Mistoqsijiet mill-​Qarrejja

Fl-​1 Pietru 4:3 (NW) naqraw li xi Kristjani xi darba kienu ħadu sehem f’“idolatriji illegali.” Mhux l-​idolatriji kollha huma illegali, kundannati u projbiti minn Alla?

Iva, fil-​ħarsa t’Alla, l-​idolatrija kollha hija illegali. Dawk li qegħdin ifittxu l-​favur tiegħu ma jistgħux jipprattikaw l-​idolatrija.—1 Korintin 5:11; Apokalissi 21:8.

Madankollu, donnu jidher li l-​appostlu Pietru kien qed jirreferi għall-​idolatrija minn angolu differenti. Raġuni waħda hi li fost ħafna ġnus tal-​qedem, l-​idolatrija mhux biss kienet komuni imma wkoll mingħajr rażna legali mill-​awtoritajiet. Jiġifieri, il-​liġi tal-​pajjiż ma kinitx tipprojbixxi din l-​idolatrija. Xi idolatrija kienet saħansitra parti mill-​politika nazzjonali jew governattiva. F’dan is-​sens, xi wħud kienu ħadu sehem f’‘idolatriji mingħajr rażna legali’ qabel ma saru Kristjani. (New World Translation, edizzjoni taʼ l-​1950) Per eżempju, jistaʼ jiġi notat li s-​Sultan Babiloniż Nabukodonosor waqqaf xbieha idolatruża tad-​deheb, imma Sidrak, Mesak, u Għabednegu, il-​qaddejja taʼ Jehovah, irrifjutaw li jqimuha.—Danjel 3:​1-12.

Raġuni oħra hi li ħafna riti idolatrużi kienu jinkludu atti li kienu kuntrarji għall-​aħħar għal kull liġi naturali jew sens morali li joriġina mill-​kuxjenza li biha jitwieled kull bniedem. (Rumani 2:​14, 15) L-​appostlu Pawlu kiteb dwar prattiċi baxxi li kienu “kontra n-​natura” u “bla ġieħ,” u dawn spiss ġew stabbiliti fir-​riti reliġjużi. (Rumani 1:​26, 27) L-​irġiel u n-​nisa li kienu qed jieħdu sehem f’idolatrija illegali kienu qed imorru kontra s-​sens naturali tagħhom taʼ dak li hu tajjeb u ħażin. Ċertament li kien xieraq illi dawk li jsiru Kristjani jitilqu dawn il-​prattiċi korrotti.

Barra dak li għedna, dawn l-​idolatriji li kienu komuni fost dawk li ma kinux Lhud kienu kundannati minn Alla Jehovah. B’hekk, kienu kontra l-​liġi.a—Kolossin 3:​5-7.

[Nota taʼ taħt]