Kunu Moħħkom f’Loku Hekk Kif Joqrob it-​Tmiem

¹ Il-​Kelma t’Alla spiss tiddeskrivi l-​jum taʼ Jehovah bħala li ġej “bħal ħalliel”—jiġifieri, ġej għal għarrieda, f’daqqa waħda, bil-​moħbi. (1 Tess. 5:2; Mt. 24:43; 2 Pt. 3:10; Apk. 3:3; 16:15) Dwar dan, Ġesù qal: “Mela kunu lesti intom ukoll, għax qatt ma tistgħu tobsru s-​siegħa li fiha jiġi Bin il-​bniedem.” (Mt. 24:44) Kif nistgħu nibqgħu mqajmin spiritwalment hekk kif joqrob it-​tmiem? Mod wieħed kif jistaʼ jirnexxilna jinsab fil-​parir ispirat: “Kunu għaqlin [“moħħkom f’loku,” New World Translation].”—1 Pt. 4:7.

² Biex ikollok moħħ f’loku trid tara l-​affarijiet mill-​ħarsa taʼ Jehovah. (Efes. 5:17) Dan se jgħinna naraw lilna nfusna bħala “barranin u għorba” qalb is-​sistema preżenti t’affarijiet. (1 Pt. 2:11) Se jgħinna wkoll nagħrfu x’inhu verament importanti, x’jiġi l-​ewwel, u nieħdu deċiżjonijiet tajbin.—Flp. 1:10.

³ Agħmel Miri Spiritwali: Meta nagħmlu miri spiritwali u niksbuhom se niġu megħjunin inkunu moħħna f’loku. Għandek miri spiritwali li qed tipprova tikseb bħalissa? Qed tistinka biex taqra l-​Bibbja kuljum, tattendi l-​laqgħat Kristjani kollha, taqra kull ħarġa tat-​Torri taʼ l-​Għassa u Stenbaħ!, jew forsi żżid is-​sehem tiegħek fil-​ministeru? Jekk tagħmel miri li huma addattati għalik, tagħmel ħiltek biex tilħaqhom, u titlob lil Jehovah biex ibierek l-​isforzi tiegħek, għandek mnejn tibqaʼ skantat bir-​riżultati.

⁴ Ċertu anzjan staqsa lil koppja żagħżugħa dwar il-​miri spiritwali tagħhom. Il-​mistoqsija tiegħu ġagħlithom jirrealizzaw li jekk jissimplifikaw ħajjithom u jeħilsu għalkollox mid-​dejn li kienu mgħobbijin bih, huma setgħu jaqdu bħala pijunieri. Iddeċidew li jagħmluha l-​mira tagħhom. Ħabirku biex iħallsu d-​dejn u sabu modi kif inaqqsu l-​attivitajiet li ma kinux neċessarji u li kienu qed jiħdulhom mill-​ħin u l-​enerġija tagħhom. Eżatt sena wara, kienu laħqu l-​mira tagħhom. B’liema riżultat? Ir-​raġel jgħid: “Li kieku ma kinux il-​miri ma konniex naslu safejn wasalna. Ninsabu iktar kuntenti. Ħajjitna hija iktar trankwilla u isbaħ. Hija verament mimlija skop u sinifikanti.”

⁵ Hekk kif nistennew il-​jum taʼ Jehovah, jalla nibqgħu mqajmin spiritwalment billi ngħixu b’moħħ f’loku, u nibqgħu konċentrati fuq li nagħmlu r-​rieda t’Alla.—Titu 2:​11-13.