Xi Ħaġa Aħjar mill-​Kosmetiċi

WARA li rrefera għat-​“tiżjin” li n-​nisa kienu jużaw biex jidhru isbaħ, l-​appostlu Pietru wissa: “Imma ħa jkun tiżjin minn ġewwa, il-​bniedem moħbi fil-​qalb, dak li ma jitħassarx, imżejjen bi spirtu ġwejjed taʼ sliem, u li hu prezzjuż ħafna quddiem Alla.”—1 Pietru 3:4, Karm Żammit.

Taʼ interess, meta l-​appostlu kiteb dwar tiżjin taʼ barra bħal dan, hu uża forma tal-​kelma Griega koʹsmos, li hi wkoll l-​għerq tal-​kelma Maltija “kosmetiċi,” li tfisser “magħmulin għas-​sbuħija sp[eċjalment] tal-​ġilda.” Kien Pietru qed jipprojbixxi lin-​nisa Kristjani mill-​użu taʼ kosmetiċi u għajnuniet tas-​sbuħija simili oħrajn? Il-​Kelma t’Alla ma tissuġġeriha mkien din il-​ħaġa. Pjuttost, din il-​kwistjoni tħalliha f’idejn l-​individwu, u għalhekk nistgħu nistennew ammont taʼ varjazzjonijiet fil-​gosti.

Madankollu, jekk il-​kosmetiċi jiġu applikati b’mod esaġerat, jew f’ammont li jdejjaq lil ħafna oħrajn, dan x’impressjoni jkun qed jagħti? Mhux waħda qarsa, aggressiva, taʼ tlellix, taʼ ftaħir, jew egoċentrika? Tabilħaqq, dan lill-​mara jistaʼ jagħmilha tidher ħamalla, u forsi jagħti impressjoni ħażina rigward il-​kwalitajiet morali tagħha.—Qabbel Eżekjel 23:36-42.

B’rikonoxximent taʼ dan, mara ‘li qed tgħid li tivvenera lil Alla’ se tħabrek, jekk tagħżel li tapplika l-​kosmetiċi, sabiex wiċċha jirrivela l-​karatteristiċi taʼ l-​għaqal, il-​ħlewwa, it-​tjieba, u l-​modestja. Kwalitajiet bħal dawn se jżidulha l-​grazzja u l-​għaxqa. Fil-​fatt, kemm jekk tagħżel li tuża l-​kosmetiċi u kemm jekk le, hi se turi dinjità u sbuħija minn ġewwa. Dan se jirrifletti l-​għarfien tagħha li, kif jindika l-​kliem taʼ Pietru kkwotat fil-​bidu, hemm xi ħaġa aħjar mill-​kosmetiċi.—1 Timotju 2:9, 10, NW.