejjew inżommu lura sabiex ma nwiġbux b’mod vendikattiv. (Efesin 4:26, 27) Spirtu taʼ korla li jistaʼ joħloqilna l-​problemi u jsir taʼ prova għal oħrajn ma jistax jipproduċi dak li teħtieġ minna l-​fidi f’Alla tagħna taʼ tjieba. Barra minn dan, jekk aħna ‘nimxu b’għaqal kbir,’ se nkunu ‘tqal biex ninkorlaw,’ u ħutna rġiel u nisa se jinġibdu lejna.—Proverbji 14:29.

17. X’jitwettaq bit-​tneħħija tal-​ħażen mill-​qalb u mill-​moħħ?

¹⁷ Żgur li għandna bżonn inkunu ħielsa minn “kull ma hu mniġġes”​—dak kollu li Alla jistmerru u li jqanqal il-​korla. Iktar minn hekk, irridu ‘nneħħu kull fdal taʼ ħażen.’ Ilkoll kemm aħna għandna neliminaw minn ħajjitna kwalunkwe nuqqas taʼ ndafa fil-​laħam u fl-​ispirtu. (2 Korintin 7:1; 1 Pietru 1:14-16; 1 Ġwann 1:9) It-​tneħħija tal-​ħażen minn qalbna u minn moħħna għenitna biex ‘nilqgħu bil-​ħlewwa l-​kelma tal-​verità mħawla fina.’ (Atti 17:11, 12) Ilna kemm ilna Kristjani, irridu nibqgħu nħallu iktar verità Skritturali titħawwel fina. Għala? Għax bl-​ispirtu t’Alla, il-​kelma mħawla tipproduċi “l-​bniedem il-​ġdid” li jasal għas-​salvazzjoni.—Efesin 4:20-24.

18. Wieħed li hu biss semmiegħ tal-​kelma kif inhu differenti minn dak li l-​kelma jagħmilha wkoll?

¹⁸ Kif nuru li l-​kelma hi l-​gwida tagħna? Billi nkunu ubbidjenti biex ‘nagħmlu l-​kelma, u mhux nisimgħuha biss.’ (Luqa 11:28) “Dawk li jagħmlu l-​kelma” għandhom fidi li tipproduċi xogħlijiet bħalma huma attività żeluża fil-​ministeru Kristjan u parteċipazzjoni regulari fil-​laqgħat tal-​poplu t’Alla. (Rumani 10:14, 15; Lhud 10:24, 25) Wieħed li hu sempliċi semmiegħ tal-​kelma “[j]kun bħal bniedem li jara f’mera l-​wiċċ li bih twieled.” Hu jagħti titwila, imbagħad jitlaq u jinsa dwar x’kien forsi meħtieġ biex jirranġa d-​dehra tiegħu. Bħala “dawk li jagħmlu l-​kelma,” aħna nistudjaw bir-​reqqa u nobdu “l-​liġi perfetta” t’Alla, li tkopri dak kollu li hu jitlob minna. Il-​ħelsien li b’hekk ingawdu hu preċiż l-​oppost tal-​jasar għad-​dnub u l-​mewt, għax dan iwassal għall-​ħajja. Mela ejjew ‘inżommu sħiħ mal-​liġi perfetta,’ billi kontinwament ngħarbluha u nobduha. U aħseb ftit! Bħala ‘dawk li jagħmlu x-​xogħol, u mhux semmiegħa li jinsew,’ aħna għandna l-​ferħ li jiġi mill-​favur t’Alla.—Salm 19:8-12 [Salm 19:7-11, NW].

Bil-​Wisq Iżjed Minn Adoraturi Formali

19, 20. (a) Skond Ġakbu 1:26, 27, il-​qima safja x’tirrikjedi minna? (b) Liema huma xi eżempji taʼ qima bla tinġis?

¹⁹ Jekk irridu ngawdu favur divin, irridu niftakru li l-​qima vera m’hijiex sempliċement formalità. (Ġakbu 1:26, 27) Aħna forsi naħsbu li aħna aċċettati bħala adoraturi ‘tajbin’ taʼ Jehovah, imma hi l-​istima tiegħu dwar kull wieħed minna li verament tgħodd. (1 Korintin 4:4) Difett serju wieħed jistaʼ jkun li nonqsu li ‘nrażżnu lsienna.’ Inkunu qed nitqarrqu jekk naħsbu li Alla kuntent bil-​qima tagħna jekk aħna nimmalafamaw lil oħrajn, nigdbu, jew nużaw ilsienna ħażin b’modi oħrajn. (Levitiku 19:16; Efesin 4:25) Żgur li ma rridux li “t-​tjieba [“forma taʼ qima,” NW]” tagħna tkun “fiergħa” u mhix aċċettata minn Alla għal xi raġuni jew oħra.

²⁰ Għalkemm Ġakbu ma jsemmix kull aspett tal-​qima safja, hu jgħid li din tinkludi li “żżur l-​iltiema u r-​romol fl-​hemm tagħhom.” (Galatin 2:10; 6:10; 1 Ġwann 3:18) Il-​kongregazzjoni Kristjana tieħu interess speċjali biex tipprovdi għar-​romol. (Atti 6:1-6; 1 Timotju 5:8-10) Ladarba Alla huwa l-​Protettur taʼ l-​armla u taʼ l-​iltim, ejjew nikkoperaw Miegħu billi nagħmlu dak li nistgħu biex ngħinuhom spiritwalment u materjalment. (Dewteronomju 10:17, 18) Qima safja tfisser ukoll li “żżomm ruħek bla tinġis ’il bogħod mid-​dinja,” is-​soċjetà umana bla tjieba li qiegħda taħt il-​poter taʼ Satana. (Ġwann 17:16; 1 Ġwann 5:19) Għalhekk, ħalli nibqgħu ħelsin mill-​kondotta taʼ mingħajr Alla li għandha d-​dinja biex b’hekk inkunu nistgħu nigglorifikaw lil Jehovah u nintużaw fis-​servizz tiegħu.—2 Timotju 2:20-22.

21. F’dak li għandu x’jaqsam maʼ l-​ittra taʼ Ġakbu, liema mistoqsijiet oħrajn jistħoqqilhom li nikkunsidrawhom?

[Nota taʼ taħt]

Kif Twieġeb Int?

◻ X’se jgħinna nissaportu l-​provi?

◻ Minkejja l-​provi, il-​Kristjani għala jistgħu jifirħu?

◻ Kif nistgħu nkunu dawk li jagħmlu l-​kelma?

◻ X’tinvolvi l-​qima safja?

[Stampi f’paġna 7]

“Dawk li jagħmlu l-​kelma,” qegħdin jipproklamaw is-​Saltna t’Alla mad-​dinja kollha